Do 10 ao 16 de xullo

Posy Simmons, André Juillard e Vittorio Giardino será as estrelas da X edición de Viñetas desde o Atlántico

(31-Xullo-2009)

A concelleira de Cultura da Coruña, María Xosé Bravo, presentou o pasado mércores o Salón Internacional do Cómic da Coruña Viñetas desde o Atlántico, que se desenvolverá entre os días 10 e 16 de agosto. Esta edición, que alcanza a número doce, repasará a historia do cómic-book americano coa presenza de singulares autores como a inglesa Posy Simmonds, o francés André Juillard ou o italiano Vittorio Giardino.

Ademais, esta décimo segunda edición de Viñetas contará con outro prato forte, a presenza dun teórico do cómic, o americano Scott McCloud, un dos expertos máis reputados con ampla bibliografía sobre o proceso creativo neste xénero.

Completan o cadro de invitados os españois Pasqual Ferry, un dos debuxantes máis internacionais, habitual colaborador nas editoriais Marvel e DC, José Fonollosa -que mostrará no Aquarium os orixinais da súa obra A viaxe de Darwin- e Enrique V. Vegas, o pai dos cabezóns que fan as delicias dos máis pequenos.

As salas de Viñetas tamén terán cabida para dous galegos que triunfan na actualidade no mundo da banda deseñada no mercado americano: Emma Ríos e Alex Cal que estarán cos seus seguidores no marco deste Salón do Cómic.

No capítulo de invitados, ademais, Viñetas desde o Atlántico contará coa presenza de Paco Roca, o autor do premiado Arrugas que o pasado ano non puido acudir á súa cita neste Salón en cuxo marco se expoñían os orixinais do citado álbum que se achega con formas exquisitas á dura realidade do alzheimer.

Unha das exposicións centrais desta edición de Viñetas desde o Atlántico, comisariada por Jaume Vaquer, será a consistente nunha mostra procedente dun coleccionista persoal que permite repasar exhaustivamente a historia do cómic-book americano máis tradicional e clásico, percorrendo para iso catro décadas, dende os gloriosos 50 ata principios dos 90. Trátase sen dúbida da mellor colección sobre cómic americano que chega ao noso país por primeira vez. Viñetas, ademais, quixo dar unha lectura especial a esta mostra, convidando a vela dende a perspectiva dos seus guionistas. Deste xeito, entre as pezas expostas, poderanse ver traballos da editorial EC, DC, obra da etapa de Stan Lee en Marvel, os 80's cos guionistas británicos, cun apartado gráfico a cargo de nomes como Jack Kirby, Jack Davis, Wally Wood, Steve Ditko, Jim Aparo, Neal Adams, Dave Gibbons, Mazzucchelli, Mignola, e moitos máis.

Pola súa banda, o Paseo de Coches dos Xardíns de Méndez Núñez volve ser o espazo de referencia das editoriais. Decenas de casetas poñerán á venda as últimas novidades editoriais nun recinto ao que se accederá a través dunha enorme arcada vestida con xigantescas lonas ilustradas. Nesta ocasión, ademais, a feira contará cunha carpa na que os editores poderán realizar presentacións das últimas publicacións e organizar encontros cos seus autores.

Os espazos expositivos do salón serán, como en anteriores edicións, o Kiosco Alfonso, a Sala Municipal de Palexco, a Sala de exposicións da Biblioteca Salvador de Madariaga, en Durán Loriga, o Palacio de María Pita e o Aquarium.

[Viñetas desde o Atlántico]

A mostra aberta na Fundación Torrente Ballester prorroga a súa estancia en Compostela antes de viaxar a Ferrol e a Madrid. O traballo de David Pintor competirá na X Bienal Clermont-Ferrand

Éxito total da exposición Ciudades de papel cos orixinais de David Pintor

(31-Xullo-2009)

O éxito do público asistente á exposición dos orixinais do libro Ciudades de papel (El Patito) do ilustrador David Pintor obrigou á Fundación Torrente Ballester a prorrogala ata o vindeiro 22 de agosto. Ciudades de papel recolle quince das trinta e seis ilustracións que compoñen o libro, e inaugurouse na Fundación sita na compostelá Rúa do Vilar o pasado 6 de xuño. Os debuxos que compoñen tanto a mostra como o libro están chegando aos máis remotos lugares do mundo, como a Estados Unidos, Xapón ou Austria, dende onde se recibiron peticións á editorial por algunhas das láminas orixinais que a propia editorial sacou á venda no mes de maio.

Tras pechar a súa estadía en Compostela, a exposición Ciudades de papel percorrerá a xeografía estatal chegando a Ferrol o 22 de agosto e a Madrid o 18 de setembro.

O éxito de Ciudades de Papel traspasou as nosas fronteiras e David Pintor participará na X Bienal de Clermont-Ferrand, un dos certames máis importantes do mundo en canto a libros de viaxes. David Pintor concursará na categoría IN na que se recoñece os traballos máis innovadores e orixinais.

Tratarase da biblioteca pública teolóxica máis importante de Galicia

O Pai Isorna cede a súa biblioteca persoal ao concello de Valga

(31-Xullo-2009)

O Auditorio Municipal de Valga acollerá dentro duns meses unha das primeiras bibliotecas teolóxicas públicas de Galicia, que se constituirá cos miles e miles de libros, enciclopedias, vídeos, revistas… doadas o Concello de Valga polo Pai Isorna. Trátase dunha biblioteca con máis de sete mil volumes procedentes da biblioteca privada do franciscano e que pasaron a integrarse no patrimonio público valgués.

A biblioteca está composta na súa maioría, de obras relacionadas coa relixión, a teoloxía e la filosofía, polo que o municipio valgués contará cunha das primeiras bibliotecas públicas de toda Galicia especializada en teoloxía, xa que a maioría das que existen pertencen a entidades relacionadas coa Igrexa. A nova biblioteca de Valga emprazarase na planta superior do Auditorio e estará dirixida, fundamentalmente, a investigadores, estudantes universitarios e outras persoas interesadas neste ámbito.

Entre un gran número de revistas relixiosas, tamén se entremezclan bastantes obras da literatura galega, outras relacionadas con arte especialmente sobre mosteiros e catedrais , así como publicacións centradas na época do franquismo e no golpe de estado do 23-F. Destaca particularmente unha colección de vídeos coas misas que o Pai Isorna oficiou en galego e foron retransmitidas pola TVG. Tamén, tres grandes libros titulados Atlas-guía das misións españolas en América, que son dos exemplares máis valiosos de toda a colección.

A Corporación valguesa aceptou por unanimidade no Pleno o legado do Pai Isorna e tamén o de Clemente Matos, un valgués que actualmente reside en Pontevedra e que tamén doou ao Concello mil volumes da súa propiedade para incrementar os fondos da biblioteca de Pontevalga. “Ámbalas dúas coleccións teñen valor e agradecémosllo especialmente porque para eles tamén terán unha importancia especial”, comenta o alcalde, José María Bello Maneiro.

Este proxecto ten "vocación e perdurabilidade no tempo", segundo o Conselleiro de Cultura Roberto Varela

A Biblioteca de Galicia acollerá o maior centro de documentación do mundo sobre cultura Xacobea

(29-Xullo-2009)

A reunión mantida onte Roberto Varela, Conselleiro de Cultura e Turismo, co Comité Internacional de Expertos do Camiño deu como resultado o anuncio da creación dun centro onde se recompile o saber sobre o culto e a cultura xacobea e se investigue sobre a temática compostelá. Toda a bibliografía formará parte da Biblioteca da Cidade da Cultura.

Tras a reunión, acordouse pór en funcionamento un centro de investigacións sobre o culto e a cultura xacobeas que terá a súa sede en Compostela e que aglutinará o saber e a bibliografía existente sobre este eido. Para crear este centro é importante ter en conta a utilización das novas tecnoloxías da información e da comunicación de xeito que os fondos existentes nel poidan ser consultados dende calquera lugar do mundo. Todos estes proxectos, tal e como destacou o conselleiro, nacen con "vocación de perdurabilidade no tempo", isto é, malia que teñen o Xacobeo 2010 como punto de orixe non son efímeros senón que se constitúen para permanecer en funcionamento.

O obxectivo do centro é potenciar a investigación e recompilar nun único punto de referencia todas as publicacións e artigos que teñan vinculación co fenómeno xacobeo e mais co Camiño de Santiago. A intención da consellería é que a Cidade da Cultura acolla o centro na súa biblioteca e que se creen outros proxectos de investigación a partir da súa constitución como pode ser unha base de datos de iconografía xacobea on-line. Así mesmo, o Comité de Expertos encargarase de exercer de Consello de Redacción da revista de investigación de primeiro nivel, Ad Limina, cuxo número cero sairá á luz en 2010.

Os días 1 e 2 de agosto

Melide acolle esta fin de semana a súa II Feira do Libro no Camiño

(29-Xullo-2009)

Esta fin de semana terá lugar en Melide a II Feira do Libro no Camiño, que contará con once expositores que mostrarán a actualidade literaria galega. Alén dos expositores, a Feira do Libro de Melide tamén terá obradoiros, literatura especializada, sinaturas de libros, etc.

Ao longo de dous días, pasarán polo Cantón de San Roque autores como Concha Blanco, Santiago Jaureguizar, Inma López Silva, Carlos Parrado, Heidi Kühn-Bode, Juan Carballo, Xosé Vázquez Pintor, entre outros moitos.

Durante a xornada do sábado darase a coñecer o gañador do II Concurso de Artes Plásticas Concello de Melide.

[Descargar o programa da Feira do Libro no Camiño de Melide]

O acto enmárcase no 50 aniversario do pasamento do poeta

Inaugurase mañá a exposición Ramón Cabanillas. A roseira dos recordos

(27-Xullo-2009)

Dentro dos actos dedicados polo concello de Cambados a Ramón Cabanillas no 50 aniversario do pasamento do poeta nado na aldea de Fefiñáns inaugurase mañá a exposición Ramón Cabanillas. A roseira dos recordos.

Esta exposición acompaña a Cabanillas pola “roseira dos recordos”. Está feita coas memorias líricas do propio poeta, coas lembranzas dalgúns amigos, coas pegadas de non poucos documentos e coas principais imaxes que ilustraron o seu vivir. Quen percorra con ollos atentos os dez paneis que compoñen a mostra terá ocasión de comprobar que a cómica autobiografía cabanillana non pasa diso: unha chanza. Porque Cabanillas tivo unha vida longa, axitada e itinerante: viviu en Cambados, Santiago de Compostela, Cuba, O Porriño, Madrid, Mondariz, Silleda, Moaña, Dozón… Traballou nos máis diversos mesteres, volvendo iteradamente á súa condición de funcionario local e non deixando nunca a poesía. Vestiu frac para grandes ocasións, acompañou en paseos e cafés a primeiros ministros e altos dignitarios e tamén, mil veces, pasou penalidades: “Toda a miña vida é unha traxedia”, afirmaba nas horas de desespero. En resumo, Cabanillas foi un poeta, un gran poeta, pero tamén un home de vida aventureira e bohemia, “un dandy perdido na bohemia”, dicía Vicente Risco, alguén de quen debemos coñecer algo máis que o tempo polo que pasou o xarampón. Esta mostra permanecerá aberta ata o 30 de outubro.

Os actos de presentación darán comezo ás 20.00 h. e contará coa presentación do libro biográfico Ramón Cabanillas. Crónica de desterros e saudades (Galaxia) de Luís Rei. Abrirá e pechará o acto a soprano Andrea Búa Aguín.

Xunto a esta exposición tamén se pode contemplar a inaugurada o pasado 23 de xullo Cabanillas e os artistas do seu tempo no Museo do Pazo de Torrado. Esta mostra permanecerá aberta ao público ata o 20 de setembro e está composta por obras orixinais de Castelao, Lloréns, Asorey, Seoane, Narciso Pérez, Colmeiro, Isaac Díaz Pardo, Antonio Palacios, Uxio Souto...

[Descargar o tríptico da exposición Ramón Cabanillas. A roseira dos recordos]

A poeta avireinse está considerada como unha das poetas modernas máis importantes de Portugal

Rosa Alice Branco gaña a XVII edición do premio de poesía Espiral Maior

(27-Xullo-2009)

A poeta e ensaísta Rosa Alice Branco foi declarada gañadora o pasado venres do XVII premio de poesía Espiral Maior, convocado pola editorial cullerdense e o Ámbito Cultural de El Corte Inglés.

O xurado, formado por Xavier Rodríguez Baixeiras, Xosé María Álvarez Cáccamo e o editor Miguel Anxo Fernán Vello, salientou de entre case duascentas obras O gado do Senhor e destacou o seu discurso irónico e crítico sobre os textos bíblicos e a Providencia.

Rosa Alice Branco naceu en Gafanha da Nazaré, Aveiro en 1950 e é considerada unha das poetisas máis grandes do panorama literario portugués. Na actualidade é profesora de Psicoloxía da Percepción na Escola Superior de Artes e Design (ESAD) e traballa como Investigadora en Comunicación e Arte na Universidade de Aveiro. En Espiral Maior xa publicou a edición bilingüe Horizonte pegado à pele.

O premio supón, amais da dotación económica, unha das máis importantes do Estado para premios de poesía, a publicación da obra gañadora cunha tiraxe de dous mil exemplares.

Os días 24 e 25 de xullo no campus universitario de Santiago de Compostela

Arranca a Festigal09. Un mundo de tendencias e diversidade

(24-Xullo-2009)

Outro ano máis o campus universitario de Santiago de Compostela acollerá unha nova edición do Festigal, un dos maiores escaparates culturais do país que ten como protagonistas a música, as letras, o audiovisual e as novas tendencias. O festival, organizado pola Fundación Galiza Sempre e Galiza Nova, terá lugar os días 24 e 25 de xullo.

O Festigal está concibido como un escaparate cultural, onde a cultura galega e a internacional (tradicionalmente cunha especial atención aos países da lusofonía), manteñen un frutífero diálogo.

Ao longo destes dous días o Festigal acollerá presentacións de libros, conferencias, mesas redondas ou recitais de poesía entre outros moitos actos. Estarán presentes librarías como a Andel de Vigo ou A palavra perduda e a libraría Pedreira de Santiago de Compostela. Tamén contarase coa participación de editoriais como A Nosa Terra, OQO ou Galaxia.

En base a anos anteriores, está previsto que pasen preto de vinte mil persoas ao longo dos dous días que dura o Festigal. Na organización participarán 200 persoas, contando os voluntarios. O Festigal contará con 40 postos de artesanía e tendas, 6 exposicións e 15 postos de xantar e bares.

O recinto, que ocupará un total de 20.000 metros cadrados, contará con zona de acampamento, na que se instalarán, en torno a 160 tendas. Para a promoción do Festigal 2009, editaranse 20.000 programas, 15.000 cartaces e 50.000 folletos.

[Máis información na páxina web Festigal09]

[Descargar o programa Festigal09]

Esta iniciativa busca a implicación dos diferentes sectores do libro e involucrar esta iniciativa dentro das diferentes actividades que se desenvolverán dentro do Ano Xacobeo

Apróbase a declaración do 2010 como Ano do Libro e da Lectura de Galicia

(24-Xullo-2009)

O Consello da Xunta celebrado onte aprobou a declaración do 2010 como Ano do Libro e da Lectura de Galicia. O obxectivo da declaración é o de mobilizar a todas as organizacións galegas, o sector do libro, os representantes editoriais e demais axentes implicados a favor do fomento da lectura. A Consellería de Cultura e Turismo vinculará os plans de actuación e as medidas de promoción do libro coa celebración do Ano Xacobeo.

A finalidade deste proxecto é impulsar o Ano do Libro e da Lectura de Galicia a través da celebración do Xacobeo 2010. Para elo, as institucións públicas galegas, os centros de ensino, as bibliotecas, as asociacións e federacións culturais dependentes da Xunta de Galicia dedicarán unha parte da súa actividade a pór de relevo esta manifestación contribuíndo ao recoñecemento do libro como instrumento para a promoción e a divulgación da cultura e da lingua de Galicia.

Desde a Consellería de Cultura e Turismo apóstase por utilizar unha ferramenta tan importante como é a Lei do Libro e da Lectura e de Galicia (Lei 17/2006, do 27 de decembro) e traballar nas obrigas que esta lei recolle. Entre elas, confíaselle a Administración as tarefas de planificación, información e coordinación arredor do libro e da lectura co fin de favorecer a sociedade galega. Ademais, tamén recoñécese o caracter estratéxico e prioritario do sector do libro como instrumento para a expresión do dereito á creación, a promoción e á divulgación da cultura, da historia e da lingua de Galicia. Para elo, elaboraranse e aprobaranse plans e programas de ecuación de promoción do libro e de fomento da lectura.

O 24 de xullo a Asociación de Escritores lerá un manifesto diante a estatua de Rosalía na Alameda de Santiago

A AELG presenta dúas novas seccións na súa páxina web: a Fototeca e as Polafías

(20-Xullo-2009)

A páxina web da Asociación de Escritores en Lingua Galega (AELG) ven de presentar dúas novas seccións no seu espazo virtual: a Fototeca e as Polafías.

A Fototeca nace polo obxectivo de dar visibilización á imaxe do escritor/a. Nesta sección a Aelg inclúe as fotos que constan nos seus arquivos, tanto as remitidas polos socios/as como as que a propia Asociación vai acumulando no seu arquivo. A idea é facer un lugar ao que remitir a quen necesite unha foto con boa calidade para a súa impresión (xornalistas, entidades organizadoras de eventos, editoriais…). Con esta iniciativa, a Aelg pon a disposición da sociedade estes contidos, que suman un total de 505 arquivos gráficos de 238 socios/as da Aelg. O material fotográfico é de uso libre sempre que se cite a autoría. A Fototeca da Aelg irase acrecentando grazas as sesións fotográficas e de vídeo que a Asociación desenvolve co financiamento da Deputación da Coruña.

Pola súa banda, as Polafías, coordinadas polo vogal de Literatura de Tradición Oral, Antonio Reigosa, consiste nunha colección de vídeos sobre reunións ou veladas de carácter festivo con contidos literarios e musicais, cuxo obxectivo primordial é o de poñer en valor e rescatar do esquecemento o valioso patrimonio oral, literario e musical, galego. Todos os vídeos incluídos nesta sección levan unha descrición que os insire no corpus da literatura de tradición oral, constituíndo unha moi importante base de datos.

Con estas novas achegas a web da AELG gaña en valor converténdose nun lugar de referencia para todos aqueles interesados en coñecer os nosos escritores e as súa produción literaria.

Comunicado da AELG na véspera do Día da Patria Galega

Ante a creba do proceso de restitución á normalidade do noso idioma impulsada polo actual goberno galego, que obvia así o espírito do Estatuto que lle dá sentido, a Asociación de Escritores en Lingua Galega, tras pulsar o sentir dos seus asociados, promoveu a creación do comunicado que se xunta, que será lido en acto público o vindeiro 24 de xullo, ás 17.00 h., diante da estatua de Rosalía de Castro situada na Alameda de Santiago de Compostela.

A Aelg prega encarecidamente a asistencia a este acto co que se pretende transmitir á sociedade que os seus escritores e escritoras asumen plenamente a responsabilidade que lles foi transmitida desde o Rexurdimento, e que traballan e loitan diariamente por normalizar e engrandecer un sistema literario nacido dunha lingua e dunha cultura propias, patrimonio tamén da humanidade.

[Manifesto AELG na véspera do Día da Patria Galega]

Tusitala gaña a segunda edición do do concurso de microrrelatos eróticas convocado por Vieiros

... e ferveu a rede cos plátanos da señora Consuelo!

(20-Xullo-2009)

O suxestivo que pode ser un quilo de plátanos é a base do microrrelato enviado por Tusitala para conseguir o premio da II edición do concurso de textos eróticos curtos Ferve a Rede, convocado por Vieiros en colaboración coa Secretaría Xeral de Política Lingüística.

O xurado, formado por Francisco Macías, Xosé Antonio Perozo e Xosé Luís Martínez Pereiro salientou, como podemos ler en Vieiros, "o dominio da lingua oral que se recoñecía no relato e tamén o valor de presentar sen tabús e con atrevemento e picardía a sexualidade nas persoas de máis anos".

O microrrelato gañador leva como premio unha viaxe e estadía de tres noite a Bruxas (Bélxica) para dúas persoas nun céntrico hotel de catro estrelas, gozando do seu 'paquete romántico'.

[Máis información e para ler o relato gañador en Vieiros]

[Ferve a Rede '09]

A novela xira en torno a un desfalco bancario na década dos 80

Xosé Monteagudo, gañador da XXI edición do García Barros pola súa novela Un tipo listo

(16-Xullo-2009)

O escritor morañés Xosé Monteagudo Folgar foi declarado, por fallo unánime do xurado, gañador da XXI Edición do Premio Manuel García Barros, polo seu traballo presentado baixo o título de Un tipo listo.

Os membros do xurado, formado nesta edición por Inma Otero Varela, Armando Requeixo, Luís Alonso Girgado, Carlos Lema, en representación de Editorial Galaxia, e por Valentín García Gómez como secretario do xurado, destacaron a orixinalidade da trama da novela, dentro do universo da literatura en galego, xa que xira en torno a un desfalco bancario na década dos 80. O fallo considera que se trata dunha peza de calidade e moi cohesionada, cun ritmo de lectura rápido e sen caídas, e con personaxes de gran autenticidade.

A obra ten trazas de crónica familiar e social, ao tempo que propón unha reflexión de alcance ético. Trátase dunha novela para un público lector moi amplo.

Un tipo listo trátase da terceira novela de Xosé Monteagudo, quen xa resultara gañador no 2002 do premio Blanco Amor coa súa primeira novela, As voces da noticia (Galaxia). O seu último libro publicado é Esta historia (Galaxia), do 2006.

Como gañador do certame Manuel García Barros, a súa obra será publicada pola editorial Galaxia.

Do 20 ao 26 de xullo

Comeza a conta atrás para o 13º Salón do Cómic de Cangas

(16-Xullo-2009)

O concelleiro de Xuventude e Voluntariado do Concello de Cangas, Óscar Graña, presentou esta mañá na Casa da Xuventude a 13ª edición do Salón do Cómic de Cangas, no que participarán artistas de recoñecido prestixio como Diego Olmos, Montse Martín, Alberto Guitián ou Gabor...

Unha das citas clásicas da banda deseñada galega dará comezo o vindeiro luns 20 de no Auditorio Municipal e permancerá aberta ata o 26 de xullo. Ao longo de sete días os asistentes poderán participar en obradoiros de cómic e caricaturas, presentacións de cómics, sinaturas, asistir a proxeccións, exposicións, etc.

Entre os actos previstos está a entrega a Susana Broullón o premio do 11º Certame de Cómic de Cangas pola obra Rec.

[Programa do 13º Salón do Cómic de Cangas]

Dende a Consellería anunciouse a celebración dun acto homenaxe a Blanco Amor no trixésimo aniversario do seu pasamento e a subvención para a edición da obra completa do poeta Xosé Carlos Gómez Alfaro

O PEN Clube Galicia e a Consellería de Cultura e Turismo colaborarán na celebración da bienal literaria 'Pedra de palabra'

(13-Xullo-2009)

Tras a reunión mantida hoxe entre o PEN Clube Galicia, o conselleiro de Cultura Roberto Varela manifestou o seu compromiso para colaborar na celebración da bienal literaria 'Pedra de palabra' que se celebrará en Santiago de Compostela no mes de outubro de 2010. Este evento, organizado polo PEN Clube Galicia confirmouse o apoio institucional ao evento literario que na súa terceira edición estará dedicado a Iberoamérica. Ámbalas dúas partes traballarán conxuntamente para que a literatura galega serva de ponte entre o mundo hispánico e o lusófono.

Dende o PEN Clube confíase en contar coa presenza de destacadas figuras das letras iberoamericanas como convidados co obxectivo de abrir a literatura galega ás letras hispánicas e lusistas. Nas anteriores edicións de Pedra de palabra, dedicadas a Europa e a Africa-Asia, estiveron en Galicia autores como Ernesto Sábato, Álvaro Mutis ou Isabel Allende. Nesta ocasión contarase coa escritora brasileira, de orixe galego, Nélida Piñol como embaixadora da literatura galega.

Entre outros proxectos para os próximos meses, Roberto Varela destacou a organización dun acto homenaxe con motivo do XXX aniversario da morte de Eduardo Blanco Amor, que se conmemora o 1 de decembro. Asemade, a Consellería apoiará a publicación de dous tomos, dentro da colección Arte de trobar coa obra completa do escritor Xosé Carlos Gómez Alfaro, o poeta do Ribeiro falecido hai un ano. O legado foi recollido polo profesor Román Raña e a súa presentación farase en setembro no marco da vendimia cun acto literario en Ventosela, a súa localidade natal.

A obra, títulada provisionalmente Relato dun estalido xordo, publicarase a finais de ano en galego e en castelán

Pablo García Martínez, gañador do V Premio Biblos-Pazos de Galicia

(13-Xullo-2009)

A noite do venres tivo lugar, na Casa Grande do Bachao de Santiago de Compostela, a entrega do V Premio Biblos-Pazos de Galicia para menores de 25 anos.

Desta o premio recaeu no mozo de Arzua Pablo García Martínez, xornalista de 24 anos e redactor de Vieiros. Con Pablo García foi finalista Zeltia Regueiro Fuentes, de Cambre

O premio consiste nunha escultura de Luís Loureira titulada A peneira dos soños, un ordenador portátil, a estancia ao longo do mes de outubro na Casa Grande do Bachao para ultimar a súa novela baixo a tutela de Manuel Rivas e a edición da obra en galego e castelán antes de rematar o ano.

Do 10 ao 13 de xullo

A Piloña dedica a Rosalía de Castro a súa 9ª Forxa Literaria

(10-Xullo-2009)

Hoxe comeza a 9ª Forxa Literaria. Encontros culturais no rural na Fundación Casa Museo "A Solaina de Piloño" no Concello de Vila de Cruces. Esta edición está dedicada á figura de Rosalía de Castro.

Estas Forxas Literarias, impulsadas polo artista Paco Lareo, son de carácter bianual e serven como punto de reunión e de intercambio entre artistas e público.

O programa que comeza hoxe prolongarase ata o domingo 12 de xullo e principiará ás 18.00 h. coa descuberta do busto de Rosalía de Castro. De seguido haberá unha charla-coloquio sobre a vida e obra de Rosalia, na que se contará coa intervención de Ana Blanco Gomez, Vicepresidencia da Fundación Rosalía de Castro; e de Maite Piñeiro, Xerente da Fundación. Rematará o día cun recital de poemas de Rosalía por parte de nenos e de nenas e Regueifas a cargo de Pinto de Herbón e de Luís o Caruncho.

Neta primeira xornada inaugurarase unha exposición fotográfica coa obra de Paco Penas.

O sábado 11, a partires das 18.00 h., presentarase o libro Alexandre Bóveda na demanda de restauración (Laiovento) de David Otero. Este acto contará coas intervencións de Xosé Vázquez Pintor, Avelino Pousa Antelo e de Xoán Fernández Avella, amais de gozar coa música de Mini e Mero.

Rematará esta 9ª Forxa o domingo cunha lembranza ao dramaturgo Manuel Varela Buxán, onde intervirán Xosé Vazquez Pintor, Carlos Loureiro e Daniel González Alén. Antes da clausura Orlando Jorge Figueiredo, José Jerónimo Ferreira e Ulises Figueredo do Grupo poético de Aveiro mais Iria Pedreira Anido ofrecerán aos asistentes un recital poético musical.

Nesta edición o Seminario Estudios de Deza e Celso Fernández Sanmartín recibirán cadansúa medalla que lles acredita como Amigos de A Solaina.

Do 11 ao 16 de agosto. Contarase coa presenza dos escritores ceenses José Manuel Oter Lastres, Miro Villar, María Canosa e de Luís Lamela

Cee presenta o programa da súa Feira do Libro

(10-Xullo-2009)

A Delegación de Educación, Cultura e Xuventude do Concello de Cee ven de presentar o programa Verán Cultural 09 coas diferentes actividades que le levarán a cabo no concello situado no corazón da Costa da Morte.

Dentro da programación presentada destaca a tradicional Feira do Libro de Cee que terá lugar do 11 ao 16 de agosto. Na edición deste ano contarase coa presenza de escritores e escritoras ceenses que presentarán e asinarán os seus novos traballos.

Entre os participantes están José Manuel Oter Lastres, que ademais de pronunciar o pregón inaugural da Feira presentará o seu libro La niña de gris (MR Ediciones); tamén fará acto de presenza Miro Villar, que presentará o seu recente ensaio Antón Zapata García, biografía dun poeta emigrado ao servizo da II República, publicado por Laiovento. Pola súa banda, María Canosa presentará o libro de relatos Faíscas (Galaxia) e Luís Lamela o seu Escapado. Do monte do Pindo ao exilio pasando pola illa de San Simón (Xerais).

[Verán Cultural 09 de Cee]

Tras a xuntanza confirmou a inauguración da Biblioteca de Galicia no ano 2010

Roberto Varela reúnese cos representantes de ANABAD Galicia

(10-Xullo-2009)

O conselleiro de Cultura e Turismo, Roberto Varela, e o director xeral de Promoción e Difusión da Cultura, Francisco López Rodríguez, mantiveron onte unha xuntanza con representantes da asociación de bibliotecarios e arquiveiros ANABAD Galicia aos que comunicaron as liñas de traballo da Consellería para conseguir un sistema de bibliotecas “moderno e integrado”.

Roberto Varela anunciou no transcurso da reunión a presentación en 2010 dunha nova Lei de Bibliotecas na que se está a traballar na súa fase de borrador, coa finalidade de adecuar o marco normativo vixente desde 1989 ás novas necesidades do sector. Tras a reunión, Roberto Varela asegurou que a Consellería de Cultura e Turismo manterá un “diálogo permanente con todos os profesionais, especialmente das bibliotecas públicas” para a elaboración dun Plan de Bibliotecas para esta lexislatura. Neste eido, estudaranse as propostas presentadas de cara a deseñar unha “modernización eficaz” dos modelos de xestión, mantendo, e incrementando no posible, as liñas de axudas ás bibliotecas públicas.

Respecto á Biblioteca de Galicia, o conselleiro Roberto Varela confirmou a súa inauguración en 2010, coincidindo co Ano da Lectura, concibíndoa como “un proxecto para todos os galegos”. O plan para esta biblioteca ten como obxectivo “recoller e difundir a nosa cultura en calquera soporte” no que será prioritario o servizo á rede de bibliotecas públicas.

A literatura acapara unha importante parte do programa do Congreso que se celebrará dos días 13 ao 17 de xullo

Compostela acolle a vindeira semana o IX Congreso Internacional da AIEG

(09-Xullo-2009)

Santiago de Compostela acollerá do 13 ao 17 de xullo o IX Congreso Internacional da Asociación Internacional de Estudos Galegos (AIEG). Estes congresos, que se ven celebrando dende o ano 1985, reune a estudosas e estudosos de diversas disciplinas e que se ocupan da realidade galega ou da súa relación coa globalización e da presenza da cultura galega no mundo, especialmente no ámbito académico.

Este IX Congreso congregará a especialistas de todo o mundo e de todas as áreas do saber, a debateren a situación do Dereito, da Economía, Política, Tecnoloxía da información, Tradución, Historia, Literatura e Lingüística galegas na era globalizada.

Por suposto, a literatura terá unha enorme importancia no desenvolvemento dos cinco días do Congreso, cun amplo abano de actividades como mesas redondas, conferencias e relatorios.

[Programa do IX Congreso Internacional da AIEG]

O conselleiro de Cultura e Turismo e o conselleiro de Educación tomaron posesión dos seus cargos como vogais da Fundación en representación da Xunta de Galicia

A Real Academia Galega, galardoada co XXV Premio 'Celanova, Casa dos Poetas'

(08-Xullo-2009)

A Fundación Curros Enríquez de Celanova concedeu no día de onte o XXV Premio 'Celanova, Casa dos Poetas' á Real Academia Galega.

A Fundación fixo pública esta decisión de entre todas as propostas pola 'impagable contribución á preservación do idioma dende o pasado século' e os seus 'evidentes méritos'. Tamén agradeceuse a colaboración da Real Academia Galega polos actos levados a cabo dende a institución no centenario da morte de Curros celebrada o pasado ano.

O Premio 'Celanova, Casa dos Poetas' vense celebrando dende o ano 1985 en colaboración co Concello de Celanova e xurde co gallo de lembrar cada ano a Manuel Curros Enríquez e a Celso Emilio Ferreiro, dúas das máximas figuras literarias da Galicia do século XIX e XX e dous dos máximos expoñentes da poesía civil a partir do Rexurdimento, nados, ámbolos dous, na popular “Calle Arriba” de Celanova. Con este galardón, a Fundación pretende homenaxear un galego que ó longo da súa vida se teña significado pola defensa dos valores culturais de Galicia no máis amplo sentido da palabra.

O premio, sen dotación económica, consiste nunha medalla de prata, obra do escultor Acisclo Manzano, que reproduce por unha cara a casa de Curros Enríquez, e pola outra cinco “C” concéntricas que simbolizan a letra pola que comezan os elementos identificativos deste premio “Casa, Curros, Celanova, Castor e Celso”. O nome de Castor refírese a Castor Elices, poeta romántico contemporáneo de Curros, que tamén naceu en Celanova. O galardoado recibe tamén unha placa de prata na que se recolle un resumo da acta do acordo, co fin de dar fe da concesión do premio. No acto de entrega, o premiado asina sempre no libro de honra do premio, acostumando a deixar unha frase para o recordo.

Na mesma sesión o conselleiro de Cultura e Turismo, Roberto Varela e o conselleiro de Educación Xesús Vázquez tomaron posesión dos seus cargos como vogais da Fundación en representación da Xunta de Galicia.

Roberto Varela, que ostenta o cargo de vicepresidente do Padroado, mostrou a súa intención de colaborar activamente coa Fundación e coas actividades que esta fomenta. Neste eido, os representantes de cultura e educación destacaron o importante papel da Fundación na promoción e difusión da figura de Manuel Curros Enríquez e outros poetas e escritores vinculados a Celanova. Roberto Varela fixo fincapé na transcendencia das actuacións e das iniciativas promovidas pola Fundación como organizadora e colaboradora de actos culturais, turísticos e sociais. Entre as actividades destacadas están a xestión da Casa-Museo, o Premio 'Celanova casa dos poetas', a 'Ruta Currosiana', itinerario de sendeirismo que transcorre polas antigas vías romanas dos arredores desta vila ourensá; ou a posta en marcha de seminarios, recitais poéticos e conferencias relacionadas co mundo da literatura.

Quérese agradecer deste xeito o patrocinio ininterrompido de Ediciós do Castro

Gallaecia homenaxea a Isaac Díaz Pardo no seu número 28

(08-Xullo-2009)

A revista Gallaecia, editada polo Departamento de Historia I da USC ven de elaborar no seu último número, o 28, un monográfico en homenaxe a Isaac Díaz Pardo. Quérese así agradecer o patrocinio ininterrompido de Ediciós do Castro, personalizado na figura do intelectual galeguista, da publicación que naceu en 1975 por iniciativa do profesor Vázquez Varela.

A revista Gallaecia afronta unha nova etapa cun novo formato e un consello de redacción e comité científico máis amplos para dar continuidade a un proxecto que o converte nunha das revistas de arqueoloxía e das ciencias da antigüidade con máis anos de España, ademais das máis regulares con 27 números en 33 anos. Gallaecia ten contribuído, segundo os seus responsables, a “preservar e coñecer a herdanza milenaria” que é obxecto de traballo de arqueólogos, antropólogos e historiadores da antigüidade. 

Entre os actos está a presentación dunha novela inédita do autor de Dos anxos e dos mortos

Barbantia homenaxea este novembro a Anxo Rei Ballesteros

(02-Xullo-2009)

A Asociación Barbantia dedicará o mes de novembro a homenaxear a Anxo Rei Ballesteros, finado o pasado ano e membro de dita asociación cultural.

Esta decisión xa fora tomada no pasado mes de febreiro no transcurso da súa asemblea anual. Barbantia pretende deste xeito tributar un recoñecemento de toda Galicia ao autor de Dos anxos e dos mortos, e especialmente da Pobra do Caramiñal, onde Rei Ballesteros fixou a súa residencia nos seus derradeiros anos.

Agora a Asociación Cultural Barbantia ven de presentar o calendario de actos que ao longo de novembro homenaxeará e enxalzará a figura e a obra do escritor orixinario de Boqueixón.

O venres 6 de novembro presentarase, ás 20.30 h., no Museo-Valle Inclán, da edición artesá do libro titulado Tres contos de Anxo Rei, un proxecto que Barbantia elabora conxuntamente coa Colección Bourel que dirixe Antonio Piñeiro.  Ese mesmo día, ao remate da presentación do volume, unha das persoas que mellor coñece a obra do escritor, Carlos Fernández, falaranos sobre O ensaio en Anxo Rei Ballesteros.

Unha semana despois Dolores Vilavedra, escritora, crítica literaria e profesora de Literatura Galega na USC, analizará a importancia da creación novelística do autor de Boqueixón. Despois da súa intervención terá lugar a presentación dunha novela inédita de Anxo Rei Ballesteros cuxa edición corre a cargo da Editorial Galaxia. Este acto contará coa presenza de Víctor Freixanes, director de Galaxia.

O 20 de novembro, o actor, dramaturgo, director teatral e tradutor galego Manuel Lourenzo falará sobre Anxo Rei Ballesteros e o teatro. Os actos rematarán o venres 27 coa presentación do V Anuario de Estudos do Barbanza (Anuario 2009), que será nesta ocasión un monográfico adicado ao autor homenaxeado.

Ademais, a Asociación Cultural Barbantia solicitará ao Concello da Pobra o nome dunha rúa para Anxo Rei Ballesteros.

O vindeiro ano coincide co centenario do nacemento do intelectual ferrolán

A Fundaçom Artábria recoñecerá o labor intelectual de Carvalho Calero no 2010

(02-Xullo-2009)

Tras a decepción que causou entre moita xente e colectivos a non dedicación no 2010 a Ricardo Carvalho Calero do Día das Letras Galegas, a Fundaçom Artábria recoñecerá no vindeiro ano o inxente labor cultural que desenvolveu en vida Carvalho Calero.

A Fundaçom Artábria levará a cabo no 2010 unha serie de actividades en prol da divulgación da obra e das ideas de Carvalho Calero nun ano que coincide co nacemento do profesor e escritor e intelectual ferrolán.

Este Decreto aprobouse no Consello da Xunta do 18 de xuño

Publícase no DOGA o Decreto 342/2009 polo que se crea o Rexistro Administrativo de Librarías de Galicia

(02-Xullo-2009)

Se o pasado 18 de xuño aprobábase o Decreto para a creación do Rexistro Administrativo de Librarías de Galicia, hoxe publicase dito decreto no DOGA e entrará en vigor dentro de vinte días.

O Decreto 342/2009, do 18 de xuño, polo que se crea o Rexistro Administrativo de Librarías de Galicia e se regula a súa organización e funcionamento recoñece ás librarías como puntos esenciais de venda de libros e axentes culturais indispensables. Este rexistro ten por obxecto a inscrición e anotación dos datos relativos ás librarías e libreiros/as radicados en Galicia e ten carácter obrigatorio para efectos administrativos. Sen o seu rexistro as librarías non poderán acceder ás axudas e subvencións da consellería competente en materia de cultura.

[Máis información]

[Decreto 342/2009 no DOGA]

O colectivo Arraianos desenvolverá esta actividade no transcurso da Festa da Fronteira

Méndez Ferrín recibirá o recoñecemento como Arraiano Maior da Raia Seca

(02-Xullo-2009)

O colectivo Arraianos outorgará ao escritor ourensán Xosé Luís Méndez Ferrín o recoñecemento como Arraiano Maior da Raia Seca pola súa traxectoria na defensa da identidade e da cultura arraianas.

O acto levarase a cabo o vindeiro 26 de xullo na fronteira da Madalena, no concello de Lobios, no transcurso da Festa da Fronteira. Xunto ao acto haberá un roteiro literario e un xantar aberto a todo o publico interesado en participar.

* Para anotarse no xantar hai que presentar no día da comida un xustificante de ter ingresado 20 euros no número de conta 2080 0329 31 0040005303 antes do 20 de xullo de 2009.