As letras galegas tíñense de loito novamente

Finou Anxo Rei Ballesteros, autor de Dos anxos e dos mortos

(30-Outubro-2008)

Tras unha longa enfermidade onte finou o escritor Anxo Rei Ballesteros. Aínda que nado en Boqueixón, residía dende anos na parroquia de Santa Cruz da Pobra do Caramiñal. Literariamente cultivou a narrativa, o relato curto, o ensaio e o teatro.

Debutou en 1977 con Dos anxos e dos mortos en Castrelos (reeditada por Galaxia no ano 2001) onde retrata a vida dun grupo de rapaces na Compostela da década dos 70 e a crise identitaria da xuventude galega da época. Esta obra foi considerada pola crítica como o inicio dun novo xeito de narrar na literatura galega. Ese mesmo ano resulta premiado no Pedrón de Ouro o seu conto Querido Brais, publicado en volume colectivo. En 1992 sae publicada Loaira (Galaxia), onde igualmente recrea o período final da ditadura franquista en Compostela. Esta obra resultou gañadora do premio Losada Diéguez. No 98 publica o libro de relatos A sombra dos teus soños (Galaxia) e en 2005 Non sei cando nos veremos (Galaxia), unha crítica á moral e ás formas de vida da sociedade de hoxe.

Como ensaísta publicou Tempo e vinganza (Galaxia), obra gañadora do Premio Ramón piñeiro de Ensaio 2002, onde fai un análise sobre a concepción do tempo na modernidade a través do Hamlet de Shakespeare e xunto a Carlos Fernández Fernández foi gañador do Premio Ánxel Fole por Urda e mundo. Un ensaio sobre Rof Codina.

En 1987 o grupo de teatro Malbareta estrea a súa peza teatral Xogos de damas, que será publicada en Xerais ao ano seguinte. Anxo tamén e autor da versión de A voz humana de Jean Cocteau, estreada en 1991 baixo a súa dirección.

Recentemente fixo a tradución de Molloy de Samuel Becket para Galaxia.

Anxo Rei Ballesteros recibira hai dúas semanas unha homenaxe por parte dun grupo de amigos arredor da tertulia viguesa Café Voltaire. O acto funerario civil terá lugar mañá venres á unha da tarde no cemiterio do Barqueiro.

Kiko da Silva dirixe o proxecto polo que pasaron algúns dos mellores humoristas gráficos dos últimos anos

Un ano de humor galego con Retranca

(30-Outubro-2008)

O 31 de outubro de 2007 presentouse en sociedade, no Café Moderno da Fundación Caixa Galicia, o número 1 de Retranca, unha revista de humor nacida en e para Galicia. Un ano despois, o Café Moderno volve ser testemuña co primeiro aniversario de Retranca.

Con Kiko da Silva aos mandos da nave retranqueira, polas súas páxinas e viñetas desfilaron nomes ilustres do humor galego como Xaquín Marín, Pinto e Chinto, Kohell, Leandro, Luís Davila, Andrés Meixide, Alberto Guitián, Jacobo Fernández ou os colectivos Pestinho+1 e Reizentolo.

A celebración do primeiro aniversario se acompañará coa presentación do número 12 de Retranca. A maiores, na Galería Sargadelos de Pontevedra inaugurarase, a partires do luns 3 de novembro, a Expo Retranqueira: Lerasnos de morto se non nos les de vivos.

Los judios en Galicia (1044-1492) está publicado pola Fundación Barrié de la Maza

Un libro sobre os xudíos na Galicia baixomedieval gaña o Premio Samuel Toledano

(28-Outubro-2008)

A doutora de Historia Medieval e investigadora no CSIC-Instituto de Estudos Galegos "Padre Sarmiento" María Gloria de Antonio Rubio ven de recibir o Premio Samuel Toledano que promove a Fundación do mesmo nome pola súa obra Los judios en Galicia (1044-1492) publicado pola Fundación Pedro Barrié de la Maza.

Este premio concédese anualmente e presentado en Xerusalén e leva o nome de Samuel (Sam) Toledano z"l, un dos renovadores da comunidade xudía en España. O premio concédese a un investigador hebreo e a outro do estado español, que traballan sobre temas aos que se dedicou Samuel Toledano: ao estudo das comunidades xudías en España e nos países da diáspora sefardí: a súa historia e ao seu legado cultural; as relaciones entre xudeos, cristiáns e musulmáns en España; e as relacións entre España e Israel.

A comisión do Premio está presidida por Yitzhak Navón, quinto Presidente do Estado de Israel e a compoñen destacados membros do campo académico e por personalidades do ámbito público (político, cultural, etc.) israelí ase como representantes da familia Toledano. O xurado está composto por tres membros, que se elixen anualmente pola comisión do Premio.

Los judios en Galicia (1044-1492) é un estudo integral sobre a poboación xudía que habitou en Galicia, principalmente no período baixomedieval. Por unha parte a autora trata a demografía xudía en Galicia e os personaxes máis sobranceiros da comunidade hebrea, situándoos no marco de cada vila ou cidade onde se radicaban, así como as actividades socio-profesionais que exercían e as relacións que mantiñan coas distintas institucións e grupos sociais da época (Coroa, Igrexa, Nobreza e Concellos) e coa poboación cristiá. Por outra banda preséntanse documentos inéditos como publicados previamente que serviron de base á investigación e que se complementan cos correspondentes índices onomástico e de documentos.

Trátase de After Babel: Aspect of Language and Translation e George Steiner at the New Yorker

Xerais publicará dúas obras de George Steiner

(29-Outubro-2008)

Edicións Xerais publicará o vindeiro ano as obras de George Steiner After Babel: Aspect of Language and Translation -publicada en 1975- e George Steiner at the New Yorker, obra inédita, que aparecerá tamén nos Estados Unidos no vindeiro mes de xaneiro.

George Steiner é un dos intelectuais de influencia internacional máis relevantes dende mediados do século XX. Escritor, crítico e teórico da literatura e da cultura, Steiner colabora habitualmente cos seus artigos para revistas e xornais como The New Yorker, The Times Literary Supplement y The Guardian.

Aínda que George Steiner fíxose famoso recentemente no ámbito social galego por unha entrevista ao xornal El País, estas dúas traducións van supoñer unha achega ao galego dun dos maiores estudosos e especialista na cultura europea.

Tanto After Babel: Aspect of Language and Translation como George Steiner at the New Yorker aparecerán publicadas na colección Xerais Ensaio, un proxecto da editorial de traducir para o galego grandes textos do ensaio do século XX. Dentro da mesma colección tamén aparecerá o segundo tomo d’ O segundo sexo de Simone de Beauvoir e o Tractatus Logico-Philosoficus 1918 de Wittgenstein e traducido por Arturo Leyte.

Los judios en Galicia (1044-1492) está publicado pola Fundación Barrié de la Maza

Un libro sobre os xudíos na Galicia baixomedieval gaña o Premio Samuel Toledano

(28-Outubro-2008)

A doutora de Historia Medieval e investigadora no CSIC-Instituto de Estudos Galegos "Padre Sarmiento" María Gloria de Antonio Rubio ven de recibir o Premio Samuel Toledano que promove a Fundación do mesmo nome pola súa obra Los judios en Galicia (1044-1492) publicado pola Fundación Pedro Barrié de la Maza.

Este premio concédese anualmente e presentado en Xerusalén e leva o nome de Samuel (Sam) Toledano z"l, un dos renovadores da comunidade xudía en España. O premio concédese a un investigador hebreo e a outro do estado español, que traballan sobre temas aos que se dedicou Samuel Toledano: ao estudo das comunidades xudías en España e nos países da diáspora sefardí: a súa historia e ao seu legado cultural; as relaciones entre xudeos, cristiáns e musulmáns en España; e as relacións entre España e Israel.

A comisión do Premio está presidida por Yitzhak Navón, quinto Presidente do Estado de Israel e a compoñen destacados membros do campo académico e por personalidades do ámbito público (político, cultural, etc.) israelí ase como representantes da familia Toledano. O xurado está composto por tres membros, que se elixen anualmente pola comisión do Premio.

Los judios en Galicia (1044-1492) é un estudo integral sobre a poboación xudía que habitou en Galicia, principalmente no período baixomedieval. Por unha parte a autora trata a demografía xudía en Galicia e os personaxes máis sobranceiros da comunidade hebrea, situándoos no marco de cada vila ou cidade onde se radicaban, así como as actividades socio-profesionais que exercían e as relacións que mantiñan coas distintas institucións e grupos sociais da época (Coroa, Igrexa, Nobreza e Concellos) e coa poboación cristiá. Por outra banda preséntanse documentos inéditos como publicados previamente que serviron de base á investigación e que se complementan cos correspondentes índices onomástico e de documentos.

V Simposio O libro e o mercado

A situación do libro galego no mundo actual e as súas posibilidades no exterior a debate en Santiago de Compostela

(28-Outubro-2008)

O presente e o futuro do libro galego no mundo centrará o Simposio O libro e o mercado que anualmente organiza a Asociación Galega de Editores (AGE) e o Centro Español de Derechos Reprográficos (CEDRO) coa colaboración do Consello da Cultura Galega e que chega a súa quinta edición os días 13 e 14 de novembro.

Mentres que o ano pasado o simposio se centrou no mercado editorial, este ano o grande protagonista será o libro galego no mundo, a súa situación no mundo actual e as súas posibilidades de cara á promoción exterior. Para iso contarase con importantes representantes das máis destacadas feiras internacionais do mundo da edición e profesionais do sector con ampla experiencia no exterior.

A vicedirectora da Feira Internacional do Libro de Frankfurt, que vén de celebrarse do 15 ao 19 de outubro na cidade alemá e que é sen dúbida a cita editorial máis importante do ano a nivel internacional, será a encargada de impartir a primeira conferencia do simposio. Así, Mary Fé Boix falará do libro galego ante a Feira de Frankfurt. A continuación o Xosé Ballesteros, director de Kalandraka, unha das editoriais galegas con maior proxección internacional e membro da AGE, relatará a súa experiencia persoal na promoción e venda do libro infantil e xuvenil no exterior.

Outro destacado persoeiro no sector editorial español, o Director do Instituto Ramón Llull, Josep Bargalló, aportará xa pola tarde novos datos e características da presenza internacional da literatura catalá no mundo, grazas á xestión realizada dende o seu organismo para a promoción da lingua e culturas de Catalunya, que o ano pasado foi a cultura convidada na Feira Internacional do Libro de Frankfurt.

A xornada do xoves completarase con dúas mesas redondas, unha pola mañá e outra pola tarde. Na sesión matutina intervirán, a propósito da proxección internacional do libro e a literatura galega, o profesor de Teoría da Literatura da USC Arturo Casas, a profesora da Universitat de Barcelona Helena González e o lector de lingua e literatura galega en Stirling (Escocia) Xabier Cid. A outra sesión, centrada na experiencia dos editores galegos nas feiras internacionais, correrá a cargo de Carlos del Pulgar (Nova Galicia Edicións), Pepe Puga (A Nosa Terra) e Francisco Villegas (Edicións do Cumio).

A directora da Feira Internacional do Libro Infantil e Xuvenil de Bolonia, Roberta Chinni, falará xa na mañá do venres do mercado infantil e xuvenil dende a súa perspectiva, tema que se concretará na experiencia profesional tendo en conta as características da edición galega da directora de OQO Editora Eva Mejuto, editorial recoñecida con numerosos premios internacionais na literatura para os máis cativos.

A presenza internacional da mañá do 14 de novembro completarase coa mesa redonda "A lusofonía, un mercado para Galicia". Nela intervirán a responsable do Projeto APEX para a internacionalización da edición brasileira, Dolores Manzano, a responsable da Editorial Callis (Brasil), Miriam Gabbai, e o responsable do Programa de Bibliotecas Públicas e Comunitárias do Estado de Sao Pâulo, Jose Luiz Goldfarb.

Xa pola tarde, o Director Executivo da Federación de Gremios de Editores de España, Antonio María Ávila, falará das súas numerosas vivencias no mercado exterior representando o libro español. E para clausurar o V Simposio O libro e a lectura contarase nesta edición coa Directora para Europa da Feira Internacional do Libro de Guadalajara, Amelia Guardiola. Precisamente esa feira é a próxima cita profesional á que se desprazarán os editores da AGE con stand propio e que terá lugar do 29 de novembro ao 7 de decembro na cidade mexicana.

 [Máis información na web da Asociación Galega de Editores]

 [Programa do V Simposio O libro e a lectura]

 [Folla de inscrición]

No Alén tamén se fala galego

En galego, agora e sempre

(28-Outubro-2008)

Preto de oitenta persoas do mundo da cultura, as artes, a política, o ensino e o deporte de Vilagarcía de Arousa e o seu entorno manifestan as súas derradeiras vontades respecto á lingua galega no libro de mandas que vén de publicar a Asociación Galega de Funcionarios pola Normalización Lingüística en colaboración coa Concellería de Cultura e a Secretaría Xeral de Política Lingüística.

Deste orixinal xeito pretende potenciarse o uso do galego nos testamentos, un documento xurídico con carácter legal, no que as persoas deberían expresar o seu legado na lingua na que se expresan a cotiá. Esta iniciativa é unha continuación á desenvolvida o ano pasado, tamén en torno ao Día dos Defuntos, que tiña como obxectivo estender o uso da lingua galega na denominada cultura funeraria e que en Vilagarcía se materializou cun acto simbólico de colocación dunha placa na lápida onde está soterrado Ramón Patiño del Valle no cemiterio de Vilaxoán. Con elo pretendíase concienciar á poboación da contradicción que supón que persoas que en vida se expresaron sempre en galego, sexan lembradas na “parroquia dos mortos” nunha lingua diferente, neste caso, o castelán, perdendo deste xeito, unha parte importante da súa identidade.

O Concello de Vilagarcía é un dos 13 concellos de Galicia que participan na campaña “En galego, agora e sempre” coa edición do seu propio libro de mandas. A campaña no seu conxunto será presentada o vindeiro venres, 31 de outubro, nun acto que se celebrará ás 19.30 h. no Auditorio e no que estarán presenten representantes de tódolos concellos participantes.

O xardín das pedras flotantes, A cabeza de Medusa e Xenaro e o misterio da mochila verde

Esta semana chega ás librarías os Premios Xerais 2008

(27-Outubro-2008)

O pasado xuño, tras coñecerse as obras premiadas na edición deste 2008 dos Premios Xerais de novela, de literatura xuvenil e de literatura infantil, a expectación pasaba polo intre en que os lectores e lectoras puidesen ter a súa opinión sobre eses tres libros merecentes do prestixioso galardón. Esta semana Xerais envía ás librarías O xardín das pedras flotantes, A cabeza de Medusa e Xenaro e o misterio da mochila verde.

O xardín das pedras flotantes, a obra de Manuel Lourenzo González gañadora do XXV Premio Xerais de Novela, é o relato dun amor extraordinario de dous adolescentes, Simón e Anabel, marcado por unha historia, que arrinca desde a Idade Media e nos conduce até a actualidade. Trátase dunha novela entretida, vizosa e sedutora.

A cabeza de Medusa, a novela de Marilar Aleixandre gañadora do Premio Fundación Caixa Galicia de literatura xuvenil 2008, relata a violación que sofren dúas rapazas e o pedregoso camiño da busca da xustiza que comeza para elas dende a mesma noite da agresión. A amplificación social da violación e tamén a procura dos amores ventureiros, o papel do amor e a amizade na resistencia ao medo e á vergoña son temas abordadas nesta novela con valentía, claridade e tenrura.

Xenaro e o misterio da mochila verde, a novela de Mar Guerra gañadora do Premio Merlín de literatura infantil 2008, foi definida polo xurado como "un thriller psicolóxico" que desenvolve unha historia cotián de rapaces e rapazas dun centro escolar.

Os fondos estarán dispoñibles antes de que remate este ano

Un acordo entre Galaxia e Google permitirá a lectura dos fondos editoriais da emblemática editorial na Rede

(24-Outubro-2008)

A Editorial Galaxia e a empresa transnacional Google anuncian a próxima presentación do fondo dixital da edición galega. Ambas as dúas empresas veñen de asinar un acordo que permitirá, antes de fin de ano, a publicitación na rede dos fondos da editorial galega, tanto clásicos como contemporáneos, edicións vivas no mercado e edicións catalogadas.

En palabras dos responsables das dúas empresas, Víctor F. Freixanes como director xeral de Editorial Galaxia e Luis Collado, responsable de Google Búsqueda de Libros, trátase de proxectar globalmente na Rede, con presencia en todo o mundo, unha parte importante da edición galega, a que a devandita editora representa. A comercialización dos libros será por conta de Editorial Galaxia, mais a publicitación universal dos mesmos será responsabilidade de Google, que dende antes do verán está a dixitalizar os fondos da editora nas súas sedes de California.

“Queremos que a literatura galega estea presente no diálogo universal da Rede”, declararon ambos os dous responsables, “para o cal fixemos un importante esforzo entre as dúas partes, conscientes da necesidade de que a a cultura galega participe activamente na era dixital”.

Algúns títulos estarán disponibles para a súa lectura na Rede. Outros, segundo a disponibilidade dos autores e as autoras, amosarán parcialmente os seus contidos, para a súa identificación e consideración por parte dos internautas. No mes de decembro, ambas as dúas empresas realizarán unha demostración pública do acordo aos usuarios potenciais.

O acordo entre Editorial Galaxia e Google realízase por iniciativa de ambas as dúas empresas, sen axudas institucionais de ningún tipo.

O humorista gráfico Forges será a estrela invitada na edición deste ano

Máis de cen profesionais da ilustración galega celebrarán o seu V encontro en Compostela

(24-Outubro-2008)

O vindeiro sábado, 25 de outubro, celebrarase en Santiago de Compostela o V Encontro Galego de Ilustración, organizado pola AGPI (Asociación Galega de Profesionais da Ilustración), que inclúe a máis de cen profesionais do sector de toda Galicia. Deste xeito consolídase o derradeiro fin de semana de outubro como unha data de referencia para o sector da ilustración gráfica profesional en Galicia. Autores de diferentes especialidades, que proceden de todos os lugares da xeografía galega, reúnense en Santiago de Compostela para avaliar o estado da profesión e para abordar os diferentes aspectos técnicos e problemáticos en torno a ela.

Segundo declara o director das xornadas, Manel Cráneo; "con esta quinta edición, queremos ofrecer aos profesionais e a todos os interesados no sector, un día agradable no que compartir vivencias e coñecementos dentro dunha profesión xa consolidada hoxe en día, non sen esforzo; así como amosar á sociedade, unha vez máis, o recoñecemento dun oficio en auxe e que comeza a ter o peso social e cultural que se merece”.

Personaxes da talle de Irene Penas, directora de publicacións da Editorial Everest Galicia, ou do archicoñecido Forges analizarán, entre as súas vivencias, os factores económicos, legais e sociais deste sector. Estes actos, de portas abertas ó público en xeral, terán lugar o sábado pola mañá, entre as 10 e as 14 horas, no salón de actos da Fundación Caixa Galicia, sita na Rúa do Vilar, 19, en Santiago de Compostela. Segundo declara Cráneo, “as previsións nos din que o salón de actos da Fundación estará cheo, e non só polos cerca de cen ilustradores galegos que se acercarán ao Encontro, senón pola importancia mediática dos nosos invitados”.

Pola súa banda, para o presidente da AGPI Santy Gutierrez, “despois de cinco anos da existencia da asociación, éste é o culme da intensa actividade realizada. Cremos, por tanto, que este é o mellor xeito de festexalo; cunha figura da ilustración mediática e punteira como é Forges e con outra con multitude de coñecementos dos entresixos editoriais como é Irene Penas. Con este punto e seguido na nosa fructífera traxectoria, tamén celebramos que este ano pasamos a barreira dos cen ilustradores profesionais asociados procedentes de todos os rincóns de Galicia”.

Para a realización desta programación, AGPI conta coa colaboración da Fundación Caixa Galicia, a Dirección Xeral de Creación e Difusión Cultural, de a Consellería de Cultura, e a propia FADIP (Federación de Asociaciones de Ilustradores Profesionales).

II Bienal Literaria Internacional "De Pedra e de Palabra"

O Pen Clube achegará a Galicia as literaturas de Asia e de África

(24-Outubro-2008)

O PEN Clube de Galicia organiza a II Bienal Literaria Internacional "De Pedra e de Palabra" entre os días 25 e 30 de outubro. Nesta edición profundizarase nas literaturas de África e Asia.

O acto literario de inauguración, ás 20.30 h. no Pazo de Fonseca da capital galega, correrá a cargo do escritor chinese Gao Xingjian, galardoado co Premio Nóbel de Literatura no ano 2000.

Ao longo das seguintes xornadas a literatura, música e conferencias africanas, asiáticas e galegas tomarán o CGAC e o Museo do Pobo Galego.

Un dos actos máis emotivos chegará o último día da Bienal, despois do acto de clausura, cando se lle renderá un homenaxe poético a Ramiro Fonte a cargo de Ana Romaní, Anxo Angueira, Gonzalo Navaza, Xavier Seoane, Xosé Mª Álvarez Cáccamo e Salvador García Bodaño.

 [Programa da II Bienal Literaria Internacional "De pedra e de palabra"]

O Presidente da Real Academia Galega confirmou a celebración do acto central do Día das Letras Galegas 2009 na vila natal de Ramón Piñeiro

Avelino Pousa Antelo recibe en Láncara o Premio Ramón Piñeiro "Facer País"

(20-Outubro-2008)

O intelectual galeguista Avelino Pousa Antelo foi homenaxeado o pasado sábado en Láncara co Premio Ramón Piñeiro "Facer País", por toda unha vida entregada á causa de Galicia. Neste premio, que organiza a Asociación Cultural Val de Láncara, participan todas as asociacións culturais da comarca de Sarria.

O acto de homenaxe contou coa asistencia de máis de duascentas persoas que quixeron renderlle tributo a unha das personalidades máis sobranceiras do país.

A xornalista Tereixa Navaza foi a encargada de dirixir as primeiras palabras a Pousa Antelo. A continuación, o presidente da Real Academia Galega, Xosé Ramón Barreiro, anunciou que a celebración solemne do Día das Letras Galegas terá lugar o 17 de maio do 2009 na vila de Láncara. Daquela a RAG reunirá o seu plenario nestas terras de Lugo, en memoria de Ramón Piñeiro.

Ramón Villares escribiu a laudatio do homenaxeado, subliñando tres características da súa personalidade: a súa condición de mestre, formado na tradición da Segunda República; a súa vocación agrarista, que empezou a desenvolver arredor da Escola Barreiros en Lugo e que experimentou tamén en Canarias e Zaragoza, e a súa entrega a causa do galeguismo, promotor da frustrada recuperación do Partido Galeguista despois da morte do ditador Franco, durante a transición política. O discurso, ante a ausencia do Presidente do Consello da Cultura Galega, foi lido por Víctor F. Freixanes.

Avelino Pousa recibiu o premio que con anterioridade foi entregado a persoeiros como Isaac Díaz Pardo, Neira Vilas, Xosé Manuel Beiras, o actor Luís Tosar, ou o grupo Milladoiro entre outros.

Por vez primeira un ensaio escrito en galego acada o máximo galardón que concede o Ministerio de Cultura

Justo Beramendi, novo Premio Nacional de Ensaio pola súa obra De Provincia a Nación: historia do galeguismo político

(19-Outubro-2008)

O Catedrático de Historia Contemporánea Justo G. Beramendi ven de ser galardoado co Premio Nacional de Literatura na modalidade de ensaio correspondente ao ano 2008 pola súa obra De provincia a nación: historia do galeguismo político, editado por Xerais. Este Premio é concedido polo Ministerio de Cultura para distinguir unha obra de autor nacido no Estado español, escrita en calquera das linguas oficiais e editada en España durante 2007.

O xurado estivo formado por Pedro García Barreno, pola Real Academia Española; Xosé Luís Axeitos Agrelo, pola Real Academia Galega; Adolfo Arejita Oñarte-Etxebarria, pola Euskaltzaindia; Josep González-Agapito i Granell, polo Institut d'Estudis Catalans; Paula Izquierdo González de Mendoza, pola Asociación Colegial de Escritores; José María Pozuelo Yvancos, pola Asociación Española de Críticos Literarios; e José María González García, autor galardoado na última edición. Actuou como presidente Rogelio Blanco, director xeral do Libro, Arquivos e Bibliotecas e como vicepresidenta a subdirectora xeral de Promoción do Libro, a Lectura e as Letras Españolas, Mónica Fernández.

De Provincia a nación. Historia do galeguismo político é unha investigación sistemática da natureza e evolución dos movementos sociopolíticos de reivindicación de Galicia como suxeito político de seu dende as súas primeiras manifestacións individuais no século XVIII até a actualidade. O tratamento do provincialismo, do rexurdimento e do rexionalismo do século XIX, e máis aínda do nacionalismo galego do século XX, faise cunha profundidade sen precedentes. Para a análise acaída das diferentes dimensións –a ideolóxica, a social, a organizativa, a electoral– e das súas interrelacións, o autor incorpora conceptos e modelos analíticos propios que implican unha notable innovación metodolóxica no eido do estudo do nacionalismo.

A obra de Beramendi leva acadado os máis importantes premios galegos:

Premio Irmandade do Libro. Mellor obra editorial do ano 2007; Premio Asociación de Escritores en Lingua Galega (Ensaio), 2007; Premio da Crítica Galicia (Investigación), 2008; Premio Losada Diéguez (Investigación), 2008; Pedrón de Ouro, 2008; e Segundo mellor libro de ensaio do 2007 según os lectores de Fervenzas Literarias.

O libro inclúe un CD con algunhas das grabacións máis significativas de Miro Casabella

Xan Fraga recupera nun libro a figura do músico Miro Casabella

(19-Outubro-2008)

A Editorial Galaxia publica, na colección Reportaxe, un percorrido polas imaxes, a música e a historia da Nova Canción Galega a través da vida e da obra dun dos seus compositores e intérpretes máis sobranceiros, o músico Miro Casabella.

O xornalista Xan Fraga é o autor de Miro Casabella e a Nova Canción Galega, un libro no que, a partir dunha reconstrución do contexto no que, en plena ditadura franquista, xermolou ese movemento musical, se reflicte, en imaxes, a traxectoria do autor de "O meu país" e dos seus compañeiros de andaina musical.

Xan Fraga amosa neste libro unha capacidade obxectiva para contextualizar os movementos sociais, artísticos e políticos. Nada se explica fóra do seu tempo. Manuel María, Alonso Montero, Lois Diéguez, Alfredo Conde, Xavier Alcalá... Os compoñentes todos de Voces Ceibes... Jose Afonso, Luis Cilia, Jose Mario Branco... Raimon, María del Mar Bonet, Pi de la Serra, Paco Ibáñez, Mikel Laboa...

Entre outros documentos, o libro desenterra un informe da policía política do franquismo, datado na Coruña en 1970, no que se fai un reconto miúdo da significación deste movemento cultural (Voces Ceibes e a Nova Canción Galega), con referencias concretas ás persoas máis directamente implicadas no mesmo. Tamén se inclúen, nun CD complementario, algunhas das grabacións máis significativas de Miro Casabella.

Que contar, como contar, que ler. Do 20 ao 24 de outubro

O Colectivo Casaescola de Vilagarcía organiza o seu II Encontro co obxectivo de asentar o hábito de lectura nos rapaces

(15-Outubro-2008)

Que contar, como contar, que ler. Este é o lema da segunda edición dos Encontros Casaescola que se van realizar do 20 ao 24 de outubro en Vilagarcía.

O I Encontro Da casa a escola animar a ler é cousa de tod@s realizouse por estas datas no curso escolar pasado, daquela o Colectivo Casaescola aínda non era unha asociación legal e fora a organización Escola Viva quen colaborara cos xestores de Casaescola na posta en marcha deste evento. Se o ano pasado Cantar, Contar e Xogar foi o centro de interese do Encontro centrándose dun xeito especial na infancia e os primeiros anos da escolarización dos nenos e nenas, este ano pais, nais e docentes xuntaranse de novo para estudar como asentar neles ese hábito da lectura, atendendo ao que se debe contar e como de pode contar.

Nesta edición o interese centrarase nos rapaces que agora cursan a Primaria da man dun gran coñecedor dos mecanismos da animación á lectura, Federico Martín, que xa fora un dos relatores do ano pasado, ao que acompañará un especialista en usar todo tipo de obxectos para contar, J.Antonio Lopez Parreño "Rodorín" e Quico Cadaval, experto nas estratexias para contar.

Este ano tamén se contará coa presenza de Kalandraka Editora, que realizará a presentación de varias novidades baixo o suxestivo título Eliximos que ler, pensando sempre en que contar e como contar.

O horario dos esncontros será de 19.00 h. a 21.30 h. no Auditorio de Vilagarcía e habilitarase no mesmo lugar un espazo con monitores para o coidado dos fillos e facilitar a asistencia de pais e nais.

 [Formulario de inscrición]

A publicación foi realizada polo Consello da Cultura Galega e contou coa colaboración da Secretaría Xeral de Comunicación da Xunta

Catro volumes recuperan as edicións facsimilares dos primeiros diarios galegos

(15-Outubro-2008)

O Consello da Cultura Galega acolleu no día de onte a presentación dos catro volumes que conforman Primeiros diarios galegos (1808-1809). Máis de dúas mil páxinas inclúen: Estudos críticos e as edicións facsimilares de Diario de Santiago; Apéndice al Primitivo Diario de Santiago, Gazeta de la Coruña e Telégrafo Político y Literario de la Coruña e Diario de la Coruña. Un traballo coordinado por Xosé López García e Rosa Aneiros.

No acto participaron Ramón Villares, Presidente do Consello da Cultura Galega, entidade responsable da publicación; Fernando Salgado, Secretario Xeral de Comunicación da Xunta, colaboradora na publicación e Xosé Ramón Barreiro, Presidente da Real Academia Galega.Ambos os tres concordaron en definir esta obra como “singular, espléndida e oportuna sobre o nacemento da prensa galega”.

A publicación aparece o ano que sinala o bicentenario da Guerra da Independencia contra o exército francés. “É unha obra da que se pode aprender”, segundo Ramón Villares, quen agradeceu a colaboración da Secretaría Xeral de Comuniciación para poder recuperar en edición facsimilar as primeiras cabeceiras galegas nacidas en 1808 e desaparecidas en xaneiro de 1809 coa chegada dos franceses a Galicia. Xosé Ramón Barreiro Fernández subliñou o feito de que “por unha vez Galicia non perdeu o tren dos acontecementos” e fixo notar que entre 1808 e 1815 houbo aquí 43 xornais impresos, a cifra mais alta nese momento en España. Para o Presidente da Real Academia Galega esta publicación “dignifica a conmemoración da efeméride histórica”. Fernando Salgado apuntou que o estudo dos primeiros diarios galegos “nacidos en tempo de guerra, como arma de propaganda e movilización, ilustra tamén sobre a complicidade entre o poder e os medios de comunicación”.

O traballo de localización e edición dos cinco títulos analizados realizouno Rosa Aneiros, coa colaboración de X. R. Barreiro Fernández. A decisión de acoller estas cabeceiras e non incluir outras posteriores veu determinada, ademais de pola súa importancia histórica, polo non abondoso número de exemplares existentes na actualidade. Para a iniciativa contouse coa colaboración importantísima da Real Academia Galega, e tamén da Biblioteca Nacional de Galicia, o Museo Santiago Rey Fernández-Latorre, o Arquivo do Reino de Galicia, o Museo de Pontevedra, Andrés Pascual e a Hemeroteca Municipal de Madrid.

Este proxecto editorial continúa a liña de traballo iniciada no ano 2000 polo Consello da Cultura Galega coa edición facsimilar do primeiro fito do xornalismo en Galicia: “El Catón Compostelano” (1800).

 [Máis información na web do Consello da Cultura Galega]

III Ciclo de Conferencias EscritorÆs na Universidade

Máis dunha ducia de escritores e escritoras achegarán a literatura aos universitarios de Vigo e da Coruña

(14-Outubro-2008)

A Asociación de Escritores en Lingua Galega e a Secretaría Xeral de Política Lingüística da Xunta de Galicia, en colaboración coas Facultade de Filoloxía das Universidades da Coruña e Vigo, organiza o III Ciclo de Conferencias EscritorÆs na Universidade, que achegará á comunidade universitaria e á sociedade en xeral a oportunidade de escoitar unha extraordinaria pléiade de escritores e escritoras das nosas letras.

Aínda que as conferencias darán comezo o mércores 15 de outubro, o acto de inauguración do ciclo será o día 16 de outubro, na Facultade de Filoloxía e Tradución da Universidade de Vigo, coa presenza do Vicerreitor de Relacións Institucionais, Sr. D. Iván Area, do Decano da Facultade de Filoloxía e Tradución, Sr. D. Joaquín Sueiro Justel, do Departamento de Filoloxías Galega e Latina, Sr. D. Anxo Lorenzo Suárez e polo Consello Directivo da Aelg a escritora Marta Dacosta.

Programa

Facultade de Filoloxía da Universidade da Coruña (Campus da Zapateira)

15 de outubro ás 12.00 h. Cesáreo Sánchez Iglesias.

22 de outubro ás 9.30 h. Marilar Aleixandre.

29 de outubro ás 12.30 h. Teresa Moure.

5 de novembro ás 12.30 h. Yolanda Castaño

Facultade de Filoloxía e Tradución da Universidade de Vigo

16 de outubro ás 12.00 h. O xénero poética na actualidade. Presenta Amparo Solla e interveñen Oriana Méndez, Manuel Outeiriño e Román Raña.

23 de outubro ás 12.00 h. O xénero teatral na actualidade. Presenta Manuel Forcadela e interveñen Gustavo Pernas, Euloxio R. Ruibal e Rubén Ruibal.

30 de outubro ás 12.00 h. O xénero narrativo na actualidade. Presenta Gonzalo Navaza e interveñen Francisco Castro, Xosé Miranda e Rexina Vega.

VI Encontro de Escritores Ourensáns

Os escritores ourensáns dedican unha xornada a Manuel Curros Enríquez

(14-Outubro-2008)

A Sección de Literatura do Liceo de Ourense, co patrocinio da Consellería de Cultura e Deporte da Xunta de Galicia, organiza o venres 17 de outubro o VI Encontro de Escritores Ourensáns, nesta edición dedicada ao escritor e xornalista Manuel Curros Enríquez, no ano en que se celebra o centenario do seu pasamento.

Estas xornadas, unha das citas imprescindibles do panorama literario ourensán, xa estiveron centradas na edición do pasado ano ao polígrafo ourensán Arturo Vázquez Núñez.

Abrirá a xornada a Mesa Redonda titulada Vida e obra de Manuel Curros Enríquez, que contará coa participación de Serafín Alonso Pintos, Afonso Vázquez-Monxardín e Antonio Piñeiro e de Marcos Valcárcel como moderador. Esta Mesa dará comezo ás 20.15 h. na Aula de Cultura do Liceo de Ourense.

A continuación haberá unha cea coloquio á que se convida a todas as persoas interesadas para debater sobre todos os aspectos da vida de Curros Enríquez, e que contará cos seguintes temas e poñentes:

 - Bieito Iglesias: Lingua e estilo en Manuel Curros Enríquez.

 - Luís González Tosar: A Masonería en Manuel Curros Enríquez.

 - Francisco X. Fernández Naval: Curros protestante.

 - Manuel Guede Oliva: O meu Curros Enríquez.

 - José María Pérez Álvarez (Chesi): Escritor e compromiso civil: Manuel Curros    Enríquez dende hoxe.

Para todos aqueles interesados en asistir á cea deben comunicalo no teléfono 988 222584

54 orixinais aspiraron a acadar algún dos galardóns

Teresa González Costa por partida doble e Xosé Antón Neira Cruz, gañadores do Álvaro Cunqueiro, o Manuel María e o Barriga Verde para textos dramáticos

(13-Outubro-2008)

O pasado 8 de outubro, na Sala de Xuntas do AGADIC (Axencia Galega das Industrias Culturais) reuníronse os membros do xurado do XVII Premio Álvaro Cunqueiro para Textos Teatrais, do III Premio Manuel María de Literatura Dramática Infantil e do VI Premio Barriga Verde de Textos para Teatro de Monicreques. Este xurado estivo formado por Emilio Xosé Ínsua López, Roberto Salgueiro González, Marica Campo, Carlos Labraña e Andrea Bayer, actuando como secretaria Marcelina Clavo e Laura Tato como presidenta.

Tras máis de catro horas de deliberacións decidiron proclamar a Teresa González Costa como gañadora da edición 2008 dos premios Álvaro Cunqueiro para Textos Teatrais e Manuel María de Literatura Dramática Infantil polas obras Sempre quixen bailar un tango e Pingueiras e tarteiras, respectivamente, mentres que Xosé A. Neira Cruz alzouse co Barriga Verde de Textos para Teatro de Monicreques na modalidade de teatro para rapaces con O punto da escarola. O nome dos autores recoñecidos este ano cos galardóns de literatura dramática que convoca a AGADIC foi desvelado hoxe pola presidenta do seu xurado, Laura Tato Fontaíña, no acto de inauguración da Feira Galega das Artes Escénicas, que se celebra até o vindeiro venres en diferentes escenarios de Santiago de Compostela.

Laura Tato informou, así mesmo, de que o Barriga Verde quedou deserto na categoría de teatro para adultos. Porén, o xurado quixo deixar constancia no seu ditame da "calidade e o bo nivel" dos textos presentados aos outros tres galardóns, de xeito que foron necesarias "longas deliberacións" para decidir os textos gañadores de entre o total de 54 orixinais candidatos: 28 ao Álvaro Cunqueiro, 10 ao Manuel María, e 16 ao Barriga Verde (13 textos para rapaces e 3 para adultos).

Segundo establecen as bases, os tres textos poderán ser publicados pola AGADIC nalgunha das coleccións dramáticas que mantén abertas en colaboración con diferentes editoriais galegas.

Con Sempre quixen bailar un tango e Pingueiras e tarteiras, Teresa González Costa convértese na primeira autora que ten no seu haber dous dos premios convocados pola AGADIC (anteriormente polo IGAEM): o Cunqueiro e o Manuel María. O primeiro dos textos, distinguido co XVII Premio Álvaro Cunqueiro para Textos Teatrais, debuxa un escenario de desencontros entre os personaxes que o habitan: Manuel, que se enfronta con serenidade ao final da súa vida; a súa filla mailo seu xenro, aos que a excitación polos plans de futuro os mantén alleos ao drama; e María, a moza encargada da limpeza, que a pesar do seu desencanto coa vida, é a única sensible ao que sucede ao seu carón.

O xurado destacou de Sempre quixen bailar un tango a solidez da súa estrutura dramática, cualificándoa como unha obra "moi coidada" e "moi ben construída", así como a súa intención de ridiculizar valores dominantes na sociedade actual como o afán de poder, a ambición, as aparencias, a superficialidade ou o materialismo, en contraste co "poder salvador dos soños".

Pola súa banda, o texto gañador do III Manuel María de Literatura Dramática Infantil, Pingueiras e tarteiras, é definido no ditame como unha apoloxía da ledicia e da fantasía que ofrece unha visión atípica e desmitificadora de personaxes arquetípicos. Trátase dunha obra moi lúdica, que recorre a múltiples xogos de palabras para contar como a chegada dunha compañía de circo cambia a vida cor gris nun castelo no que sempre chove.

En O punto da escarola, recoñecida co VI Premio Barriga Verde de Textos para Teatro de Monicreques, Neira Cruz artella un divertimento teatral que fai unha homenaxe implícita á profesión de titiriteiro, ao tempo que bota man de personaxes e situacións conectados co imaxinario infantil. Neste caso, o xurado valorou a plasticidade da obra e o enxeño dos seus diálogos, ademais de subliñar o seu "gran sentido do humor e unha utilización moi intelixente da música".

Ademais de por Laura Tato Fontaíña, como presidenta, o xurado da edición 2008 dos tres premios literarios da AGADIC estivo integrado por Emilio Xosé Insua López, Roberto Salgueiro González, Marica Campos, Carlos Ignacio Labraña Barrero e Andrea Bayer Lloves como vogais. As súas decisións respecto de todos os galardóns outorgados foron tomadas por maioría dos seus membros.

[Máis información]

[Acta do xurado]

Do 8 de outubro ao 8 de novembro

Siro expón na Fundación Granell unha mostra monográfica sobre Valle-Inclán

(13-Outubro-2008)

Por segundo ano consecutivo, a Fundación Eugenio Granell realiza un programa de actividades dedicado a Valle-Inclán, organizado en colaboración co museo Valle-Inclán da Pobra do Caramiñal, a Cátedra Valle-Inclán de Santiago de Compostela, e da Facultade de Filosofía da USC.

O programa de actividades consistirá nunha exposición monográfica dedicada ó escritor, un ciclo de cinema no que se poderá ver unha selección da súa obra levada ó medio cinematográfico, e nun ciclo de charlas que tratarán diferentes aspectos da vida e a obra de Valle-Inclán.

O artista e caricaturista Siro López é o autor da exposición Valle-Inclán: retratos, caricaturas e visións, unha mostra monográfica de caricaturas de Valle-Inclán. A imaxe de Valle-Inclán, xerou e segue a xerar, no público en xeral, e nos debuxantes de humor gráfico en particular unha total fascinación. A súa lánguida e finamente estudada imaxe, foi mil veces debuxada no formato de caricatura mesmo xa en vida do propio autor; a máxima, tan contemporánea, de unión de vida e obra de arte, pódese aplicar á figura de Valle-Inclán á perfección.

A exposición está composta por 38 pezas, entre retratos, caricaturas e visións, coas que ó artista plástico tenta achegarse á figura de Valle-Inclán. Siro, leva feito mais dun cento de retratos, caricaturas e visións de Ramón María del Valle-Inclán, ofrecéndose nesta mostra unha escolla variada deste inxente traballo que non remata, xa que o personaxe de Valle, como persoa e como creador, exerce un engado tal no autor, quen declara que "fai que siga a procuralo en cada mancha, en cada liña".

A exposición Valle-Inclán: retratos, caricaturas e visións poderase contemplar na Fundación Eugenio Granell (Pazo de Bendaña - Praza do Toural) de Santiago de Compostela entre os días 8 de outubro e 8 de novembro.

Ramiro Fonte faleceu despois de combater unha dura e difícil enfermidade

As letras galegas tíñense de loito

(12-Outubro-2008)

O poeta e narrador Ramiro Fonte faleceu na madrugada do venres ao sábado en Barcelona despois de combater durante meses contra unha dura e difícil enfermidade.

Natural de Pontedeume, foi un dos membros fundadores do Colectivo Cravo Fondo, con quen publica un libro colectivo en 1977. No mes e xullo recibiu o Premio Porto Magno de Real Coro "Toxos e Froles" por ser un "Gran poeta entre os máis grandes de sempre, en recoñecemento a toda a súa obra literaria, coa gratitude da Galicia do norte súa".

Ramiro Fonte é autor de máis dunha vintena de obras, entre as que figuran Designium (Xerais), Premio da Crítica de Galicia e Premio Losada Diéguez de creación; Pasa un segredo (Xerais), Premio da Crítica española; Adeus norte (Sociedad de Cultura Valle-Inclán), Premio Esquío; Mínima moralidade (Deputación da Coruña), Premio Miguel González Garcés; As regras do xogo (Cumio), Os leopardos da lúa (Galaxia), A rocha dos proscritos (Xerais), Soños eternos (Nigra) ou a triloxía Vidas da infancia, formada polos volumes Os meus ollos, Os ollos da ponte e As pontes do ceo, publicadas por Xerais. En breve verá a luz unha antoloxía poética preparada polo propio Ramiro publicada pola Sociedade de Cultura Valle-Inclán e Xerais publicará Reversos, poemario de formas clásicas no que estivo traballando Ramiro nos derradeiros meses.

O presidente do goberno, Emilio Pérez Touriño, expresou a súa consternación polo pasamento de Ramiro Fonte, quen viña desempeñando as funcións de director do Instituto Cervantes en Lisboa. A xuízo do titular do Goberno galego, “as letras e a lingua galega están de loito porque Galicia perdeu unha das voces máis lúcidas da nosa literatura” e que sempre "puxo o seu talento e a súa pluma ao servizo do noso país”. Pola súa parte, Carmen Caffarel, directora do Instituto Cervantes indicou "é unha pérdida tamén para a literatura contemporánea en lingua galega. A súa poesía, profundamente arraigada na memoria e nas preocupacións colectivas do presente, está cargada de emoción e de referentes vinculados á xeración que adquiriu a madurez na transición á democracia. Hoxe a poesía escríbese con dor."

O derradeiro adeus será este luns 13 de outubro, ás 16.30 h., na súa vila natal de Pontedeume.

A palabra, sempre queda a palabra

(Blas de Otero)

Do 7 de outubro ata o 30 de novembro

O Verbum de Vigo acolle unha exposición fotobiográfica e sonora de Celso Emilio Ferreiro

(09-Outubro-2008)

O Verbum. Casa das Palabras de Vigo inaugurou o pasado martes unha mostra temporal sobre a fotobiografía sonora de Celso Emilio Ferreiro. Esta exposición pretende ser unha innovadora forma de achegarse á obra dun autor que alimentou a varias xeracións de músicos e poetas dende diferentes perspectivas e dunha forma plena.

Celso Emilio Ferreiro. Fotobiografía sonora supón un percorrido por máis dun cento de imaxes que marcaron a vida do autor, seleccionadas por Carlos Díaz e comentadas por Ramón Nicolás, Xurxo Souto e Mónica Rodríguez que ilustrarán un poema representativo que permitirá ao visitante un estudo por décadas do universo literario e persoal de Celso Emilio Ferreiro, como xa quedou reflectido no volume Celso Emilio Ferreiro. Unha fotobiografía sonora publicada este mesmo ano por Ouvirmos.

Outra das características máis excepcionais desta mostra é a posibilidade de escoitar ao propio autor recitando un dos seus poemas ou ouvir cómo moitos autores do renome de Suso Vaamonde, María Manuela, Los Tamara ou Fuxan os Ventos interpretaron os seus textos.

A exposición sobre o poeta de Celanova permanecerá aberta ata o 30 de novembro.

Frankfurt, LIBER, Montevideo e Guadalajara

Os editores galegos levarán os seus produtos ás feiras internacionais do libro máis importantes do mundo

(07-Outubro-2008)

Os editores galegos e os seus produtos viaxarán este ano, coa colaboración da Consellería de Cultura e Deporte, ao encontro profesional do sector máis destacado a nivel internacional, a Feira Internacional do Libro de Frankfurt (Alemaña), e á única iniciativa deste tipo de relevancia mundial que se organiza en España, a Feira Internacional do Libro Liber 2008.

Feira Internacional do Libro de Frankfurt

A grande cita da edición que cada ano reúne a editores de todo o mundo en Alemaña e que terá nesta ocasión como país convidado a Turquía, celebrarase entre os días 15 e 19 de outubro. Ademais do encontro dos principais representantes internacionais do sector editorial, a feira alemá convertirase como cada ano nun dos principais centros de negocio do globo para a compra e venda de dereitos de edición, obxectivos fundamentais da delegación de editores galegos que se desprazará ata o encontro.

A Feira do Libro de Frankfurt acollerá este ano as últimas novidades da proposta editorial de máis de vinte editoriais pertencentes á Asociación Galega de Editores: Biblos Clube de Lectores, Hércules de Ediciones, Edicións Xerais de Galicia, Ir Indo Edicións, Rodeira, Kalandraka, Faktoría K de Libros, Laiovento, Everest Galicia, Sotelo Blanco Edicións, OQO Editora, Editorial Galaxia, Nigra Trea, Baía Edicións, Alvarellos Editora, Toxosoutos, Tórculo Edicións, Linteo, Tambre, A Nosa Terra e Nova Galicia Edicións.

Ademais dos diferentes encontros profesionais que os editores desprazados ata a cita alemá manteñan nos cinco días de feira, a Asociación Galega de Editores ten prevista toda unha serie de actividades para promocionar a edición galega no evento internacional, organizadas coa axuda da consultora de comercio exterior da Cámara de Comercio de Ferrol a través do Plan Foexga, Sofía Einöder e nas que se contará coa colaboración da tradutora María Reimóndez. Así, o xoves 16 de outubro a AGE presentarase ante o Círculo de Traballo de Editoriais Independentes (AkV), un grupo de traballo dentro da Börseverein des Deutschesn Buchhandels (Asociación de Libreiros Alemáns) creado co obxectivo de fomentar a cooperación no sector. Ese mesmo día manterase unha reunión coa Editorial Piper Malik, famosa en Alemaña pola publicación dun exitoso libro sobre o Camiño de Santiago.

Xa ao día seguinte, unha delegación da Asociación Galega de Editores presentarase ante a Kurt-Wolff-Stiftung, unha fundación creada no ano 2000 coa finalidade de promover a variedade literaria e editorial en Alemaña, entre outras actividades co Premio Kurt Wolff dotado de 26.000 euros, así como a colaboración con editoriais, librerías, bibliotecas, escritores, artistas e xornalistas tanto alemáns como do estranxeiro. Nesa reunión a AGE pretende dar a coñecer as súas funcións e editoriais asociadas, así como a liña de traballo levada a cabo no sector editorial galego. E posteriormente citarase coa editorial Verbrecher Verlag, creadores dunha interesante revista sobre o mundo da edición.

Feira Internacional do Libro LIBER

A Federación de Gremios de Editores de España (FGEE), á que pertence á Asociación Galega de Editores, é a entidade promotora da Feira Internacional do Libro Liber, que no ano 2008 terá cabida do 8 ó 10 de outubro en Barcelona. Liber é unha decisiva plataforma do mercado español para achegarse á realidade internacional do mundo da edición que no 2007 deu cabida a máis de 12.000 profesionais de 60 países, entre os que se atopaban máis de 700 editoriais. Este ano contará con Québec como cultura convidada.

Un total de vintecinco editoriais galegas estarán presentes en Liber 2008: Ideas Propias Editorial, Biblos Clube de Lectores, Hércules de Ediciones, Edicións Xerais de Galicia, Ir Indo Edicións, Rodeira, Kalandraka, Faktoría K de Libros, Laiovento, Everest Galicia, Sotelo Blanco Edicións, OQO Editora, Edicións do Cumio, Editorial Galaxia, Nigra Trea, Baía Edicións, Espiral Maior, Alvarellos Editora, Toxosoutos, Tórculo Edicións, Obradoiro, Linteo, Tambre, A Nosa Terra e Nova Galicia Edicións. Ademais numerosos editores desprazaranse ata a cidade condal para manter reunións con outros profesionais procedentes de todo o mundo.

Con motivo da participación da cultura de Québec como convidada de honra de Liber, organizarase un encontro entre os editores de Québec e de España para a compravenda de dereitos o día 9 de outubro. Nos días de feira tamén se levará a cabo unha misión comercial inversa organizada pola FGEE e composta por 60 bibliotecarios estadounidenses, 5 bibliotecarios e 8 editores do Reino Unido, 8 compradores de Xapón e 10 compradores de China, grazas á cal os editores galegos poderán dar a coñecer a súa produción de cara a posibles vendas mediante reunións con estes axentes estranxeiros. Ademais a AGE manterá diversos encontros con organizadores de feiras a nivel internacional e distribuidores de América Latina.

Montevideo

A delegada da Consellería na Coruña, Milagres Lantes, encabezará a delegación galega a Montevideo, onde manterá diversas reunións con entidades galegas no país sudamericano. Tamén viaxarán o escritor Santiago Jaureguízar, que intervirá en varias conferencias, e o grupo musical Ouriol, encabezado pola poeta Eva Veiga, que ofrecerá varios recitais poético-musicais. A delegación galega desprazarase tamén ata Bos Aires, onde desenvolverá diversas actividades.

Feira do Libro de Guadalajara

A última aposta da AGE no 2008 para levar a cabo a súa política de promoción é a participación na Feira do Libro de Guadalajara (México), que este ano terá lugar do 29 de novembro ó 7 de decembro. Trátase do evento máis relevante en toda a área latinoamericana en canto a asistencia de empresas e cifras de negocio e trala gratificante primeira experiencia do ano anterior dalgúns dos membros da asociación agárdase que este ano a feira mexicana sirva de marco para consolidar a presenza da edición galega en Latinoamérica. Organizarase con tal finalidade unha misión comercial coa colaboración da Cámara de Comercio da Coruña a través da cal os editores galegos poderán coñecer de primeira man o mercado mexicano, ademais de consolidar a candidatura de Galicia como país convidado para o 2011.

Vixésimo aniversario de CEDRO

CEDRO asina un Manifesto sobre o valor da cultura

(03-Outubro-2008)

Con motivo do seu vixésimo aniversario (1988-2008), o Centro Español de Dereitos Reprográficos (CEDRO) vén de facer público un manifesto. No texto, elaborado nos idiomas oficiais do Estado, resúmese o valor da cultura escrita en dez puntos concretos e difúndese co obxectivo de contribuir a sensibilizar ao conxunto da sociedade sobre a importancia de que se recoñeza e remunere xustamente o traballo dos creadores.

Manifesto de CEDRO

No vixésimo aniversario da creación de CEDRO, manifestamos que:

1. O traballo de escritores, tradutores e editores é unha das bases da riqueza intelectual da sociedade.

2. A dignidade profesional de autores e editores ten o seu fundamento no dereito de autor. É lexítima a súa aspiración a obter unha remuneración polo uso das súas obras e a que o seu traballo creativo se respecte e se protexa.

3. O acceso á información e á cultura non se pode nin debe realizar sacrificando os dereitos de autor.

4. As obras de autores e editores constitúen un valor insubstituíble para a educación, a formación permanente e a innovación en empresas, organismos públicos e centros educativos.

5. O sector do libro e das publicacións periódicas ten en España unha relevancia estratéxica: contribúe de forma significativa ao produto interior bruto, á creación de postos de traballo, á mellora da balanza comercial e á xeración no estranxeiro dunha imaxe positiva do noso país.

Por todo iso:

1. Reclamámoslles aos poderes públicos un decidido apoio aos creadores da cultura escrita e unha defensa enérxica e activa dos seus dereitos de autor, para alcanzar os mesmos niveis de respecto que existen noutros países europeos.

2. Demandamos o mantemento da compensación para os autores e editores pola copia privada das súas obras, que se leva a cabo masiva e indiscriminadamente nunha gran variedade de aparatos e soportes.

3. Instamos a todos os centros de traballo e de formación nos que se utilizan reproducións de libros e publicacións periódicas mediante fotocopia ou dixitalización, para obter a autorización previa dos titulares de dereitos, tal e como esixe a lei, mediante unha licenza de reprodución de CEDRO.

4. Expresamos o noso compromiso co desenvolvemento educativo, científico e cultural español, así como co necesario progreso das bibliotecas no noso país e coas políticas de fomento da lectura.

5. Manifestamos a nosa vontade de continuar traballando para consolidar e incrementar os importantes logros obtidos nos últimos vinte anos en materia de recoñecemento dos dereitos de autor, de remuneración a autores e editores pola reprodución das súas obras e de educación aos mozos acerca do valor da creación orixinal, obxectivos para os que pedimos a comprensión e a colaboración da sociedade.

CEDRO é a asociación sen ánimo de lucro de autores e editores de libros, revistas e outras publicacións, editadas en calquera medio e soporte, que se encarga de defender e xestionar de forma colectiva os seus dereitos de propiedade intelectual de tipo patrimonial (reprodución, transformación, comunicación pública e distribución). Foi autorizado para iso en 1988 polo Ministerio de Cultura, ao amparo da Lei de Propiedade Intelectual. A misión de CEDRO é representar e defender os lexítimos intereses de autores e editores de libros e publicacións periódicas, facilitando e promovendo o uso legal das súas obras.

O encontro servirá para homenaxear a Manuel García-Galeano, decano das letras na fala eonaviega

A Veiga acolle o I Encontro d'escritores en galego-asturiano

(02-Outubro-2008)

O venres 3 e o sábado 4 de outubro vaise celebrar na Casa da Cultura da Veiga (Vegadeo) o I Encontro d’escritores en galego-asturiano. Ao longo destes dous días haberán conferencias, mesas redondas, concertos e especialmente, un intercambio de ideas sobre o presente e o futuro da literatura en galego-asturiano. O Encontro servirá tamén para presentar o primeiro número da revista Trabatel, revista eonaviega de lliteratura.

No primeiro día do Encontro será homenaxeado Manuel García-Galeano, decano das letras na fala eonaviega e Académico de Honra da Academia de la Llingua Asturiana .

[Programa do I Encontro d'escritores en Galego-Asturiano]

Do 1 ao 18 de outubro

As Xornadas de Banda Deseñada de Ourense chegan a súa vixésima edición

(02-Outubro-2008)

Onte deu comezo unha nova edición das Xornadas de Banda Deseñada de Ourense, que este ano chega a súa vixésima edición, e que encherá de actividades a cidade auriense ata o 18 de outubro.

As XX Xornadas de Banda Deseñada de Ourense, organizadas conxuntamente pola Casa da Xuventude Ourense e polo Colectivo Phanzynex, acollerán este ano oito exposicións. As monográficas estarán dedicadas a Rachel Deville (Firminy, 1972), francesa residente en Barcelona, autora do álbum Lobas (2007) —unha reflexión autobiográfica sobre a súa condición de irmá xemelga—; ao estremeño Enrique Flores (1967), ilustrador habitual en medios como El País e autor de BD en diversas revistas e do álbum Bebop (2000, xunto con Felipe Hernández Cava), acerca do jazz dos anos cincuenta; ao portugués Filipe Abranches (Lisboa, 1965), un dos máis persoais autores da escena actual, cunha decena de álbums de BD, como O diário de K, Al'Mutamid, 16-1 ou Pássaros; e a Roque Romero (A Coruña, 1978), colaborador de numerosos fanzines como Carne Líquida ou Barsowia, e participante nos álbums colectivos H2Oil e Barsowia en llamas. No que respecta ás exposicións colectivas, estará a dedicada conxuntamente ás adaptacións á BD que de Romeo e Xulieta e de Tirant lo Blanc fixeron, respectivamente, os galegos David Rubín e Miguel Porto —que serán publicadas en breve por parte de SM—; a dos resultados da modalidade de Banda Deseñada do Certame Galego de Creadores Novos GZcrea 2008, convocado pola Dirección Xeral de Xuventude e Solidariedade; e mais a do Certamen Injuve de Cómic e Ilustración 2007, do Instituto de la Juventud.

Alén diso, as Xornadas dedicarán tamén unha pequena mostra ás súas vinte edicións, repasando os carteis, as portadas da súa revista O Fanzine das Xornadas (a máis veterana das publicacións dedicadas ao cómic en Galicia), os Premios Ourense, etc.

Haberá tamén proxeccións de cinema en pantalla grande, neste caso coa colaboración das salas Cinebox e do Cineclube Padre Feijoo. Serán dous filmes inéditos nas salas comerciais da cidade: o mércores 1 (20.30 h. e 23.00 h.), El castillo ambulante, de Hayao Miyazaki (tamén autor de cómic), e o mércores 8 (20.30 h. e 23.00 h.) Persépolis, codirixida pola autora da BD homónima en que se basea, Marjane Satrapi. Ambos os dous filmes foron gañadores de diferentes premios, ademais de teren sido nomeados para os Oscar na categoría de película de animación: El castillo ambulante recibiu a Osella de Ouro no Festival de Venecia, e Persépolis o Premio do Xurado no Festival de Cannes.

O programa inclúe ademais, como é habitual, presentacións de diversas edicións, entregas de galardóns (no transcurso dos actos de inauguración) e encontros cos autores. O venres 3 de outubro a Livraría Torga acollerá a presentación do número 3 da revista BD Banda, que contará coa presenza de Kiko da Silva, Miguelanxo Carvalho e Xico Paradelo. O sábado 4 de outubro, a partir das 12.00 h., a Casa da Xuventude será escenario de encontros e mesas redondas cos autores das exposicións e xa pola tarde, a partir das 17.00 h., presentación de exercicios creativos colectivos do Lab·Ou (Laboratorio Galego de BD Experimental). O venres 10 de outubro, ás 19.30 h., na Livraría Torga, presentación de Terra Libre (Xerais) de Fran Jaraba, que supón o fin da triloxía iniciada con Cita na Habana, ambientada na Guerra de Independencia cubana. O 14 de outubro, ás 12.00 h. na Casa da Xuventude, presentación do segundo tomo de Historias de Galiza, unha nova entrega da serie de cómics de ambientación histórica con guións de Carlos Rafael Ramos e debuxos de Idoia de Luxán, Carlos Alfonzo, Juan Luis Pérez, Jaime Eizaguirre e Jerónimo Piñeiro.

Tábula Rasa. Novas prácticas transdisciplinares

Yolanda Castaño fusiona a súa poesía con outras disciplinas artísticas no CGAC

(01-Outubro-2008)

O Centro Galego de Arte Contemporánea de Santiago de Compostela ten programado para os días 2, 3 e 4 de outubro o ciclo Tábula rasa. Novas prácticas transdisciplinares. Estes tres días xirarán en torno á idea de transversalidade, tanto por ser eventos pouco habituais no marco dun centro de arte como pola hibridación que ofrecen algunhas das propostas. Trátase dunha visión heteroxénea de prácticas que se sitúan na fronteira do puro/impuro.

Yolanda Castaño presenta mañá Tender a man, un espectáculo poético que vai fiando distintas experiencias de fusión da poesía de Yolanda Castaño con outros e outras artistas de diversas disciplinas creativas. Coa ambientación sonora a cargo de Sulxeitos (Isaac Garabatos e Jesús Andrés Tejada), os versos atopan novos camiños de comunicación apoiándose en distintas montaxes das que participan -ademáis destes músicos galegos de dilatada experiencia, a cabalo entre o jazz e a electrónica- outros creadores do eido plástico e audiovisual. Entre eles, contribúe o grafismo de Enrique Lista inspirado no último libro de Castaño, Profundidade de campo (Espiral Maior), as pinturas de Isabel Pintado baseadas no poema Contos de fadas, a montaxe de vídeo sobre o texto Highway to heaven a cargo de Manu Viqueira e outras pezas a varias voces, con efectos de son, luz, videopoesía ou performance.

XVI Xornadas Mar por Medio

Galicia e Portugal estabelecerán pontes culturais do 17 ao 19 de outubro en Ribadeo

(01-Outubro-2008)

O concello lucense de Ribadeo será o escenario das XVI Xornadas Mar por Medio que, baixa o epígrafe de Galiza e Portugal. A construción dun espazo común de comunicación e cultura. Un encontro dedicado este ano a Portugal e promovido pola Consellería de Cultura e o Concello de Ribadeo en colaboración coa Deputación Provincial de Lugo e o Instituto Camões que reunirá, entre os días 17 e 19 deste mes, a expertos de ambos lados da fronteira para establecer pontes entre as súas políticas culturais, mercados creativos, medios de comunicación e para favorecer a circulación dos artistas.

Os coloquios serán inaugurados polo director xeral de Creación de Difusión Cultural, Luis Bará, un representante da Dirección Xeral das Artes de Portugal e o alcalde de Ribadeo, Fernando Suárez. Con tal acto ábrese un programa que reflexionará sobre a cooperación institucional nos ámbitos informativo, da programación cultural, da mobilidade dos artistas, e sobre todo, no camiño a trazar para políticas culturais de cara ao futuro.

Na súa XVI edición, "Mar por Medio" mira cara o futuro para rematar co paradoxal descoñecemento mutuo entre galegos e portugueses e trazar estratexias conxuntas para as industrias culturais dos dous países. Máis alá das cifras de persoas que cruzan a Raia para ir traballar, transportar mercancías, facer turismo ou negocios, existe un nexo cultural que hai que reavivar, e que supón o complemento imprescindible para a nosa "eurorrexión" e que estende os seus lazos ata o sur do país veciño.

Lareira Literaria

Manuel Darriba, Rosa Enríquez e Antón Cortizas na Lareira Literaria de outubro

(01-Outubro-2008)

Na Lareira Literaria deste mes contamos coa presenza de Manuel Darriba, Rosa Enríquez e Antón Cortizas.

Tras gañar no 2005 o Premio Espiral Maior de Poesía con Vostede non sabe con quen está a falar o xornalista e escritor sarriao Manuel Darriba prepara a inminente publicación de Brais e os demais, que estará nos andeis este Nadal editado por Galaxia.

Pola súa parte, Rosa Enríquez sorpréndenos coa publicación do seu primeiro traballo narrativo. Unicrom achegará aos lectores o mundo de Aretz, situado na galaxia de Ionak. Tras Vestíbulo da devastación os seus lectores esperamos ver o que nos ofrece unha Rosa Enríquez de ciencia-ficción. Iso será a finais deste ano baixo a marca de Edicións Sotelo Blanco. Tamén para finais do 2008 ou ao comezo do 2009 verá a luz Raizame Vexetal, poemario co que Rosa foi 1º Accésit do Premio I Conde de Gondomar. Este libro, que será publicado nun volume colectivo, será publicado por Alvarellos Editora.

Antón Cortizas ten preparado un bo menú literario para todos os lectores. No que resta de ano publicará en Émbora Sopra neste furadiño e Contín, Contón, dime quen son, ámbolos dous libros para o público infantil. Continuando co traballo principiado con Chirlosmirlos, enciclopedia dos xogos populares Antón, despois de catro anos de investigación, publicará Tastarabás. Catálogo de brinquedos populares e uso lúdico da Natureza. Tamén un traballo de recompilación e investigación é Ao pé da Laxa da Moa. Literatura carnotá de tradición oral, que posiblemente sairá publicado no 2009. Aínda sen confirmar a súa saída aos andeis das librarías, Vaia tropa! é un libro infantil de absurdos limericks, uns pequenos poemas que roldan o surrealismo.

[Lareira Literaria]