|
O
departamento de Ánxela Bugallo aportará
ó proxecto 300.000 euros
A
Fundación Castelao e a Consellería
de Cultura asinan un acordo para catalogar e compilar
a obra de Castelao
(23-Xaneiro-2008)
 A
Fundación Castelao e a Consellería
de Cultura e Deporte presentaron onte o proxecto de catalogación universal da obra
gráfica e escrita do galeguista. A conselleira, Ánxela Bugallo, o
presidente da entidade, Avelino Pousa Antelo e o vicepresidente
segundo, Miguel Anxo Seixas Seoane, acordaron compilar toda a obra do
escritor e debuxante nunha base de datos dixital para a súa posterior
consulta.
Cultura realizará unha primeira achega
económica de 300.000 euros dirixida á localización e compilación do
disperso legado de Castelao que acolle colaboracións literarias,
creacións en prosa, textos teatrais, artigos, discursos parlamentarios,
cartas, manuscritos, apuntamentos de todo tipo, debuxos, etc., ademais
de fotografías e gravacións sonoras e audiovisuais nas que apareza
Castelao. Pero será a Fundación a encargada da elaboración dun catálogo
dixital, unha base de datos coa ficha de cada obra acompañada da súa
reprodución.
O proxecto, coordinado polo vicepresidente segundo da Fundación, Miguel
Anxo Seixas Seoane, contará cun equipo de especialistas que botará man
de institucións públicas e privadas onde se pode ver a obra do
galeguista, rastrexará publicacións periódicas do seu tempo en
hemerotecas e traballará na procura da obra inédita do autor. Ante a
extensión e complexidade do proxecto a primeira entrega do inventario
está prevista nun prazo de 18 meses, que se ampliará todo o tempo que
sexa necesario para completar a catalogación. Por outra banda, prevese
que a colaboración económica sexa aumentada ante o achádego de novas
obras ocultas de Castelao que fagan medrar o catálogo.
Madrid, Arxentina, Estados Unidos, Cuba, Montevideo, México, Chile,
Venezuela, son só algúns dos lugares onde permanece rexistrada parte da
súa obra. A esta dispersión xeográfica terán que facer fronte os
expertos que se atoparán ademais cos milleiros de colaboracións
gráficas e escritas que Castelao realizou en ducias de medios, sen
incluír a súa obra pictórica.
Pousa Antelo
manifestou que "desde que se creou a
Fundación Castelao en 1984, o de hoxe é un dos días máis felices para
nós". Para o presidente da fundación, "xenerosa foi a contribución de
Castelao a Galiza e xeneroso é o compromiso da Consellaría de Cultura
co seu legado".
Miguel Anxo Seixas, que coordenará a catalogación, lembrou que "ao
morrer Castelao trouxemos o seu corpo, pero a súa obra, que andou dun
lado para outro, quedou ciscada". O vicepresidente segundo da Fundación
Castelao subliñou a importancia de "rexistrar e xuntar nun arquivo
dixital todo ese patrimonio que pertence aos galegos".
[Máis
información]
|
|
Proponse
a entrada do Concello de Vigo, entidade coa que
mantén convenios de colaboración dende
o ano 1985
A
Fundación Penzol renova e amplía o
seu Padroado
(29-Xaneiro-2008)
 A Fundación Penzol,
a institución privada de máis rico
patrimonio documental da historia da cultura galega
e do galeguismo, cun fondo
de varios miles de documentos, dende a Idade Media ata os nosos días, amplía
o seu Padroado, previa a correspondente reforma estatutaria, a vinte persoas e propón
a incorporación ao mesmo do Concello de Vigo, entidade coa que mantén convenios
de colaboración dende o ano 1985, convenios que van a permitir o
desenvolvemento dalgúns aspectos importantes coma o referente a ampliación do
persoal ao servicio da Fundación, segundo aos acordos que se ten chegado cos
actuais responsables municipais no eido
da cultura.
Entre os novos padroeiros figuran
institucións tan prestixiosas coma a Real Academia Galega e o Consello da
Cultura xunto con persoas de esmerada cualificación nos eidos da
biblioteconomía e da documentación ou vencelladas ao mundo da cultura na súa expresión científica e
humanística.
Como consecuencia da ampliación a
composición do Padroado é como segue:
Presidente: Blanca Jiménez de
Penzol
Vicepresidente 1º: Alfonso Zulueta
de Haz
Vicepresidente 2º: Xulio Souto
Jiménez
Secretario: Antón Vidal Andión
Director da biblioteca: Francisco
Fernández del Riego
Vocais: Xaime Isla Couto; Xerardo
Fernández Albor; Olga Gallego; Xulián Parga Rodríguez; Benxamín Casal Vila;
Xoán Bernárdez Vilar; Real Academia Galega; Consello da Cultura Galega; Ricardo
Beiras García-Sabell; Mª Dolores Cabrera Iglesias; Francisco Díaz-Fierros
Viqueira; Francisco Domínguez Martínez; Pedro López Gómez; Manuel Meijide
Vecino; Henrique Monteagudo Romero; Pablo Sánchez Ferro.
Ao mesmo tempo créanse tres
comisións de traballo: unha, presidida por Pedro López, dirixida principalmente
á actualización, renovación e dixitalización dos fondos; outra presidida por
Henrique Monteagudo coa idea de dotar a Fundación dunha liña de traballo alén
da conservación de fondos e investigación especializada, e unha terceira
presidida por María Dolores Cabrera, coa idea de proxectar cara ao exterior o
patrimonio da Fundación.
|
|
Xosé
María Álvarez Cáccamo lerá
o discurso pronunciado polo seu pai ao ingresar
na Real Academia Galega
Vigo
acollerá o primeiro acto de homenaxe a Xosé
María Álvarez Blázquez co gallo
do Día das Letras Galegas
(23-Xaneiro-2008)
 Vigo
acollerá en Vigo o 26 de xaneiro o primeiro
homenaxe a Xosé María Álvarez
Blázquez co gallo do Día das Letras
Galegas.
Os
actos comezarán cunha recepción á Real Academia Galega (RAG) no Pazo de
Castrelos e a lectura do discurso que o homenaxeado pronunciou en 1962
ao ingresar nesta institución.
Desta vez, o discurso será pronunciado por Xosé
María Álvarez Cáccamo, fillo do que fora cronista da cidade de Vigo e
comisario de excavacións arqueolóxicas do Museo de Castrelos. O
encargado de darlle resposta será Fermín Bouza Álvarez, fillo de Fermín
Bouza Brey, quen respondera naquel ano ás palabras do autor
homenaxeado. "Desta maneira o acto redondéase", explicou Álvarez
Cáccamo durante a presentación do evento este martes no Concello.
O discurso de ingreso de Xosé María Álvarez Blázquez na Real Academia
Galega, titulado "Cantares e romances vellos prosificados", non chegou
a publicarse no seu día, e o daquela alcalde de Vigo, José Ramón
Fontán, propúxolle ao autor realizar un acto na nosa cidade onde
podería proceder á súa lectura, acto que finalmente non puido ter lugar
debido ao pasamento de Fontán. Co acto do sábado 26 de xaneiro en Vigo,
a Real Academia Galega quere homenaxear a Álvarez Blázquez cumprindo
dalgún xeito o que fora o seu desexo.
Por motivos de espazo, a reunión da Academia en Vigo terá lugar no
Auditorio do edificio da Alcaldía situado na rúa Areal. Nela intervirán
o alcalde, Abel Caballero, e o presidente da RAG, Xosé Ramón Barreiro.
[Máis
información]
|
|
O
gañador de cada unha das modalidades recibirá
unha figura do artista lucense Ismael López
Fernández
Os
libreiros galegos convocan os Premios Irmandade
do Libro para o vindeiro 12 de abril
(22-Xaneiro-2008)
 A Federación
de Libreiros de Galicia convoca a XVII edición
dos Premios Irmandade do Libro, que terá
lugar o 12 de abril en Sanxenxo.
Estes
premios distinguen sete modalidades:
- A un autor ou autora que, tendo publicado un libro no ano 2007, se
distinga pola súa traxectoria en defensa do libro e da lectura.
- A un centro de ensino que promova as actividades relacionadas co
fomento da literatura e da lectura en xeral e da galega en particular.
- A actividade realizada no ano 2007 por unha institución, a súa
importancia social e cultural e a súa contribución á promoción e
difusión do libro e a lectura, principalmente en galego.
- O labor realizado a prol do libro e da lectura no ano 2007 por parte
das librarías galegas pertencentes á Federación de Libreiros de Galicia.
- O libro do ano 2007: un libro, escrito preferentemente en língua
galega e distribuído nas librarías de Galicia durante o ano 2007, que
pola calidade e interese do seu contido e pola acollida, tanto da
crítica como do público lector, teña acadado especial relevancia na
nosa sociedade.
- A obra editorial do ano 2007: a calidade técnica e material dunha
publicación, o esforzo editorial, o aporte documental e gráfico e o
carácter innovador dunha obra publicada e distribuída durante o ano
2007.
- A calquera tipo de actividade realizada polos medios de comunicación
de Galicia, tanto escritos como virtuais, para divulgar e promocionar o
libro galego e a lectura en galego durante o ano 2007.hoxe
os Premios Irmandade do Libro correspondentes a
súa XVII edición.
A data de
remate do prazo de entrega é o día
7 de marzo. O gañador en cada unha das modalidades
recibirá unha figura alegórica de
bronce, deseño exclusivo para os Premios Irmandade do Libro, do artista lucense Ismael López Fernández,
realizada nos talleres Artebronce de Goián, que será entregada nunha cea o 12
de abril de 2008 en Sanxenxo (Pontevedra).
[Descargar
as bases]
|
|
Sería
o paso previo á declaración como Ben
de Interese Cultural do proxecto iniciado por Isaac
Díaz Pardo e Luis Seoane
A
AELG solicita o inventariado e a catalogación
dos fondos do Instituto Galego de Información
(22-Xaneiro-2008)
 Manifesto
da Asociación de Escritores en Lingua Galega
en relación ó Instituto Galego de
Información:
"A Asociación de Escritores en Lingua Galega (Aelg) pide á
administración competente o inventariado e catalogación do patrimonio
documental do Instituto Galego de Información, para a súa posterior declaración
como Ben de Interese Cultural.
A declaración como Ben de Interese Cultural do rico
patrimonio documental depositado no seu día no Laboratorio de Formas, suporía a
salvagarda, garante e preserva do ideario fundacional dun proxecto nacional,
testemuña dun tempo histórico de cuxas fontes se alimentan moitos proxectos
actuais, no que se implicaron Luis Seoane, Isaac Díaz Pardo, os nosos exiliados
e os traballadores da cultura da nosa emigración".
|
|
A
web contén información sobre a figura
do intelectual ourensán e das actividades
que desenvolve a Fundación
A
Fundación Carlos Casares estrea a súa
páxina web
(21-Xaneiro-2008)
 A Fundación Carlos Casares estrea a súa páxina web,
que ven de substituír á información ofrecida noutros enlaces
como a web de ACAMFE (Asociación de Casas Museo e Fundacións de
Escritores) e outras institucións (Socialia de Caixa Galicia, medios de
prensa, etc.). A partir de agora anuncian que estarán presentes dun xeito
directo, coas novidades e información puntual que unha entidade como a
Fundación Carlos Casares debe fornecer en prol dos obxectivos para os que foi concibida e
polos que vén traballando dende principiar a súa actividade pública.
A
web, aínda que están en construcción
algunhas das seccións, define os contidos
que a compoñen: un apartado dedicado á
figura do intelectual ourensán (biografía,
cronoloxía e recoñecementos), outro
á Fundación (membros, obxectivos,
actividades, publicacións,...) e un terceiro
sobre información da Fundación (noticias,
axenda, imaxe corporativa,...).
Un
dos obxectivos da web da Fundación Carlos
Casares é dar resposta ás cuestións
habituais que se presentan nas consultas que por outros medios viñan
facendo os amigos e as persoas e entidades interesadas en obter
información fidedigna arredor da figura de Carlos Casares e das
actividades que a Fundación, na súa memoria, desenvolve. Desde
a Fundación preténdese que a páxina web sexa un foro de encontro, consulta e de diálogo, pero sobre todo que
sexa o voceiro oficial da entidade que leva o nome de Carlos Casares e,
como tal, a súa maneira de estar en contacto permanente coa sociedade.
[Fundación
Carlos Casares]
|
|
A
institución provincial comprará ás
editoriais pontevedresas libros por un valor de
40.000 euros
A
Asociación Galega de Editores e a Deputación
de Pontevedra asinan un convenio para a promoción
do libro galego
(21-Xaneiro-2008)
 O vicepresidente da Deputación, José Juan Durán e
o presidente da Asociación Galega de Editores, Alfonso García
Sanmartín, veñen de asinar o convenio correspondente o ano 2007 para
a promoción e difusión do libro galego a través da adquisición de
exemplares das editoriais da provincia membros da Asociación Galega de
Editores e a súa posterior divulgación e entrega en bibliotecas,
entidades culturais, centros docentes e outros. A institución
provincial ratifica así a aportación anual que ven realizando dende hai
máis de 16 anos e que supón unha achega de 40.000 euros.
O presidente da Asociación Galega de Editores alabou
a colaboración da Deputación de Pontevedra
xa que na actualidade é a única
institución provincial galega que asina un convenio con esta asociación.
O convenio asinado corresponde o ano 2007, continuando o
longo percorrido da iniciativa xa que hai máis de 16 anos que se asina
este convenio anualmente e hai tres anos foi ampliado ata os 40.000
euros.
[Máis
información]
|
|
A
obra recolle as mellores elaboracións presentados
nos certames gastronómicos organizados pola
Asociación "Filloas da pedra" d'A
Baña
50
recetas con filloas, Mellor Libro sobre Gastronomía
Galega do ano 2007 no XIV Premio Nacional de Xornalismo
Álvaro Cunqueiro
(18-Xaneiro-2008)
 O
libro 50 recetas con filloas, publicado por
Alvarellos Editora na súa colección
A Lume Lento, foi galardoado onte, en Lalín,
co premio ao Mellor Libro sobre Gastronomía
Galega do ano 2007, unha das categorías contempladas
na XIV edición do Premio Nacional de Xornalismo
Gastronómico Álvaro Cunqueiro.
O
xurado, presidido polo alcalde de Lalín,
Xosé Crespo, e integrado por sete recoñecidos
xornalistas galegos, valorou nesta publicación
a variedade e orixinalidade das súas receitas,
o traballo de edición e o feito de que a
autoría sexa colectiva, pois boa parte dos
31 autores pertencen á Asociación
Filloas da Pedra de A Baña, promotora deste
produto, un dos doces máis emblemáticos
da gastronomía galega.
A
obra 50 recetas con filloas presenta, por
vez primeira no panorama editorial, un completísimo,
ameno e práctico tratado culinario coa filloa
como ingrediente básico. Cincuenta receitas
que demostran que as filloas de Galicia establecen
unha maridaxe perfecta con todo tipo de pratos:
para entrantes, cociña con carnes, peixes,
e, por suposto, para un variado e suxestivo repertorio
de postres. 50 recetas con filloas recolle
as mellores elaboracións presentadas nos
diferentes certames gastronómicos organizados
pola Asociación “Filloas da pedra” d’A Baña,
onde participan, coas súas saborosas propostas,
31 restauradores e particulares.
[Máis
información]
|
|
Nesta
XVIII edición particpiarán os escritores
Juan Cruz, Luis Mateo Díez e Manuel Rivas
Os
"Encontros Literarios" do Liceo de Ourense
cumpren a maioría de idade
(14-Xaneiro-2008)
 A
Sección de Literatura do Liceo de Ourense
e a Vicerrectoría da Universidade de Vigo,
Campus de Ourense, co patrocinio do Liceo de Ourense,
a Deputación Provincial de Ourense e a Universidade
de Vigo, coa colaboración da Fundación
Carlos Casares e a Cátedra de Ourense organizan
os XVIII "Encontros Literarios", que este
ano cumpren a súa maioría de idade,
e que levará como lema "Principios e
vivencias dun escritor".
Os
Encontros, que se desenvolverán do 18 ao
29 de xaneiro, contará nesta edición
coa presenza dos escritores Juan Cruz, Luis Mateo
Díez e Manuel Rivas. Todas as conferencias-coloquios
terán lugar no Salón Nobre do Liceo
de Ourense.
O
tinerfeño Juan Cruz será o encargado
de abrir os Encontros o venres 18 cunha Conferencia-Coloquio
entitulada "La búsqueda de un libro
en una biblioteca". O académico leonés
Luis Mateo Díez falará sobre "La
novela y la vida" o lúns 21 de xaneiro.
Manuel Rivas "A corpo aberto" será
o encargado de pechar estos XVIII Encontros o día
29 de xaneiro, martes.
Estes
Encontros son unha das citas claves dentro do panorama
literario galego, Carlos Casares, Alfredo Conde,
Juan José Millás, Rosa Regás,
Víctor F. Freixanes ou Xosé Carlos
Caneiro son algúns dos nomes que participaron,
en maior ou menor medida, na consecución
destes dezaoito anos de Encontros Literarios en
Ourense.
[Máis
información]
|
|
Ámbolos
dous foron nomeados membros de honra do Pen Clube
O
PEN Clube de Galicia homenaxea a Isaac Díaz
Pardo e a Francisco Fernández del Riego co
Premio Voces de Liberdade
(14-Xaneiro-2008)
 Cunha nutrida asistencia de intelectuais, escritores e xente da
cultura, o Pen Clube entregou o pasado sábado a Isaac Díaz Pardo
e a Francisco Fernández del Riego o Premio Voces de
Liberdade, que anualmente convoca esta institución para honrar a
traxectoria de personalidades destacadas da cultura galega.
Arredor de duascentas persoas participaron na
homenaxe. Logo da intervención de Luis González Tosar, presidente do Pen Clube,
que glosou a significación e a historia desta institución, cunha lembranza
especial aos seus primeiros presidentes: Alfredo Conde, Carlos Casares e Úrsula
Heinze, tomaron a palabra a escritora Marilar Aleixandre, que glosou a figura
de Isaac Díaz Pardo, e a profesora Camino Noia, que se encargou da laudatio de
Fernández del Riego. Unha e outra salientaron os méritos dos dous intelectuais
galeguistas, aos que o Pen Clube incorpora como socios de honra e lles concede
o premio Voces de Liberdade, pola súa traxectoria.
Asistiron ao acto as primeiras autoridades da cidade, entre eles o alcalde de
Vigo (Abel Caballero) e o primeiro tenente de alcalde (Santiago Olveira), así
como a Conselleira de Cultura e Deporte da Xunta de Galicia (Ánxela Bugallo) e
a Secretaria Xeral de Política Lingüística (Marisol López).
[Máis
información]
|
|
A
poetisa Luz Pozo Garza será a galardoada
na vindeira edición
O
Ministro de Cultura César Antonio Molina
recollerá en Ferrol o Premio Letras de Bretaña
(14-Xaneiro-2008)
 O
ministro de Cultura, César Antonio Molina, visitará Ferrol o vindeiro
xoves, día 17, co fin de recoller o Premio Letras de Bretaña. O
galardón foille concedido o pasado ano, cando Molina aínda ocupaba o
cargo de director do Instituto Cervantes, pero a súa posterior
designación para poñerse ao frente da carteira de Cultura obligouno a
pospor a recollida do premio.
O Premio Letras de Bretaña foi creado polo Real Coro Toxos e Froles, e
conta co apoio dos concellos de Ferrol e Mondoñedo, e o Bispado desta
diocese, xa que a súa intención é homenaxear aquelas personalidades do
mundo da cultura preocupadas por destacar a importancia da Galicia do
Norte e o seu espírito "cunqueiriano". De feito, a distinción do premio
é unha placa de prata co mapa desta rexión. Na súa primeira
edición foi galardoado o poeta e escritor
Darío Xohán Cabana.
César Antonio Molina
será recibido polo alcalde da cidade, Vicente
Irisarri, no consistorio ferrolán, onde se desenvolverá o acto de
entrega. Acto que dará comezo coa intervención do primeiro edil. Este
cederálle a palabra ao presidente do Real Coro Toxos e Froles, Pedro
Sanz, que, á súa vez, dará paso ao escritor e xornalista Ramón
Loureiro, anterior gañador do premio. Trala entrega, o ministro
dirixirá unhas palabras ao público congregado no salón de plenos.
O galardón, que se entrega
indistintamente nas localidades de Mondoñedo e Ferrol, vai xa pola
cuarta edición. Precisamente, o pasado 23 de decembro dábase a coñecer
o nome do gañador do último premio: a poetisa Luz Pozo Garza, quen
recibirá o distintivo o vindeiro 28 de febrero na terra natal de
Cunqueiro. Precederon ao ministro o poeta e membro da Real Academia
Galega Darío Xoán Cabana, e o xornalista e escritor Ramón Loureiro.
O
xurado decidiu entregarlle o galardón a César Antonio Molina pola súa
traxectoria literaria e o seu coñecemento das obras de Alvaro Cunqueiro
e Gonzalo Torrente Ballester. Asemade, o escritor e agora ministro é un
grande estudioso da zona de Bretaña.
[Máis
información]
|
|
A
poeta María do Cebreiro foi seleccionada
para pasar un mes en Bangor como parte do convenio
A
AELG e o Centro de Estudos Galegos en Gales presentan
o inicio da colaboración entre as dúas
entidades
(11-Xaneiro-2008)
 O vindeiro luns día 14 de
xaneiro, ás 17.00
h., vaise presentar en rolda de prensa no Club Internacional de Prensa en Santiago, o inicio da colaboración entre o Centro
de Estudos Galegos en Gales e a Asociación de Escritores en Lingua Galega
(AELG).
Os obxectivos do programa de
colaboración son os seguintes:
-
Aunar achegas académicas e creativas ao
estudo da literatura galega promovendo a sinerxia entre a comunidade académica
da Universidade de Bangor e a escritora invitada.
-
Axudar a aumentar a
visibilidade e a presenza das voces literarias galegas no contexto galés,
británico e internacional.
-
Crear vencellos entre as
autoras/es galegas/os e os axentes culturais galeses. Para estes efectos,
organizaranse recitais de lectura, seminarios, conferencias e mesmo entrevistas
vis-a-vis con outros escritores, críticos literarios, tradutores, etc, do
entorno galés.
-
Promover entre o noso
estudantado o entendemento da complexidade socio-política e cultural da
península Ibérica a través da contribución da escritora ou escritor nos nosos
cursos de historia e literatura galega.
-
Proporcionarlle á escritora
ou escritor un lugar estimulante para o traballo e a creación.
O proxecto de colaboración inclúe a estada na cidade de
Bangor dunha figura representativa das novas voces da literatura galega
contemporánea. Este ano a poeta María do Cebreiro será a convidada. As datas da
súa estadía serán do 23 de febreiro ao 22 de marzo do 2008.
Estarán presentes na rolda de
prensa Marisol López, secretaria xeral de Política
Lingüística; Helena Miguélez, directora do Centro de Estudos
Galegos en Gales; Cesáreo Sánchez, presidente da Asociación de
Escritores en Lingua Galega e María do Cebreiro, escritora convidada.
|
|
Complementando
estas actividades celebraranse conferencias de escritores
nas comarcas indicadas
A
AELG promove, en colaboración coa Dirección
Xeral de Turismo, unha serie de 16 roteiros baixo
o título de "Terras de..." co obxectivo
de espallar o coñecemento global do noso
país
(11-Xaneiro-2008)
 A Asociación de Escritores en Lingua Galega (Aelg),
en colaboración coa Dirección Xeral
de Turismo da Consellería de Innovación
e Industria promove a realización de 16 roteiros baixo o título “Por Terras de…”, co
obxectivo de espallar o coñecemento global do noso país. O proxecto
consiste na
elaboración por recoñecidos escritores da parte textual de 16 rutas literarias,
con carácter divulgativo e con vocación literaria, que se corresponden coas
nosas bisbarras ou comarcas tales como a Terra Chá, Terra de Bergantiños,
Terras de Monforte, Terra do Caurel, etc., o que posibilita o coñecemento
global da nosa Comunidade.
Asemade, celebraranse conferencias de escritores de
prestixio internacional nas comarcas indicadas, para o impulso e desenrolo do
noso patrimonio turístico-cultural en xeral e da comarca en particular, co fin
de potenciar a cultura galega mais alá das nosas fronteiras.
En concreto, as zonas e os autores/as dos textos son:
Por
Terras de... O Ribeiro,
por Miguel
Anxo Fernández
Por
Terras de... Baixo Miño,
por Marta
Dacosta
Por
Terras de... Terra de Rosalía, por Anxo
Angueira
Por
Terras de... Terra Chá,
por Darío
Xohán Cabana
Por
Terras de... Compostela,
por Marilar
Aleixandre
Por
Terras de... A Coruña,
por Henrique Rabuñal
Por
Terras de... Ourense,
por Bieito Iglesias
Por
Terras de... Lugo,
por Isidro Novo
Por
Terras de... Vigo,
por Manuel Forcadela
Por
Terras de... A Terra do Medio,
por Xosé Vázque Pintor
Por
Terras de... Eume,
por Eva Veiga
Por
Terras de... Ferrol,
por Ramón Loureiro
Por
Terras de... Fisterra-Costa da
Morte, por Modesto Carlos Fraga Moure
Por
Terras de... Cambados,
por Ramón Caride
Por
Terras de... O corazón de Galiza,
por Xulio López Valcárcel
|
|
O
autor vigués leva moitos años traballando
no eido da comunicación e da xestión
cultural
Francisco
Castro incorpórase ao equipo de Editorial
Galaxia como coordenador de novos proxectos
(11-Xaneiro-2008)
 Francisco Castro (Vigo, 1966), escritor, profesor e
blogueiro, vén de incorporarse ao equipo editorial de Galaxia en calidade de
Coordenador de Novos Proxectos.
O autor vigués leva moitos anos traballando no eido
da comunicación e a xestión cultural. É asiduo colaborador de diversos medios
de comunicación galegos como cronista cultural. Foi un dos primeiros autores en
promover o uso da Internet como motor para animación á lectura e o debate
cultural, nomeadamente desde a súa concurrida bitácora A canción do naúfrago.
A súa carreira
como escritor comezou no ano 1991 coa publicación de Amor de cinema
(Edicións
Cardeñoso), ao
que lle seguiron Play-Back (Premio Lueiro Rey de Novela Curta, 1997,
Ed. do Cumio), o
libro de relatos eróticos Xeografías (finalista
do Premio de Narrativa Erótica Positivas, 2001), os relatos de A canción do náufrago
(Ir Indo), ambos de 2001, e
a novela histórica Memorial do infortunio
(A Nosa Terra).
En 2004 publicou Xeración perdida
(Galaxia),
novela coa que adentra ao lector no mundo das drogas. Recibiu en 2006 o Premio
Blanco Amor de novela longa con Spam
(Galaxia) e quedou
finalista do Premio Fundación Caixa Galicia
de Literatura Xuvenil con O ceo dos afogados
(Xerais).
Como articulista, recibiu o Manuel Reimóndez Portela polos seus traballos de
animación á lectura.
En 2007 resultou gañador do Premio de Novela
Manuel García Barros co texto titulado As
palabras da néboa (Galaxia), do cal o xurado salientou “un discurso narrativo
orixinal cunha proposta novidosa de novela histórica”.
|
|
Os
autores de Así nacen as baleas, Vidas
post-it e Os ollos de K falarán
cos lectores sobre os seus libros
Comeza
o 2008 con tres novas propostas no Literactúa
de Carballo
(11-Xaneiro-2008)
 Literactúa comeza o primeiro trimestre do 2008 con tres novas propostas
literarias. Literactúa é unha actividade
da Concellería de Cultura, Ensino e Normalización
Lingüística do Concello de Carballo,
onde cada último mércores de mes,
o autor ou autora dun título proposto participa
en Carballo nun acto de conversa cos lectores e
lectoras nun estabelecemento hosteleiro da
localidade.
Os tres libros programados para este primeiro trimestre do ano son: Así
nacen as baleas (Galaxia), de Anxos Sumai; Vidas
post-it (Xerais) de Iolanda Zúñiga
e Os ollos de K (Galaxia),
de Antón Riveiro Coello.
Anxos
Sumai, premio Xosé María Álvarez
Blázquez ó autor/a do ano 2007 conversará
cos lectores o mércores 30 de xaneiro sobre
Así nacen as baleas (Galaxia), a historia dunha liberación e, ao tempo, a viaxe de volta dunha muller nova á casa, á familia e ao pasado.
Será no café Valle-Inclán.
Para
o día 27 de febreiro Iolanda Zúñiga
e as súas Vidas post-it (Xerais) estarán
en A Reserva. Para rematar este trimestre, Antón
Riveiro Coello, un dos escritores máis importantes
dos últimos anos, falará cos lectores
sobre a súa última novela, Os ollos
de K (Galaxia) o 26 de marzo en O Patacón.
[Máis
información]
|
|
A
plataforma cultural acolle o texto da obra, textos
do libro recitados e musicados pola autora e música
de ambientación de zoommm
zoommm
textos biónicos de Estíbaliz Espinosa
n'A Regueifa Plataforma
(10-Xaneiro-2008)
 A poeta, actriz e cantante coruñesa Estíbaliz Espinosa ven de publicar n'A
Regueifa Plataforma o seu último traballo, zoommm textos biónicos. Un
poemario que se acompaña con Paleolithics, banda sonora creada para a
ocasión pola propia Estíbaliz. Como complemento, tamén inclúese textos do libro
recitados e musicados pola autora.
Estíbaliz Espinosa ten no seu haber os premios Esquío 1999 por Pan (libro
de ler e desler) e o Espiral Maior de poesía 2002 por número e, ademais de
participar en numerosas antoloxías e volumes colectivos.
A Regueifa Plataforma é un netlabel sen ánimo de lucro dende o que todos
aqueles creadores e creadoras que o desexen poden difundir, distribuír e amosar
a súa obra baixo licenza Creative Commons. Na súa web tamén está dispoñible os
traballos de María Lado, de Antía Sánchez ou de Pedro Lamas entre moitos máis.
[zoommm
textos biónicos]
|
|
Aniversario
dun dos Premios máis importantes do panorama
literario galego
25
anos de Premios Xerais
(07-Xaneiro-2008)
 Neste 2008 cúmprense 25 anos de Premios Xerais, un dos acontecementos máis
importantes e de maior tradición nas letras galegas.
Foi en 1984 cando Carlos G. Reigosa conseguiu o primeiro premio Xerais de Novela cun
dos best-seller da literatura galega, Crime en Compostela, o comezo dos
casos do
detective Nirvardo Castro, e que xa vai pola súa 14ª edición. Desde entón,
autores da categoría de Darío Xohán Cabana, Anxo Angueira, Xosé
Miranda ou Teresa Moure fixéronse con tan prezado galardón, até chegar á obra
premiada no 2007, Cardume, de Rexina Vega.
Dous anos despois do premio de Novela, Xerais organiza o Merlín de
Literatura Infantil, que este ano cumpre a súa 23ª edición, desde aquel 1986
cando A casa abandonada de Úrsula Heinze puxo en marcha este premio. Ao longo
destes anos algúns dos máis importantes
escritores para rapaces acadaron este premio: Marilar Aleixandre, Agustín
Fernández Paz, Xosé A. Neira Cruz ou Antonio García Teijeiro até Carlos López,
que fíxose co Premio da última edición con Minimaladas.
O premio de máis recente creación é o Premio Fundación Caixa Galicia de
Literatura Xuvenil, que este ano chega a súa 3ª edición. Jaureguizar con A cova
das vacas mortas, e An Alfaya, con Illa Soidade, foron os gañadores da primeira
e segunda edición, respectivamente.
Xa está aberto o prazo de presentación de orixinais para as tres
categorías. Os interesados deberán enviar seis copias antes do día 7 de abril
do 2008. No mes de maio darase a coñecer os membros do xurado, que emitirá os
fallos no curso da Cea "Xerais" que se celebrará o día 7 de xuño.
[25ª
edición dos Premios Xerais de Novela]
[23ª
edición dos Premios Merlín de Literatura
Infantil]
[3ª
edición dos Premios Fundación Caixa
Galicia de Literatura Xuvenil]
|
|
O
libro recolle desde a segunda metade do século
XIX até os acontecementos ocorridos nos últimos
trinta anos
O
mundo do traballo en Galicia percorre a historia
do movemento obreiro galego
(06-Xaneiro-2008)
 A
Consellería de Traballo e o Departamento de Historia Contemporánea da Universidade de Santiago de
Compostela, baixo a dirección do catedrático Ramón Villares,
auspician O mundo do traballo en Galicia,
un libro que recolle a historia do movemento obreiro
galego, a autoría parte dos doutores en Historia Margarita Barral e Antonio Míguez.
Segundo Villares, o libro está dirixido “ao público interesado na cuestión
social e obreira da Galicia contemporánea, máis que a un público
especializado e académico”. Non obstante, precisa, “trátase dunha obra
de alta divulgación, que tenta trasladar á sociedade algúns dos
resultados da investigación desenvolvida nos últimos decenios sobre
esta materia”.
Son máis de 150 as páxinas que compoñen esta publicación, de amplo
formato e a toda cor, que inclúe máis de 170 imaxes que resultarán
sumamente atractivas e chamativas para o lector: fotografías de escenas
de traballo de comezos do século XX; reproduccións de publicacións que
datan mesmo de finais do século XIX; gravados correspondentes a
situacións de traballo tamén anteriores ao século XX; reproduccións de
manifestos obreiros, carteis de irmandades ou de primeiras planas de
xornais da época...
A obra está composta por catro partes, precedidas dunha introdución
baixo o título Trazos do obreirismo galaico, a cargo do coordinador do
proxecto. A continuación, o lector fará un ilustrador percorrido pola
historia do traballo en Galicia, a través dos capítulos O nacemento do
movemento obreiro, A grande mudanza (Obreirismo no primeiro terzo do
século XX), O período franquista (Dos anos do chumbo ao novo
sindicalismo) e O período democrático.
[Máis
información]
|
|
Ofertaranse
obradoiros e conferencias impartidas polos máis
prestixiosos especialistas
Nace
o Espazo Literario Caixanova con iniciativas por
toda Galicia
(03-Xaneiro-2008)
 O Espazo Literario Caixanova nace coa
idea de servir de plataforma para a organización dunha serie de
actividades en torno á literatura.
No marco do Espazo Literario
Caixanova organizaranse obradoiros, de temática variada,
estendendo este labor por toda Galicia e diversificando a oferta
formativa neste ámbito artístico. Así, ao longo de 2008, ofertaranse
obradoiros de narrativa, de poesía, de perfeccionamento de relato, de
creación literaria, de lectura, de voz y un especificamente pensado
para maiores, que estará centrado na súa experiencia vital e que ten a
intención de que convertan a súa memoria en literatura. Todas estas actividades estarán
dirixidas por escritores e críticos literarios de recoñecido prestixio
na nosa comunidade e, ademais, recibirán mensualmente visitas de
importantes persoeiros relacionados co mundo cultural e literario
galego (escritores, axentes literarios, editores, periodistas
especializados...). Así mesmo, está prevista a publicación dun libro
que recollerá, como mínimo, un traballo de cada un dos participantes
nos distintos cursos.
Ademais dos obradoiros, o Espazo
Literario Caixanova organizará entre os meses de xaneiro e maio, un
ciclo de conferencias con escritoras e escritores galegos baixo o
título "Os camiños da literatura galega". Algúns dos máis sobresaíntes
escritores de Galicia percorrerán as principais cidades da nosa
comunidade establecendo encontros e debates co público.
A oferta complementase coa posta en
marcha dun Premio Escolar que pretende implicar a alumnos de Ensinanza
Secundaria Obligatoria de toda Galicia e dun blog
(http://www.centrosocialcaixanova.com/blogs/literatura), que está xa en
funcionamento e que permite aos asistentes dos obradoiros participar
dunha forma activa nun foro de debate literario y de reflexión
compartida.
AXa
está aberta a inscrición nos obradoiros
de Lectura (impartido por Ramón Nicolás)
e o obradoiro de voz expresiva (impartido por Alicia
Borrás).
[Máis
información e listaxe de actividades]
|
|
Analízase
polo miúdo todos os acontecementos culturais
que nos agarda no 2008
O
Anuario 2008 de culturagalega.org fai un repaso
de todo o acontecido no 2007
(02-Xaneiro-2008)
 O
Consello da Cultura Galega publicou o Anuario 2008
onde se destaca o máis importante acontecido
no ámbito cultural do noso país.
O
anuario está dividido en diferentes seccións:
arte, ciencia e tecnoloxía, comunicación,
espectáculos, historia, lingua, literatura,
medio ambiente, sociedade e música e cronolóxicamente
por meses.
Polo
miúdo analizan as dez chaves para entender
este 2007 que xa rematou (a visibilidade exterior, a
efervescencia creativa na
música e no cómic, os proxectos de desenvolvemento da Cidade da Cultura, as polémicas ambientais...)
e todo o que nos agarda no 2008 que ven (o centenario do pasamento de Manuel
Curros Enríquez, as vodas de prata do Consello da Cultura Galega, os
quince anos do Centro Galego de Arte Contemporánea, a aprobación da Axencia Galega das Industrias Culturais, sermos país convidado en Brest ou na Feira do Libro de
La Habana, a segunda canle da Televisión de Galicia...).
En
canto a literatura repásanse os sete millóns
de euros que puxeron en marcha a Lei do Libro e
da Lectura, Culturgal, o canon bibliotecario, os
premios Xerais ou o Premio Nacional de Literatura
Dramática a Rubén Ruibal.
[Anuario
2008 de culturagalega.org]
|
|
Do
artista ourensán quedará a súa
obra inmortal
Deixounos
Xaime Quessada
(02-Xaneiro-2008)
 O pasado 31 de decembro finou á idade de 70
anos o pintor, escultor e escritor Xaime Quessada. Xaime Quesada Porto naceu en
Ourense en 1937. Ós 14 anos coñece a Picasso e en 1956 marcha a estudiar a
Madrid na Escola Superior de Belas Artes de San Fernando, onde entra en
contacto con algúns dos sectores de oposición á Dictadura. De novo en Galicia
forma con Acisclo Manzano e con José Luis de Dios o grupo “Volter” inspirado por Vicente Risco e Ramón Otero Pedrayo. No ano 66 crea o grupo “7 artistas galegos” que integra xunto a
Virxilio, Xavier Pousa, Arturo Baltar y Manuel García Buciños, máis os
outros dous membros de “Volter”.
Home profundamente galeguista, comentaba hai
tempo nunha entrevista a La Voz
de Galicia que ao redor da mesa padiola dos Quessada formouse o embrión da UPG,
aínda que por diferenzas desertou ao poco tempo e pasou ó Partido Comunista.
Na súa faceta como escritor destacan Cuentos
crueles, Lucenza, El Recristo del Baraña ou El olvido.
Este 2008 comeza
sen un dos nosos artistas máis importantes e con máis proxección mundial.
|
|