A nova coñeceuse na Asemblea Xeral celebrada o pasado 21 de xuño en Marsella

A AELG entra a formar parte da Confederación de Escritores Europeos-Federación de Asociacións Europeas de Escritores

(30-Xuño-2009)

A Asociación de Escritores en Lingua Galega (AELG) ven de ser confirmada como membro da EWC-FAEE A.I.S.B.L. (Confederación de Escritores Europeos – Federación de Asociacións Europeas de Escritores), na Asemblea Xeral que tivo lugar o pasado 21 de xuño de 2009 en Marsella.

Xunto coa Asociación de Escritores en Lingua Galega, ingresaron na EWC-FAEE A.I.S.B.L. a Asociación Europea de Escritores Die KOGGE e. V. de Alemaña; a Asociación de Escritores Daneses, de Dinamarca; a Unión de Escritores Bielorrusos, de Bielorrusia; a Asociación de Escritores Eslovenos, de Eslovenia, e a Academia da Lingua Maltesa, de Malta.

Bernardino Graña entrerá como Académico Electo na Real Academia Galega

O poeta do Courel Uxío Novoneyra centrará o Día das Letras Galegas do 2010

(30-Xuño-2009)

O plenario da Real Academia Galega reunido o pasado sábado na súa sede da rúa Tabernas decidiu homenaxear no 2010 co Día das Letras Galegas ao poeta do Courel Uxío Novoneyra.

O mesmo día acordouse o ingreso na Real Academia Galega como Académico Electo do poeta de Cangas do Morrazo Bernardino Graña.

Uxío Novoneyra

Uxío Novoneyra naceu o día 19 de xaneiro de 1930 en Parada do Courel no seo dunha familia labrega. Sendo estudante de bacharelato en Lugo coñeceu a Manuel María e ambos frecuentaron o trato de intelectuais da xeración anterior, como Luís Pimentel, Anxel Fole, Celestino Fernández de la Vega e Ramón Piñeiro.

Con 19 anos Uxío trasladouse a Madrid onde se matriculou na Facultade de Filosofía e Letras e regresou en 1951 para facer o servizo militar.

Entre 1953 e 1962 volve vivir no Courel obrigado por unha pleuresía que o tivo á morte. Nesta prolongada reclusión coñecerá a María Mariño e o seu marido Roberto Pose. Este encontro entre o mozo poeta e María Mariño dará lugar a unha das máis frutíferas relacións literarias de Galicia.

En 1962 Uxío traballou en Madrid facendo programas de radio e televisión e participando nalgunha das actividades do grupo Brais Pinto ata o seu regreso a Parada en 1966 reclamado polos seus pais, xa vellos e enfermos. En 1973 casou con Elba Rei, coa que tivo tres fillos, residían entre o Courel e Lugo para instalárense definitivamente en Santiago en 1983. En 1982 Novoneyra fora elixido Presidente da Asociación de Escritores en Lingua Galega, cargo que ocupou ata a súa morte, ocorrida o 30 de outubro de 1999.

Novoneyra foi un poeta de entrega total, cunha obra en constante refacción, en continua forxa. Mais non por isto foi un poeta de minorías xa que sempre tivo unha gran preocupación pola comunicación co pobo. Algúns dos seus poemas extensos, como Vietnam Canto ou Letanía de Galicia estiveron presentes en cancións e recitacións desde a súa creación en 1968.

Entre os seus libros destacan Os Eidos (Galaxia), con prólogo de Ramón Piñeiro, Os Eidos-2 (Galaxia), ilustrado por Laxeiro, ao que lle dedica un extenso poema, Poemas caligráficos (Brais Pinto), que recolle poemas publicados con anterioridade pero artisticamente mostrados a través da caligrafía do autor.

En Muller para lonxe (Deputación de Lugo) reúne algúns poemas de amor xa publicados e outros inéditos, ilustrados con debuxos de Carlos Pardo Teixeiro e un epílogo de Claudio R. Fer. O poemario Tempo de elexía (Vía Láctea) recolle esencialmente Elexías do Courel (Rialp) pero sen a tradución ao castelán que incluía a edición castelá. Os dous últimos poemarios de Uxío Novoneyra serán Poemas de doada certeza i este brillo premido entre as pálpebras (Espiral Maior) e Arrodeos e desvíos do Camiño de Santiago e outras rotas (Hércules de Ediciones).

Alén da súa incursión na narrativa para nenos, temos que sinalar a oralidade da súa poesía, que adquiría matices especiais cando o mesmo poeta recitaba os seus propios versos. Unha proba máis do seu enraizamento co pobo e coa poesía popular.

Bernardino Graña

Bernardino Graña Villar naceu en Cangas do Morrazo en 1932. O seu pai, mestre republicano que perdeu a súa praza unha vez comezada a guerra e que tivo que sobrevivir grazas ás academias que rexentou  en Ribadavia e en Cangas, foi o seu mellor mestre e introduciuno no gusto pola literatura, a arte, a historia e as materias relativas ás humanidades en xeral, polo que desde ben mozo tivo unha preparación importante.

Esta preparación levouno a ser poeta precoz. Estando no Instituto Santa Irene de Vigo coñeceu a Faustino Rei Romero e a través del contactou con Celso Emilio Ferreiro, Álvaro Cunqueiro e outros e comezou a publicar na revista viguesa Alba.

Despois da facer o bacharelato comeza a súa carreira universitaria na Universidade de Santiago de Compostela no curso 1953-1954 e ao pouco de chegar sae gañador nas Festas Minervais con poemas en galego e castelán. Comeza a relacionarse con ilustres galeguistas como Otero Pedrayo, Aquilino Iglesia Alvariño ou Ramón Piñeiro. Participou como articulista en La Noche, tarefa que seguiu despois no Faro de Vigo. Debido a problemas con certos profesores, abandonou os estudos en Compostela e comezounos de novo en Salamanca.

Nesta cidade a súa actividade cultural e antifranquista foi maior. Alí formou parte do grupo poético La Marabunta, publicou na revista Clavero, así como noutras moitas revistas como Ixbiliah, Ágora e Dabo.

Despois trasladouse a Madrid para estudar a especialidade de Filoloxía Románica.

Madrid foi unha das etapas máis importantes de Bernardino. Alí formou parte do Grupo Brais Pinto e publicou o seu primeiro poemario (Poema do home que quixo vivir) en 1958, adscrito na tendencia poética que se deu en chamar "Escola da Tebra", claramente influenciada polo existencialismo, tan presente naqueles anos. En Brais Pinto desenvolveu xuntamente cos outros compañeiros numerosas actividades a prol do país máis alá da editorial que levaba o mesmo nome.

Rematada a carreira, aparece en Lugo, no Colexio Fingoi, onde se beneficia dunha bolsa para recompilar e estudar os contos de tradición popular da provincia de Lugo, baixo a supervisión de Carballo Calero, reunidos no libro Contos populares da provincia de Lugo (Vigo, Galaxia, 1963). Tamén recompilou moito léxico da zona do Morrazo para o Suplemento do Diccionario de Eladio Rodríguez.

Neste tempo publica 20 mil pesos crime (1962) e Profecía do mar (1966), gaña por oposición unha praza de catedrático de Instituto e pasa varios anos primeiro en Reus e despois en Zaragoza ata volver a Galicia e xubilarse como catedrático na súa vila natal de Cangas en 1991. Desde entón publicou moitos libros e realizou moitas actividades. Destacamos entre elas a súa presenza na Asociación de Escritores en Lingua Galega, da que foi presidente en dúas ocasións e da que recibiu unha homenaxe no ano 1995, e tamén a concesión do Pedrón de Ouro.

Bernardino Graña é un autor cunha personalidade moi forte e cunha concepción da literatura moi clara e foi quen de escribir obras importantes en todos os xéneros literarios, incluído o xornalismo. Home intelectualmente inquedo, non se axustou a modas literarias pasaxeiras. Mentres en Galicia moitos autores estaban escribindo poesía social nos anos setenta, el xa se adiantara lanzando no ano 1966 o seu Profecía do mar, alfaia poética que se converteu no seu momento nunha icona literaria do país, e fronte a outras correntes da narrativa galega, publica Fins do mundo en 1974. Alén diso, foi un dos primeiros en preocuparse por un teatro moderno e de calidade con 20 mil pesos crime (1962), primeira obra de tema policial e con influencias dos grandes autores europeos do século XX.

Mención especial merécea a súa dedicación á literatura infantil, con numerosas contribucións moi aprezadas polos rapaces, como os inesquecibles O león e o paxaro rebelde (1969) ou O Gaiteiro e o rato Pérez (1994). Tamén foi pioneiro no teatro destinado a esta clase de público co seu Sinfarainín contra don Perfeuto (1975) e Os burros que comen ouro (nunca cabalos serán) (1979).

A súa última novela, Protoevanxeo do neto de Herodes (2006), foi Premio Eixo Atlántico de narrativa galega e portuguesa, na cal, fronte ás novelas sensacionalistas sobre a vida de Xesús, presenta unha novela histórica amplamente documentada e que supera en calidade literaria a moitas obras publicadas con esta temática.

Bernardino Graña sempre estivo comprometido con Galicia e coa súa lingua e polo súa produción literaria ocupa un posto destacado na literatura do noso país. Nestes momentos en Cangas do Morrazo estase procedendo á creación dunha Fundación na súa honra.

* Informacións biográficas tomadas da web da Real Academia Galega

[Páxina web dedicada a Uxío Novoneyra]

[Páxina web dedicada a Bernardino Graña]

Entre os premios recoñecerase o libro mellor editado

O Clúster do Produto Gráfico e do Libro Galego pon en marcha a I Edición do Premio Produto Gráfico Galego

(25-Xuño-2009)

O Clúster do Produto Gráfico e do Libro Galego presentou onte en Santiago a primeira edición dos premios Produto Gráfico Galego, iniciativa que pretende poñer en valor o traballo dos profesionais e empresas de Galicia que destaquen pola súa innovación e creatividade no eido da produción gráfica.

Esta convocatoria establece catro modalidades de premios, entre a que se atopa o premio ao mellor libro editado. O resto dos premios son ao Deseño Innovación, ao Produto Gráfico Publicitario e o Premio Novos Talentos.

O Premio Libro Editado recoñecerá o traballo máis talentoso neste ámbito, que teña que ver cos libros impresos e encadernados en Galicia e que reúnan os criterios de creatividade e innovación no tocante a encadernación, ilustración ou fotografía.

Os días 2 e 4 de xullo

O club de lectura Gáliz Tendendo Redes organiza un roteiro pola Compostela de Festina lente

(25-Xuño-2009)

O club de lectura Gálix Tendendo Redes remata a primeira parte do seu programa cunha dobre sesión sobre a exitosa novela Festina Lente (Xerais).

O xoves 2 de xullo, de 17.00 h. a 19.00 h. no Consello da Cultua Galega, desenvolverase unha lectura compartida sobre o libro de Marcos S. Calveiro e se fará un achegamento á novela histórica. Ese mesmo día o doutor Carlos Sastre, experto en iconografías medievais, renacentistas, modernas e contemporáneas establecerá as claves entre arte e literatura ao longo da Historia.

A segunda parte terá lugar o sábado 4 de xullo ás 11.30 h. cunha xuntanza no Café Literarios na Praza das Quintana, desde onde partirá a visita polo Santiago do século XVI da man so profesor e decano da Facultade de Xeografía e Historia Manuel Monterroso. Ás 14.00 h. xantarase no Restaurante Bonaval (interesados en inscribirse dirixirse a: galix@galix.org, anxelagracian@hotmail.com ou tuiverde@hotmail.com). Tras repoñer forzas, os asistentes, dirixidos por Augusto Guedes, membro de Amigos do Románico, visitarán a Catedral. De seguido participarase nunha actividade de Bookcrossing, patrocinada por Edicións Xerais de Galicia, na que se deixarán en variados escenarios da zona vella de Santiago de Compostela exemplares desta obra e doutras tanto dos autores escollidos este ano no club de lectura Tendendo Redes como doutros pertencentes á literatura xuvenil galega.

Rematarase o día e a xornada co recital poético "Canteiro en Compostela", no cal moitas das nosas poetas e moitos dos nosos poetas labrarán con palabras a beleza da cidade pedra. Confirmaron a súa asistencia a este recital: Manolo Rivas, Ana María Fernández, Antón L. Dobao, Cesáreo Sánchez Iglesias, Elvira Ribeiro, Estevo Creus, Fran Alonso, Gloria Sánchez, Helena Villar (que dará voz tamén a Rosalía de Castro), Marica Campo (que dará voz tamén a un poema inédito de Manuel María), Marilar Aleixandre, Marcos Calveiro, Miro Villar, Paulino Vázquez, Rafa Villar, Rosa Enríquez, Xoán Babarro, Xosé A. Neira Cruz, Xosé María Álvarez Cácamo, Xosé Luis Méndez Ferrín, (que non estará de viva voz pero si coa súa palabra), e Ánxela Gracián, así como alumn@s do club Gálix Tendendo Redes, da AdR e espontáne@s.

[Descargar o programa]

Dientes de leche de Ignacio Martínez Pisón e El chino de Henning Mankel, gañadores nas categorías de castelán e en lingua estranxeira, respectivamente

Inma López Silva gaña o Arcebispo Juan de San Clemente con Memoria de cidades sen luz

(22-Xuño-2009)

Tras coñecer ás obra finalistas no mes de marzo, hoxe déronse a coñecer aos gañadores dos XV Premios Literarios Arcebispo Juan de San Clemente.

Na modalidade de literatura galega a gañadora foi Inma López Silva por Memoria de cidades sen luz (Galaxia). A novela de López Silva impúxose ás outras dúas finalistas: Conexión Tubinga (Xerais) de Alberto Canal, e O xardín das pedras flotantes (Xerais) de Manuel Lourenzo González.

En lingua castelá e lingua estranxeira as obras gañadoras son Dientes de leche (Seix Barral) de Ignacio Martínez Pisón e Henning Mankel pola novela El chino (Tusquets), respectivamente.

Nesta edición o xurado estivo composto polos alumnos e alumnas dos institutos de ensino secundario Arcebispo Juan de San Clemente de Santiago de Compostela, como organizador; o Xesús Ferro Couselo de Ourense, o María Soliño de Cangas (Pontevedra) o Poeta Díaz Castro de Guitiriz (Lugo) e o Nº 1 de Ribeira (A Coruña).

A entrega de premios realizarase no mes de marzo de vindeiro ano no transcurso dunha cea onde os gañadores compartirán espazo cos rapaces membros do xurado.

O actor Santi Prego será o contacontos á luz do lume purificador

Espazo Lectura prepara para San Xoán a fogueira dos versos, onde o lume e os libros xuntaranse nunha noite máxica

(22-Xuño-2009)

Mañá martes, noite de San Xoán, Espazo Lectura celebrará esta noite máxica na recén inaugurada Casa da Lectura. Será unha velada na que se xuntará poesía, lume e contos: a fogueira dos versos.

Esta sesión, que toma prestado o nome dun poemario de Antonio García Teijeiro, comezará con música a partir das 22.30 h. e continuará logo, contra as doce da noite, cunha lectura de poemas arredor dun pequeno lume. Esta noite de San Xoán de lume e libros rematará cunha sesión de contacontos a cargo do actor Santi Prego, que deleitará a todos os asistentes coas súas historias á luz da pequena fogueira.

Esta fogueira literaria na Casa da Lectura, situada en Nogueira-Donas (Gondomar) conta coa colaboración da Concellería de Cultura do Concello de Gondomar e pretende ser participativa e aberta ás persoas que desexen levar comida para compartir e poemas para ler.

Hixinio Puentes gañou o Premio Vicente Risco de Creación Literaria e Román raña fíxose co Cidade de Ourense de poesía

Xornada de premios literarios en Ourense

(22-Xuño-2009)

Esta fin de semana fallaronse en ourense o X Premio Vicente Risco de Creación Literaria e o XXV Premio de poesía Cidade de Ourense, dos que saíron gañadores Hixinio Puentes e Román Raña, respectivamente.

O Premio Vicente Risco de creación literaria, que convocan conxuntamente a Fundación Risco e o Concello de Ourense, foi a parar a mans de Hixinio Puentes pola novela histórica A do vinteún, un xénero que tan ben manexa o escritor mañonés. A do vinteún será publicada, como en edicións anteriores, pola editorial Sotelo Blanco.

O sábado tamén se coñeceu ao gañador da XXV edición do Premio de poesía Cidade de Ourense para obras presentadas en galego ou en portugués. Desta volta o gañador foi Román Raña, autor de longa traxectoria e recoñecido prestixio. A obra gañadora será publicada por Espiral Maior.

O domingo 21 en Castro de Rei e o sábado 27 en Abadín

Dedícase a Aquilino Iglesia Alvariño o IX Congreso Cultura Terra Cha

(20-Xuño-2009)

Co gallo do centenario do poeta chairego Aquilino Iglesia Alvariño (1909-1961) dedícase a súa figura o IX Congreso Cultura Terra Cha que se celebrará os días 21 e 27 de xuño en Castro de Rei e en Seivane-Vilarente (Abadín), respectivamente. Este Congreso está convocado pola Fundación Manuel María coa colaboración da Secretaría Xeral de Política Lingüistica da Xunta de Galicia.

Porgrama de actividades

17.00 h. en Castro de Rei (na rúa e no teleclub)

Inaguración das rúas: Aquilin Iglesia Alvariño e Emilio Sinde Nieto.

Intervencións de:Juan José Díaz Valiño, Alcalde; Mario Saavedra, Concelleiro de Cultura; Conferencias de Ricardo Polín, investigador da literatura chairega: "Non me esquezo de vos" e "A identidade chairega na poesía de Iglesia Alvariño.

20.00 h. en Muimenta (na Casa da Cultura)

Conferencia de Félix Villares, profesor do seminario de Mondoñedo: "Aproximación a Aquilino Iglesia Alvariño"

Recital da súa poesía.

Intervención musical de Mini e Mero

Sábado, día 27 de xuño do 2009

16.30 h. en Seivane-Vilarente (Abadín)

Ofrenda floral na casa natal de Aquilino Iglesia Alvariño.

17.00 h. na Igrexa Parroquial

Conferencia de Manolo Regal: "Aquilino Iglesia Alvariño: 4 estampas rurais"

Este Rexistro permitirá regular a organización e funcionamento das librarías galegas

Aprobado o Decreto para a creación do Rexistro Administrativo de Librarías de Galicia

(20-Xuño-2009)

O Consello da Xunta reunido o pasado xoves aprobou o Decreto para a creación do Rexistro Administrativo de Librarías de Galicia.

Este Rexistro permitirá regular a súa organización e funcionamento. Para a aprobación deste rexistro telemático foron necesarios os informes favorables do Consello Consultivo de Galicia, da Asesoría Xurídica Xeral e da Dirección Xeral do Servizo Galego de Igualdade.

O Rexistro Administrativo de Librarías de Galicia terá carácter obrigatorio para os efectos administrativos de todos os establecementos abertos ao público nos cales se vendan libros, tal como establece a Lei 17/2006, do 27 de decembro, do libro e da lectura de Galicia. A inscrición no rexistro, de carácter público e único, será unha condición necesaria para acceder ás axudas e subvencións da Consellería de Cultura e Turismo.

Con este novo decreto búscase renovar, ordenar e dar unha utilidade real o Rexistro Administrativo de Librarías. A Dirección Xeral de Promoción e Difusión da Cultura facilitaralles aos interesados o acceso ao contido do rexistro informático para funcionar como un medio de consulta áxil e eficaz.

O xurado destacou da obra que se trata "dunha crítica dos valores que últimamente se empregan como produto comercial"

Santiago Cortegoso gaña a XIV edición do premio "Rafael Dieste" de teatro

(17-Xuño-2009)

O actor pontevedrés Santiago Cortegoso Calvar, coa obra 0,7 % Molotov, foi o gañador da XIV edición do premio de teatro “Rafael Dieste”, instituído pola Deputación da Coruña. Esta edición contou coa concorrencia de 36 obras orixinais.

O premio foi dado a coñecer esta mañá, na sede da institución provincial, polo presidente da Deputación, Salvador Fernández Moreda, nun acto que contou coa asistencia da deputada responsable da área de Cultura, Caridad González Cerviño, do comisario do certame, Antonio Simón, e dos membros do xurado Manuel Areoso, Elina Luaces, Alejandro Piñeiro, José Enrique Rivadulla e Teresa Moure, como gañadora da última edición. 

Amais do premio en metálico, a obra gañadora inclúe tamén a edición e posta en escena da peza teatral, que percorrerá varios concellos da provincia coruñesa.

A homenaxe coincidiría co centenario do seu nacimento

Responsables de cultura de seis cidades galegas asinan un documento para propoñer a Carvalho Calero para o Día das Letras Galegas

(17-Xuño-2009)

Representantes das concellarías de Cultura das cidades de Santiago de Compostela, A Coruña, Ferrol, Ourense, Pontevedra e Vigo reuníronse hoxe no compostelán Pazo de Raxoi para propoñer a candidatura de Ricardo Carvalho Calero como homenaxeado na celebración do Día das Letras Galegas do ano 2010.

No documento asinado recóllese a necesidade de homenaxear a un persoeiro quen "quen, cunha das máis completas e extensas traxectorias vitais en defensa da cultura galega, se converteu nunha das figuras fundamenais no campo da literatura e da lingua". así como a súa importancia como poeta e "referente e modelo para a xeración de poetas dos 80". Pola súa banda, a concelleira compostelá de Cultura, Socorro García Conde indicou que "a homenaxe sería especialmente acaída no ano 2010, ao cumprirse o centenario do seu nacemento".

O documento asinado polas concellarías das cidades de Santiago de Compostela, A Coruña, Ferrol, Ourense, Pontevedra e Vigo será remitido de inmediato á Real Academia Galega que está próxima a decidir a identidade do homenaxeado no Día das Letras de 2010.

[Descargar o documento]

Artigo 16 da Lei 9/1984 da CRTVG: "A programación debe de estar inspirada na promoción e difusión da cultura e lingua galega"

A AELG, a AGE e a Federación de Libreiros de Galicia asinan un manifesto contra a supresión do Servizo de Cultura da Televisión de Galicia

(17-Xuño-2009)

Reproducimos o manifesto asinado pola Asociación de Escritores en Lingua Galega, a Asociación Galega de Editores e a Federación de Libreiros de Galicia sobre a supresión do Servizo de Cultura da Televisión de Galicia:

"Queremos manifestar a nosa fonda preocupación pola decisión tomada pola nova directiva da CRTVG segundo a cal fica suprimido o Servizo de Cultura, creado en 2005. A inmediata suspensión do único programa da televisión pública galega centrado na divulgación e coñecemento da literatura do noso país énchenos de incerteza, así como a consecuente falta de visibilización dos escritores e escritoras en lingua galega e das novidades da produción editorial que poden ser atopadas nas librarías galegas.

Esta primeira toma de decisión con respecto ao programa sobre libros da TVG prodúcenos moita preocupación con respecto ao futuro da programación cultural da televisión e da radio públicas.

Lamentamos profundamente a celeridade e contundencia do actual goberno galego en executar as medidas máis involucionistas posíbeis a respecto do noso idioma, arroupadas pola hostilidade, o estatismo e a inacción promovidos por outras áreas, como é a de Educación, promotora da inmediata derrogación do decreto 124/07, a de Presidencia, coa modificación do artigo 35 da Lei da función pública que elimina a obriga de realizar en galego como mínimo unha proba nos procesos selectivos de acceso á Administración autonómica.

Lembramos a este respecto as obrigas contraídas pola CRTVG en aplicación do artigo 16 da Lei 9/1984 da CRTVG: "A programación debe de estar inspirada na promoción e difusión da cultura e lingua galega"."

Na XV edición da homenaxe O Escritor na súa Terra

Agustín Fernández Paz recibe este sábado a 'Letra E' da Asociación de Escritores en Lingua Galega

(16-Xuño-2009)

A Asociación de Escritores en Lingua Galega (AELG) organiza este sábado en Vilalba unha homenaxe ao escritor Agustín Fernández Paz.

A homenaxe O Escritor na súa Terra chega este ano a súa XV edición recaeu no escritor da Terra Chá por decisión unánime da súa asemblea de socios e socias. Esta iniciativa anual conforma xa unha tradición na traxectoria da AELG, e tense constituído ao longo de máis dunha década como unha celebración na que a terra de orixe do homenaxeado cobra un protagonismo fundamental nesta cita cultural.

Os actos darán comezo ás 12.00 h. no parque Agustín Fernández Paz de Vilalba, onde terá lugar a plantación dunha bidueira (árbore simbólica elixida polo escritor) e o descubrimento do Monólito Escultórico. Intervirán, amais do homenaxeado, Cesáreo Sánchez Iglesias, presidente da AELG e Mercedes Queixas, secretaria xeral da AELG.

A comitiva desprazarase posteriormente ata o Centro Cultural e Recreativo de Vilalba, onde terá lugar o acto de entrega da 'Letra E' da Asociación e dunha peza escultórica do artista Silveiro Rivas. Contarase coas intervencións de Gerardo Criado, Alcalde de Vilalba; Mercedes Queixas, secretaria xeral da AELG; Cesáreo Sánchez Iglesias, presidente da AELG; e de Manuel Bragado, director de Xerais, que pronunciará a Laudatio.

Ás 14.30 h. haberá un xantar de confraternidade aberto a todos os interesados en asistir no Parador de Turismo de Vilalba.

O recoñecido galeguista recolle hoxe a Medalla no Salón de Actos da Real Academia

A Real Academia Galega de Belas Artes nomea a Isaac Díaz Pardo Académico Honorario

(16-Xuño-2009)

O intelectual e artista galeguista Isaac Díaz Pardo recibe hoxe a Medalla da Real Academia Galega de Belas Artes de Nosa Señora do Rosario pola que se nomea Académico Honorario de dita entidade.

A Academia Galega de Belas tivo en conta para esta concesión os seus numerosos méritos que o fan merecedor desta distinción. Á súa condición de destacado representante da arte galega como ilustre pintor e ceramista, únese a súa profunda vinculación ao longo de máis de medio século na nova etapa da restauración da Cerámica de Sargadelos, á que Díaz Pardo, ademáis dunha empresa, concibe como centro de investigación, tecnoloxía, deseño e difusión da arte e da cultura de Galicia; creador e impulsor das Cerámicas do Castro, do Laboratorio de Formas de Galicia, das Edicións do Castro, do Museo de Arte Contemporánea Carlos Maside, do Seminario de Estudios Cerámicos de Sargadelos, do Laboratorio Xeolóxico de Laxe, e do Instituto Galego de Información, entre outros.

Este sábado a partir das 19.30 h.

O concello de Moaña inaugura dúas rúas en homenaxe a Manuel María e a Bernardino Graña

(16-Xuño-2009)

Este sábado 20 de xuño, celebrarase na urbanización do Rosal, en Moaña, a inauguración-homenaxe das rúas adicadas a Bernardino Graña e Manuel María.

O programa de actividades principiará ás 19.30 h. na rúa Bernardino Graña coa interpretación da Marcha do Antigo Reino de Galicia. Posteriormente intervirán o Alcalde de Moaña e membros da Asociación de Escritores en Lingua Galega. Posteriormente o homenaxeado Bernardino Graña descubrirá unha placa homenaxe.

A comitiva desprazarase posteriormente ata o Paseo do Poeta Manuel María onde ás 20.00 h., Saleta -viúva do poeta da Terra Cha- descubrirá a placa co nome de Manuel María. Tras a descuberta haberá un recital de poemas coa intervención de: Heitor Mera, Marta Dacosta, Anxo Angueira, Lucía Novas, Xosé Daniel Costas e Celso Parada, e a interpretación do Himno Galego.

Os actos de homenaxe aos poetas Manuel María e Bernardino Graña rematarán ás 20.30 h. cun Acto Musical no salón de actos do I.E.S. As Barxas, que contará coas initervencións da Banda e Coral Solfa (Santiago de Compostela) e do cantautor Tino Baz.

Este galardón concédeo a Xunta de Galicia a aqueles autores que salientaron na cultura e na identidade de Galicia como pobo

Marcos Valcárcel, Luciano García Alén e Fernando Pérez-Barreiro Noia recibirán a Medalla Castelao 2009

(11-Xuño-2009)

O Consello da Xunta de Galicia aprobou hoxe o decreto polo que se concede a Medalla Castelao 2009 -coa cal a Administración distingue aqueles galegos e galegas autores dunha obra merecente do recoñecemento do seu pobo no eido artístico, literario ou de calquera outra faceta da actividade humana- ao investigador, erudito e divulgador da cultura galega Marcos Valcárcel; ao médico e etnógrafo Luciano García Alén; e ao tradutor Fernando Pérez-Barreiro Noia. Outros galardoados son a investigadora Tarsy Carballas Fernández e o doutor e internista Fernando Diz-Lois Martínez.

Os premiados:

Marcos Valcárcel López

Doutor en Xeografía e Historia e catedrático de Lingua e Literatura galegas no ensino secundario, Marcos Valcárcel conta cunha longa traxectoria como investigador, erudito e divulgador da cultura de Galicia, facianas ás cales engade a súa traxectoria como dinamizador cultural, xornalista de opinión, ensinante e estudioso da historia cultural, literaria e política de Ourense. Autor de numerosas publicacións e cun constante labor xornalístico durante máis de trinta anos no campo do columnismo de opinión, puxo en marcha un dos blogs de máis prestixio do país, cuxa capacidade de convocatoria o converteu nun dos lugares da internet máis activos de Galicia. Recoñécese, deste xeito, toda unha vida dedicada á cultura, ao coñecemento e a súa transmisión á sociedade cun talante aberto, dialogante, galeguista, cívico e, en definitiva, universal.

Luciano García Alén

Médico e etnógrafo, foi fundador e primeiro presidente do Club Nacionalista Alén Nós e patrono fundador do Museo do Pobo Galego. Con Filgueira Valverde e o seu irmán Alfredo García Alén participou nos anos 50 a 70 na organización e desenvolvemento do Museo de Pontevedra. Dentro da súa actividade a prol da cultura galega resaltan os seus traballos e investigacións sobre a olaría popular, sendo o principal artífice de que se conserve unha importante documentación escrita e gráfica de recipientes que, doutro xeito, terían desaparecido sen deixar pegada. Este importante labor continúa ata día de hoxe.

Fernando Pérez-Barreiro Noia

Tradutor do inglés e chinés, o seu labor profesional levouno a exercer cargos de relevo en organismos e institucións de alto nivel mundial como membro dos equipos dos servizos exteriores da BBC en Londres, profesor en prestixiosas universidades inglesas ou xefe dos Servizos de Tradución da Organización Internacional do Café. Autor da primeira tradución dunha obra teatral de Shakespeare para o galego e das primeiras traducións directas do chinés para o galego, o seu labor a prol da internacionalización da cultura galega a través da palabra e do fluxo intelectual conéctanos coas sociedades de maior peso específico no mundo contemporáneo.

A Medalla Castelao foi creada en 1984 para conmemorar o retorno a Galicia dos restos de Alfonso Daniel Rodríguez Castelao, o 28 de xuño dese ano. O decreto de creación deste galardón sinala que a perfección, o simbolismo ou a transcendencia das obras e do labor dos premiados con este recoñecemento debe ser o froito da entrega dunha vida, e o reflexo dun traballo conscientemente realizado con entrega e con fe na cultura, na historia e no ser dun pobo. A Medalla Castelao creouse para que sirva de exemplo a obra daqueles galegos que deben ser guía para futuras xeracións que queiran seguir engrandecendo a realidade de Galicia.

Deste xeito a AELG súmase a outros colectivos que xa asinaron o Documento

A AELG maniféstase en favor do Documento para a defensa do galego no ensino

(11-Xuño-2009)

Perante as medidas involucionistas do actual goberno da Xunta de Galiza, cara á lingua galega, idioma propio do noso país, creado senlleiramente pola sociedade galega ao longo da súa xa milenaria historia, que está a materializarse, por unha banda, na anulación de dereitos legais de recoñecemento administrativo da súa competencia e uso e, por outra, na forzada eliminación da súa aprendizaxe dentro do ámbito educativo, a Asociaicón de Escritores en Lingua Galega (AELG) quere adherirse ao documento presentado e ratificado por colectivos sociais, profesionais e sindicais.

Subscribimos os puntos deste pronunciamento na medida en que, desde a autoridade educativa e no exercicio das súas competencias e responsabilidades gobernativas, é preciso asegurar a competencia en lingua galega dos nenos e nenas desde a escola, como garante do desenvolvemento das habilidades lingüísticas que doten a infancia e a mocidade das destrezas básicas: comprender, falar, ler e escribir. Porque só desde o coñecemento amplo e sen prexuízos é posíbel entender un mundo habitado e pensado desde a biodiversidade real, lingüística e cultural, que debe medrar necesariamente desde o manexo das claves do respecto interpersoal.

A AELG convida aos escritores e escritoras a divulgar e facer pública a súa adhesión persoal a este pronunciamento colectivo nos diversos foros de comunicación en que como tal participa.

Documento en defensa do galego no ensino:

As organizacións abaixo asinantes, ante o anuncio da Consellaría de Educación e Ordenación Universitaria de realizar unha consulta nos centros educativos en relación co uso do galego, queren transmitir á comunidade educativa e á sociedade galega no seu conxunto as seguintes cuestións:

1. Esta é unha consulta, deseñada á marxe da comunidade educativa, carente de rigor na metodoloxía de distribución e no procesamento de datos e sen garantías para a intimidade das persoas e a protección de datos de carácter persoal.

2. O Plan Xeral de Normalización da Lingua Galega, aprobado por unanimidade de todas as forzas políticas con representación no Parlamento Galego en 2004 (PP, PSOE e BNG), é un punto de encontro na definición dos obxectivos para o ámbito educativo. O Decreto 124/2007, de 28 de xuño, recolle este acordo do Parlamento Galego dándolle carácter normativo e a súa legalidade foi avalada por varias sentenzas do Tribunal Superior de Xustiza de Galicia. Esta norma pretende garantir unha competencia similar en galego e en castelán.

3.O obxectivo de que ao remate do ensino obrigatorio os nenos e as nenas sexan plenamente competentes nas dúas linguas oficiais non pode conseguirse con menos do 50% das materias impartidas en galego. Coa enquisa que se envía ao centros o mantemento desta porcentaxe só se garantiría marcando a resposta “en galego” ou “todo en galego”, pois esta opción non fai referencia á totalidade do ensino, senón soamente ás materias que habería que impartir hoxe en galego –o 50%-, xa que a enquisa non recolle a opción de que todas as materias agás as linguas, poidan ser impartidas en galego.

4. Por termos en conta as consideracións anteriores, propoñemos marcar a opción “galego” (en Infantil e FP) e “todo en galego” (en Primaria e Secundaria), porque desta maneira estariamos a indicar que queremos en galego as materias que hoxe se deben impartir na nosa lingua, tal e como indica o decreto en vigor. Non significaría, por tanto, que optemos por todo o ensino en galego, pois esta opción non se considera.

5. Igualmente xulgamos preciso transmitir a nais e pais a necesidade de incluíren no apartado de observacións da enquisa peticións semellantes a que expresamos a continuación:

- Desexaría que o ensino fose en galego, unha opción que non recolle esta enquisa.

- Estou a favor da aplicación do decreto actual de promoción e uso do galego no ensino, realizado co consenso da comunidade educativa e que emana do Plan Xeral de Normalización da Lingua Galega, aprobado por unanimidade no Parlamento Galego.

- Todo o anterior fai que os resultados desta consulta non me parezan lexítimos.

A Mesa pola Normalización Lingüística, Asociación de Directores e Directivos de IES, AS-PG (Asociación Socio-Pedagóxica Galega), CIG-Ensino (Confederación Intersindical Galega), Comités, Coordinadora de Equipas de Dinamización e Normalización Lingüística de Ferrolterra, Coordinadora de Equipos de Dinamización e Normalización Lingüística, Coordindora de Equipas de Dinamización e Normalización Lingüística de Compostela, NEG (Nova Escola Galega), STEG (Sindicato dos/as traballadores/as do Ensino de Galicia).

O evento está organizado pola asociación cultura MariñaPatrimonio e a Área de Cultura da Deputación de Lugo

A Mariña lucense acolle un ciclo sobre a literatura oral nos meses de xuño e xullo

(10-Xuño-2009)

Durante os meses de xuño e xullo as localidades de Viveiro, Ribadeo, Foz e Alfoz acollerán as actividades propostas para o ciclo O Patrimonio Inmaterial: A Literatura Oral que organiza a asociación cultural MariñaPatrimonio en colaboración coa Área de Cultura da Deputación de Lugo.

O presidente de MariñaPatrimonio, José Luis Rodríguez Guerreiro, detallou na presentación do ciclo os contidos das catro conferencias. O venres 12 de maio, o Salón de Actos do Conservatorio Profesional de Música de Viveiro acollerá, ás 20.00 h., a primeira das conferencias titulada A literatura oral na canción galega da man de Baldomero Igrexas (Mero) e Xosé Luis Rivas (Mini). O 19 e 26 de maio, á mesma hora, a Casa das Letras de Ribadeo e a Libraría Bahía de Foz acollerán os relatorios Guía da narrativa oral e Mitos e monstros da Mariña de Xosé Miranda e Antonio Reigosa, respectivamente. A última das xornadas terá lugar o venres 10 de xullo no Salón de Actos do Castelo do Castro de Alfoz grazas á participación no ciclo de Isaac Ferreira, Manuel Lourenzo e Xesús Pisón coa súa disertación titulada Polo país do Valadouro: xigantes, mouras, ninfas, demos e santos.

Pola súa banda, o responsible de cultura da Deputación de Lugo Antonio Veiga, destacou a importancia “de manter vivo este patrimonio inmaterial que forma parte da historia da literatura e da oralidade galega”. Vinculada á literatura oral está a lingua galega e a música tradicional de Lugo e, concretamente, da comarca da Mariña. O nacionalista Antonio Veiga destacou o labor ao que contribúe a asociación MariñaPatrimonio poñendo ao dispor da sociedade un “anaco da historia da literatura oral desta zona”.

[Descargar o programa]

Nunha soa semana depositáronse 28 volumes aportados polos socios da biblioteca, moitos deles novidades editoriais

Intersocios, un novidoso sistema de préstamo de libros entre os usuarios da biblioteca de Lalín

(10-Xuño-2009)

A Biblioteca Municipal 'Varela Jacome' de Lalín iniciou a semana pasada un novidoso sistema de préstamos de libros. A través deste sistema, os socios da biblioteca poden deixar os seus libros en calidade de préstamo para ampliar os fondos bibliográficos do centro, que á súa vez permitirá a outros socios poder levalos en préstamo.

Esta orixinal medida -que se manterá ata o mes de setembro-, rexistrou nesta primeira semana de funcionamento unha moi boa acollida por parte dos usuarios. Ata o de agora, un total de 28 volumes ocupan xa os andeis adicados aos libros aportados polos usuarios acollidos a este “Intersocios”, moitos deles son novidades editoriais.

Dende o concello de Lalín valórase "positivamente o número de socios que se adscribiron a este programa na primeira semana de funcionamento que permitirá aumentar o fondo de publicacións da biblioteca municipal”. O seu concelleiro de Educación, Gómez Estévez, lembrou que “os interesados en participar neste sistema de préstamo de libros deberán dirixirse a biblioteca municipal para depositar as súas publicacións para compartilas con outros usuarios”. Entre as publicacións que poden acollerse a estes sistema figuran tamén as de carácter infantil.

O sábado 13 de xuño

O concello do Valadouro nomeará fillo predilecto da vila ao dramaturgo Manuel Lourenzo

(09-Xuño-2009)

O Concello do Valadouro nomeará este sábado 13 de xuño ao dramaturgo Manuel Lourenzo como fillo predilecto da vila luguesa.

Manuel Lourenzo, nado na parroquia de Ferreira do Valadouro en 1945, montou xunto con Francisco Pillado) o Grupo de Teatro O Facho en 1965. En 1978, funda de novo con Francisco Pillado a Escola Dramática Galega e desde o ano 98 rexenta con Santiago Fernández a escola teatral Casahamlet. Como autor recibe en 1997 o Premio Nacional de Literatura Dramática, por Veladas indecentes (Laiovento), premio ao que habería que sumar o Premio de Teatro Rafael Dieste, o Premio Abrente ou o premio á mellor dirección no Festival Interncional de Teatro de Ribadavia, entre outros moitos. O pasado ano foi galardoado co Premio Nacional das Artes Escénicas.

Os actos darán comezo ás 20.00 h. coa entrega oficial a Manuel Lourenzo do título de Fillo Predilecto de O Valadouro no Salón de Plenos do concello.

Ás 21.00 h. representarase a obra A sensación de Camelot do propio Manuel Lourenzo a cargo do grupo teatral Raiolas.

A revista Amencer dedica ao poeta abadinense un número monográfico

O Seminario de Mondoñedo lembra a Aquilino Iglesias Alvariño no seu Centenario

(09-Xuño-2009)

O Seminario de Mondoñedo acollerá este mércores un acto de celebración do Centenenario Aquilino Iglesias Alvariño, un dos máis importantes representantes da Escola Poética do Seminario de Mondoñedo e a que for a homenaxeado co Día das Letras Galegas no ano 1986.

Para a celebración do Centenario, a publicación diocesana do Seminario de Mondoñedo Amencer, que elaboran os alumnos e os profesores do Seminario, prepararon un número monográfico dedicado a Aquilino Iglesias Alvariño.

O acto comezará ás 20.00 h. na aula "Losada Quiroga" do Real Seminario Conciliar de Santa Catalina de Mondoñedo e intervirán o director de Amencer, Francisco Rivas López; D. Félix Villares Mouteira, reponsable da publicación, será o encargado de presentar o monográfico dedicado á memoria de Aquilino Iglesia. Intervirán tamén Ramón Loureiro, xornalista; Orlando González, Alcalde de Mondoñedo; e Antonio Veiga, Delegado Provincial de Cultura. O grupo "Aires do Padornelo" ofrecerá unha actuación musical.

Antes do acto de homenaxe a Aquilino Iglesias Alvariño, ás 19.00 h., presentarase o libro Príncipes de Bretaña, Estrelas de Compostela (Biblos), ilustrado por Gonzalo Pernas e escrito por Ramón Loureiro.

Haberá presentacións de libros, actuacións usicais e de danza, sinatura de libros...

O Grove convoca esta fin de semana a I Festa das Letras e do Libro

(09-Xuño-2009)

A Praza de Arriba do Grove acollerá este venres e sábado a primeira Festa das Letras e do Libro, despois de suspenderse por mor da chuvia e das malas condicións atmosféricas o pasado mes de maio.

O acto está convocado pola Concellería de Cultura coa colaboración da Agrupación de Libreiros do Grove e conta coa participación do Coro Infantil de San Martiño, a Coral Polifónica da Confraría San Martiño, a Asociación de música e danza tradicional Paradanda Mecos, o Grupo de Teatro Enxebre e Nós e Vós Teatro da Asociación Cultural Roza do Pedrol.

Programa de actividades

Venres, 12 de xuño

20.00 h. Presentación do libro Mecas. A memoria das mulleres. Conducen o acto Patricia Arias, coordinadora da edición e Antón Mascato, concelleiro de Cultura.

20.20 h. Actuación de Clara Pino. Presentación do disco Mai, do grupo Covalblú.

20.30 h. Intervención da Directora do IES As Bizocas.

20.35 h. Lecturas de fragmentos dos textos por parte dos alumnos e alumnas

20.50 h. Actuación musical de Clara Pino, do grupo Covalblú.

21.15 h. Intervención dunha das avoas, en representación das restantes.

21.30 h. Intervención do Alcalde do Grove, por parte dos alumnos e alumnas ás súas avoas.

Sábado, 13 de xuño

18.00 h. Apertura dos postos de libros. Inauguración da exposición Libros coma mazáns

19.30 h. Actuación do Coro Infantil da Coral San Martiño.

19.45 h. Homenaxe a Teresa González Costa, gañadora dos Premios Álvaro Cunqueiro Manoel María de textos teatrais. Presentación dos seus libros Sempre quixen bailar un tango e Tarteiras e pingueiras, de Edicións Xerais de Galicia. Participan: Manuel Bragado, editor, e Teresa González Costa, autora.  Lectura dramatizada de textos das obras presentadas, polo grupos de teatro Roza do Pedrol e Enxebre.

20.30 h. Actuación da Coral Polifónica da Confraría San Martiño, dirixido por Josefa Dorado.

21.00 h. Presentación do libro Cien de ellas, de Rubén Luengo y Miguel del Corral. Intervén: Miguel Muñiz, Enrique, editor de Todogrove  e  Rubén Luengo, autor. Lectura de poemas da antoloxía.

21.30 h. . Actuación do grupo de Música e Danza Tradicional Paradanda Mecos.

O sábado 13 de xuño en Cuntis

A asociación O Fervedoiro de Cuntis homenaxea a figura de Xohán Xesús González

(09-Xuño-2009)

A Asociación O Fervedoiro de Cuntis desenvolverá  o vindeiro 13 de xuño unha serie de actos en homenaxe ao escritor cuntiense Xohán Xesús González. Esta actividade encádrase no labor da recuperación histórica deste personaxe por parte d'O Fervedoiro, como figurar unha rúa compostelá e outra no Baño (Cuntis) co nome do insigne cuntiense, así como unha proposta á Real Academia Galega para homenaxear cun Día das Letras Galegas a Xohán Xesús González.

Os actos de homenaxe principiarán ás 12.00 h., cando se inaugurará na Casa da Cultura Roberto Blanco Torres de Cuntis a mostra biográfica Xohán Xesús González: Porta dun futuro proletario. Esta exposición –que percorre a vida, obra literaria e política, labor sindical e activismo cultural do escritor de Sebil– será itinerante por distintos lugares de Galicia. Participan nestes actos o escritor Xosé Vázquez Pintor, Uxío Breogán Diéguez Cequiel, Director do Centro de Documentación Alexandre Bóveda, e un membro da Comissom da Memoria Histórica da Gentalha do Pichel (Compostela).

De seguido os asistentes desprazaranse ata o cemiterio parroquial de Sta. María de Cequeril (Cuntis), onde se ofrecerá unha ofrenda floral e un breve recital poético ao pé da campa sepulcral de Xohán Xesús González.

Todos os asistentes poderán apuntarse a un xantar en homenaxe a Xohán Xesús González. As persoas que queiran asistir deberán contactar coa asociación O Fervedoiro no teléfono 678178973 ou ben no seguinte enderezo electrónico: ofervedoiro@hotmail.com

Xohán Xesús González (Sebil-Cuntis 1895, Boisaca-Compostela 1936) desenvolveu o seu labor como escritor, xornalista, avogado, político e canteiro. Estudou maxisterio en Santiago de Compostela, onde traballou como redactor en El Compostelano. En Compostela entrou en contacto con outros estudantes galeguistas como Luís Seoane ou Ánxel Fole. En 1936 participa na fundación da Asociación de Escritores de Galicia. Ó estoupar a Guerra Civil púxose á fronte dun grupo de cincuenta obreiros de Teo que se dirixiron cara a Compostela para defender a legalidade republicana. O 21 de xullo foi detido polos militares e fusilado o 12 de setembro de 1936, nas tapias do cemiterio de Boisaca, en Santiago de Compostela.

Como escritor Xohán Xesús González cultivou a poesía (Agarimos. Versos da y-alma), a narrativa (Ana María, A filla da patrona, Teresiña Novás, A modelo de Paco Asorey), o ensaio (En pé campesiños, Hacia una morfología de la vida gallega, Regionalismo, nacionalismo, separatismo) e o teatro (Carmiña, Felisa, Los estudiantes).

Mil cousas poden pasar, Ás de bolboreta e Sol de Inverno, obras gañadoras

Rosa Aneiros e Jacobo Fernández Serrano, gañadores dos premios Xerais 2009

(07-Xuño-2009)

A illa de San Simón volveu convocar no día de onte á maxia das palabras, á letra escrita, aos libros. Os premios Xerais.

Por vez primeira, e para sorpresa de todos os asistentes, unha mesma persoa gañou dous dos tres premios nunha mesma edición. O xurado deu coñecer primeiramente o premio Merlín a Jacobo Fernández Serrano, a quen xa coñecíamos polos seus traballos como ilustrador e de banda deseñada como As aventuras de Cacauequi (El Patito) ou Os amigos de Archimboldo Roque (Faktoría K). Posteriormente, a escritora e xornalista de Valdoviño Rosa Aneiros levantouse en dúas ocasións sucesivas para recoller os premios Fundación Caixa Galicia de literatura xuvenil e o Xerais de novela.

Tras as palabras de benvida de Celia Torres, directora de promoción e coordinadora dos Premios, actuou como mantedor literario Agustín Fernández Paz, quen nun emotivo discurso loou a vontade de escribir ("pois a fame de historias é unha característica universal inscrita no ADN da humanidade") e o feito de o facer en galego ("Un dos trazos máis significativos da cultura galega, que tan ben souberon expresar os XIV membros da Xeración Nós, é a súa vocación de ser célula de universalidade, a súa vontade de ser unha peza máis, en pé de igualdade, no mosaico mundial das culturas: a lúcida conciencia de que só se pode ser universal desde as propias raíces).

Premio Merlín de literatura infantil

O xurado da XXIV edición do Premio Merlín de literatura infantil formado por Rosana Estévez (contacontos e membro de Espazo Lectura), Santiago Gutiérrez (ilustrador), Mercedes Pacheco (tradutora), Mª Xesús Pereiro (escritora infantil e profesora), Xan Guillén  Vázquez (profesor e coordinador do Premio Literario Frei Martín Sarmiento) e Helena Pérez Fernández, secretaria do xurado, en representación de Xerais, con voz e sen voto, acordou declarar como obra gañadora Mil cousas poden pasar, de Jacobo Fernández Serrano, presentada baixo o lema Papude.

O xurado destacou da obra a desbordante imaxinación da que fai gala o autor, polo novidoso do argumento, pola solidez dun mundo que se constrúe con cada frase, polo orixinal da estrutura, polo arriscado de levar o absurdo ao estremo, polo metafórico de moitas paisaxes argumentais, polo inédita e variada galería de personaxes que viven na cidade de Nil, unha cidade onde todo é posible, onde o excepcional é o cotián, onde o surrealismo é o normal, e onde o absurdo convértese no lóxico.

Premio Fundación Caixa Galicia de literatura xuvenil

O xurado da IV edición do Premio Fundación Caixa Galicia de literatura xuvenil, formado por Verónica Rego (en representación da Fundación Caixagalicia), Mónica Góñez (profesora e escritora), Pilar Ponte Patiño (profesora), Alba González Méndez (estudante de 4ª da ESO, IES Os Rosais de Vigo), Amanda Bouzada Novoa (estudante de 4º da ESO do IES Os Rosais de Vigo) e Xosé Manuel Moó Pedrosa, secretario do xurado, en representación de Xerais, con voz e sen voto, acordou declarar como gañadora a obra Ás de bolboreta, de Rosa Aneiros.

O xurado definiu Ás de bolboreta como un relato onde aparecen historias humanas, diferentes, que no seu conxunto forman unha radiografía urbana e actual, globalizada, interconectada e diversa. Ás de bolboreta presenta unha estrutura dividida en varios capítulos onde cada parte está conectada con todas as demais e onde de forma sucesiva aparecen temas como o terrorismo, a intolerancia, a soidade ou a violencia contra as mulleres. Rosa Aneiros combina ao longo da historia diálogos áxiles e frescos. Trátase dun conto triste e entenrecedor ao mesmo tempo.

Premio Xerais de Novela

O xurado da XXVI edición do Premio Xerais de Novela, formado por Ana Bande Bande (bibliotecaria), César Lorenzo Gil (xornalista), Paz Raña Lama (profesora), Sonia Díaz (xornalista), Bieito Legaspi (profesor e membro de Espazo Lectura) e Fran Alonso, secretario do xurado en representación de Xerais, con voz e sen voto, acordou declarar gañadora a obra Sol de Inverno de Rosa Aneiros, presentada baixo o lema O retorno das aves.

O xurado salientou sobre Sol de Inverno que estamos ante unha longa novela que emociona, comprometida, densa. A autora debuxa o periplo vital de Inverno, unha fascinante personaxe que dende os trece anos se move baixo o motor da paixón. Unha historia que nace na aldea de Antes e continúa  por Barcelona, Francia, México, La Habana, pola revolución castrista e polo maio parisino do 68. Unha novela de profunda introspección, tanto dos protagonistas como dos ambientes. Rosa Aneiros constrúe un mundo simbólico, máxico e riquísimo en referentes. Un río de historias que non deixa indiferente. Unha novela que engaiola dende a primeira páxina.

Rematou o acto de entrega de premios Manuel Bragado, director de Xerais, que en primeira instancia lembrou as cifras de títulos editados por Xerais ao longo destes trinta anos. Expresou a enorme preocupación existente polo momento en que pasa a lingua galega e os ataques irresponsables que sufre, sen precedente ata o de agora e que pode resultar fatal. Como director de Xerais, reafirmou o compromiso e a insistencia de editar en galego.

Manuel Bragado anunciou, para antes de que remate este ano, a posta en marcha da Biblioteca Dixital Xerais, que acollerá desde contidos educativos dixitais para todas as idades ata textos literarios, recuperando incluso algúns títulos actualmente descatalogados, dispoñibles en aparellos electrónicos como los e-books. O director de Xerais rematou a súa intervención lembrando as figuras de Suso Jarés e de Ramiro Fonte, que faleceron o pasado ano.

Carlos L. Bernárdez pronunciará unha conferencia sobre a vida e obra de Cabanillas  e a praza do Concello acollerá un recital poético

O Concello de Moaña homenaxea con dous actos ao poeta Ramón Cabanillas no 50º aniversario da súa morte

(05-Xuño-2009)

O Concello de  Moaña en colaboración coas Asociacións de veciños Praia-Seara e Moaña Centro, xunto cos Colectivos A Irmandade d´O Pontillón, Lonxa Literaria, Biblioteca Pública Municipal e a Asociación de Mulleres de Moaña organizan dúas actividades para conmemorar a quen fora secretario do concello de Moaña, o poeta galeguista Ramón Cabanillas no 50 Aniversario da súa morte.

Todas estas Asociacións e Colectivos centráronse na necesidade de honrar ao poeta, a quen se lle concedeu xa comezada a democracia unha das rúas principais de Moaña.

As actividades darán comezo hoxe venres cunha conferencia sobre a vida e obra do poeta, será ás 20.30 h. no salón de plenos do Concello de Moaña a cargo de Carlos L. Bernárdez.

O sábado ás 22.00 h. no parque do concello de Moaña, celebrarase un recital poético centrado na obra do poeta neste espazo singular.

IV Encontro coa arte. Do 5 ao 7 de xuño

33 artistas lembran a Celso Emilio Ferreiro en Brión

(05-Xuño-2009)

A Concellería de Cultura e Xuventude do Concello de Brión dedica ao poeta Celso Emilio Ferreiro unha nova edición de Encontro coa Arte.

Brión acollerá desde o venres 5 de xuño ata o domingo 7 unha reunión interdisciplinar onde 33 pintores, escritores e fotógrafos tratarán a figura e o legado do poeta de Celanova.

Estes xa tradicionais Encontros coa arte chegan este ano a súa carta edición, tras os anteriores homenaxes a Rosalía de Castro, Álvaro Cunqueiro e Blanco Amor no 2008.

Programa

Venres, 5 de xuño

16.30 h. Primeiro día de Pintura do Natural no Río Pego. Obradoiro de Arte no Parque Infantil Río Pego, dirixido a nenos/as de Educación Infantil e Primaria.

Sábado, 6 de xuño

10.00 h. Segundo día de Pintura do Natural, no entorno da Igrexa parroquial de Os Anxeles.

16.00 h. Segundo día de Pintura do Natural no entorno da Igrexa parroquial de San Fins de Brión.

21:00 h. Tempo de Música e Poesía “Homenaxe a Celso Emilio Ferreiro” con : Carlos Pereira, Eva Veiga, María Manuela, Miguel Anxo Fernán-Vello, Pablo Bouza, Xulio L. Valcárcel e Xurxo Varela.

Domingo, 7 de xuño

Encontro con artistas no stan da Feira de Saldos en Montebalado.

Artistas participantes neste IV Encontro coa Arte: Alfonso Costa, Alfredo Erias, Ángeles Jorreto, Beatriz Ansede, Carlos Pereira, Chelo Rodríguez, Enrique Ochotorena, Eva Veiga, J. Cabello Ruíz, J. Daniel Buján, J. Francisco Escudero, Jano Muñoz, Laureano Vidal, Luís Ocaña, Luís Romero, Manuel Gandullo, Manuel Suárez, Manuela Vázquez, María Manuela, María Xesús Díaz, Miguel Anxo Fernán-Vello, Nito Pereiro, Pablo Bouza, Pedro Bueno, Rafa Arroyo, Ramón Astray, Ricardo Rilo, Sonia Omil, Tino Poza, Victor Rey, X. Vázquez Castro, Xosé Vizoso e Xulio López Valcárcel.

[Ver o programa do IV Encontro coa Arte. Lembrando a Celso Emilio Ferreiro]

A AGE denuncia que dende a Deputación de Pontevedra non se deu explicación algunha

A Deputación de Pontevedra desbota unilateralmente un convenio de máis de vinte anos coa Asociación Galega de Editores

(02-Xuño-2009)

A Asociación Galega de Editores (AGE) ven de anunciar publicamente a súa enorme preocupación ante a actitude da Deputación de Pontevedra, que este ano rompeu por sorpresa e de forma unilateral o Convenio Editorial que ambas entidades mantiñan desde hai 20 anos.

A AGE quere manifestar a o seu desgusto e sorpresa ante este feito, que se produce sen que os editores recibisen ningún tipo de comunicación previa  nin explicación, e convida a Deputación de Pontevedra a restablecer un acordo beneficioso para a cultura e o libro galego.

Malia este abandono do Convenio, a Comisión Técnica xa realizara todas as xestións oportunas no pasado mes de novembro de 2008, deixando todo listo para que a Deputación de Pontevedra puidese executar o convenio e realizar a compra de libros, destinados a dotar as bibliotecas da provincia.

A AGE móstrase alarmada de que a Deputación de Pontevedra rompa unilateralmente un convenio con máis de vinte anos de vixencia precisamente nun momento difícil para os libros en lingua galega e moi especialmente nun momento en que a crise está a afectar ao sector do libro e da industria editorial, agravada xa pola gratuidade dos libros de texto, e que agora se ve moi dificultada pola falta de apoio á lingua galega.  Neste sentido, a actitude da Deputación de Pontevedra significa un paso atrás moi importante no apoio á cultura que se fai en Galicia e en galego e, moi especialmente, ao libro galego e á industria que representa.

Por outra banda, a AGE considera que non parece acertado que a Deputación ignore o convenio sen ningún tipo de explicacións precisamente nun momento en que a crise económica global ameaza gravemente o sector.

A AGE considera que é precisamente nestes días cando as institucións públicas, como a Deputación Provincial de Pontevedra, máis deben amosar o seu apoio na defensa dos valores do libro galego e da lectura, reforzando o seu compromiso coa nosa cultura e coas empresas e nas iniciativas que apostas por eles.

A AGE, que non recibiu ningún tipo de explicacións oficiais ao respecto, pregúntase os motivos polos que Deputación de Pontevedra non executa o tradicional convenio neste 2008. Ante a enorme preocupación existente, e o estado de incerteza e inquedanza que predomina entre as editoriais galegas, a directiva da Asociación Galega de Editores solicita o restablecemento do convenio para desbotar definitivamente a alarma social que todo isto pode xerar no ámbito da cultura galega.

As outras dúas obras finalistas foron Así nacen as baleas de Anxos Sumai e Made in Galiza de Sechu Sende

Case perfecto, de Marina Mayoral, gañadora do Premio Frei Martín Sarmiento 2009

(02-Xuño-2009)

O colexio Salesianos de Ourense acolleu o venres 29 de maio o acto do fallo do premio Frei Martín Sarmiento na súa categoría para adultos. Estes premios, organizados polos equipos de Normalización lingüística da FERE, chegan este ano a súa quinta edición, e conta por vez primeira cunha categoría de libros para adultos.

Case perfecto (Xerais) de Marina Mayoral, foi a obra seleccionada como gañadora. A obra da escritora mindoniense impúxose aos outros dous finalistas: Así nacen as baleas (Galaxia) de Anxos Sumai e Made in Galiza (Galaxia) de Sechu Sende.

[Ver o resto de premiados dos Premios Frei Martín Sarmiento]

O fallo definitivo será o sábado 6 de xuño na Illa de San Simón

Finalistas dos Premios Xerais 2009

(02-Xuño-2009)

Tras a súa primeira sesión de deliberación, celebrada o pasado venres no castelo de Soutomaior, os xurados dos Premios Xerais 2009 declararon as obras finalistas nas tres modalidades que concorren á edición deste ano.

O xurado da 26ª edición do Premio Xerais de Novela, formado pola bibliotecaria Ana Bande, os xornalistas César Lorenzo Gil e Sonia Díaz e os profesores Paz Raña Lama e Bieito Legaspi, máis Fran Alonso como secretario do xurado en representación de Xerais, con voz e sen voto, acordou declarar finalistas, entre as 45 participantes, as obras presentadas baixo os lemas A soidade dos leóns, Dinara, Limiar da conciencia e O retorno das aves.

O xurado da 4ª edición do Premio Fundación Caixa Galicia de Literatura Xuvenil, formado pola representante da Fundación Caixa Galicia Verónica Rego, as profesoras Mónica Góñez e Pilar Ponte Patiño, Alba González Méndez (estudante de 4ª da ESO, IES Os Rosais de Vigo), Amanda Bouzada Novoa (estudante de 4º da ESO do IES Os Rosais de Vigo) e Xosé Manuel Moó Pedrosa, secretario do xurado, en representación de Xerais, con voz e sen voto, acordou declarar como finalistas as obras presentadas baixo os lemas: Ás de bolboreta, Dragal e Quiromántico.

O xurado da 24ª edición do Premio Merlín de literatura infantil, formado por Rosana Estévez, contacontos e membro de Espazo Lectura; o ilustrador Santiago Gutiérrez; Mercedes Pacheco , tradutora; Mª Xesús Pereiro, escritora infantil e profesora; Xan Guillén Vázquez, profesor e coordinador do Premio Literario Frei Martín Sarmiento; e Helena Pérez Fernández, secretaria do xurado, en representación de Xerais, con voz e sen voto, acordou declarar como finalistas as obras presentadas baixo os lemas: Papude, Secundario e Septempunctata.

Os tres xurados determinarán as obras gañadoras, nunha vindeira reunión, a celebrar o sábado 6 de xuño, xusto antes do fallo dos premios que, como nos últimos anos, vense realizando na illa de San Simón.

Na súa visita ao stand promocional de Galicia no Salò, o conselleiro Roberto Varela anunciou a creación de cinco bolsas para a elaboración de banda deseñada

Remata o Saló Internacional del Cómic de Barcelona con dous premios para As serpes cegas, publicado por BD Banda

(02-Xuño-2009)

Onte clausurouse o 27º Salón Internacional del Còmic de Barcelona, nunha edición na que a banda deseñada galega foi país convidado.

Entre os galardóns ás mellores obras publicadas no 2008 o colectivo galego BD Banda, editora do cómic As serpes cegas, foi unha das grandes triunfadoras con dous premios: á Mellor Obra do 2008 e Mellor Guión a Felipe Hernández Cava. Sen premio quedaron o resto de finalistas galegas, que nesta edición optaban aos seguintes premios: Jacobo Fernández Serrano na categoría do Premio 'Josep Toutain' ao autor revelación do 2008, David Rubín por Cuaderno de tormentas (Planeta DeAgostini Cómics) na categoría de Mellor debuxo e o fanzine BD Banda na categoría de Mellor revista sobre banda deseñada.

Lareira Literaria

Alfonso Álvarez Cáccamo e Carlos L. Bernárdez na Lareira Literaria de xuño

(02-Xuño-2009)

Na Lareira Literaria deste mes contamos coa presenza dos escritores Alfonso Álvarez Cáccamo e Carlos L. Bernárdez.

Nado no seo dunha familia de intelectuais, Alfonso Álvarez Cáccamo publicou a pasado ano, co gallo do Día das Letras Galegas dedicado ao seu pai, Xosé María Álvarez Blázquez, o ensaio X. M. Álvarez Blázquez, 1915-1985: unha fotobiografía (Xerais). Outra das súas achegas literarias recentes é a novela xuvenil A revolución dos globos (Galaxia), de grande éxito entre público e crítica. Entre os seus novos proxectos atopamos a publicación do seu segundo poemario, Sebes contra o vento que publicará en breve Espiral Maior. Outro dos traballos nos que anda mergullado é a escrita dunha novela policial, na cal aínda está deseñando as liñas argumentais. Fora do literario, Alfonso Álvarez Cáccamo ven de rematar a elaboración do guión dunha longametraxe que versa sobre a odisea, fuxindo das gadoupas da morte, do deputado Antón Alonso Ríos. O filme será dirixido por Antón Dobao, que xa levara á pantalla grande a súa novela Bosque de levas.

O profesor e experto en arte Carlos L. Bernárdez, autor dunha extensa obra sobre grandes clásicos da nosa literatura e da historia artística galega, o escritor vigués está a traballar nun ensaio sobre a pintora Maruja Mallo, situándoa no contexto da arte do seu tempo en Europa e América. Trátase este dun traballo aínda en período de elaboración, que pretende comparar a arte da pintora con artistas internacionais, valorando as súas achegas á arte, especialmente nas décadas dos vinte, trinta e corenta. E dentro de pouco poderemos ver nas librarías do país, publicado por Xerais, a edición crítica de Samos, o derradeiro libro de Ramón Cabanillas. Neste novo traballo, Carlos L. Bernárdez sitúa a obra do cambadés no contexto histórico e cultural da Galiza da posguerra, analizando o estilo do autor e situando a obra na evolución persoal e biográfica.

[Lareira Literaria]