III Encontro de Novos Escritores "Entre dous séculos"

O Pazo de Mariñán converteuse esta fin de semana en punto de encontro de dúas xeracións de escritores e escritoras

(29-Setembro-2008)

O Pazo de Mariñán acolleu o venres e o sábado o III Encontro de Novos Escritores que baixo o título "Entre dous séculos", organizou a Asociación de Escritores en Lingua Galega, en colaboración coa Dirección Xeral de Xuventude e a Deputación da Coruña.

Na presentación do Encontro celebrada no Museo de Belas Artes da Coruña, o presidente da AELG, Cesáreo Sánchez -que estivo acompañado polo director xeral de Xuventude Rubén Cela, e por Antía Otero, vicepresidenta da asociación-, afirmou que as xornadas “queren ser un lugar de encontro, unha terra de liberdade para a reflexión, un lugar para que os propios protagonistas do feito literario e máis do devir da escrita máis nova poñan en común puntos de concordancia e de diverxencia que os sitúen nun mesmo sistema literario”. Máis tarde, referíndonse aos participantes, Cesáreo Sánchez dixo que “eles son non só o futuro, eles e elas son xa o presente da literatura viva dunha das máis vellas e cultas nacións de Europa”, engadindo que “teñen a responsabilidade de situar ao noso idioma no día a día, de dotalo da necesaria xuventude para seguir sendo instrumento de comunicación e coñecemento”.

Xa no Pazo de Mariñán, celebrouse a primeira das mesas programadas, baixo título “Cartografías literarias no novo século”, na que interviron Oriana Méndez, Mario Regueira e Rubén Ruibal, coordinados por María Xesús Nogueira. A modo de resumo, considerouse que a literatura galega debería asumir con orgullo os apelativos de anormalidade ou subalternidade, asumir os chamados estigmas e persistir neles como única solución de continuidade. E así é porque, según se dixo no transcurso da mesa, a relación de poder e a subalternidade foi a que produciu a nosa literatura tal e como é, e foi esa necesidade de diferenciación, o seu exercicio de resistencia o que a configurou como unha das literaturas máis orixinais e arriscadas de Europa. No noso sistema literario –engadiuse- temos asistido a un pular sen precedentes das minorías: a presenza inédita en número de creadoras femininas, o papel dos grupos literarios heterodoxos e abertos, a importante presenza de proxectos de autoedición, ou nos últimos anos, a aposta por novas vías, como a videocreación ou a ciberliteratura, que rachan coas nocións tradicionais de xénero e co propio concepto de creación literaria.

“Presencia e invisibilidade das/os escritores/as na sociedade actual” foi o título que acolleu a segunda mesa desta primeira xornada do congreso, na que interviron Ana Acuña, Iolanda Aldrei e Samuel Solleiro, coordinados por Elvira Riveiro. Un proceso literario é –asi se dixo- unha situación comunicativa complexa cunha serie de factores que condicionan o grao de visibilidade de un escritor ou escritora en determinada micro ou macro sociedade e tempo. O creador xoga nunhas coordenadas múltiples entre as que o grao de proximidade ou distanciamento a respecto dos medios difusores da súa obra, dos canais comunicativos, é decisivo á hora de tornar efectivo o propio proceso da emisión literaria. O distanciamento deses medios –estimouse- pode ser consecuencia de orixes periféricas, valoracións críticas, incomunicación, diferencia entre as capacidades técnicas ou económicas das entidades difusoras e as esixencias da obra, etc… mais tamén pode corresponderse cunha cualificación do texto como disidente a respecto do sistema no que se inxiren eses medios.

Dúas mesas, relacións entre Literatura e novas tecnoloxías e Literatura, sociedade e nación pecharon a derradeira xornada do III Encontro.

Na primeira das mesas desta derradeira xornada, que baixo o título "A literatura. Internet e novas tecnoloxías" contou coa participación de Lara Bacelo, Leo Campos e Eduardo Estévez, coordinados por Francisco Castro, analizouse o cambio tecnolóxico revolucionario que, no que respecta á poesía, ofrece dous aspectos a ter moi en conta: novos sistemas de reprodución e o acceso doado ás novas ferramentas expresivas. Unha das máis relevantes é a rede. Internet ofrece un espazo de reprodución ilimitado. Con Internet, o soporte libro é substituído por un documento de texto ou un pdf. As páxinas web son o modo de distribución. Neste proceso, segundo se comentou, os medios de edición son, en xeral, independentes (un exemplo poden ser as comunidades de bitácoras ou blogs), con estratexias e regras novas pero que procuran o mesmo obxectivo de sempre: atraer público, e incluso transformarse en soporte. Finalmente, plantexouse no debate a proposta de publicar os novos textos na rede para deixar de bater contra os muros dos premios literarios e as editoriais.

Na segunda mesa celebrada nesta derradeira xornada participaron os autores Carlos Negro e María Reimóndez, coordinados por Marta Dacosta. En "Literatura, sociedade e nación" falouse dos inicios do que hoxe chamamos Promoción dos 90, centrados na loita contra a frivolidade da movida e contra o culturalismo innecesario; unha xeración de autores comprometidos coa lingua e co país, formados no noso idioma e na nosa literatura, por veces, tal como se dixo, con máis paixón que coñecemento, desexosos de sinceridade e de engaloiar pola poesía, de render os lectores, de convertelos en poetas tamén.

O III Encontro de Novos Escritores "Entre dous séculos" pechou cun recital poético celebrado no Museo de Belas Artes da Coruña, no que participaron María Lado, Lucía Aldao, Emma Couceiro, Celso Sanmartín, Estíbaliz Espinosa e O Leo, rematando coa actuación de García, membro do grupo Dios Ke te Crew. 

O xurado decidiu por unanimidade concederlle o galardón a Mensaxes

Mariano Casas Gil, novo gañador do premio "Castelao" de banda deseñada

(26-Setembro-2008)

O pintor e ilustrador Mariano Casas Gil, coa súa obra Mensaxes, é o gañador da cuarta edición do premio "Banda Deseñada Castelao", convocado pola Deputación da Coruña. O premio foi dado a coñecer onte na sede de Deputación da Coruña, polo presidente provincial, Salvador Fernández Moreda, que sinalou que o xurado decidiu por unanimidade seleccionar o traballo de Casas Gil entre as cinco creacións presentadas a esta edición do certame.

Ademais de Salvador Fernández Moreda, o xurado estivo integrado polo comisario do premio, o ilustrador coruñés Miguelanxo Prado, así como a deputada responsable da área de Cultura, Caridad González Cerviño; Horacio Altuna, Ángel de la Calle, Agustín Fernández Paz e Carlos Portela.

O xurado estima que a obra galardoada é "un magnífico libro que narra unha historia asentada nun guión de insólita solidez e unha proposta formal, sinxela e eficaz que, nun orixinal artificio metalingüístico, xoga un papel decisivo na narración". "Nunha situación límite, unha parella pasa as súas últimas horas de vida narrando, coa linguaxe da banda deseñada, o que lle está a acontecer. Fan isto porque "se algunha arte pode ser testemuña do futuro dos nosos tempos, iso sería ou cómic, as únicas narracións visuais que viaxarán non tempo", como afirman nun momento dado", segundo o subliñado polo voceiro do xurado, e comisario do premio, o debuxante galego Miguelanxo Prado. Tamén sostén o xurado que "deste xeito, conforme vai avanzado a historia, asistimos a sucesivos golpes de efecto narrativo- temáticos e formais- que nos levan fascinados ata as extraordinarias páxinas finais".

Con esta argumentación conceptual fundamentou o xurado a súa decisión de outorgar por unanimidade de todos os seus membros o premio a Mariano Casas Gil, cuxa creación, segundo Miguelanxo Prado, "tendo un estilo gráfico moi marcado, que se afasta dos estándares máis comerciais, constrúe unha narración que incardina con ese discurso visual". "A simbiose entre as dúas linguaxes é fundamental", aseverou o comisario do premio de banda deseñada Castelao 2008. Respecto ao número de creacións, -cinco en total- Miguelanxo Prado sinalou "a presentación de traballos a este tipo de premios é irregular, pois esíxese a obra finalizada".

En edicións pasadas, este premio foi acadado por David Rubín e o seu Onde ninguén pode chegar na primeira edición, Un home feliz de Antonio Seijas na segunda e As avanturas de Cacahuequi de Jacobo Fernández na edición do ano pasado.

Xosé Luís Martínez Pereiro xa foi gañador do premio de narracións Carvalho Calero e do Cidade de Coruña de literatura fantástica

A verdade como mal menor, obra premiada no premio Repsol YPF de Narrativa Breve

(25-Setembro-2008)

A obra A verdade como mal menor, de X.L. Martínez Pereiro, vén de recibir o premio Repsol YPF de Narrativa Breve, que convoca anualmente a factoría coruñesa coa colaboración da Secretaría Xeral de Política Lingüística e Editorial Galaxia.

A plica abriuse diante dos xornalistas na Fundación Luís Seoane da Coruña. Encargouse de facelo o catedrático da Universidade de Santiago e crítico literario, Anxo Tarrío. En opinión do xurado, trátase dun libro imaxinativo, desenfadado e culto, que o secretario do xurado relacionou coa tradición de Borges e con autores galegos como Carlos Casares ou Álvaro Cunqueiro. Componse de 45 relatos que viaxan entre a reflexión e a ficción, a imaxinación e o humor, con intelixentes doses de erotismo.

Angel Crespo, novo responsable da factoría coruñesa de Repsol YPF amosou a súa satisfacción coas convocatorias anteriores do premio e reafirmou o seu compromiso co mesmo e coa narrativa galega. De feito, nesta convocatoria acudiron 32 orixinais (un 64 % máis ca na convocatoria anterior). Marisol López, secretaria xeral de Política Lingüística, salientou a colaboración entre a sociedade civil (a iniciativa das empresas privadas) e as institucións da cultura, para construir entre todos unha base social sólida para a narrativa e a lingua galega.

O libro estará nas librerías o próximo mes de novembro, segundo se anunciou na rolda de prensa, e confirmouse a iniciativa que xa se puxo en marcha na edición anterior (Así nacen as baleas, de Anxos Sumai): expositores co libro en todas as gasolineiras da compañía, ademais dos lanzamentos tradicionais nos circuitos de comercialización do libro.

Xosé Luís Martínez Pereiro (A Coruña, 1959) é autor dunha xa extensa produción literaria (teatro e narrativa), ademais de debuxante e músico. Formou parte da embaixada que representou ao humorismo gráfico galego na VIII Bienal do Humor celebrada en Cuba (1993) e participou en numerosos salóns e eventos desta especialidade. Colaborou e colabora en moi diversas publicacións, dentro e fóra de Galicia. Entre os seus libros salientan Amálgama de desquiciados (Baía), As irmás bastardas da ciencia (Laiovento, Premio da narracións Carvalho Calero) e Breviario de calamidades (Espiral Maior). No ano 2000 esta mesma editorial publica Medición definitiva do limbo (Premio Cidade da Coruña de Literatura Fantástica).  

A Universidade de Vigo acolle o II Congreso Internacional 'Tradución e políticas editoriais'

Valentín Arias será homenaxeado no Día Internacional da Tradución

(25-Setembro-2008)

O 30 de setembro é o Día Internacional da Tradución, cando o gremio de tradutores celebran o seu patrón, San Xerome. Dentro dos diversos actos que conmemorarán este día, a Consellería de Cultura e Deporte quere celebralo cunha homenaxe ao tradutor Valentín Arias e coa organización dunha xornada sobre terminoloxía.

Os actos do Día Internacional da Tradución iniciaranse o luns 29 de setembro coa celebración en Vigo da Xornada "Terminoloxía: palabras que contan". Terá lugar na Facultade de Filoloxía e Tradución da Universidade de Vigo, organizada en colaboración coa Asociación de Tradutores Galegos e a Asociación Galega de Profesionais da Tradución e da interpretación. A xornada desenvolverase ao longo da mañá. Abrirase cunha conferencia sobre "Terminoloxía en Galiza: tesouros novos e vellos" a cargo de Iolanda Galanes, presidenta da Sociedade Galega de Terminoloxía. A continuación presentaranse varios proxectos nos eidos da tradución e a terminoloxía. A xornada rematará cunha mesa redonda sobre "Terminoloxía e interpretación".

O 30 de setembro a Consellería de Cultura recoñecerá o traballo desenvolvido por Valentín Arias, un dos máis grandes tradutores de Galicia. Será nun acto no Auditorio do Centro Sociocultural Caixanova de Vigo ás 19.00 h., no que intervirá a conselleira de Cultura e Deporte, Ánxela Bugallo.

Vicente Arias López naceu en Sarria en 1934. En 1969 comezou a traballar coa Editorial Galaxia. Foi membro fundador en 1984 da Asociación de Tradutores Galegos, da que foi presidente. Traduce fundamentalmente do francés, do portugués e do español. En 1989 recibiu o premio Ramón Cabanillas de Tradución, e o Premio de Tradución Xuvenil do Ministerio de Cultura. Entre as súas moitas traducións atópanse as obras de Jules Verne A volta ao mundo en oitenta días, Viaxe ao centro da terra e Da Terra á Lúa, Voo de noite de Antoine de Saint-Exupéry, O estranxeiro de Albert Camus e A fractura do miocardio de Jacques Fansten. Tamén traballou no equipo que traduciu O enxeñoso fidalgo don Quixote da Mancha. Ademais publicou numerosos artigos sobre a tradución e a función do tradutor, en especial en países con linguas minorizadas.

II Congreso Internacional 'Tradución e políticas editoriais'

A Facultade de Filoloxía e Tradución da Universidade de Vigo organiza para os días 15, 16 e 17 de outubro o II Congreso Internacional 'Tradución e políticas editoriais'. O congreso ten como obxectivos principais os de proporcionar un espazo de encontro para o estudo e a reflexión sobre a complexidade do fenómeno da tradución editorial, tanto dende a perspectiva do proceso coma do produto. Con este II Congreso quérese favorecer o intercambio de experiencias entre investigadoras e investigadores e os diferentes axentes que interactúan no proceso da tradución como produto definitivo que se presenta ao público consumidor.

Antonio Neira de Mosquera foi un dos precursores do Rexurdimento cultural galego do último terzo do século XIX

Alvarellos rescata La marquesa de Camba, inédita desde 1848

(24-Setembro-2008)

Alvarellos Editora e o Consorcio de Santiago veñen de recuperar, na Colección Rescate, unha novela histórica galega que permanecía totalmente esquecida: trátase de La marquesa de Camba, do xornalista compostelán Antonio Neira de Mosquera.

Trátase dunha historia real publicada por vez primeira –e única, ata hoxe– en Madrid en 1848. O relato narra o asasinato, en xuño de 1366, ás portas da Catedral de Santiago, do arcebispo don Suero Gómez de Toledo mailo seu deán Pedro Álvarez. Un suceso que conmocionou á sociedade da época. Os exemplares da primeira edición de 1848 foron axiña retirados pola censura, co que o libro pasou a ser un obxecto de culto, inexistente ata hoxe na maior parte das bibliotecas e arquivos.

Esta edición, ao coidado de Xosé Ramón Fandiño, é a primeira dende aquela de 1848 (exceptuando a tradución ao portugués aparecida en Porto en 1852). Xosé Ramón Fandiño sinala, no amplo e documentado estudo introdutorio, que “partindo do feito real do asasinato de don Suero, Neira constrúe o seu relato ou novela histórica utilizando a técnica romántica de recrear o ambiente medieval de castelos feudais [aparece, en varias ocasións, o Castelo da Rocha], preferencia por paisaxes nocturnas, tormentas e naufraxios marítimos, e introduce a novidade de concederlle a categoría de personaxe central, en detrimento do seu fillo Fernán Pérez, á Marquesa de Camba”.

O editor Henrique Alvarellos mostra o seu agradecemento “ao Consorcio de Santiago, pois a súa participación, como co-editor, nesta obra, permítenos apostar por edicións moi coidadas e contribuír a rescatar textos importantes para a historia de Santiago e de Galicia como é esta novela”.

Antonio Neira de Mosquera (Santiago, 1823- 1854) foi un dos precursores do Rexurdimento cultural de Galicia do último terzo do século XIX. Pertenceu a unha xeración de mozos universitarios, optimistas, loitadores, agrupados na Academia Literaria de Santiago (fundada en 1831), na que tamén atopamos a Añón, os irmáns Faraldo e Camino, Rúa Figueroa, Romero Ortiz... Tal e como recolle Xosé Ramón Fandiño no limiar de La marquesa de Camba, Neira de Mosquera cultivou todos os xéneros literarios (articulista, novelista, dramaturgo, crítico histórico e literario, monografías...). Como xornalista foi director de El Recreo Compostelano, con Antolín Faraldo como director adxunto. Para Benito Varela Jácome "Neira era el escritor más versado en la historia compostelana". Neira de Mosquera morreu aos 31 anos de idade, en Compostela, un 9 de xullo de 1854.

XVIII edición do Premio Ourense de Banda Deseñada

O Sistema de Bibliotecas Municipais da Coruña resulta premiado polo seu traballo de divulgación e promoción da banda deseñada

(23-Setembro-2008)

O Premio Ourense de BD, que outorgan anualmente a Casa da Xuventude de Ourense e mais a Concellaría de Cultura do Concello de Ourense para distinguir as máis importantes iniciativas e traxectorias dentro do panorama da banda deseñada galega, recae este ano 2008 no Sistema de Bibliotecas Municipais da Coruña, polo seu labor de divulgación e promoción da banda deseñada nos últimos anos.

O grupo de traballo formado por Fátima Elías, Iván Serrano e Julio Pesquera e dirixido por este último encárgase, desde hai catro anos, de dar especial atención ás actividades relacionadas co cómic, na procura de reivindicar a novena arte dentro das bibliotecas, a través de conferencias e presentacións, talleres de lectura e de creación, e actividades de difusión dos fondos: nomeadamente, o activo blog Fancomic.es, onde se ofrecen noticias do mundo da BD xunto con comentarios sobre novidades editoriais que se poden encontran nos seus fondos, e mais o servizo de noticias mediante SMS.

Ao traballo cotián a prol da banda deseñada entre os usuarios e os que non o son, hai que engadir o feito para o propio sector profesional, como a continuada participación en defensa da BD en distintos congresos de bibliotecarios; ten, ademais, importancia clave a súa participación na conformación do grupo de bibliotecarios «Comicteca», de ámbito peninsular.

O Sistema de Bibliotecas Municipais coruñesas componse dunha oficina coordinadora, catro bibliotecas de barrio (O Castrillón, Fórum Metropolitano, Monte Alto e Sagrada Familia), a Biblioteca Infantil e Xuvenil e a Biblioteca de Estudos Locais, e son a Infantil e Xuvenil e a do Fórum Metropolitano as que encabezan esta reivindicación da banda deseñada, cunha colección que xa supera os 8.000 títulos e que conta en custodia co fondo da colección persoal do malogrado Toñito Blanco.

O Premio Ourense de BD chega así á súa décimo oitava edición. Será entregado durante o acto de inauguración das XX Xornadas de Banda Deseñada de Ourense, o próximo 1 de outubro.  

Até o de agora, foron galardoados co Premio Xaquín Marín, Agustín Fernández Paz, Edicións Xerais, Miguelanxo Prado, A Nosa Terra, o equipo de «A Familia Perpetua» (Carvallo, Héitor e Robledo), a Deputación da Coruña, a Biblioteca Club 33 de Santiago, Fausto Isorna, o programa Xabarín Club, o Festival Viñetas desde o Atlántico, Fran Jaraba, a Deputación de Lugo, o Consello da Cultura Galega, a revista Golfiño, Pepe Carreiro, o Colexio de Arquitectos de Galicia, a revista BD Banda, a Libraría Paz e o Colectivo Polaqia.

 [fancomic.es]

Na Facultade de Filoloxía da USC os días 16 e 17 de outubro con entrada libre e de balde

Un Seminario internacional analizará o papel na literatura das poetas de Galicia e Irlanda

(22-Setembro-2008)

A Facultade de Filoloxía da Universidade de Santiago acollerá os días 16 e 17 de outubro o Seminario Internacional Creación, Edición e Crítica: poetas galegas e irlandesas, organizado polo Grupo de investigación Poesía e Xénero da USC co apoio da Asociación de Escritores en Lingua Galega e a colaboración de CEDRO, do Ministerio de Educación e Ciencia e a Universidade de Santiago.

Neste seminario internacional, onde se reunirán representantes do mundo editorial, da crítica e da creación poética, tanto de Galicia como de Irlanda, ten como obxecto poñer en común as súas experiencias en relación ao fenómeno recente da emerxencia de mulleres poetas en ambas comunidades. Neste seminario preténdese darlles a palabra ás escritoras, quen dialogarán cos críticos/as e editores/as sobre as relacións entre a creación, a edición e a crítica.

Programa do Seminario. Todas as actividades no Salón de Graos da Facultade de Filoloxía (Avda. de Castelao s/n - Campus Norte) da Universidade de Santiago

Xoves, 16 de outubro

9.30 h. Inauguración do Seminario: Realidade lingüística e sistema literario en Galicia e Irlanda. Interveñen: Mª Xesús Nogueira Pereira, Cesáreo Sánchez Iglesias, Celia de Fréine e Mercedes Queixas

11.00 h. Mesa I: Muller, poesía e edición. Coordinado por Laura Lojo Rodríguez. Intervencións das participantes: María Lado (poeta galega), Celia de Fréine (poeta irlandesa) e Jessie Lendennie (de Salmon Publishing). Tradución e sumarios: José María Díaz Lage e Dolores Rodríguez Pazo

13.00 h. Debate moderado por Helena Miguélez Carballeira

16.30 h. Mesa II: Muller, poesía e edición. Coordinada por Mª Xesús Nogueira Pereira. Sumario do debate da Mesa I por parte de José María Díaz Lage. Intervencións dos/das participantes: Mª do Carme Kruckenberg (poeta galega), Kerry Hardie (poeta irlandesa) e Fran Alonso (de Edicións Xerais). Tradución e sumarios: Teresa Pérez Tilve e Dolores Rodríguez Pazo

18.30 h. Debate moderado por Sean Hardie e Jorge Sacido Romero

20.00 h. Recital poético na Libraría Couceiro (Pza. de Cervantes, 6). María Lado, Kerry Hardie, María do Carme Kruckenberg e Jessie Lendennie

Venres, 17 de outubro

9.30 h. Mesa I: Muller, poesía e crítica, coordinada por Manuela Palacios. Intervencións das participantes: Marilar Aleixandre (poeta galega), Kerry Hardie (poeta irlandesa) e Irene Gilsenan-Nordin (crítica da poesía irlandesa). Tradución e sumarios: Teresa Pérez Tilve e Dolores Rodríguez Pazo

12.00 h. Debate moderado por José Francisco Fernández Sánchez

16.30 h. Mesa II: Muller, poesía e crítica, coordinada por José María Díaz Lage. Sumario do debate da MESA I por parte de Teresa Pérez Tilve. Intervencións dos/das participantes: Xiana Arias (poeta galega), Celia de Fréine (poeta irlandesa) e Ramón Nicolás (crítico da poesía galega).Tradución e sumarios: Dolores Rodríguez Pazo e Teresa Pérez Tilve

18.30 h. Debate moderado por María do Cebreiro

20.00 h. Recital poético na Libraría Couceiro (Pza. de Cervantes, 6). Marilar Aleixandre, Celia de Fréine, Xiana Arias, María do Cebreiro e Luz Pichel

A entrada ás mesas, debates e recitais é libre e de balde.

[Descargar programa]

As publicacións de USC Editora organizaranse en tres grandes liñas editoriais: Académica, Docencia e Ensaio

A Universidade de Santiago crea un novo selo editorial, USC Editora

(19-Setembro-2008)

A Universidade de Santiago crea, no marco do Servizo de Publicacións e Intercambio Científico, un novo selo coñecido como USC Editora. Esta iniciativa introduce criterios de calidade que reforzan os xa existentes e que serán aplicados por editores especializados nas cinco grandes áreas de coñecemento que revisarán os orixinais, tendo en conta os consellos achegados por expertos alleos á USC. Cumprirase, deste xeito, coas esixencias de organismos oficiais relacionados coa investigación, como explica o responsable académico do Servizo, Antonio Azaustre. O proxecto recólleo o novo regulamento que foi aprobado no mes de xullo en Consello de Goberno e que entrará en vigor o vindeiro 15 de outubro.

As publicacións de USC Editora organizaranse en tres grandes liñas editoriais: Académica, Docencia e Ensaio. Dentro delas poderán existir coleccións que estarán sempre actualizadas na páxina web do Servizo. Incluiranse tamén as revistas científicas da Universidade que reúnan as características esixidas pola Comisión de Publicacións.

Ademais de USC Editora, Azaustre adianta que axiña contarán cunha nova páxina web para facilitar a compra en liña e a actualización continua do catálogo. Tamén venderán os manuais elaborados polos profesores, das que o director académico do Servizo destaca como “as publicacións máis demandadas polo público e que deben estar máis presentes entre a comunidade universitaria”.

O Servizo de Publicacións e Intercambio Científico da Universidade de Santiago de Compostela edita, distribúe e intercambia libros e teses de doutoramento que son resultado da investigación dos profesores da Universidade xunto con revistas científicas de diversas áreas do coñecemento. O fondo editorial recóllese, ademais, no seu Catálogo de Publicacións que se edita anualmente en formato impreso. Ao mesmo tempo, intercambia os libros e revistas con máis de mil centros universitarios e institucións científicas e de cultura de todo o mundo.

O Servizo, que xurdiu en 1945 baixo o nome de Secretaría de Publicacións da USC, comezou informalmente antes desta data “coas creacións esporádicas dos textos máis antigos na Universidade”, como apunta a directora técnica Marisa Melón.

Coas obras seleccionadas preténdese achegar aos lectores obras de diversas temáticas

Arranca a segunda etapa dos Clubs de Lectura de Pontevedra

(18-Setembro-2008)

A delegada provincial de Cultura e Deporte, Mª Xesús López Escudeiro, a concelleira de Cultura do Concello de Pontevedra, Dolores Dopico, e a coordinadora dos clubs de lectura, Eva López Rodríguez, presentaron esta mañá a segunda etapa dos clubs de lectura da cidade teucrina. A campaña literaria reanúdase o próximo mes de outubro en tres emprazamentos: na Biblioteca Pública de Pontevedra, na Axencia de Lectura de Santa María de Xeve e no local da Asociación Sociocultural do Burgo.

Nesta segunda fase dos clubs de lectura, as obras seleccionadas abranguen pezas clásicas universais, como As ondas (Galaxia) de Virxina Woolf ou Madame Bovary (Galaxia) de Flaubert, novelas contemporáneas como Deshonra (Rinoceronte) do Premio Nobel surafricano Coetzee, e textos galegos como Morning Star (Xerais), de Xosé Miranda.

Outras das obras que se abordarán nesta segunda edición dos clubs de lectura en Pontevedra son: Eu servín ao rei de Inglaterra (Rinoceronte), do checo Bohumil Hrabal, Os ollos de K (Galaxia) de Antón Riveiro Coello, obra con toques de novela negra; As palabras da néboa (Galaxia) de Francisco Castro, texto de aventuras; ou Ácaros verdes (Ronsel) de Pilar Buela, unha recreación dos útlimos días de Adolf Hitler a través do testemuño ficticio de Eva Braun e Magda Goebbels, a esposa do coñecido ministro de propaganda nazi.

Todos aqueles interesados en participar nestes grupos de lectores poderán inscribirse a partir deste venres 19 de setembro a través do correo electrónico clublecturapontevedra@gmail.com. Ademais de asistir ás reunións, tamén se pode participar no debate mediante a rede, a través dos espazos www.blogoteca.com/clvpontevedra e www.blogoteca.com/clpontevedra. Unha opción que se inclúe debido á que ambas webs rexistraron na pasada edición unha extraordinaria actividade, recibindo máis de 6.000 visitas, demostrando o interese dos pontevedreses pola discusión literaria en grupo.

Con todos estes títulos quérese afondar no coñecemento dos lectores de obras dos máis variados estilos e autores, ampliando o criterio con respecto á edición anterior máis centrada na literatura galega.

L'eclat dans l'Abîmes foi publicada en Francia por Gallimard

Os libros arden mal de Manuel Rivas, finalista dos Premios Medicis

(17-Setembro-2008)

A edición francesa d’ Os libros arden mal atópase entre as obras finalistas que optan ao Premio Medicis, o máis importante da edición francesa, xunto ao Goncourt. Manuel Rivas, incluído no apartado de Literatura estranxeira, comparte deste xeito nómina de finalistas con autores como Richard Ford, Don De Dillo, Ian MaCwan ou Sasa Stanisic. L’ eclat dans l’ abîmes, publicada en Francia pola Editorial Gallimard, será presentada na libraría Le Merle Moqueur (Rue de Bagnolet, 51) de París o vindeiro 23 de setembro ás 19.00 h. nun encontro dos lectores e lectoras co autor galego.

Desde este Colectivo preténdese crear, ao longo do curso, Clubs de lectura infantil, xuvenil e de adultos

Así nacen as baleas de Anxos Sumai estreará a primeira sesión do Club de Lectura Casaescola

(17-Setembro-2008)

Con motivo da inauguración do presente curso escolar o Colectivo Casaescola dá comezo aos seus clubs de lectura. Trátase dun proxecto aberto e participativo a asociados ao Colectivo e aqueles lectores e lectoras interesados.

Este é o primeiro dos clubs que se porán en funcionamento este ano, máis adiante haberán outro infantil e outro da mocidade.

O próximo día 24 de setembro, ás 20.00 h. no Auditorio de Vilagarcía, comezarán coa presenza de autores próximos que naceron ou viven na comarca dúas propostas ben diferenciadas, unha para adultos e outra para os máis cativos.

A primeira proposta do Club de Lectura de Adultos é o libro Así nacen as baleas (Galaxia) de Anxos Sumai, nacida en Catoira; unha novela coa que gañou o premio Repsol de narrativa breve. Para o Club de Lectura de Infantil o Colectivo Casaescola está en conversas cos dous autores residentes en Cambados, Chema Heras e Xulio Gayoso, que iniciarán á súa vez este percorrido compartido de lecturas para os primeiros lectores de Vilagarcía días despois.

O acto está organizado pola AELG co patricinio da Deputación de Lugo e se celebrará o vindeiro 17 de outubro

Isidro Novo e Antonio Reigosa coordinan a 'I Xornada de Literatura Oral'

(16-Setembro-2008)

A Asociación de Escritores en Lingua Galega (AELG) organiza, co patrocinio da Área de Cultura da Deputación de Lugo, a 'I Xornada de Literatura Oral' que se vai desenvolver en Lugo o vindeiro 17 de outubro arredor do tema A figura do demo na literatura de tradición oral baixo a coordinación de Isidro Novo e Antonio Reigosa.

Os relatorios e mesas redondas, a cargo de especialistas como José Manuel Pedrosa, Xosé Miranda, Félix Castro Vicente e Peter Missler, vanse desenvolver no salón de Actos da Deputación Provincial (na rúa San Marcos s/n) con entrada de balde.

Paralelamente, poderase visitar na Sala de Exposicións da Deputación de Lugo a mostra Libros do demo: grimorios e ciprianillos, colección de xoias bibliográficas propiedade dos irmáns Félix e Cástor Castro Vicente.

 [Descargar programa]

Este ano creáronse axudas para a realización de probas de tradución para a exportación de libro galego cara o exterior

A Consellería de Cultura dedica este ano máis de 300.000 euros para a tradución

(15-Setembro-2008)

A tradución de obras editoriais doutros idiomas para o galego e desde o galego a outros idiomas atópase nun bo momento. A Consellería de Cultura e Deporte, a través da Dirección Xeral de Creación e Difusión Cultural dedica este ano 307.689 euros á subvencionar traducións e probas de tradución.

O director xeral de Creación e Difusión Cultural, Luis Bará, explicou hoxe na Comisión de Cultura do Parlamento as medidas que se están a desenvolver para promover a tradución editorial. Entre 2004 e 2008 Cultura incrementou no 241% as axudas destinadas a tradución de libros.

Con este incremento a Consellería quere facilitar que as nosas autoras e autores conten con vías para exportar a súa produción literaria a mercados exteriores noutras linguas. Ao mesmo tempo, procúrase facer posible que se poidan atopar no noso país e na nosa lingua textos significativos producidos no exterior, incluíndo obras de referencia clásicas e de actualidade.

O incremento das cantidades incidiu no aumento do número de traducións. Fronte ás 30 obras traducidas que recibiron subvención en 2004, o ano pasado foron 89, o que supón triplicar o número de obras aínda que se agarda que a cifra sexa superada este ano.

O aumento das traducións produciuse nas obras publicadas en galego desde outros idiomas, que pasaron de 16 a 63 obras, e tamén na cantidade de obras galegas que foron editadas noutros idiomas co apoio da Consellería, que se no 2004 eran 14, en 2007 pasaron a ser 26. Estas axudas permitiron a publicación de obras literarias galegas en castelán, catalán, inglés, francés, italiano e portugués, entre outros.

Este ano creouse ademais unha nova modalidade de axuda, a dirixida a probas de tradución, para as que se destinaron 25.000 euros. Trátase de apoiar a tradución a outras linguas de fragmentos de entre 100 e 1.000 palabras cos que se procura que as persoas ou entidades do exterior poidan formar unha primeira opinión con respecto da obra, para iniciar os contactos para a edición dese texto na súa lingua. Esta acción busca favorecer a exportación de textos de autores galegos a outras linguas. 

Kiko da Silva, Fran Bueno, Xaquín Marín, Fausto Isorno e Siro López

Algúns dos mellores ilustradores daranse cita na Biblioteca Municipal de Ferrol

(10-Setembro-2008)

A cidade de Ferrol terá a oportunidade de coñecer de primeira man as propostas dalgúns dos mellores representantes da banda deseñada, a ilustración e animación en Galicia a través dun novo programa que mañá xoves, 11 de setembro, dá comezo nun ciclo que ten como punto de encontro a Biblioteca Municipal.

En formato de charlas, pero tamén co evidente atractivo de poder contar en vivo coas ensinanzas e experiencias dos autores, que aportarán algunhas das referencias da súa técnica, danse a man, ao longo dos cinco próximos xoves, a partir das 19.30 h. e con acceso libre a tódolos interesados, Kiko da Silva, Fran Bueno, Xaquín Marín, Fausto Isorna e Siro López.

A proposta foi presentada onte pola concelleira de Cultura de Ferrol, Yolanda Díaz, como unha das máis novidosas aportacións do seu departamento cara á dinamización e o coñecemento da Biblioteca Municipal. Non é sen embargo a primeira experiencia. Díaz situouna de xeito continuado coas precedentes, como foi o Club de Lectura e o Club de Creación Poética, que terán continuidade. Precisamente este último contou, como o de agora, coa participación da Dirección Xeral de Creación e Difusión Cultural da Consellería de Cultura e Deporte a través do programa Letras Vivas.

Esta iniciativa constitúe unha aposta pola diversidade no marco da Biblioteca Municipal ao aportar novas referencias temáticas, como é o caso da ilustración, a animación e a banda deseñada, que contan con algúns dos principais referentes do país misturando a novos creadores, aínda que xa consagrados, con outros como Marín ou Siro, adiantados do seu tempo e que marcaron a impronta da viñeta crítica como unha referencia do xornalismo galego das últimas décadas.

A proposta ten tamén como obxectivo a achega de novos públicos á Biblioteca Municipal mediante unha programación alternativa. Neste caso, os xóvenes, e en xeral todos aqueles que teñen algunha inquedanza ou habilidade polo debuxo e o deseño, son a referencia incuestionable.

O programa que abre Kiko Dasilva mañá continúa o 18 de setembro coa participación de Fran Bueno. Xaquín Marín ofrecerá a súa charla o 25 de setembro, mentres que Fausto Isorna farano o 2 de outubro. Siro López clausura a iniciativa o 2 de outubro.

Do 4 ao 8 de decembro no Palexco da Coruña

Ábrese o prazo para inscribirse no Cultur.gal 08

(10-Setembro-2008)

O Cultur.gal 08, Feira Galega das Industrias Culturais, abre o prazo para que todas aquelas empresas e entidades que crean, distribúen, promocionan e ofrecen produtos e servizos relacionados coa cultura en Galicia poidan solicitar a súa participación no maior escaparate da creatividade galega. A solicitude de participación por parte das industrias culturais galegas pode facerse até o 10 de outubro.

Esta feira quere ofrecer unha visión integral da produción de contidos en Galicia incluíndo todos os ámbitos das industrias culturais: as artes escénicas, o audiovisual, o libro, a música, as novas tecnoloxías para a cultura e o lecer, os servizos socioculturais, etc.

Do 4 ao 8 de decembro no Palexco da Coruña haberá unha ampla programación, tanto xeral como profesional, con múltiples actuacións musicais, proxeccións, obradoiros, presentacións de libros e discos, actividades infantís, mesas redondas, foros, encontros, etc.

O Cultur.gal convértese, deste xeito, no escaparate ideal para as empresas culturais que queiran achegarlles os seus produtos e servizos a todos/as os/as profesionais e á cidadanía en xeral, unha oportunidade única para todas aquelas persoas que queiran coñecer a oferta cultural do país en todos os ámbitos e o mellor espazo de encontro e interrelación para todos/as os/as profesionais relacionados coa cultura en Galicia.

[Máis información]

Destácase un galega que se teña signaficado pola defensa dos valores culturais de Galicia

O xornalista e escritor Alfonso Sobrado Palomares, Premio "Celanova Casa dos Poetas"

(08-Setembro-2008)

Onte celebrouse en Celanova a entrega da XXIV edición do Premio "Celanova Casa dos Poetas" a Alfonso Sobrado Palomares.

Co gallo de lembrar cada ano a Manuel Curros Enríquez e a Celso Emilio Ferreiro, dúas das máximas figuras literarias da Galicia do século XIX e XX e dous dos máximos espoñentes da poesía civil a partir do Rexurdimento, nados, ámbolos dous, na popular “Calle Arriba” de Celanova, a Fundación Curros Enríquez en colaboración co Concello de Celanova, leva dende o ano 1985 organizando anualmente o premio “Celanova casa dos poetas” que pretende homenaxear un galego que ó longo da súa vida se teña significado pola defensa dos valores culturais de Galicia no máis amplo sentido da palabra.

O galardoado na edición deste ano, Alfonso Sobrado Palomares, é  un dos cumios do xornalismo de Galicia, xunto ós tamén ourensáns, Manuel Curros Enríquez ou Valentín Lamas Carvajal. Sobrado Palomares fundou e dirixiu revistas tan relevantes no panorama informativo estatal na segunda metade do século XX como “Posible”, “Ciudadano” e “Leer”, cabeceiras  tan aperturistas que a censura e os secuestros situou ó borde da quebra en repetidas ocasións durante o franquismo. Ademais, ó longo da súa traxectoria profesional, puxo en marcha as axencias “Radial Press” e “Delfos”.

Se ben, no seu papel no xornalismo non se limitou soamente á faceta de editor ou promotor de cabeceiras, senón que tamén exerceu a profesión no campo máis activo da mesma, chegando a entrevistar a persoeiros da talla histórica de Ben Bella, Tito, Fidel Castro ou Willy Brandt, que hoxe forman parte por dereito propio da Historia Universal. Así mesmo, durante un longo período de dez anos presidiu a Axencia EFEl. E iso sen esquecer xamais as súas orixes no planalto de Paradela (Calvos de Randín), ó pé das terras fronteirizas do Couto mixto, nin os seus comezos profesionais no xornalismo ourensán.

Como escritor, Alfonso Sobrado Palomares ten publicados máis de media ducia de libros de éxito, entre os que destaca “Amareite despois de sempre” e a biografía do ex-presidente do Goberno Felipe González, xunto a outros textos narrativos e poemas en galego que permanecen inéditos.

Os galardoados reciben unha medalla de prata, obra do escultor Acisclo Manzano, que reproduce por unha cara a casa de Curros Enríquez, e pola outra cinco “C” concéntricas que simbolizan a letra pola que comenzan os elementos identificativos deste premio “Casa, Curros, Celanova, Castor e Celso”. O nome de Castor refirese a Castor Elices, poeta romántico contemporáneo de Curros, que tamén naceu en Celanova. E o de Celso, identifica, evidentemente, ó tamén poeta Celso Emilio Ferreiro. O galardoado recibe tamén unha placa de prata na que se recolle un resumo da acta do acordo, co fin de dar fe da concesión do premio.
No acto de entrega, o premiado asina sempre no libro de honra do premio, acostumando a deixar unha frase para o recordo.

A lista de premiados do Casa dos Poetas recolle algunhas das figuras máis importantes da cultura galega de diferentes ámbitos como a literatura, a pintura, a música, a escultura, o cine... Na edición do pasado ano foi galardoado o dramaturago Manuel Lourenzo, que meses despois acadaría o Premio Nacional da Cultura Galega.

Tamén presentarase o "Roteiro de Afranio", un proxecto co obxectivo de dar a coñecer a figura de Alonso Ríos e os percorridos que fixo polas vilas e montes

Homenaxe Nacional a Antón Alonso Ríos, Siñor Afranio

(08-Setembro-2008)

O mestre, escritor e político Antón Alonso Ríos recibirá unha homenaxe nacional o 13 de setembro no lugar do seu nacemento, Camporrapado, na parroquia silledense de Cortegada. Alonso Ríos é unha das figuras máis salientables do galeguismo durante a Segunda República, foi perseguido tralo levantamento militar de 1936 e converteuse nun dos grandes protagonistas da Galicia no exilio desde Bos Aires.

A Comisión pola Memoria Siñor Afranio, a Asociación sociocultural Adellis e a Consellería de Cultura e Deporte recordarán ao mestre galeguista nunha xornada de homenaxe á súa figura. Os actos terán lugar a partir das 6 da tarde na Carballeira e na súa casa natal.

O cantor Roberto Sobrado actuará na Carballeira seguido polas intervencións dun representante da familia, Xulio Carballo Arceo; a alcaldesa de Tomiño, Sandra González; o delegado de Pontevedra da Consellaría de Medio Rural, Gonzalo Constenla; e a conselleira de Cultura e Deporte, Ánxela Bugallo. Na casa natal de Antón Alonso Ríos, o escritor e académico Xosé Neira Vilas dará unhas palabras antes de colocarse unha peza conmemorativa do acto de homenaxe.

Esta conmemoración servirá tamén para presentar o "Roteiro do Afranio", un proxecto co que se pretende dar a coñecer a figura de Alonso Ríos e o percorrido que fixo polas vila e montes de Galicia no ano 36 facéndose pasar por un cidadán portugués chamado Siñor Afranio.

Trátase dun proxecto que inclúe, entre outras iniciativas, unha exposición sobre Alonso Ríos e o seu trasunto fuxido, unha web divulgativa do roteiro e da figura do deputado agrarista e unha guía de turismo cultural. A exposición comezará a súa itinerancia o 20 de setembro en Tomiño, para logo chegar a outras localidades do país.

Antón Hipólito Alonso Ríos, naceu en 1887. Logo de estudar en Compostela, emigrou á Arxentina ao igual que algúns dos seus once irmáns. Alí traballou coma mestre e entrou no mundo societario colaborando coa fundación "Sociedad Hijos de Silleda" en 1908. De 1919 a 1931 foi xerente da "Sociedad Científica Argentina". Voltou á península en 1931, enviado pola Federación de Sociedades Galegas, representando á emigración na II República. Ese ano foi escollido membro do Consello Permanente do Partido Galeguista así coma presidente da "Asamblea Republicana de La Coruña" para o estudo do anteproxecto do Estatuto de autonomía de Galicia. Traballando en Tomiño coma director de escola, defendeu os intereses do mundo agrario desde a "Federación Provincial Agraria de Pontevedra" e participou na Campaña Pro Estatuto. En 1936 resultou elixido deputado agrario ás Cortes polo Frente Popular. Logo do golpe de Estado militar, tomou parte na defensa da República en Tomiño, organizando a resistencia mediante a agrupación de gardas de asalto en Tui. Perseguido, fuxiu disfrazado coa identidade do cidadán portugués "Siñor Afranio de Amaral" nas vilas e montes galegos. Foi mendiño, traballou nas colleitas e nas casas e ata se fixo pasar por frade. Tras pasaren tres anos, consegue chegar a Porto, Casablanca e finalmente Bos Aires.

No exilio, colaborou cos refuxiados galegos no exterior e, despois de chegar Castelao a América en 1940, axudaron a reconstruír o nacionalismo galego coa "Irmandade Galega", a alianza "Galeuzca" e o Consello de Galicia.

As súas obras más destacadas foron os ensaios Noite i amañecer de Galiza (1942), Co pensamento na Patria Galega, Da saudade, amore, arte e misticismo (1956) e A Cultura Galega na súa dimensión americán (1961). Participou, nos últimos anos da súa vida, en todas as actividades patrióticas da colectividade galega. Na autobiografía O Siñor Afranio ou como me rispei das gadoupas da morte. Memorias dun fuxido (1979) describe o seu periplo durante a persecución franquista. Faleceu en 1980, aos 93 anos de idade.

[Comisión pola Memoria Siñor Afranio]

Terá como tema "A forza das minorías" e coincidirá un ano despois de que a Cidade da Cultura acolla o Centro IBBY para a Diversidade Cultural

Galicia acollerá o 32º Congreso Internacional do IBBY no 2010

(08-Setembro-2008)

Galicia acollerá en 2010 o Congreso Internacional de IBBY, o maior acontecemento mundial da literatura infantil e xuvenil, que cada dous anos reúne a escritores e expertos de todo o mundo. Dentro de dous anos Santiago de Compostela será a sede do 32º congreso, que terá como tema "A forza das minorías". A Consellería de Cultura e Deporte patrocina un evento que reforzará a proxección internacional do Centro IBBY para a Diversidade Cultural que abrirá as súas portas en 2009 na Biblioteca Nacional da Cidade da Cultura.

O congreso de Santiago de Compostela será presentado a vindeira semana en Copenhague, dentro do programa do 31º Congreso de IBBY (International Board on Books for Young People). Santiago collerá o testigo da capital danesa, e precederá na organización deste evento a Londres, que será a sede da edición de 2012. Basilea, Cape Town (Cidade do Cabo), Cartagena de Indias e Macao son outras das cidades do mundo que acolleron o congreso de IBBY nos últimos anos. A última vez que se celebrou na Península foi en Sevilla en 1994.

Xosé Neira Cruz, comisario coordinador do congreso, será o encargado de presentalo este mércores perante os membros do IBBY e os centos de escritores e expertos en literatura infantil e xuvenil presentes en Copenhague. A presentación por Neira Cruz das principais características do evento estará acompañada da proxección dun vídeo sobre Galicia e Santiago, e unha breve actuación do gaiteiro Xosé Manuel Budiño.

O 32º Congreso IBBY desenvolverase do 8 ao 12 de setembro de 2010 no Pazo de Congresos e Exposicións de Galicia, coordinado por Gálix (Asociación Galega do Libro Infantil e Xuvenil). Da importancia do congreso que se celebrará en Santiago dá conta a calidade do seu comité científico, formado entre outros por Rigoberta Menchú (Nicaragua), Premio Nobel da Paz; Somaly Mam (Camboxa) e Olayinka Koso Thomas (Nixeria), ambas Premio Príncipe de Asturias de Cooperación Internacional; o escritor e académico Víctor Freixanes ou Anne Pelowski, unha das maiores expertas internacionais en literatura infantil entre outros.

Agárdase a presenza en Santiago de máis de 700 expertos en literatura infantil e xuvenil chegados de moitos dos 78 países integrados en IBBY. En Santiago estarán debatindo escritores, ilustradores, bibliotecarios, editores, libreiros, tradutores, críticos e investigadores, profesores, membros de ONGs, representantes de institucións dedicadas á promoción da lectura, etc. Xa se iniciou o proceso de preinscrición, cun ritmo de anotacións que fai pensar nunha participación moi alta, cunha importante presenza de membros de comunidades lingüísticas minoritarias e de persoas chegadas de Latinoamérica.

Deste xeito Galicia consolidarase nos próximos anos como unha referencia mundial no eido da literatura infantil e xuvenil. O Congreso Internacional de IBBY é o maior evento internacional da literatura infantil e xuvenil, e nel sempre ocupa un lugar destacado a cultura anfitrioa, neste caso a galega. A súa celebración en Santiago producirase ao ano seguinte da apertura na Cidade da Cultura, dentro da Biblioteca Nacional, do Centro IBBY para a Diversidade Cultural.

Galicia disporá do segundo centro que IBBY apoie e promova desde a súa fundación, logo do creado en Oslo (Noruega) en 1985. O centro terá como principal obxectivo o estudo, a difusión e a promoción dos libros para nenos e mozos procedentes das culturas con linguas minorizadas. O centro terá a primeira biblioteca internacional especializada na colección, estudo e divulgación da literatura infantil escrita nestas linguas, co que se converterá nun dinamizador a nivel mundial de iniciativas culturais para nenos, adolescentes e adultos.

A creación do Centro IBBY é resultado dun acordo da Consellería de Cultura e Deporte coa Internactional Board on Books for Young People (IBBY), a máis prestixiosa institución mundial de fomento da literatura infantil e xuvenil. O anuncio fíxoo Ánxela Bugallo en marzo pasado no transcurso da Feira do Libro Infantil e Xuvenil de Boloña. Na elección foi relevante o peso internacional da literatura infantil e xuvenil en lingua galega.

Entre os seus fondos atópanse primeiras edicións e orixinais de Xosé Neira Vilas, Castelao, Laxeiro ou de Luís Seoane

A Biblioteca do Exilio da Biblioteca Galega de Bos Aires ofrece textos orixinais e únicos de indubidable interese para a cultura galega

(07-Setembro-2008)

A Biblioteca Galega de Bos Aires ven de catalogar e poñer a disposición do público un sector especial que reúne a produción intelectual e editorial do exilio en América. A denominación desta área é Biblioteca do Exilio, que inclúe a autores, editores e ilustradores de distintas personalidades do ámbito cultural hispánico.

Entre os fondos pódese atopar, por exemplo, as coleccións Hórreo e Dorna que Arturo Cuadrado e Luís Seoane dirixiron para a editorial Emecé. Tamén está unha grande parte dos fondos das editoriais Nova e Botella al Mar, que foron unha continuación daquelas dúas coleccións, así como exemplares das edicións Galicia, do Centro Galego de Bos Aires, e de Ediciones Lérez, do Centro Pontevedrés.

Así mesmo existen edicións orixinais de innumerables exiliados galegos e españois en Arxentina e América. En poesía e narrativa, obras de Rafael Alberti, María Teresa León, Juan Ramón Jiménez, León Felipe, Xosé Neira Vilas ou Ramón de Valenzuela Otero.

No ámbito do pensamento, a política e a historia, poden encontrarse traballos de Antón Alonso Ríos, Castelao, Luís Jiménez de Asúa, Emilio González López, Claudio Sánchez Albornoz, Ángel Ossorio y Gallardo. Tamén hai libros ilustrados por Luís Seoane, Castelao, Colmeiro, Laxeiro e Federico Ribas.

En xeral trátase de primeiras edicións ou edicións únicas e algunhas destas publicacións foron ou están reeditándose actualmente de libros publicados entre 1920 e 1975.

Os responsables da Federación e da Biblioteca consideran que estes libros conforman un fondo de investigación imprescindible para coñecer o labor intelectual dos emigrados e exiliados, que non podía ser desenvolvida nos seus países de orixe, xa fora polas prohibicións da ditadura de Primo de Rivera ou máis tarde pola acción censora e represiva da ditadura franquista.

O Premio Civiltá delle Minorance está organizado pola Fundación Grinzane Cavour, a Fundación Cassa de Risparmio e a Regione de Piamonte

Alfredo Conde é recoñecido pola súa aportación ás literaturas e culturas minorizadas

(07-Setembro-2008)

A Fundación Grinzane Cavour, a Fundación Cassa de Risparmio e a Regione de Piamonte concederon a Alfredo Conde o Premio Civiltà delle Minorance (Civilización das Minorías). Os organizadores salientaron a aportación do escritor galego ás literaturas e culturas minoritarias.

Non é a primeira vez que Alfredo Conde obtén un premio literario en Italia. En 1990 a súa novela Xa vai o griffón no vento (Xerais) recibiu o Premio Cavour á mellor novela estranxeira, convocado pola Fundación Grinzane Cavour, unha das partes que creou agora o galardón de apoio ás minorías xunto coa Fundación Cassa de Risparmio e a Regione Piamonte.

O premio entregarase os días 22 e 23 de novembro en Ostana, na provincia de Torino. Trátase da primeira edición do mesmo. A idea dos organizadores é recoñecer anualmente a aportación de escritores e escritoras en linguas como a galega. O feito de que sexa precisamente o galego, entre as outras linguas europeas, o idioma de creación elexido valórase moi positivamente.

Alfredo Conde (Allariz, 1945) é un dos narradores galegos máis coñecidos polo público lector. Coa súa novela Xa vai o griffón no vento obtivo o Premio Nacional de Literatura no ano 1984, primeira vez que ese galardón se lle outorgou a un autor galego; con esa mesma obra tamén gañou o Premio Blanco Amor e o Premio da Crítica española. Como narrador é así mesmo autor de libros de relatos, entre eles Mementos de vivos (Galaxia), Música sacra (Galaxia) ou A casa de Adara (Xerais), e de novelas como Breixo (Galaxia) (Premios da crítica galega e española, 1981), Memoria de Noa (Premio Chitón e Ícaro), O fácil que é matar (Xerais), Azul cobalto, Romasanta (Galaxia) ou Lukumí (Galaxia). A súa última novela é María das Batallas, publicada o pasado ano por Galaxia.

[Máis información na web de Galaxia]

Tamén está confirmada a presenza nas Feiras Internacionais de Frankfurt e Guadalajara

Galicia no LIBER 2008

(03-Setembro-2008)

A Feira Internacional do Libro, Liber 2008, reunirá a arredor de 700 editoriais e empresas do sector do 8 ao 10 de outubro no recinto de Gran Vía de Fira de Barcelona. A Feira dará a coñecer a produción literaria e artística da cultura de Québec, provincia francófona de Canadá, convidada de honra na edición deste ano. Promovido pola Federación de Gremios de Editores de España, Liber é o acontecemento profesional máis importante da industria editorial española e latinoamericana.

Liber 2008 está dirixido a profesionais do sector como editores, libreiros, distribuidores, bibliotecarios, autores, docentes e profesionais das artes gráficas. Na 26ª edición de Liber participarán uns 300 expositores directos que representan a 700 editoriais e empresas de 16 países. O editores galegos tamén estarán presente grazas á colaboración da Asociación Galega de Editores coa Consellería de Cultura e Deporte.

Na súa aposta pola internacionalización, están convidados a Liber máis de 600 compradores de 60 países.

Ao mesmo tempo, Liber 2008 será un punto de encontro para os profesionais do sector a través das múltiples actividades que se organizarán, como mesas redondas, foros, presentacións de libros e exposicións. Tamén se entregarán os Premios ao Fomento da Lectura aos Medios de Comunicación nos apartados de Prensa, Radio e Televisión, o Premio ao Fomento da Lectura en Bibliotecas Públicas e o Premio Boixareu Ginesta ao Libreiro do Ano.

Pero esta non será á única presenza da literatura galega no exterior. No que queda de ano xa está confirmada a asistencia á Feira Internacional de Frankfurt (Alemaña) e á Feira Internacional do Libro de Guadalajara (México) sen esquecer a exitosa participación na Feira Internacional do Libro de La Habana no pasado mes de febreiro, na que Galicia foi o país convidado e na que destacou a numerosa afluencia de público e o grande éxito de vendas, ademais da fructífera presenza na Feira do Libro Infantil e Xuvenil de Boloña, a Feira do Libro de Londres, a Feira de Bos Aires e a Bienal do Libro de Sao Paulo, onde unha delegación de editores desprazados para a ocasión mantiveron numerosos contactos con destacados profesionais do ámbito editor, libreiro e bibliotecario do país brasileiro.

[Máis información na web da Asociación Galega de Editores]

Un home na escuridade

A última novela de Paul Auster será publicada en galego antes que en inglés

(03-Setembro-2008)

Onte chegou ás librarías a edición galega de Un home na escuridade, a nova novela de Paul Auster. A lingua galega participa dese xeito, a través de Editorial Galaxia, no lanzamento mundial desta novela, aínda inédita en lingua inglesa, que se publicará en galego ao mesmo tempo que Editorial Anagrama a publica en castelán.

Na súa nova novela, Paul Auster enfróntase ás pantasmas da sociedade contemporánea cunha trama que conxuga a historia de August Brill, un crítico literario retirado que padece insomnio, coa duns Estados Unidos sumidos nunha nova guerra civil logo da secesión dalgúns estados por causa dos resultados electorais do ano 2000. Nun xogo fascinante despréganse dúas novelas; nunha delas, o protagonista é Owen Brick e o escenario uns fantasmais EUA, sen guerra de Irak nin Bush, sumidos nunha contenda civil. Auster sitúanos así perante unha retorta e reveladora versión da política americana actual e dos seus dilemas éticos. A outra é a «novela familiar» do narrador, na que August Brill nos conta e se conta a súa propia vida, descobre e descóbrenos, detective insomne e desolado, dilemas, amores, segredos e traizóns.

Un home na escuridade é a cuarta obra do prestixioso escritor de New Jersey publicada por Galaxia tras Brooklyn Follies, Viaxes no scriptorium e A vida interior de Martin Frost.

Lareira Literaria

Xoán Bernárdez Vilar, Paco López-Barxas, Estíbaliz Espinosa e Xosé Antón Laxe Martiñán na Lareira Literaria de setembro

(03-Setembro-2008)

Na Lareira Literaria deste mes contamos coa presenza de Xoán Bernárdez Vilar, Paco López-Barxas, Estíbaliz Espinosa e Xosé Antón Laxe Martiñán.

Cunha longa traxectoria as súas costas, Xoán Bernárdez Vilar leva dedicado os últimos anos ao remate da súa tese de doutoramento sobre o tema A Fachada Atlántica Europea segundo a 'Ora Maritima' de Rufius Festus vienus, unha obra moi antiga que describe as costas galegas arredor do século VI aC.

Paco López-Barxas, despois de publicar recentemente No xardín das mandrágoras (Laiovento) e Sar, Sarela e os monstros de Compostela (Kalandraka) mantén unha intensa actividade creativa, para finais deste ano e comezos do 2009 ten preparada a publicación de Sar e Sarela polos parques de Compostela, outro libro sobre a figura de Eugenio Granell para o público infantil, Tom e Mix, os cabalos de Clara en Sotelo Blanco e un ensaio sobre a figura do escritor e galeguista Ben-Cho-Shey.

Pola súa parte, Estíbaliz Espinosa, mentres agarda a publicación en papel do virtual Zoommm. Textos biónicos, ramifica o seu talento en multitude de proxectos.

Xosé Antón Laxe Martiñán, tras a publicación do seu primeiro libro Quen beillaría iso? en Baía Edicións, deixa nesta Lareira un fragmento que aparecerá no novo poemario que está cociñando.

[Lareira Literaria]