Entre os días 30 de xuño e 4 de xullo

Un congreso internacional analizará a obra de Emilia Pardo Bazán

(27-Xuño-2008)

O Centro Sociocultural Fundación Caixa Galicia acollerá entre os días 30 de xuño e 4 de xullo o I Congreso Internacional "La literatura de Emillia Pardo Bazán", organizado pola Casa-Museo Emilia Pardo Bazán e a Fundación Caixa Galicia.

Ao longo destes cinco días sucederánse debates, conferencias, comunicacións e relatorios impartidos por máis de setenta especialistas procedentes, entre outros paises, de Galicia, Francia, Italia, Estados Unidos, Catalunya ou Inglaterra, onde se analizará a obra e a vida dunha das escritoras coruñesas máis internacionais.

O comité organizador está formado polos profesores José Manuel González Herrán, Cristina Patiño Eirín, Ermitas Penas Varela e Olivia Rodríguez González e a Consellería de Educación e Ordenación Universitaria da Xunta de Galicia homologará o Congreso como Actividade de Formación para os profesores de Ensino Secundario.

[Ver programa]

[Formulario de inscrición]

A arquiveira e historiadora ourensana recolle o premio que na edición anterior foi outorgado ao británico John Rutherford

Olga Gallego recibirá o Premios Trasalba 2008

(26-Xuño-2008)

A memoria de Ramón Otero Pedrayo volverá a convocar unha nutrida representación da cultura galega nas instalacións e arredores da casa grande de Cimadevila, na parroquia de Trasalba, concello de Amoeiro, casa petrucia dunha das grandes personalidades das letras galegas contemporáneas. Nesta edición entregarase o Premio Trasalba a Olga Gallego Domínguez, nun acto literario ao que asisten case medio millar de persoas.

Esta é a XXVI edición do Premio Trasalba, que o ano pasado foi concedido ao británico John Rutherford. Prémiase a traxectoria dunha figura comprometida coas letras e coa cultura galega. O premio non ten dotación económica, senón afectiva e simbólica. Isaac Díaz Pardo entrega un deseño orixinal, especialmente pensado para a ocasión, e a Fundación Otero Pedrayo entrega un Libro Homenaxe á personalidade agasallada, nesta ocasión coordenado polo director do Arquivo Histórico Provincial de Ourense, Pablo Sánchez Ferro. Titúlase o libro O tecido da historia, e inclúe, entre varias colaboracións, un orixinal de Olga Gallego sobre Otero Pedrayo.

Pablo Sánchez Ferro será o encargado da laudatio da homenaxeada no acto literario que presidirá o titular da Real Academia Galega, Xosé Ramón Barreiro. Ao mesmo tempo, Craig Patterson, discípulo de John Rutherford en Oxford e profesor na universidade de Stirling (Escocia), presentará o seu libro O devalar da idea. Otero Pedrayo e a identidade galega, editado inicialmente en inglés e traducido e publicado agora pola Fundación. Ramón Villares, presidente do Consello da Cultura Galega e vicepresidente da Fundación Otero Pedrayo, presentará pola súa banda o libro de Otero Pedrayo, Galicia e Europa, editado neste caso polo Consello da Cultura Galega, no que se recolle unha conferencia coa voz do autor de Trasalba.

Tradicionalmente, a festa de Trasalba, na que se reúne o Patronato da Fundación para facer reconto das actividades do ano, celebra unha misa votiva en memoria de Otero Pedrayo e unha comida de amizade no souto próximo á casa grande de Cimadevila, á que asisten arredor de medio millar de persoas. A Fundación, presidida polo escritor e editor Víctor F. Freixanes, acolle no seu Patronato personalidades e institucións de toda Galicia, entre outras as tres universidades galegas, a Deputación Provincial de Ourense, o concello de Amoeiro e a Consellería de Cultura.

O Premio Trasalba foi instituído hai 26 anos. No ano 2006 concedeuse ao grupo Milladoiro, que agasallou á Fundación cun tema orixinal titulado “Trasalba” e que dende entón se convertiu no himno ou referencia musical da festa literaria.

Olga Gallego Domínguez (Ourense, 1923) é historiadora e arquiveira e membro da Real Academia da Historia (1980). A súa actividade profesional levouna a verificar os catálogos da Fundación Penzol, o da biblioteca da Caixa de Aforros, os das bibliotecas da Escola de Comercio e do Instituto de Ensino Medio Santa Irene. Dende 1968 é directora do Arquivo Histórico Provincial e do Arquivo da Delegación de Facenda de Ourense e en 1972 pasou a ser Directora de sección do grupo de colaboradores Marcelo Macías do Museo Arqueolóxico de Ourense. Membro do Padroado da Fundación Penzol e tamén do Padroado Ramón Otero Pedrayo, en novembro de 1986 ingresa na Real Academia Galega.

O xurado estivo formado polo alumnado dos IES Rosalía de Castro, Camilo José Cela de Padrón, Nosa Señora dos Ollos Grandes de Lugo, Pintor Colmeiro de Silleda e o Lauro Olmo do Barco de Valdeooras

Así nacen as baleas, Arthur e George e Hoy, Júpiter, premiados na XIV edición dos Premios "Arcebispo Juan de San Clemente"

(25-Xuño-2008)

Así nacen as baleas de Anxos Sumai e publicado por Galaxia, Arthur e George, de Julian Barnes, e traducido por Xesús Fraga para Rinoceronte Editora e Hoy, Júpiter, de Luis Landero e publicado por Tusquets, foron as obras premiadas da XIV edición dos Premios Literarios "Arcebispo Juan de San Clemente" que convoca anualmente o IES Rosalía de Castro.

Así nacen as baleas impúxose na categoría de lingua galega as outras dúas obras finalistas: Cardume (Xerais) de Rexina Vega e Mentres a herba medre (Galaxia) de Xesús Rabade Paredes. En castelán, as outras obras que competían polo galardón foron Crematorio (Anagrama) de Rafael Chirles e La muerte lenta de Luciana B. (Destino) de Guillermo Martínez. No apartado de lingua estranxeira, o xurado salientou Arthur e George sobre Terrorista de John Updike e traducida ao galego por Lara Domínguez para Xerais e Zapatos italianos (Tusquets) de Henning Mankell.

Nesta décimo cuarta edición o xurado estivo formada polos rapaces e rapazas dos IES Rosalía de Castro (Santiago de Compostela), IES Cámilo José Cela (Padrón), IES Nosa Señora dos Ollos Grandes (Lugo), IES Pintor Colmeiro (Silleda) e o IES Lauro Olmo (Barco de Valdeorras).

Patiño comprometeuse a realizar novos esforzos integradores do colectivo libreiro

Xurxo Patiño, novo presidente da Federación de Libreiros de Galicia

(24-Xuño-2008)

A Federación de Libreiros de Galicia celebrou o pasado venres 20 de xuño unha Asemblea Xeral Extraordinaria para a elección dos cargos da Xunta Directiva, por finalización regulamentaria de mandato do equipo de goberno anterior. Xurxo Patiño Pérez, responsable da Libraría Librouro de Vigo, foi elixido novo presidente da Federación de Libreiros, por un período de catro anos.

Co novo presidente estarán no equipo de goberno como vicepresidente, Arximiro Blanco Costas, das librarías Mendinho e Martín Códax de Vigo; como secretario, Benxamín Riobó Sanluis, responsable da Libraría O Pontillón de Moaña; e como tesoureiro, Xaime Corral Prieto, da Libraría Nós, de Sanxenxo.

Xurxo Patiño aproveitou o seu nomeamento para agradecer o intenso traballo desenvolvido polo seu antecesor no cargo e agora novo tesoureiro, Xaime Corral, e comprometeuse a continuar coa liña de traballo da directiva anterior e a realizar novos esforzos integradores do colectivo libreiro.

O de 5 de xullo en Arca-O Pino

II Festa da Narración Oral de Galiza

(20-Xuño-2008)

O Centro Sociocultural Luis Seoane de Arca-O Pino acollerá o vindeiro sábado 5 de xullo a II Festa da Narración Oral de Galiza.

O evento, organizado polo Colectivo Tatalo e Nova Escola Galega, pretende ser unha exaltación da oralidade, un día onde Arca vaise convertir nun gran escenario da palabra.

As actividades terán como marco do seu desenvolvemento o Centro Sociocultural Luis Seoane, onde terá lugar a partires das 09.00 h. a II Xornada sobre a Oralidade para educadores/as. A festa continuará pola tarde, onde Paula Carballeira, Cándido Pazó e Quico Cadaval, máis a actuación musical de Espido participarán na sesión de contacontos Sucedidos no Camiño e outras historias.

Ás 22.30 h. e ata que o corpo aguante os contos e as historias estarán presentes nos bares e pubs do concello, animados por Eva Varela, Carlos Santiago, Celso Sanmartín e Róber Bodegas.

Desde a organización animan a todos e a todas a participar contando as súas historias nun marco incomparable como é o Concello de O Pino, un enclave de extraordinaria importancia onde conflúen dúas tradicións: o Camiño de Santiago e narración oral.

[Máis información, programa e formulario de inscrición]

Un recoñecemento a toda unha vida dedicada á emancipación de Galicia

A Agrupaçom Cultural O Facho fixo entrega a Francisco Fernández del Riego do Facho de Ouro

(19-Xuño-2008)

A Fundación Penzol de Vigo acolleu o pasado día 17 de xuño a entrega do Facho de Ouro a Francisco Fernández del Riego. O acto presentábase como recoñecemento a toda unha vida dedicada á emancipación de Galicia.

José Luís Rodríguez Pardo, presidente do O Facho, abriu o acto, lembrando no mesmo as vicisitudes da recuperación da cultura galega nos tempos escuros do primeiro período do Rexime Nacional-Católico, algunhas das mesmas compartidas polo presentador. A entrega do Facho de Ouro a Francisco Fernández del Riego serviu para expor que a través do inxente labor levada a cabo polos seus bos e xenerosos, dos que D. Paco é proba ben indicativa, Galicia terá outras novas mil primaveras.

Fernández del Riego, respondeu para agradecer a consideración tida a sua persoa coa entrega do Facho de Ouro por parte da Agrupaçom Cultural. Posteriormente lembrou o nacemento da Associaçom e a súa pertenza tanto nos primeiros anos da década dos sesenta do século pasado, época onde o franquismo facía estragos, como hoxe.

Ao finalizar o acto de entrega e recoñecemento, o homenaxeado fixo de anfitrión para nos mostrar aos membros do Facho tanto a biblioteca da Fundación Penzol, así como o Museo “Francisco Fernández del Riego” onde é posible ver e contemplar telas dos nosos pintores mais senlleiros así como de outros artistas de alta consideración mundial.

Posteriormente celebrouse un xantar onde D. Francisco estivo acompañado polos seus mais próximos amigos e parte da Xunta Directiva do Facho.

[Máis información na web da Agrupaçom Cultural O Facho]

A cidade andaluza de Sevilla acollerá o congreso entre os días 18 e 21 de xuño e contará coas intervencións, entre outros, de Alfonso García Sanmartín e Suso de Toro

VI Congreso de Editores de España versará sobre os problemas de distribución e comercialización do libro

(16-Xuño-2008)

A Federación de Gremios de Editores de España, a máxima entidade representante da industria editorial española, organiza entre os días 18 e 21 de xuño en Sevilla o VI Congreso de Editores de España. Esta actividade vén a ser unha cita obrigada de indubidable interese para o sector editorial nacional, quinto en importancia e produción do mundo. A Asociación Galega de Editores (AGE) participará activamente no programa do encontro, ao mesmo tempo que algúns dos seus editores asociados asistirán en calidade de congresistas ao foro sevillano.

O Congreso nesta edición está dedicado monograficamente aos problemas de distribución e comercialización, con especial fincapé na incorporación das novas tecnoloxías e os circuítos dixitais. Tamén se analizará a súa incidencia no modelo de negocios no mundo do libro, xunto ao rol creativo que o editor asume. As liñas xerais das tres grandes sesións que se levarán a cabo son: as novas tecnoloxías de distribución e modelos de negocio; a propiedade intelectual e dereitos do editor; e valor e percepción do produto cultural e a gratuidade do libro.

Tras confeccionar un estudado programa, preténdese dar repaso aos temas de preocupación actual e inmediata que afectan ao sector do libro, onde os principais expertos de cada unha das ramas analizarán e debaterán os asuntos que lles competen a fin de emitir unhas conclusións que se convertan nos primordiais obxectivos a lograr polos editores españois no futuro inmediato. Entre os numerosos actos programados, está previsto que o presidente da AGE, Alfonso García Sanmartín, modere unha mesa redonda sobre a diversidade editorial no marco da globalización, o venres 20 de xuño ás 16.00 h.

Estarán presentes no encontro uns cento cincuenta congresistas, como representantes de alrededor dunhas cen empresas editoriais, e outros cen invitados (conferenciantes, moderadores, acompañantes, delegacións institucionais e colaboradoras, etc.); co que a suma total ascenderá a uns douscentos cincuenta participantes. Ademais, despois da intervención en edicións anteriores de figuras da literatura como Luis García Montero, Carmen Martín Gaite, Bernardo Atxaga, Juan J. Millás e Suso de Toro, está previsto que clausure cunha conferencia maxistral o escritor andaluz J.M. Caballero Bonald.

[Ver información completa na web da Asociación Galega de Editores]

Entre os seus obxectivos están a coordinación das accións dos seus membros para a defensa dos dereitos profesionais

Constituiuse en Poblet a Federación de Asociacións de Escritores Galeusca

(16-Xuño-2008)

As asociacións de escritores cataláns, vascos e galegos constituiron onte en Poblet (Tarragona) a Federación de Asociacións de Escritores Galeusca. Por parte da Asociación de Escritores en Lingua Galega asistiron ao acto o seu presidente, Cesáreo Sánchez Iglesias, e a secretaria xeral, Mercedes Queixas.

A constitución desta Federación -que coincide co 25 aniversario dos encontros anuais entre autores das tres comunidades- ten como fins a representación, promoción e defensa dos escritores en lingua catalana, eúscaro e galega, así como a coordinación das accións dos seus membros cara a unha maior eficacia na defensa dos dereitos profesionais en todos os seus aspectos.

Asemade, a Federación centrarase na actuación conxunta fronte a organismos e institucións da administración pública, tanto de ámbito estatal como autonómico e europeo, como aquelas de carácter privado en calquera de ditos ámbitos. O impulso da normalización do feito literario nas súas diversas manifestacións e soportes é outro dos fins da Federación, así como o fomento das relacións con outras Federacións ou Asociacións que representen os intereses de escritores e escritoras, ou aquelas que agrupen as empresas ou axentes que vehiculan a difusión e comunicación da produción literaria en todo os seus xéneros.

Canto as actividades que se propón a Federación, caben salientar a difusión e promoción das respectivas linguas e da produción literaria realizada a través delas nos distintos xéneros e soportes; o desenvolvemento de programas de investigación e formación e encargo de estudos monográficos sobre temas profesionais; a organización de congresos, seminarios, cursos, exposicións e outras actividades colectivas; a edición de documentos, estudos e traballos de divulgación e a participación en organismos públicos e privados.

A presidencia da Federación será rotatoria, correspondendolle neste primeiro periodo ao presidente dos escritores cataláns, Guillem-Jordi Graells. 

O especialista na obra do poeta de Celanova Ramón Nicolás comenta a selección fotográfica realizada pola Fundación Celso Emilio Ferreiro

Ouvirmos publica unha fotobiografía sonora de Celso Emilio Ferreiro

(16-Xuño-2008)

A discográfica e editorial lucense Ouvirmos presentou unha fotobiografía sonora de Celso Emilio Ferreiro. A filla do poeta de Celanova, Isabel Ferreiro Loredo, introduce, en representación da Fundación Celso Emilio Ferreiro, a selección fotográfica de Carlos Díaz comentada por Ramón Nicolás. Máis dun cento de fotografías, coas que se achega un poema e un breve estudo por década, introdúcennos no universo literario e persoal de Celso Emilio Ferreiro.

Por outra banda, acompañan esta selección fotográfica dous CD’s. Un deles, analizado tamén por Ramón Nicolás, recolle a voz do autor recitando os seus textos. O outro ofrece unha selección das cancións compostas cos seus poemas por artistas de renome como Suso Vaamonde, María Manuela, Los Tamara ou Fuxan os Ventos. Xurxo Souto Eiroa, músico e director de programación da Radio Galega, é quen documenta e guía a escoita deste último CD.

Ouvirmos continúa así a liña marcada coa fotobiografía de Manuel María e que continuará coa de Álvaro Cunqueiro.

O biólogo e escritor ourensán deixará o seu cargo en Merlín Comunicación en outubro

Gustavo Adolfo Garrido será o novo xerente da Fundación Carlos Casares

(12-Xuño-2008)

Gustavo Adolfo Garrido vén de ser nomeado director xerente da fundación que leva o nome do escritor ourensán, que fora director de Galaxia e presidente do Consello da Cultura Galega.

Cúbrese así o posto no organizativo que quedara baleiro coa marcha de Damián Villalaín a Santiago para ocupar un posto de asesor do Presidente da Xunta.  Gustavo A. Garrido fóra colaborador de Carlos Casares dende 1989 no consello de redacción de GRIAL, director da colección de Galaxia Galicia no espello e, dende 2006, é responsable de Merlín Comunicación.

No mesmo Padroado do día 3 pasado, foi nomeado Xosé M. Soutullo para levar a dirección cultural. Soutullo e Garrido pertencían ao consello asesor da Fundación Carlos Casares dende a súa fundación. Gustavo A. Garrido compatibilizará a dirección da Fundación Carlos Casares coa súa responsabilidade en Merlín Comunicación ata outubro, momento en que abandonará a empresa de Editorial Galaxia.

O día 15 de xuño vaise constituir a Federación de Asociacións de Escritores Galeusca

Os editores en lingua galega, vasca e catalá avogan por axudas á edición de carácter interlingüístico e transfronteirizo

(10-Xuño-2008)

Os editores en lingua galega, vasca e catalá reuníronse os pasados 6 e 7 de xuño en Lleida no marco da quinta edición de Galeusca. Despois de analizar e debater as principais cuestións que afectan ao sector do libro e das respectivas industrias culturais da edición, a reunión serviu para reafirmar a importancia de fortalecer a colaboración estable que aporta Galeusca, ademais de establecer unha serie de conclusións.

Sobre as axudas á edición, estableceuse que se debe manter e sistematizar o intercambio de información sobre as axudas á edición nos diferentes territorios Galeusca, instar ao Ministerio de Cultura a modificar os sistemas de axuda á edición para que establezan estímulos para a edición de obras de interese cultural e de dubidosa viabilidade comercial, sen outras vinculacións ás dotacións de libros para as bibliotecas, e establecer un diálogo co Comisario Europeo do Multilingüismo e avogar por que se dean ás axudas á edición de libros un carácter interlingüístico e intercultural que supere o carácter transfronteirizo actual. En canto á gratuidade do libro de texto, acordouse reivindicar o recoñecemento da importancia da elaboración de contidos curriculares tamén en soporte papel, e lamentouse que, pasados tres anos da celebración do anterior Galeusca, as repercusións negativas para todos os sectores do libro que prevíamos entón, e que podían provocar grandes problemas para garantir a presenza de materiais curriculares desenvolvidos nas respectivas linguas, se viron confirmadas polos diferentes estudos técnicos elaborados.

Sobor do intercambio entre editores Galeusca, afirmouse a vontade de traballar polo aproveitamento de tódalas sinerxias derivadas da pertenza ao Galeusca no intercambio sistemático de títulos, autores e proxectos; mentres que no tocante á proxección exterior das culturas Galeusca, considerouse de especial importancia preservar tamén neste campo a especificidade das citadas culturas e comprométense a profundizar no estudo de fórmulas de colaboración en materia de promoción internacional que ofreza ao mundo unha visión nítida das nosas culturas, lonxe de esquemas uniformizadores que distorsionen a nosa voz propia e orixinal.

Constitución da Federación de Asociacións de Escritores Galeusca.

Por outra banda, o vindeiro domingo día 15 vaise constituir, na localidade catalana de Poblet, a Federación de Asociacións de Escritores Galeusca. Por parte da Asociación de Escritores en Lingua Galega asistirán o acto de constitución da Federación o seu presidente, Cesáreo Sánchez Iglesias, e a súa secretaria xeral, Mercedes Queixas.

A constitución desta Federación ten como fins a representación, promoción e defensa dos escritores en lingua catalana, eúskaro e galega, así como a coordinación das accións dos seus membros cara a unha maior eficacia na defensa dos dereitos profesionais en todos os seus aspectos.

Asemade, a Federación centrarase na actuación conxunta fronte a organismos e institucións da administración pública, tanto de ámbito estatal como autonómico e europeo, como aquelas de carácter privado en calquera de ditos ámbitos. O impulso da normalización do feito literario nas súas diversas manifestacións e soportes é outro dos fins da Federación, así como o fomento das relacións con outras Federacións ou Asociacións que representen os intereses de escritores e escritoras, ou aquelas que agrupen as empresas ou axentes que vehiculan a difusión e comunicación da produción literaria en todo os seus xéneros.

Canto as actividades que se propón a Federación, caben salientar a difusión e promoción das respectivas linguas e da produción literaria realizada a través delas nos distintos xéneros e soportes; o desenvolvemento de programas de investigación e formación e encargo de estudos monográficos sobre temas profesionais; a organización de congresos, seminarios, cursos, exposicións e outras actividades colectivas; a edición de documentos, estudos e traballos de divulgación e a participación en organismos públicos e privados.

Increméntase nun 54% as axudas á tradución

Cultura convoca axudas para a tradución e para grandes proxectos editoriais

(10-Xuño-2008)

A Consellería de Cultura e Deporte aprobou hoxe as axudas á tradución e ao desenvolvemento de grandes proxectos editoriais.

Dentro do obxectivo de fomentar a exportación da literatura do país Cultura destina un total de 307.689 euros para apoiar as traducións desde e para o galego. Esta cantidade supón un incremento do 54% con respecto do ano anterior.

O ano pasado presentáronse 67 proxectos de tradución ao galego e 50 do galego a outras linguas, o que supuxo un incremento notable fronte aos 37 e 21, respectivamente, do ano 2006. A convocatoria de axudas á tradución desde e para o galego foi publicada hoxe no DOG.

Para favorecer a exportación de textos de autores galegos a outras linguas, este ano a Consellería de Cultura convocou por primeira vez axudas ás probas de tradución, cunha partida de 25.000 euros. Trátase de apoiar a tradución a outras linguas de fragmentos de entre 100 e 1000 palabras cos que se procura que as persoas ou entidades do exterior poidan formar unha primeira opinión con respecto da obra, para iniciar os contactos para a edición dese texto na súa lingua.

Por outra parte, o DOG de hoxe tamén publica as axudas a materialización de grandes proxectos editoriais de libro galego. Cultura destina 295.387 euros a estas axudas, dirixidas tanto á edición tradicional como en novos soportes. O obxectivo é contribuír á existencia dun catálogo de grandes obras en lingua galega, importantes para o crecemento intelectual do país.

[Convocatoria de axudas á tradución]

[Convocatoria de axudas a grandes proxectos editoriais]

A Deputación da Coruña financiará cun total de 37.000 euros diversas actividades culturais organizadas pola RAG

Colaboración entre a Real Academia Galega e a Deputación da Coruña

(10-Xuño-2008)

Xosé Ramón Barreiro, presidente da Real Academia Galega e Salvador Fernández Moreda, presidente da Deputación da Coruña, formalizaron onte un acordo de colaboración polo que a institución provincial financiará diversas actividades culturais organizadas pola institución académica durante 2008. Ambos os dous presidentes valoraron de xeito moi positivo este novo acordo de colaboración institucional.

Mediante este acordo, a Deputación da Coruña destinará este ano un total de 37.000 euros para apoiar economicamente o programa de actividades culturais da Real Academia Galega. Entre outras cuestións, os fondos provinciais destinaranse a actividades de conservación da casa museo de Emilia Pardo e á compra de material bibliográfico e arquivístico para a institución académica.

Espazos Lectores. Ler en común. Os clubs de lectura

Unhas xornadas analizarán o pracer de ler en común

(10-Xuño-2008)

Entre os días 13 e 14 de xuño o Auditorio de Galicia en Santiago de Compostela acollerá a celebración das xornadas de animación lectora Espazos lectores. O obxectivo destas xornadas é difundir e recuperar o hábito de ler, non só de forma individual, senón tamén en comunidade. O proxecto da Dirección Xeral de Creación e Difusión Cultural e da Asociación Socio-Pedagóxica Galega busca, nesta primeira edición, dinamizar os clubs de lectura en Galicia, para que o que contará coa presenza da animadora á lectura Geneviéve Patte e de representantes de círculos de literarios de Cataluña, Andalucía e Portugal.

Estes clubs funcionan como puntos de encontro e de intercambio de opinións sobre as obras escollidas polos seus integrantes. Aínda que as xornadas se dirixen principalmente a bibliotecarios, docentes ou encargados de bibliotecas, poden participar interesados en xeral. Todos eles terán que formalizar a súa inscrición na web www.rbgalicia.org

A primeira conferencia será pronunciada por Geneviéve Patte, exbibliotecaria e animadora á lectura, quen baixo o título A biblioteca, espazo de intercambio de palabras relatará parte da súa experiencia fomentando actividades para retoma-lo hábito lector. Este encontro terá lugar o día 13 de xuño, ás 17.30 h. na Sala Mozart do Auditorio de Galicia. Acto seguido, ás 18.45 h., celebrarase a mesa redonda Os clubs de lectura, perspectivas diversas, na que compararán as súas experiencias locais Inmaculada Casals Torres (directora da Biblioteca Central urbana Can Casacuberta de Badalona), Fernando Jiménez Guerra (Centro Andaluz de las Letras de la Consejería de Cultura de la Junta de Andalucía) e Mª Luz Corral Uzal (directora das Bibliotecas municipais do concello de Oleiros).

Na seguinte xornada, a primeira conferencia (ás 10.00 h.) analizará a dificultade de inculcarlle este hábito aos máis cativos; Do escepticismo á satisfacción: a posta en marcha dun club de lectura escolar por Xoán Carlos Rabada, responsable de biblioteca e coordinador do Club de Lectura "Entre liñas", do IES Ramón Menéndez Pidal". Ás 11.00 h., María João Sampaio, responsable da División Municipal da rede de lectura do Municipio do Porto, pronunciará a charla Comunidade de leitores: a leitura como espaço de descoberta e partilha. Xa ás 13.00 h., Concha Costas de "Espazo Lectura" de Gondomar, Soledad Ríos de "A Lonxa Literaria" de Moaña, e Nel Vidad de "Literactúa" de Carballo participarán no coloquio Lecturas comúns e espazos activos: experiencias locais de comunidades lectoras. As xornadas rematan con tres últimas conferencias. A primeira, ás 16.30 h., A animación á lectura na Web social, a cargo de Antonio Alonso, dinamizador da lectura escolar quen exporá a importancia da Internet na promoción e desenvolvemento das bibliotecas escolares. A segunda, As lecturas en galego no eido urbano, rural e virtual: a experiencia dos clubes de lectura de Pontevedra con Eva López, coordinadora dos Clubs de Lectura de Pontevedra, quen comparará os hábitos lectores do campo e da cidade. Por último, Carmen Loriga pechará as xornadas Espazos Lectores ás 19.00 h. con Facer lectores e lectoras no ámbito familiar. A psicóloga e responsable da Biblioteca Escolar no CIFP Ánxel Casal incidirá na necesidade de que os pais lles inculquen aos pequenos o afán lector.

[Máis información]

O gañador do I Premio Xerais Carlos G. Reigosa actuou como mantedor literario e Tino Baz puxo a banda sonora ao evento

O xardín das pedras flotantes, de Manuel Lourenzo González; A cabeza de Medusa, de Marilar Aleixandre e Xenaro e o misterio da mochilota verde de Mar Guerra Cid, gañadores dos Premios Xerais 2008

(08-Xuño-2008)

A illa de San Simón acolleu a celebración dos Premios Xerais 2008 nas súas tres categorías: a 25ª edición de Novela, a 23ª edición do Merlín de Literatura Infantil e a 3ª edición do Fundación Caixa Galicia de literatura xuvenil.

Tras unha breve presentación de Celia Torres, Directora de Promoción de Xerais, tomou a palabra Carlos G. Reigosa que na noite de onte participou como mantedor literario. Quen fora gañador da I edición do Xerais de Novela por Crime en Compostela destacou a importancia desta editorial nada en 1979 e a súa primeira aposta polos valores máis novos e prometedores da narrativa galega. Ao remate, a poderosa voz que parece brotar da propia terra de Tino Baz, acompañado pola súa zanfona deu paso ás valoracións dos diferentes xurados.

O xurado do Premio Merlín decidiu outorgar o premio por unanimidade á obra Xenaro e o misterio da mochilota verde, ópera prima de Mar Guerra Cid. O xurado destacou a "habilidade de artellar unha intriga, creando unha serie de personaxes entrañables e sabiamente retratados" e a "orixinalidade no tratamento de valores como a amizade, a relación familiar, a comprensión da diversidade ou as relacións afectivas". A autora sinalou a importancia de "reivindicar a diferenza, que non significa ser raro ou estraño, senón ser especial". O xurado recomendou á editorial a publicación da obra finalista Paspallás azul.

A escritora, poeta e bióloga Marilar Aleixandre fíxose por unanimidade e con A cabeza de Medusa, co premio da III edición da Fundación Caixa Galicia de literatura xuvenil. "Unha historia de solidariedade, de amizade, onde a esperanza enche as páxinas dunha obra comprometida que aborda con rigor e coñecemento un tema difícil como é a violencia, neste caso sexual, exercida contra as mulleres". O xurado salientou "a valentía, a claridade e tenrura" deste libro. A autora basease nunha historia real, a dobre violación dunhas rapazas e a busca de vencer o medo, a vergoña, a través do amor.

O libro comeza co descubrimento do primeiro Hamlet e supón unha homenaxe ao teatro shakesperiano

O globo de Shakespeare, de Santiago Jaureguizar, galardoado na VIII edición do Terra de Melide

(07-Xuño-2008)

O xurado do VIII Certame de Creación Literaria Terra de Melide, integrado nesta edición por Manuel Bragado, Antón Pedreira, Xesús Manuel Marcos, Óscar Sánchez e Xaquín Vázquez, coa presidencia da alcaldesa de Melide Socorro Cea, decidiu outorgar por maioría ao xornalista e escritor asentado en Lugo Santiago Jaureguizar o premio pola súa obra O globo de Shakespeare.

En O globo de Shakespeare Jaureguizar fai unha homenaxe ao teatro shakesperiano nun libro que comeza co descubrimento do manuscrito do primeiro Hamlet, que levaba perdido dende finais do século XVI nun pazo do Ribadeo do século XXI e altera a vida dos seus tres habitantes: o titiriteiro Ricardo, o pintor Leandro e a ama de chaves Celia. Paralelamente, asistimos á rutura do matrimonio dun escritor de éxito, afectado tamén pola mudanza nas relacións de poder entre os personaxes do pazo. Na farsa concorren asemade unha prostituta que continúa exercendo porque se sente soa e un actor secundario de western obsesionado con matar a un ex presidente español porque o goberno que presidía promulgou unha lei do cinema que, na súa percepción, deixouno sen traballo.

Santiago Jaureguizar é autor de títulos como Breve crónica universal da clase obreira (Premio Lueiro Rey 2001, Sotelo Blanco Edicións), Casa Skylab (Premio Xerais 2003, Xerais), Cabaret Voltaire (Premio García Barros 2005, Galaxia) ou A cova das vacas mortas (Xerais) que no ano 2006 foi galardoada co Premio Fundación Caixa Galicia.

Todos os días 7 de xuño teñen un Melide un marcado carácter cultural dende que un 7 de xuño, de 1933, a editorial Nós sacase á luz o libro Terra de Melide, aínda hoxe considerado unha xoia da etnografía desta comarca do interior de Galicia. Ao fío desta simbólica data, o Concello de Melide falla cada ano o Certame de Creación Literaria Terra de Melide, que este ano chega á súa oitava edición. A lúa dos Everglades (Xerais) de Xesús Manuel Marcos foi a obra gañadora da última edición.

Barsowia, APB e Tanque Familiar entre outros cómics estarán presentes no MoCCA nun dos festivais de banda deseñada independente dos EUA

Polaqia achega a banda deseñada galega a Nova Iorque

(06-Xuño-2008)

Froito do encontro de dous colectivos de autores de banda deseñada, desde EE.UU. Calavera Comics e desde Galicia Polaqia, o 7 e 8 de xuño, os cómics editados por Polaqia estarán á venta no MoCCA, o Museo do Cómic de Nova Iorque, no transcurso dun dos festivais de banda deseñada independente máis importantes de EE.UU, sendo esta, a primeira vez que diferentes publicacións de autores galegos como APB, Tanque Familiar, Pinche Mundo ou o propio Barsowia, entre outros títulos da vintena que conforman o catálogo de Polaqia ata a data, poderán adquirirse en EE.UU., e nun marco tan prestixioso como é o MoCCA.

E tamén grazas a isto este agosto, en Viñetas del Atlántico, que se desenvolverá na Coruña entre os días 11 e 17 de agosto, poderanse adquirir os cómics que Calavera edita, inéditos no Estado Español hoxe, no stand de Polaqia, no que se considera como o primeiro paso dunha colaboración fructífera entre ambos os dous colectivos.

Para vestir de gala a ocasión, no MoCCA exhibirase un cartel realizado entre Alexis Ziritt –membro de Calavera Comics- e David Rubín –membro de Polaqia- cuxa función é dar coñecer ao lector estadounidense en que consiste Polaqia, que é, de onde e por quén está conformado o colectivo.

Desde Polaqia afirman que “este pequeno paso, dado con forza e independencia, é un gran avance e unha mostra máis de que para o cómic galego non hai fronteira que se lle resista, e reafirmámonos na nosa idea de que buscar novos camiños dentro dun medio tan rico como o cómic, e non axustarse a fórmulas unha e mil veces vistas, é a verdadeira chave para chamar a atención, abrir portas e camiños tanto para a colaboración como para a internacionalización da banda deseñada galega, e, o que é máis importante, crear lectores fieis para o medio”.

Polaqia é un colectivo de creadores formado na actualidade por Roque Romero, Kike Benlloch, Diego Blanco, Álvaro López, Luís Sendón, Sergio Covelo, David Rubín, José Domingo, Hugo Covelo, Brais Rodríguez, Bernal, Emma Ríos. Funciona en base a recursos propios e nel pódense encontrar, ademais do "Barsowia", cómics de autores concretos como "A prueba de balas", "38", "Tanque familiar" e "Corazón de tormentas". Máis da metade dos cómics -que superan a vintena- de Polaqia saen en galego e os restantes en castelán.

Xa está dispoñible o proxecto As bases da banda

BD Banda abre BDagoxía, un espazo dirixido a potenciar as posibilidades da banda deseñada con fins didácticos e lúdicos

(05-Xuño-2008)

BD Banda abre na súa web BDagoxía, un espazo destinado especificamente a educadores, bibliotecarios, técnicos culturais, animadores socioculturais e todo tipo de profesionais interesados en aproveitar as posibilidades da banda deseñada para os seus proxectos en libre acceso e difusión. BDagoxia actualizará periodicamente a súa lista de recursos e fornecerá ademais información sobre cursos, conferencias e iniciativas puntuais que toquen estes temas.

Xa está dispoñible na súa web o proxecto íntegro As bases da banda, unha exposición que, realizada en colaboración coa Dirección Xeral e Creación e Difusión Cultural, xa percorreu diferentes centros de ensino do país amosando os elementos técnicos e narrativos e mais a historia da novena arte ademais de propor, na guía didáctica anexa, un feixe de actividades para se introducir en aspectos que van desde a narración ou a creación de personaxes ata a crítica ou a autoedición.

Segundo informan o obxectivo é falar de como se pode empregar a novena arte para transmitir coñecementos e realizar intervencións de todo tipo no noso tecido sociocultural. Bibliotecas, centros de ensino, ludotecas, centros socioculturais, espazos asociativos… xa que as posibilidades de empregar a BD con fins didácticos e lúdicos van moi para alén de obradoiros nos que se ensina a debuxar. Falar de dinámicas de dinamización, de actividades parateatrais, de narración, de comprensión lectora, de atención á diversidade e de moitas outras áreas nas que a BD pode ser unha ferramenta idónea para tratar calquera tema.

 [BDagoxía]

Esta mostra percorre e analiza as facetas vitais do autor homenaxeado nas Letras Galegas deste ano

A exposición A palabra e os días dá o salto á rede

(04-Xuño-2008)

A Casa Galega da Cultura de Vigo acolleu dende o luns 21 de abril e ata o 25 de maio deste ano a exposición A palabra e os días. Homenaxe a Xosé Mª Álvarez Blázquez, organizada pola Editorial Galaxia e patrocinada pola Consellería de Cultura e Deporte da Xunta de Galicia. Esta mostra levou aos visitantes que se acercaron unha viaxe pola biografía e a obra dun autor fundamental na edición galega. A exposición incide na súa figura atendendo ás súas múltiples facetas vitais e creativas, mostrando ó poeta, pero tamén ó investigador e ó cronista.

Unha vez rematada A palabra e os días en formato físico, a Editorial Galaxia colga na súa web os paneis da exposición e un punto interactivo sobre a súa vida e obra. Os internautas teñen a oportunidade de navegar polos paneis da exposición celebrada en Vigo e que agora comeza a súa itinerancia por toda Galicia ata fin de ano.

Ao acceder ao menu, o visitante terá a posibilidade de contemplar os paneis que formaron parte da exposición, e que nos levan a unha viaxe virtual que arranca en Tui no ano 1915 e que chega ata a súa morte, en Vigo, no ano 1985. Todas as facetas vitais do autor homenaxeado co Día das Letras 2008 son tratadas aquí: o poeta, o narrador, o arqueólogo, o editor… Ao mesmo tempo, desde a web accédese a un Punto Interactivo que dá paso á biografía, bibliografía de e sobre Álvarez Blázquez, un paseo polo seu tempo vital, así como unha ampla mostra documental do seu importante labor como editor.

 [A palabra e os días]

Está prevista a participación de 47 artistas enter escritores, pintores e escultores

O Concello de Brión lembra a Blanco Amor no III Encontro coa Arte

(03-Xuño-2008)

A Concellería de Cultura e Xuventude do Concello de Brión dedica ao escritor ourensán Eduardo Blanco Amor o III Encontro coa Arte.

Do venres 6 de xuño ata o domingo 8 xuntaranse un total de 47 artistas, escritores, pintores ou escultores, nunhas xornadas onde se tratará a figura e o legado do autor d'A esmorga.

Programa.

Venres 6 de xuño

13.45 h. Inauguración no Centro Social Polivalente da exposición "A ollada do desexo". Obra fotográfica 1933-1973 de Eduardo Blanco Amor.

17.00 h. Primeira xornada de pintura ao natural na Carballeira de Santa Minia (Pedrouzos).

20.15 h. Inauguración no Hotel-Balneario de Compostela (O Tremo-Os Ánxeles) da exposición das obras doadas polos artistas participantes no II Encontro coa Arte: "Lembrando a Cunqueiro", celebrado en xuño do 2007.

Sábado 7 de xuño

9.00 h. Almorzo

10.00 h. Desprazamento en autocar a Parroquia de Luaña, para realizar as obras do segundo día de Pintura do natural.

16.30 h. Xantar

17.00 h.-19.00 h. Tempo libre para pintar o cadro de intercambio. Entregarase aos artistas un lenzo de pequeno formato, que pintarán con temática libre. O artista que desexe realizar o cadro noutro tipo de soporte, pode facelo. Estas obras serán sorteadas entre os propios artistas participantes o día seguinte no xantar de irmandade e despedida.

19.00 h. Regreso en autocar a Casa da Cultura para a entrega das obras pintadas pola mañá. Exposición e faladoiro das obras realizadas quedando expostas ao público.

22.00 h. Cea

Faladoiro: Manuel Guede Oliva “Blanco Amor e o Teatro.
Tempo de poesía: Eva Veiga, Carlos Pereira e Pablo Bouza.
Actuación musicalO venres 6

Domingo 8 de xuño

Terceira xornada de pintura ao natural no Río Pego (Brión)

As dúas exposicións: "A ollada do desexo" e "Lembrando a Cunqueiro" permanecerán abertas ao público ata o 30 de xuño.

Pódese participar nas categorías de micro´relatos, micro-poemas ou micro-curtas

A Coruña celebra o seu VIII centenario cos premios Microcoruñas

(03-Xuño-2008)

Con motivo da celebración do VIII Centenario da Coruña, o Concello convoca os premios microcoruñas.

Os participantes poden participar en calquera das seguintes categorías:

- Micro-relatos de 240 caracteres (en galego ou en castelán)

- Micro-poemas de 8 versos (en galego ou en castelán)

- Micro-curtas de 80 segundos (en galego ou en castelán)

As obras participantes deberán ser inéditas e ten que gardar relación coa cidade da Coruña e o seu contorno. Calquera persoa poderá participar, sempre que a súa obra sexa inédita e garde relación coa cidade da Coruña e o seu contorno.

O prazo de admisión remata o 18 de xuño e os premios consistirán en tarxeta-regalo cambiable por valor de 800 €.

 [Máis información e bases do concurso]

Lareira Literaria

Beatriz Dacosta e Vítor Vaqueiro na Lareira Literaria de xuño

(03-Xuño-2008)

Beatriz Dacosta e Vítor Vaqueiro cóntanos ás súas novidades e proxectos sobre vindeiros libros e traballos.

Beatriz Dacosta, despois dun longo silencio literario de catro anos tras Contrato temporal (Francka Editora) volve ao pracer da escrita cun feixe de relatos curtos, xénero xa traballado en Cascas de noz (Galaxia). Entre os seus proxectos tamén está o retomar unha novela en estado de suspensión desde hai anos.

Pola súa banda, Vítor Vaqueiro está a piques de publicar en Galaxia Os ollos do tempo,unha novela onde profundiza sobre cuestións como as de verdade, realidade, ficción, imaxe e dobre, empregando como fío condutor a fotografía e o cinema. O autor vigués ten unha consolidada traxectoria como narrador, poeta e divulgador da cultura e da fotografía do país.

 [Lareira Literaria]