Impartirá conferencias nas cidades de Zürich, Lucerna e Xenebra

Esperanza Mariño Dávila espallará a figura de Uxío Novoneyra nas Sociedades Galegas de Suíza

(28-Maio-2010)

Durante a primeira semana do vindeiro mes de xuño, a escritora e catedrática de Lingua e Literatura galegas no IES de Cacheiras (Teo), Esperanza Mariño Davila, impartirá un ciclo de conferencias sobre a vida e a obra de Uxío Novoneyra -homenaxeado co Día das Letras Galegas 2010- a varias asociacións galegas en Suíza. Esta iniciativa parte da Federación de Sociedades Galegas en Suíza, dirixida por Pedro Hombre e Cristina Pena.

Esta será a segunda ocasión na que Mariño Dávila se desprazará a Suíza para impartir un ciclo de conferencias sobre o personaxe homenaxeado no Día das Letras Galegas. En 2007 faloulles a diversas sociedades de emigrantes galegos no país helvético sobre a figura María Mariño, repartindo alá exemplares doutra obra da súa autoría: o "Dicionario"María Mariño (3C3 editores).

O programa de conferencias de Esperanza Mariño Dávila é o seguinte:

- 3 de xuño. Centro Galego de Zug e Promoción da Cultura de Zürich.

- 4 de xuño. Asociación Lucerna.

- 5 de xuño. Centro Galego de Lucerna.

- 6 de xuño. Centro Galicia de Olten e Irmandade Galega de Xenebra.

En todos estes actos Esperanza Mariño vailles entregar para as bibliotecas destas sociedades de emigrantes Galegos en Suíza exemplares do seu recente libro "Dicionario"Uxío Novoneyra (3C3 Editores).

Recrearase o Ourense da xeración Nós

Ourense devén este domingo na Bela Auria

(28-Maio-2010)

Este domingo no xardín do Posío e no IES Otero Pedraio celebrarase A Bela Auria, unha festa de recreación histórica, ambientada no Ourense da xeración Nós.

Tomada do nome que empregaba Otero Pedraio para referirse a Ourense, A Bela Auria converterase nunha xornada festiva cuxo programa de actividades versará sobre tres eixos principais: A Bela Auria, actividades situadas cronolóxicamente entre comezos de século e o ano 1936; Saberes Perdidos, obradoiros para aprender a manexarse en habilidades precisas para unha sociedade menos industrializada; e A historia dentro da historia, unha homenaxe ao traballo de todas esas figuras que dedicaron a súa vida ao estudo da historia.a historia é a disciplina que dun ou doutro xeito cultivaron as grandes figuras desta época. Unha homenaxe ao traballo destas figuras.

[Programa da xornada A Bela Auria]

Celebrarase do 20 ao 27 de xuño en Santiago de Compostela

Xacobeo 2010 presentou hoxe o I Encontro Internacional de literatura de viaxes

(28-Maio-2010)

Xacobeo 2010 presentou hoxe o I Encontro Internacional de Literatura de Viaxes LITVI 2010, que se celebrará entre o 20 e o 27 de xuño e que forma parte do Camiño da Reflexión da programación deseñada para o Xacobeo e enmarcado no Ano do Libro e da Lectura. No acto de presentación participaron o director xeral de Promoción e Difusión da Cultura, Francisco López Rodríguez; o director xerente da S.A. de Xestión do Plan Xacobeo, Ignacio Santos Cidrás, e a directora de Trevisani, empresa organizadora de LITVI 2010, Ana García.

LITVI 2010 achegará ata Santiago de Compostela a autores, profesionais, editores, axentes literarios e lectores, en xeral, de todas as áreas que rodean a literatura de viaxes nun proxecto único e singular. A súa programación conta con encontros con autores, un congreso temático sobre As literaturas do camiño, ciclos de conferencias, mesas redondas, sinaturas de libros, unha Feira Internacional de Dereitos ou unha gran feira aberta a todo o público na Alameda santiaguesa. Previamente, un grupo de autores e xornalistas realizarán un percorrido polo Camiño Francés de tres días.

Este primeiro encontro internacional de literatura de viaxes complementarase con espectáculos de animación na rúa, campañas de difusión, comunicacións, encontros coa prensa e outros actos de interese.

Na presentación do LITVI 2010 anunciáronse os nomes dalgúns dos participantes desta singradura, na que están Suso de Toro, Xavier Alcalá, Xavier Queipo, Antonio Pérez Henares, César Antonio Molina, Fernando Martínez Laínez, Francisco Singul, Javier Reverte, John Rutherford, Jordi Lloréns Estapé, Josep Mª Bernadás, Julio Llamazares, Luisa Castro, Manuel Lourenzo, Pablo Arribas Briones, Paco Nadal, Paulo Caucci, Pemón Bouzas, Pere Tobaruela, Sérgio Luís de Carvalho, Soledad Puértolas e Susana Fortes.

[Descargar o dossier de LITVI 2010]

Do 29 de maio ao 6 de xuño

Comeza a 26 Feira do Libro de Ourense

(28-Maio-2010)

A 26 edición da Feira do Libro de Ourense comeza mañá co pregón do escritora Teresa Moure. Ata o 6 de xuño, a praza do bispo Cesáreo da cidade auriense acollerá aos 16 expositores participantes e as múltiples actividades que se desenvolverán nesta festa do libro.

Presentacións de libros, recitais, maxia, monólogos, música, etc. estarán presentes ao longo dos nove días que durará a Feira do Libro. Entre as novidades literarias que se presentarán na Feira están o libro de Elena Gallego Abad, Dragal. A herdanda do Dragón; A Voz Herdada, de Kike Benlloch e David Rubín; Guía secreta da gastronomía de Galicia, de Martín Álvarez Gonález; ou Lingua e futuro, de Goretti Sanmartín, entre outros.

[Programa da 26 Feira do Libro de Ourense]

Os nomes dos gañadores coñeceranse o 12 de xuño

Xerais fixo públicos os membros dos xurados dos seus premios de Novela e Merlín

(28-Maio-2010)

Xerais fixo público hoxe os membros do xurado que ditaminarán as obras gañadoras dos premios Xerais 2010.

O xurado da XXVII edición do premio Xerais de Novela, no que concorren trinta e oito obras, está formado por Comba Campoy (actriz), Manuel Ángel Candelas Colodrón (profesor da Universidade de Vigo e blogueiro), Roberto Pérez Pardo (profesional do libro), Belén Regueira (xornalista), Antón Sobral (pintor) e Fran Alonso (secretario do xurado), en representación de Xerais, con voz e sen voto.

O XXV premio Merlín de Literatura Infantil, ao que se presentaron trinta e dúas obras, conta co xurado composto por An Alfaya (Premio Merlín, 1997), Jacobo Fernández Serrano (Premio Merlín, 2009), Antonio García Teijeiro (Premio Merlín, 1996), Mar Guerra (Premio Merlín, 2008), Gloria Sánchez (Premio Merlín, 1990),  e Helena Pérez Fernández (secretaria do xurado), en representación de Xerais, con voz e sen voto.

O 4 de xuño os dous xurados reuniranse para deliberar sobre as obras presentadas. O sábado 12 de xuño coñeceranse os nomes dos gañadores na festa dos premios que terá lugar na illa de San Simón. 

Polo artigo titulado A procura do tesouro

Marica Campo gaña o VI Premio de artigos xornalístcos normalizadores do Concello de Carballo

(28-Maio-2010)

O artigo titulado A procura do tesouro de Marica Campo, foi o gañador do VI Premio a artigos xornalísticos normalizadores do Concello de Carballo.

Segundo o xurado, o recoñecemento deste artigo débese á súa capacidade para atraer públicos diversos, con niveis de lectura diferentes; ao seu contido de valor intrínseco, desde as raíces até o futuro; á súa calidade lingüística e literaria, cunha metaforización exacta, nun artigo de estrutura circular e con conexión con modalidades literarias tanto cultas como populares. O xurado do VI Premio estivo composto por Belén Puñal, María Pilar García Negro, Xesús Fraga, e Nel Vidal, como secretario, sen voto. O xurado decidiu tamén outorgarlle un accésit ao artigo Por unha Galiza neofalante, do autor Marcos Abalde Covelo, que xa recibiu tamén un accésit na edición anterior do certame.

Estará operativa a partires do 1 de xullo

Preséntase a plataforma de contidos dixitais Meubook

(28-Maio-2010)

Onte presenteuse no Centro Social Caixanova de Santiago de Compostela a Plataforma de Contidos Dixitais Meubook. O portal Meubook ofertará a partires de xullo os seus servizos electrónicos a centros de formación, editores, autores, librarías e usuarios, centrándose principalmente na recompilación, actualización e intercambio de contidos. Outro dos servizos estreas de Meubook é o denominado 'libro a demanda', unha función de impresión de libros de baixo custo, onde as editoriais, a partir do libro electrónico, imprimen só os libros que lles demandan, cunha técnica de impresión diferente a tradicional e que se realiza ao momento.

No accionarado de Meubook atopamos a empresas como o Clúster do Produto Gráfico e do Libro Galego, Tórculo, Espiral Maior, a libraría Couceiro, Academia Postal, Distribucións Grial e Edicións Bolanda. A parte tecnolóxica corre a cargo do Laboratorio de Redes da Universiade de Vigo e do Centro Tecnolóxico de Telecomunicacións de Galicia e a administración e dinamización a cargo de Algueirada.

Coa intención de celebrar unha tertulia cada trimestre, a primeira delas terá lugar na galería Sargadelos da Coruña o 2 de xuño

Principian as Tertulias AGPI na Coruña

(26-Maio-2010)

O vindeiro mércores 2 de xuño a Asociación Galega de Profesionais da Ilustración (AGPI) principia unha nova actividade, as Tertulias AGPI, que achegarán á sociedade galega diferentes visións e temas por parte dalgúns dos ilustradores máis representativos do país.

A primeira tertulía celebrarase na galería Sargadelos da Coruña e terá como tema central Fuga de talentos. Segue a ser necesaria a emigración de ilustradores?, que contará coa participación de Alberto Guitián, quen durante anos desenvolveu o seu traballo profesional en Barcelona.

Estas tertulias, aínda sen periodicidade fixa, ten previsto espallarse por diferentes cidades galegas, fixando unha data por trimestre.

A autoría é da historiadora Sabela Taboada González

Un traballo sobre a prensa galega no Guerra da Indepencia faise co premio da VII edición do premio de ensaio "Manuel Murguía"

(26-Maio-2010)

O ensaio histórico titulado E fíxose a nación. A idea de nación española: liberais vs. absolutistas na prensa galega da Guerra de Independencia (1804-1814), da historiadora compostelá Sabela Taboada González, foi elixido, por unanimidade do xurado, gañador da VIII edición do premio de ensaio "Manuel Murguía", convocado pola Deputación da Coruña. 

O xurado, formado por Xosé Manuel Alfeirán, Carmen Valderrama e Pedro Armas, cualificou a obra gañadora como "un traballo senlleiro", e que "está ben estruturado, ben artellado, e resulta de interese científico, social e para os medios de comunicación". Pedro Aramas, membro do mesmo, explicou polo miúdo o contido do traballo gañador, no que se analiza a historia de prensa galega "nun período moi convulso da historia de España" e considerou que, a pesar do paso do tempo, o tema central del, "o concepto de nación", segue estando "de plena actualidade".

Sabela Taboada, amais do premio económico, verá publicada a súa obra.

Varias entidades unen os seus esforzos na organización de actividades

Presentada a web do centenario do escritor Carvalho Calero

(26-Maio-2010)

Entidades culturais como a Associaçom Galega da Língua (AGAL), a Mesa pola Normalización Linguística, a Fundaçom Artábria, a Associação Cultural Pró-AGLP, o Local Social Aturuxo, o Centro Social Gomes Gaioso e o Instituto Cultural Brasil-Galiza veñen de presentar a páxina web dedicada ao centenario do escritor e profesor Ricardo Carvalho Calero.

A páxina web www.carvalhocalero2010.net componse de completas biografías e bibliografías do escritor ferrolán, actividades que se están a desenvolver neste centenario, mediateca, colaboracións, etc. Igualmente está aberta ás aportacións de todos aqueles interesados en achegar calquera contribución.

[Páxina web do centenario de Carvalho Calero]

Faro referencial da cultura e da sociedade galega

Pecha o blog As uvas na solaina

(26-Maio-2010)

o blog As uvas na solaina é un faro. Serve por igual como centro de vixía como punto luminoso. A súa razón de ser, ese ollo que da voltas unha e outra vez para retornar á orixe, é a cultura. A cultura galega. Esta toma consciencia cando é iluminada por ese ollo xigante de luz. Por ese ollo de Marcos Valcárcel.

Historiador, escritor e unha das mentes máis lúcidas que deu este país noso nos últimos vinte e cinco anos, pecha unha etapa. Aberto alá polo ano 2006, As uvas na solaina foi un referente na internet, unha ágora dirixida pola batuta e a man tendida, aberta e xenerosa de Marcos Valcárcel, quen espallou as súas uvas permitindo que agromasen novos acios dende a súa Auria natal.

O martes publicouse o último post cunha carta de despedida de Marcos Valcárcel. Esperamos que sexa só un ata logo.

Carta de Marcos Valcárcel (As uvas na Solaina. Ourense, 24 de maio de 2010)

Son de agradecemento a todas as entidades que nos últimos tempos me dedicaron o seu apoio ou recoñecemento, como o Pen Clube de Galicia, a Asociación de Escritores en Lingua Galega, a Asociación de Editores Galegos e o Liceo de Ourense.

Grazas a Xosé Luís Baltar por defender con éxito a miña candidatura ao premio Otero Pedrayo 2008, e á Presidencia da Xunta de Galicia por concederme a medalla Castelao.

Grazas tamén á Fundación Curros Enríquez, ao Congreso Manuel Luís Acuña, á Fundación Carlos Casares, ao grupo Sarabela e aos medios de comunicación.

Grazas aos meus compañeiros do Instituto da Carballeira, os mellores do mundo. Grazas aos amigos que organizaron a homenaxe do 2008 e o libro Marcos Valcárcel, o valor da xenerosidade, con máis de duascentas colaboracións de escritores e artistas. Os amigos foron un diamante en bruto e un apoio constante: Benito Losada, Afonso Monxardín, Eduardo Núñez, César Ansias, Moncho Quintana, Xosé Luís Troitiña, Xoán Fonseca, Pepe Trebolle, Xulio Outomuro, Millán Picouto, e as súas donas.

Grazas ao meu irmán Fiz e a Ánxela polas xornadas fresqueiras ao pé dos carballos da súa casa no Pereiro.

E, por suposto, a María e a Eire: por todo.

Aproveito para despedir voces amigas, destacadas na nosa historia cultural: Anselmo López Morais, Manuel de Dios, Begoña Muñoz, Javier Randulfe e Perfecto Estévez.

Escoito a cantante brasileira María Bethânia e encontro este verso:"Navigar é preciso; viver nao é preciso".

Navigar, descubrir a vida en cada minuto, deixar as fiestras abertas e reconciliarse coa TERRA.

Nota dos Amigos de Marcos:

O coidador foi apañando palabra a palabra, letra a letra nos casos de dúbida, para escribir este texto nas longas noites desta primavera. Con el péchase definitivamente o vizoso ciclo d´As Uvas na Solaina. Moitas grazas a todos e todas.

 [Blog As uvas na solaina]

A colección compartirá deseño e os exemplares venderanse a un prezo único de 9,90  euros

Nace Módicos, unha colección que integra fondos de Urco, 2.0 editora, Positivas e Rinoceronte

(24-Maio-2010)

As editoriais Urco, 2.0 Editora, Positivas e Rinoceronte unen parte dos seus catálogos para ofrecer Módicos, unha colección de libros que, baixo o mesmo deseño editorial, sairán á venda ao prezo de 9,90 euros.

Os primeiros títulos de Módicos corresponden a fondos procedentes dos catálogos de Urco Editora e de Rinoceronte Editora, e nas vindeiras datas sumaranse os títulos escollidos tanto por Positivas como por 2.0 editora. Estes libros só se poderán mercar a través da libraría online Toupa.net.

A colección Módicos presentarase mañá martes na galería Sargadelos (R/ Nova, 16) de Santiago de Compostela ás 19.00 h.

Trátase de ATRAVÉS|EDITORA e da editorial Anosacosta

Dúas novas editoriais aparecen no país

(23-Maio-2010)

Se hai un par de semanas anunciabamos a aparición da editorial Barbantesa, agora son dúas editoriais máis as que aparecen no panorama literario do país, con dúas propostas totalmente diferentes pero igual de interesantes e atractivas.

ATRAVÉS|EDITORA nova marca editorial da Associaçom Galega da Língua (AGAL), que estará dirixida polo vicepresidente da AGAL Miguel R. Penas. O obxectivo de ATRAVÉS|EDITORA nace co obxectivo de "demostrar que a vía reintegracionista é a mais válida e útil para marcar un padrón galego actual". Os primeiros libros saídos do carimbo de ATRAVÉS|EDITORA son Animais!, de Séchu Sende; Noente paradise. Poemas e canções, de Ugía Pedreira; Parecia não pisar o chão. Treze ensaios sobre as vidas de Fernando Pessoa, de Carlos Taibo.

Pola súa banda, a editorial Anosacosta publicará o seu primeiro libro no vindeiro mes de xuño, cinco anos despois de abrir a web www.anosacosta.com, referencia imprescindible para coñecer o día a día na Costa da Morte. O obxectivo da editorial Anosacosta é dar saída a novas voces poéticas e publicar libros sobre a historia da Costa da Morte, Bergantiños, e Xallas. A primeira publicación será o segundo poemario individual do poeta e xornalista Xosé Manuel Lema, titulado Cartafol de Néboas, mentres que o segundo volume recollerá poemas de varias autoras da Costa da Morte, como Lupe Oroña, Diana Varela, Rocío Leira, Iria Ameixeiras ou Alicia Baña.

O mércores 26 de maio

O Centro de Documentación e Recursos Feministas de Vigo lembra o pasamento de Rosalía de Castro cunha mesa redonda

(23-Maio-2010)

No pasado mes de marzo inaugurouse o Centro de Documentación e Recursos Feministas dependente da Concellería de Igualdade de Vigo, un centro que integra 8.500 títulos, 150 revistas e 930 pezas audiovisuais.

Para o 26 de maio dito Centro de Documentación e Recursos Feministas de Vigo celebra o 125 aniversario do pasamento de Rosalía de Castro cunha mesa redonda integrada polas escritoras María Xosé Queizán, María Pilar García Negro e María do Cebreiro Rábade.

O acto principiará ás 20.00 h. no Centro de Documentación e Recursos Feministas de Vigo, sito na Biblioteca Pública Central. (R/ Joaquín Yáñez, 6 -2º andar) en Vigo.

A relación das ponencias das participantes na mesa redonda serán:

- A xustiza pola man de Rosalia de Castro verso a verso, de María Xosé Queizán.

- A evidencia frente a conveniencia sexista de María Pilar García Negro.

- O sentido ético da poesía de Rosalía de Castro de María do Cebreiro Rábade.

Baixo a dirección da Fundación Carlos Casares, desenvolverase entre os días 1 e 3 de xuño no Pazo de Mariñán, en Bergondo

Xuño principia cunha nova edición dos Diálogos Literarios de Mariñán

(18-Maio-2010)

Os Diálogos Literarios de Mariñán, que organiza a Fundación Carlos Casares coa colaboración da Deputación da Coruña, da Xunta de Galicia e a Fundación Caixa Galicia chegan este ano a súa VII edición, que arrincará o martes 1 de xuño no tradicional paraxe do Pazo de Mariñán, na localidade coruñesa de Bergondo.

Coordinados polo poeta Román Raña, ao longo de tres días destacados autores, editores, críticos e profesores procedentes de Galicia, Angola, Euskadi, Catalunya, Estremadura e Aragón intercambiarán opinións e experiencias sobre o proceso literario e editorial baixo o lema central de As fronteiras ambiguas.

Os VII Diálogos principiarán o 1 de xuño Begoña Caamaño e Xabier Quiroga centrarán a mesa de traballo As fronteiras ambiguas. Mito e negrura, moderado por Xosé Monteagudo. O mércores 2 Baldo Ramos e o angoleño Valter Hugo Mãe compartirán espazo en As fronteiras ambiguas. Pintura e poesía, coordinado por Emma Couceiro. Ese mesmo día, pola tarde, Jon Kortazar moderará a tertulia A literatura vasca. Perspectivas. Para rematar esta segunda xornada Antonio Altarriba e Miguel-Anxo Murado, coa coordinación de Olivia Rodríguez, compartirán mesa no Auditorio da Fundación Caixa Galicia coas As fronteiras ambiguas. O texto e a vida, no que será o único acto público dos Diálogos.

Rematarán estes VII Diálogos literarios o xoves con dúas mesas: a primeira, baixo a moderación de Fran Alonso, na que intervirán Harkaitz Cano e José Luis García Martín en As fronteiras ambiguas. Prosa e poesía. Pola tarde, será a quenda de Francesc Parcerisas e Miguel Anxo Fernán Vello para falar de As fronteiras ambiguas. Palabra lida, palabra recitada. Esta última moderada por Lucía Aldao.

[Programa dos VII Diálogos Literarios de Mariñán]

Do 15 ao 23 de maio

Arrinca este sábado a Feira do Libro de Lugo

(13-Maio-2010)

Este sábado 15 de maio arrinca na Praza Maior de Lugo a XXVIII edición da Feira do Libro, co pregón do escritor Isidro Novo. Un total de 14 stands conforman a oferta cultural desta edición que conta cun programa cunha serie de actividades dirixidas ao público de todas as idades, pero especialmente aos máis pequenos, con sesión de contacontos, obradoiros e concursos.

Como en anos anteriores celebraranse actividades musicais, teatrais e recitais literarios a cargo de varios escritores. Así como presentacións de libros e mesas redondas sobre diferentes temas literarios.

A feira estará aberta ata o domingo 23 de maio en horario de 11.00 h. a 14.00 h. e de 17.30 h. a 21.30 h. entre semana e as fines de semana de 11.00 h. a 14.30 h. e de 17.30 h. a 21.30 h.

[Programa da 28º Feira do Libro de Lugo]

O xurado destacou de As crebas a mistura que presenta de clasicismo, culturalismo e compromiso social

Miro Villar faise co 'Concello de Carral' de Poesía

(11-Maio-2010)

As crebas, de Miro Villar, foi a obra gañadora do XIII Certame de Poesía 'Concello de Carral' fallado onte.

O premio, xunto a dotación económica correspondente, conleva a publicación da obra na colección de poesía de Edicións Espiral Maior. O acto de entrega  do premio terá lugar o 28 de maio, na Casa da Cultura de Carral.

O premio de poesía 'Concello de Carral', un dos certames clásicos dentro do panorama poético galego, foi instituído no ano 1997 e foi obtido en edicións anteriores por Fernando Díaz-Castroverde, Rafael Lema, Rafa Villar, Lucía Novas, Baldo Ramos, Eduardo Estévez, Xurxo Alonso, Marcos Calveiro, Isidro Novo, Xosé Luís Mosquera Camba, Paulino Peña Álvarez e Eli Ríos.

Cinco poetas e trinta espectáculos percorrerán o Camiño de Santiago

Camiños de amor e lúa na Ruta Xacobea

(11-Maio-2010)

Xacobeo 2010 presentou hoxe en Santiago a iniciativa Camiños de Amor e Lúa, un proxecto no que se conxuga o Ano do Libro e da Lectura co propio Ano Santo. Neste marco, desenvolveranse unha serie de eventos de animación á lectura, nos que se mesturan música e poesía, que terán lugar en 30 concellos polos que discorren os distintos camiños que teñen como meta Santiago de Compostela.

O programa de Camiños de Amor e Lúa está formado por tres espectáculos diferentes. O primeiro deles presentase baixo nome de Recital de Amor e Lúa e corre a cargo do poeta Xosé Carlos Caneiro. Este espectáculo xira arredor do poemario Camiños de Amor e Lúa publicado por Biblos, que o escritor publicou o ano pasado, e consiste na declamación de poemas acompañados por Xosé Manuel Salgado (guitarra clásica e guitarra acústica). O segundo espectáculo desta iniciativa denomínase Camiño ao Mar e toma o nome dun poemario de X.H. Rivadulla Corcón. Xunto a X. H. Rivadulla o trompetista e músico Franky Valencia pon as notas que alumean na narración do poeta. O último dos espectáculos que conforman Camiños de Amor e Lúa é o titulado Voces novas nos camiños, no que participan tres poetas novas: María Lado, Olaia Cociña e María Canosa, acompañadas por música en directo.

A primeira das actuacións enmarcadas nesta iniciativa terá lugar o próximo domingo, 15 de maio, no faro de Fisterra a partir das 19.00 h. Nesa xornada será a quenda do espectáculo Camiño ao Mar de Rivadulla Corcón.

[Descargar o dossier de Camiños de amor e lúa]

Na categoría de castelán, o premio foi para María Luísa Frisa Gracia

Alberto Gómez Aneiros gaña o XII Certame de Narración Curta 'Ánxel Fole'

(11-Maio-2010)

Alberto Gómez Aneiros e María Luísa Frisa Grácia son os gañadores do XII Certame 'Ánxel Fole' de Narración Curta nas modalidades de galego e castelán, respectivamente.

O xurado encargado de elixir aos gañadores, composto nesta edición por: o xornalista Jesús Varela, e os escritores Pablo Núñez e Saturnino Valladares na categoría de castelán; e o escritor e docente Toño Núñez, o profesor Primitivo Iglesias e a profesora Carmen Silva na categoría de galego; decidiron premiar na categoría de galego a Alberto Gómez Aneiros polo seu traballo Encontros e desencontros. O segundo premio foi para Alberto Rodríguez por O sangue que tinxe as rúas de Gottam. En castelán a zaragozana María Luísa Frisa Gracia gañou o primeiro premio por Matar a un hombre, e un segundo premio para a obra No solo de frío se tirita de Manuel Luque Tapia.

Son un total de sete poemas de xuventude e da primeira madurez

Víctor Aneiros musica no seu novo traballo os versos de Ramiro Fonte

(11-Maio-2010)

O bluesman Víctor Aneiros ven de publicar o seu quinto traballo discográfico, que leva por título Brétemas da memoria, no que o músico ferrolano leva ao seu terreo sete poemas de xuventude e da primeira madurez do poeta de Pontedeume Ramiro Fonte.

Non é a primeira vez que Victor se achega á poesía de Fonte, pois no seu anterior disco xa recreou Na barra, tema onde estaban moitas das obsesións do escritor: ambientes nocturnos, personaxes decadentes atrapados entre sombras, atracción polo abismo, Ofelias afogadas na noite... Puro blues, segundo o artista. Os poemas que Aneiros musica en Brétemas da memoria son: Autor de westerns, Vida bohemia, Un tute á morte, Sirenas da policía, Lupanar de cristal, Sombras de Compostela e Máis alá. Víctor Aneiros inclúe no seu novo traballo, ao carón dos versos de Ramiro Fonte, Axúdame, un tema baseado nun texto doutro poeta contemporáneo, Xosé Carlos Caneiro.

[Podes escoitar algúns dos temas de Bretémas da memoria no myspace de Víctor Aneiros]

Publicará un catálogo no que o lector atopará dende autores galegos ata traducións en diferentes xéneros

Edicións Barbantesa xorde no mapa editorial galego

(11-Maio-2010)

Edicións Barbantesa é o novo proxecto literario de Penélope Pedreira (Rinoceronte Editora, Axencia Literaria Galega, Xestión Literaria Galega, Morgante Editora) que comeza a dar os seus primeiros pasos entre Cangas e Sevilla.

Barbantesa nace con catro títulos dun catálogo que promete ser variado e plural, onde o lector atopará dende novidades de autores galegos como traduciones nos máis variados xéneros, como mostran os primeiros títulos da editorial: As Médulas, de Silvia Bardelás, Pan prós crocodilos, de Calros Solla; A balada do café triste, de Carson McCullers; e Os ditosos anos do castigo, de Fleur Jaeggy.

Edicións Barbantesa pon ao dispor dos seus lectores a posibilidade de subscribirse aos novos títulos que vaian aparecendo no seu catálogo. Esta opción conleva un desconto dun 15% do prezo normal e os gastos de envío de balde.

[Web de Edicións Barbantesa]

Celebrarase igualmente a IV Conferencia da Fundación Iberoamericana do PEN Clube

Compostela acollerá a III Bienal Literaria Internacional

(09-Maio-2010)

Santiago de Compostela acollerá a III Bienal Literaria Internacional, que terá lugar do 2 ao 6 de xuño do 2010, na que se enmarcará asemade a IV Conferencia da Fundación Iberoamericana do PEN Clube coincidindo coa celebración do Ano do Libro e da Lectura e o Xacobeo 2010.

No acto de presentación, no que interviron Luís González Tosar, presidente do PEN Clube Galicia; Xosé Sánchez Bugallo, alcalde de Santiago de Compostela; e o conselleiro de Cultura e Turismo, Roberto Varela, apuntouse á capacidade do congreso para contribuír a que "a literatura galega viaxe e se proxecte por toda América e todo o mundo, fortalecendo as frutíferas pontes que unen a Península Ibérica con Latinoamérica". Roberto Varela subliñou que a III Bienal supón unha "excelente iniciativa dinamizadora da cultura e das letras galegas".

Do 2 ao 6 de xuño de 2010, a III Bienal de Pedra e de Palabra concibirase como un punto de encontro e máis un foro de debate. Non se trata dun congreso de escritores senón de que os participantes contrasten as súas opinións na procura de camiños abertos e plurais para o feito literario, neste caso en Iberoamérica. A literatura galega será a anfitrioa, tanto do mundo das letras hispanoamericanas coma das letras luso-brasileiras. Coa III Bienal preténdese que a literatura galega sirva de punto de encontro entre dúas grandes áreas lingüísticas e literarias, a hispanoamericana e a lusófona. As fondas históricas relacións de Galicia con América e a diáspora a aquel continente xustifican de sobra o evento.

De Pedra e de Palabra consolídase na súa terceira edición como un foro aberto entre escritores das diversas rexións do mundo celebrado en Santiago de Compostela. Nesta edición está prevista a participación de poetas, novelistas, ensaístas, dramaturgos, xornalistas, críticos, profesores de literatura, editores e cantos dun xeito ou doutro participan da escritura creativa, da industria do libro e da promoción de lectura.

A Asociación Cultural Monte Branco organiza un ano máis o Festiletras. Do 15 ao 23 de maio

Un ano máis as letras vanse de festa ata Ponteceso

(09-Maio-2010)

A Asociación Cultural Monte Branco de Ponteceso organiza un ano máis Festiletras, que conta para esta edición cun amplo programa cultural, artesanal e de musical. As actividades do Festiletras 2010 desenvolveranse entre os días 15 e 23 de maio.

Isabel Blanco será a encargada de ler o pregón da edición deste ano. O domingo 16 terá lugar un dos actos máis emotivos da edición deste ano coa entrega dos premios aos 'bós e xenerosos' a Bernardino Graña e a Avelino Pousa Antelo. Xabier P. Docampo, Mini e Mero, Xurxo Souto, Concha Blanco ou Xoán Babarro serán algúns dos que se achegarán ao longo da semana ata Ponteceso.

[Programa do Festiletras 2010]

[Web Festiletras 2010]

Natural de Melide, o poeta e escritor reside en Cangas desde o ano 1973

Cangas inaugura unha rúa dedicada a Xosé Vázquez Pintor

(05-Maio-2010)

O poeta e escritor Xosé Vázquez Pintor terá unha rúa co seu nome no concello de Cangas. Así o decidiu  a Corporación Municipal de Cangas no pasado mes de outubro. Será concretamente na parroquia de Coiro.

Natural de Melide, Vázquez Pintor reside en Cangas desde o ano 1973. O seu labor literario ten sido recoñecido con numerosos premios, como o Cidade de Ourense, o Esquío, o Torrente Ballester ou o Premio da Crítica Española.

O día 21 de maio terá lugar a inauguración oficial da rúa Xosé Vázquez Pintor, que contará cun completo programa de actividades.

Programa

19.30 h.Presentación do último libro de Xosé Vázquez Pintor Máis vidas (Espiral Maior) a cargo de Miguel Anxo Fernán Vello e o propio autor.

20.30 h.Concentración a carón da Ponte do Bouzós na Av. de Lugo e, pasarrúas a cargo da Banda de Gaitas Tromentelo.

20.45 h. Saúda ao distinguido e autoridades. Glosa sobre Xosé Vazquez Pintor. Descuberta da placa Rúa Xosé Vazquez Pintor. Intervencións da Sra. Concelleira de Cultura, Sra Alcaldesa e Xosé Vázquez Pintor. Percorrido de toda a comitiva pola Rúa Xosé Vázquez Pintor, na compaña de música tradicional. Diante da segunda placa, conclúe o acto coa interpretación do Himno Galego.».

A plataforma intégrase en Europeana, a Biblioteca Dixital Europea

O acervo bibliográfico galego dixitalizado en Galiciana

(04-Maio-2010)

Xa están cargados os primeiros rexistros de Galiciana, a Biblioteca Dixital de Galicia impulsada pola Consellería de Cultura e Turismo e a Fundación Cidade da Cultura da Xunta de Galicia e xestionada pola Biblioteca Nacional de Galicia co obxectivo de difundir e preservar o rico acervo bibliográfico galego.

Nestes intres poden se consultar máis de 1700 obras e case un millón de imaxes dixitalizadas. Tamén conta cunha ampla hemeroteca con publicacións periódicas que van dende o ano 1803 ata o 2000. O documento máis antigo que podemos ver está datado no ano 1517.

Os usarios ten ao seu dispor dous tipos de buscas: unha sinxela e outra avanzada e índices por autor, título, materias. lugares e editores.

[Biblioteca Dixital Galega Galiciana]

Abrirá o ciclo o venres 7 a poeta Mª do Carme Kruckenberg

O Verbum vigués acolle a segunda edición de Poéticas para unha vida

(04-Maio-2010)

Unha nova edición de Poéticas para unha vida arrancará este venres no marco incomparable do Verbum vigués, fronte a praia de Samil.

Durante quince días a oralidade, a visualidade, a palabra e a expresividade, toda ela poesía inaudita, tomarán a Casa das Palabras.

O venres 7 principiará o ciclo Poéticas María do Carme Kruckenberg a partires das 20.00 h. Ao día seguinte dobre sesión con Yolanda Castaño ás 20.00 h. e a Compañía de David Fernández Rivera ás 21.00 h.

Nas dúas fins de semana seguintes estarán no Verbum Micropoetisa Ajo, Quico Cadaval, Dax31, (na Rúa Príncipe), Inéditos Libres, Avelino Saavedra, Antón Lopo, Estela Lloves e Ad Hoc. No Verbum proxectarase de sesión continúa diversos videos.

[Descargar o cartel de Poéticas para unha vida]

Do 9 ao 14 de maio

V Semana do Libro e a Lectura de Carballo

(04-Maio-2010)

O Pazo da Cultura de Carballo acollerá do desde o 9 ata o 14 de maio a V Semana do Libro e a Lectura de Carballo. Esta cita, organizada polo Concello carballés e a Asociación Socio-Pedagóxica Galega (AS-PG) coa colaboración de Caixanova e Conservas Calvo, contará con obradoiros, exposicións, contacontos, teatro e maxia e afondará en disciplinas como a regueifa, a gráfica creativa, a oralidade, a dramatización, a escrita creativa, a música ou a expresión corporal.

Evencio Ferrero, alcalde de Carballo, resaltou durante a presentación do programa a importancia de esta iniciativa para "que faga bos lectores e cidadáns libres".

[Programa da V Semana do Libro e a Lectura de Carballo]

Na Biblioteca da Muller do Concello de Muxía

A Galería Mulleres dedica o mes de maio a Rosalía de Castro

(04-Maio-2010)

A Galería de Mulleres, nada coma actividade de difusión da Biblioteca da Muller da Biblioteca Municipal de Muxía, dedica o mes de maio á poeta Rosalía de Castro.

Na Biblioteca da Muller do concello de Muxía o usuario poderá atopar un variado e amplo número de exemplares de e adicados a Rosalía de Castro.