Afonda sobre a Rosalía defensora da lingua e do pobo galego

María Pilar García Negro gaña o premio 'Vicente Risco' de Ciencias Sociais cun traballo sobre Rosalía de Castro

(28-Febreiro-2010)

A escritora, sociolingüista e profesora María Pilar García Negro é a gañadora do XV Premio 'Vicente Risco' de Ciencias Sociais polo seu ensaio O clamor da rebeldía. O nacemento do ensaio na literatura galega contemporánea, simultáneo ao nacemento da conciencia de xénero: análise e interpretación de textos rosalianos. Neste traballo, García Negro reflexiona con gran madurez sobre a figura de Rosalía non só como fundadora da literatura galega contemporánea senón tamén como membro dun colectivo que, nunha situación totalmente adversa e de xeral desprestixio de Galicia e dos galegos, soubo reivindicar a lingua galega e tamén a dignidade das galegas e galegos como pobo.

O xurado desta XV edición do premio 'Vicente Risco' estivo composto por Fernando  Acuña Castroviejo (en representación do Concello de Castro Caldelas), Teresa  Devesa Graña (en representación do Concello de Allariz), Luís Martínez-Risco Daviña  (en representación da Fundación Vicente Risco), Francisco Fernández Rei (en  representación da Fundación Sotelo Blanco) e Xosé María Eguileta Franco (en  representación da Fundación Vicente Risco e Fundación Sotelo Blanco). Coa asignación económica establecida nas bases do concurso, María Pilar García  Negro verá publicado o seu traballo na editorial Sotelo Blanco.

Do 2 ao 5 de marzo en Santiago de Compostela

Estaleiro e Corsarias organizan as I Xornadas Galegas de Edición Independente

(28-Febreiro-2010)

Do 2 ao 5 de marzo terá lugar na Biblioteca Nodal 'Ánxel Casal' de Santiago de Compostela as I Xornadas Galegas da Edición Independente organizadas por Estaleiro Editora e Corsarias.

As entidades organizadoras das xornadas pretenden crear un espazo anual en que os axentes da edición independente galega poidan reflexionar sobre o estado do sector, sobre as súas estruturas e sobre as súas dinámicas de funcionamento. O evento será, para lograr estes obxectivos, un lugar de encontro entre editoras independentes, asociacións culturais con produción editorial, escritores e consumidores. No evento, os diferentes axentes da edición independente galega poderán participar en mesas de debate, conferencias e presentacións de materiais con outros editores de Portugal, Euskadi e Madrid.

Ao longo destes catro días das Xornadas organizaranse palestras, mesas redondas e presentacións divididas en dúas sesións por día.

[Programa das I Xornadas Galegas de Edición Independente]

Asinarase o 8 de marzo o acordo para situar esta biblioteca na Cidade da Cultura

Creación da Biblioteca Concepción Arenal de Estudos das Mulleres

(28-Febreiro-2010)

O vindeiro 8 de marzo conmemórase o Día Internacional da Muller. Nesa data a Secretaría Xeral da Igualdade e a Consellería de Cultura asinarán un acordo para a creación, na Cidade da Cultura, da Biblioteca Concepción Arenal de Estudos das Mulleres, biblioteca que recompilará o importante fondo bibliográfico e documental que en materia de estudos das mulleres se ten agrupado durante case vinte anos de políticas de igualdade en Galicia.

Por un traballo sobre a fonética e o léxico do galego empregado en Zolle (Guntín)

Vázquez Somoza recibe o premio do III Certame de Investigación Condado de Pallarés

(28-Febreiro-2010)

O filólogo guntinés Xosé Luís Vázquez Somoza recibiu o pasado venres no concello de Taboada o primeiro premio correspondente ao III Certame de Investigación Condado de Pallares polo seu traballo sobre a fonética e o léxico do galego que se emprega en Zolle, a súa parroquia natal, pero engadindo ademais ao devandito estudo un enfoque antropolóxico. Polo seu premio, amais da dotación económica, Vázquez Somoza verá publicada a súa obra nunha tiraxe de 1000 exemplares que editará a Área de Cultura da Deputación de Lugo a través do seu servizo de publicacións.

O xurado do Condado de Pallares de Investigación que outorgou o premio a Xosé Luís Vázquez Somoza estivo formado por: Carlos Baliñas Pérez, profesor da facultade de Humanidades de Lugo; María Xesús Nogueira Pereira, profesora do mesmo centro; Jaime Delgado Gómez, licenciado en Arqueoloxía; e María Socorro Castro Suárez, en representación da entidade organizadora, a asociación Amigos do Mosteiro de Ferreira de Pallares.

Esta é a III edición do Certame de Investigación Condado de Pallares, un premio aberto a obras sobre lingüística, historia, arte, arqueoloxía, etnografía e folclore no antigo condado de Pallares, que estaría formado polos actuais concellos de Guntín, Portomarín, Taboada, Chantada e Carballedo.

Durante o acto de entrega rememoráronse algunhas das afinidades entre o escritor de Vila de Cruces e o pintor de lalinense

Neira Vilas recibe o Premio Laxeiro 2010

(23-Febreiro-2010)

Xosé Neira Vilas recibiu hoxe de mans do conselleiro de Cultura e Turismo, Roberto Varela, o Premio Laxeiro 2010. Roberto Varela gabou a carreira do galardoado, afirmando que "é un dos grandes nomes da nosa cultura e un referente literario, intelectual e, sobre todo, humano".

Esta sétima edición do premio ten como obxectivo reivindicar a obra e a memoria de Laxeiro a través de persoeiros fundamentais da cultura e das artes galegas.

No transcurso da entrega do premio, resaltáronse as afinidades entre o premiado neste 2010, Xosé Neira Vilas e José Otero Abeledo, máis coñecido como Laxeiro, "por compartir o don extraordinario de repropoñer en formas aparentemente simples, inmediatamente comunicativas, toda unha tradición cultural" así como posuír "a cualidade rara e preciosa, de creadores verdadeira e sentidamente populares". Lembrouse igualmente como se coñeceron Neira Vilas e Laxeiro, fai case sesenta anos, na biblioteca do Centro Galego de Bos Aires.

Cúmprense 173 anos do nacemento da poeta máis importante das letras galegas

A AELG organiza unha lectura simultánea no aniversario de Rosalía de Castro

(23-Febreiro-2010)

A Asociación de Escritores en Lingua Galega (AELG) conmemorará mañá mércores o 173º aniversario do nacemento de Rosalía de Castro cunha lectura pública simultánea en diferentes cidades do país.

A Coruña. Ás 18.00 h. no monumento a Curros Enríquez. Coa colaboración da Concellaría de Cultura do Concello da Coruña.

Lugo. Ás 18.00 h. na Rúa Nóreas, a carón da casa que fai esquina con Rúa San Pedro, onde viviu Rosalía de Castro entre 1864 e 1868. Hai unha placa indicativa.

Santiago de Compostela. Ás 17.30 h. onde a estatua de Rosalía, no Paseo da Ferradura da Alameda.

Vigo. Ás 19.00 h. no nº 12 da Rúa Real, onde a tipografía de Juan Compañel. Coa colaboración da Concellaría de Cultura do Concello de Vigo.

Ferrol. Ás 18.00 h. na Praza do Himno Galego.

Pontevedra. Ás 18.00 h. na estatua de Castelao, onda o Museo de Pontevedra. 

Os gañadores daranse a coñecer no transcurso da Cea das Letras o 17 de abril

Os escritores galegos elixen os finalistas dos Premios AELG 2010

(19-Febreiro-2010)

Os membros da Asociación de Escritores en Lingua Galega (AELG) deron a coñecer hoxe os finalistas dos Premios AELG, uns galardóns concedidos por escritores/as para escritores/as.

Da conxunción de votos emitidos nunha primeira quenda polos asociados/as á AELG, elaborouse unha listaxe de obras finalistas correspondentes a cada xénero dos mencionados, sobre a que os socios e socias emitirán de novo o seu voto nunha segunda quenda para elixir as obras gañadoras destes Premios AELG 2010.

Os finalistas aos Premios AELG 2010 son:

Narrativa: Monte Louro (Xerais) de Luís Rei Núñez, O Cabo do Mundo (Xerais) de Xabier Quiroga e Unha historia que non vou contar (Xerais) de Cid Cabido.

Poesía: Deter o día cunha flor (Baía) de Luz Pozo Garza e O pouso do fume (Espiral Maior) de Dores Tembrás.

Nota: Na sección de poesía O paraíso das sombras (Biblos) de Cesáreo Sánchez Iglesias, resultando elixido finalista, foi retirado a petición do autor na súa condición de presidente da Asociación de Escritores en Lingua Galega, entidade organizadora dos Premios.

Teatro: Delimvois (Xerais) de Rubén Ruibal, Medea dos fuxidos e outras pezas (Biblos) de Manuel Lourenzo e Sempre quixen bailar un tango (Xerais) de Teresa González Costa.

Ensaio: A mecánica da maxia. Ficción e ideoloxía en Álvaro Cunqueiro (Galaxia) de Manuel Forcadela, As razóns do galego. Apelo á cidadanía (Galaxia) de Henrique Monteagudo, Cartas de republicanos galegos condenados a morte (1936-1948) (Xerais) de Xesús Alonso Montero e Soñadores e Familia. Os personaxes na narrativa de Álvaro Cunqueiro (3c3 editores) de María Xesús Nogueira.

Literatura Infanto-xuvenil (AELG-Gálix): Ás de bolboreta (Xerais) de Rosa Aneiros, Lúa do Senegal (Xerais) de Agustín Fernández Paz, O Brindo de Ouro II. A táboa da Hospitalidade (Xerais) de Xesús Manuel Marcos e Valados (Xerais) de Agustín Fernández Paz.

Tradución: Flanagan. Flash-Back (Xerais) de Jaume Ribera e Andreu Martín, en tradución de Isabel Soto; O museo da inocencia (Galaxia) de Orhan Pamuk, en tradución de Bartug Aykam e María Alonso Seisdedos; Obra dramática completa (Galaxia) de Sarah Kane, en tradución de Manuel F. Vieites; e Residente privilexiada (Trifolium) de María Casares, en tradución de Ana Belén Martínez Delgado.

Blogs Literarios: A canción do náufrago (http://franciscocastro.blogaliza.org), de Francisco Castro; As uvas na solaina (http://asuvasnasolaina.blogspot.com), de Marcos Valcarcel; Axenda Cultural da AELG (http://axendaaelg.blogaliza.org), de Algueirada (Acción cultural na rede); Brétemas (http://bretemas.blogaliza.org), de Manuel Bragado; Cabaret Voltaire (http://cabaretvoltaire.canalblog.com), de Jaureguizar; e O levantador de minas (http://olevantadordeminas.blogaliza.org), de Alfredo Ferreiro.

Mellor traxectoria xornalística (AELG-Colexio de Xornalistas): Belén Regueira, Ana Romaní, Xosé Manuel Pereiro, Bieito Iglesias, Manuel Rivas, Fran P. Lorenzo, Lino Braxe e Anxo Tarrío.

Os gañadores de cada unha das seccións darase a coñecer o vindeiro 17 de abril en Santiago de Compostela no transcurso da Cea das Letras, na cal galardoarase ao escritor arxentino Juan Gelman co premio de 'Escritor Galego Universal'.

Recitais, actuacións, instalacións e un curso de poesía en Valadares

Esta fin de semana... sopa de alg-as

(18-Febreiro-2010)

A Asociación Cultural alg-a, comunidade de arte e acción libre, ten programado para esta fin de semana unha serie de actividades adicadas á poesía.

A poeta ceense María Lado impartirá un obradoiro de poesía mañá venres de 18.00 h. a 20.00 h. e o sábado de 11.00 h. a 13.00 h. no Centro Cultural de Valadares (Vigo). Os interesados en asistir poden chamar ao número de teléfono 687052901 ou escribindo un mail a mig@alg-a.org.

O resto de actividades programadas por alg-a desenvolveránse o sábado 20 de febreiro a partires das 17.30 h. coas accións, lecturas e actuacións de: o colectivo A porta verde do sétimo andar, Elvira Riveiro, Silvia Penas, Ledicia Costas, Mr Caracter acústico, Leo y Arremecaghona e AID. Deixarase o micro aberto para espontáneos que queiran recitar os seus poemas ou as súas lecturas.

A xornada rematará coa poesía visual a cargo de Ellas (Antía Sánchez + Lucía Romaní), a acción instalación "escritos de vento" por nelaque e a videoinstalación "autopoema colectivo" por Mig. 

Realizará un investimento para os próximos dous anos de 300.000 euros

Cultura e Turismo promove a creación de grandes proxectos editoriais

(16-Febreiro-2010)

A Consellería de Cultura e Turismo, a través da Dirección Xeral de Promoción e Difusión da Cultura, promoverá durante os anos 2010 e 2011 a promoción, produción e edición dos grandes proxectos editoriais.

Para a realización destes proxectos a Consellería investirá un total de 300.000 euros, distribuídos en dúas anualidades de 150.000 euros cada unha para os anos 2010 e 2011.

Nestes grandes proxectos estaría incluída toda planificación ou plan de realización que procure a excelencia, tanto polo que respecta á presentación formal, xa sexa polos contidos, cando precisen unha atención e unha disposición de medios especialmente custosa para as editoriais que os afronten, ou se plasmen en obras de importancia para o crecemento intelectual de Galicia, e de difícil comercialización no mercado xeral.

Do 21 ao 23 de abril

Pessoa protagonizará as VIII Xornadas Literarias de Neda

(14-Febreiro-2010)

O escritor portugués Fernando Pessoa centrará as VIII Xornadas Literarias de Neda que organiza este concello coa Universidade da Coruña. Ao longo de tres días, expertos na obra de Pessoa debullarán a vida e a obra deste portugués universal.

As VIII Xornadas Literarias principiarán o 21 de abril na Facultade de Humanidades da UDC ás 20.00 h. coas intervencións do Decano Manuel Recuero e do Alcalde de Neda Ignacio Cabezón. De seguido, o profesor Fernando Manuel Cabral Martins, da Universidade Nova de Lisboa, pronunciará a conferencia: Pessoa sem máscaras.

Ao día seguinte, a Casa da Cultura de Neda acollerá unha Mesa-coloquio con alumnos e alumnas do IES “Fernando Esquío”, baixo a dirección da profesora Mª Dolores París Fraga titulada Vida e obra de Pessoa. Tras a mesma, o profesor Fernando Cabral Martíns e Elías Torres, da USC departirán sobre : Pessoa: vale a pena viver!(A paixao pola vida na obra do poeta, a ànsia de viver plenamente).

O venres 23 de abril rematarán estas Xornadas Literarias na Casa da Cultura de Neda con unha mesa-coloquio onde, baixo o epígrafe de Pessoa e o cinema, contará coa intervención na mesma de José Manuel Sande, membro do CGAI, Carlos Quiroga, profesor na Universidade de Santiago; e Carlos G. Figueiras, Licenciado en Filoloxía Galego-Portuguesa.

Ao remate de cada día haberá actividades culturais relacionadas: cine, música, mostra bibliográfica, etc. A inscrición ás xornadas é de balde, os interesados deben dirixirse á Casa da Cultura de Neda (Avda. de Algeciras, 61), no teléfono 981390233 ou a través do correo electrónico cultura@neda.dicoruna.es. 

Participarán José Luís Peixoto, Miguel Anxo Fernán-Vello, Luís Alberto de Cuenca, Luísa Castro, Kirme Uribe e María Lado

O 23 de febreiro arranca a segunda edición do ciclo Poetas di(n)versos

(14-Febreiro-2010)

A Concellería da Coruña, dirixida por María Xosé Bravo, acompañada pola poeta Yolanda Castaño, presesentaron o segundo ciclo de Poetas Di(n)versos.

Se na primeira edición Luís Eduardo Aute, Luís García Montero e Joan Margarit uniron os seus versos aos de Lucía Aldao, Luz Pozo e Garza e Xosé María Álvarez Cáccamo, respectivamente, nesta edición o portugués José Luis Peixoto e Miguel Anxo Fernán-Vello, Luis Alberto de Cuenca e Luísa Castro, e Kirmen Uribe e María Lado compartirán escenario e versos nunha serie de recitais que comezarán o 23 de febreiro na Casa da Cultura Salvador de Madariaga da Coruña.

O recital de Luís Alberto de Cuenca e Luísa Castro está programado para o 16 de marzo e o de Kirme Uribe e María Lado para o 20 de abril.

A praia dos afogados, O Cabo do Mundo e Areaquente compiten pola mellor novela en galego

Xa se coñecen os finalistas do XVI Premio 'Arcebispo de San Clemente'

(10-Febreiro-2010)

Hoxe déronse a coñecer os finalistas das tres categorías do XVI Premio 'Arcebispo Juan de San Clemente' que convoca anualmente o IES Rosalía de Castro de Santiago de Compostela.

En literatura galega os tres finalistas son A praia dos afogados (Galaxia) de Domingo Villar, O cabo do mundo (Xerais) de Xabier Quiroga e Arequente (Sotelo Blanco) de An Alfaya.

En castellano os finalistas son La noche de los vientos (Seix Barral) de Antonio Muñoz Molina, Puente del Alma (Galaxia Gutenberg) de Julián Ríos e El país de la canela (Norma) de William Ospina.

Na categoría de novela estranxeira os finalistas desta edición son Algo que contarte (Anagrama) de Hanif Kureishi, El día antes de la felicidad (Siruela) de Erri de Luca e Minuto de silencio (Maeva) de Siegfrid Lenz.

Gravación de poemas de uxío Novoneyra

A AS-PG convoca o concurso Curtas para Rosalía

(10-Febreiro-2010)

A Asociación Socio-Pedagóxica Galega (AS-PG) ven de convocar o concurso Curtas para Rosalía, co obxectivo de achegar e mostrar ao público calquera aspecto da vida ou da obra de Rosalía de Castro, así como para demostrar a vixencia e a actualidade da súa obra.

Para a celebración do devandito concurso, a AS-PG preparou un espazo na súa web onde se publicarán os títulos e a ficha técnica das curtas admitidas a concurso. Así mesmo, serán publicadas as obras finalistas en cada categoría.

As bases do concurso establecen dous premios: un premio de dous mil euros á mellor curtametraxe máis un diploma conmemorativo e un premio de mil euros máis diploma ás obras cuxos realizadores/as ou directores/as sexan menores de 30 anos.

Gravación de poemas de Uxío Novoneyra

Por outra banda, e para conmemorar o Día das Letras Galegas a Uxío Novoneyra neste 2010, a AS-PG levará a cabo un casting a través da web para seleccionar unha voz masculina e unha voz feminina que participen na gravación dun DVD que sobre Uxío Novoneyra a entidade está a elaborar. Os interesados en participar deberán gravar en formato mp3 dous poemas do libro Os Eidos que enviarán á AS-PG a través do seguinte formulario: http://www.as-pg.com/Podcast/ShowRecommendationForm.do. Os envíos haberán de se facer antes do día 22 de febreiro de 2010.

[Descargar as bases do concurso]

Cantares de Manuela de Barro, Cerdedo na obra do Padre Sarmiento, Carta arqueolóxica do concello de Cerdedo e Cerdedo in th Voyager I

Cerdedo é un mundo da mán de Morgante

(05-Febreiro-2010)

Edicións Morgante lanza dunha tacada catro títulos da serie Cerdedo in the Voyager, da autoría de Calros Solla. Deste xeito, o autor pontevedrés recolle e centraliza nesta colección de Morgante diversos traballos inspirados no patrimonio cultural do concello de Cerdedo, e que van dende o ensaio e a recolleita de cantigas á creación poética.

Os catro libros publicados son: Cantares de Manuela de Barro, onde Calros Solla recolle a transcrición das cantigas que Manuela de Barro cantaba desde a súa nenez, con dous novos cantos de reis a maiores da primeira edición. En Cerdedo na obra do Padre Sarmento o autor achega unha cumprida restra de pasaxes da obra édita de Sarmento, nas cales o relixioso amentaba con oufanía o lar cerdedense. A Carta arqueolóxica do concello de Cerdedo ceiba do esquecemento cento vinte e cinco xacementos prehistóricos localizados no concello de Cerdedo. Todos os xacementos inventariados foron gravemente alterados ou mesmo destruídos. O carto título é unha nova edición de Cerdedo in the Voyager I. Qui sumus?, Unde venimus?, Quo imus? Son, todas tres, as preguntas transcendentais que estruturan o poemario. Cada unha destas cuestións é tratada de diferentes xeitos polo poeta que non atopa respostas e que se abandona á desesperanza. Cerdedo, Galicia queren ser dignificados dende e para o universo, buscándolle a finalidade do ser a unha entidade étnica ben determinada, pero non apreciada polos propios.

Premios, conferencias, encontros, roteiros... serán algunhas das actividades programadas pola asociación de escritores

A AELG presenta o seu programa de actividades para este 2010

(05-Febreiro-2010)

A Asociación de Escritores en Lingua Galega (AELG), na súa Asemblea Anual de Socios e Socias, celebrada o pasado 23 de xaneiro no Museo do Pobo Galego, acordou, entre outras cuestións, o programa de actividades para 2010, do que cómpre salientar:

A concesión do premio “Bós e xenerosos” ao Colectivo de Concellos organizadores do Premio Blanco Amor de Narrativa., e da Letra “E”, “Escritora na súa Terra”, a Marilar Aleixandre.

Entrega do galardón “Escritor Galego Universal” ao arxentino Juan Gelman na Cea das Letras, acontecemento literario onde se entregarán os Premios AELG XXX Aniversario. O premio para institucións irá para o Salón do Libro de Pontevedra. Este acto será ademais a oportunidade para exteriorizar a celebración do XXX aniversario da AELG, e homenaxear a todos os membros das respectivas directivas que a asociación tivo ao longo da súa historia.

Celebrarase tamén o ciclo de conferencias “III Encontro Cidade da Coruña”, a “II Xornada da Crítica”, o “IV Encontro de Escritores/as Novos/as”, a I “Xornada de Literatura e Ensino” e a “III Xornada de Literatura de Tradición Oral”.

Participará igualmente na edición do Galeusca, que organiza este ano a AELG na Coruña.

“A escrita do conto popular” é o título dun congreso que se celebrará en colaboración coa USC, e levará a cabo un Roteiro Novoneyra, no que colabora a Deputación de Lugo, e o ciclo “Escritores na Universidade”, organizado coa UDC e o Concello da Coruña.

Editaranse as actas da II Xornada de Literatura de Tradición Oral, e se lle dará continuidade a gravación en vídeo dos socios/as da AELG e do proceso de dixitalización para o Centro de Documentación da web da asociación, así como da apertura dunha sección na web coa historia da AELG a través dos informes de prensa.

Está prevista a celebración de 2 Polafías na Coruña, 2 en Lugo, 1 en Pontevedra e 1 en Ourense, así como a colaboración coa Concellería de Cultura de Compostela para a elaboración de 4 roteiros literarios na cidade.

Finalmente, a AELG organizará un Cortexo Cívico conmemorativo do traslado dos restos mortais de Rosalía de Castro, desde Padrón ao Panteón de Galegos Ilustres.

A exposición estará aberte dende o 4 ata o 27 de febreiro

O grupo Brais Pinto na Casa Museo Casares Quiroga da Coruña

(05-Febreiro-2010)

No ano 1958 un grupo de intelectuais e escritores galegos, de ideoloxía de esquerda e nacionalistas, fundou o grupo Brais Pinto en Madrid. Integraban este grupo Xosé Luís Méndez Ferrín, Bernardino Graña, Reimundo Patiño, Xosé Fernández Ferreiro, Bautista Álvarez, Ramón Lorenzo, César Arias, Herminio Barreiro e Xosé Ramón Fernández-Oxea ("Ben-Cho-Shey"). O nome propúxono Fernández Ferreiro a partires da historia dun afiador das súas terras de Nogueira de Ramuín que percorreu o mundo e foi atropelado por un tranvía en Madrid. Este grupo mantivo unha intensa actividade cultural chegando a crear unha editorial.

Case cincuenta anos despois, a Casa Museo Casares Quiroga acolle unha exposición sobre este grupo. Segundo a Concelleira de Cultura da Coruña, María Xosé Bravo, esta mostra pretende destacar a importancia do grupo Brais Pinto dentro da evolución do galeguismo cultural e político,presentar un panorama de recoñecemento dos grupos nacionalistas galegos, mostralo como contribución á renovación literaria galega, trazar perfís dos integrantes, adaptar a mostra aos deseños curriculares dos distintos ciclos escolares e ofrecela como actividade complementaria dentro do aula.

A mostra divídese en tres apartados: no primeiro deles preténdese contextualizar ao grupo dentro dunha xeografía e unha época política e social. Para iso presentamos unha descrición dos feitos políticos, sociais e culturais destacables nacionais e internacionais. Unha segunda parte incide na orixe, o por que do seu nome, quen o integra, as súas dúas etapas, onde se reunían, que lugares frecuentaban, que actividades desenvolvían, que publicacións editaban. Por último, unha terceira parte céntrase nas obras recoñecidas e emblemáticas que xorden nas dúas épocas nas que se divide o grupo e as aportacións á cultura galega (Escola da Tebra, Nova
Narrativa, expresionismo, informalismo) e a súa situación dentro da evolución do nacionalismo galego.

A mostra estará aberta ao público dende o 4 de febreiro ata o 27 de febreiro.

Once artistas participan nesta exposición

O Verbum de Vigo acolle unha exposición que pescuda na obra e figura de Cabanillas a través da fotografía

(05-Febreiro-2010)

O Verbum. Casa das Palabras de Vigo acolle a exposición Unha viaxe con Ramón Cabanillas a través da Fotografía.

Co gallo da celebración no 2009 do Ano Cabanillas o Verbum quere programar con esta exposición unha visión íntima e persoal sobre o traballo do autor, que achegara ao Ramón Cabanillas máis íntimo a través da escolma de trinta e tres traballos realizados por once fotógrafos galegos actuais baseados na obra de Cabanillas, presente tamén na exposición.

Os artistas seleccionados para a exposición son: Iñaki Abella, Quico Álvarez, Eduardo Apariz, Luís Barreiro, Mónica Irago, Martina Miser, Emilio Moldes, José Luiz Oubiña, Carlos Puga, Xaquín Rosales e Mónica Vila; quenes realizaron un labor de introspección e afondamento na lírica do poeta do Salnés, sendo esta exposición o resultado fotográfico dese traballo de creación libre, íntimo e persoal.

Na mostra o visitante pode contemplar as instantáneas que foron inspiradas e guiadas pola obra do poeta que, xunto cun pequeno texto dos autores explicando o seu traballo, acompaña estas imaxes.

A mostra Unha viaxe con Ramón Cabanillas a través da Fotografía está organizada pola asociación Candea (Asociación de ensinantes do Salnés) e dirixida e comisariada por Fotoxoguete.

O 6 de febreiro no Círculo de Belas Artes

A canción da auga, música e poesía en Lugo

(05-Febreiro-2010)

A música de F. Mompou, de R. Schumann ou de C. Debussy unirase ao versos de Ramón Cabanillas, de Federico García Lorca ou de Paul Verlaine no recital poético-musical titulado A canción da auga que se celebrará mañá sábado no Salón Rexio do Círculo de Belas Artes de Lugo ás 19.00 h.

Xunto ao piano de Alexis Delgado e a voz da soprano de Laura F. Alcalde, recitarán os versos Joaquín Araujo, Manolo Rivas, Miguel Mato, Tonina Gay, Lois Diéguez, Isidro Novo, Lino Braxe, Matesa Bourio, Carlos Boves e Xosé Saqués.

[Descargar o programa]

Repartiranse cartaces e trípticos dos gañadores

As obras gañadoras da V Noite da Edición de Galicia 2009 promociónanse nas principais librarías do país

(05-Febreiro-2010)

Tras os premios entregados no pasado mes de decembro durante a V Noite da Edición de Galicia 2009 organizado pola Asociación Galega de Editores (AGE), dende esta semana as principais librarías de Galicia amosarán no seu escaparate e nos mostradores os cartaces e dípticos editados pola AGE para promocionar as obras gañadoras de ditos premios.

Os traballos gañadores, nas súas diversas categorías, foron: Sidecar (Galaxia) de Alberto Lema, Premio Ánxel Casal ao libro de ficción; Cartas de republicanos galegos condenados a morte (Xerais) de Xesús Alonso Montero, Premio Ánxel Casal ao libro de non ficción; Ciclo de Xúpiter (Linteo) de Millán Picouto, Premio Ánxel Casal ao Libro de poesía ou teatro do ano; A araña e máis eu (Kalandraka) de Fran Alonso, Premio Neira Vilas ao mellor libro infantil e xuvenil; a tradución dos Contos Completos de Edgar Allan Poe, I e II (Galaxia) por Eva Almazán, Premio Lois Tobío ao tradutor do ano 2009; A grande viaxe (OQO) de Gabriel Pacheco, Premio Isaac Díaz Pardo ao ilustrador do ano 2009; e o Premio Rosalía de Castro á iniciativa editorial do ano 2009 para as Fotobiografías sonoras da editorial Ouvirmos.

O Museo ampliará os seus fondos sobre o monxe beneditino con este manuscrito

Presentado no Museo de Pontevedra un manuscrito autógrafo e inédito do Padre Sarmiento

(05-Febreiro-2010)

O Museo de Pontevedra acolleu a pasado luns a presentación dun manuscrito autógrafo inédito do Padre Sarmiento datado no século XVIII. O manuscrito é autógrafo, orixinal e inédito. Está encadernado en pergamiño (30 x 21 cm.) e composto por 28 follas numeradas polo anverso e o reverso, o que fai un total de 56 páxinas. En canto ó contido, este alberga, dun lado unha reseña do libro titulado “Libro Bezerro” do monasterio benedictino de Celanova (Ourense), que ocupa as páxinas de 1 á 3 e está firmada o 1 de xaneiro de 1752; doutro lado, unhas reflexións críticas sobre a obra “Celanova Ilustrada” ou “Anales de San Rosendo”, da autoría de Frei Benito de la Cueva, prior de aquel cenobio, texto, neste caso, sen data, tal vez por non haber completado Sarmiento os seus comentarios, feito relativamente habitual na súa maneira de investigar e escribir (páxinas 5-56).

Este documento ten un gran interese para o Museo de Pontevedra, xa que este é a institución galega que posúe o máis rico conxunto de materiais (documentais, bibliográficos, artísticos e persoais) relacionados coa figura do insigne monxe beneditino.

O vento da illa, Nunca me esquecerei de ti e Indoor optan os premios do xurado e do públicoa

Xa se coñecen os finalistas do IV Premio 'Diario Cultural' de Teatro Radiofónico

(05-Febreiro-2010)

As obras presentadas baixo os lemas O vento da illa, Nunca me esquecerei de ti e Indoor foron seleccionadas como finalistas do IV Premio 'Diario Cultural' de Teatro Radiofónico, organizado polo programa Diario Cultural da Radio Galega e o Centro Dramatico Galego (CDG), co patrocinio da AGADIC (Axencia Galega das Industrias Culturais).

O xurado desta edición está integrado por Rubén Ruibal, Ánxeles Cuña, María Paredes, Camilo Franco e pola directora do programa Ana Romaní. A directora da compañía Sarabela Teatro Ánxeles Cuña dirixirá a adaptación radiofónica das obras finalistas, que serán agora dramatizadas por un equipo de actores e actrices coordinado polo CDG e emitidas ao longo do mes de marzo na Radio Galega. Trala sua emisión daranse a coñecer o Premio do Xurado dotado con 3.000 euros e o Premio da Audiencia dotado con 3.000 euros. Os tres textos finalistas serán editados nun CD-Libro.

Este premio 'Diario Cultural' de Teatro Radiofónico vense desenvolvendo dende a ano 2007 e foron gañadores nas pasadas edicións David Rodríguez (2007) por O Bambam (premios do xurado e do público); Begoña García (2008) por O mal da vaca (premio do xurado) e Lois Pérez por Saltimbanqui (premio do público); e Rubén Ruibal e César Candelas por Peter Buckley (premios do xurado e do público).