Os días 21 e 22 de novembro

Eu ou nós? Encontro de novos escritores no castelo de Santa Cruz de Oleiros

(27-Outubro-2009)

A Asociación de Escritores en Lingua Galega (AELG) convoca para os días 21 e 22 de novembro no castelo de Santa Cruz (Oleiros) unha nova edición dos tradicionais encontros de novos escritores.

Este evento será un espazo para o diálogo sobre os camiños que as novas letras galegas están a tomar na escena do noso sistema literario. Este ano, dende a AELG queren asumir as potencialidades que as tecnoloxías da información poñen ao dispor da cidadanía para tentar multiplicar as posibilidades de diálogo así como a divulgación dos asuntos a debate.

As xornadas dividiranse en catro mesas. Na primeira delas, moderada por María Xesús Nogueria, intervirán, baixo o tema A literatura (auto)referenciada Iolanda Zúñiga, Inma López Silva e Alberto Lema. Na segunda mesa intervirán sobre Noticias da poesía última Alicia Fernández, Andrea Núñez e Gonzalo Hermo coa coordinación de Elvira Riveiro Tobío.

Na xornada do día 22, baixo o título de (Auto)edición: a mirada do libro de autor/a compartirán mesa Carlos Vinagre, Baldo Ramos e Uqui Permui, intervindo como coordinadora Antía Otero. Para finalizar as mesas deste Encontro os escritores María Lado, Estíbaliz Espinosa e Sechu Sende, baixo a moderación de Francisco Castro, disertarán sobre o tema O peso da nación.

Os actos rematarán nesta segunda xornada cun recital poético-musical na Fundación Luís Seoane.

[Blog EU OU NÓS? IV Encontro de novo@s escritor@s]

[Programa do Encontro]

Con este galardón distínguese a persoas que destacan no campo da creación artística e cultural

Isaac Díaz Pardo recibe a Medalla de Ouro ao mérito en Belas Artes

(27-Outubro-2009)

Isaac Díaz Pardo recibiu hoxe nun acto celebrado en Santander a Medalla de Ouro ao mérito en Belas Artes correspondente ao ano 2008.

Creadas en decembro de 1969, estas medallas son concedidas anualmente polo Ministerio de Cultura e distinguen ás persoas e entidades que destacan no campo da creación artística e cultural ou prestado notorios servizos no fomento, desenvolvemento ou difusión da arte e a cultura ou na conservación do patrimonio artístico.

Con Isaac Díaz Pardo foi tamén galardoado o guionista coruñés Juan Antonio Porto.

O anuncio da concesión realizouse no pasado mes de febreiro a proposta do entón Ministro de Cultura César Antonio Molina.

En Cambados do 26 ao 30 de outubro

A asociación Candea organiza as II xornadas 'Cabanillas na escola'

(25-Outubro-2009)

Mañá dan comezo as II xornadas Cabanillas na escola que se celebrarán no I.E.S. Ramón Cabanillas de Cambados ao longo da vindeira semana.

Estas xornadas, organizadas por Candea (Asociación de Ensinantes do Salnés) coa colaboración da Consellería de Educación, ten como obxectivos reunir as experiencias realizadas sobre Ramón Cabanillas nos distintos centros de ensino durante o 2009, ano no que se celebra o cincuenta aniversario do pasamento do poeta cambadés.

Entre os aspectos sobre os que se afondarán nos próximos días están a actualización didáctica do profesorado, presentar novos materiais e experiencias, fomentar o intercambio entre os profesores e profesoras, ofrecer ao profesorado recursos diversos para traballar nas aulas e o de difundir o coñecemento dos recursos que ofrece a obra e a persoa de Ramón Cabanillas para traballar no ensino. Para levar a cabo dito programa están planificadas unhas conferencias a cargo da profesora Esperanza Mariño sobre o traballo de Ramón Cabanillas como tradutor e do membro da Real Academia Galega Francisco Fernández Rei titulada Ramón Cabanillas, a construción dunha patria e dunha lingua. Ao longo das xornadas tanto Candea como os diferentes centros de ensino participantes no proxecto compartirán experiencias didácticas sobre os programas levados a cabo. As xornadas rematarán o venres cun roteiro sobre o Salnés de Cabanillas, levado a cabo por Manuel Núñez Pérez.

Os interesados en asistir a estas xornadas deberán aboar 10 euros en concepto de inscrición que se realizará o primeiro día. Para os participantes no proxecto será de balde.

O texto, de 1944, examina o significado de Palestina a través das vicisitudes da historia

Olivia Rodríguez atopa un inédito de Vicente Risco sobre o significado de Palestina

(23-Outubro-2009)

A profesora e investigadora da Universidade da Coruña Olivia Rodríguez González ven de atopar un texto inédito do escritor ourensán Vicente Risco levado a cabo pola profesora Olivia Rodríguez González. A descuberta se trata dun texto histórico-descritivo, escrito en castelán e datado en 1944, que, desde unha concepción cristiá dos fundamentos de Occidente, arredor do centro simbólico que é Xerusalén para as tres relixións monoteístas, examina o significado de Palestina a través das vicisitudes da historia, e agoira posibles futuros para a supervivencia nesas datas cruciais da que Risco considera “Terra Santa” por antonomasia. A derrota alemá na 2ª Guerra Mundial xa se albiscaba daquela, e o autor propón unha saída diplomática para a pacificación dun territorio no que a España, segundo el, podía ter un papel importante.

Olivia Rodríguez González é profesora de Teoría da Literatura e Literatura Comparada así como investigadora de Filoloxía na Universidade da Coruña, alén de ser membro do padroado de Vicente Risco. A súa obra tense caracterizado pola investigación do escritor e intelectual ourensán. Entre a súa produción e labor investigador sobre Risco destacan Estética e teoría da cultura en Vicente Risco (Galaxia), Vicente Risco: escritor, etnógrafo e ideólogo do galeguismo (Ir Indo) amais dunha inxente cantidade de artigos e publicacións aparecidas en diferentes revistas e medios de comunicación.

En 1991 Anisia Miranda e o seu home, Xosé Neira Vilas, pasan a residir en Gres (Vila de Cruces)

Falece repentinamente a escritora galegocubana Anisia Miranda

(22-Outubro-2009)

No día de hoxe producíuse o repentino pasamento de Anisia Miranda Fernández, vicepresidenta da Fundación Xosé Neira Vilas, escritora e dona de Xosé Neira Vilas. O velatorio lévase a cabo no Salón de Actos da Fundación Xosé Neira Vilas, e mañá venres 23 terá lugar o sepelio na igrexa parroquial de Santiago de Gres que se realizará na máis estrita intimidade.

Anisia Miranda naceu o 30 de decembro de 1932 na cidade cubana de Ciego de Ávila. Filla de emigrantes galegos, cando era unha meniña seus pais e ela trasladáronse a unha arredada zona campesiña. Traballaban unha pequena finca. non había escola, e para que puidese estudar mudáronse para a cidade da Habana cando ela tiña nove anos. Rematou o ensino primario e estudou logo Maxisterio, e máis tarde xornalismo, para o que tiña unha moi definida vocación. Con doce anos publicou o seu primeiro traballo na prensa. E pouco despois escribiría o seu primeiro conto para nenos.

En 1953 trasladouse cos seus pais a Buenos Aires. Vencellouse ás actividades culturais galegas. En 1954 coñeceu a Xosé Neira Vilas. estudaron xuntos xornalismo. Casaron en 1957, ano en que fundaron "Follas Novas", unha organización editorial e distribuidora do libro en galego en América. Incorporáronse ambos a un seminario permanente para escritores. Colabora na prensa arxentina. na prensa galega de Buenos Aires publica o seu primeiro artigo en lingua galega en 1958. Tamén dá a coñecer por esas datas poemas de autores latinoamericanos traducidos á nosa lingua. Asiste a conferencias, exposicións de pintura e actos patrióticos galegos. Vive moi de cerca o Primeiro Congreso da Emigración, velebrado en 1956, e reúne a máis ampla información documental sobre o mesmo. En "Follas Novas" anima as tertulias sabatinas que se levan a cabo con xoves galegos e arxentinos de ascendencia galega. Coméntanse libros chegados de Galicia, lense poesías e narracións e debátense problemas diversos relacionados co noso país.

Asistiu ás clases de lingua galega de Eduardo Blanco Amor, e tamén ás de Historia, Xeografía, Litaratura e Economía de Galicia que impartían, respectivamente, Alberto Vilanova, Ramón de Valenzuela, Rafael Dieste e Antonio Baltar. Anisia e Xosé Neira foron discípulos, compañeiros e amigos dos mencionados e tamén de Laxeiro, Emilio Pita, Suárez Picallo, Antón Alonso Ríos, Lorenzo Varela e outros.

Co selo editorial de "Follas Novas" publica, en 1960, o seu primeiro libro, un poemario titulado Esta es Cuba, hermano.

En 1961 Anisia e Neira trasládanse a Cuba, onde triunfara unha revolución popular. Traballou no Consello Nacional de Cultura como redactora da revista Pueblo y cultura, ó tempo que colaboraba noutras publicacións periódicas. Escribiu programas de radio. Foi coordinadora nacional de edicións de libros para nenos e adolescentes. Máis tarde sería nomeada a xefa de redacción do semanario infantil Pionero. Co-fundadora e xefa de redacción da revista para nenos Zunzún, dende 1980, e Bijirita, dende 1986. A primeira cunha tirada mensual de 25.000 exemplares e a segunda (para nenos que aínda non len ou comezan a ler) de 300.000. creou un estilo moi persoal de xornalismo para nenos e nenas.

Tras xubilarse en 1991, ela e o seu marido radicáronse en Galicia. En Gres (Vila de Cruces), aldea natal de Neira, creouse a Fundación Xosé Neira Vilas, e Anisia vén participando arreo nas actividades do Centro Cultural que alí se estableceu: catalogou os libros infantís, puxo en marcha un sistema deselección por parte dos lectores e de rexistro de préstamos a domicilio, atendeu persoalmente a biblioteca nos primeiros tempos, organizou o museo etnográfico e toma parte activa nos programas culturais que se levan a cabo: exposicións, concertos, charlas, encontros, funcións de teatro, etc. Ademáis vense desempeñando como xurado nos premios "Arume" e "Estornela" de poesía e teatro respectivamente. É vicepresidenta da Fundación.

De algúns dos seus libros lévanse publicado milleiros de exemplares. Parte da súa obra está traducida a outras linguas. Narracións súas foron incluídas nunha selección de literatura universal para nenos publicada en Bratislava pola editorial Wlade Letá, en 1985.

Anisia Miranda recibiu, entre outras, as seguintes distincións: Medalla Ho Chi Minh; Orde da Amizade, outorgada polo Consello de Ministros da República Socialista de Vietnam; En tres ocasións, o Premio Nacional de Teatro Infantil e Xuvenil, en Cuba, por outras tantes pezas teatrais; Premio de Narrativa (Cuba) polo seu libro Becados; Premio Nacional de Literatura para nenos polo libro Los cuentos del Compay Grillo (Unión Nacional de Escritores, Cuba); Medalla "Raúl Gómez García" (Sindicato de Traballadores da Cultura, Cuba); Medalla Por la Cultura Nacional (Ministerio de Cultura, Cuba); Membro de Honra de Asociacións de emigrantes da Arxentina e de Suiza; ou é recoñecida como filla adoptiva do Concello de Vila de Cruces.

[Biografía de Anisia Miranda tomada da web da Fundación Xosé Neira Vilas]

Organizada polas asociacións Monte Branco e Monte d'Arxa, terá lugar o 25 de outubro

Outono da lingua en Cerqueda

(22-Outubro-2009)

As asociacións malpicás Monte Branco e Monte d'Arxa organizan, para o vindeiro domingo 25 de outubro, o "Outono da Lingua en Cerqueda" no local sociocultural das Pozacas (Cerqueda-Malpica), onde se poñerá fin ao proxecto "A regueifa en Cerqueda. Lembrando a Celestino Álvarez".

Nun evento na que a lingua será a gran protagonista, os actos comezarán ás 16.00 h. no salón de actos, onde está prevista a presentación do xogo interactivo e do libro O regueifeiro Celestino Álvarez Castro, "Celestrino". O lado máis festivo terá lugar ás 18.00 h. baixo as tres carpas instaladas na polideportiva das Pozacas onde se combinará un magosto coa regueifa e o baile. O grupo Trastes de Cances pechará a xornada.

Os asistentes poderán visitar, no centro das Pozacas, unha mostra bibliográfica con publicacións nacidas na parroquia de Cerqueda, que temén estarán á venda.

Aínda sen nome fixado, terá lugar os días 28 e 29 de novembro

Sen Cultur.gal, a Concellería de Cultura da Coruña propón a súa propia Feira de creación cultural para toda Galicia

(20-Outubro-2009)

Tras rexeitar a nova Consellería de Cultura a organización dunha nova edición do Cultur.gal, onde pasaron o pasado ano 40.000 persoas nos catro días que durou a Feira, a Concellería de Cultura da Coruña propón a creación dunha Festa ou Feira de creación cultural.

Aínda sen nome definido, esta Feira terá lugar na última fin de semana de novembro (os días 28 e 29). Dende a propia Concellería de Cultura da Coruña pretenden que sexa unha Festa onde a cidadanía se sinta parte da mesma.

Un dos obxectivos que se promoven dende a Concellería é que a mesma abarque produtos e traballos de todo o sector cultural: editorial, audiovisual, produtoras musicais, artes escénicas... Así como actuacións musicais, teatro, monólogos, obradoiros para nenos ou para adultos, etc

A Concellería de Cultura da Coruña abre á cidadanía a posibilidade de participar na mesma recollendo suxestións para o nome desta Feira de creación cultural. Pódense enviar as suxestións ao correo electrónico cultura@coruna.es

Desempeñaba as funcións de arquiveiro-bibliotecario dende o ano 1993

Finou o académico da Real Academia Galega Antonio Gil Merino

(20-Outubro-2009)

O pasado domingo, día 18 de outubro, produciuse na Coruña o falecemento de Antonio Gil Merino, académico de número da Real Academia Galega, da que formaba parte desde 1975 e da que foi arquiveiro-bibliotecario durante doce anos. Os seus restos foron trasladados onte ao Cemiterio Municipal de San Amaro da Coruña.

Gil Merino naceu en Castrillo de Villavega (Palencia) no ano 1916. En 1944 foi destinado á Biblioteca Pública de Lugo e no ano 48 ocupou o cargo de Xefe do Arquivo da Delegación de Facenda de Lugo. Gil Merino estableceu en Lugo a Biblioteca Pública Provincial Unificada, resultado da unión nunha soa entidade da antiga biblioteca da Deputación e a creada polo Estado, co que conseguiu crear unha das mellores bibliotecas de Galicia. Case un ano despois foi nomeado Director do Centro Coordinador de Bibliotecas de Lugo co fin de fomentar a cultura a través do libro. Grazas a este organismo creáronse bibliotecas municipais nas vilas e localidades máis importantes da provincia, sempre coordenadas polo mencionado Centro que se encargou da ordenación, catalogación e formación do persoal. En 1951 foi nomeado Director do Arquivo Histórico Provincial creado grazas á súa iniciativa. Foi tamén Director do Arquivo Histórico do Reino de  Galicia, por concurso de méritos e da Casa de Cultura.

En 1954 ingresou na Real Academia Galega como académico correspondente e o 13 de decembro de 1975 leu o discurso de ingreso como membro numerario: La obra del Dr. D. Juan Francisco de Castro en la cultura gallega del siglo XVIII, que foi contestado en nome da institución por Enrique Chao Espina. Desde o ano 1977 desempeña o cargo Arquiveiro-Bibliotecario da institución, labor que xa viña exercendo desde o falecemento de Juan Naya en 1993.

Presentáronse un total de 41 orixinais

Manuel Lourenzo, Xosé A. Neira Cruz, Ignacio Vilariño e Begoña García, gañadores dos premios para textos teatrais da AGADIC

(19-Outubro-2009)

Esta mañá deuse coñecer, no transcurso do acto de apertura da XVII Feira Galega das Artes Escénicas, os nomes dos autores recoñecidos este ano cos premios literarios que convoca a AGADIC para textos teatrais.

As catro obras gañadoras foron elixidas de entre o total de 41 orixinais que optaban este ano aos premios literarios. Ademais de por Blanca Ana Roig como presidenta, o xurado da edición 2009 estivo integrado por Xosé Ramón Fandiño, Eduardo Alonso, Teresa González Costa, Jorge Rey e Gustavo Pernas Cora como vogais.

Coa concesión do XVIII Premio Álvaro Cunqueiro para Textos Teatrais á obra Flores de Dunsinane, distínguese a un dos grandes nomes da nosa escena, Manuel Lourenzo. O xurado destacou do texto gañador o seu ritmo, así como "o emprego dunha linguaxe rica, poética e expresiva dramaticamente". En Flores de Dunsinane, Lourenzo reinterpreta o Macbeth de Shakespeare, centrando o argumento en Fleance, fillo de Banquo. O compañeiro de armas de Macbeth, a quen este mandara asasinar, emprega a súa astucia para chegar a rei de Escocia e agora, vello e moribundo, recibe a visita dos seus antecesores, os Macbeth, cos que revive o reinado sanguento destes.

O IV Manuel María de Literatura Dramática Infantil foi para Sopa de xarope de amora, de Xosé A. Neira Cruz, quen obtén por segundo ano consecutivo un dos premios literarios convocados pola AGADIC, despois de que a súa obra O punto da escarola fora recoñecida en 2008 co Barriga Verde de Textos para Teatro de Monicreques na modalidade de teatro para rapaces. Sopa de xarope de amora é, segundo o ditame do xurado, "unha comedia áxil e divertida, protagonizada por personaxes estrambóticos que actualizan algúns dos tradicionais contos de fadas creando unha atmosfera que estimula a imaxinación". No fallo destácase, así mesmo, a boa resolución dramática tanto dos personaxes coma dos escenarios onde se desenvolve a acción.

Canto ao VII Premio Barriga Verde de Textos para Teatro de Monicreques, Auga que non vas beber..., de Igancio Vilariño Sanmartín, foi a obra galardoada na categoría de teatro para adultos. Neste caso, o xurado valorou a axilidade e a ironía dun texto que "entronca co teatro de Cachiporra na tradición de Barriga Verde, Blanco Amor e Dieste".

Na modalidade de teatro para rapaces, o Barriga Verde recaeu en Begoña García con Bon appétit, que o xurado define como "unha peza de estrutura clásica que ofrece un canto á gastronomía", na que están "moi ben aderezados" os ingredientes dramáticos e culinarios, ademais de adaptarse perfectamente ao teatro de monicreques.

Segundo establecen as bases, os textos poderán ser publicados pola AGADIC nalgunha das coleccións dramáticas que mantén abertas en colaboración con diferentes editoriais galegas.

O xurado destacou a obra como "un conto informático no mundo das letras"

Xoán Babarro gaña o 'Pura e Dora Vázquez' de Ilustración

(17-Outubro-2009)

O escritor macedán e residente na Coruña Xoán Babarro resultou gañador da VII edición do premio “Pura e Dora Vázquez” de narración, por acordo unánime do xurado, reunido onte no Centro Cultural da Deputación de Ourense, co seu traballo titulado Palabra era un universo paralelo. Este premio é convocado anualmente pola Deputación de Ourense nas modalidades de narración e ilustración e chega neste ano á súa sétima edición.

O xurado avaliou de maneira especial a calidade léxica do texto e a relación coas novas tecnoloxías, chegando a definilo como “un conto informático no mundo das letras” e que vai gañando en intensidade segundo avanza a historia. Trátase dun traballo altamente elaborado, cunha liña argumental claramente definida. O xurado desta edición estivo integrado por Concha Blanco (gañadora da pasada edición), José Manuel Fernández López (educador), Xosé Paz (pedagogo) e Antonio Piñeiro (xornalista). Como secretario oficióu o director do Centro Cultural, Francisco González, e presidíu o xurado o deputado de cultura, José Luis Valladares. 

O 24 de outubro en no Muíño do Rañego de Vilalba

A Fundación Manuel María e a Asociación Xermolos homenaxean a Xabier P. Docampo

(17-Outubro-2009)

A Fundación Manuel María e a Asociación Cultural Xermolos homenaxearán o vindeiro 24 de outubro ao escritor Xabier P. Docampo no Muíño do Rañego de Vilalba.

Xabier P. Docampo recibirirá esta homenaxe tras serlle concedida en edicións anteriores a Paco Martín, Manuel María e o pasado ano en Agustín Fernández Paz. Os actos comezarán ás 12.00 h. e contarase coa presenza de Fina Casalderrey, Xosé Cobas, María Xesús Fernández, Agustín Fernández Paz, Antía Otero, Mercedes Queixas e David Otero que falarán sobre a obra e traxectoria do escritor de Rábade. A continuación colocarase o cuarto hectómetro literario no Paseo dos Soños que dará paso a un xantar de irmandade no restaurante Nova Ruta de Vilalba.

Para poder acudir ao xantar débese confirmar a presenza no teléfono 646413890. O prezo do mesmo é de 15 euros.

O 6 de novembro a partir das 18.00 h.

A Estrada celebra a súa IV Festa da poesía, organizada pola editorial Fervenza

(17-Outubro-2009)

O vindeiro 6 de novembro A Estrada celebrará a IV Festa da Poesía, que nesta edición incorpora por vez primeira á celebración o título de Memorial Xosé Couceiro Bugallo, en lembranza ao poeta e músico que finou o pasado 26 de maio.

O acto, organizado pola editorial Fervenza en colaboración co concello da Estrada, dará comezo ás 18.00 h. na Praza do Mercado. O pregón correrá a cargo da poeta ourensá Celia Parra Díaz e a Festa está aberta a todos aqueles que desexen recitar algún poema.

Os interesados en participar deben chamar ao teléfono 616201862. 

O gañador baseou o seu traballo na obra Doentes de Roberto Vidal Bolaño

O brionés Brais Rodríguez gaña o I Certame Galego de Cómic sobre Teatro

(17-Outubro-2009)

O ilustrador Brais Rodríguez é o gañador do I Certame Galego de Cómic sobre Teatro, organizado pola Asociación Cultural Entre Bambalinas, editora da Revista Galega de Teatro.

Seguindo as bases do certame, o gañador baseou o seu traballo na obra Doentes de Roberto Vidal Bolaño e presentou un traballo de 32 páxinas en branco e negro. A Asociación Cultural Entre Bambalinas comprometeuse a publicar nun volume a través da Revista Galega de Teatro a obra gañadora nos próximos meses.

Brais Rodríguez (Brión, 1980) é licenciado en Belas Artes pola Universidade de Vigo e é colaborador  habitual de diferentes publicacións e fanzines como Barsowia, Carne Líquida ou Fanzine Enfermo entre outros. A comezos deste mes recibiu o premio Gzcrea de banda deseñada coa obra Os mortos.

O 45 % das empresas do sector víronse obrigadas a reducir persoal

O crise económica provoca unha seria preocupación no sector gráfico galego

(14-Outubro-2009)

A Asociación de Empresarios de Artes Gráficas de Galicia (AEAGG), reuníronse en Asemblea Xeral Extraordinaria para axudar aos empresarios a reflexionar para saír da actual crise que vive o sector.

Segundo datos do Estudio do Sector do 2008, elaborado pola Federación Empresarial de Industrias Gráficas de España (FEIGRAF), en Galicia, hai actualmente 534 empresas que dan emprego a 4673 traballadores. Tras unha enquisa realizada pola AEAGG aos seus asociados sobre o seu actual nivel de produción e cifras de emprego os resultados demostraron que a primeira se viu diminuída nun 30% e que un 45% das empresas reduciron persoal no que vai de ano. A esta situación chegouse pola crise económica e financeira mundial e polas particularidades dun sector que vai da man da última tecnoloxía, esixe unha elevada inversión e está altamente atomizado. Ademais, o imparable avance da era dixital, o descenso da demanda e as restricións de crédito contribuíron a agravar o seu estado.

Na Asemblea organizada pola AEAGG, o presidente desta entidade, Jacobo Bermejo, comentou: "non temos receitas para evitar as políticas de prezos de derrubamento, que o único que fan é empeorar a situación das empresas, nin para sacar traballo de onde non o hai, pero como colectivo podemos buscar solucións que axuden a buscar novos negocios e trasladar á Administración a nosa preocupación pola falta de financiamento que estamos a sufrir e por unha política que vai poñer en perigo centos de postos de traballo". Bermejo animou aos empresarios a levar a cabo un cambio no modelo de negocio e a constituír un lobby forte e unificado para reivindicar á Administración unhas medidas que contribuirán a mellorar a situación do sector.

A AEAGG trasladará as conclusións deste encontro ao presidente da Xunta de Galicia e ao Conselleiro de Economía e Industria, así como a creación de liñas de axuda para proxectos de concentración empresarial e para potenciar a saída ao exterior das empresas do país. Así mesmo, os empresarios desexan que o sector gráfico sexa declarado estratéxico e un plan para que este colectivo poida afrontar con optimismo o futuro da industria gráfica, así como os retos que se lle formulen.

O 17 de outubro no Museo do Mar de Galicia

Homenaxe a Ramiro Fonte no cabodano do seu pasamento

(14-Outubro-2009)

O Auditorio do Museo do Mar de Galicia, en Vigo, acollerá o vindeiro sábado 17 de outubro, ás 12.00 h. unha homenaxe ao poeta Ramiro Fonte con motivo do primeiro ano do seu pasamento. No acto presentaranse tres libros: as edicións dos seus poemarios derradeiros: Reversos (Xerais), Xardín do pasatempo (Tambre) e a edición especial Ramiro Fonte, o libro dos amigos, unha obra colectiva na que os seus achegados lle renden tributo á súa memoria humana e literaria.

Ramiro Fonte, unha das voces poéticas máis importantes dos últimos trinta anos, faleceu o 11 de outubro do ano pasado en Barcelona tras unha grave doenza.

O presidente da Asociación de Escritores en Lingua Galega Cesáreo Sánchez, novo presidente de Galeusca

Peche e conclusións da XXVI edición do Galeusca

(14-Outubro-2009)

O pasado luns rematou na localidade de Arantzazu (Gipuzcoa) a XXVI edición do Galeusca que reuniu entre os días 9 e 12 a escritores e escritoras galegos, cataláns e vascos baixo o lema Hizkuntza txikiak, erronka handiak, Petites literatures, grans desafiaments, Literaturas minorizadas, grandes desafíos.

Tras o peche das xornadas os colectivos participantes adoptaron as conclusións de avanzar nos temas de propiedade intelectual e dereitos profesionais dos escritores así como realizar as adecuacións necesarias ao desenvolvemento da Federación Galeusca, reforzando a estrutura organizativa necesaria mediante o apoio ás presidencias coa creación de tres vogalías, unha en cada asociación.

Así mesmo, a Federación Galeusca, na súa defensa da liberdade de expresión, ante a próxima celebración do xuízo oral contra a dirección de Euskaldunon Egunkaria,  quere facer chegar a súa solidariedade aos imputados e facer pública a súa esixencia de arquivo da causa.

Dende Galeusca apoian as mobilizacións que se van celebrar en Galicia, Euskadi e Países Cataláns na defensa dos dereitos lingüísticos e postúlanse en total desacordo coas accións regresivas respecto á normalización lingüística adoptadas polo actual goberno galego.

Finalmente, a Federación Galeusca, no exercicio rotatorio da presidencia, comunica que Guillem Jordi Graells (Presidente de AELC) é relevado por Cesáreo Sánchez Iglesias (Presidente de AELG), quen organizará o próximo encontro anual desta Federación.

En galego só contamos co título O home é un grande faisán no mundo, publicado por Xerais e traducido por Franck Meyer

Herta Müller, Premio Nobel de Literatura 2009

(11-Outubro-2009)

A Academia Sueca ven de anunciar o pasado xoves que a escritora de orixe romanesa Herta Müller é a nova Premio Nobel de Literatura 2009. A Academia recoñece a capacidade da escritora de describir "coa concentración da poesía e a franqueza da prosa, a paisaxe dos desposuídos".

Herta Müller naceu en 1953 en Bánát, un lugar xermanofalante da rexión de Timisoara, en Romanía. Estudou lingua e literatura alemana e romanesa en Temesvar. En 1987 trasladouse ao sector occidental de Berlín co seu marido, o novelista Richard Wagner. Herta Müller destaca polos seus relatos sobre as duras condicións de vida en Romanía baixo o réxime comunista de Nicolae Ceausescu, pero o seu tema principal é como unha ditadura deteriora e racha toda forma de relación humana. Entre os seus libros máis coñecidos destacan as novelas Niederungen (Terras baixas), 1982; Herztier, 1994; Der Fuchs war damals schon der Jäger 1992,  Heute wär ich mir lieber nicht begegnet, 1997; ou a recentísima, Atemschaukel (Todo o que posúo lévoo comigo), 2009, e os ensaios recollidos en Hunger und Seide. Entre outros recoñecementos recibiu o Premio de Literatura de Berlín 2005, o Franz Kafka de 1999 e, neste mesmo ano, o premio da Sociedade Heinrich Heine de Düsseldorf de 2009.

En galego Herta Müller ten publicado O home é un grande faisán no mundo, publicado pola editorial Xerais dentro da colección 'As literatas' e traducida por Franck Meyer.

Celebraranse catro xornadas entre o 8 de outubro e o 3 de decembro onde a comunidade universitaria coñecerá a situación literaria dos diferentes xéneros literarios

Comeza mañá o IV Ciclo Escritores/as na Universidade

(07-Outubro-2009)

A Asociación de Escritores en Lingua Galega (AELG) e a Secretaría Xeral de Política Lingüística, coa colaboración da Facultade de Filoloxía e Tradución da Universidade de Vigo, organizan o IV Ciclo Escritores/as na Universidade, consistente nunha serie de mesas redondas nas que se achegarán á comunidade universitaria e á sociedade en xeral a posibilidade de saber como ven os autores/as a situación actual dos seus respectivos xéneros literarios.

En concreto, as mesas redondas tratarán de ofrecer panorámicas dos xéneros narrativo, poético, teatral e ensaístico desde o punto de vista dos escritores/as, que faran unha análise subxectiva, para despois participaren nun coloquio aberto ao estudantado.

O ciclo celebrarase no salón de actos da Facultade de Filoloxía e Tradución da Universidade de Vigo.

Programa

8 de outubro ás 12.00 h. O poeta en tempos de penuria. Interveñen Antonio García Teijeiro, Elvira Riveiro Tobío e Luis González Tosar

5 de novembro ás 12.00 h. Narrar e contar dos tempos que corren. Interveñen Marcos S. Calveiro, Luis Rei Núñez e Inma López Silva.

19 novembro ás 12.00 h. Ensaiar e pensar desde (e para) o país escuro. Interveñen María López Sánchez, Dolores Vilavedra e Xosé Manuel Beiras Torrado.

3 de decembro ás 12.00 h. Máscaras e rostros, teatro e realidade. Interveñen Quico Cadaval, Afonso Becerra e Gustavo Pernas.

Con A vila sulagada obtivo o premio da primeira edición do Blanco Amor de novela

Morreu en Lugo o escritor e dramaturgo ribadense Daniel Cortezón

(06-Outubro-2009)

O escritor e dramaturgo Daniel Cortezón finou o pasado domingo no Hospital Xeral de Lugo onde estaba ingresado.

Daniel Cortezón naceu en Ribadeo en 1927. A súa foi unha infancia marcada polos sucesivos traslados de seu pai, que pertencía ao corpo de carabineiros, e tamén, coma tantos coetáneos, pola Guerra Civil que obrigou a  familia a fuxir a Francia. Á volta, con 12 anos, comeza de aprendiz nunha botica. Este é un traballo que desenvolve até 1963, un tempo de estancia continuada en Ribadeo. Foi traballar logo a León e Madrid, chegando a ser redactor xefe da revista Auxiliares de Farmacia. Na capital española estivo en contacto coa maior parte dos intelectuais galegos que entón residían alí e participou nas célebres xuntanzas do Café Gijón. Volveu a Galicia, residiu en Vigo con longas estancias na súa localidade natal.

Autor tanto en galego como en castelán, e a pesar de ser considerado pola crítica como un dos grandes dramaturgos, el considerábase sobre todo novelista aínda que só se publicaran dúas das catro novelas escritas por Daniel Cortezón: As covas do rei Cintolo (Galaxia, 1956) e A vila sulagada (Ediciós do Castro), primeiro premio Blanco Amor no ano 1981. Aínda inéditas fican Ribanzo, premio “Manuel Cao Turnes” do Centro Gallego de Buenos Aires e O cabaleiro da lus, Premio “Castelao” del Centro Gallego de Buenos Aires.

A súa obra máis prolífica atopámola na súa inmensa obra teatral, deténdose principalmente no teatro histórico en galego: Prisciliano (Galaxia), Pedro Madruga (Ediciós do Castro), Os Irmandiños (Ediciós do Castro) ou Xelmírez ou a gloria de Compostela (IGAEM); e no galeguismo: Castelao ou A paixón de Galiza (Ediciós do Castro) sen esquecer as traducións feitas por Daniel Cortezón cara o galego: Xeneraliño (Máscara), Os anxos cómense crús (Galaxia), Asamblea Xeral (Universidad Internacional Menéndez y Pelayo), Paulo Iglesias (Ediciós do Castro) ou Guernica (Revista Galega de Teatro).

Outro dos xéneros máis abordados por Daniel Cortezón é o ensaío, no que abordou ás figuras literarias do pasado século e estudou a súa obra: Da mística e mítica caballeresca en Don Ramón Cabanillas ou Eduardo Amor e a súa obra teatral; así como o seu compromiso coa terra e a lingua: A oferta cultural das linguas minoritarias, Teatro e nacionalismo (Cuadernos da Escola Dramática Galega) ou Castelao y la condición gallega de Valle-Inclan.

De Daniel Cortezón queda moita obra inédita por publicar, como por exemplo a prohibida pola censura de 1973 Compañero presidente, compañero (La muerte de Allende), premiada co “Ciudad de Alcoy” de Teatro e a súa figura e obra aínda está insuficientemente estudada e recoñecida.

Na actualidade conta cun catálogo vivo de 1600 títulos

Xerais celebra o seu 30 aniversario

(06-Outubro-2009)

Edicións Xerais de Galicia cumpriu onte o seu 30 aniversario. Un 5 de outubro de 1979 Xulián Maure, co apoio financeiro de Germán Sánchez Ruipérez, funda en Vigo e editorial Xerais, co obxectivo de non deixar baleiro campo ningún da comunicación impresa necesaria para Galicia.

Nestes 30 anos o catálogo de Xerais acadou os tres mil douscentos títulos, dos que 1.600 forman parte do seu catálogo vivo, e vendeu máis de dez millóns de exemplares. A pesar de nacer cunha vontade educativa, na actualidade o catálogo de Xerais aborda todos os xéneros, converténdose nunha das editoriais de referencia no ámbito literario galego.

Vindeiras paradas: Liber e Frankfurt

O libro galego nas feiras do libro máis importantes

(06-Outubro-2009)

O libro galego estará presente en dúas das feiras máis importantes dentro do calendario editorial: o LIBER, Feira Internacional do Libro en Madrid e a Feira do Libro de Frankfurt.

A XXVII Feira Internacional do Libro de Madrid – Liber 2009 terá lugar do 7 ao 9 de outubro, no recinto feiral IFEMA e terá como país convidado a Rusia. Asistirán con stand propio as editoriais galegas Nova Galicia, OQO editora, Primerapersona, Ideaspropias Editorial e Ediciones del Viento. Pola súa parte, a Consellería de Cultura e Turismo compartirá stand coa Asociación Galega de Editores, no cal estarán presentes un total de 24 editoriais galegas, mentres que os servizos de publicacións das Universidades da Coruña e de Santiago de Compostela compartirán espazo coa Asociación de Editoriais de Universidades Españolas. Por último, o selo de literatura infantil e xuvenil Tambre estará presente dentro do grupo editorial Luís Vives.

Amais dos libros galegos, a Consellería de Cultura e Turismo convidou como relatores a Luisa Castro, Carlos G. Reigosa, María Canosa e Xosé Carlos Caneiro, que participarán nunha mesa redonda o xoves 8 de outubro sobre Periodismo e literatura, na Sala 21 do recinto feiral de Ifema.

A Feira Internacional do Libro de Frankfurt terá lugar do 14 ao 18 de outubro nesta cidade alemá e terá como país invitado de honor na edición deste ano a China e é o evento internacional máis importante no mundo do libro. Ao igual que no LIBER, a Consellería de Cultura e Turismo estará presente cun stand propio de máis de 70 metros compartido coa Asociación Galega de Editores. A editorial pontevedresa Kalandraka será a única editorial galega que contará cun stand propio. Pola súa banda, os libros da editorial Xerais estarán presentes dentro do stand de Anaya.

A Frankfurt asistirán como relatores invitados os escritores Marina Mayoral, Vicente Araguas e Alfredo Conde, que participarán o día 16 de outubro nunha mesa redonda sobre Proxección da literatura galega no exterior.

Mary Prince, unha escrava das indias occidentais é un libro fundamental na loita pola abolición da escravitude no mundo, segundo o xurado

María Reimóndez gaña o Plácido Castro de tradución 2008

(04-Outubro-2009)

A lucense María Reimóndez obtivo por unanimidade do xurado o VIII Premio de Tradución Plácido Castro pola súa tradución do inglés da novela Mary Prince, unha escrava das indias occidentais, escrita pola propia Mary Prince a comezos do século XIX.

Do 9 ao 12 de outubro

A localidade guipuscoana de Arantzazu acollerá a XXVI edición do Galeusca

(04-Outubro-2009)

A Asociación de Escritores en Lingua Galega (AELG), Euskal Idazleen Elkartea (EIE) e a Associació d´Escriptors en Llengua Catalana (AELC) celebran un novo encontro de Galeusca, unha xuntanza das tres asociacións para pór en común información sobre temas puntuais e para profundizar en cuestións que teñen que ver coa literatura, no máis amplo sentido do termo. A organización de cada edición corre a cargo de unha das asociacións, que asumen esa responsabilidade por quendas, tocándolle este ano á Euskal Idazleen Elkartea que celebrará a XXVI edición na localidade de Arantzazu (Gipuzcoa) entre o 9 e o 12 deste mes de outubro.

Por parte da Asociación de Escritores en Lingua Galega estarán representando á Asociación os seguintes membros: Alfredo Ferreiro, Antía Otero, Antón Riveiro Coello, Armando Requeixo, Cesáreo Sánchez, Dores Tembrás, Eva Moreda, Fran Alonso, Francisco Castro, Laura Caveiro, Marcos Calveiro, Mercedes Queixas, Paco Souto e Rexina Vega.

Este acordo enmárcase no proxecto de recuperación do esplendor cultural, económico e social que o concello de Mondariz Balneario tivo nos dous últimos séculos

Convenio de colaboración entre a Fundación Mondariz Balneario e a Real Academia Galega para a recuperación da obra de Emilia Pardo Bazán

(02-Outubro-2009)

A Fundación Mondariz Balneario e a Real Academia Galega asinaron un convenio de colaboración para a recuperación da memoria histórica de Mondariz Balneario. O obxectivo da Fundación Mondariz Balneario é poder contar coa colaboración da Real Academia Galega nos traballos de recuperación e recopilación do material histórico de Mondariz. En concreto, a través deste acordo, a Fundación e a Real Academia Galega traballarán en prol da recuperación e publicación de todo o material literario relacionado con Emilia Pardo Bazán e Mondariz.

Como mostra de agradecemento, a Fundación Mondariz Balneario entregou á Real Academia Galega, en concepto de doazón, unha reprodución do busto de Dona Emilia Pardo Bazán realizado a finais do século XIX polo escultor Lorenzo Coullaut Valera, por encargo de Enrique Peinador Vela.

A famosa escritora, xunto con outros persoeiros da ciencia, a sociedade e a política, como Echegaray, o Rei Alfonso XIII, a Infanta Isabel ou galeguistas como Castelao ou Vicente Risco, foron asiduos e nobres visitantes do balneario e Gran Hotel que contribuíron decisivamente a transformar Mondariz-Balneario nun reputado centro social, intelectual e cultural en toda Europa. En numerosas ocasións a propia condesa de Pardo Bazán recoñeceu ir a Mondariz a “curarse dos estragos do pensamento e dos males da civilización”.

A sinatura deste convenio enmárcase dentro das actividades do proxecto posto en marcha a nivel internacional pola Fundación Mondariz Balneario para a recuperación do esplendor cultural, económico e social que o concello de Mondariz Balneario tivo nos séculos XIX y XX. Dentro de este ambicioso plan de actuación, a Fundación Mondariz Balneario está desenvolvendo un programa de recuperación da Memoria Histórica de Mondariz Balneario coa finalidade de investigar, recopilar e clasificar todo o material histórico orixinal de Mondariz Balneario.

O director xeral de Promoción e Difusión da Cultura Francisco López cualificou este centro como "unha catedral rural das nosas letras"

A Fundación Neira Vilas e a Consellería de Cultura e Turismo asinan un convenio para a ampliación das instalacións da Fundación cruceña

(02-Outubro-2009)

O escritor Xosé Neira Vilas, como presidente da Fundación que leva o seu nome en Vila de Cruces e o director xeral de Promoción e Difusión da Cultura, Francisco López asinaron un convenio para a realización da primeira fase das obras de ampliación da Fundación e Casa da Cultura. No acto hoxe á mañá estiveron presentes asemade o alcalde de Vila de Cruces, Jesús Otero Varela, e a muller do autor, Anisia Miranda.

Mediante a firma deste acordo a Consellería de Cultura e Turismo aportará 60.000 euros á Fundación en materia de realización de equipamentos e obras destinadas a obter os espazos necesarios para que poidan representarse as diversas manifestacións da cultura galega nun marco digno e adecuado.

A Fundación Neira Vilas tense caracterizado polo desenvolvemento dun labor de continuidade no campo da promoción e difusión da cultura. Francisco López cualificou este centro cultural como "unha catedral rural das nosas letras", pois a Fundación e Casa da Cultura "Neira Vilas" conta cun fondo de mais 8.500 volumes, unha biblioteca para nenos, importantes documentos da literatura galega e organiza o Premio Estornela de Teatro e o Premio Arume de poesía para nenos. As dúas entidades vinculadas a este convenio son conscientes da necesidade de instalacións de caracter sociocultural que permitan unha oferta satisfactoria, co obxecto de satisfacer as necesidades que en materia cultural teñen os habitantes desa zona, así como o incidir no hábito a lectura en galego.

O anuncio o realizou o director xeral Francisco López no transcurso da homenaxe que os tradutores rinderon a Marilar Aleixandre

Cultura e Turismo apoiará con 300.000 euros á tradución nos vindeiros dous anos

(02-Outubro-2009)

A Consellería de Cultura e Turismo anunciou no transcurso da homenaxe que se lle tributou a Marilar Aleixandre o pasado 30 de setembro, coincidindo co Día da Tradución, o seu compromiso de continuar coas axudas á tradución que se viña mantendo nos últimos anos. segundo o director xeral de Promoción e Difusión da Cultura, Francisco López "non só se vai continuar apoiando as axudas á tradución, senón que se van incrementar, pasando a un total de 300.000 euros no conxunto dos próximos dous anos". O director xeral tamén subliñou durante o acto de homenaxe que o compromiso da Consellería de Cultura e Turismo é "traballar en común, apoiando conmemoracións como ésta, colaborando coas asociacións de tradutores e editores co obxectivo de promover novos proxectos e liñas de apoio".