Sustitúe a Antonio Gil Merino, falecido en outubro do pasado ano

Henrique Monteagudo entra na Real Academia Galega

(30-Abril-2010)

O Plenario da Real Academia Galega, reunido hoxe en sesión ordinaria, acordou nomear académico electo a Henrique Monteagudo para ocupar a vacante que se produciu tras o falecemento no pasado mes de outubro do académico numerario Antonio Gil Merino.

Nado en Muros en 1959, Henrique Monteagudo é profesor de Filoloxía Galega e Portuguesa da Universidade de Santiago de Compostela. Dende o ano 2000 é secretario do Consello da Cultura Galega, onde coordina a súa Sección de Lingua. Actual co-director da revista Grial, pertence ao seu consello de redacción desde 1988.

Monteagudo é autor dunha extensa obra centrada principalmente no ensaio e na investigación do eido sociolingüístico e foi recoñecido cos premios Losada Diéguez de Investigación no ano 2000 e co Premio da Crítica de Galicia en 2009 pola súa obra etras primeiras. O Foral de Caldelas. A emerxencia da escrita en galego e os primordios da lírica trobadoresca (Fundación Barrié de la Maza). A súa publicación máis recente é As razóns do galego. Apelo á cidadanía, publicado por Galaxia.

O dia 1 comeza a 29ª edición da Feira do Libro de Santiago de Compostela

Un maio de letras para a cidade de Compostela

(29-Abril-2010)

Santiago de Compostela acollerá este mes de maio un completo programa de actividades que xirarán en torno ao mundo das letras e dos libros.

O sábado 1 princiapiará a 29ª edición da Feira do Libro, que ata o domingo 9 estará localizada no parque da Alameda. Este ano contará como novidade cun stand monográfico con títulos de ámbito local e na cal os visitantes que se acheguen terán ao seu dispor ata sesenta referencias de todos os xéneros. Esta iniciativo partiu do grupo de traballo Editores de Compostela, fundado polas editoriais compostelás Sotelo Blanco, Positivas e Alvarellos.

Pola súa banda, o concello compostelán promove diferentes actividades no programa Maio das Letras, que inclúe recitais de poesía, obradoiros, festas, probas lúdicas e unha exposición.

Os recitais de poesía serán parte fundamental da programación. Un total de 24 poetas confirmaron a súa participación nos diferentes recitais que se desenvolverán no Pub As dúas, o venres 7 de maio; o venres 21 no Café Bar A Conga; e o venres 28, no Café Casino. Comezarán todos ás 22.00 h.

Dende o Concello de Santiago preparouse tamén un obradoiro de animación á lectura denominado Libri Terrae, que se impartirá en varios escenarios: o mércores 19 no CSC das Fontiñas (9.00 h. e 11.30 h.); o xoves 20 na Biblioteca Ánxel Casal (9.00 h. e 11.30 h.); o venres 21 na Casa das Asociacións (9.00 h. e 11.30 h.); o luns 24 na Biblioteca Fundación Caixa Galicia (9.30 h. e 12:30 h.); e o martes 25 no Centro Social Caixanova (9.00 h. e 11.30 h.).

A banda deseñada tamén terá protagonismo cun obradoiro e cunha exposición. O debuxante Primitivo Marcos impartirá un obradoiro sobre banda deseñada o mércores 19, ás 19.00 h. na Casa das Asociacións. Ao día seguinte, no mesmo escenario e á mesma hora, encargarase da sesión Álex Cal. Nas mesmas instalacións de Cornes permanecerá do 18 de amio ao 2 de xuño a exposición Universo Galimatías, o cómic galego.

[Programa da 29ª edición da Feira do Libro de Santiago de Compostela] 

Polas súas obras A praia dos afogados (Galaxia) e Os instrumentos musicais na tradición galega (Difusora)

Domingo Villar e Pablo Carpintero, premiados cos Losada Diéguez

(27-Abril-2010)

A praia dos afogados (Galaxia) de Domingo Villar e Os instrumentos musicais na tradición galega (Difusora) de Pablo Carpintero foron galardoados co XXV Premio Losada Diéguez de creación e investigación e ensaio, respectivamente.

O premio, concedido polos concello de Boborás e Carballiño, contou cun xurado formado por un representante da Real Academia Galega, Consello da Cultura Galega, Museo do Pobo Galego, Deputación Provincial de Ourense, alcalde do Concello de Carballiño, Cátedra de Lingua e Literatura Galega da Universidade de Santiago e as Universidades de Vigo e da Coruña.

Será o domingo 9 de maio

O web www.uxionovoneyra.com organiza unha xornada de evocación e homenaxe a Uxío Novoneyra no seu espazo natural

(25-Abril-2010)

O web www.uxionovoneyra.com loitou moito coa finalidade de acadar para o poeta do Courel o Día das Letras Galegas. Milleiros de apoios sumáronse a esta iniciativa e este 2010 dedicarase literariamente á figura de Novoneyra.

Agora, dende o mesmo espazo, organízase unha xornada de homenaxe a Uxío Novoneyra previa aos actos oficiais que se desenvolverán o vindeiro 17 de maio. Será o domingo 9 de maio cun completo programa de actividades.

Os actos principiarán ás 11.00 h. na Ferrería de Seoane, onde se estacionarán os autos. De seguido, camiñada dende a Ferrería con destino a Parada, lugar natal de Uxío Novoneyra. No percorrido, que durará aproximadamente dúas horas, faranse paradas para recitar poemas de Novoneyra. Este acto será aberto ao público.

Ás 13.00 h. comezará a homenaxe, xunto a casa natal do poeta, na cal evocarase a Uxío Novoneyra e ao seu espazo natural, o Courel. No transcurso deste acto intervirán músicos e cantautores. Dende a organización comunican que todos aqueles que desexen participar neste acto central deben comunicalo á organización a través do correo uxionovoneyra@gmail.com.

Como punto e seguido ata o día 17 de maio pecharase esta xornada sobre as 15.00 h. cunha ofrenda floral diante da casa de Uxío Novoneyra, que fará un grupo de escolares do Courel.

Levará por título Baixo a sombra das pedras flotantes

A Fundación Arte y Derecho axuda á creación dunha novela gráfica de Kiko da Silva

(25-Abril-2010)

A novela gráfica Baixo a sombra das pedras flotantes sobre a que está a traballar o ilustrador Kiko da Silva acadou unha das axudas promovidas pola Fundación Arte y Derecho co fin de financiar proxectos creativos de autores que se expresan a través da creación visual. Ao mesmo, presentáronse un total de 684 proxectos.

Baixo a sombra das pedras flotantes será publicada contra fin de ano por Xerais en galego e por Norma en castelán.

[Máis información na web da Fundación Arte y Derecho]

Estará dirixido polo escritor Francisco Castro

Caixanova organiza en Compostela un obradoiro literario

(25-Abril-2010)

Baixo o lema Gústache escribir? O pracer de crear textos Caixanova organiza en Santiago de Compostela un obradoiro de creación literaria impartido polo escritor Francisco Castro.

O obxectivo deste obradoiro literario é afondar no exercicio das técnicas literarias para descubrir como perfeccionar a escrita de relatos. As aulas terán lugar os días 3, 10, 24 e 31 de maio, entre as 19.00 h. e as 21.00 h. As persoas interesadas en asistir ao curso poden formalizar a matrícula no web www.caixanova.es e no teléfono 902 504 500.

Intervirán X. Carlos Hidalgo, José Manuel Sande, Leo i Arremecághona, Gonzalo Hermo, Paula Pérez, Rubem Centeno e David Castro

A galería Sargadelos da Coruña acolle un novo ciclo de escrita(s)

(20-Abril-2010)

X. Carlos Hidalgo, José Manuel Sande, Leo i Arremecághona, Gonzalo Hermo, Paula Pérez, Rubem Centeno e David Castro son os participantes dunha nova edición de escrita(s), organizado polo poeta e director da galería Sargadelos da Coruña Claudio Pato.

Neste ciclo de intervencións o obxectivo márcase en afondar nas relacións que se dan na producción de textos, facendo especial fincapé en como todas estas marcas e liñas de forza sempre heteroxéneas chegan no trato co outro.

As conferencias desenvolveranse entre os días 23 de abril e o 17 de xuño ás 20.00 h. na Galería Sargadelos da Coruña con entrada de balde.

Programa

29.de abril. José Manuel Sande: A viaxe do comediante.

6 de maio. Leo Arremecághona: Pan! Pan!! Punk!!!

20 de maio. Gonzalo Hermo: Palabras que mancan: sensibilidade masoquista e poesía-Outra.

3 de xuño. Paula Perez: Sete horas antes.

10 de xuño. Ruben Centeno: Rostos do desejo em guerra: umha leitura política e bastarda de Jean Genet.

17 de xuño. David Castro: Obradoiro obxetor.

[Descargar o programa de escrita(s)]

A reeleción foi por unanimidade do Plenario

Ramón Villares renovará o seu mandato durante catro anos ao fronte do Consello da Cultura Galega

(20-Abril-2010)

O Plenario do Consello da Cultura Galega reelixiu na sesión celebrada hoxe á tarde por unanimidade a Ramón Villares como presidente da institución para un segundo mandato, que se prolongará do 2010 ata o 2014.

O trámite seguinte, se así o considera o Parlamento de Galicia, será a comparencia de Ramón Villares na Cámara, posibilidade contemplada no Regulamento do Consello da Cultura Galega como expresión de boas prácticas institucionais. Deseguido producirase o nomeamento oficial no Consello da Xunta de Galicia, a proposta do Conselleiro de Cultura e Turismo, Roberto Varela, vocal do Plenario e que estivo presente na votación celebrada esta tarde.

O reelixido presidente Ramón Villares quixo recoñecer o traballo desenvolvido desde o 2006 pola Comisión Executiva, que permitiu executar o noventa por cento do orzamento previsto. Villares aludiu igualmente os obxectivos de seguir facendo do Consello un laboratorio de ideas, amais das súas funcións asesoras e consultivas, e de continuar traballando a prol dunha maior proxección exterior da cultura galega. 

Terá lugar entre os días 21 e 25 de abril

Ferrol acolle a primeira feira do libro do ano

(19-Abril-2010)

Ferrol inaugura o calendario das Feiras do Libro que percorrerán a xeografía galega nos videiros meses.

Concertos didácticos, presentación e sinaturas de libros, sesións de contacontos, unha maratón de lectura, exposicións, charlas-coloquios, conversas con escritores, obradoiros de elaboración de libretas e marcapáxinas, xogos populares ou actividades dirixidas a centros de ensino, entidades e público en xeral serán algunhas das propostas que os lectores atoparán entre os días 21 ao 25 de abril en varios escenarios da cidade como o Cantón de Molíns, o Centro Cultural Carvalho Calero, a Biblioteca Municipal da Praza de España e o Teatro Jofre.

Como é habitual, acudirán a Ferrol durante a celebración deste evento recoñecidos escritores para a tradicional sinatura de libros. Entre eles, a ex directora da Biblioteca Nacional e escritora Rosa Regás, Premio Nadal 1994 e Premio Planeta 2001, o escritor e ex ministro de Cultura César Antonio Molina, os profesores José Antonio Ponte Far ou Xosé Manuel Suárez, sen esquecer a representación local, como Vicente Araguas (pregoeiro da edición deste ano), Rosa Aneiros, Jorge Llorca ou Antón Cortizas.

A Feira do Libro deste ano terá unha mención moi especial, xa que estará adicada ao escritor ferrolán universal Juan Farias.

[Programa da 21º Feira do Libro de Ferrol]

O mítico Café Tortoni acollerá un faladoiro cos lectores galegos

O libro galego desembarca un ano máis na Feira do Libro de Bos Aires

(19-Abril-2010)

O libro galego estará un ano máis na Feira Internacional do Libro de Bos Aires, un dos eventos editoriais máis importantes de Latinoamérica.

Galicia terá unha presenza destacada na Feira coa participación de 21 editoriais pertencentes á Asociación Galega de Editores (AGE) que expoñen o mellor da súa produción nun stand compartido co Centro Galego de Bos Aires. O expositor conta co patrocinio da Dirección Xeral de Promoción e Difusión da Cultura, da Consellería de Cultura e Turismo.

A presenza editorial acompañarase de diversas actividades nas que tomará parte a representación galega. O día 22 será á inauguración oficial da Feira e o día 23, festividade do Día do Libro, o stand galego acollerá a sinatura de libros por parte dos escritores Benigno Campos, autor de A cociña dos Larpeiros (Galaxia), e Xosé Carlos Caneiro, autor, entre outras moitas obras, de Un xogo de apócrifos (Xerais). Tamén colaborará nas activiades culturais a escritora María do Cebreiro Rábade. Outro dos momentos máis intensos da axenda cultural será o faladoiro cos lectores galegos da capital arxentina que terá lugar o día 24 no emblemático Café Tortoni, en cuxas vitrinas poden verse textos e obras de autores galegos. Nesta actividade participará tamén a xornalista galego-arxentina Débora Campos.

Organizado polo MACUF terá lugar do 28 de abril ao 22 de xuño

Maestr@s de papel para coñecer o lado oculto da creación literaria

(19-Abril-2010)

O Museo de Arte Contemporánea (MACUF) da Coruña organiza o ciclo de conferencias Maestr@s de papel, que se desenvolverán no museo coruñés dende o 28 de abril ata o 22 de xuño.

Programación

Mércores 28 de abril, 20:00 h. José María Merino: A alquimia literaria

Xoves 13 de maio, 20:00 h. Marcos Calveiro e Luís Rei Núñez: A imaxe reinventada.

Xoves 10 de xuño, 20:00 h. Fina Casalderrey, An Alfaya e Rosa Aneiros: Literatura con voz feminina: ¿unha escritura de rebelión no panorama do século XXI?

Martes 22 de xuño, 20:00 h. Luís Mateo Díez: Os fíos condutores da ficción: o azar, a memoria e o esquecemento.

A entrada para as conferencias é de balde ata completar o aforo.

Unha historia que non vou contar, Deter o día cunha flor, Cartas de republicanos galegos condenados a morte (1936-1948), Delimvois, Lúa do Senegal, O museo da inocencia, Manuel Rivas, Brétemas e Juan Gelman foron os premiados

Entrega de premios na Cea das Letras 2010

(19-Abril-2010)

O sábado celebrouse a tradicional Cea das Letras da Asociación de Escritores en Lingua Galega (AELG), unha data de convivencia onde se entregan os premios á mellor obra publicada no 2009 nas modalidades de: ensaio, literatura infantil e xuvenil, poesía, narrativa, tradución, teatro, traxectoria xornalística e blog literario, así como á institución que salientara na defensa e difusión da cultura galega. Os premiados saen das votacións realizadas polos propios socios da AELG.

Premiados

Narrativa: Unha historia que non vou contar (Xerais) de Xosé Cid Cabido.

Poesía: Deter o día cunha flor (Baía) de Luz Pozo.

Ensaio: Cartas de republicanos galegos condenados a morte (1936-1948) (Xerais) de Xesús Alonso Montero.

Teatro: Delimvois (Xerais/IGAEM) de Rubén Ruibal.

Literatura Infantil e Xuvenil: Luz do Senegal (Xerais) de Agustín Fernández Paz (Premio en colaboración con Gálix).

Tradución: Bartug Aykam e María Alonso Seisdedos, pola tradución da obra O museo da inocencia(Galaxia) de Orham Pamuk.

Mellor traxectoria xornalística: Manuel Rivas (Premio en colabración co Colexio de Xornalistas).

Blog Literario: Manuel Bragado, polo seu blog Brétemas.

Institucións: Salón do Libro Infantil e Xuvenil de Pontevedra.

Escritor Galego Universal: Juan Gelman.

O crítico e escritor Xosé Manuel Eyré represento á crítica galega no acto celebrado en Barcelona

O cabo do Mundo e Deter o día cunha flor, galardoados co Premio da Crítica

(19-Abril-2010)

Esta fin de semana coñecéronse en Barcelona os gañadores dos Premios da Crítica Española, concedidos pola Asociación Española de Críticos Literarios, que cada ano salientan os mellores títulos de poesía e narrativa en cada unha das linguas do estado español.

O representante da crítica galega, Xosé Manuel Eyré, fixo público que os premiados eran O cabo do mundo (Galaxia) de Xabier Quiroga, en narrativa, e Deter o día cunha flor (Baía), de Luz Pozo Garza, en poesía.

Da novela de Xabier Quiroga destacouse que "combina a extracción de personaxes da Historia da vida cotidá nun pobo do sur da provincia de Lugo (Escairón), coa doación a esa mesma Historia de personaxes que son logradas creacións literarias. De forma e maneira que ambas (extracción e doación) encaixan á perfección no puzzle, ese enorme puzzle que construímos, con toda a vontade e dignidade de que somos capaces, todos os que non queremos que sexan esquecidas tantas traxedias como o Alzamento militar franquista de 1936 provocou e que algúns pretenden desactualizar interesadamente". Pola súa banda, na notificación do premio, subliñouse que Deter o día cunha flor "presenta un diálogo artístico entre a poesía de Luz Pozo Garza e os grabados de José Valentín Díaz, diálogo harmonizado polo deseño de Xosé Tomás. Un intenso ton de misticismo sincretista abre o poemario coa serie “Aleph”, en complicidade intertextual cos autores admirados, de Borges a Dante; e péchao tamén con ese clima a serie “Carta de Beatrice Vía-Láctea” . Unha vez máis, o libro envíase como ofrenda ao amigo/amado ausente, Eduardo Moreiras (“Lotus no corazón”), por quen cobra sentido o desenvolvemento lírico do motivo tomado dunha poeta chinesa do s.XI que se lamentaba de que a beleza dunha flor recén nacida no ía poder reter o tempo de amor nun instante de eternidade (“Li Yian pide deter o día”)".

O resto dos premiados

En lingua castelá, José María Pozuelo Ybanco, anunciou que os galardóns correspondían a El viajero del siglo, de Andrés Neuman , en narrativa, e a Fämulo en poesía, poemario do autor Francisco Javier Lerín.

Javier Rojo comunicou que en lingua vasca correspondían a Autokarabana, de Fermín Etxegoien, en narrativa, e a Eroriaren logica, de Juanra Madariaga, en poesía.

Pola súa banda Álex Broch fixo públicos os correspondentes á lingua catalá, que recaeron en Contes Russos, de Francesc Serés, en narrativa, e a L´ombra dels dies vermells, de Carles Miralles, na modalidade de poesía.

Do 27 de abril ao 6 de maio en Santiago de Compostela

Un curso analizará a cultura contemporánea galega

(19-Abril-2010)

Entre os días 27 de Abril e 6 de Maio terá lugar en Santiago de Compostela o Curso de Cultura Contemporánea Galega (CCCG), organizado pola Associaçom Galega da Língua (AGAL) e a Cátedra UNESCO de Cultura Luso-Brasileira da USC co apoio da Deputación da Coruña, do Concello de Santiago de Compostela e das Faculdades de Filoloxía e Ciencias da Comunicación da USC.

O obxectivo do curso é establecer un espazo de reflexión académica e profesional interdisciplinar sobre a actualidade dunha cultura galega desacralizada e viva, definitoria de como nos vemos os galegos e da imaxe que de nós internacionalizamos.

Os profesores da USC Carlos Quiroga, Elias Torres, Ramom Flores das Seixas e José Pereira Fariña e o director de UNINOVA Gustavo Marcos serán os encargados da parte teórica do curso, que se divide nas sesións: Culturas Tradicionais, Culturas de Élite, Culturas de Masas, Culturas Empresariais e Culturas Libres.

Estas conferencias, veranse complementadas cun ciclo de mesas redondas en que participarán 20 representantes do tecido cultural galego nas súas dimensións empresarial e asociativa.

As aulas presenciais do curso celebraranse no Auditorio de Galicia e nas Faculdades de Filoloxía e Xornalismo e complementaranse cun foro virtual de debate on-line. A matrícula, que poderá realizarse ata o próximo dia 26, garante un certificado de 30 horas e un crédito da Universidade de Santiago.

[Máis información]

O Padroado da Fundación Pedrón de Ouro destacou a traxectoria de Fermín Bouza Álvarez para outorgarlle o Pedrón de Honra

Camilo Nogueira, premiado co Pedrón de Ouro 2010

(19-Abril-2010)

O Padroado da Fundación Pedrón de Ouro ven de facer público os nomes dos galardoados co Pedrón de Ouro 2010 e o Pedrón de Honra.

O político, economista e escritor Camilo Nogueira foi recoñecido co Pedrón de Ouro pola súa traxectoria en prol da cultura nacional.

Pola súa banda, o sociólogo e escritor Fermin Bouza Álvarez foi recoñecido co Pedrón de Honra pola súa traxectoria e pola súa defensa irredutíbel da lingua galega desde todas as tribunas públicas nas que participa.

A AGE mantivo os primeiros contactos con empresas do sector para a posta en marcha da Escola 2.0

Cara unha plataforma para o libro dixital

(15-Abril-2010)

A Asociación Galega de Editores (AGE) vén de asentar os alicerces para o desenvolvemento da nova plataforma de contidos para o libro dixital. Foi no transcurso dunha xornada de traballo celebrada nas instalacións da editorial Sotelo Blanco na que representantes da Asociación, co seu presidente Alfonso García Sanmartín, á fronte, puideron coñecer as propostas de traballo de varias empresas do ámbito das TIC de Galicia.

Un dos proxectos presentados foi o do Cluster galego das TIC que supón unha plataforma de distribución de contidos na que se contemplan dous portais diferenciados: un para o libro xeneralista, e outro para o libro electrónico de materiais educativos. É precisamente neste segundo eido no que a AGE pretende avanzar na elaboración de contidos dixitais que posibiliten a posta en marcha da Escola 2.0 incluída no Plan Abalar da Consellería de Educación para o vindeiro curso 2010-2011. Ademais, a plataforma tecnolóxica tamén contempla a inclusión de tendas en liña tanto para os libreiros como para os editores, así como ferramentas de redes sociais e de formación. Outra das vantaxes desta nova tecnoloxía é a posibilidade que ofrece de almacenamento de tódolos contidos e o control dos mesmos por parte dos usuarios da plataforma. A proposta do Cluster, presentada polo profesor da Facultade de Telecomunicacións do Campus de vigo, José Carlos López Ardao, contempla un proxecto nunha fase bastante avanzada que se desenvolvería en diversas fases.

Na rolda de contactos de onte, os membros da AGE tamén puideron coñecer as propostas das Universidades da Coruña e de Vigo, que puxeron sobre a mesa as diversas posibilidades de colaboración no proxecto cos recursos que se poidan establecer. Concretamente, por parte da Universidade da Coruña estiveron representantes da empresa Galebook, xestada no viveiro empresarial da institución académica; mentres que pola Universidade olívica estivo o profesor José Luís Martínez Orge.

Asemade, na xornada de traballo de onte tamén presentaron as súas ofertas e posibilidades de colaboración as empresas Grammata, Imaxin Software e Netex Knowledge Factory. Nos vindeiros meses, a AGE asinará acordos de colaboración coas empresas das TIC galegas coa fin de axilizar o traballo de constitución da plataforma tecnolóxica para o libro do futuro.

O galardón entrégase ininterrompidamente dende o ano 1083

A Fundación Otero Pedrayo distingue co premio Trasalba 2010 a Xosé Ramón Barreiro

(14-Abril-2010)

A executiva da Fundación Otero Pedrayo determinou por unanimidade conceder o Premio Trasalba 2010 ao historiador e académico Xosé Ramón Barreiro Fernández, presidente ata hai pouco da Real Academia Galega.

O premio, que ten carácter honorífico, entregarase na festa literaria que anualmente se celebra na casa grande de Cimadevila, en Trasalba, no derradeiro domingo do mes de xuño.

Este recoñecemento ten que ver coa súa traxectoria ao servizo da cultura galega, na liña histórica de continuidade que representa a memoria de Otero Pedrayo e a Xeración Nós, atendendo aos seus méritos como intelectual galeguista e, moi principalmente, como renovador da historiografía galega.

Xosé Ramón Barreiro Fernández (Ribeira, 1936) é unha das figuras sobranceiras da historiografía galega contemporánea. Licenciouse e doutorouse en Dereito Canónico pola Universidade Gregoriana de Roma. En 1974 obtivo a licenciatura en Filosofía e Letras, con premio extraordinario, e doutorouse en Historia pola Universidade de Santiago de Compostela coa tese O campesiño galego no século XIX: economía e sociedade. Foi catedrático de Historia Contemporánea de Galicia na mesma universidade, onde desempeñou as funcións de decano da Facultade de Xeografía e Historia. Desde o 20 de decembro de 2001 ata o 23 de xaneiro de 2010 foi presidente da Real Academia Galega, substituíndo a Francisco Fernández del Riego. A súa obra histórica repártese en numerosos libros e estudos. Os seus traballos de investigación céntranse sobre todo na historia contemporánea de Galicia, entre outros ‘O movemento obreiro en Galicia’ (1990) ou os seus catro volumes sobre os séculos XIX e XX. A súa última publicación é a Historia Social da Guerra da Independencia en Galicia.  

O 22 de abril no Salón Teatro de Santiago de Compostela

A lectura e a danza, conferencia organizada polo Centro Coreográfico Galego

(14-Abril-2010)

Organizada polo Centro Coreográfico Galego (CCG), a conferencia impartida por María Dolores Fojón Polanco A lectura e a danza pretende achegar unha visión da danza a través da literatura e preséntase como xeito de unir as celebracións este mes do Día Internacional do Libro (23 de abril) e do Día Internacional da Danza (29 de abril).

Á conferencia, que terá lugar o día 22 de abril ás 19.30 h. no Salón Teatro de Santiago de Compostela con entrada de balde ata completar a capacidade do teatro, seguirá un coloquio cos asistentes no que tamén participará a profesora do CCG Pilar Peña.

Fojón Polanco defenderá a necesidade de abordar conxuntamente danza e literatura, a través dun repaso ameno polos pensadores e escritores que, ao longo dos séculos, deixaron a súa reflexión sobre a actividade creativa e, concretamente, a coreográfica: Platón , Aristóteles , Cicerón , Rousseau , Kant , Schiller , Schopenhauer , Nietzsche , Wittgenstein , Leonardo da Vinci , Shakespeare , Descartes, Molière , Stendhal , T . Gautier, Tolstoi... Realizará tamén un breve percorrido pola historia da danza en Grecia, Roma, Idade Media, Renacemento e Idade Moderna, Romanticismo, Academicismo, Danza Moderna Americana e Danza Moderna Europea. A chamada "literatura bailada" será outro dos aspectos que trasladará ao público, desde a traxedia grega até Lewis Carrol e os nosos contemporáneos, pasando por Shakespeare e Cervantes.

O Servizo de Publicacións da USC e Alvarellos Editora sacan novos títulos sobre o autor homenaxeado no Día das Letras Galegas

Aparecen novas publicacións sobre Uxío Novoneyra

(14-Abril-2010)

Un dos aspectos máis interesantes da celebración do Día das Letras Galegas, amais de conmemorar a figura dun autor de recoñecido prestixio e traxectoria literaria -e aínda que as veces esquecido- é a aparición de xoias de incalculable valor sobre o homenaxeado que noutros contextos sería moi difícil que viran a luz.

Se hai unhas semanas anunciabamos a publicación do magnífico volume publicado polo Centro Ramón Piñeiro dentro dos seus Cadernos, agora saen do prelo sendas publicacións baixo o carimbo do Servizo de Publicacións da Universidade de Santiago e de Alvarellos Editora.

Pola súa banda, Alvarellos Editora incorpora a súa colección Rescate Tempo de elexía nunha edición bilingüe galego-castelán que retoma o espírito da primeira publicación desta obra (Madrid, 1966), con tradución ao castelán do propio Uxío Novoneyra e ampliada con respecto a aquela primeira versión. Esta obra incorpora un CD que recolle o recital inédito e íntegro (de 25 minutos de duración) que Uxío Novoneyra ofreceu en Lugo, no salón de actos do Instituto Lucus Augusti, en 1982. Nese recital, que comeza polo Poema dos Caneiros e conclúe coa Letanía de Galicia incluíu 33 poemas, entre eles, a maior parte das súas elexías. Este documento sonoro foi gravado directamente por Henrique Alvarellos, director desta editorial (daquela estudante de primeiro de bacharelato nese centro educativo), e conservado todos estes anos no seu formato orixinal en casete. Agora, debidamente dixitalizado e remasterizado, preséntase cunha moi boa calidade de son.  

O primeiro libro que se comentará será Se o vello Simbad volvese ás illas de Álvaro Cunqueiro

Novo clube de lectura na Nodal de Coruña dirixido por Fernández Naval

(14-Abril-2010)

Os afeccionados á lectura teñen unha data todos os xoves na biblioteca nodal 'Miguel González Garcés' da Coruña no clube de lectura en galego recen creado.

O clube reunirase todos os xoves de 19.00 h. a 20.30 h. e estará dirixido polo escritor Francisco X. Fernández Naval. O público de destino do clube son os lectores adultos e o xénero a tratar nas reunións será a narrativa. De feito, o primeiro libro a comentar será Se o vello Simbad volvese ás illas de Álvaro Cunqueiro.

Os interesados en asistir e participar deben apuntarse na Sala de Consulta da propia Biblioteca ou ben no teléfono 981 170218 de 8.30 h. a 15.00 h.

Unha vez finalizado o proceso, os fondos serán publicamente accesibles a través da internet

A Fundación Penzol e a Consellería de Cultura asinan un convenio de colaboración para a difusión dos fondos da Fundación

(14-Abril-2010)

O Vicepresidente da Fundación Penzol, Alfonso Zulueta, e o conselleiro de Cultura e Turismo, Roberto Varela, asinaron onte un convenio de colaboración entre as dúas entidades para a conservación e difusión do seu fondo bibliográfico e documental cifrado en 41.609 exemplares. Ambas entidades promoven deste xeito accións dirixidas á recuperación, conservación, acceso e estudo, e difusión á sociedade do patrimonio documental e bibliográfico da Fundación Penzol a través da conversión a formato dixital dos fondos identificados no convenio asinado hoxe.

A encargada de sufragar os gastos económicos será a Fundación Cidade da Cultura de Galicia, quen achegará unha partida económica de 92.780 euros para sufragar os gastos da dixitalización e creación de metadatos dos fondos bibliográficos (libros, folletos, e publicacións periódicas) e documentais (de orixe pública, semipública ou privada, así como especiais e coleccións variadas) conservados no arquivo e na biblioteca da Fundación Penzol. Unha vez dixitalizados, os resultados do proceso poranse a disposición de ambas as dúas fundacións, e serán incluídos pola Fundación Cidade da Cultura nos fondos dixitais da Biblioteca de Galicia, para a súa utilización e difusión pública, de xeito que permita a consulta dos mesmos mediante as novas tecnoloxías da comunicación.

A totalidade dos fondos da colección Penzol caracterízanse todos por ter como denominador común temas ou asuntos referidos a Galicia. Hoxe en día as coleccións están formadas por uns 38.500 títulos de monografías impresas datadas desde o século XV, 106 títulos de libros manuscritos, aproximadamente un milleiro de diplomas en pergameo, 44 documentos de cartografía histórica, 589 unidades de instalación de documentos do arquivo (93,78 m.l.) e uns 2.370 títulos de publicacións periódicas desde o século XIX.

O ciclo de conferencias está organizado pola Concellería de Cultura da Coruña e a AELG

Literatura e viaxe teñen unha cita na Coruña

(12-Abril-2010)

O Pazo de María Pita na Coruña acolleu esta mañá a presentación do programa de conferencias que terá lugar dentro do Atopo Cidade da Coruña que este ano chega á súa terceira edición baixo a lema Literatura e viaxe e que organiza a Concellería de Cultura da Coruña en colaboración coa Asociación de Escritores en Lingua Galega (AELG).

Na rolda de prensa, a Concelleira de Cultura destacou a grandísima calidade dos cinco escritores que se achegarán a nosa cidade para mostrar as diferentes afeccións que podemos descubrir na palabra viaxe. O presidente da Asociación de Escritores en Lingua Galega, Cesáreo Sánchez Iglesias sinalou a importante actividade literaria da cidade de Coruña  presente na súa historia pero tamén na actualidade que se reflicte en actividades como este ciclo de conferencias que "logrará cumprir un soño como é poder contar con escritores de recoñecido prestixio internacional neste III Atopo Cidade da Coruña".

A primeira das conferencias terá lugar o vindeiro luns 19 de abril co poeta arxentino Juan Gelmán, Premio Nacional de Poesía en 1997 e Premio Cervantes de Literatura no 2007.

A seguinte cita literaria será o 28 de abril e nesta ocasión o encontro será con Miguel Anxo Murado, autor galego dunha prolífica obra narrativa, poética, ensaística e dramática e que cubriu como xornalista as guerras de Croacia e Bosnia e máis a Segunda Intifada Palestina. É autor dos volumes Fin de século en Palestina (Galaxia), A segunda Intifada (Ediciones del Oriente y el Mediterráneo) ou Ruído, Relatos de guerra (Galaxia).

Xa no mes de maio continuará este III Atopo Cidade da Coruña cunha cita o 5 de maio coa poetísa Hélia Correia, escritora lisboeta recoñecida como unha das revelacións da novelística portuguesa da xeración dos 80 e 90, a pesar da súa obra narrativa estar sempre impregnada de discurso poético.

O 11 de maio o encontro será o escritor, tradutor e editor arxentino, Alberto Manguel. Coautor do Dicionario de lugares imaxinarios, un catálogo de terras de fantasía, illas, cidades e outros lugares que só existen na literatura reflexionou por escrito sobre a importancia do lector e o seu propio acto de ler, desde a perspectiva deste de converterse en destino e orixe de toda a creación literaria, á vez que acredita en que ler non será só no futuro un acto de rebeldía, senón un acto de supervivencia.

A última das citas deste Atopo Cidade da Coruña terá lugar o 19 de maio con Xabier P. Docampo , escritor chairego, autor dunha prolífica obra narrativa pensada para o lectorado máis nova, galardoado con múltiples premios e recoñecementos literarios nacionais e internacionais, como o Premio Nacional de Literatura Infantil e Xuvenil en 1995.

Todas as citas terá lugar na Real Academia Galega ás 20.00 h. A entrada será gratuíta até completar aforo.

Autor coñecido no relato curto, gaña o prestixioso premio coa súa primeira novela longa

Iván García Campos faise co XVIII premio de novela Blanco Amor

(12-Abril-2010)

O coruñés Iván García Campos é o gañador do XVIII premio de novela longa Blanco Amor pola obra O imposible de desatar.

O xurado, formado por Bieito Iglesias, María Xesús Nogueira, Teresa Bermúdez, Carlos Figueiras e Xesús Constela, inclináronse pola obra de García Puentes de entre as 23 obras presentadas, destacando a súa "óptica vangardista" e a súa "aposta innovadora e arriscada para reflectir as sombras existentes nas relacións humanas".

Para Iván García Campos O imposible de desatar é a súa primeira novela longa, pero xa acadara varios galardóns na narración ou relato breve, como a 34ª edición do Premio Nacional de Narracións Curtas Modesto Rodríguez Figueiredo, Os Viadutos no 2007, o Ánxel Fole de relato curto no 2006, o Manuel Orestes ou o Cidade de Ourense no 2004.

O Premio de novela longa Blanco Amor ten a particularidade de ser organizada conxuntamente por 52 concellos galegos, recaendo a organización cada ano en un deles. Este ano o concello organizador foi Poio.

O obxectivo e a realización de actividades relacionadas coa obra de escritores galegos

Cultura colaborará este ano coas Fundacións Valle-Inclán e a Torrente Ballester

(12-Abril-2010)

A Consellería de Cultura e Turismo ven de asinar cadanseu acordo de colaboración coas Fundacións Gonzalo Torrente Ballester e Valle-Inclán.

Tanto a Fundación Valle-Inclán, dirixida por Xerardo Fernández Albor, como a Consellería dirixida por Roberto Varela, consideran esencial o establecemento de accións conxuntas que permitan desenvolver un programa conxunto para a realización de distintas actividades relacionadas coa obra de escritores galegos de recoñecido prestixio. Así preténdese impulsar o coñecemento da obra literaria de Valle Inclán, unha das grandes figuras da cultura galega de todos os tempos.

Dentro destas actividades atópanse a edición da revista Bradomín, unha publicación periódica de interese valleinclano, a publicación dun libro relacionado coa bibliografía de Valle Inclán, o congreso valleinclano e actuacións da Escola de Teatro Valle Innova para a posta en marcha de obras valleinclanistas expandindo a obra por todos os concellos das catro provincias de Galicia. Segundo o convenio, vixente ata o 15 de decembro de 2010, para a realización conxunta destas actividades, a Consellería comprométese a achegar á Fundación Valle Inclán a cantidade de 25.000 euros.

Convenio coa Fundación Torrente Ballester

No marco deste programa tamén se inclúe o obxectivo de dinamizar a biblioteca persoal de Torrente Ballester, así como o coñecemento e a divulgación entre os escolares da vida e obra do escritor ferrolán, cuxo legado se atopa na sede da Fundación en Santiago de Compostela. Asemade, neste ámbito traballarase para achegar aos escolares o mundo da literatura como enriquecemento cultural e pracer persoal.

No cincuenta aniversario de Memorias dun neno labrego

A Aula da Uned de Lalín acollerá un curso sobre Neira Vilas

(12-Abril-2010)

Do 26 ao 28 de abril a Aula da Uned de Lalín acollerá o curso Xosé Neira Vilas, da Galicia de Balbino á Galicia de hoxe, dirixido pola profesora Pilar González Yanci.

Ao longo dos tres días de duración do curso analizarase polo miúdo a vida e obra de Xosé Neira Vilas, prestando especial atención á que posiblemente sexa a súa obra máis coñecida: Memorias dun neno labrego, e estudaranse as mudanzas que sufriu a Galicia dos últimos cincuenta anos, onde se terá un especial achegamento á Galicia rural e á Galicia emigrante. Entre os poñentes e profesores que participarán no curso están Víctor F. Freixanes, Xesús Alonso Montero, Dolores Vilavedra e Victorino Pérez Prieto, entre outros.

Para pechar o curso, na última xornada os alumnos visitarán a Fundación Xosé Neira Vilas no concello de Vila de Cruces, onde serán recibidos polo propio Neira Vilas.

Sarria acolleu a entrega dos XIX premios Irmandade do Libro

A praia dos afogados de Domingo Vilar, mellor libro do 2009 para os libreiros

(11-Abril-2010)

Onte coñecéronse na localidade lucense de Sarria os gañadores da XIX edición dos premios Irmandade do Libro, a cita annual co que a Federación de Libreiros de Galicia pretende recoñecer a actividade literaria do pasado ano.

Se hai uns días coñecíamos a nova da entrega do premio ao mellor autor do pasado ano á poeta ribadense Luz Pozo Garza, o sábado coñecéronse os premiados nas diferentes categorías:

Mellor libro do 2009: A praia dos afogados (Galaxia) de Domingo Villar.

Mellor obra editorial: Colección contemporánea de Rinoceronte Editora.

Mellor libraría: Porta da Vila de Viveiro.

Mellor centro de ensino: CEIP San Martiño de Salcedo (Pontevedra).

Mellor institución: Asociación Cultural Monte Branco de Ponteceso.

Fomento á lectura: Espazo Lectura de Gondomar.

Os premios non teñen dotación económica agás en centros de ensino e fomento á lectura, que recibirán un cheque de 2.000 euros en libros. Os gañadores recibirán unha escultura do artista Ismael López.

Do 14 ao 17 de abril

Ferrol acolle un ano máis a Semana de Poesía Salvaxe

(08-Abril-2010)

A vindeira semana arranca en Ferrol a III Semana de Poesía Salvaxe. Ao longo de catro días algúns dos puntos máis significativos da cidade encheranse de versos e poesía.

A III Semana de Poesía Salvaxe principiará o mércores 14 de abril no Cantón de Molíns coa participación de Víctor M. Díez, Guillermo Ferrández e Karlotti. Xa á noite, o pub Os Cazadores acollerá os poemas visuais desde Lisboa de Tiago Gomes.

O xoves 15 a poeta cospeitense Emma Couceiro estará recitando os seus poemas no Mercado da Magdalena, para deixar paso a lecturas, performances e música por diversas rúas ferrolás. No serán o barrio do Inferniño será escenario dun espectáculo simbiótico entre verso e música. Este segunda xornada rematará ás 22.00 h. no pub El Bata coa participación de Madammecell.

A poesía no mercado de Recemil abrirá á terceira xornada da Semana de Poesía Salvaxe de Ferrol cos versos de María Couceiro. Ás 13.00 h. Antonio Gómez estará "poñendo patas arriba a desorde" na Praza de España. Pola tarde, a poeta cacereña Ada Salas achegarase ata Caranza para demostrar por qué está considerada como unha das voces máis importantes na poesía castelá. Para poñer punto e seguido, Javier Semprún achegará ao público O corvo de Edgar Allan Poe. Será ás 22.00 h. na capela do Torrente Ballester.

Como remate a esta Semana, o bar Os Cazadores servirá como escenario do poeta visual e artista experimental Antonio Gómez. Será ás 13.30 h. do sábado. O punto e seguido ata a edición do vindeiro ano estará na Capela do Torrente Ballester coa música de 3 Gatos Swing.

[Programa da III Semana de Poesía Salvaxe de Ferrol]

O sábado 10 de abril celebrarase a XIX edición dos premios Irmandade do Libro

Luz Pozo será galardoada co premio ao mellor autor/a polos libreiros galegos

(08-Abril-2010)

A ribadense Luz Pozo Garza será unha das protagonistas da XIX edición dos premios anuais Irmandade do Libro que se celebrará o vindeiro sábado 10 de abril en Sarria. A poeta e académica da Real Academia Galega recibirá o premio na modalidade de Autor/Autora, en tanto que nas restantes a decisión está pendente da última reunión do xurado.

O programa dos XIX premios Irmandade do Libro principiará ás cinco da tarde cunha visita guiada á ruta turística Fiz Vergara Vilariño; ás sete e media haberá unha actuación aberta ao público na Casa dá Cultura, a cargo do cómico Avelino González, que ofrecerá un monólogo, e de Yolanda Castaño, cunha lectura poética, e Branca Novoneira, que presentará o seu espectáculo de danza.

Ás nove e media será ofrecida unha recepción e un cóctel no Hotel Alfonso IX. Pasadas as dez haberá unha cea, durante a cal o presidente da federación, Xurxo Patiño, homenaxeará ao desaparecido Víctor López Villarabid entregándolle unha placa á súa viúva, Rocío Rodríguez. Ás once e dez da noite está prevista a apertura dun acto cultural a cargo do escritor e académico Darío Xohán Cabana. Seguidamente será lida a acta do xurado e entregados os premios aos gañadores, que tamén intervirán, así como os representantes das institucións. A despedida será ás 12.00 horas a cargo de Rodríguez Barrio.

Ademais da citada Luz Pozo, serán entregados premios nas modalidades de centros de ensino, institucións, fomento da lectura, obra editorial do 2009, libro do ano e libraría do ano.

Ágora, os libros nas prazas

No Día do Libro, as prazas das capitais galegas serán de papel

(08-Abril-2010)

A artista uruguaia Luz Darriba e a Fundación Cultural Cumulum cubrirán o 23 de abril cun tapiz de libros as prazas do Obradoiro (Santiago de Compostela), María Pita (A Coruña). Praza Maior de Lugo, Praza Maior de Pontevedra e a Praza Maior de Ourense. Ágora, os libros nas prazas enmárcase dentro do Ano do Libro e da Lectura en Galicia.

Esta acción ten por obxectivo poñer o libro e a lectura en valor mediante un modo visual e ao alcance de todas as persoas. Para este proxecto Cumulum xuntará máis de 150.000 libros. A artista Luz Darriba xa foi quen, hai dez anos, de cubrir con máis de 600.000 libros a muralla de Lugo.

Para levar a cabo este proxecto contouse coa colaboración de asociacións, editoriais, librarías, bibliotecas, etc... Unha vez sexan desinstalados estes tapices de libros, os exemplares serán entregados a persoas ou institucións que os necesiten.

A concellería de Cultura da cidade herculina propón un magnífico abano de posibilidades para achegar a lectura á cidadanía

A Coruña, máis que nunca, é unha cidade que le

(06-Abril-2010)

A Coruña 2010, A cidade da que le é a nova campaña de animación lectora posta en marcha pola concellería de Cultura da Coruña e que arranca neste mes de abril e continuará ao longo de todo o ano.

A programación para o mes de abril principiará ps días 9 e 10 de abril no Teatro Rosalía de Castro coa representación da multipremiada representación de teatro A Esmorga. Sarabela Teatro é a encargada de levar ás táboas o clásico de Eduardo Blanco Amor.

O 12 de abril comeza o concurso Biblio-clip, consistente na realización de curtas (dun máximo de 35 segundos) inspirados nas bibliotecas e na lectura.

O Teatro Rosalía de Castro acollerá p 15 de abril, ás 20.30 h. e con entrada de balde, o espectáculo Canto de permanencia, unha homenaxe a Uxío Novoneyra a través de música, audiovisuais e poesía a cargo de Uxía Senlle.

Do 21 ao 25 de abril terá lugar, nos Xardíns de Méndez Núñez, a Festa do Libro. Nesta Festa do Libro dos Xardíns de Méndez Núnez tamén estarán “bibliotecarios/as-mediadores-especialistas” para “receitar” e “recomendar” libros que se poden atopar nas bibliotecas e nas casetas da “festa-feira”.

Para o 26 o alumnado da Escola de Imaxe e Son da Coruña estrea o audiovisual Herdanzas, baseado n'A Esmorga de Blanco Amor.

A Biblioteca do Consulado abre as súas portas cunha visita ao mes (2º xoves de cada mes, ás 18:00h) desde abril para amosar á cidadanía a biblioteca pública máis antiga do estado e os seus fondos.

Os coruñes e visitantes poderán pasear coa literatura seguindo os pasos das figuras literarias de Méndez Núñez, Rosalía de Castro na Coruña e Jenaro Marinhas del Valle.

[A Coruña 2010, A cidade que le]

Os días 8, 9 e 10 de abril

Coruña acolle as I Jornadas de Cultura, Língua e Ensino

(06-Abril-2010)

A Associaçom Galega da Lingua (AGAL), coa colaboración da Universidade da Coruña, organiza as I Jornadas de Cultura, Lingua e Ensino que se desenvolverá na Facultade de Ciencias da Educación entre os días 8 e 10 de abril.

Ao longo destes tres días formularase a través de conferencias e relatorios a situación e realidade nos ámbitos educativos, lingüísticos e culturais de Galicia.

Intervirán nestas I Jornadas Narciso de Gabriel, Bernardo Penabade, Elias Torres, João Aveledo, Carlos Garrido, Filipe PresasMaurício Castro e Pablo Gamallo.

O prazo de inscrición remata mañá. Para os socios da AGAL a inscrición é de balde e de 30 € para os non socios. Despois da participación do persoal nas xornadas, será entregado Diploma do Departamento de Didácticas Específicas por 16 horas.

[Blog das I Jornadas de Cultura, Língua e Ensino]

Na Biblioteca da Muller do Concello de Muxía

A Galería Mulleres dedica o mes de abril á poeta e narradora Francisca Herrera

(06-Abril-2010)

A Galería de Mulleres da Biblioteca da Muller do Concello de Muxía dedica á poeta e narradora Francisca Herrera Garrido (A Coruña, 1869-1950) este mes de abril.

[Textos de Francisca Herrera]

Uxío Novoneyra no Courel pódese atopar en culturagalega.org

Un roteiro permítenos coñecer o Courel de Uxío Novoneyra

(06-Abril-2010)

Se anteriormente foron Rosalía de Castro, Curros Enríquez e Eduardo Pondal, agora Uxío Novoneyra ten o seu propio roteiro grazas ao soportal culturagalega.org.

O roteiro pódese descargar no Google Earth ou no GPS. Este roteiro Uxío Novoneyra foi realizado pola empresa Etnoga e contou coa colaboración da familia de Uxío Novoneyra.

[Roteiro Uxío Novoneyra no Courel]