Xabier P. Docampo, libraría Andel, Festina lente, colección Rescate, as Bibliotecas Públicas de Oleiros, Asociación Cultural IES Rosalía de Castro e o IES Blanco Amor de Ourense

Gañadores dos XVIII Premios Irmandade do Libro

(29-Marzo-2009)

Os libreiros galegos celebraron a pasada madrugada os seus tradicionais premios Irmandade do Libro, desta volta no concello ourensán do Carballiño.

Coñecéndose de anteman o galardón a Xabier P. Docampo na categoría de mellor autor, faltaba por saber aos gañadores do resto de categorías: Librarías, Mellor libro do ano 2008, Obra editorial do ano 2008, Fomento da lectura, Institucións e Centros de ensino. Para a decisición, o xurado estivo composto por Xurxo Patiño, presidente da Federación de Libreiros; Benxamín Riobó, secretario; Xaime Corral, tesoreiro; Alfonso Vázquez-Monxardín, profesor de Lingua Galega; Xosé Carlos Caneiro, escritor; Belén Solleiro Díaz, bibliotecaria e Gregorio Ferreiro Fente, da Secretaría Xeral de Política Lingüística.

Os gañadores da XVIII edición dos premios Irmandade do Libro foron:

Mellor libraría: Andel do Libro Galego e Portugués (Vigo)

Mellor libro do 2008: Festina lente (Xerais) de Marcos S. Calveiro

Obra editorial do 2008: Colección rescate de Alvarellos Editora

Fomento da lectura: Bibliotecas Públicas de Oleiros.

Institucións: Asociación Cultural IES Rosalía de Castro

Centros de ensino: IES Blanco Amor (Ourense)

[Gañadores da pasada edición]

Será Académico Numerario da Sección de Artes da Imaxe

Miguelanxo Prado ingresa na Real Academia Galega de Belas Artes

(29-Marzo-2009)

A Real Academia Galega de Belas Artes 'Nosa Señora do Rosario' ven de nomear na súa última sesión ordinaria ao debuxante Miguelanxo Prado como membro da mesma.

Miguelanxo Prado resultou elixido Académico Numerario da Sección de Artes da Imaxe, recoñecéndose así a súa contribución no campo do deseño, o que lle converteu o máis destacado representante galego desta arte no ámbito internacional.

Tamén foi elixido membro Correspondente, don José Torres Casal, en recoñecemento ao meritorio labor desenvolvido na Institución ao longo de 47 anos, sendo neste momento a "memoria viva" da Academia.

A montaxe de Teatro do Atlántico está baseada na obra de título homónimo coa que Teresa Moure gañou a Rafael Dieste para textos teatrais

Unha primavera para Aldara, gran vencedora dos María Casares de Teatro

(26-Marzo-2009)

Unha primavera para Aldara, de Teatro do Atlántico, foi a gran vencedora na entrega de premios da décimo terceira edición dos Maria Casares de Teatro. A montaxe de Teatro do Atlántico logrou un total de sete premios: Mellor espectáculo, Mellor dirección, Mellor actriz protagonista, Mellor escenografía, Mellor texto orixinal, Mellor iluminación e Mellor vestiario.

O teatro Rosalía de Castro da Coruña sirviu de escenario aos premios anuais creados pola Asociación de Actores e Actrices de Galicia (AAAG) para serviren de estímulo e recoñecemento ao labor desenvolvido pola profesión teatral galega.

A obra de Teresa Moure, que xa fora galardoada co Premio Rafael Dieste de Teatro que convoca a Deputación da Coruña, sitúa a trama nun cenobio no ano 1465, na época das grandes loitas irmandiñas.

Mariví Villaverde representa desde o anonimato os exiliados e exiliadas represaliados cuxa memoria compre restaurar

A AELG homenaxeará o vindeiro sábado a Mariví Villaverde na sexta edición de "Os Bos e Xenerosos"

(25-Marzo-2009)

A Asociación de Escritores en Lingua Galega celebra a sexta edición de “Os Bos e Xenerosos”, recoñecemento anual da figura dun escritor ou colectivo que, pola súa dilatada actividade de intervención social, contribuíse á difusión pública da nosa cultura. Con esta homenaxe, dedicada este ano a Mariví Villaverde, destácase, sobre todo, un compromiso ético coa cultura de Galicia.

Con esta sexta edición, que se celebrará o vindeiro sábado 28 de marzo no Museo de Pobo Galego (R/ San Domingos de Bonaval) en Compostela, preténdese poñer de relevo a exemplar traxectoria de Mariví Villaverde, que representa desde o anonimato os exiliados/as represaliados/as cuxa memoria cómpre restaurar. Ao mesmo tempo é a xusta homenaxe aos colectivos que traballan na recuperación da Memoria Histórica.

Mariví Villaverde no ronsel das boas e xenerosas.

Escritora, tradutora dunha realidade que lle tocou vivir e que converte en maxia literaria. A maxia de legarnos o pasado que non vivimos, un presente no que segue firme e combativa á beira do pobo creativo e honrado e un futuro que se pousará en todo o que dela aprendemos. Mariví Villvarde, lectora adolescente que acompañou as horas no cárcere da súa tía Arxentia, mestra galeguista e republicana, con obras de teatro que foron menciña e alimento. Teatro que vai encher a súa vida no exilio co seu compañeiro Ramón de Valenzuela, con Roberto Villanueva ou Eduardo Blanco Amor. Escriben, adaptan, traducen, representan. Ela é actriz, colaboradora do xornal Galicia, nai e legadora da verdade lexítima republicana, a verdade que herdara do seu pai Elpidio Villaverde, alcalde de Vilagarcía e deputado a Cortes en 1936 e das súas tías rapadas.

Decide levar a súa memoria a un libro e escribe en 1962 Tres tiempos y la esperanza publicado na Editorial Alborada, reeditado por Ediciós do Castro (1987) e nunha versión en galego en A Nosa Terra (2002), ao que a autora lle engade un epílogo e lle devolve ás personaxes os seus verdadeiros nomes. Mariví ábrenos a cancela para entrar na historia das nosas maiores, nesa urdime dun vivir privado e silencioso e na alegría do progreso e da liberdade espallada na area da praia de Compostela. Fainos tremer co terror vivido atrás das portas onde petan tantas veces, coas fuxidas e coas mortes. Entendemos o amor, a lealdade á casa común e o desexo de construir un mundo mellor. Historias de cicatrices que atravesan todas as alfándegas. Hoxe Mariví Villaverde forma parte do Consello pola Memoria, participa en todos os actos políticos aos que é convidada, en congresos e homenaxes como nas dedicadas a Alexandre Bóveda ou a Lois Tobío. Hai tempo que Ramón faleceu mais ela segue comprometida cos tempos que lle tocou vivir, empeñada en sembrar a dignididade coa que Galiza loitou e defendeu a lexitimidade da República; le, escribe e vai ao teatro. O tempo na súa compaña non transcorre: amiga, boa e xenerosa, ofrécenos a memoria e o seu traballo diario.

Programa de actos

12.30 h.   Acto musical a cargo do Grupo Instrumental Século XX, que interpretará obras do compositor Paulino Pereiro.

12.45 h.   Intervención de Cesáreo Sánchez Iglesias, presidente da AELG. Lectura da acta de concesión do premio a cargo de Mercedes Queixas, secretaria xeral da AELG. Laudatio pronunciada por Marga do Val. Entrega dunha placa conmemorativa á homenaxeada. Resposta á laudatio de Mariví Villaverde.

Tanto a obra gañadora como as outras dúas finalistas serán publicadas nun libro-cd por Xerais o 15 de abril

Peter Buckley, de Rubén Ruibal e César Candelas, obra gañadora do III Premio "Diario Cultural" de Teatro Radiofónico

(25-Marzo-2009)

Peter Buckley, escrita por Rubén Ruibal e César Candelas Colodrón, foi a obra elixida polo xurado como gañadora do III Premio “Diario Cultural” de Teatro Radiofónico. O Premio da audiencia foi tamén para Peter Buckley, quedando como finalistas as obras Servizo de información de Paula Carballeira e O xou mas gou on de Eva Freixeira.

O xurado estivo composto por Cristina Domínguez, directora do Centro Dramático Galego; Ana Romaní, directora do "Diario Cultural" da Radio Galega; Flor Maceiras, actriz e profesora na Escola de Teatro de Narón; Cándido Pazó, actor e director e Camilo Franco, crítico teatral. O xurado destacou que a obra gañadora, Peter Buckley, é unha historia que emprega pautas do xénero negro, convertendo a estrutura do relato nunha translación radiofónica dun ambiente cinematográfico. Valora ademais a escrita áxil, contundente e madura, con personaxes ben perfilados.

Tanto Peter Buckley como as outras dúas finalistas publicaranse nun libro-cd editado por Xerais. A presentación deste libro e a entrega do premio terá lugar o vindeiro 15 de abril no transcurso dunha Gala no Teatro Rosalía de Castro da Coruña.

[Escoitar Peter Buckley, de Rubén Ruibal e César Candelas Colodrón]

[Escoitar Servizo de información, de Paula Carballeira]

[Escoitar O xou mas gou on, de Eva Freixeira]

Do 23 ao 26 de marzo en Lugo

A Fundación Casares organiza unhas xornadas sobre a figura Ramón Piñeiro

(23-Marzo-2009)

A Fundación Carlos Casares organiza desde hoxe ata o xoves 26 de marzo as Xornadas Ramón Piñeiro na Galicia so século XX. que se desenvolverán no Salón de Actos da Deputación Provincial de Lugo.

Importantes estudosos, escritores xornalistas e filósofos participan nestas importantes xornadas co fin de dar a coñecer a personalidade e a carreira política de Ramón Piñeiro. Entre outros estarán Darío Villanueva, Xesús Alonso Montero, Gerardo Fernández Albor, Justo Beramendi ou Ramón Máiz.

A entrada é libre e gratuíta para todos os asistentes, con certificación de asistencia para os interesados, que poden inscribirse no mesmo lugar de celebración das xornadas.

[Xornadas Ramón Piñeiro na Galicia do século XX]

Ata trece concellos acollerán unhas das feiras do libro que arrancarán no mes de abril en Ferrol

A Consellería de Cultura e Deporte e a Federación de Libreiros convocan as feiras do libro para o 2009

(23-Marzo-2009) 

Trece concellos galegos acollerán ao longo deste 2009 as diferentes Feiras do Libro que organiza a Consellería de Cultura e Deporte xunto á Federación de Libreiros de Galicia, dentro das actividades conxuntas de promoción do libro.

As datas e os concellos de celebración son os seguintes:

Ferrol: do 22 ao 26 de abril.

Santiago de Compostela: do 1 ao 10 de maio.

Lugo: do 16 ao 24 de maio.

Ourense: do 30 de maio ao 7 de xuño.

Lalín: do 11 ao 14 de xuño.

Vigo: do 3 ao 12 de xullo.

Noia: do 16 ao 19 de xullo.

A Coruña: do 1 ao 10 de agosto.

Viveiro: do 13 ao 16 de agosto.

Foz: do 20 ao 23 de agosto.

Monforte de Lemos: do 27 ao 30 de agosto.

Ribadeo: do 5 ao 8 de setembro.

Santa Comba: do 13 ao 16 de agosto.

Xabier P. Docampo recollerá o premio como mellor autor do 2008

Carballiño acollerá os premios da XVIII edición dos Irmandade do Libro

(23-Marzo-2009)

O concello ourensán de Carballiño é o escenario escollido polos libreiros galegos para entregar o vindeiro 28 de marzo os galardóns correspondentes á XVIII edición dos premios Irmandade do Libro.

O único gañador coñecido antes da gala do vindeiro venres é o premio a Xabier P. Docampo na categoría de autor. O resto dos finalistas son:

Andel do Libro Galego e Portugués (Vigo)

Libraría Porta da Vila (Viveiro)

Libraría Paz (Pontevedra)

Mellor libro do ano 2008

Fin de século en Palestina (Galaxia) de Miguel Anxo Murado

Festina lente (Xerais) de Marcos S. Calveiro

O xardín das pedras flotantes (Xerais) de Manuel Lourenzo

Obra editorial do ano 2008

As flores do mal (Galaxia) de Charles Baudelaire

Guía das plantas de Galicia (Xerais) de Xosé Ramón García

Colección rescate de Alvarellos Editora

Fomento da lectura

Biblioteca Pública de O Porriño

Bibliotecas Públicas da Coruña

Asociación Cultural Lonxa Literaria (Moaña)

Institucións

Casino de Santiago

Asociación Cultural IES Rosalía de Castro

Liceo Recreo Ourensán

Centros de ensino

CEIP de Quintela (Moaña)

CEIP San Martiño, de Igrexa-Salcedo (Pontevedra)

IES Blanco Amor (Ourense)

Os resultados definitivos coñeceránse no transcurso da Cea das Letras o vindeiro 9 de maio

Os escritores e escritoras elixen os mellores libros do 2009

(20-Marzo-2009) 

Os Premios AELG, que conceden os escritores e as escritoras aos seus compañeiros, xa teñen finalistas para a edición do 2009. Tras unha segunda quenda, desvelaranse aos gañadores no transcurso da Cea das Letras, que se celebrará o día 9 de maio no Hotel Porta do Camiño de Santiago de Compostela.

Nos Premios da AELG recoñecerase a mellor obra publicada no 2008 en cadanseu xénero: Ensaio, Literatura Infantil e Xuvenil (en colaboración con Gálix), Poesía, Narrativa, Tradución (en colaboración coa Asociación Galega de Tradutores), Teatro e Traxectoria Xornalística (que premiará o/a autor/a coa mellor traxectoria xornalística do 2008, e para cuxa elección se contará cos votos dos/as membros do Colexio de Xornalistas). Para a edición deste ano incorporase por vez primeira o premio ao mellor blog literario.

Finalistas

Literatura infanto-xuvenil

A cabeza da medusa (Xerais) de Marilar Aleixandre, Caderno de animalista (OQO) de Antón Fortes, Fume (OQO) de Antón Fortes, O libro das viaxes imaxinarias (Xerais) de Xabier P. DoCampo, e PAlAbrAs brAncAs (Xerais) de Elvira Riveiro

Poesía

A melancolía dos corpos (Sociedad de Cultura Valle-Inclán) de Xulio López Valcárcel, Acendede as almenaras: cántigas de amor, de amigo e de escarnio (Xerais) de Bernardino Graña, Amor Amén (Xerais) de Iolanda Zúñiga, construcións (Positivas) de Eduardo Estévez, Cultivos transxénicos (Instituto de Estudos Miñorianos) de Carlos Negro, Hordas de escritura (Xerais) de Chus Pato, Látego de algas (Espiral Maior) de Antón Reixa, Libro de Alicia (Espiral Maior) de Olalla Cociña, Migracións (Espiral Maior) de Rafa Villar, Non son de aquí (Xerais) de María do Cebreiro, O xeito de Freud (Espiral Maior) de Carlos Lema, e Reversos: días adiados (Xerais) de Ramiro Fonte

Teatro

Fume / Insomnio (Estaleiro) de Rubén Ruibal e Carlos Losada, Historia da chuvia que cae todos os días (Xerais) de Roberto Salgueiro, Nachtmahr (Xerais) de Raúl Dans, Unha primavera para Aldara (Deputación da Coruña) de Teresa Moure.

Ensaio

Anti Natura (Xerais) de María Xosé Queizán, Caderno de notas (A Nosa Terra) de Jenaro Marinhas del Valle, Fendas abertas: seis ensaios sobre a cuestión nacional (Xerais) de Carlos Taibo, Fin de século en Palestina (Galaxia) de Miguel Anxo Murado, Historia de Ourense (Xerais) de Marcos Valcárcel, Miro Casabella e a nova canción galega (Galaxia) de Xan Fraga, O espírito da letra. Nove achegas filosóficas a textos literarios (Edicións Espontáneas) de Luís G. Soto, O natural é político (Xerais) de Teresa Moure, e Por unha Galiza liberada e novos ensaios (Espiral Maior) de Xosé Manuel Beiras

Tradución

A conxura dos necios (Faktoría K) de John Kennedy Toole con tradución de Eva Almazán; As flores do mal (Galaxia) de Charles Baudelaire, traducido por Gonzalo Navaza; Cantos e fragmentos (Positivas) de Safo, tradución de Raúl Gómez Pato; O xiro postal (Rinoceronte) de Sembène Ousmane, traducido por María Isabel García Fernández; e Un home na escuridade (Galaxia) de Paul Auster e tradución de Eva Almazán.

Narrativa

A choiva do mundo (Galaxia) de Xosé M. Pacho Blanco, A verdade como mal menor (Galaxia) de X. Luís Martínez Pereiro, Costa Norte/ZFK (Galaxia) de Xurxo Borrazás, Festina lente (Xerais) de Marcos S. Calveiro, Memoria de cidades sen luz (Galaxia) de Inma López Silva, O libro das viaxes imaxinarias (Xerais) de Xabier P. DoCampo, O profesor de vegliota (Xerais) de Manuel Veiga, O xardín das pedras flotantes (Xerais) de Manuel Lourenzo González, Os nomes do traidor (Xerais) de Xurxo Sierra Veloso, e Shakespeare destilado (Galaxia) de Xesús Constela.

Mellor traxectoria xornalística

Ana Romaní, Bieito Iglesias, Camilo Franco, Gustavo Luca de Tena, Marcos Valcárcel, Xosé Manuel Eyré e Xosé Manuel Pereiro.

Mellor blog literario

…mmmm… de Estíbaliz Espinosa, As uvas na solaina de Marcos Valcárcel, Das orixes de marzo de Helena González, Lándoa. Marxes de Texto de Arturo Casas, Henrique Marques-Samyn de Henrique Marques-Samyn, e O levantador de minas de Alfredo Ferreiro. 

O xurado estraá composto por catro centros de ensino que, cando o IES Rosalía de Castro, farán parte do xurado

Memoria de cidades sen luz, Conexión Tubinga e O xardín das pedras flotantes, finalistas da XV edición do Premio San Clemente

(20-Marzo-2009)

O Comité seleccionador do Premio Arcebispo Juán de San Clemente deu coñecer os nove finalistas que optarán aos premios da XV edición deste certame onde o xurado está composto por rapaces e rapazas de institutos de secundaria.

Os finalistas en lingua galega son Memoria de cidades sen luz (Galaxia) de Inma López Silva, Conexión Tubinga (Xerais) de Alberto Canal, e O xardín das pedras flotantes (Xerais) de Manuel Lourenzo González.

Na categoría de castelán son finalistas La casa de Dostoievski (Planeta) de Jorge Edwards, El día de hoy (Alfaguara) de Alejandro Gándara e Dientes de leche (Seix Barral) de Ignacio Martínez Pisón. Finalmente, optan ao premio de mellor novela en lingua estranxeira Chesil Beach (Anagrama) de Ian MacEwan, Tren nocturno a Lisboa (El Aleph) de Pascal Mercier, e El chino (Tusquets) de Henning Mankel.

O xurado darase a coñecer nos vindeiros días e estará formado por un instituto por cada unha das provincias galegas canda o IES Rosalía de Castro de Compostela, organizador do acto. Este ano, ademais, estase a meditar a opción de incluír un instituto de fora de Galicia ante a posibilidade de que finalmente a obra premiada en galego sexa traducida ao castelán.

A biblioteca contará cun fondo bibliográfico de obras escritas por e sobre mulleres

O Concello de Muxía inaugura a Biblioteca da Muller coa finalidade de afondar no coñecemento a través das obras das mulleres

(18-Marzo-2009) 

O Concello de Muxía ven de inaugurar a Biblioteca da Muller, un espazo situado dentro da biblioteca municipal do concello, que conta cun fondo bibliográfico de obras escritas por mulleres, sobre mulleres ou sobre temáticas que afectan á muller.

Esta sección, posible grazas á colaboración entre as Concellerías de Servizos Sociais, a Concellería de Cultura, Muller e Xuventude e o financiamento da Secretaría Xeral de Igualdade da Vicepresidencia da Xunta de Galicia, pon a disposición do público obras sobre feminismo, filosofía, antropoloxía, arte, literatura infantil, poesía, novela… escritas por mulleres ou que aborden todos estes temas dende unha perspectiva de xénero.

Desde as dúas concellerías, concordan en destacar a achega da muller á historia da humanidade e de dotar á Biblioteca Municipal dun fondo de documentación para afondar na problemática da muller ou nas distintas areas de coñecemento a través das obras de mulleres.

Entre os obxectivos marcados con este novo servizo están a recuperación e visibilización da achega da muller á historia da humanidade, ao mundo das ideas, das artes, das ciencias… ámbitos nos que tradicionalmente apareceu infrarrepresentada. A creación dun espazo para temas relacionados coa muller desde unha perspectiva de xénero de fácil acceso para toda a poboación, así como erradicar prexuízos e actitudes machistas ou misóxinas e a concienciación da poboación sobre comportamentos sexistas moi arraigados socialmente.

O Concello de lugo publicará nun volume os relatos gañadores e os finalistas das dúas categorías

Xoán Xosé Piñeiro e Saturnino Valladares, gañadores do 'Ánxel Fole' de narración curta

(18-Marzo-2009)

Un ano máis, a Concellería de Cultura e Turismo do Concello de Lugo ven de facer públicos os gañadores do Certame de Narración Curta 'Ánxel Fole', que este ano chega a súa décima edición.

Os gañadores deste premio, que se divide nas modalidades de relatos en galego e en castelán, foron Xoán Xosé Piñeiro en galego por O valedor e Saturnino Valladares en castelán por Mujeres para entretener a un preso. Os membros do xurado da categoría de galego, formado polo filólogo Iago Rodríguez Yáñez e os poetas Carlos Vázquez e Xavier Rodríguez Barrio, destacaron do traballo gañador “a uniformidade da súa narrativa que consegue manter o interese do lector ata o final, así como a riqueza do seu léxico para tratar a historia un enfermo psiquiátrico que se toma a xustiza pola súa man”.

"A riqueza no manexo do idioma, a súa capacidade narrativa para a recreación de ambientes mesturada cun gran lirismo" foron os factores que, segundo o xurado da categoría de castelán, fixeron merecedor do premio a Saturnino Valladares.

O concello de Lugo publicará nun volume tanto os relatos gañadores en ámbalas dúas categorías, como as obras finalistas: A endeble esencia, de Martiño Maseda e El animal, de José Manuel Moreno.

No 2008 publicáronse máis de tres millóns e medio de exemplares

Galicia é a quinta comunidade que máis publica con 2.070 títulos editados no 2008

(16-Marzo-2009) 

O Instituto Nacional de Estatística (INE) ven de facer público  o informe estatístico sobre a produción editorial do 2008.

Destaca o aumento de libros editados tanto no Estado Español como en Galicia. A nivel estatal, incrementouse en cerca de 14.000 os títulos editados e en case trinta millóns máis de exemplares publicados. Galicia pasou dos 2.364 títulos publicados no 2007 ata os 3.747 títulos no 2008 que fan un total de 5,25 millóns de exemplares, situándose en produción como a quinta comunidade autónoma tras Catalunya, Madrid, Andalucía e Valencia.

Incrementouse igualmente o número de títulos en galego, que pasou dos 1.472 publicados no 2007 ata os 2.070 do 2008, dos cales 733 correspondeu a obras literarias, 420 a publicacións oficiais e 267 a literatura infantil e xuvenil. En total imprimíronse en Galicia máis de tres millóns e medio de exemplares en galego e 1,61 millóns de exemplares noutras linguas.

A Coruña sitúase no ranking galego que máis publica con 2.158 títulos e 2.778.000 de exemplares, seguida de Pontevedra con 1.283 títulos e 2.194.000 exemplares e de Lugo e Ourense con 153 títulos e 134.000 exemplares cada unha destas dúas provincias.

Cómo dato negativo e preocupante está o descenso de títulos en galego traducidas cara outras linguas. Se no 2007 traducíronse 40 títulos, no 2008 soamente foron 22, dos cales 13 foron narrativa e 6 de literatura infantil e xuvenil.

Outro dato a subliñar é a eficacia das librarías, que un ano máis segue a ser o principal canle de ventas de libros.

[Máis información no INE]

Os membros do xurado salientaron de Palabras para un baleiro o seu ritmo e a súa visualidade

Baldo Ramos gaña o IX Premio de poesía 'Fiz Vergara Vilariño'

(16-Marzo-2009)

O poeta e artista celanovés Baldo Ramos resultou gañador do IX premio de poesía Fiz Vergara Vilariño. O certame, organizado pola Agrupación Cultural Ergueitos e Concello de Sarria, é un dos máis importantes do país e conleva, ademais do premio económico, a publicación da obra. Este certame foi obtido por algúns dos nosos poetas máis importantes, como Marica Campo, Martín Veiga ou Emma Pedreira.

O xurado desta edición, composto polo concelleiro de Cultura de Sarria, Xermán Arias; a Presidenta da Agrupación Cultural Ergueitos, María Casar (ambos con voz e sen voto) e os poetas Xosé Antón Neira Cruz, Lucía Aldao e Pilar Pallarés, destacaron de Palabras para un baleiro, a obra gañadora asinada por Baldo Ramos, o seu "achegamento existencialista, case filosófico. Unha poesía esencializada con moito sentido do ritmo" e a súa profunda "visualidade", froito do seu traballo artístico.

Trátase dun total de tres libros e dous cedés con cabeceiras de Arxentina, Cuba e Galicia

O Centro Ramón Piñeiro recupera cinco cabeceiras da prensa galega da emigración

(13-Marzo-2009)

Hoxe tivo lugar a presentación de cinco novos traballos levados a cabo por investigadores do Centro Ramón Piñeiro para a Investigación en Humanidades, que teñen como nexo común a recuperación de cabeceiras da prensa galega na emigración durante os séculos XIX e XX. O coordinador deste proxecto é Luís Alonso Girgado, que foi o encargado de explicar polo miúdo os contidos dos tres libros e dos dous cedés que se acaban de editar, que inclúen facsímiles e estudos complementarios.

Marisol López, secretaria xeral en funcións de Política Lingüística, felicitou as persoas que participaron nestes proxectos de estudo e recuperación da memoria histórica e, en especial, a Alonso Girgado. Ademais, fixo fincapé na importancia desde o punto de vista histórico e sociolóxico destas publicacións. Do mesmo xeito, destacou o papel do Centro Ramón Piñeiro como referente para a investigación en materia de lingua e cultura galegas, e como espazo de formación para os novos investigadores.

Os cedés que acaban de ver a luz levan por título Prensa galega de Arxentina (1935-1964) e Escolma de Almanaques Galegos (1865-1929). O primeiro deles reúne mostras de exemplares dun total de cinco cabeceiras de prensa: Coro Brétemas e Raiolas, Abrente, Betanzos, Unión Estradense e Airiños. Estes medios de comunicación contiñan informacións de temática musical ou cultural, entre outras. Pola súa parte, o cedé Escolma de Almanaques Galegos (1865-1929) reúne 18 mostras de Cuba, Arxentina e Galicia, de Manuel Castro López, Leandro Saralegui ou Soto Freire, da editorial Céltiga ou de medios de prensa como La Concordia ou La Monarquía. Trátase de almanaques de cidades, provincias ou da comunidade galega publicados en Galicia ou na emigración, con estudos, informacións, mostras de creación literaria e crónicas, que van precedidas dun completo estudo introdutorio.

Polo que atinxe aos libros publicados, o volume 1895. Almanaque Gallego constitúe a recuperación dunha obra que viu a luz na Coruña no ano 1894, dirixida por Farruco Lage e Guillermo Díaz. Unha das peculiaridades deste traballo é que está escrito integramente en galego nas máis de 150 páxinas que ocupa. Este almanaque, en formato libro de peto, inclúe textos en verso e prosa e contén achegas de Salvador Golpe, Galo Salinas ou Alejandro Barreiro.

Lérez (Bos Aires, 1962) foi unha publicación do Centro Pontevedrés de Bos Aires conmemorativa do seu vixésimo aniversario. Este traballo permite coñecer interesantes datos sobre a cidade e a provincia de Pontevedra relativos á súa historia, á paisaxe, á industria da pesca, á música, e, ao mesmo tempo, aborda cuestións relacionadas coa lingua e coa identidade política. Tamén a figura de Castelao está presente de forma constante nas páxinas desta publicación.

Por último, Céltiga (Bos Aires, 1924-1932) está considerada unha das grandes cabeceiras da prensa galega na Arxentina, un peso que adquiriu en parte grazas á lista de destacados colaboradores, entre os que figuraban Eduardo Blanco Amor, Vicente Risco, Otero Pedrayo, os irmáns Vilar Ponte, Cabanillas, Lugrís Freire, Victoriano Taibo ou Amado Carballo. Na súa nómina de ilustradores, contaba tamén con prestixiosos artistas galegos, como Castelao, Sobrino ou Maside. Os fundadores de Céltiga foron Domingo Rial e Ramón Peña, e dous dos seus directores foron Suárez Picallo e Blanco Amor. Esta cabeceira, de corte eminentemente cultural, distinguiuse en boa medida por asentar un discurso político galeguista moderado e progresista.

Os cinco proxectos que se deron a coñecer hoxe viron a luz grazas ao traballo desenvolvido por Luís Alonso Girgado, Manuel Quintáns Suárez, Élida Abal Santorum e Alexandra Cillero Prieto.

O Consello da Xunta tomou hoxe a decisión tras o aval da Real Academia de Belas Artes Nosa Señora do Rosaio, o Consello da Cultura Galega e a Universidade de Santiago

A casa de Castelao en Rianxo ven de ser declarada Ben de Interese Cultural

(12-Marzo-2009)

O Consello da Xunta declarou hoxe a casa familiar de Castelao en Rianxo Ben de Interese Cultural, coa categoría de sitio histórico. Esta declaración recoñece o valor histórico e simbólico da casa e outórgalle o máximo grao de protección prevista na lexislación para o patrimonio cultural.

A declaración efectiva prodúcese unha vez que o 17 de febreiro deste ano os técnicos da Consellería de Cultura entrasen no inmoble para comprobar o estado actual do seu interior e das súas pertenzas. Realizouse ademais unha reportaxe fotográfica para incorporar á documentación do expediente de declaración de BIC.

A declaración de BIC como sitio histórico vén avalada polo informe favorable de tres organismos consultivos: a Real Academia de Belas Artes Nosa Señora do Rosario, o Consello da Cultura Galega e a Universidade de Santiago de Compostela. O decreto de declaración aprobado hoxe polo Consello da Xunta sinala que a casa ten un indiscutible valor simbólico e constitúe o espazo no que se formou como artista, intelectual e político a figura máis relevante da Galicia do século XX.

No decreto arguméntase que na biografía de Castelao "a casa familiar de Rianxo significou o punto de ida e permanente retorno, o lugar que foi entendido popularmente como un santuario de galeguidade, e así se entendeu sempre nos ámbitos culturais e sociais de Galicia. O domicilio familiar constituíu a súa referencia fixa na súa vila natal, e consecuentemente existía unha estreita identificación, privada e pública, de Castelao con aquel".

No decreto explícase que a casa "permaneceu baixo propiedade e uso da familia de maneira ininterrumpida durante case un século, sen que apenas mudase por dentro desde os anos anteriores á Guerra Civil, polo que conserva fielmente a fasquía e o ambiente das casas vilegas de clase media do primeiro terzo do século XX, neste caso no ámbito dunha vila mariñeira". No decreto sinálase que a casa presenta a posibilidade real de revivir o ambiente vital máis íntimo de Castelao.

En total serán 700 libros e 246 teses de doutouramento dos anos 2007 e 2008

Google dixitalizará parte dos fondos editoriais da Universidade de Santiago

(12-Marzo-2009)

Tras o acordo chegado entre Galaxia e Google para a dixtalización do seu fondo editorial agora é a Universidade de Santiago quen ven de asinar un acordo con Google polo que unha parte dos fondos editoriais da USC estarán dispoñibles en internet a través de Google Books, que permitirá difundir na rede unha importante selección dos libros que edita o Servizo de Publicacións e Intercambio Científico da institución docente e que a converte na primeira das galegas que se suma a esta iniciativa.

Google Books é un servizo que indexa a información contida en centos de miles de publicacións impresas para ofrecer aos usuarios a posibilidade de que atopen calquera dato dentro deles. Na actualidade ten xa máis de sete millóns de libros dixitalizados dispoñibles en máis de cen idiomas diferentes, sendo o español o segundo máis empregado nas buscas.

Concretamente serán 700 libros e 246 teses de doutoramento defendidas nos anos 2007 e 2008 os volumes da USC que Google Books ofrecerá no seu web nun primeiro momento, co obxectivo final de aloxar todo o seu fondo editorial e así contribuír á difusión do labor investigador e de divulgación que caracteriza ás Universidades. 

Como explicaron o pasado martes en rolda de prensa o vicerreitor de Cultura, Elias Torres, o responsable de Google Búsqueda de Libros, Luis Collado, e o director académico do Servizo de Publicacións da USC, Antonio Azaustre, os títulos volcados na rede respectarán sempre a protección dos dereitos legais que permiten amosar só un máximo do 20 por cento, ademais da portada, contraportada, índices e lapelas. O resto do libro permanecerá oculto para o lector e as partes visibles non poderán descargarse nin imprimirse, ao igual que se fai nas preto de vinte Universidades españolas que xa teñen asinados contratos similares coa empresa norteamericana.

Mentres que a dixitalización das obras é responsabilidade de Google, a comercialización dos volumes dixitalizados ou indexados continuará a cargo da Universidade que en breve activará o servizo de compra por internet con carriño propio a través da súa páxina institucional.

Na rolda de prensa estiveron tamén presentes a directora, o editor e o administrador web do Servizo de Publicacións da USC, Marisa Melón, Juan Blanco e José Ramón Gómez, respectivamente; así como a directora da Biblioteca Xeral da USC, Isabel Casal.

Neuston. Proxecto 1. Explorando a interface

Un diálogo entre artistas e científicos co mar de fondo protagonizan a nova exposición do Museo do Mar de Vigo

(09-Marzo-2009)

Tomando como metáfora o neuston, que define a comunidade de organismos que viven asociados á superficie, na interface auga-aire, o Museo do Mar de Vigo presenta a exposición NEUSTON. Experimento 1. Explorando a interface, onde científicos e escritores dialogan sobre ciencia e arte no entorno do mar e das ciencias mariñas de Galicia.

Neuston, proposto como un experimento transdisciplinar, estabelece a colaboración de quince tándems de científicos e artistas. A partir dunha publicación científica, o investigador exponlle ao artista un aspecto concreto do seu traballo, inicio dun diálogo a partir do cal o artista realiza a súa proposta. Esta exposición mostra o resultado do experimento, en forma de dípticos onde ambas as linguaxes aparecen confrontadas.

Os tándems de participantes son: Antonio A. Alonso – Xosé María Álvarez Cáccamo; Xosé A. Salgado – Víctor Freixanes; Eva Balsa – Martín Caeiro; Antonio Figueras – Miguel Vázquez ; José Franco – Gonzalo Navaza; José L. Garrido – Din Matamoro; Carmen G. Sotelo – Xavier Queipo; Angel Guerra – Miguel Anxo Prado; Marta L. Cabo – Marilar Aleixandre; Isabel Medina – Fran Alonso; Miguel A. Murado – Vítor Vaqueiro; Santiago Pascual – Rosa Aneiros; José Pintado – Fernando Casás; Miguel Planas – Manuel Sendón ; e Fran Saborido – Manuel Vilariño.

A presentación de Neuston. Experimento 1 terá lugar este venres 13 de marzo no Museo do Mar de Vigo ás 20.00 h. e contará coa presenza da Conselleira de Cultura Ánxela Bugallo e da directora do Instituto de Investigacións Mariñas (CSIC) Aída Fernández Ríos.

No sexo a lingua serve para moitas cousas

Quente, quente... o sexo volve á rede

(09-Marzo-2009)

"No sexo a lingua serve para moitas cousas". Baixo esta premisa o xornal dixital Vieiros convoca por segundo ano consecutivo, coa colaboración da Secretaría Xeral de Política Lingüística, o certame de microrrelatos eróticos 'Ferve a Rede'.

Un dos principais obxectivos do concurso é a normalización da lingua nun ámbito como o sexual. Este concurso, iniciado en 2008, non era a primeira vez que Vieiros lanzaba unha iniciativa relacionada co erotismo ou o sexo, e a súa relación coa lingua galega, velaí están os antecedentes con Necesariamente X ou o Vocabulario sexual galego.

Todos os participantes poden enviar os seus microrrelatos eróticos a Vieiros desde o 10 de marzo ata o 24 de abril. Os mesmos non poderán exceder dos 690 caracteres.

O premio 'quente' consistirá nunha viaxe e estadía de tres noite a Bruxas (Bélxica) para dúas persoas nun céntrico hotel de catro estrelas, gozando do seu 'paquete romántico'. Ademais, todas as persoas que participen no certame entrarán nun sorteo para facerse cunha estadía dunha fin de semana nun hotel en Amarante (Portugal), tamén con 'paquete romántico' e tratamento VIP.

[Ferve a Rede '09]

De que estou a falar cando falo de correr está publicada pola editorial Galaxia

Haruki Murakami presentará a súa última novela en Santiago de Compostela

(08-Marzo-2009)

Coincidindo coa data sinalada para a presentación da súa última novela, o escritor xaponés Haruki Murakami estará este mércores no Casino de Santiago de Santiago de Compostela para falar de Do que estou a falar cando falo de correr, publicada por Galaxia e traducida directamente do xaponés por Mona Imai e e Gabriel Álvarez Martinez.

Nesta nova entrega Murakami relata as súas experiencias como corredor de maratóns e o xeito en que isto inflúe no seu traballo como novelista. O título é unha homenaxe ao escritor norteamericano Raymond Carver, de quen é tradutor para o xaponés.

Do que estou a falar cando falo de correr é o seu segundo libro en galego tras Tras do solpor (Galaxia). En 2007 os alumnos de secundaria de varios institutos de Galicia concedéronlle o Premio San Clemente á mellor novela estranxeira por Kafka en la orilla (Tusquets).

A súa presenza será moi interesante para todos os seus lectores, xa que é moi coñecida a defensa que mantén o escritor xaponés sobre a súa intimidade, polo que poucas veces dá conferencias ou concede entrevistas.

Música, teatro, folclore, poesía, libros, artesanía, cine, contacontos,...

O concello de Culleredo encherase de cultura esta primavera

(05-Marzo-2009)

Coa chegada da primaveira o Concello de Culleredo pon en marcha unha intensa e continuada programación cultural que se desenvolverá desde marzo ata xuño. Música, teatro, folclore, poesía, libros, artesanía, cine, contacontos, cencia e outras actividades terán lugar no concello cullerdense todas as fins de semana.

Unha das actividades que acaparará un importante protagonismo será o teatro, por onde pasarán as compañías Sarabela teatro, Redrum teatro, Lagarta lagarta, o teatro Lope de Vigo e a propia escola Municipal de teatro de Culleredo, ao que haberá que sumar a II primaveira Máxica adicada aos mais pequenos, onde actuarán catro dos mellores magos galegos.

A programación da primaveira das Letras Galegas contén 90 actos diferentes de actividades lúdicas e culturais que acompañarán ata o verán, os fins de semana dos veciños/as de Culleredo. Unha programación dirixida a todos os sectores de población, cunha atención preferente á defensa constante da nosa lengua, raices e cultura.

O programa de "Encontros culturais de primaveira , Letras Galegas 2009” mestura a celebración de eventos con outras citas habituais do Concello de Culleredo, como  o XVIII concurso de deseño” Isaac Díaz Pardo”, a XIII feira de artesanía e libro galego, a clausura da XXII edición das escolas culturais municipais, o XII concurso de pintura “Pintor Argüelles” ou a XVI edición do día da familia de Culleredo, XVI festival internacional de maxia “Mago Antón e amigos” ou a celebración do día da república.

A biblioteca de Poesía “Uxio Novoneira” de Vilaboa acollerá ao longo destes meses recitais poéticos, presentacións de libros, talleres de poesía e a celebración do II Diálogo de Pintura e Poesía de Culleredo.

O Muíño de Acea de Ama albergará importantes exposicións pictóricas dos mellores artistas plásticos galegos actuais, Xosé Vázquez Castro, Ricardo Rilo, Laureano Vidal, Isabel pintado, Luisa Valdés, xunto á exposición “Galicia en Foco”e “Historia do cine galego”.

Na programación tamén terá un peso importante o cinema, onde se proxectarán máis de 72 curtametraxes no programa de cinemas dixitais.

[Programación dos Encontros culturais prmavera de Culleredo]

Estes premios están dotados cun premio de 6000 euros en cada unha das súas modalidades

Aberta a convocatoria para os diferentes premios para textos teatrais convocados pola Agadic

(05-Marzo-2009)

A Axencia Galega das Industrias Culturais (Agadic), seguindo a súa liña de promoción e difusión das artes escénicas e musicais e co fin de  incentivar a creación literaria no eido teatral ven de convocar o XVIII Premio Álvaro Cunqueiro para Textos Teatrais, o IV Premio Manuel María de Literatura Dramática Infantil e o VII Premio Barriga Verde de Textos para Teatro de Monicreques, tanto para público infantil como adulto.

Segundo figura nas bases haberá un único galardoado por premio e modalidade, no caso do premio Barriga Verde, cunha dotación económica de 6000 €.

Ao longo das diferentes edicións estes premios foron acadados por moitas das figuras máis relevantes da literatura dramática actual, como Raúl Dans, Roberto Vidal Bolaño, Manoel Riveiro, Paula Carballeira, Breogán Riveiro, Roberto Salgueiro, Rubén Ruibal ou Manuel Guede, entre outros. Na convocatoria do 2008 resoltou gañadora Teresa González Costa no Álvaro Cunqueiro e no Manuel María e Xosé A. Neira Cruz no Barriga Verde na modalidade infantil, quedando deserto en adultos.

[Bases dos premios]

Foi fundador do padroado Pedrón de Ouro e un dos promotores do Modesto R. Figueiredo e do Eusebio Lorenzo Baleirón

Deixounos Avelino Abuín de Tembra

(03-Marzo-2009)

O fundador do padroado Pedrón de Ouro Avelino Abuín de Tembra faleceu no día de onte nunha clínica de Santiago de Compostela.

Natural de Imo, concello de Dodro, do ano 1931, foi un dos escritores e galeguistas máis vencellados á resistencia cultural de Galicia durante o franquismo.

Avelino Abuín de Tembra foi o creador dos Xogos Florais do Ensino Medio de Galicia, dos Cursos Monográficos Manuel Peleteiro e fundador do Padroado do Pedrón de Ouro. Ata a súa morte foi secretario xeral da Fundación Rosalía de Castro e membro da súa Comisión de Cultura desde 1965.

Como activista cultural promoveu o premio de poesía "Eusebio Lorenzo Baleirón" e creou a Ruta Rosaliana. Abuín de Tembra foi un dos promotores dun dos certames literarios de máis prestixio de Galicia, o Modesto R. Figueiredo, un premio mítico gañado por moitos dos máis importantes escritores e escritoras galegos.

Como autor Abuín de Tembra deixa unha amplísima obra xornalística con máis de oito mil artigos aparecidos en publicacións do país, españolas e latinoamericanas. Como poeta gañou os Premios Ciudad de Carballo no 79 e o Galicia de Poesía e Premio Celso Emilio Ferreiro de poesía no ano 81.

Este premio, que toma o seu nome do fundador do real Coro Toxos e Froles de Ferrol, ten como obxectivo o recoñecer o labor cultural en prol da cultura galega

Luís Alonso Girgado recibe o Premio Manuel Lorenzo Barja

(03-Marzo-2009)

O Real Coro Toxos e Froles ven de lle recoñecer ao ferrolán Luís Alonso Girgado o seu labor cultural concedéndolle o VIII Premio Manuel Lorenzo Barja.

Luís Alonso Girgado, asesor literario do Centro Ramón Piñeiro e colaborador en publicacións de carácter cultural como Anhtropos, Ínsula, Clave Orión, Grial, Nordesía ou Libro Aberto, dirixe a colección Libros da Frouma da editorial Follas Novas.

O Premio Manuel Lorenzo Barja, que toma o nome do fundador do Coro, pretende recoñecer a labor das persoas ou institucións que traballan a prol da cultura galega, e máis concretamente no campo editorial. Este galardón recaeu anteriormente en formacións como Cántigas da Terra da Coruña e De Rueda de Ourense, en investigadores como o Padre Calo, ao xornal La Voz de Galicia, en figuras tan emblemáticas como Faustino Santalices e Xosé Fontenla Leal, a título póstumo; ou ao Obradoiro de Cultura Tradicional Ultreia, na pasada edición.

Lareira Literaria

Rexina Vega, Ramón Caride e Ánxela Gracián na Lareira Literaria de marzo

(03-Marzo-2009)

Na Lareira Literaria deste mes contamos coa presenza de Rexina Vega, Ramón Caride e de Ánxela Gracián.

Rexina Vega, doutora en Filoloxía Románica e especialista na obra de Álvaro Cunqueiro, inaugurouse na narrativa con Cardume, obra que lle valeu o Premio Xerais do 2007. Nestes intres prepara a que será a súa segunda novela, Locus solis. Neste novo traballo Rexina Vega, a través dos diarios, os debuxos, os sms, os mails, as cartas postais, deixadas por un enferma mental, pretende achegarse á visión, á linguaxe e á biografía dunha esquizofrénica, acompañándoa durante un período de dez anos: desde que descubre a enfermidade ata o seu ingreso como crónica nun centro psiquiátrico. Xunto a este novela, para a que os seus lectores aínda terán que agardar un pouco para vela nos andeis de todas as librarías, a editorial Ouvirmos publicará unha nova fotobiografía sonora dedicada a Álvaro Cunqueiro, onde Rexina Vega se encarga do estudo e dos textos introdutorios.

Ramón Caride, un dos nosos escritores máis afamados, ven de publicar en México a súa novela O sangue dos camiños (Sotelo Blanco), que se reeditará tnovamente en galego, desta volta por Xerais, antes do verán incorporando os cambios feitos na tradución cara o portugués e o castelán. E seguindo coas traducións de Caride a outras linguas e mercados, Anaya publicará en castelán o seu premio Merlín, Perigo vexetal. Para as Letras Galegas, Xerais publicará a novela curta inédita Andanzas de Xan Farrapeiro, destinada para o público infantil-xuvenil e ilustrada por Marisa Irimia, onde Ramón Caride recrea as andanzas dun personaxe dos contos tradicionais. E sen data de remate, Caride traballa nun libro de relatos e máis nun poemario que aínda que lle queda un tempo a cocer a lume lento...

E se falabamos das traducións de Caride, non podemos esquecernos dunha das mellores tradutoras do país, como así recoñeceu o xurado do Premio Plácido Castro de tradución ao entregarlle este galardón a Ánxela Gracián. Escritora, tradutora, editora, filóloga e unha das cabezas visibles de Gálix, Ánxela Gracián ven de traducir en Galaxia Hugo Pratt. O desexo de ser inútil (Lembranzas e reflexións), O home que plantaba árbores de Jean Giono, e Stefano de María Teresa Andruetto, este último verá a luz en breve. Como autora marzo será un mes prolífico, xa que ata tres obras súas estarán dispoñibles para os seus lectores, trátase de Pinga de choiva en Xerais, Xoaniña rei-rei, en Sotelo Blanco e Carrapeto na editorial MacMillán.

[Lareira Literaria]