|
O
14 de outubro rendirase homenaxe a Luz Pozo Garza
Culleredo
presenta un outono cheo de letras
(30-Setembro-2009)
 O
Concello de Culleredo presentou o programa
do ciclo Outono das Letras, dedicado á 'Palabra
de muller'. Ao longo dos vindeiros tres meses, a
biblioteca 'Uxío Novoneyra' de Vilaboa e
o edificio de servizos múltiples de O Burgo
acollerán presentacións de libros
e espectáculos de poesía, música
e danza.
Un
dos actos centrais deste Outono das Letras terá
lugar o mércores 14 de outubro coa homenaxe
que se lle brindará á poeta Luz Pozo
Garza, que presentará o seu último
poemario Deter o día cunha flor (Baía).
O mércores seguinte tocaralle quenda a Eva
Veiga que presentará A luz e as súas
cicatrices (Sociedad de Cultura Valle-Inclan).
No
mes de novembro estarán na biblioteca 'Uxío
Novoneyra' Yolanda Castaño e Diana Varela
Puñal, que presentarán Erofanía.
Triloxía poética (1995-1998) (Espiral
Maior) e Fíos (Espiral Maior), respectivamete.
Dentro dos espectáculos poético musicais
o día 6 Mon Santiso e compañía
presentarán Cancións contadas /
Cantadas cancións e o venres 27 Yolanda
Castaño e Blanca Novoneyra mesturarán
poesía, música e danza contemporánea
en Tender a man.
En
decembro presentarase os libros Poemas de amor
e de cidade do Taller de poesía de Vilaboa
e O pouso do fume (Espiral Maior) da poeta
coruñesa Dores Tembras.
Xunto
a este Outono das letras a concellería de Cultura do Concello de Culleredo bota
a andar as actividades de
Animación á Lectura para adultos para este curso 2009/2010 que
darán comezo o día 5 de outubro nas Bibliotecas Municipais “Xosé
Cardeso Liñares” de Vilamelania-Vilaboa, “Uxio Novoneyra” de
Villamelania-Vilaboa e “Miguel González Garcés” de Servizos Múltiples
do Burgo.
Dirixidos aos usuarios adultos, realizaranse os clubes de
lectura e a Tertulia Literaria, que reúnen dous alicientes distintos: a
lectura persoal e íntima e a posibilidade de compartir a lectura con
outras persoas. Este ano, como novidade, nacen a Tertulia de Arte e a Tertulia de
Poesía. Os interesados en recibir máis información sobre
estas actividades deben de se dirixir a calquera
das bibliotecas municipais do Concello de Culleredo
ou chamando ao teléfono 981665597. Todas
estas actividades son de balde.
[Programa
de Outono
das letras 2009]
|
|
|
|
Do
1 ao 19 de outubro
Dan
comezo ás XXI Xornadas de Banda Deseñada
de Ourense
(30-Setembro-2009)
 Un ano máis,
e xa van vinte e unha edicións, Ourense acolle as Xornadas de
Banda Deseñada que decorrerán do 1 ao 18 de outubro en
diferentes localizacións da cidade das Burgas. Estas Xornadas
están organizadas pola Casa da Xuventude de Ourense co apoio
da Dirección Xeral de Xuventude e Voluntariado e do Concello
de Ourense.
Entre as estrelas
convidadas desta edición destaca a presenza do sevillano
Miguel Brieva, que presentará en Ourense a súa exposición
Sobras maestras. Brieva é colaborador de revistas como El
Jueves, La Vanguardia, El País, Rolling Stone ou Mondo Bruto e
autor das obras Dinero, Enciclopedia Clismon e El otro mundo.
Outros artistas de
recoñecido prestixio que pasarán por Ourense son o
catalán Juanjo Sáez e o ourensán David Rubín.
A exposición de Sáez fará un repaso á súa
traxectoria como autor de BD, publicista e ilustrador mentres que
Rubín presentará os orixinais do seu recente e exitoso
Cuaderno de tormentas.
Outras exposición
que se poderán contemplar nas Xornadas son as mostras
colectivas do 'Certamen de Cómic e Ilustración Injuve
2008', 'Fanzine Enfermo', 'All-Girlz', 'GZcrea Banda Deseñada 2009',
'Viñetas descubertas. Certames galegos 2000-2008' e 'Miña
terra galega'.
Por
outra banda, numerosas
actividades acompañarán as exposicións. Deste
xeito haberá unha sección dedicada ao cinema e á
banda deseñada onde se proxectarán en 35mm filmes
relacionados coa banda deseñada internacional, mesas redondas
cos autores, exercicios creativos colectivos do Lab·Ou
(Laboratorio Galego de BD Experimental) e un dos actos máis
esperados, a entrega dos premios do Certame «GZcrea 2009»
e do Premio Ourense de BD que terán lugar mañá
ás 12:30 h, na Casa da Xuventude.
[Páxina
web das XXI Xornadas de Banda Deseñada de
Ourense]
|
|
|
|
A
mostra Galicia 2009, Tempo de BD estará
no VIII Festival de Banda Deseñada da Rexión
de Bruxelas
A
banda deseñada galega chega ata Bruxelas
(28-Setembro-2009)
 Do
1 ao 8 de outubro poderase visitar no VIII Festival
de Banda Deseñada da Rexión de Bruxelas a mostra retrospectiva
Galicia 2009, Tempo de BD, unha exposición
que recolle algúns dos grandes traballos que se produciron no
país nos últimos anos. Esta iniciativa é froito da
colaboración entre a Consellería de Cultura e Turismo, promotora da exposición, e
a Fundación Galicia Europa, que tivo a iniciativa de trasladala á
capital belga.
A inauguración terá lugar o vindeiro día 1 de outubro en Bruxelas
coincidindo coa presentación oficial do festival, á que asistirán as
autoridades belgas e os medios de comunicación especializados. Neste
emprazamento poderá visitarse a mostra ata o día 8 de outubro.
Posteriormente, entre os días 9 e 11 de outubro, as 70 láminas que
compoñen a exposición exhibiranse na sede do Festival de BD de
Bruxelas, xunto a obras de todo o mundo seleccionadas pola organización.
|
|
|
|
O
29 de outubro en Santiago de Compostela
Xornada
homenaxe dedicada a Xohana Torres
(27-Setembro-2009)
 A
Comisión de Igualdade do Consello da Cultura
Galega, baixo a coordinación de Ana Romaní
e de Helena González, organiza a xornada-homenaxe
Xohana Torres. A dona dos mapas. Mediante
este acto, que se celebrará o 29 de outubro
no Consello da Cultura Galega, quérese propiciar
novos enfoques arredor da súa obra poética,
narrativa, teatral e no ámbito da literatura
infantil e xuvenil, así como resituar e documentar
a relevancia creativa no contexto cultural dende
os anos 50 ata a actualidade desta escritora compostelá.
Entre
os ponentes que reivindicarán e falarán
da autora de Estacións ao mar estarán Ramón Villares, María Xosé Agra, Dolores
Vilavedra, Iolanda Ogando, Olga Novo, Montse Pena Presas, Helena
González, Mariam Mariño, Laura Pérez Landeira, Xoán Bernárdez Vilar e
Ana Romaní. Tras as ponencias e presentacións pecharase a xornada
coa sesión Clandestina abordaxe, onda
que rompe, un recital poético a cargo
de María Xosé Queizán,Chus Pato, Lupe Gómez e María do Cebreiro, presentadas por Lara Rozados.
[Programa
de Xohana
Torres. A dona dos mapas]
|
|
|
|
O
mito que fascina: do lobo ao lobishome os días
16 e 17 de outubro
Lugo
converterase en capital da literatura de tradición
oral galega
(21-Setembro-2009)
 Os
días 16 e 17 de outubro vai ter lugar, no Salón de Actos da Deputación de Lugo, as II Xornadas de Literatura de
tradición oral, que nesta nova edición
xirará arredor da figura do lobo: O mito que fascina:
do lobo ao lobishome.
As
xornadas, organizadas pola Asociación de
Escritores en Lingua Galega (AELG) co patrocinio
da Área de Cultura da Deputación de Lugo
e coordinadas por Antonio Reigosa e Isidro Novo,
ten como obxectivo promover a valorización
do patrimonio cultural en xeral pero especialmente
a visualización do inmaterial, entre o que
a literatura popular de tradición oral ocupa
un lugar senlleiro dentro da literatura galega.
O
mito que fascina: do lobo ao lobishome, contará
coas intervencións dos relatores Xabier P. Docampo, escritor
e Premio
Nacional de Literatura Infantil e Xuvenil; Antxon Gómez Lorente,
escritor e garda de montes do Parque Natural de Pagoeta; Alberte
Reboreda, arqueólogo e técnico de Patrimonio Cultural; e X. Luis Garrosa
Gude, escritor, profesor e investigador da literatura oral.
Paralelamente
a estas II Xornadas, estará aberta desde
o 8 ata o 25 de outubro a exposición. O
lobo, unha carreira por sobrevivir
na Sala de Exposicións do Pazo de San Marcos
(sede da Deputación de Lugo). Esta exposición
está organizada por ADEGA, AAAGP, ERVA e
Museo Provincial de Lugo.
As
xornadas son de balde. Todos aqueles interesados
en recibir diploma acreditativo do mesmo, deben
dirixirse a través do e-mail oficina@aelg.org
ou chamando ao teléfono 981 133 233.
[Programa
das II
Xornadas de Literatura de Tradición Oral]
|
|
|
|
"É
unha narración en clave de misterio, case
unha crónica xornalística" segundo
declarou o xurado
Daniel
Montero Coira, gañador da V edición
do premio de banda deseñada Castelao
(21-Setembro-2009)
 O
pontevedrés Daniel Montero Coira, coa súa obra Sen mirar atrás, é o gañador
da V edición do premio de banda deseñada Castelao que convoca
anualmente a
Deputación da Coruña.
A concesión foi dada a coñecer esta mañá polo
presidente da Deputación da Coruña, Salvador Fernández Moreda, quen
subliñou que á presente edición “presentáronse un total de 8 obras,
todas elas de elevada calidade, segundo a opinión do xurado”, que
estivo formado por Miguelanxo Prado, tamén comisario do premio, por
Ángel de la Calle, e Carlos Portela.
O xurado outorgou por maioría de todos os seus membros o premio
ao orixinal presentado por Daniel Montero Coira baixo o título Sen
mirar atrás, apreciando nesta obra “a corrección no desenvolvemento
dunha narración ben construída e axilmente contada, a efectividade dun
tratamento gráfico axeitado á historia, e un interesante personaxe
secundario que medra habilmente nun segundo plano”, segundo o afirmado
polo seu voceiro, o creador Miguelanxo Prado, quen manifestou tamén que
“é unha narración en clave de misterio, case unha crónica xornalística”.
O xurado seleccionou tamén como finalista a obra Kartoffel, da
que son autores José Trigo Alonso, e Ramón Trigo Alonso. “A obra
finalista amosa ambición argumental e unhas propostas gráficas e
plásticas interesantes”, segundo a opinión do tribunal.
|
|
|
|
O
proxecto servirá para dar coñecer
Galicia entre os propios galegos e os visitantes
de fóra
A
Consellería de Cultura e Turismo porá
en marcha no transcurso desta lexislatura a creación
de vilas literarias
(21-Setembro-2009)
 A Consellería de Cultura e Turismo, a través da Secretaría Xeral para o
Turismo, anunciou no transcurso da visita realizada onte polo conselleiro Roberto
Varela a Vilanova de Arousa a creación das vilas literarias coma
produto turístico cultural que sirva de base para dar a coñecer Galicia
entre os propios galegos e os visitantes de fóra. A iniciativa consiste
no deseño de itinerarios turísticos por diferentes vilas galegas
recoñecidas tomando como punto de partida a literatura dos autores que
naceran nelas ou estean vencellados biograficamente a elas para
descubrir despois outros moitos aspectos culturais, patrimoniais ou
naturais das súas zonas de influencia.
Roberto Varela explicou que as vilas que se acollan a iniciativa vilas
literarias, cuxa elección se acordará con profesionais do sector da
cultura de Galicia, deberán cumprir unha serie de requisitos ou
condicións entre os que destacan que a súa poboación teña a
configuración urbana e o recoñecemento de vila; que esta sexa lugar de
nacemento de máis dun escritor comunmente recoñecido na historia da
literatura galega ou que se lle dedicara o Día das Letras Galegas.
Tamén se valorará que o lugar conte con algún roteiro recoñecido, rural
ou urbano, relacionado cos escritores da súa terra, entre outros
aspectos.
Padrón, Ponteceso, Mondoñedo, Celanova, Cambados, Rianxo ou Vilanova de
Arousa son algunha dos principais lugares que formarán parte do elenco
de vilas literarias que promoverá a Secretaría Xeral de Turismo. O
berce de nacemento de escritores como Rosalía de Castro, Eduardo
Pondal, Álvaro Cunqueiro, Manuel Curros Enríquez, Ramón Cabanillas,
Castelao ou Valle Inclán servirán como reclamo para coñecer comarcas
enteiras de Galicia, cuxos recursos turísticos moitas veces non están
aínda suficientemente promocionados.
|
|
|
|
O
sábado 19 de setembro
Ribadavia
lembra ao poeta Xosé Carlos Gómez
Alfaro
(18-Setembro-2009)
 O
PEN Clube de Galicia organiza para mañá sábado unha xornada
que servirá para lembrar e para homenaxear
ao poeta Xosé Carlos Gómez Alfaro,
finado o pasado ano mentres asistía a un acto literario con motivo da celebración do Día da Letras Galegas no colexio no que traballaba.
Os
actos comezarán a partir das 12.00 h. n'As
Chavolas-Ventosela (Ribadavia) co develamento dunha placa na casa natal do poeta,
trala cal o profesor Xesús Alonso Montero
e Manuel García Montero (alcalde de Cenlle)
pronunciarán unhas palabras en lembranza
do autor de O clamor da eclipse (Espiral
Maior).
Posteriormente
presentarase, ás 13.15 h. na Casa da Cultura
de Ribadavia, Poesía Galega toda, I e II, editado
polo PEN Clube e onde se recolle toda a obra competa
de Gómez Alfaro. Tomarán a palabra
durante o acto Luís González Tosar,
presidente do PEN Clube; Xosé Carlos Sierra,
director do Museo Etnolóxico de Ribadavia;
e Román Raña, encargado da edición.
Seguiralle á presentación un recital
poético-musical a cargo de Miro Villar, Ramón
Nicolás, Xosé Gregorio Ferreiro Fente,
Miguel Anxo Fernán Vello, Helena de Carlos
e Víctor Campío entre outros.
Rematarase
este acto de lembranza coas intervencións
de Francisco López-Barxas, Director Xeral
de Creación e Difusión da Cultura,
e do alcalde de Ribadavia Marcos Blanco Jorge.
|
|
|
|
culturagalega.org
ofrécenos a posibilidade de viaxar virtualmente
pola Costa da Morte mentres lemos os poemas que
compoñen De Pondal ao Batallón
literario. 120 anos de poesía na Costa da
Morte
A
poesía da Costa da Morte no Google Earth
(18-Setembro-2009)
 O
soportal culturagalega.org pon ao dispor dos internautas
unha versión xeográfica para Google Earth do
libro De Pondal ao Batallón Literario.
120 anos de poesía na Costa da Morte,
publicado en papel por Sotelo Blanco e a Asociación
Neria baixo a edición de Modesto Fraga e
Miro Villar.
Utilizando
os recursos que ofrece Google Earth, podemos achegarnos
virtualmente ata os lugares relacionados cos poemas
que compoñen esta antoloxía poética.
Deste xeito, mergullámonos na praia do Rostro
mentres lemos A televisión de María
Lado, sentámonos no cabo Touriñán
ao carón de Marilar Aleixandre para subir
máis tarde ao Monte Neme seguindo a pegada
literaria de Xosé Manuel Varela, así
ata completar as vinte e oito paradas desta viaxe
poética pola Costa da Morte.
[Máis
información na web de culturagalega.org]
|
|
|
|
A
exposición poderase visitar na Casa da Cultura
ata finais deste mes
A
obra e o pensamento de Vicente Risco en Monforte
de Lemos
(18-Setembro-2009)
 O
pasado mércores inaugurouse na Sala de Exposicións da Casa da Cultura de Monforte
de Lemos a exposición Europa en Vicente Risco. Esta mostra está
promovida pola Fundación Vicente Risco e conta coa colaboración da
Dirección Xeral de Promoción e Difusión da Cultura e da Secretaría
Xeral de Política Lingüística da Xunta de Galicia ademais da da
Delegación de Cultura do Concello de Monforte de Lemos.
Europa en Vicente Risco
repasa de maneira cronolóxica a carreira do autor en relación cos
sucesos máis importantes da súa época, dende as vangardas artísticas
ata a evolución dos fascismos. Tamén sitúa o pensamento de Risco en
relación con Europa e explica cales eran as principais liñas políticas
e sociais que o ourensán ideou para unha Europa na que Galicia tiña que
xogar o seu papel.
[Europa
en Vicente Risco]
|
|
|
|
O
premio entregarase no transcurso da inauguración
das Xornadas de Banda Deseñada de Ourense
El
Patito Editorial recibe o Premio Ourense de Banda
Deseñada
(18-Setembro-2009)
 O
Premio Ourense de Banda Deseñada, que é outorgado anualmente pola Casa da
Xuventude de Ourense e mais a Concellaría de Cultura do
Concello de Ourense para distinguir as máis importantes
iniciativas e traxectorias dentro do panorama da banda deseñada
galega, recae este ano 2009 en El Patito Editorial, polo seu labor na
publicación de cómic e por dar nel especial cabida aos
autores galegos e á edición en lingua galega, aínda
que sen se pechar a outros autores e linguas.
O
Premio será entregado no transcurso da inauguración das
Xornadas de Banda Deseñada de Ourense, o próximo 1 de
outubro. Sen dotación económica, o galardón é
un trofeo deseñado expresamente para cada edición polo
artista plástico Manolo Figueiras.
Nacida
en outubro de 2007, El Patito Editorial está dirixida por
Gemma Sesar e Fausto Isorna e ten como obxectivos
principais publicar autores galegos, tanto en galego como en
castelán; recuperar as obras clásicas da Banda Deseñada galega, e,
ademais, publicar obras de autores españois e internacionais.
No seu catálogo figuran, así, recuperacións de
clásicos como Dudi, e recompilacións da obra dispersa
de autores como Primitivo Marcos, Norberto Fernández, Fran
Bueno ou Emma Ríos. Entre as súas publicacións
están os dous últimos premios Castelao de Banda Deseñada
convocados pola Deputación da Coruña: Aventuras
de Cacaeuqui, de Jacobo Fernández Serrano, e Mensaxes,
de Mariano Casas. Ademais, é intención dos editores
traducir toda a obra de Miguelanxo Prado a galego. Son ademais promotores da revista
Galimatías, dirixida ao público xuvenil. Tamén
comercializan en DVD o documental 35 anos de historieta galega,
dirixido polos propios promotores de El Patito.
O Premio Ourense
de BD chega así á súa vixésima edición.
Até o de agora, foron galardoados co Premio Xaquín
Marín, Agustín Fernández Paz, Edicións
Xerais, Miguelanxo Prado, A Nosa Terra, o equipo creativo de
«A Familia Perpetua» (Carvalho, Héitor e Robledo),
a Deputación da Coruña, a Biblioteca Club 33 de
Santiago, Fausto Isorna, o programa Xabarín Club, o
Festival Viñetas desde o Atlántico, Fran Jaraba, a
Deputación de Lugo, o Consello da Cultura Galega, a revista
Golfiño, Pepe Carreiro, o Colexio de Arquitectos de
Galicia, a revista BD Banda, a Libraría Paz, o
Colectivo Polaqia e as Bibliotecas Municipais da Coruña.
|
|
|
|
A
publicación está dirixida por Craig
Patterson e Helena Miguélez
Publícase
vía web o primeiro número de Galicia
21. Journal of Contemporary Galicia Studies
(18-Setembro-2009)
 Craig
Patterson, dende a Universidade de Cardiff, e Helena
Miguélez, dende a de Bangor, son os responsables
de Galicia 21. Journal of Contemporary Galician
Studies, unha publicación virtual de
carácter anual en galego e en inglés
no que se abordarán diferentes aspectos culturais
de Galicia.
Integran
o comité editorial profesionais procedentes
de universidades europeas e americanas e incorporan
ao primeiro número, recén publicado,
artigos de Burghard Baltrusch,
Anxo M. Lorenzo, Roberto Pascual, María do Cebreiro,
María Reimóndez e Miguel-Anxo Murado.
Completan este número unha entrevista con
Domingo Villar
e unha serie de recensións de libros. Dende o comité de edición
están abertos a futuras contribucións
en forma de traballos xurdidos baixo un alicerce
galego.
[Nº
1 de Galicia 21. Journal of Contemporary Galicia
Studies]
|
|
|
|
O
guionista da obra Felipe Hernández Cava recibiu
o premio como 'Mellor guión'
O
álbum As serpes cegas, publicado por
BD Banda, premiado como mellor obra do Estado
(18-Setembro-2009)
 Dolmen,
editorial especializada en banda deseñada
e organizadora dos premios da crítica nesta
modalidade, fixo público o pasado martes
na cerimonia de clausura das Xornadas de cómic
de Avilés os resultados da IX edición
dos premios da crítica.
As
serpes cegas, do mallorquín Bartolomé Seguí e do madrileño Felipe Hernández Cava optaban
a recibir os galardóns a “Mellor obra nacional”, “Mellor debuxante
nacional” e “Mellor guionista nacional”. Finalmente As serpes cegas -primeiro álbum editado en solitario por
BD Banda- foi considerada como mellor obra do Estado.
Pola súa banda, Felipe Hernández Cava levou o
galardón ao mellor guión.
|
|
|
|
O
día 29 de setembro Daoud Hari pronunciará
unha conferencia no CGAC
Os
tradutores galegos homenaxearán a Marilar
Aleixandre no Día Internacional da Tradución
(18-Setembro-2009)
 Representantes
da Escola de Tradución da Universidade de
Vigo, da Asociación Galega de Tradutores
e da Asociación Galega de Profesionais da
Tradución e da Interpretación reuníronse
co director xeral de Promoción e Difusión da Cultura, Francisco López,
co obxecto de definir os
últimos detalles dos actos conmemorativos do Día Internacional da
Tradución, que se celebrará o próximo 30 de setembro.
Ese
día a Asociación de Tradutores
Galegos homenaxeará a Marilar Aleixandre pola súa traxectoria como
tradutora e o que significa, neste eido, para a cultura galega e a súa
integración na vangarda intelectual do mundo contemporáneo.
Na
mesma xuntanza anunciouse a presenza de Daoud Hari, recoñecido
intérprete no conflito bélico de Darfur, quen pronunciará unha conferencia
o día 29 no salón de actos do CGAC verbo da súa experiencia e abordará
cuestións relativas a súa obra Eu fun tradutor en Darfur, con versión
en 12 idiomas.
Asemade, trala concreción destes feitos englobados nos actos do Día
Internacional da Tradución, abordáronse asuntos relativos á
materialización de proxectos que apoien e impulsen a actividade
tradutora en Galicia.
|
|
|
|
O
19 de setembro en Betanzos. Intervirán os
poetas Lucía Vilches, Óscar de Souto,
Carmen Corral, Antón Borrazás e Begoña
Picón
A
Asociación O.L.C.A. organiza o Festival poético-musical
Latexos
(10-Setembro-2009)
 A Asociación Organización Literario-Cultural Amencer (O.L.C.A.)
organiza o Festival poético-musical Latexos
que terá lugar o vindeiro sábado 19
de setembro en Betanzos.
Os
poetas
confirmados para o evento son Lucía Vilches, Oscar de Souto, Carmen Corral Bosch, Antón Borrazás
e Begoña Picón que, xunto a presentación
de Braulio García Zamorano e baixo a intervención musical
e Roberto Vilela e a posta en escena a cargo de
Macanucci, ofrecerán aos asistentes un recital
poético que fusionará música
ambiental, música instrumental e poesía
de autor recitada en directo polos propios autores.
No
transcurso do Festival presentarase Latexos-Latidos,
o primeiro libro publicado pola Asociación
O.L.C.A. cunha escolma poética selecta deses
cinco autores membros de dita Asociación.
O
Festival dará comezo ás 21.00 h. no
Auditorio de Betanzos con entrada de balde ata completar
aforo.
|
|
|
|
O
premio está convocado pola Entidade Local
de Morgadáns e o Instituto de Estudos Miñoranos
Carmen
Caramés e Elvira Riveiro e Silvia Penas,
gañadoras da segunda edición do Victoriano
Tobío de Poesía
(08-Setembro-2009)
 A
segunda edición do premio de poesía
Victoriano Taibo, convocado pola Entidade Local de
Morgadáns e o Instituto de Estudos Miñoranos, recaeu ex aequo
e por unanimidade do xurado nos poemarios Cuarto minguante de Carmen Caramés e Biografía da multitude de Elvira Riveiro e Silvia Penas.
O
xurado, formado por Marta Dacosta, Araceli Gonda
e Gonzalo Navaza e completado -con voz e sen voto-
por Urbano Esmerode e Miguel Anxo Mouriño
destacaron de Cuarto minguante que se trata
dun poemario sobre "a dor dunha nai frustrada pola morte prematura do seu fillo, a quen
invoca e recorda con altura poética e
sinceridade" ademais de salientar a aparición de "algúns momentos de clímax nos que a emotividade se apodera do lector".
Pola
súa banda, o xurado valorou de Biografía
da multitude a súa "vontade de crítica ao sistema e a de construción estrutural mediante a
articulación dos poemas e dos textos en prosa poética para darnos unha
visión deste presente que é, en realidade, un abismo que separa o pasado do futuro"
xunto ao anhelo de "procurar a nosa reflexión".
A
esta segunda edición presentáronse
45 orixinais, dos que nunha primeira xuntanza do
xurado seleccionáronse seis. O premio consistente,
ademais da dotación económica, nunha
escultura conmemorativa realizada polo artista miñorán Fino Lorenzo e a
edición da obra na colección de poesía do Instituto de Estudos
Miñoranos denominada Colección Victoriano Taibo, será entregado no
marco dun acto que terá lugar en Morgadáns a mediados de novembro para
homenaxear a figura de Victoriano Taibo e reivindicar o seu labor
literario e cultural.
|
|
|
|
Do
15 ao 18 de setembro
Re-escribindo
a Cabanillas, novas visións sobre o poeta
do Salnés
(06-Setembro-2009)
 A Rede de Dinamización da Sociedade da Información e o Centro Comarcal
do Salnés únense neste Ano Cabanillas en Re-scribindo a Cabanillas,
unha iniciativa que ten como finalidade o emprego das novas tecnoloxías
para a creación dunha nova composición artística a partir de distintos
poemas de Cabanillas e onde cada un dos participantes ofrecerá a súa
persoal visión da obra do poeta.
O obradoiro terá unha duración de 6 horas, distribuídas en 4 sesións de hora e media cada unha
entre os días 15 e 18 de setembro e cos distintos traballos
farase unha montaxe para o seu visionado público.
Nesta iniciativa poderán participar todas aquelas persoas que o desexen,
teñan máis de 16 anos e conten con
coñecementos informáticos básicos.
|
|
|
|
Na
reunión mantida tratouse o desenvolvemento
da Lei do Libro e da Lectura de Galicia
A
Asociación Galega de Editores e a Consellería
de Cultura e Deporte potenciarán a presenza
do libro galego nas Feiras internacionais
(06-Setembro-2009)
 O
Director Xeral de Promoción e Difusión
da Cultura anunciou o pasado venres, tras a reunión
mantida tanto con Alfonso G. Sanmartín, presidente
da Asociación Galega de Editores (AGE), como
con outros representantes do sector en Galicia,
a creación dun grupo de traballo que deseñará
as liñas estratéxicas para impulsar
o sector do libro tanto en Galicia como nas citsa
internacionais máis importantes.
Deste xeito, acordouse establecer unha actuación coordinada que
potencie a imaxe de Galicia e facilite o achegamento dos axentes
internacionais do mercado do libro, na súa forma tradicional e nos
novos formatos. Segundo esta liña estratéxica, a Consellería
de Cultura e Turismo
apoiará a presenza de Galicia nas feiras de Frankfurt e no Líber, en
outubro deste ano, e na de Guadalajara (México) nos últimos días de
novembro e primeiros de decembro.
Con vistas ao próximo exercicio de 2010, Francisco López confirmou
que está programada a asistencia á Feira Internacional do Libro
Infantil e Xuvenil de Boloña, outra viaxe promocional a Buenos Aires, e
no derradeiro trimestre acudir de novo os compromisos de Líber,
Frankfurt e Guadalajara. O director xeral de Promoción e Difusión da
Cultura comprometeuse neste acto “non só a incrementar o esforzo para
integrar o libro galego no eido internacional, senón mesmo melloralo
dentro dos seus medios para unha eficaz e duradeira mellora nos índices
de lectura e uso da nosa produción editorial”.
No encontro mantido entre
Consellería e a AGE
abordouse tamén a importancia fundamental de impulsar aspectos
relativos á plasmación práctica de ideas, especialmente as referidas ao
desenvolvemento da Lei do Libro e da Lectura de Galicia, co obxectivo
claro de que o sector incremente substancialmente a súa solidez en base
aos parámetros de calidade e profesionalidade acadados até agora.
Co obxectivo de canalizar esta proposta, constituirase un grupo de
traballo que abordará 28 puntos básicos para o crecemento do mundo
editorial de Galicia, relativos á promoción de obras galegas, mercados
de dereitos ou competitividade internacional.
|
|
|
|
Os
días 3, 4, 10, 11, 17 e 18 de setembro
A
Casa Museo Emilia Pardo Bazán acolle as Xornadas
Contra vento e marea. Palabras e pegadas dos
feminismos
(03-Setembro-2009)
 A concelleira de Igualdade e Participación Cidadá
da Coruña, Margarida Vázquez,
presentou o pasado 1 de setembro as Xornadas Contra vento e marea. Palabras e pegadas dos
feminismos, unha serie de conferencias, debate, teatro, danza e
diversas intervencións artísticas que se desenvolverán os días 3, 4,
10, 11, 17 e 18 de setembro, organizadas pola Casa-Museo Emilia Pardo
Bazán e financiadas pola Concellería e a Deputación da Coruña.
O lema Contra vento e marea fora elixido por Emilia Pardo Bazán para
reivindicar o seu compromiso co traballo intelectual, tendo en conta as
evidentes trabas da época. É o momento de pór en valor o legado da
Condesa na actualidade, unha figura recoñecida pola súa defensa na
debatida cuestión da educación das mulleres. Así, nestas xornadas
intentarase manter esta mesma pulsión de liberdade, recollendo o
testemuño do espírito aberto e transgresor da primeira muller
catedrática da Universidade española.
As xornadas propoñen un achegamento ás cuestións de xénero a través de
dous bloques temáticos, pioneiras e anónimas e feminismo(s), facendo un
percorrido dende as primeiras loitas feministas do século XIX ata a
actualidade, con especial fincapé no ámbito galego, intentando mostrar
unha panorámica ampla e plural (teoría, activismo, literatura, arte)
por medio de conferencias, debates, teatro, danza e intervencións
artísticas na rúa. As xornadas contan coa dirección e coordinación de Xulia Santiso e
Anxela Caramés e serán gratuítas e de acceso libre. Expedirase 1
crédito académico de libre configuración, que se está tramitando coa
Universidade da Coruña, Santiago de Compostela e Vigo.
Por
estas xornadas pasarán, entre outras, María
Reimóndez, María Xosé Queizán,
Carmen Branco, María Jesús Busto Fariña,
Carme Nogueira, ...
[Descargar
o Programa das Xornadas 'Contra vento e marea']
|
|
|
|
Do
2 ao 20 de setembro
Siro
López inaugura en Culleredo a súa
exposición A Autonomía Galega nas
caricaturas de Siro
(03-Setembro-2009)
 Siro
López inaugurou onte na sala de Exposicións "Xosé Rey Lago" dos Muíños de Acea de Ama,
en Culleredo unha exposición con máis dun centenar de caricaturas sobre os acontecementos
máis sobresaíntes da historia da Autonomía Galega, os feitos que
definiron esta etapa, e os seus persoeiros protagonistas.
A
mostra, organizada pola Deputación da Coruña,
recolle unha selección
das viñetas que Siro López publicou no xornal “La Voz de Galicia” desde
1985 ata 2006. Trátase, pois, dun percorrido, en clave de humor, pola
historia máis recente de Galicia. Nesta exposición Siro López, a través da súa xenial pluma, ofrécenos na súa
particular visión en clave de sátira intelixente, do
acontecer en Galicia nos últimos 25 años.
A exposición compleméntase coa edición dun catálogo que, sen
dúbida, é unha peza bibliográfica de gran valor. Ademais das
reproducións das caricaturas de Siro, inclúe a excepcional colaboración
de destacados persoeiros da vida política, xornalística, cultural e
académica galega, admiradores do enxeño de Siro, da súa especial
capacidade para interpretar a historia humorísticamente. Entre os seus
colaboradores pódense citar ao ex alcalde coruñés, e actual
embaixador de España preto da Santa Sede, Francisco Vázquez; o
presidente da Corporación Voz, Santiago Rey Fernández-Latorre; o
presidente do Consello da Cultura Galega, Ramón Villares; o catedrático
Ramón Maiz, e o politólogo, Xosé Luis Barreiro.
A
exposición permanecerá aberta ata
o 20 de setembro.
|
|
|
|
O
acto está organizado conxuntamente pola Asociación
Xermolos e a Fundación Manuel María
Outeiro
de Rei homenaxeará un ano máis a Manuel
María no seu cabodano
(03-Setembro-2009)
 A
Asociación Xermolos e a Fundación
Manuel María organizan, un ano máis,
o día da Memoria da Chaira Enteira, conmemorando
a data do cabodano do escritor e poeta Manuel María
nunha xuntanza cultural e de irmandade que se celebra
cada 8 de setembro en Outeiro de Rei.
A
xornada comezará cun xantar ás 15.00
h. (os interesados en asistir deben chamar ao teléfono
646413890). Ás 17.00 h. recitaránse
poemas de Manuel María en Pena de Rodas.
Tras o mesmo, os asistentes desprazaránse
ata o Cemiterio no Campo de Santa SAbela, ao carón
do Miño, onde se depositará unha ofrenda
floral na tumba de Manuel María. Como remate,
terá lugar o rito da navalla e un recital
de poesía e música en Santa Sabela,
coa interpretación da obra de Manuel María
por Miro Casabella, Mini e Mero e Tino Baz entre
outros.
|
|
|
|