Soportal dos rapaces

Rapaces

» Representantes de GÁLIX reúnense por vez primeira co novo Director Xeral de Promoción e Difusión da Cultura

» Kalandraka Editora e a asociación BATA preparan novos títulos da colección Makakiños

Representantes de GÁLIX reúnense por vez primeira co novo Director Xeral de Promoción e Difusión da Cultura

Gálix reúnese co director xeral de Promoción e Difusión da Cultura (13-07-2009) Representantes de GÁLIX reuníronse o pasado venres co director xeral de Promoción e Difusión da Cultura Francisco López Barxas para avanzar na colaboración respecto á recollida, promoción e execución de iniciativas que fomenten a difusión da literatura infantil e xuvenil.

O director xeral López Barxas comprometeuse co sector a colaborar na elaboración do Catálogo Anual de libros infantís e xuvenís galegos, co fin de ser presentados na Feira Infantil de Bolonia (Italia) en marzo do 2010, a máis importante do mundo do sector das letras infantís. Dende a Dirección Xeral subliñouse a importancia deste tipo de feiras internacionais por ser o foro "onde proxectamos ao mundo a nosa creación, e constitúe unha importante oportunidade para a difusión das obras de literatura infantil e xuvenil das diferentes editoriais galegas".

A Consellería de Cultura e Turismo traballará con GÁLIX para garantir a promoción "da mellor produción de literatura infantil e xuvenil galega" na prestixiosa Biblioteca da Xuventude de Múnic (Alemaña). O ano pasado, Galicia logrou aportar tres libros a este arquivo, referencia internacional no eido dos libros infantís e xuvenís.

Da xuntanza tamén saíu a posibilidade de organizar unha semana do Libro Infantil e Xuvenil no exterior, actividade que se enmarcará dentro da programación da Consellería de Cultura e Turismo no 2010, que será declarado Ano da Lectura. Nesta liña, darase especial relevancia ó 2 de abril como día Internacional do Libro Infantil e Xuvenil, co fin de potenciar a promoción das obras galegas entre o público máis novo.

Kalandraka Editora e a asociación BATA preparan novos títulos da colección Makakiños

(13-07-2009) A editorial pontevedresa Kalandraka prepara a publicación de novos títulos da colección Makakiños. Esta colección, creada en colaboración coa asociación BATA (Baion Asociación Tratamiento del Autismo) de Vilanova de Arousa, caracterízase por utilizar un sistema pictográfico (SPC) que facilita a súa lectura e comprensión, reducindo as palabras con carga simbólica, as metáforas e evitando no posible termos abstractos, posibilitando a súa lectura a nenos e nenas con parálise cerebral, autismo ou disfasia.

Tras a recente reedición de El conejo blanco e de La ratiña presumida, Kalandraka e BATA ultiman a publicación dunha serie de libros que utilizan o sistema SPC e que estarán listos para o mes de decembro. Esta colección servirá para achegar a este colectivo acción cotiáns, como ir á compra, facer de xantar, etc. Xunto a estes libros de cuestións habituais o ilustrador Marc Taeger prepara a versión Makakiños da súa A verdadeira historia de Carapuchiña.

Tras o éxito desta colección, da que se recibiron pedidos procedentes de América e doutras partes do mundo, a delegación portuguesa de Kalandraka tamén traballa na elaboración dos seus primeiros títulos, que estarán a disposición do público luso nos vindeiros meses.

RECURSOS