A Fundación Castelao elaborará un catálogo dixital que estará dispoñible no Arquivo Nacional

A Fundación Castelao e a Consellería de Cultura asinan un convenio para a catalogación universal de Castelao

(31-Xullo-2008)

O Consello da Xunta vén de autorizar o convenio de colaboración entre a Consellería de Cultura e Deporte e a Fundación Castelao que vai permitir a catalogación universal da obra do escritor rianxeiro. A ratificación deste acordo supón o comezo dunha das labores de compilación máis difíciles, debido ás características da obra deste escritor: moi ampla e diversa así como repartida por diferentes países.

A dificultade de localización e compilación de todo o material creativo do escritor galego, así como de fotografías ou gravacións nas que apareza, levou á consellaría a investir 300.000 euros neste convenio, mentres que a Fundación Castelao se comprometeu a elaborar un catálogo dixital que estará a disposición do público no Arquivo Nacional da Cidade da Cultura.

O proxecto, coordinado polo vicepresidente da Fundación, o historiador Miguel Anxo Seixas Seoane, conta cun grupo de 5 especialistas que está acudindo tanto a institucións públicas coma privadas que garden parte da obra do galeguista, a hemerotecas xornalísticas e mesmo coñecidos na procura da obra inédita dun dos pais do nacionalismo galego.

A obra do rianxeiro está integrada por colaboracións literarias, creacións en prosa, textos teatrais, artigos, discursos parlamentarios, cartas, manuscritos, debuxos... pero ademais repartidos polos lugares nos que foi transcorrendo a súa vida: Galicia, Madrid, Arxentina, Estados Unidos, Cuba, Montevideo, México, Chile ou Venezuela.

Para garantir a máxima rigorosidade no estudo e a compilación o máis exhaustiva posible, o equipo integrante desta investigación dividiuse entre 5 cidades ao longo deste ano para estudar o paso e creación de Castelao por elas. Unha é Vigo, onde se quere verificar o que hai deste autor na Fundación Penzol, con especial interese na densa variedade de colaboracións que desenvolveu con distintas publicacións, como El Barbero Municipal, Vida Gallega, A Nosa Terra, Nós, El Pueblo Gallego... e tamén para recoller os case 800 debuxos publicados en Faro de Vigo e o xornal Galicia.

Outro dos puntos é Santiago de Compostela, de onde se extraerá material gardado entre a Biblioteca Xeral, a Facultade de Xeografía e Historia e o Instituto Padre Sarmiento. Na Coruña a investigación desenvólvese nos fondos do Museo de Belas Artes, da Real Academia Galega e da Fundación Caixa Galicia; mentres que en Lugo o estudo desprázase ao Museo de Lugo e a Biblioteca Provincial.

Complétase o percorrido vital do galeguista cunha última parada onde tamén deixou a súa pegada: Madrid. Os lugares onde se atopan pezas de Castelao son o Arquivo de Alcalá de Henares e a Biblioteca Nacional, que ata agora tiña o privilexio de ser a única que custodiaba pezas de Castelao en exclusiva.

Durante o vindeiro ano, a investigación cruza o Atlántico para analizar a actividade do galeguista no exilio, onde se espera atopar a metade da súa obra, da que se calcula existen cerca de 3.000 pezas por todo o mundo.

A compilación da obra de Castelao é unha das iniciativas máis importantes para a Consellaría de Cultura polo que ten de salvagarda do patrimonio cultural galego disperso na diáspora.

O escritor verinense Xosé Carlos Caneiro pechará o Festival cun recital do seu último libro A vida nova de Madame Bovary

O Concello de Verín organiza o III Festival Internacional da Palabra, que nesta edición contará cunha ducia de actuacións

(30-Xullo-2008)

Unha ducia de actuacións para os públicos máis diversos, coa palabra como  motivo vertebrador, desenvolveranse en Verín, entre xoves día 31 de xullo e o domingo día 3 de agosto, na 3ª edición do Festival Internacional da Palabra. A actuación da compañía barcelonesa Teatre Arca e un concerto-homenaxe ao músico popular Manuel Rodríguez “Manoliño” destacan nunha programación que se clausurará a última hora do domingo día 3 co recital-presentación do libro A vida nova de Madame Bovary (Galaxia) do autor verinense Xosé Carlos Caneiro.

Xéneros tan diversos como o cabaré, o teatro de fantoches ou as artes plásticas intégranse nun programa que protagonizan creadores e intérpretes galegos, portugueses e de Castela-León; aínda que participen artistas dunha ducia de países. Cinco actos de narrativa oral nos que intervirán media ducia de contadores de Brasil, Portugal, Zamora e Galicia, catro presentacións de libros en lingua galega, portuguesa e española, e a actuación dun  recitador ambulante de poemas son os actos nos que a palabra é protagonista dentro da súa vertente máis tradicional ou literaria. Un cabaré ambulante, cunha banda de jazz e sete actores en escena, servirá como contrapunto a este maratón que converterá a Verín durante catro días en centro das relacións en directo das producións culturais en lingua castelá, portuguesa e galega.

O Festival Internacional da Palabra está organizado polo Concello de Verín e conta coa colaboración,  no ámbito institucional, do Instituto Camoes de Portugal, a Deputación Provincial de Ourense, a Cámara Municipal de Chaves e o Concello de Fene. BioCoop, o Consello Regulador da D.O. Monterrei, a Pastelería Primavera e diversos negocios de hostalería son algunhas das empresas da comarca que apoian este festival, que ten un orzamento global arredor dos 10.000 euros.

 [Programa na Axenda]

Cidades e literatura, conferencias, verbas na rúa, presentacións de libros e a resolución do premio Microcoruñas acompañarán os actos propios da XXXVII Feira do Libro

A Coruña convertirase en cidade literaria conmemorando os seu 800 Aniversario

(30-Xullo-2008)

Entre os días 1 e 10 de agosto A Coruña será escenario de distintos eventos e actividades relacionados coa literatura que terán o 800 aniversario do outorgamento da Carta Puebla como ixo común. O programa, baixo o nome 'A cidade literaria no VIII Centenario', pon en valor á cidade como referente das letras galegas e discorrerá en paralelo á realización da XXXVII Feira do Libro da Coruña, que nesas mesmas datas se celebrará na cidade.

As actividades programadas son:

Marinedas. Literatura e cidades, cidades e literatura

Non hai mellor homenaxe a unha cidade que darlle como regalo a inmortalidade literaria. Retratar as súas xentes e os seus costumes, empregar como escenario as súas rúas e como argumento as súas anécdotas, contos e acontecementos para construír unha obra universal, capaz de conmover a calquera lector alí onde se atope, é concederlle a grandeza da permanencia no tempo.

Con permiso de dona Emilia Pardo Bazán, utilizamos o sobrenome literario máis universal da nosa cidade, Marineda, para este ciclo de conferencias coordinado polo escritor Pedro A. Ramos García e dedicado a facer un percorrido por tres cidades moi especiais, tres cidades literarias: A Coruña, Madrid e Barcelona.

Conferencias (Ás 21.00 h.)

Venres 1: Pasado e presente dunha cidade literaria: A Coruña. Relator: Xulia Souto

Sábado 2: O Madrid de Historias do Kronen. Relator: José Ángel Mañas

Xoves 7: A Barcelona negra e mediterránea de Vázquez Montalbán. Relator: Paco Camarasa

Venres 8: A odisea coruñesa. Relator: Manuel Rivas

Lugar: Carpa da Feira do Libro da Coruña. Xardíns de Méndez Núñez

Verbas na rúa

A cidade da Coruña ten a sorte, ao longo da súa historia, de contar con numerosos escritores e poetas que a retrataron nos seus versos e nas súas prosas tanto en galego como en castelán. Emilia Pardo Bazán, Wenceslao Fernández Flórez, Lorenzo Varela, Curros Enríquez, Rosalía de Castro, González Garcés, Tomás Barros, Álvarez Torneiro, Eduardo Pondal, Luisa Villalta, Darío Xoán Cabana, Luz Pozo Garza, Cesáreo Sánchez, Ánxeles Penas, Lino Braxe, Fernán Vello, Francisco Salinas, Xosé M. Martínez Oca, Antonio Riveiro Coello, Alfredo Conde, Xavier Seoane, César Antonio Molina, Luis Rei Núñez, Xurxo Souto, Manuel Rivas e moitos outros, coñecidos ou anónimos, dedicaron esforzo, amor e paixón en trasladar a papel as mil e unha Coruñas posibles.

Agora devolvemos as súas palabras a eses lugares. Poesía, narrativa e historia na rúa. Verbas na rúa. En distintos lugares da cidade colocaranse no chan frases alusivas, poemas e prosas dedicadas á cidade. Outra forma de coñecer e ler A Coruña.

Premios Microcoruñas

Entrega dos premios do certame Microcoruñas ao que se presentaron 170 propostas entre as tres categorías: micropoemas, microrrelatos e microcurtas relacionados coa cidade coruñesa e que conta coa colaboración de FNAC Coruña.

Os membros do xurado son Marta Otero, Miguel Anxo Fernán Vello, Ana Abelenda e Manolo Lourenzo.

- Lugar: Fundación Luís Seoane

- Día: sábado 9 de agosto ás 20.30 h.

Presentación de libros

Con motivo da realización do VIII Centenario da cidade da Coruña, o Concello en colaboración con distintas editoriais, publica diversos libros dedicados especialmente á cidade que serán presentados na Fundación Luís Seoane:

- Alfonso IX e Crunia

- Poemas coruñeses. Antoloxía de textos poéticos dos séculos XIX e XX sobre A Coruña

- A Coruña nos textos dos viaxeiros. Séculos XVIII, XIX e XX.

O autubús estará acompañado por varias ciclobibliotecas para o público máis novo

Un autubús percorrerá este verán as praias galegas para fomentar a lectura

(29-Xullo-2008)

A conselleira de Cultura, Ánxela Bugallo, e o director xeral de Creación Difusión Cultural, Luís Bará, presentaron está mañá na Coruña "Máis libros, máis libres", unha campaña de nimación á lectura que percorrerá varias cidades e vilas galegas para achegar ás praias o pracer polo libro e a lectura.

Durante este verán un autobús percorrerá a costa galega e tamén as praias fluviais do interior achegando libros de diferentes xéneros e para todas as idades. Estará acompañado por varias "ciclobibliotecas" con contacontos e outras actividades de dinamización para os máis novos.

O autobús de "Máis libros, máis libres" comeza a súa viaxe hoxe na praia de Riazor, de onde partirá para levar a literatura ata Ribadeo (praia dos Castros), Viveiro (praia de Covas), Foz (praia da Rapadoira), Ferrol (praia Doniños, zona de Outeiro), Carballo (praia de Razo), Boiro (praia Barraña), Vilagarcía (centro da vila), O Grove (centro da vila), Pontevedra (centro da vila), Cangas (praia Rodeira), Vigo (Samil), e ata as praias fluviais de Ourense, Allariz e O Barco. Ademais, o bus vai estar tanto pola mañá (de 10 a 14h) coma pola tarde (de 16 a 20h) a difundindo literatura para chegar ao maior número posible de lectores.

Esta iniciativa da Dirección Xeral de Creación e Difusión Cultural encádrase dentro do Plan da Lectura, que presentou Ánxela Bugallo no Parlamento en outubro. O plan ordena por primeira vez de forma integral todos os esforzos que se realizan para incrementar o hábito da lectura e fortalecer todos os actores do sector, desde libreiros a bibliotecas ou editores, para o que se prevé un investimento total de 50 millóns de euros até o ano 2011. O Plan da Lectura é unha obriga que se deriva da Lei do Libro e da Lectura, que entrou en vigor a finais de xaneiro, para ordenar este sector de grande importancia cultural e económica. Para elaborar o Plan, a Consellería de Cultura mantivo un diálogo continuo con todas as partes implicadas.

O portugués é unha das figuras máis destacadas do panorama poético da segunda metade do século XX

Amadeu Batista gaña a XVI edición do Premio de Poesía Espiral Maior

(28-Xullo-2008)

O poeta portugués Amadeu Baptista venceu, por unanimidade, a XVI edición do Premio de Poesía Espiral Maior, coa obra Açougue, presentada baixo o lema de Francis Bacon.

O xurado, que estivo formado polos poetas Xosé María Álvarez Cáccamo, Xavier Rodríguez Baixeiras e o director da editorial, Miguel Anxo Fernán Vello, destacou a obra de Baptista como unha "proposta de grande interese poético e literario", amais de amosar unha poesía "limpa, natural e fluída". Sobre o contido subliñou a súa "capacidade de evocación do pasado" á vez que "ilumina unha especie de crónica colectiva do pobo portugués".

Nesta edición concorreron 206 traballos procedentes de Galicia, Portugal e Brasil e é un dos premios poéticos máis importantes do país e xa foi acadado por poetas como Yolanda Castaño, Xabier Seoane, Carlos Penela ou Rafael Lema.

Amadeu Baptista é un dos poetas máis importantes da segunda metade do século XX, con libros traducidos ao castelán, inglés ou francés, obtivo, entre outros galardóns, o Prémio de Poesia e Ficção de Almada, o Prémio Nacional de Poesia Natércia Freire, o Prémio Internacional de Poesia Palavra Ibérica ou o Prémio Nacional Sebastião da Gama (en dúas ocasións).

Este premio, creado polo Real Coro "Toxos e Froles",  celebra o 150 aniversario da concesión do título de cidade ao Concello de Ferrol

Ferrol homenaxea co Premio Porto Magno a Ramiro Fonte

(24-Xullo-2008)

Como celebración do 150 aniversario da concesión do título de cidade ao Concello de Ferrol, o Real Coro "Toxos e Froles", decano dos coros históricos galegos, crea o premio Porto magno.

O xurado do Porto magno, entre os que figuran entre os seus membros Julia Uceda, Premio Nacional de Poesía; Miguel García Posadas, Presidente da Asociación Nacional de Críticos Literarios; Ramón Pernas, escritor e director da Fundación Ámbito Cultural; Ramón Loureiro, escritor e xornalista; Pedro Sanz, xornalista,mestre e presidente do Real Coro "Toxos e Froles"; Segundo Pérez López, Director do Instituto Teolóxico Compostelán; Félix Villares, cóengo de Mondoñedo e escritor; e varios membros da xunta directiva do Toxos acordou, por unanimidade, conceder este premio a Ramiro Fonte baixo estas palabras: "Gran poeta entre os mais grandes de sempre, en recoñecemento a toda a súa obra literaria, coa gratitude da Galicia do norte súa".

Este premio entregarase o día 28 ás 13.30 h. na Sala de Recepcións do Concello de Ferrol. No acto participarán o alcalde, Vicente Irisarri; a Concelleira de Cultura, Yolanda Díaz e o Presidente do "Toxos e Froles", Pedro Sanz. A continuación terá lugar a lectura da acta do xurado, a laudatio a cargo de Miguel García Posadas e a entrega do premio a Ramiro Fonte quen, xunto a Julia Uceda, procederán á lectura dalgúns poemas. Está esperada a presenza do Ministro de Cultura César Antonio Molina quen pechará o acto.

En 1983 publica o seu primeiro libro, As cidades da nada (Sociedad de Cultura Valle-Inclán)». Con Designium (Xerais) foi Premio da Crítica en Galicia e Premio Losada Diéguez de creación. Pasa un segredo (Xerais), de 1988, foi galardoado co Premio da Crítica Española. Foi gañador do Premio Esquío con Adeus Norte (Sociedad de Cultura Valle-Inclán) e Mínima moralidade (Deputación da Coruña) foi merecedor do González Garcés. Recentemente publicou As pontes do ceo (Xerais) coa que pechaba a triloxía "Vidas de infancia", coa que Ramiro Fonte decidiu emprender para reconstruír o Pontedeume da súa infancia.

Os seus poemas están presentes en numerosas antoloxías de poesía galega e peninsular.

Todos aqueles que desexen adherirse ao homenaxe a Ramiro Fonte do vindeiro luns, poden facelo enviando un correo electrónico ao enderezo amboage56@hotmail.com

Recitais poéticos e presentacións de libros encheran a Galería das Letras

O Festigal08 chega a súa sétima edición con 48 horas de letras, música, tendencias e diversidade

(23-Xullo-2008)

Durante os días 24 e 25 de xullo, o Campus Universitario Sur de Santiago de Compostela converterase nun grande océano cultural. Neste 2008 o Festigal chega a súa sétima edición e o celebra, baixo a dirección da Fundación Galiza Sempre e Galiza Nova, con 48 horas de música, tendencias e diversidade.

O Festigal está concebido como un escaparate cultural, onde a cultura galega e a internacional (tradicionalmente cunha especial atención aos países da lusofonía), manteñen un frutífero diálogo. Vai máis alá dun simple festival de música, xa que conta con charlas, mesas redondas e presentacións de libros -galería das ideas-, actuacións de maxia, tendas de artesanía, de libros, estreos audiovisuais... En base aos anos anteriores, está previsto que pasen 20.000 persoas ao longo dos dous días que dura o Festigal. Na organización participarán 200 persoas, contando os voluntarios. O Festigal contará con 40 postos de artesanía e tendas, 6 exposicións e 15 postos de xantar e bares. O recinto, que ocupará un total de 20.000 metros cadrados, contará con zona de acampamento, na que se instalarán, en torno a 160 tendas. Para a promoción do Festigal 2008, editaranse 20.000 programas, 15.000 cartaces e 50.000 folletos.

Na Galería das Letras desta edición participarán ás librarías Andel do libro (Vigo), A Palabra Perduda (Santiago) e Pedreira (Santiago) e as editoriais OQO, Rinoceronte, Urco, A Nosa Terra, Galaxia e a Lonxa Cultural amais de recitais de poesía e presentacións de libros.

 [Programa na Axenda]

 [Programa na web do Festigal08]

No marco da Feira o escritor local Xosé Vázquez Pintor falará sobre a súa obra Para dicir abril (Sotelo Blanco)

Melide acollerá esta fin de semana a I Feira do Libro no Camiño de Santiago

(23-Xullo-2008)

Por vez primeira os libreiros de Melide terán un día de homenaxe ao seu traballo e tamén un escaparate para a creación literaria da comarca. O Concello de Melide organiza esta fin de semana a I Feira do Libro no Camiño de Santiago, que centrará todos os seus actos na praza do Convento da vila.

Dende o sábado, ás 11.00 h. –hora de apertura da feira-, poderanse visitar as casetas de librarías instaladas na praza, onde ás 12.00 h., a escritora Mercedes Queixas pronunciará o pregón co que quedarán inaugurados dous días dunha feira literaria pioneira en Melide.

Entre as visitas ás casetas, está programada para as 13.00 h. do sábado a presentación da segunda novela da escritora Iria López Teixeiro, Santa Matriusca (Biblos). Será tamén no marco desta feira, o sábado, cando se realice a entrega de premios do I Concurso de Artes Plásticas do Concello de Melide, Os sons de Galiza, cuxos traballos finalistas poden visitarse durante estes días no Museo da Terra de Melide. A entrega de premios deste certame de pintura dará comezo ás 18.30 horas, no Salón de Plenos do Concello.

Para os máis pequenos, o sábado desenvolveranse talleres sobre ilustración e outros aspectos vencellados aos libros, así como unha sesión de contacontos a cargo de Santi Prego.

O equipo de goberno de Melide incluíu tamén na programación desta fin de semana varias actuacións musicais. A primeira delas, o sábado –Cantón de San Roque, 23.00 h.-, traerá a Melide ao grupo Sumrrá, que presentará na vila o seu terceiro traballo, co que se está a consolidar como grupo de referencia a nivel estatal pola calidade do seu jazz que conserva sempre a pegada galega.

As actividades con maior peso literario desta I Feira no Camiño de Santiago concentraranse na mañá do domingo 27. Ás 12.00 h., o director xeral de Edicións Xerais, Manuel Bragado, moderará unha mesa redonda na que participarán varios gañadores do Certame de Creación Literaria da Terra de Melide entre os anos 2000 e 2007.

Ao seu remate, o escritor Xosé Vázquez Pintor, que recentemente deu nome á biblioteca pública municipal da vila, estará na Feira do Libro para participar nun coloquio que xirará derredor da súa obra Para dicir abril (Sotelo Blanco). Xunto a Vázquez Pintor, estarán Ánxela Gracián, directora da Colección Medusa de Sotelo, onde o autor melidense publicou a súa obra, e tamén a escritora cubana Yanelis Velazco, autora da tese Xosé Vázquez Pintor: a memoria que reconstrúe un mundo.

A alcaldesa de Melide, Socorro Cea, avanzou que “quixemos con esta feira recoñecer o traballo das librarías de Melide, unilas nun proxecto común e dar un pulo á actividade literaria e creativa que sempre caracterizou á nosa comarca”. Así mesmo, a rexedora melidense destacou que “temos un programa ambicioso que traerá a Melide a figuras de referencia da literatura galega actual, ao tempo que queremos apostar por novos rostros e actividades que animen á xente nova a achegarse aos libros”.

Neste sentido, a Feira do Libro que organiza o Concello de Melide contará tamén o domingo con obradoiros, dirixidos polo ilustrador Xosé Tomás; contacontos coa compañía Seisdedos e contos de ciclobibliotecas con Anxo Moure. Amais, durante os dous días, o Concello de Melide sorteará entre os asistentes á feira lotes de libros. Nesta mesma liña de fomento da lectura, o Concello de Melide ten tamén a disposición dos usuarios das piscinas de Furelos o servizo de bibliopiscinas, grazas ao cal se poden consultar xornais e libros en servizo de préstamo nas propias instalacións das piscinas descubertas.

Dende a Concellaría de Cultura, a concelleira Conchi Castro destacou que “é unha aposta pioneira para o noso Concello, pero entendemos que os libros e a cultura non deben ficar ancorados nas grandes cidades, senón que é preciso tamén escoitar o que teñen que dicir as vilas coma Melide, nas que a actividade cultural é se cadra menos vistosa pero de gran calidade”.

A Feira do Libro poderá visitarse en horario de 11.00 h. a 14.00 h. e de 17.00 h. a 21.30 h., o sábado e o domingo, que se pechará coa actuación musical de Tino Baz, ás 21.30 h., na Praza do Convento.

O director de Rodeira incidiu na necesidade de profundizar na promoción exterior do gremio

Alfonso García Sanmartín volve a ser elixido como presidente da Asociación Galega de Editores

(23-Xullo-2008)

A Asociación Galega de Editores (AGE), reunida onte en Asamblea Xeral Extraordinaria para a elección dos cargos da súa Xunta Directiva para os dous próximos anos, decidiu por maioría reelixir como presidente a Alfonso García Sanmartín, director de Rodeira-Edebé, nunha aposta da asociación pola continuidade na liña de traballo desenvolvida nestes dous últimos anos.

O equipo directivo queda tamén configurado polo vicepresidente, Francisco Alonso (Edicións Xerais de Galicia); a secretaria, Ana Guerra Cañizo (Edicións Obradoiro); a tesoureira, Pilar Sampil (Editorial Galaxia) e cinco vogais: Francisco Villegas (Edicións do Cumio), Irene Penas (Everest Galicia), Antonio Balboa (Edicións Lóstrego), Consuelo Carreira (Sotelo Blanco Edicións) e Tucho Calvo (La Voz de Galicia).

No tocante ao futuro, o presidente reelixido Alfonso García Sanmartín incide na necesidade de profundizar na profesionalización do gremio, traballando no eido da promoción exterior e da interacción cos outros gremios galegos do ámbito do libro de cara a abordar no transcurso dos próximos meses os problemas que afectan en este momento ao sector. O presidente adiantou que o Simposio O Libro e a Lectura que anualmente celebra a AGE a finais de ano sobre temas relacionados co sector editorial vai abordar na súa quinta edición a visibilidade do libro galego no exterior e a súa proxección. Asemade informou de que se está estudiando a posibilidade da súa celebración na Feira Galega das Industrias Culturais, Culturgal, que terá lugar entre o 4 e 7 de decembro no Palacio de Exposicións e Congresos da Coruña.

Na Asamblea Xeral aprobouse a creación dunha nova comisión, a de axudas, que vai a coordinar Xelasio Suárez (Ir Indo Edicións), e que se unirá ás restantes comisións existentes na AGE: de publicacións; de estatutos, garantías e conflictos; de feiras e comercio exterior; de convenio das editoriais; de actos; e de gratuidade e libro de texto. Tamén se informou da axenda de traballo prevista na Bienal do Libro de São Paulo, a que está previsto que acuda a AGE cunha representación de editores no próximo mes de agosto.

Desde Celanova para o mundo

Onde o mundo se chama Celanova. Falamos galego en todos os idiomas

(22-Xullo-2008)

A poesía de Curros Enriquez, Celso Emilio Ferreiro e Méndez Ferrín, abandonará durante unhas horas o idioma galego no que foi creada para ser recitada en linguas do mundo como o árabe, eslovaco, hebreo, servo-croata, castelán, húngaro, alemán, inglés e asturiano.

O mércores 23 de xullo terá lugar, na horta da Casa Museo de Curros Enriquez (Casa dos Poetas), un acto de homenaxe aos poetas da Terra de Celanova nun acto organizado pola Fundación Curros Enríquez, o Concello de Celanova, as Redes Escarlatas e a Universidade de Vigo baixo o título "Onde o mundo se chama Celanova. Falamos galego en todos os idiomas".

Unha vez finalizado o recitado a cargo dos alumnos do curso aos que sumarán tradutores de Curros, Celso Emilio e Méndez Ferrín noutras linguas, como éuscaro, francés ou sardo, a música da cantante de fados María do Ceu e do grupo de gaitas de Allariz, pechará o acto.

Bandeira contará a partires de mañá cunha rúa co seu nome

Silleda lembra ao escritor e político Ramón de Valenzuela

(22-Xullo-2008)

Ramón de Valenzuela Otero foi un escritor e político silledense. Aos vinte e un anos incorpórase ás Mocidades Galeguistas, da que será conselleiro da zona Lalín-A Estrada. Xunto a Castelao e a Víctor Casas participa en mitins do Partido Galeguista. Tras ser detido en agosto do 36, consegue saír da cadea para enrolarse no bando fascista, do que rapidamente deserta para poñerse ás ordes de Enrique Líster.

En 1939 marcha a Francia e dez anos despois a Arxentina, onde desempeña unha importante labor cultural. En 1966 volve a Madrid onde mantivo contacto co grupo Brais Pinto.

Publicou dúas novelas autobiográficas, en Non agardei por ninguén relata os acontecementos desde 1936 ata o seu paso ás filas republicanas, que tería a súa continuación en Era tempo de apandar. As bágoas do demo é unha mostra do seu traballo teatral. En 1974 publica o libro de relatos O Naranxo e de 1976 é a súa Historia do galeguismo político.

O 24 de abril o pleno do concello silledense acordou cambiar o nome da Rúa Iryda de Bandeira pola de Ramón de Valenzuela. Mañá celebrarase un xornada de actos en lembranza. O programa da xornada,`Unha rúa na súa vila´, comezará ás 20.00 h. cun acto cívico na Praza da Feira da Bandeira coa participación de Mariví Villaverde (viúva do autor); Xosé Neira Vilas (escritor e académico) e Luís Bará (Director Xeral de Creación e Difusión Cultural). Logo procederase á inauguración da Rúa Ramón de Valenzuela. Ás 21.00 h. haberá un acto de homenaxe na Casa da Viña, parroquia de Manduas coa descuberta dunha placa conmemorativa na casa natal.

Esta xornada de lembranza está organizada por Adellís asociación socio-cultural - Comisión pola Memoria Siñor Afranio.

 [Cartaz co programa]

Con Raida Rodríguez, Martín Veiga, Samuel Solleiro e Xavier Queipo

A Galería Sargadelos da Coruña acolle entre o 22 de xullo e o 12 de agosto o Ciclo dos a-fora(s)

(20-Xullo-2008)

Raida Rodríguez, Martín Veiga, Samuel Solleiro e Xavier Queipo. Catro autores para falar da relación centro/periferia a través dos desprazamentos dende un lugar natal (Galicia) a outro en principio alleo.

A Galería Sargadelos da Coruña acollerá entre o 22 de xullo e o 12 de agosto o ciclo dos a-fora(s). Claudio Pato, director da Galería Sargadelos da Coruña apunta que "esta idea dos a-fóra (s) non só formula  problemas ligados aos desprazamentos demográficos por condicións de explotación dos hábitats (tal vez só podamos falar xa dun único hábitat) e polas condicións de fame que subseguen. Pois traza ao tempo unha posibilidade de tirar desa carencia todo un idioma da excelencia, toda unha arte do común, unha fala que se produce na non distancia".

PROGRAMA

22 de xullo (20.00 h.). Poesía sen poemas: ningún lugar  nos é común, ningunha posibilidade nos é allea. Con Raida Rodríguez, Eva Méndez do Roxo e Carles-Lluís Pallarès.

O suxeito poético é unha utopía.

Non hai un poder unificado, o poder está disperso, por iso non se pode conquistar, dí Sadie Plant.

Pero pódese perverter. Na palabra. A que xorde da dor da escisión. A que desexa. Desexo de vida. Alleo a calquera horizonte de sentido.

29 de xullo (20.00 h.). Poesía e periferia. Con Martín Veiga.

6 de agosto (20.00 h.). No mundo hai moitos anos. Con Samuel Solleiro.

A figura do galego nas Antillas, a soa posibilidade da figura dun galego nas Antillas, é un fruto recente da globalización, diferente desoutras figuras clásicas: a persoa da periferia que visita o centro (emigración) ou a persoa do centro que visita a periferia (exilio ou cousas peores). Hoxe é posíbel esa inmediatez no paso dunha periferia a outra. Agora ben, xorden as dúbidas: podemos realmente subestimar o papel dos centros xeopolíticos nestas situacións? A experiencia da periferia é a mesma aquí e aló? Cal podería ser o papel das outras periferias na nosa escrita futura? Somos, enfín, negros os galegos?

12 de agosto (20.00 h.). Na procura de coordenadas. Con Xavier Queipo

Aprenderannos os puntos cardinais. O tempo levounos a percibir outras dimensións. Iso segundo adoptemos o punto de vista da introspección, a condición de animais terrestres, o noso lugar no espazo, a orientación nos mapas, a nosa percepción do mundo, a memoria filoxenética ou a experiencia propia de navegantes verdadeiros ou falsos. Velaí a delimitación do universo propio.

Onte foi presentado por representantes da Consellería de Cultura, do Concello da Coruña, das Industrias Culturais Galegas e polo director da feira

A II edición de Cultur.gal celebrarase entre os días 4 e 7 de decembro no Palexco da Coruña

(19-Xullo-2008)

A conselleira de Cultura e Deporte, Ánxela Bugallo, o director xeral de Creación e Difusión Cultural, Luís Bará, a concelleira de Cultura da Coruña, María Xosé Bravo, un representante das industrias culturais galegas, Fran Alonso, e o director da feira, Nel Vidal, presentaron onte a Feira Galega das Industrias Culturais, Cultur.gal 08, rodeados por diversos representantes do sector da creación cultural en Galicia.

A cita das empresas galegas dedicadas ao mundo da produción e divulgación de contidos culturais terá lugar entre os días 4 e 7 de decembro no Palacio de Exposicións e Congresos da Coruña. A Feira comezara a súa andadura en maio do ano pasado no Pazo de Congresos e Exposicións de Pontevedra.

A consellería de Cultura e Deporte promove esta segunda edición, na que se conta coa participación na organización das diversas entidades sectoriais das industrias culturais galegas. Procúrase aumentar a participación de profesionais na feira, pero tamén do público en xeral, para dar a coñecer como se artella o sector e facer máis visíbel a actuación destas empresas.

Ademais, Cultur.gal 08 proponse un obxectivo máis ambicioso: constituírse nunha plataforma que se erixa en referencia anual imprescindíbel para os profesionais do sector e persoas implicadas no mundo da cultura. Un punto de encontro que lle dea maior impulso e proxección ás creacións galegas.

A feira ofrece unha visión integral da produción de contidos culturais en Galicia incluíndo todos os ámbitos de manifestación creativa: as artes escénicas, o audiovisual, o libro , a música, as novas tecnoloxías para a cultura e o lecer así como os servizos socioculturais. Ademais, este encontro tamén recoñecerá a importancia do deseño gráfico, da publicidade, das artes visuais ou da serigrafía como sectores implicados no noso desenvolvemento cultural.

Máis aló das actividades destinadas ao público profesional, Cultur.gal 08 abre as súas instalacións aos visitantes en xeral como forma de achegar a nosa ampla oferta cultural a todos os galegos. De feito, programouse un conxunto de actividades específico para os curiosos que queiran achegarse ata Palexco: actuacións musicais, proxeccións, obradoiros, presentacións de libros, discos, actividades infantís, mesas redondas...

Desta maneira, Cultur.gal 08 supón unha oportunidade única para que o público en xeral coñeza como se artellan as industrias culturais galegas e entre en contacto e se implique coa produción de contidos propios.

 [Dossier Culturgal.08]

A gañadora, Berta Dávila, publicou recentemente o poemario Corpo baleiro (Espiral Maior)

Unha obra sobre a Xeración Xabarín gañadora do IV Premio Biblos-Pazos de Galicia

(19-Xullo-2008)

Unha compostelá de 21 anos residente na Coruña, Berta Dávila Fernández, é a gañadora do 4º Premio Biblos-Pazos de Galicia para menores de 25 anos que se fallou no transcurso dunha cea literaria que se desenvolveu na noite de onte na Casa Grande do Bachao, preto de Santiago, con asistencia de máis dun cento de persoas representativas do mundo literario e cultural galego e con convidados doutros lugares do mundo.

Estudante de Filoloxía Hispánica na Coruña, a autora ofrécenos en Bailarei sobre a túa tumba (título provisional da obra galardoada) un proxecto que, segundo o xurado, «pode cualificarse de ambicioso e dunha sorprendente madurez». A autora tenta «recoller o xeito de ver o mundo e de enfrontarse á vida dos membros da que ela chama a "xeración Xabarín", é dicir, a dos mozos e mozas que naceron na década dos oitenta e "viron os xogos olímpicos na tele, pero non se lembran demasiado"».

O tema elixido resulta moi atraente por moitas razóns. Porque o feito de que o retrato dunha xeración a través duns poucos personaxes sexa un dos máis frecuentes na literatura, lonxe de restarlle méritos, dálle aínda maior interese á proposta de Berta Dávila,pois cada xeración ten o seu xeito específico de enfrontarse ao mundo e á vida, un xeito que sempre é orixinal e irrepetible. A dicir do xurado, que tivo como secretario a Agustín Fernández Paz, que tutelará á gañadora deste ano, «se o tema ten interese, non o ten menos a forma de narrar que Berta Dávila nos descobre na selección de páxinas do texto que presenta: hai unha madurez no emprego das estratexias narradoras, uns diálogos cargados de vida, un intento de trasladar á escrita o ton vital e os rexistros lingüísticos desta xeración de mozos e mozas que viven agora a década dos vinte anos».

O xurado conclúe: «Cremos que no proxecto de Berta Dávila hai elementos suficientes para que del acabe saíndo unha novela moi estimable, que, con seguridade, nos achegará unha voz nova e potente ao noso panorama literario».

Os asistentes ao acto tiveron ocasión de coñecer en primicia absoluta as primeiras secuencias que se coñecen da nova longametraxe de Ángel de la Cruz, Os mortos van á presa, que ten previsto a súa estrea para o vindeiro mes de xaneiro. Ademais de contemplar a María Castro no papel dunha vendedora de Biblos, os convidados ao Bachao escoitaron en directo a Lucía Rolle acompañada por Vitor Iglesias interpretando, entre outras pezas, o tema central da película.

O premio achégalle á gañadora unha escultura de Luís Loureira titulada A peneira dos soños, un ordenador portátil, a estancia ao longo do mes de outubro na Casa Grande do Bachao para ultimar a súa novela baixo a tutela de Agustín Fernández Paz e a edición da obra en galego e castelán antes de rematar o ano.

Con Berta Dávila foi finalista Zeltia Regueiro Fuentes, de Cambre, tamén presente na cea e que recibiu como agasallo a colección de poesía Arte de trobar do PEN Clube de Galicia e a Mandaio de Biblos.

As tres edicións anteriores foron gañadas por Iria López Teijeiro, a quen tutelou Xosé Luís Méndez Ferrín coa novela Meniña de cristal; Alberto Ramos, que tivo para a súa Dor pantasma a Darío Xohán Cabana como titor, e Patricia Casas que contou coa axuda de Helena Villar para concluir Teselas de cidade.

A entrega dos premios terá lugar durante a XX edición das Xornadas de Banda Deseñada de Ourense

Martín Romero Outerial, gañador do GZ Crea 2008 na modalidade de Banda Deseñada

(19-Xullo-2008)

Martín Romero Outerial (Xión, A Coruña, 1981) foi o gañador de GZ Crea 2008, Certame Galego de Creadores Novos de Banda Deseñada coa obra O home do saco. O xurado que estivo formado por Manel Cráneo, David Rubín, Pinto, Carlos Portela, Kiko da Silva e Henrique Torreiro, actuando como presidente Rubén Cela e como secretario Benito López outorgou o segundo premio a Lola Lorente por "Ventrículo" e o terceiro a Jerónimo Piñeiro, de Pontedeume, pola obra "Carta dende a fronte". O xurado, ademais, decidiu outorgar unha mención de honor a Diego Campos Omil pola súa obra "Que ben se está en todas partes".

A entrega dos premios terá lugar durante a XX edición das Xornadas de Banda Deseñada de Ourense, que terán lugar entre o 1 e o 18 de outubro, e evento no que se exporán as obras premiadas neste concurso do "GZcrea".

Fontenla Leal foi impulsor do Himno Galego e precursor da Academia Galega

O Concello de Ferrol e a Real Academia Galega nomean a Xosé Fontenla Leal como Fillo Predilecto "In memoriam" da cidade

(17-Xullo-2008)

O Concello de Ferrol máis a Real Academia Galega organizan mañá o nomeamento de Xosé Fontenla Leal como Fillo Predilecto “In Memoriam” da cidade. Deste xeito, aquelas persoas que o desexen non terán máis que solicitar entradas, ata esgotar aforo, no propio despacho de billetes do Teatro Jofre, entre as 11.00 e 13.00 e de 16.30 a 19.00 horas, para asistir á homenaxe, no que participará a Corporación Ferrolá e os principais responsables da devandita institución académica.

O acto dará comezo ás 19.00 h. no Teatro Jofre e inclúe a participación de representantes da Real Academia Galega, concretamente do seu presidente Xosé Ramón Barreiro e do membro numerario Xosé L. Axeitos, ademais do propio alcalde e da concelleira de Cultura. A xornada inclúe tamén unha actuación musical, coa presencia do dúo “Ad Rem”, así como do Real Coro Toxos e Froles, que porá o punto final coa interpretación do Himno Galego.

Nos últimos meses, o consistorio ferrolán levou a figura de Fontenla Leal aos centros educativos de Ferrol, onde distribuiu máis de 2.000 unidades didácticas para dar a coñecer entre os máis novos e novas a este ilustre ferrolán.

Xosé Fontenla Leal naceu en Ferrol o 12 de febreiro de 1864 e, con a penas dez anos e orfo de nai, emigra a Cuba. Cun decidido carácter autodidacta, en La Habana traballou na industria litográfica. A súa paixón polos libros levouno a reunir máis de 3.000 volumes, dos que boa parte foron doados ao Centro Galego da Habana. En 1986 funda a Revista de Galicia xunto con Secundino Cora García e colabora no Diario de la Marina. No ano 1905, Fontenla Leal ten unha decisiva contribución na xénese da futura Real Academia Galega, ao fundar a Asociación Iniciadora e Protectora da Academia Galega xunto a Manuel Murguía e Curros Enríquez. Logo sería nomeado académico non numerario desta institución, ocupando os cargos de vogal, vicepresidente e presidente.

Asemade, Fontenla Leal impulsou de xeito definitivo o Himno Galego, con letra de Eduardo Pondal e música de Pascual Veiga, que foi estreado o 20 de decembro de 1907 en La Habana. Finalmente, morre o 5 de decembro de 1919 na capital cubana.

Á espera do lusco fusco é unha metáfora burlesca da novela

Xesús Constela, gañador da XX edición do Premio García Barros de novela

(17-Xullo-2008)

O xurado da XX edición do Premio de Novela "Manuel García Barros (Ken Keirades)", formado por Armando Requeixo, Xosé Manuel Eiré, Luis Alonso Girgado, Carlos Lema e Valentín García Gómez como secretario acordou, por maioría, conceder o Premio Manuel García Barros (Ken Keirades) á obra presentada baixo o lema Á espera do lusco fusco, de autoría de Xesús Constela. En opinión do xurado, a novela gañadora é especialmente valorable por tratarse dun monólogo narrativo, escrito cunha linguaxe coloquial que utiliza recursos rítmicos como a repetición con fins paródicos.

A novela é unha metáfora burlesca da literatura, pon en entredito a ficción tradicional como convención e xoga coa tradición literaria de Shakespeare e Cervantes a Blanco Amor, para acabar constituíndo un divertimento en busca da libertade literaria e da esencia da escrita.

Xesús Constela xa resultou gañador no ano 2003 do Premio Torrente Ballester convocado pola Deputación da Coruña con As humanas proporcións (Galaxia) e publicou recentemente Libro das alquimias (Galaxia).

O Premio de novela Manuel García Barros (Ken Keirades) está organizado polo Concello da Estrada como testemuña da admiración e respecto e para manter a presencia do ilustre académico e galeguista estradense, co obxectivo de espallar a súa persoa e maila importante aportación que a súa obra fixo ás Letras Galegas. Entre os gañadores do premio están escritores como Manuel Forcadela, Xosé Miranda, Xavier Alcalá, Xavier Queipo, Xosé Carlos Caneiro, Antón Rivero Coello, Bieito Iglesias ou Francisco Castro, gañador da pasada edición con As palabras da néboa (Galaxia).

O vindeiro mes de outubro celebrarase en Madrid o seminario Saber ler. ¿Ensinar ou facer lectores?

O CSIC colaborará cos editores de libros de texto

(17-Xullo-2008)

Os investigadores do Consello Superior de Investigacións Científicas (CSIC) asesorarán aos editores na elaboración dos materiais educativos en virtude dun convenio asinado entre a citada institución e a Asociación Nacional de Editores de Libros e Material de Ensinanza (ANELE), que representa ao 96% do sector. Este convenio, que se une ás accións do CSIC dirixidas ao fomento da cultura científica entre escolares e universitarios, xurde trala incorporación da asignatura Ciencias para o Mundo Contemporáneo en Secundaria e Bacharelato.

O acordo comprende, ademais do asesoramento científico, a organización de eventos relacionados coa divulgación da ciencia entre os profesionais da educación. Unha das primeiras actividades que se desenvolverán no marco desta cooperación é o seminario "Saber ler. ¿Ensinar ou facer lectores?", cuxa celebración en Madrid está prevista para o próximo mes de outubro.

A firma do citado acordo súmase ás diferentes actividades que o CSIC dirixe á comunidade educativa en todos os seus niveis. Esta liña de actuación comprende, entre outras iniciativas, o proxecto "CSIC na Escola", destinado aos niveis de Infantil e Primaria, e cuxa finalidade é a formación e actualización científica do profesorado, mediante seminarios especializados impartidos por toda España.

No caso de Secundaria e Bacharelato, o organismo leva a cabo diversas actividades mediante a firma de convenios específicos con centros de ensinanza dirixidos á colaboración na organización de xornadas, concursos, certames ou visitas guiadas relacionados coa divulgación da ciencia, así como ao asesoramento e formación do profesorado por parte de especialistas e, incluso, a facilitar a estancia en centros do CSIC de alumnos seleccionados.

 [Máis información na web da Asociación Galega de Editores]

 [Máis información na web do CSIC]

Manifesto da Federación de Asociacións de Escritores "Galeusca"

As escritoras e escritores galegos, vascos e cataláns proclaman a vontade de escribir nas súas linguas

(14-Xullo-2008)

A Asociación de Escritores en Lingua Galega, como integrante da Federación de Asociacións de Escritores "Galeusca", da que tamén forman parte a Associació d'Escriptors en Llengua Catalana e a Euskal Idazleen Elkartea (Asociación de Escritores Vascos) quere facer público o seguinte Manifesto:

Perante o discurso pretendidamente homoxeneizador e centralista que subxace no “Manifiesto por la lengua común”, a Federación de Asociacións de Escritores “Galeusca” quere deixar constancia do seguinte:

1.  A realidade plurilingüe que conforma e dá existencia ao estado español, lonxe de ser entendida como unha “asimetría” ou deficiencia per se, está a reproducir de xeito transparente unha diversidade lingüística e cultural común á maioría dos estados que conforman a Europa plurilingüe.

2.  O galego, o éuscaro e o catalán non son "inventos" recentes senón linguas que foron normais nos seus territorios e sociedades respectivas durante centos de anos. A súa desnormalización, a súa perda de usos públicos, non se produciu de forma "natural", senón, mesmamente, por invasión da lingua que se decretou como oficial do estado, sen consulta nin acordo previo.

3.  O artigo 3 da Constitución española garante a presenza desa lingua común para todos os habitantes do estado, mediante a esixencia a toda a cidadanía do deber de coñecer o castelán. Toda a cidadanía de Galicia, Euskadi e os Países Cataláns asume na práctica esa esixencia, pois non hai persoa que non teña unha boa competencia en castelán, ora a teñan como primeira lingua, ora como segunda. Porén, respecto do galego, do éuscaro e do catalán a lexislación non prevé a obriga de seren coñecidos nos seus respectivos territorios, o que establece unha asimetría nos dereitos lingüísticos da cidadanía que quere exercer o dereito, que lles é recoñecido, a usalos.

4.  O galego, éuscaro e catalán tamén son linguas oficiais nos seus territorios, que é o mesmo que dicir que son as linguas propias de aproximadamente o 40% da poboación do estado español. Estes códigos lingüísticos diferentes do castelán, lexítimos e nos que se recoñece o percorrido e expresividade dun pobo e dunha cultura, son instrumentos de comunicación igualmente “democrática”, ferramentas de relación interpersoal útiles e necesarias para a sociedade que as sustenta.

5.  O dereito ao uso público, en todas as instancias, da lingua propia está recoñecido en todas as lexislacións democráticas do mundo. No ámbito europeo cómpre lembrar a Carta Europea das Linguas Rexionais ou Minoritarias (aprobada e ratificada polo Estado español) ou a Declaración Universal de Dereitos Lingüísticos, aprobada coa unanimidade do Congreso dos Deputados.

6.  A visión anuladora que da enriquecedora realidade plurilingüe española se transmite desde o “Manifiesto” leva a pensar na similitude coas teses da etapa franquista:  un Estado, unha lingua, e, consecuentemente, a reforzar as formulacións diferenciadoras entre cidadáns de primeira e de segunda por razón de lingua. A competencia plurilingüe, tamén para os cidadáns españois nados en comunidades autónomas cunha única lingua oficial, sempre será unha chave que abra o mundo, que abra as fronteiras do respecto polo outro desde a interpretación dunha relación de equidade entre os seres humanos, independentemente do seu lugar de nacemento, de residencia e de lingua propia. Además, o “Manifiesto” parte dunha premisa que non se corresponde coa realidade, pois en ningún caso o castelán corre perigo ningún en todo o territorio do Estado.

7.  A aprendizaxe de linguas, ademais da propia, sempre debe ser entendido en positivo e como sinónimo de enriquecemento do individuo, pois coa aprendizaxe plurilingüe estimúlase a expresividade e cognición das persoas. No caso de Galiza, Euskadi e os Países Cataláns é imprescindíbel que a poboación sexa competente nas dúas linguas oficiais, para que logo cadaquén poida decidir libremente se usa unha ou outra nos diferentes ámbitos e situacións. É dicir, a dobre competencia é imprescindible para garantir a liberdade lingüística.

8.  Para garantir esa utilización libre das linguas precísanse medidas emanadas dunha política lingüística adecuada. É dicir, para garantir os dereitos constitucionais que temos tamén os falantes de catalán, éuscaro e galego precísanse políticas lingüísticas que creen as condicións para exercelos, tal e como ditou o Tribunal Constitucional na sentenza 337/1994 cando “avalaba un trato desigual, que non discriminatorio, para as dúas linguas oficiais en función do carácter propio dunha delas que fai preciso unha acción normalizadora que debe, necesariamente, implicar accións de apoio singularizado”.

9.  As políticas lingüísticas aplicadas ao ámbito educativo nas chamadas comunidades bilingües teñen como obxectivo conseguiren que o alumnado acade unha boa competencia nas dúas linguas oficiais, independentemente de cal sexa a súa lingua familiar. Para acadar ese obxectivo, é preciso desenvolver planificacións lingüísticas que garantan a consecución dese obxectivo e que pasan, necesariamente, pola utilización vehicular maioritaria da lingua máis desfavorecida socialmente. E isto, en vez de ir contra a liberdade lingüística, é, precisamente, unha actuación imprescindible para garantir esa liberdade lingüística.

10.  As escritoras e os escritores galegos, vascos e cataláns PROCLAMAMOS a nosa vontade de seguirmos a escribir nas nosas linguas e a contribuírmos ao proceso, inacabado, de normalización das nosas linguas, como dereito humano, democrático, pacífico ao que non imos renunciar. Repudiamos enerxicamente todos os intentos de EXCLUSIÓN que colegas escritores españois realizan das nosas linguas e lamentamos que, no canto de se preocuparen pola saúde do español en Puerto Rico, Costa Rica ou os Estados Unidos, se dediquen a combateren o máis próximo e asimetricamente discriminado.

A EGU conta con 200.000 entradas permanentemente actualizadas entre outros materiais para profesores e alumnos

Ir Indo presenta a Enciclopedia Galega Universal na Internet

(11-Xullo-2008)

Onte presentouse no hotel compostelán Puerta del Camino a Enciclopedia Galega Universal en Internet elaborada pola editorial viguesa Ir Indo; ao acto de presentación asistiron o vicepresidente da Xunta de Galicia Anxo Quintana, a directora xeral de Promoción Industrial e da Sociedade da Información, Helena Veiguela; o director de Ir Indo Edicións, Bieito Ledo; o reitor da Universidade de Santiago, Senén Barro; e o presidente do Consello da Cultura Galega, Ramón Villares.

A Enciclopedia Galega Universal en Internet, ao igual que na súa versión impresa, é a primeira enciclopedia de carácter universal escrita integramente en galego. Editada por Ir Indo Edicións, é unha obra de carácter interactivo e multimedia, que incorpora vídeos, animacións e audios. Conta con 200.000 entradas permanentemente actualizadas, 20.000 mapas, 50.000 fotografías, material didáctico para profesores e alumnos, ademais de variados xogos e concursos.

 [Enciclopedia Galega Universal na Internet]

Do 14 o 24 de agosto

Vinte editores galegos promocionarán os seus produtos na Bienal de São Paulo

(11-Xullo-2008)

Vinte editores galegos contarán con material promocional no stand da Federación de Gremios na Bienal do Livro de Sao Paulo, que vai ter lugar entre o 14 e o 24 de agosto.

A Bienal Internacional do Livro de São Paulo conmemora os 200 anos da indústria do libro nese País, introducido coa chegada de D. João VI e a família real portuguesa no ano 1808, como explica a propia organización. Os libros que desembarcarán xunto coa corte no Rio de Janeiro, nese mesmo ano, definen tamén o nacemento da Biblioteca Imperial, convertida hoxe na Biblioteca Nacional de Brasil.

O evento é promovido pola Câmara Brasileira do Livro (CBL). Portugal será un dos países homenaxeados; compartindo ese honor con Xapón, en conmemoración do centenário da inmigración nipona ó Brasil; e España, pola realización da VII edición do Congreso Ibero-Americano de Editores, que vai ter lugar nos dias que anteceden á celebración da propia Bienal.

Trescentos cincuenta expositores vanse dar cita nun espazo de 60.000 m2, representando a máis de 900 selos editoriais. Agárdase que a visiten, durante os dez días de exposición, máis 800.000 persoas.

A viaxe de oito editores galegos conta co apoio do FOEXGA ( Consellería de Industria) , sendo organizado co apoio da Cámara de Comercio de Pontevedra e a Asociación Galega de Editores. A AGE participa dentro do stand da Federación de Gremios de España, onde tamén expoñen os gremios de Cataluña, Euskadi, Valencia, Madrid e Andalucía.

A Asociación Galega de Editores comezou hai varios meses a preparación do traballo para esta cita, na que a comisión de feiras e comercio exterior da AGE acordou participar no ano 2008. A axenda de traballo conta co apoio do becario do IGAPE en Sao Paulo.

 [Ver reportaxe na web da Asociación Galega de Editores]

  [20ª Bienal Internacional do Livro de São Paulo]

Unha mesa redonda e un recital con lecturas de poemas e textos serán os actos principais do evento

A AELG, o Concello da Coruña e Cedro organizan o I Encontro Cidade da Coruña

(09-Xullo-2008)

Os próximos días 18 e 19 de xullo a Asociación de Escritores en Lingua Galega organiza, en colaboración coa Concellaría de Cultura do Concello da Coruña e Cedro, o I Encontro Cidade da Coruña, unha actividade que nace coa pretensión de estenderse a outras cidades do país.

A Concelleira de Cultura María Xosé Bravo subliñou o obxectivo de "achegar ao público coruñés a palabra convertida en literatura contemporánea". A resposable de cultura explicou que se trata dun encontro pioneiro na cidade, que nace "con vocación de continuidade" e pretende pór nun primeiro plano a expresión poética, narrativa, dramática e ensaística.

Pola súa parte, o presidente da AELG Cesáreo Sánchez, afirmou que a perda da memoria colectiva e a súa recuperación é un feito "que implicou a toda a sociedade nos últimos anos". Indicou ademais que "a memoria inmediata ou da xeración anterior é a que produce os verdadeiros problemas de identidade colectiva e individual".Neste sentido, os creadores, como parte da sociedade na que viven "achegan a súa visión, crean e recrean o que foi e, ao tempo, o que non foi ou non puido ser".

O venres 18 de xullo celebrarase unha mesa redonda que, baixo o título Narrativa con memoria histórica, contará coa presenza de Lidia Jorge, Carme Riera e Manuel Rivas. Será na Casa Museo Casares Quiroga (R/ Panadeiras, 12).

O día seguinte, no Teatro Rosalía de Castro (R/ Riego de Agua, 1), con presentación de Antía Otero, está previsto un recital poético e lectura de textos a cargo de Marica Campo, Yolanda Castaño, Lidia Jorge, Luz Pozo, Carme Riera, Manuel Rivas, Xavier Rodríguez Baixeras e Xavier Seoane, alén da actuación musical de “Carmen Rey Grupo”, cun son próximo do rhythm and blues, coa esencia do funk e do jazz.

A entrada é de balde até completar aforo.

Os debuxantes Tirso Cons, Al Barrionuevo e Manel Fontdevila estarán presentes na edición deste ano

Todo preparado para o 12º Salón do Cómic de Cangas

(08-Xullo-2008)

O 12º Salón do Cómic de Cangas (Pontevedra) volverá contar nesta edición con debuxantes de primeira fila, como son Tirso Cons, Al Barrionuevo e Manel Fontdevila, coautor da polémica portada de ‘El Jueves’ que retrataba ós Príncipes de Asturias nunha actitude impropia.

O Concelleiro de Xuventude de Cangas, Óscar Graña, indicou na presentación do programa que o alto nivel dos convidados e as múltiples actividades que se celebrarán no Auditorio Municipal do 21 ó 27 de xullo constitúen un “gran potencial” que converten o Salón do Cómic de Cangas nun evento “de referencia” no eido da banda deseñada, xa que se trata da principal cita destas características en Galicia xunto coa da Coruña. Fóra de cartel achegaranse ademais destacados debuxantes coma Horacio Altuna ou Kenny Ruiz, autor do cartaz anunciador desta duodécima edición para o que se inspirou na garita do monte do Facho, símbolo do Salón.

Obradoiros, proxección de películas, exposicións e conferencias dos autores convidados son algunhas das iniciativas incluídas na ampla programación do 12º Salón do Cómic de Cangas, todas con entrada libre e de balde. Despois da inauguración do luns 21 ás 19.30 horas, o martes 22 darán comezo pola mañá os talleres de banda deseñada e caricaturas cos debuxantes Jvlivs e Luis Davila, “que tanto éxito teñen entre o público infantil”, lembrou Graña. O mércores 23 terá lugar á tardiña a entrega de premios do 10º Certame de Cómic e a presentación da revista ‘O Tebeo’, editada pola Concellería de Xuventude, onde se recollen as propostas gañadoras. Óscar Graña destacou a “calidade excelente” dos traballos presentados ó concurso, que este ano fai “unha aposta especial polo galego”. Un xurado profesional escollerá nos próximos días os autores vencedores entre os 72 que optan ós galardóns.

 [Web do Salón do Cómic de Cangas]

Qué mudou no panorama literario español na década transcorrida desde a celebración de daquela primeira xuntanza?

II Xuntanza de Escritores en Iria Flavia

(08-Xullo-2008)

No ano 1998, o Premio Nóbel Camilo José Cela organizou o I Encuentro de Jóvenes Escritores en Iria Flavia. Dez anos despois, a Fundación que leva o seu nome organiza entre os días 7 e 10 de xullo a organización do II Encuentro de Escritores en Iría Flavia, baixo a pregunta de ¿Qué ha cambiado en el panorama literario español en la década transcurrida desde la celebración de aquel primer encuentro?.

Deste xeito, e como seguimento dos autores que xa participaron na primeira edición, aqueles escritores e escritoras volven de novo a Iria Flavia desde a perspectiva de que xa son autores "sólidos" e para recuperar o espírito da súa primeira xuntanza e por de novo sobre a mesa cuestións que lles inquietan ou preocupan.

As sesións, que inclúen mesas redondas e visitas a diferentes espazos, comezarán propiamente mañá 8 de xullo y rematarán o día 9. Abordaranse cuestións como Diez años en la vida de un escritor; Maneras de mirar. ¿Algo más que modas?; Escribir poesía, escribir cuento, escribir teatro; La novela: Corrientes y modas; e Influencia del mercado editorial en la labor creativa del escritor.

Na xuntanza estarán presentes Antonio Álamo, Lola Beccaría, Gabriela Bustelo, Carlos Castán, Diego Doncel, Óscar Esquivias, Lucía Etxebarría, Luis García Jambrina, Ignacio García Valiño, Gloria Méndez, Toni Montesinos, Tino Pertierra, Blanca Riestra, Hilario J. Rodríguez, Care Santos, Marta Sanz, Lorenzo Silva y Ángela Vallvey-Arévalo. Estes autores estarán o día 9 de xullo, ás 14.30 h. e ata as 16.30 h. asinando os seus libros na Libraría Couceiro de Santiago de Compostela.

Con este protocolo facilitarase o achegamento da cultura galega á dos países lusófonos

A Consellería de Cultura e a Asociación Internacional de Lusitanistas asinan un convenio de colaboración cultural

(08-Xullo-2008)

A conselleira de Cultura e Deporte, Ánxela Bugallo, e a presidenta da Asociación Internacional de Lusitanistas (AIL), Regina Zilberman, asinaron hoxe un protocolo de colaboración cultural. A Consellería apoiará o labor desta institución con presenza en 32 países, e que ten por obxecto fomentar os estudos das linguas portuguesas, e tamén do galego.

O protocolo asinado pretende establecer liñas de traballo conxunto entre a AIL e a Consellería a través da Dirección Xeral de Creación e Difusión Cultural, que permitirán a realización de actividades culturais conxuntas. Este labor en común facilitará o achegamento da cultura galega á dos países lusófonos.

A Asociación Internacional de Lusitanistas foi fundada en Poitiers (Francia) en 1984 e ten a súa sede actual en Coimbra. Agrupa a docentes universitarios, investigadores e estudosos de 32 países, cun importante peso de Galicia. A asociación asinou convenios con organismos de todo o mundo, entre eles a Fundación Gulbekian e o Instituto Camões. En 2005 celebrou en Santiago o seu VIII Congreso Internacional, que este ano se desenvolverá en Madeira.

A mostra está comisariada pola especialista Sagrario López Poza

Libros de emblemas e obras afíns na Biblioteca Universitaria de Santiago de Compostela

(07-Xullo-2008)

Con motivo da celebración de Compostella Aurea. VIII Congreso de la Asociación Internacional Siglo de Oro, terá lugar a exposición Libros de emblemas e obras afíns na Biblioteca Universitaria de Santiago de Compostela. A exposición recolle o importante fondo bibliográfico que a nosa biblioteca posúe neste campo da emblemática, fundamental no panorama literario europeo nos séculos XVI e XVII. Contribúe así a difundir unha destacada mostra do  patrimonio cultural que custodia a USC.

A exposición celebrarase no Claustro Alto do Colexio de Fonseca, e estará comisariada pola profesora Sagrario López Poza, destacada especialista neste campo de estudo coas colaboracións de José Julio García Arranz (Universidade de Estremadura), Sandra María Fernández Valés (Universidade da Coruña) e Teresa Zapata Fernández de la Hoz (Universidade de Alcalá de Henares). Como se ten dito arriba, forma parte das actividades de Compostella Aurea. VIII Congreso de la Asociación Internacional Siglo de Oro, organizado polo Departamento de Literatura Española, Teoría da Literatura e Lingüística Xeral da USC.

No mesmo acto a concelleira de cultura de Ferrol solicitou para Carvalho Calero o Día das Letras Galegas 2010

Henrique Dacosta gaña a XVI Edición do Premio Carvalho Calero de Creación Literaria-Narración Curta

(07-Xullo-2008)

O profesor Henrique Dacosta foi proclamado gañador da XVI Edición do Premio Carvalho Calero de Creación Literaria-Narración Curta pola súa obra Unha nada de doce relatos. Este premio, que organizan de forma conxunta o Concello de Ferrol e a Asociación Cultural Medulio, decidiu deixar deserta a modalidade de investigación e ensaio.

Henrique Dacosta, ademais de colaboracións lingüísticas e literarias en periódicos e revistas (Agdlia, Ferrolandlisis, A Nosa Terra...), foi gañador do II Certame Carvalho Calero (1992) coa novela Mar para todo o sempre, e do IV (1994) co conxunto de relatos Sobre comboios, janelas e outras pequenas histórias. Foi finalista no I Certame de Relato Curto da Asociación Cultural Cidade Vella (1989) con Ruiva mulher de esperanrça. Inédito aínda, posúe un estudio sobre a toponimia do Concello de Fene, elaborado durante o período 1989-1990. En Émbora ten publicado Os desherdados e Ferroláns na historia da literatura galega.

No mesmo acto onde se deu a coñecer o premio a concelleira de Cultura de Ferrol Yolanda Díaz expresou a súa satisfacción persoal pola decisión da Real Academia Galega de elixir a Ramón Piñeiro como homenaxeado na conmemoración do Día das Letras Galegas na edición de 2009.  Yolanda Díaz, tras lembrar a importante aportación do intelectual galegista á cultura do país e a súa trasposición ao exterior, chamou a atención sobre a procura do Concello de Ferrol para conquerir idéntico recoñecemento para o lingüista e escritor ferrolán Ricardo Carvalho Calero.

O Plenario da Real Academia Galega tomou está mañá a decisión en sesión ordinaria

Ramón Piñeiro, Día das Letras Galegas 2009

(05-Xullo-2008)

O Plenario da Real Academia Galega, reunido en sesión ordinaria o día 5 de xullo de 2008 na súa sede da Rúa Tabernas, acordou dedicar o Día das Letras Galegas de 2009 a Ramón Piñeiro López pola "dedicación, total e desinteresada, da súa vida na defensa de Galicia e da súa cultura debe ser unha referencia moral indiscutible e necesaria cara ás novas xeracións". A RAG tamén destacou o seu traballo sobre pensamento e filosofía, o seu labor como ensaísta e como promotor da normalización da lingua galega nos anos difíciles da posguerra. De igual maneira subliñouse o labor de animación cultural galeguista e a súa contribución á publicación de numerosos libros en galego, enchendo este baleiro, coma ningunha outra institución, nos anos anteriores á Transición como director da Editorial Galaxia.

Ramón Piñeiro (Láncara, Lugo, 1915-Santiago de Compostela, 1990) foi unha das figuras máis sobranceiras da Galicia do século XX. Formado nas Mocidades Galeguistas da Segunda República, axiña se converteu na referencia do galeguismo e da resistencia cultural que, dende o interior, tentaba desenvolver unha estratexia posible nas circunstancias difíciles da posguerra e do franquismo. A súa obra literaria céntrase preferentemente en cuestións de carácter filosófico e lingüístico: Significado metafísico da saudade (1951), A linguaxe e as linguas (1967), Olladas no futuro (1974)..., mais a súa actuación didáctica, de información e animación, dirixida principalmente ás xeracións máis novas foi decisiva para a reconstrución cultural e mesmo política da Galicia da transición ás liberdades democráticas e á autonomía.

Xunto con Domingo García-Sabell, Rof Carballo, Celestino Fernández de la Vega e os seus compañeiros de tarefas editoriais, Xaime Isla Couto e Francisco Fernández del Riego, configuran un núcleo de pensamento que na historia da literatura galega contemporánea se coñece como o grupo Galaxia, célula activa de creación intelectual, na procura dun discurso moderno e universalista. Da súa man, a Editorial Galaxia converteuse de feito en plataforma de anovación e defensa da identidade galega, concitando vontades, activando proxectos, conectando as xeracións novas coa tradición dos máis vellos, "Sementar nas novas xeracións a idea e os valores de Galicia, que se estaban perdendo" deixou dito. Historia da literatura galega, de Francisco Fernández del Riego, Historia de Galicia de Vicente Risco e a Gramática elemental de gallego común de Carballo Calero foron os primeiros libros que saíron da editorial.

En 1967 foi elixido membro numerario da Real Academia Galega. O seu discurso levou por título A linguaxe e as linguas. Consonte a súa defensa da nosa cultura, participou na creación do Consello da Cultura Galega no ano 1983, do que foi o seu primeiro presidente ata o seu pasamento. E non cabe ignorar o seu intenso influxo na normalización política do galego, facendo a nosa lingua patrimonio común por enriba das opcións de partido.

Finalmente e, non menos importante, foi o seu labor socrático, exemplarizado nas conversas na súa "mesa camilla", na súa intensa e xenerosa correspondencia epistolar dentro e fóra de Galicia, tanto nos escuros tempos inmediatos á posguerra como, posteriormente, con  toda persoa que tivese Galicia como referente das súas actividades ou ideais.

O presidente da Xunta de Galicia destacou o seu labor pola recuperación da lingua e a cultura galega durante a ditadura franquista

A editorial Galaxia, galardoada coa Medalla de Ouro de Galicia

(03-Xullo-2008)

O Consello da Xunta de Galicia vén de lle conceder a Editorial Galaxia a Medalla de Ouro de Galicia, máxima distinción do goberno galego. A Xunta valorou moi especialmente "a contribución da histórica editora á cultura galega e á defensa dos intereses de Galicia". O acto de entrega celebrarase solemnemente o próximo 25 de xullo en Santiago de Compostela.

Na intervención posterior ao Consello da Xunta que aprobou esta mañá a concesión da Medalla, Pérez Touriño explicou que Galaxia “sempre destinou o seu impulso e a súa orientación con comprometidos galeguistas como Ramón Piñeiro, Francisco Fernández del Riego e Xaime Illa Couto” dende a súa fundación o 25 de xullo de 1950 baixo a presidencia de Ramón Otero Pedrayo. O presidente da Xunta destacou que estas tres personalidades orientaron desde o primeiro momento a editorial co compromiso pola “recuperación da lingua e a cultura galega e ao servizo de creación de liberdade durante a ditadura franquista”.

A editorial xurdiu coa vocación de recuperar a significación histórica e o valor cultural da lingua galega na creación e na transmisión do pensamento. Antífona da Cantiga de Ramón Cabanillas foi o primeiro libro publicado pola editorial en 1951. Simultaneamente á edición dos primeiros libros, comezou a publicar a revista cultural, Cadernos Grial, que foi prohibida e non volveu a circular ata 1963. Ademais, a editorial impulsou a creación de varias fundacións culturais, como a Fundación Penzol, a Fundación Otero Pedrayo e a Fundación Illa Couto.

Durante a dirección de Carlos Casares impulsouse o deseño, a colección de literatura infantil e xuvenil, Árbore e Costa Oeste, a edición de obras de ensaio, dicionarios e gramáticas e material escolar. Así como a Biblioteca Básica da Cultura Galega que reúne en 51 títulos as obras da historia e a cultura de Galicia.

A Editorial Galaxia, que dirixe actualmente Víctor Freixanes, ten editados case 2.500 volumes e un catálogo vivo de arredor dun milleiro de títulos. O catálogo recolle as obras dos autores máis significativos das letras galegas e os máis modernos. Ademais, Galaxia promove dende o ano 2000 traducións ao castelán, o inglés, o vasco, o catalán, o alemán, o francés, o italiano o grego ou o ruso. As traducións, que superan xa os 130 exemplares, xurdiron co obxectivo de espallar o coñecemento da creación cultural galega alén das nosas fronteiras. Xaime Isla Couto segue a presidir o Consello de Administración e Francisco Fernández del Riego dirixe a Biblioteca da Fundación Penzol.

Editorial Galaxia é, sobre todo, un espazo de convivencia democrática, un foro de creación e de xestión cultural, plataforma de difusión do coñecemento a prol de obxectivos que en 1950 xa marcaron os fundadores: unha Galicia renovada, dona de seu, democrática e europeista; unha lingua moderna e sen complexos, conectada con todas as linguas e as culturas do mundo, marca de identidade do país; unha cultura universal e esixente, crítica e en constante transformación, que afirmándose na consciencia do seu rico pasado traballa arreo pensando nas novas xeracións.

O intelectual tamén entregou os mil catrocentos vinte folios de respostas a catro enquisas lingüísticas, a maioría inéditas

Xesús Alonso Montero fixo entrega de tres manuscritos autógrafos á Universidade de Santiago

(02-Xullo-2008)

O historiador e intelectual Xesús Alonso Montero entregou no día de onte á Universidade de Santiago tres manuscritos autógrafos e as respostas de catros enquisas lingüísticas nun acto literario que presidiu o vicerreitor de Cultura Elias Torres. Tamén asistiron o director académico do Servizo de Publicacións da USC, Antonio Azaustre, e a presidenta da Comisión de Bibliotecas e Arquivos, Helena de Carlos.

No evento, Alonso Montero, catedrático xubilado da institución docente, sinalou que os textos doados son, polo seu contido, representativos do seu labor filolóxico. Así, tratan o universo político da problemática da lingua galega no franquismo e un achegamento ao universo marxista de certos escritores galegos.

Pola súa banda, Elias Torres agradeceu ao protagonista do acto a súa entrega nestes tempos nos que “xa se pode obrar con liberdade grazas á aquela actividade académica na que participou o propio Alonso Montero” e que “sentou ás bases da actual Universidade”.

Un libro e dúas conferencias son os documentos autógrafos facilitados. A obra titúlase A batalla de Montevideo (Os agravios lingüísticos denunciados na UNESCO en 1954) (Xerais).

En canto ás conferencias, ambas as dúas leunas o seu autor en actos solemnes da Universidade. A primeira intervención, Literatura: Lección de clausura, pronunciouna no Paraninfo da USC o 25 de febreiro de 2002 na súa lección de despedida. A segunda, proferida no Colexio de Fonseca o 3 de febreiro de 2005, leva por título Dous días na vida de Lorenzo Varela, exiliado republicano en Buenos Aires.

Alonso Montero tamén entregou os mil catrocentos vinte folios de respostas a catro enquisas lingüísticas (1958, 1967, 1969), relativos sobre todo ás dúas últimas. Dito material permanece “na súa maioría inédito”, segundo explica o seu responsable. No fondo documental, hai textos impresos que ilustran algún aspecto do correspondente estudo.

Lareira Literaria

Rafael Lema, Xosé Miranda, Conchi Regueiro e Xesús Manuel Valcárcel na Lareira Literaria do verán

(02-Xullo-2008)

Rafael Lema, Xosé Miranda, Conchi Regueiro e Xesús Manuel Valcárcel cóntanos ás súas novidades e proxectos sobre vindeiros libros e traballos.

Rafael Lema ven de rematar a continuación de El camino secreto de Santiago (Edaf). Todo sobre Santiago. Verdades y mentiras de Camino Jacobeo, que sairá na editorial madrileña no 2009. Para finais do verán publicará en Tambre Crónicas corsarias, onde continúa coa saga do Capitán Araña, alcume do corsario de Camariñas Ambrosio Álvarez Pardiñas.

Xosé Miranda volverá a publicar en Xerais un novo libro do meigo Amancio Amigo. En Amancio Amigo e o demo da botella o protagonista vivirá unha serie de aventuras e de sucesos estraños na busca dun demiño fuxido.

A escritora luguesa Conchi Regueiro ultima unha novela xuvenil situada nunha remota aldea perdida nas montañas chea de misterio e de terror protagonizadas por unha rapaza de cidade e outra da aldea sobre cuxa familia pesa unha escura lenda...

Xesús Manuel Valcárcel, un dos fundadores do movemento sentimental_ISMO, vangarda literaria e artística de Galicia, prepara, tras a publicación no 2006 do Manifesto senti_MENTAL_ista (Bubela), unha nova obra onde presenta o sentimental_ISMO como un amplo movemento que reivindica a arte por excelencia, como expresión do inxenio, da variedade e da complexidade humanas; unha arte rebelde e comprometida, a partir da autoesixencia de autores e autoras, desenvolvendo unha concepción completamente nova da función da Arte e da figura do Artista. Este libro titularase rebelde stil nuovo e aparecerá en Editorial Bubela.

 [Lareira Literaria]