Participarán Xoán Abelleira, Rosa Aneiros, Yolanda Castaño, Lupe Gómez, Manuel Rivas, Cesáreo Sánchez Iglesias e Xavier Seoane, acompañados pola música de Berrogüeto

Poetas galegos homenaxean a John Berger nun acto poético-musical

(29-Xuño-2010)

O edificio do cárcere provincial da Coruña acollerá mañá mércores unha homenaxe poético-musical ao escritor londinense John Berger.

O acto dará comezo ás 20.30 h. A entrada será de balde recollendo a invitación previamente no propio cárcere en horario de 11.00 h. a 14.00 h. e de 18.00 h. a 21.00 h.

A gañadora coñecerase na vindeira primaveira

Sol de Inverno, de Rosa Aneiros, é unha das cinco novelas finalistas do Premio Casino de Santiago

(29-Xuño-2010)

Sol de Inverno (Xerais), a novela gañadora do Premio Xerais do 2009, é unha das cinco obras finalistas do premio de novela europea Casino de Santiago, que este ano chega a súa oitava edición.

O traballo de Rosa Aneiros competirá coas novelas: La puerta de los infiernos (Salamandra) de Laurent Gaudé, A muller do mediodía (Sotelo Blanco) de Julia Frank, Otras islas (RBA) de Manuel de Lope e La extraña desaparición de Elmex Lennox (Salamandra) de Maggie O’ Farrell.

Este premio foi acadado en edicións anteriores por escritores de grande sona internacional, como Ian Mc Ewan por Expiación (Anagrama), Simonetta Agnelo por A Mennulara (Galaxia), Anna Gavalda con Xuntos e mais nada (Galaxia), Kazuo Ishiguro con Nunca me abandones (Galaxia), Zadie Smith por Sobre a beleza (Galaxia), Sarah Waters por A rolda nocturna (Galaxia) e Sandro Veronesi por Caos calmo (Anagrama), na última edición.

1958-1996

Lois Pereiro, homenaxe das Letras Galegas no 2011

(28-Xuño-2010)

O Plenario da Real Academia Galega, reunido en sesión ordinaria o pasado día 26 de xuño, acordou dedicar o Día das Letras Galegas de 2011 ao monfortino Lois Pereiro (1958-1996).

Lois Pereiro naceu en Monforte de Lemos no ano 1958. Con dezasete anos marchou a Madrid onde cursou estudos de Políticas, que logo abandonou polos idiomas e a informática. Na cidade madrileña fundou, xunto con Antón Patiño, Xosé Manuel Pereiro e Manuel Rivas, a revista Loia, que só coñecería catro números (o último de 1978). Nesta publicación apareceron poemas do escritor monfortino que posteriormente serían recollidos en Poemas para unha loia (1996), libro no que se inclúe o ensaio "Modesta proposición para renunciar a facer xirar a roda hidráulica dunha cíclica historia universal da infamia", que fora dado a coñecer ese mesmo ano nas páxinas da revista Luzes de Galiza.

De regreso ao país, onde compaxinou profesionalmente o exercicio da tradución co labor poético, figurou nas antoloxías colectivas recollidas baixo os títulos De amor e desamor (1984) e De amor e desamor II (1985), compilacións nas que figuran nomes como Pilar Pallarés, Miguel Anxo Fernán-Vello, Manuel Rivas, Xavier Seoane, Francisco Salinas, Xulio Valcárcel, Lino Braxe e outros poetas de moi diferentes tendencias, mais que partillaban inquedanzas culturais. Entre as iniciativas conxuntas deste grupo heteroxéneo destaca o sostemento da revista.

Sempre reticente á difusión individual do seu traballo, foi non obstante colaborador de non poucas empresas de fasquía renovadora, de aí a participación en consellos de redacción e mailos artigos, poemas e relatos espallados por La Naval, Trilateral, Das Capital ou Luzes de Galiza, onde viron a luz -amais do ensaio xa citado- os oitos primeiros capítulos da súa novela inconclusa Naúfragos do paradiso. Nesta mesma liña actuou como letrista con Radio Océano e redactou guión televisivos.

En vida, Pereiro só publicou dúas obras, Poemas 1981/1991 (Positivas, 1992), na que segundo consta na contracapa se recollen "tódolos poemas que escribiu ó longo da súa vida como poeta"; e Poesía última de amor e enfermidade (Positivas, 1995), duros e espidos poemarios nos que se fan patentes as pegadas expresionistas, as referencias á literatura xermánica e certos trazos da contracultura.

Lois Pereiro demorado e morno na publicación dos seus artigos cultivou desde os inicios unha imaxe e unha estética que logo fixeron del un autor de culto. Cartografou coma ningúen o labirinto do mundo contemporáneo conciliando para tal fin o individualismo escéptico coa tradición demoledora do expresionismo centroeuropeo. A súa proposta callou na sensibilidade emerxente, mergullada no posmodernismo, e desexosa de atoparse nun discurso reflexivo, acuciante e non retardario.

A morte sobreviríalle na cidade da Coruña no ano 1996.

Esta enerxía xa non vai ter fin,

non foi creada nin destruída.

Irá ocupando diferentes vidas,

transformándose en emocións alleas

tatuadas noutros corpos paralelos,

en simultáneas procesións

sen pausa.

[Poesía última de amor e enfermidade, Positivas]

En defensa do Poleiro

Os escritores únense para salvar o Mosteiro de Celanova

(25-Xuño-2010)

A Plataforma en Defensa do uso público do Mosteiro de Celanova organiza mañá sábado unha xornada reivindicativa para evitar que o Instituto e o Centro de Servizos Sociais sexan desaloxados do Mosteiro.

No programa de actividades, que comezará ás 17.30 h., presentarase o libro En defensa do poleiro. A voz dos escritores galegos en Celanova, publicado pola editorial Toxosoutos, e que representa o veredicto unánime de  moitos escritores galegos en contra da tentativa de privatizar a parte do mosteiro de  Celanova que ocupa o instituto, un ben que é patrimonio de todos e que está  destinado ao seu mellor uso, a formación pública. É a voz clara da cultura contra os escuros intereses especuladores. As contribucións literarias dos máis de sesenta autores que conforman esta  publicación, son totalmente inéditas. En defensa do poleiro podemos atopar escritos de autores como Darío Xohán Cabana, Anxo Angueira, Xosé Vázquez Pintor, Bieito Iglesias, Francisco Castro, Olga Patiño, Marilar Aleixandre ou Xosé Neira Vilas.

A xornada continuará ás 18.30 h. coa presentación do vídeo promocional do IES de Celanova O IESplicable, dirixido por Bruno Nieto e rematará ás 19.00 h. cunha manifestación que transcorrerá pola rúas da vila, e a lectura dun Manifesto na praza Maior ao remate da mesma.

[Presentación de En defensa do Poleiro. A voz dos escritores galegos en Celanova]  

Este ano chega a súa XXXVI edición

O certame de narracións breves 'Modesto R. Figueiredo' celebrarase por vez primeira en Vilagarcía

(25-Xuño-2010)

Vilagarcía de Arousa será por vez primeira a  sede do Certame Galego de Narracións  Breves “Modesto Rodríguez Figueiredo”  que no 2010 acada a súa trixésimo sexta  edición. O premio literario, que hoxe se presenta na capital  arousán, está organizado pola  Fundación do Padroado Pedrón de Ouro.

O Certame Galego de Narracións Breves “Modesto Rodríguez Feigueiredo” é un dos máis prestixiosos da narrativa galega. O premio vense convocando ininterrumpidamente dende 1975 e naquela primeira edición foi gañado por Xosé Luis Méndez Ferrín. Entre a nómina de galardoados nos seus 36 anos de historia figuran nomes consagrados das letras galegas como Xosé Manuel Martínez Oca, Xavier Alcalá, Víctor Freixanes ou Suso de Toro.

[Bases do XXXVI Certame 'Modesto R. Figueiredo]

Festa literaria

Xosé Ramón Barreiro recibirá este domingo o Premio Trasalba 2010

(25-Xuño-2010)

O escritor, historiador e expresidente da Real Academia Galega Xosé Ramón Barreiro recibirá este domingo, na Fundación Otero Pedrayo, o premio Trasalba 2010. Este premio, de carácter honorífico, recompensa o labor cultural e galeguista de distintos persoeiros.

Os actos programados para esta Festa Literaria principiarán en Trasalba, concello de Amoeiro, ás 9.30 h. con dianas e alboradas. Unha hora máis tarde o párroco de Santa Uxía de Mandía (Ferrol) Xoaquín Campo Freire ofrecerá unha misa en memoria de Ramón Otero Pedrayo. Previo ao acto central da entrega a Xosé Ramón Barreiro do premio Trasalba 2010, con laudatio de Xosé Luís Méndez Ferrín, presentarase o libro Poesía, de Ramón Otero Pedrayo, en edición de Xesús Alonso Montero, publicado por Editorial Galaxia e a Fundación Otero Pedrayo.

[Programa de actos da entrega do Premio Trasalba 2010]

Nesta edición, que organiza bianualmente a Deputación da Coruña, presentáronse 78 obras

Manuel Darriba logra o González Garcés de Poesía

(23-Xuño-2010)

A obra Os indios deixaron os verdes prados, do escritor e xornalista Manuel Darriba foi elixida gañadora do XV premio de poesía “Miguel González Garcés”, convocado pola Deputación da Coruña.

A concesión do xurado, formado nesta edición por Manuel Álvarez Torneiro, Xosé Mª Álvarez Cáccamo, Xavier Lama, Ánxeles Penas e Henrique Rabuñal, decidiu por unanimidade seleccionar a obra do xornalista sarriano de entre as 78 obras presentadas.

O comisario do certame Xavier Seoane destacou de Os indios deixaron os verdes prados o seu “rico mundo sensorial” , así como “a captación da cotianidade con metáforas visionarias e irracionais”. Segundo Seoane, trátase dun libro “denso e orixinal”, que amosa “madurez e forza expresiva”, cunha elevada perfección formal, plasmada en versos libres, e tendente ao sintético, “con poemas breves e concisos, de elevada concentración”.

Os premios en poesía non son nada novos para Manuel Darriba, quen xa gañara o premio Espiral Maior por Vostede non sabe con quen está a falar no ano 2005. En narrativa foi merecedor do Lueiro Rey pola novela curta Velada do billarista. O seu traballo máis recente é Branco, publicado o pasado ano pola editorial Galaxia.

Nas modalidades de lingua castelá e lingua estranxeira, as obras gañadoras foron El país de la canela (Norma) de William Ospina e El día antes de la felicidad (Siruela) de Erri de Luca

Areaquente, de An Alfaya, gaña o premio San Clemente

(23-Xuño-2010)

An Alfaya e a súa novela Areaquente (Sotelo Blanco) foi premiada polos alumnos dos cinco centros de educación secundaria que este ano formaron parte do xurado da XVI edición dos premios San Clemente na modalidade de novela galega.

Estes premios, organizado polo IES Rosalía de Castro de Santiago de Compostela, ten a particularidade de estar composto por un xurado formado por alumnos de institutos das catro provincias galegas, un por cada provincia e o IES Rosalía de Castro como entidade organizadora. Este ano os centros participantes foron o IES Xulián Magariños de Negreira, o IES de Allariz, o IES do Castro de Vigo e o IES Perdouro de Burela.

Areaquente competía con outras dúas novelas, A praia dos afogados (Galaxia) de Domingo Villar e O Cabo do Mundo (Xerais) de Xavier Quiroga. Nas outras dúas modalidades, novela en castelán e novela estranxeira, as obras gañadores foron El país de la canela (Norma) de William Ospina e El día antes de la felicidad (Siruela) do italiano Erri de Luca, respectivamente.

Os días 18 e 19 de xuño na Praza de Arriba

Arranca a II Festa do Libro e da Lectura no Grove

(18-Xuño-2010)

A Praza de Arriba de O Grove acolle esta fin de semana a II Festa do libro e da lectura, que acollerá multitude de actividades como presentacións de libros, sinaturas, homenaxes a escritoras premiadas, música de cantautor, proxeccións, danza, recitais. música, teatro e un encontro con autores e autoras da comarca. Esta II Festa está organizada pola Concelleria de Cultura en colaboración coa Agrupación de Libreiros do Grove (Besada, As Cortiñas e Papiro) e o IES As Bizocas.

[Programación da II Festa do Libro e da Lectura]

Lilainas constitúe unha homenaxe as mulleres de Sanxenxo

A libraría Nós publica un novo libro sobre Sanxenxo

(18-Xuño-2010)

A libraría Nós de Sanxenxo, rexentada polo expresidente da Federación de Libreiros de Galicia e actual tesoureiro da mesma, Xaime Corral, ven de editar un novo título dentro da súa colección de publicacións dedicadas a Sanxenxo.

Lilainas, do escritor local Antonio Castro Martínez, é un libro de relatos que, partindo do Sanxenxo da infancia sito na lembranza, constitúe unha homenaxe as mulleres de Sanxenxo, coñecidas baixo o xentilicio de "lilainas".

Lilainas ven a sumarse á activa acción cultural da libraría Nós, onde, amais de convocar anualmente o premio de investigación Luis Cuadrado, ten publicados os libros El vuelo de la gaviota, de Carlos Quintiá; Luz, viento, arena y mar (Sanxenxo en siete cuentos) de Antonio Castro Martínez e Pasaxes na memoria. Historia e testimonios dos represaliados políticos do concello de Sanxenxo (1936-1950) de Mª Elisa Franco Torres.

O venres 18 de xuño ás 22.30 h.

Ourense celebra o Festival músico-literario EBA 5.0

(18-Xuño-2010)

A Praza Maior de Ourense acollerá esta noite o festival EBA 5.0. O universo de Eduardo Blanco Amor 50 anos despois de A esmorga, un espectáculo músico-literario coa actuación da Banda Municipal de Ourense, a Banda Ourensóns, Burgas Beat, Gomes Mouro, Guezos, Magritte, María do Ceo, O Sonoro Maxín, Os Perqtores, Sólidos Galicianos e a animación dos cabezudos de A Esmorga. O festival repousará sobre unha fabulación de Fernando Dacosta, Josito Porto e Suso Díaz, de Sarabela Teatro.

O espectáculo dará comezo ás 22.30 h.

Impulsada pola Fundación Manuel María de Estudos Galegos, conta co apoio da Área de Cultura da Deputación de Lugo

Todo listo para a Casa Museo Manuel María

(18-Xuño-2010)

Este mércores presentouse no salón de actos da Deputación de Lugo o proxecto que está a desenvolver a Fundación Manuel María de Estudos Galegos, impulsado co apoio da Área de Cultura da Deputación de Lugo, para converter a casa natal do escritor chairego en Casa Museo do Escritor. No acto de presentación estiveron xunto ao vicepresidente da Deputación Antón Bao, Saleta Goy, viúva de Manuel María e presidenta da Fundación, Alberte Ansede, Secretario da Fundación, Severino Rodríguez, alcalde de Monforte de Lemos e Xan Casabella e Xosé Díaz Vieites, responsábeis técnicos do proxecto. Do mesmo xeito, tamén participou o escritor Camilo Gómez Torres para falar na presentación do libro inédito de Manuel María, recentemente publicado, Cecais hai unha luz.

Actualmente, a casa natal de Manuel María constitúe a vivenda habitual do seu irmán Xosé María, a súa dona Xosefa e o fillo destes Xosé Antón, cos que a Fundación Manuel María acaba de chegar a un principio de acordo que deberá posibilitar a construción dunha nova vivenda para eles e o futuro acondicionamento para museo da casa natal do poeta, coñecida como Casa de Hortas. Dito inmoble está situado no mesmo centro de Outeiro de Rei e foi construído no ano 1891 polos avós de Manuel María. É unha típica casa de labregos acomodados cunha fermosa finca de máis de 2.000 metros cadrados.

A realización do proxecto suporá a restauración dunha vivenda que é prototipo da casa chairega, unha destacada mostra do rico patrimonio artístico-cultural da Chaira luguesa. Nela preténdese dar acollida ao interesantísimo legado de Manuel María que contén elementos culturais, artísticos e académicos de alto valor. Alí preténdese ubicar a importante biblioteca do escritor, unha das mellores coleccións particulares do libro galego, así como o seu significado fondo artísticos que contén obras de Castelao, Urbano Lugrís, Carlos Maside, Laxeiro, Luís Seoane, Sucasas, Alfonso Abelenda, Manuel Torres, Blas Lourés, Raimundo Patiño, Xavier Pousa, Argüelles, Balboa, Díaz Pardo, Castro Gil... Son tamén numerosos e interesantes os documentos manuscritos, videográficos, fotográficos, etc., tanto de Manuel María como doutras figuras relevantes da época, que se reunirían nesta institución.

A maiores do apoio da Área de Cultura da Deputación, que amparou desde un inicio o proxecto da casa museo de Manuel María, con esta finalidade a Fundación Manuel María está a recibir apoios por parte de diferentes institucións públicas, empresas privadas e de particulares, como o Concello de Monforte e a Deputación da Coruña, cidades ás que Manuel María estivo moi vinculado na súa madurez e nos últimos anos da súa vida, respectivamente. Estes apoios posibilitáronlle á Fundación dar o primeiro paso de compromiso de adquisición da casa do escritor. Mais, dada a envergadura do proxecto no seu conxunto, a Fundación Manuel María de Estudos Galegos está dando a coñecer o proxecto en distintas cidades e vilas do país para así canalizar as colaboracións dos particulares mediante a achega de todo tipo de obxectos que teñan a ver con Manuel María (cartas, tarxetas, fotos, postais, vídeos, conferencias…) e mesmo de achegas económicas para a realización da iniciativa..

Gallego Jorreto foi fundador do Museo do Pobo Galego

A Fundación Curros Enríquez entrega o seu premio annual 'Celanova, Casa dos Poetas' ao escultor Manuel Gallego Jorreto

(18-Xuño-2010)

A Fundación Curros Enríquez fixo entrega do seu premio annual 'Celanova, Casa dos Poetas' ao arquitecto Manuel Gallego Jorreto. Este premio pretende homenaxear un galego que ó longo da súa vida se teña significado pola defensa dos valores culturais de Galicia no máis amplo sentido da palabra.

Manuel Gallego Jorreto, natural do Carballiño, é licenciado en Arquitectura pola Universidade Politécnica de Madrid. Foi membro fundador do Museo do Pobo Galego en 1976, e así mesmo, membro do Seminario de Estudos Galegos no ano 1980 e da Fundación Luis Seoane en 1996.

O premio 'Celanova, Casa dos Poetas' ven entregándose dende o ano 1985 e non ten dotación económico. O galardoado recibe unha medalla de prata, obra do escultor Acisclo Manzano, que reproduce por unha cara a casa de Curros Enríquez, e pola outra cinco “C” concéntricas que simbolizan a letra pola que comenzan os elementos identificativos deste premio “Casa, Curros, Celanova, Castor e Celso”. En anos anteriores dito premio entregouse a personaxes da cultura galega tan importantes como Ánxel Fole, Uxío Novoneyra, Méndez Ferrín, Carvalho Calero, Laxeiro, Carlos Velo, Carlos Casares, Díaz Pardo ou á Real Academia Galega, homenaxeada na pasada edición.

A AELG organiza un cortsexo cívivo ata Santiago rememoriando o traslado dos restos mortais da poeta galega

Lembrando a derradeira viaxe de Rosalía de Castro a Compostela

(18-Xuño-2010)

A Asociación de Escritores en Lingua Galega (AELG) vai celebrar o vindeiro 15 de xullo un acto cívico e reivindicativo en lembranza do traslado dos restos mortais de Rosalía de Castro, que tivo lugar o 25 de maio de 1891. O cortexo cívico conta co apoio e colaboración de diversos colectivos, como as asociacións culturais O Galo, Medulio, Auriense, Maio Longo, Solfa e a asociación cultural de Meira, e fundacións como Manuel María e Bautista Álvarez, entre outras organizacións culturais que se irán sumando ao longo destas semanas.

Un tren, identificado como Follas Novas, partirá da estación da Matanza, ao carón da casa de Rosalía, o xoves día 15 de xullo ás 16.30 h., para facer o traxecto Padrón-Compostela. Previamente, haberá unha concentración na colexiata de Santa María de Iria, no cemiterio de Adina, onde o presidente da AELG, Cesáreo Sánchez, informará do sentido dos actos, á vez que se lerá un poema de Rosalía de Castro. Na estación de Compostela agardará a comitiva restante, actuando a banda municipal. Xa en Santiago, o cortexo sairá pola rúa do Hórreo cara a Praza do Toural, primeira parada da comitiva, onde haberá unha lectura de tres poemas de Cantares Gallegos (“A gaita gallega”, “Castellanos de Castilla” e “Eu cantar, cantar, cantei”), para continuar pola Praza da Universidade e pola Praza de Cervantes, onde se lerán outros poemas de Rosalía.

Finalmente, en San Domingos de Bonaval celebrarase unha audición do Ángelus, de Massenet, e unha lectura de poemas de Follas Novas, intercalando actuacións do diversos grupos musicais e artistas participantes, para rematar o acto coa lectura dun comunicado reivindicativo da figura de Rosalía de Castro, cando se cumpren 125 anos da súa morte.

O xurado salientou da obra gañadora a mistura de clasicismo e imaxes innovadoras

O caboverdiano José Luís Tavarés faise co premio de poesía 'Cidade de Ourense'

(14-Xuño-2010)

O poeta caboverdiano José Luís Tavarés foi elixido gañador do XXV Premio de Poesía 'Cidade de Ourense', polo traballo presentado co lema: As irrevogábeis trevas de Baldick Lizandro.

O xurado, que estivo composto  por Antonio Pires Cabral, como representantes do Grémio Literário-Vilarense; Teresa Devesa, profesora de lingua e literatura galega; Román Raña, gañador da XXV edición; Rafa Villar, gañador da XXIV edición; Miguel Anxo Fernán Vello, como representante da editorial Espiral Maior; e actuando como secretaria a técnica de Normalización lingüística do Concello de Ourense Mónica Fernández Valencia sendo a Presidenta do Xurado a Concelleira de Cultura Isabel Pérez González, sen voz nin voto, destacou a calidade dos corenta traballos presentados a esta edición do certame.

O xurado ensalzou da obra que “é un discurso ben construído en poemas longos cunha linguaxe coidada onde se combinan o clasicismo con imaxes innovadoras cheas de riscos eficazmente resoltos”. 

Do 7 ao 9 de xullo

A UNED-A Coruña organiza un curso de verán sobre Torrente Ballester e Carvalho Calero

(14-Xuño-2010)

O Concello de Ferrol e o Centro Asociado da UNED en A Coruña conmemoran o centenario do nacemento de Torrente Ballester e Carvalho Calero cun Curso de Verán sobre a súa vida e obra, que se desenvolverá do 7 ao 9 de xullo na Aula Universitaria de Ferrol, baixo a dirección de Jose Antonio Ponte Far. Este curso leva o título de Torrente Ballester e Carvalho Calero: dous ferroláns ante a literatura.

O curso Torrente Ballester e Carvalho Calero: dous ferroláns ante a literatura será inagurado o 7 de xullo, ás 16.00 h., na sede da UNED e contará co director do Centro Gallego de Arte de la Imagen, Guillermo Esgrigas Rodríguez, quen impartirá unha sesión sobre fotografías, documentación fílmica, revistas, artigos, conferencias e actos públicos de Torrente Ballester e Carvalho Calero. A continuación, o catedrático de Literatura da Universidade de Santiago Luis Iglesias Feijóo e gran especialista na figura de Torrente abordará a súa faceta de novelista. Na xornada do día 8 contarase como poñentes estrela con dúas das fillas dos ilustres ferroláns: Marisa Torrente Malvido e Victoria Carballo Calero (esta última é profesora da Universidade de Vigo), que participarán nunha mesa redonda que levará por título Los dos escritores: vecindad, relación personal en el Ferrol anterior a la Guerra y después.

Torrente, o articulista e ensaista, Torrente e o cine, Carvalho, o narrador e poeta ou unha mesa redonda sobre Carvalho, o profesor e lingüista completarán o programa nesta xornada coas intervencións de profesores e catedráticos das Universidades de Santiago e A Coruña ou mesmo de Lisboa. Finalmente, na xornada do día 9, abordarase o teatro de Torrente Ballester e a importancia de Torrente e Carvalho Calero nas literaturas galega e castelán. O curso rematará coa presentación do libro La boda de Chon Recalde, a penúltima obra publicada por Torrente Ballester.

Cea no 221b de Baker Street

Xesús Fraga participa nunha nova sesión de 'O sabor das letras'

(14-Xuño-2010)

O escritor e xornalista Xesús Fraga será o convidado de luxo da quinta sesión de “O sabor das letras”, que se celebrará este xoves 17 de xuño ás 20.30 h. no restaurante do museo MARCO. Esta actividade forma parte do programa que desenvolve o Café Voltaire da Fundación Carlos Casares, que ten como obxectivo establecer un espazo de diálogo entre a literatura e a gastronomía. Nesta ocasión, a data con Xesús Fraga terá o suxestivo título de Cea no 221b de Baker Street.

O prazo de reserva xa está aberto, e as prazas son limitadas. Para reservar debe realizarse unha petición na Agrupación de Amigos do MARCO por escrito (amigos.marco@marcovigo.com) ou por teléfono (986113900 -ext. 402). Poden retirarse as entradas do despacho de billetes do MARCO ata dous días antes do acto. O prezo é de 5 € para socios da Fundación Casares ou da Asociación de Amigos do MARCO e de 7 € para o resto do público.

Premios Xerais 2010

Iolanda Zúñiga e Teresa González Costa coróanse en San Simón

(13-Xuño-2010)

Un ano máis a illa de San Simón acolleu a gala dos premios Xerais. A velada principiou coas palabras de Fina Casalderrey, quen actuou como mantedora literaria, lendo o discurso titulado Chove prata en San Simón, no que abordou a importancia da literatura infantil en Galicia e ás achegas que para o seu desenvolvemento supuxeron tanto o Premio Merlín como a colección Merlín de Xerais, tras máis de douscentos títulos editados.

Tras a súa intervención o momento máis agardado da noite: coñecer os nomes dos gañadores e as obras premiadas.

O xurado da 27ª edición do Premio Xerais de Novela, formado por Comba Campoy (actriz), Manuel Ángel Candelas Colodrón (profesor da Universidade de Vigo e blogueiro), Roberto Pérez Pardo (profesional do libro), Belén Regueira (xornalista), Antón Sobral (pintor) e Fran Alonso (secretario do xurado), en representación de Xerais, con voz e sen voto, entre as trinta e oito participantes acordou declarar finalistas as obras presentadas baixo os lemas Fría e negra, Hovercraft e O avesso do avesso. Despois da súa última deliberación, acordou por unanimidade declarar como gañadora a presentada baixo o lema O avesso do avesso que, despois de aberta a plica, resultou ser de Iolanda Zúñiga e corresponde ao título Periferia.

O xurado do Premio Xerais de novela 2010 no ditame que elaborou sobre Periferia sinalou que «partir dun argumento moi sinxelo e botando man dun sutil fío narrativo, o autor ou autora deste texto creou un universo narrativo contundente, denso, moderno e actualísimo co que se atreveu a construír unha novela do século XXI, ano 2010, poñendo cargas de dinamita nos piares da nosa propia concepción do que debe ser unha novela.». Segundo a autora, Periferia foi concibido coma un texto contra a soberbia, contra a estupidez, contra a ignorancia. Contra a ridiculez do ser humano, que ten a certeza de sentirse o centro do universo. É un texto a favor da tolerancia, aberto ao diálogo, sen fronteiras.

Pola súa banda, o xurado da 25ª edición do Premio Merlín de literatura infantil, formado por An Alfaya (Premio Merlín, 1997), Jacobo Fernández Serrano (Premio Merlín, 2009), Antonio García Teijeiro (Premio Merlín, 1996), Mar Guerra (Premio Merlín, 2008), Gloria Sánchez (Premio Merlín, 1990), e Helena Pérez Fernández (secretaria do xurado), en representación de Xerais, con voz e sen voto, entre as trinta e dúas obras participantes, declarou finalistas as presentadas baixo os lemas: Canis lupus, Celerifera, Cincocentos trinta e tres e Sete pétalos. Despois da súa última deliberación, acordou por  maioría declarar como gañadora a presentada baixo o lema Celerífera, que, despois de aberta a plica, resultou ser de Teresa González Costa e corresponde ao título A filla do ladrón de bicicletas.

O xurado subliñou que A filla do ladrón de bicicletas contén un certo histrionismo calculado nas situacións que se producen. Estas son extraordinarias, ou sexa, fóra do ordinario e divirten e mesmo provocan o lector ou lectora que non quedan impasibles endexamais. Teresa González Costa comentou, ao recibir o premio, que «as bicicletas sempre foron moi importantes na miña vida, nesta obra co personaxe de Celerífera quixen facerlle unha homenaxe as bicicletas».

www.cruzandolibros.es

O programa Cruzandolibros fomentará o hábito de lectura a través dos centros de información ás mulleres de Galicia

(13-Xuño-2010)

O conselleiro de Cultura e Turismo, Roberto Varela e a secretaria xeral da Igualdade, Marta González asinaron a semana pasada o acordo de colaboración para o desenvolvemento do programa Cruzandolibros, co obxectivo de fomentar o hábito da lectura e intercambio de libros entre as persoas interesadas no marco das actividades contempladas no Ano do Libro e da Lectura. Ao acto tamén asistiu o director xeral de Promoción e Difusión da Cultura, Francisco López e representantes dos concellos nos que desenvolverá o programa na súa primeira fase, Arteixo, Padrón, Vilalba, Carballiño, Lalín, Ribeira, Monforte, Verín, Vilagarcía e Ponteareas.

A iniciativa Cruzandolibros pretende que a xente continúe desenvolvendo as súas competencias lectoras e propoñer á lectura como actividade recreativa e alternativa para o tempo de lecer. Este proxecto xorde co propósito de integrar a lectura, a reflexión e o lecer en distintos Centros de Información ás Mulleres de toda Galicia.

O programa Cruzandolibros desenvolverase a través de centros de información ás mulleres dos concellos participantes, mediante a creación de puntos de encontro denominados CruzandolibrosCIM. Estes puntos habilitarán un espazo, dentro das dependencias dos centros de información ás mulleres, a dispor das persoas usuarias do programa que permita o normal desenvolvemento do proceso de intercambio dos fondos bibliográficos. As persoas interesadas recollerán os libros nas dependencias dos Centros de Información ás Mulleres para seres mais tarde devoltos aos puntos de entrega, ou en calquera outro espazo. Cruzandolibros contará cunha páxina web, creada pola Secretaría Xeral da Igualdade (www.cruzandolibros.es), na que os usuarios poderán introducir o número de identificación do seu libro, e así poder seguir o seu itinerario, deixar unha pequena nota ou comentario acerca das súas consideracións derivadas da lectura do libro e da súa participación no programa, así como as súas suxestións e comentarios.

A Consellería de Cultura e Turismo dotará aos centros de fondos bibliográficos e fomentará o a participación cidadá e a creación de grupos de lectura animando ao intercambio de libros entre as persoas participantes. Pola súa banda, a Secretaría Xeral da Igualdade coordinará a colaboración dos CIM dos concellos e dotará dos materiais necesarios aos CruzandolibrosCIM. Os CIMs facilitarán asemade información sobre o programa e os lectores e lectoras poderán tamén propoñer a incorporación e novas obras ao programa.

En marzo xa gañara o Narrativas Quentes de Positivas

Eva Moreda gaña o Terra de Melide cunha obra sobre a inmigración galega en Londres

(08-Xuño-2010)

A escritora vegadense Eva Moreda é a gañadora da novena edición do Certame de Creación Literaria Terra de Melide. Moreda, quen en marzo gañara o Narrativas Quentes, presentou ao concurso melidense a obra A veiga é como un tempo distinto.

O xurado, formado por Santiago Jaureguizar, Mercedes Queixas, Manuel Bragado, Noelia e Xoaquín Vázquez, destacou da obra gañadora “a súa literatura moderna, narrada con frescura e cun pulo narrativo merecedor de ser recoñecida como a mellor das vinte e cinco obras presentadas ao certame”.

O fío argumental desta novela traza un percorrido pola inmigración galega en Londres nos anos 60 e 70, contada, segundo o xurado, “cunha visión innovadora”. Eva Moreda verá recoñecido o seu traballo coa publicación da obra na Editorial Xerais, amais da cantidade económica estipulada nas bases do concurso.

O Concello de Melide tamén convocara o Certame de Investigación Terra de Melide, pero nesta ocasión, coma na última edición, o xurado declarou o premio deserto.

O libro de artista como colector de ideas

O Verbum acolle unha exposición que convida á reflexión sobre os límites do libro

(08-Xuño-2010)

O Verbum. Casa das Palabras de Vigo acolle o vindeiro venres 11 de xuño a exposición O libro de artista como colector de ideas.

Co obxectivo de amosar unha ampla visión sobre as diferentes posibilidades e formatos que pode tomar o libro, cuestiónase qué é como obxecto, cal é a idea que temos os lectores e os artistas dun libro.

A mostra, comisariada por Paula Mariño, convida ao visitante a unha viaxe polos vértices da lectura e do libro a través dos libros de artista que acollerá a exposición, que contará con orixinais de Berta Cáccamo, Baldo Ramos, Xosé Albeos ou de Eduardo Valiña, entre outros.

A mostra estará aberta dende o 11 de xuño ata o 29 de agosto no Verbum. Casa das Palabras de Vigo con entrada de balde.

Contos coas mans abertas

A Tropa de Trapo convídanos á reflexión a través dos contos

(07-Xuño-2010)

Esta fin de semana principiou na vila ourensá de Ramirás a xira Contos coas mans abertas, promovida polo Fondo Galego de Cooperación e Solidariedade dentro das súas actividades de sensibilización.

Trátase dun espectáculo músico-teatral creado expresamente para esta campaña pola compañía compostelá A Tropa de Trapo, quen percorrerá ata finais de ano un total de vinte concellos asociados á entidade municipalista galega. Canda Ramirás, son Arteixo, Porto do Son, Xove, Ferrol, Sada, Cambre, Salceda de Caselas, A Estrada, Culleredo, Ames, Nigrán, Mos, Verín, Cangas, Carballo, Burela, Abegondo, O Valadouro e Poio os lugares seleccionados para acoller as representacións.

A proposta, dirixida a público adolescente e adulto, baséase en contos narrados a dúas voces onde a música en directo cobra especial relevancia. Instrumentos como a guitarra, a kalimba, o goni ou o laúde árabe mergullan aos espectadores en historias reais, recollidas case todas en primeira persoa, contos sinceros e achegados que falan do fondo humano que nos une a todos. Sen caer en tópicos sobre a solidariedade e a cooperación, Contos coas mans abertas é un espectáculo cheo de esperanza, de humor, de amor, de pequenas loitas e grandes soños. Son contos para mellorar o mundo e entendelo mellor.

Mulleres da aldea, cooperantes, guerrilleiros sandinistas, vacas, inmigrantes do Magreb ou unha tribo de bosquimanos son algúns dos protagonistas das historias contadas por Marta Ortiz e Brais Gutiérrez, dous ensinantes de vocación que en 2006 xuntaron as súa inquedanza pola narración oral no proxecto A Tropa de Trapo. Dende entón levan percorrido toda Galicia e outros lugares da xeografía ibérica facendo reflexionar a nenos, mozos e maiores cos seus diferentes espectáculos.

[Programación de Contos coas mans abertas]

Os gañadores daranse coñecer o sábado 12 de xuño

Xa se coñecen os finalistas dos premios Xerais 2010

(07-Xuño-2010)

O xurado dos premios Xerais de novela e do Merlín de literatura infantil reuniuse o pasado venres 4 de xuño deu a coñecer os finalistas de cada unha das categorías.

o xurado da XXVII edición do Premio Xerais de Novela, dotado con 25.000 euros e no que participaron trinta e oito obras, formado por  Comba Campoy (actriz), Manuel Ángel Candelas Colodrón (profesor da Universidade de Vigo e blogueiro), Roberto Pérez Pardo (profesional do libro), Belén Regueira (xornalista), Antón Sobral (pintor) e Fran Alonso (secretario do xurado), en representación de Xerais, con voz e sen voto, acordou declarar finalistas as obras presentadas baixo os lemas Fría e negra, Hovercraft e O avesso do avesso.

Pola súa banda, o xurado da XXV edición do Premio Merlín de Literatura Infantil, dotado con 10.000 euros e no que participan trinta e dúas obras, formado por An Alfaya (Premio Merlín, 1997), Jacobo Fernández Serrano (Premio Merlín, 2009), Antonio García Teijeiro (Premio Merlín, 1996), Mar Guerra (Premio Merlín, 2008), Gloria Sánchez (Premio Merlín, 1990),  e Helena Pérez Fernández (secretaria do xurado), en representación de Xerais, con voz e sen voto, acordou declarar como finalistas as obras presentadas baixo os lemas Canis lupus, Cincocentos trinta e tres e Sete pétalos.

O fallo de cada un dos premios darase a coñecer no serán do sábado, 12 de xuño, no acto literario que terá lugar na illa de San Simón e no que a escritora Fina Casalderrey actuará como mantedora literaria. Como en edicións anteriores o acto será transmitido en directo por internet por Blogaliza.tv.

A obra está dirixida polo editor e tradutir Jonathan Dune

Preséntase unha antoloxía que peneira oito séculos de literatura galega

(07-Xuño-2010)

A Consellería de Cultura e Turismo e as editoriais Xerais e Galaxia veñen de presentar Anthology of galician literature. Antoloxía da literatura galega (1196-1981), un proxecto en edición bilingüe (inglés-galego) de Jonathan Dunne. Esta antoloxía recolle literatura de tradición oral, literatura dramática, ensaio, poesía e narrativa de ficción que servirá de carta de presentación da literatura galega diante do mundo anglosaxón.

Esta escolma vai precedida dunha introdución, elaborada polo propio Jonathan Dunne, na que se informa moi sinteticamente da historia desta literatura, así como se amosan os criterios de edición organizados por épocas e representativos dos diferentes xéneros literarios. Tamén se inclúe ao importante equipo de tradutores, 55 profesores, críticos e académicos de proxección internacional, que realizaron a selección dos textos.

O Irmandino publicouse en dúas etapas dende 1934 ata 1936 e de 1958 ao ano 1961

O CIRP recupera a cabeceira da Irmandade Galeguista de Uruguai

(03-Xuño-2010)

O Centro Ramón Piñeiro para a Investigación en Humanidades ven desenvolvendo, nos últimos anos e baixo a dirección de Luís Alonso Girgado, a recuperación de cabeceiras históricas da emigración galega en América. Tras rescatar e presentar en facsímil revistas como Cristal, Saudade ou Mundo Gallego, agora o CIRP ven de presentar un CD onde se recolle a publicación do Órgano da Irmandade Galeguista do Uruguai,O Irmandino, editado en dúas etapas diferentes  dende outubro de 1934 a xaneiro de 1936 e dende xuño  de 1958 ata o mes de xuño de 1961, nesta segunda  etapa dirixida por Xosé L. Villaverde e M. Vázquez Valiño. O Irmandino comeza a publicarse en outubro de 1934 como  órgano de expresión da Irmandade Galeguista do Uruguai.  Terá dúas épocas: a primeira conta cun total de seis  números; a segunda abarca do ano 1958 ao 1961 cunha tiraxe de catro números. A extensión destes é de catro páxinas cada un, exceptuando o número 5 que, con motivo do Día de Galicia, ten oito.

O Irmandino será de carácter político e vencellado ao Partido Galeguista (PG), reivindica a identidade de Galicia como entidade diferenciada do resto do Estado español. Ao comezo da segunda etapa, tras a Guerra Civil, O Irmandino ten un marcado carácter continuísta e retoma a loita polos dereitos de Galicia.

O poeta e xornalista ven de publicar unha antoloxía poética da súa obra

César Antonio Molina recibe a Medalla Castelao 2010

(03-Xuño-2010)

O Goberno de Galicia aprobou hoxe no Consello da Xunta o decreto polo que se conceden as Medallas Castelao do 2010 coa cal o Goberno distingue aqueles galegos e galegas autores dunha obra merecente do recoñecemento do seu pobo no eido artístico, literario ou de calquera outra faceta da actividade humana.

Entre os merecedores da Medalla deste ano está o poeta, xornalista e exministro de Cultura César Antonio Molina, quen ven de publicar El rimor del tiempo, unha antoloxía poética da súa obra.

O resto dos distinguidos coas Medallas Castelao son o pintor e escultor Antón Lamazares, a matrona Rosalina Celada, a cantante Luz Casal e a traballadora da Administración pública Prudencia Santasmarinas Raposo.

A Escritora na súa Terra, este sábado 5 de xuño en Santiago de Compostela

Marilar Aleixandre recibirá o sábado unha homenaxe na súa Terra

(03-Xuño-2010)

Marilar Aleixandre será homenaxeada pola Asociación de Escritores en Lingua Galega (AELG) na XVI edición da iniciativa A Escritora na súa Terra. A decisión da dita homenaxe, considerada como unha celebración na que a terra de orixe do homenaxeado/a cobra un protagonismo fundamental nesta cita cultural, foi tomada por unanimidade da asemblea de socios e socias da AELG.

Tratase dunha celebración múltiple e popular na que se vén recoñecendo a entidade literaria de insignes figuras das nosas letras, a través dunha serie de eventos como a entrega do galardón Letra E de escritor/a (unha peza escultórica asinada por un/ha recoñecido/a artista galego/a), a plantación dunha árbore simbólica (elixida polo propio autor, e que neste caso é un abruñeiro), a colocación dun monolito conmemorativo ou a inauguración dun espazo público co nome do/a homenaxeado/a ou cun nome elixido polo/a homenaxeado/a.

A homenaxe A Escritora na súa Terra desenvolverase en Santiago de Compostela este sábado 5 de xuño. En anteriores edicións foron homenaxeados, entre outros, Antón Avilés de Taramancos, Agustín Fernández Paz, Bernardino Graña, Manuel Lourenzo ou Luz Pozo Garza.

[Programa de Actos]

III Bienal do Pen Clube

Libera a palabra! unirá os mundos literarios hispanoamericanos e lusófonos

(01-Xuño-2010)

Mañá comeza en Santiago de Compostela a III Bienal do PEN Clube que reunirá na capital galega a escritores de Galicia, España e de América Latina. Baixo o lema Libera a palabra! ao longo de cinco días Compostela será un punto de encontro e de debate.

Libera a palabra! permitirá aos escritores procedentes das dúas beiras do Atlántico contrastar opinións na busca de camiños abertos e plurais no ámbito literario, neste caso, Iberoamérica.

Co obxectivo de que a literatura galega serva de ese punto de encontro entre dúas grandes áreas lingüísticas e literarias, a hispanoamericana e a lusófona. Neste encontro participarán poetas, novelistas, ensaístas, dramaturgos, xornalistas, críticos... como Arcadio López-Casanova, Luís Sepúlveda, Anxos Sumai, Lauren Mendinueta ou Carmen Boullosa.

[Programa da III Bienal do Pen Clube - Libera a palabra!]

Pola obra Costa Necrópole

Mariña Pérez Rei gaña o IX Certame Literario Antón Avilés de Taramancos

(01-Xuño-2010)

Costa Necrópole, de Mariña Pérez Rei, foia obra seleccionada polo xurado do Certame Literario de Relato de Aventuras 'Antón Avilés de Taramancos' para ser a obra gañadora da súa novena edición.

O concurso está convocado polo Concello de Noia e organizado pola Casa da Gramática do IES Virxe do Mar coa colaboración da Deputación da Coruña.

En Costa Necrópole a autora amaiense relata a historia dun rapaz de África que busca unha nova vida en Europa.

Sete palabras, de Suso de Toro, leva o premio no apartado de creación literaria

A Fundación Premios da Crítica entrega os seus galardóns do 2010

(01-Xuño-2010)

O Padroado da Fundación Premios da Crítica, reunida a pasada fin de semana en Mondariz-Balneario, deu coñecer os premiados da edición do 2010 dos Premios da Crítica de Galicia.

No apartado de creación literaria o premio foi para a última novela de Suso de Toro, Sete palabras, publicado por edicións Xerais de Galicia.

O traballo de Manuel Forcadela A mecánica da maxia. Ficción e ideoloxía en Álvaro Cunqueiro, editado por Galaxia, foi a obra premiada na sección de Ensaio e Pensamento. Outro título de Galaxia, Ramón Piñeiro e a revisión do nacionalismo, de Manuel Barros, foi premiada en Investigación. Enrique Acuña, director literario de A Nosa Terra, levou o galardón de Ciencias e Artes da Representación mentres que a Colección Ars Gallaeciae Musicae, da editorial Dos Acordes, fíxose co premio da Crítica Galicia no bloque de Música. Pola súa banda, a Casa das Ciencias da Coruña gañou o premio destinado a Iniciativas Culturais.

Estes premios da Crítica Galicia convócanse anualmente dende o ano 1978. Inicialmente foron convocados polo Círculo Orensán Vigués, ata que no ano 1992 faise cargo deles a Fundación Premios da Crítica Galicia .