A escritora luguesa ocupará a vacante deixada por Miguel Ángel Arauxo tras o seu falecemento

Margarita Ledo Andión foi nomeada Académica electa da Real Academia Galega

(31-Marzo-2008)

O Plenario da Real Academia Galega, reunido en sesión ordinaria o 29 de marzo de 2008, acordou nomear académica electa a dona Margarita Ledo Andión, para ocupar a vacante que se produciu tras o falecemento do académico numerario don Miguel Anxo Araúxo Iglesias.

Margarita Ledo Andión (Castro de Rei, Terra Chá, 1951) é escritora, cineasta, é actualmente catedrática de Comunicación Audiovisual na Universidade de Santiago de Compostela.

Como poeta, publicou dous importantes libros nos primeiros anos da década dos setenta, dentro dunha estética máis avanzada ca a dominante naqueles anos, e que en gran medida anuncian camiños que se impuxeron máis tarde. Margarita Ledo, aínda que a súa activa vida de profesional da información poida facer esquecelo ás veces, é unha das personalidades literarias máis interesantes do noso tempo.

Ten publicado numerosos traballos de investigación sobre o sector audiovisual, nos que entre outros eixos destacan as culturas minorizadas e o formato documental. Dirixe o Observatorio do Audiovisual Galego (ODA), preside a Federación Lusófona de Ciencias da Comunicación (LUSOCOM) e a Asociación Galega de Investigación en Comunicación (AGACOM), tamén pertence a comisións executivas e consellos editoriais de diversas entidades e publicacións.

As subvencións están destinadas á edición en soporte impreso, dixital ou audiovisual

A Secretaría Xeral de Política Lingüística destina máis dun millón de euros para proxectos editoriais en lingua galega

(31-Marzo-2008)

A Secretaría Xeral de Política Lingüística anuncia unha convocatoria de axudas para fomentar a elaboración e a publicación de recursos didácticos curriculares en lingua galega, para niveis non universitarios. Destínase unha contía máxima de 1.050.000 euros.

A convocatoria de subvencións está destinada á edición, en soporte impreso, dixital ou audiovisual, de diversos materiais didácticos curriculares e complementarios, así como á elaboración de material para a formación de adultos. Este último deberá incorporar as directrices do Marco europeo común de referencia para as linguas. Os requisitos para poder acceder ás axudas son que as empresas solicitantes dispoñan dun departamento de edición en Galicia e que os títulos propostos estean correctamente realizados en galego. Ademais, os materiais editados en soporte impreso deberán ter unha tiraxe mínima de 1.000 exemplares e de 500 os editados en soporte dixital ou audiovisual.

A calidade da obra, a orixinalidade, a adaptación dos contidos ao currículo establecido, o tipo de contidos, a transversalidade ou a calidade lingüística serán algúns dos criterios preferentes para a concesión de subvencións.

A presentación de solicitudes poderá realizarse ata o 31 de abril. O prazo máximo para a resolución das concesións non poderá exceder de seis meses, contados a partir do 29 de marzo, o día seguinte ao da publicación desta resolución no Diario Oficial de Galicia.

Encontros do Plan de Mellora de Bibliotecas Escolares 07/08

Responsables de bibliotecas escolares intentan mellorar estes recursos educativos nunhas xornadas

(30-Marzo-2008)

Os vindeiros 3 e 4 de abril celebraranse, na localidade de Sanxenxo, os Encontros do Plan de Mellora de Bibliotecas Escolares 07/08. Alí se reunirán os responsables das bibliotecas escolares de todos os centros incluídos neste programa, co obxectivo de intercambiar informacións e materiais e avanzar na súa formación nos diversos aspectos da dinamización deste importante recurso educativo. Ao longo destes encontros vanse analizar aspectos que afectan e preocupan ás bibliotecas de centros educativos.

Na primera xornada o profesor José Antonio Camacho exporá algúns dos obxectos de estudo que ven preparando na súa tese de doutoramento: como avaliar procesos e resultados na biblioteca escolar. Aprender a ler: ler para aprender é o título da ponencia da docente e investigadora María de Lourdes Dionísio. O director de Xerais e autor do blog Bretemas Manuel Bragado falará dos blogs e sobre a lectura en galego no marco da nova literacidade. Para rematar, obradoiros a cargo de Antón Castro, Charo Pita e José Fariña e José Luis Barreiro.

O venres 4 de abril Villar Arellano, directora da biblioteca Civican da Fundación Caja Navarra, mostrará a biblioteca escolar como centro de recursos para a aprendizaxe e a alfabetización internacional. Os recursos electrónicos nas bibliotecas escolares e a súa relación cos proxectos lectores será o tema a tratar na conferencia de José Manuel Luque, coordinador do Plan de Lectura e Biblioteca en Málaga. A experta en estudos literarios e tecnoloxías dixitais Laura Borràs intervirá cunha ponencia sobre o fomento da lectura en contornos dixitais. Rematará estes encontros o escritor valencián Gonzalo Moure.

Darío Xohán Cabana, Yolanda Castaño, Antía Otero, An Alfaya, Mona Imai e María Lado pasarán no mes de abril polo concello cangués

Abril será o mes do libro en Moaña

(27-Marzo-2008)

A concellería de Cultura e Educación do Concello de Moaña presenta a programación de Abril, mes do libro, que organiza a Biblioteca Pública Municipal de Moaña e a Lonxa Literaria. Ao longo do mes de abril se desenvolverán recitais poéticos, tertulias e obradoiros literarios e contará coa presencia de Darío Xohán Cabana, Yolanda Castaño, Antía Otero, An Alfaya, Mona Imai e María Lado.

Mañá venres haberá dous recitais poéticos a cargo de Darío Xohán Cabana e Yolanda Castaño. O poeta de Roás estará a partir das 11.30 h. na Biblioteca municipal; esta actividade está dirixida a escolares do concello de Moaña. O acto de Yolanda Castaño comezará ás 20.00 h. na Casa da Mocidade.

O 2 de abril, coincidindo co Día Internacional do Libro Infantil e Xuvenil, as poetas Antía Otero e Yolanda Castaño realizarán un recital poético colectivo na Biblioteca de Moaña. Esta actividade, dirixida tamén aos escolares, dará comezo ás 11.30 h.

An Alfaya falará da súa Sombra descalza (Xerais), premio Lazarillo 2005, nun acto organizado pola Lonxa Literaria. Na Casa da Mocidade a partir das 18.00 h.

A tradutora de A casa das belas adormentadas (Rinoceronte) Mona Imai, participará ao redor dunha tertulia literaria da obra do seu compatriota, o xaponés Yasunari Kawabata. Ás 21.00 h. na Casa de Cultura de Abelendo, nun acto organizado pola Lonxa Literaria.

A partir do 20 de abril María Lado impartirá un obradoiro de creación literaria na Biblioteca Municipal de Moaña. Os interesados en inscribirse ten que chamar ao teléfono 986314250.

Abril, mes do libro rematará cun coloquio-obradoiro literario na Biblioteca Municipal de Domaio. A duración do mesmo é de dúas horas e a entrada é libre. Comezará ás 18.00 h.

Os usuarios de Bergondo, Guísamo, Arca e Redondela contarán desde hoxe con este servizo

A campaña 'Lendo espero' achega libros a 45 centros médicos galegos

(27-Marzo-2008)

A campaña de fomento da lectura ‘Lendo espero’ chega a 45 centros médicos de toda Galicia co obxectivo de promover este hábito entre todos os públicos. Este ano son 16 os concellos inscritos no programa que se leva desenvolvendo de forma estable dende o 2006 e que desde hoxe se instalará en Bergondo, Guísamo, Arca e Redondela.

Especialmente dirixido aos cativos e cativas, ‘Lendo espero’ distribúe libros de diverso tipo nas salas de espera dos servizos de pediatría nas distintas localidades galegas dende o 2006. Esta iniciativa permitirá introducir os libros na vida dos nenos e nenas como forma de entretemento e por outra banda, búscase aproveitar o encontro de pais e fillos para ler e demostrarlles aos pais a importancia da lectura como unha forma de distracción e a riqueza que conleva.

Nos servizos de pediatría diporase dun punto de lectura, con libros e información sobre as condicións de uso. Os usuarios poderán coller os libros libremente, que estarán dirixidos, principalmente, a idades novas e conterán abondosas imaxes. Para o mantemento cotiá e a actualización dos fondos, a Consellería contará coa colaboración das bibliotecas municipais.

Os últimos en acoller está campaña durante este ano foron Oleiros, Rianxo, Carballo, Cedeira, Poio, Meis e Illa de Arousa. E está previsto que a inclúan Bergondo, Guísamo, Arca, Redondela, Monterroso, Barbadás, Xunqueira de Ambía, Caldas de Reis, Cuntis e Salvaterra do Miño.

Os premios, dotados con 15000 euros, serán seleccionados por un xurado formado por quince membros de recoñecido prestixio

Créanse os Premios Nacionais da Cultura Galega

(24-Marzo-2008)

A conselleira de Cultura e Deporte, Ánxela Bugallo, presentou esta mañá no CGAC os Premios Nacionais da Cultura Galega, acompañada polos quince membros do xurado que elixirán as dez modalidades dos galardóns: Arquitectura e Espazos Públicos, Artes Visuais, Artes Escénicas, Literatura, Música, Patrimonio Cultural, Pensamento e Cultura Científica, Cine e Audiovisual, Iniciativa Cultural e Cultura Tradicional e de Base.

Cultura convoca estes Premios coa finalidade de facer unha mención pública a aquelas persoas ou colectivos que se teñan destacado no enriquecemento da cultura galega, tanto coas súas obras como coa súa participación en distintas iniciativas no eido da creación ou do fortalecemento do noso patrimonio cultural, tal e como aparece hoxe no DOG.

As candidaturas poderán ser presentadas polos membros do xurado e tamén por institucións, entidades culturais e profesionais relacionadas coas actividades artísticas, culturais e patrimoniais obxecto de cada premio. Estes galardóns convocaranse con carácter anual a partir deste ano e cada categoría está dotada con 15.000 euros. Os premios recaerán preferentemente en persoas –físicas ou xurídicas, que teñan destacado por unha obra ou actuación desenvolvida no ano anterior ou en recoñecemento do conxunto dunha traxectoria.

Todos os premios serán adxudicados por un xurado único, formado por 15 profesionais de recoñecido prestixio e representativos de cada sector da cultura nas actividades obxecto dos respectivos premios. Son os seguintes:María Xosé Agra Romero, Rosario Álvarez Blanco, Xosé Ramón Barreiro Fernández, Xosé Luis Barreiro Rivas, Xosé Manuel Buxán Bran, María Bouzas, Domingo Docampo Amoedo, Laura Tato Fontaíña, María Isabel Fraga Vila, Celestino García Braña, Ana Romaní Blanco, John Rutherford, Felipe Senén López Gómez, Xurxo Souto e Ramón Villares Paz.

 [Máis información]

Rosalía de Castro e Celso Emilio Ferreiro inauguran esta nova liña editorial

Trece Lúas, nova iniciativa editorial de Faktoría K

(24-Marzo-2008)

Trala recente conmemoración -o 21 de marzo- do Día Mundial da Poesía, Faktoría K presenta unha nova iniciativa editorial, a colección Trece Lúas, que se inaugura con senllas escolmas poéticas de dous dos autores máis sobranceiros na Historia da Literatura Galega: Rosalía de Castro e Celso Emilio Ferreiro. Dous libros con páxinas despregables que conteñen trece poemas cada un, ilustrados por Belén Padrón e Baldo Ramos, respectivamente. Poesía visual para ler pausadamente, meditar e contemplar placidamente sobre un atril, para que os seus versos e estampas inunden o espírito do lector.

Mañá martes, 25 de marzo, ás 20 horas na Libraría Couceiro de Santiago (Praza de Cervantes, 6) celebrarase un acto de presentación no que van participar a presidenta da Fundación Rosalía de Castro, Helena Villar, o crítico literario Ramón Nicolás, especialista na obra de Celso Emilio Ferreiro, e o artista Baldo Ramos. Un recital de poesía e música, para achegarnos á vida e á obra dos autores.

Belén Padrón dálle forma e cor a cada poema de Rosalía, plasmando nas súas ilustracións a súa visión do imaxinario ‘rosaliniano’. Imaxes de contido onírico e simbólico sobre o desamor, a morriña, a beleza da paisaxe, a vida da paisanaxe, as inxustizas sociais, a saudade e o desacougo interior. Baldo Ramos -natural de Celanova, coma Celso Emilio Ferreiro- presenta unha sucesión de imaxes de estilo surrealista, formato caligráfico, cunha mestura cromática na que contrastan negro, branco, vermello, amarelo, lila e granate.

O congreso se desenvolverá entre nos días 24 e 28 de marzo

Especialistas de carácter internacional xuntaranse en Compostela para analizar a literatura e a iconografía do Camiño de Santiago

(21-Marzo-2008)

A Universidade de Santiago de Compostela acolle o Congreso Internacional In marsupiis Peregrinorum. Circulación de textos e imaxes arredor do Camiño de Santiago na Idade Media. Este Congreso inscríbese no marco do Programa de Doutoramento Europeo en Filoloxía Románica que a Universidade de Santiago de Compostela mantén coas Universidades de Milano, Zürich, Paris IV-Sorbonne, Pavia e Siena. Nas xornadas de traballo previstas, concibidas desde unha perspectiva multidisciplinar, participarán especialistas en historia, arte e literatura, así como na lingua e no imaxinario que se construíu arredor do Camiño de Santiago durante a Idade Media.

O Congreso dividirase en dúas partes diferenciadas: unha primeira sección, integrada por unha serie de relatorios nos que especialistas internacionais abordarán os temas obxecto de estudo desde diferentes perspectivas, e unha segunda, na que os doutorandos que desexen participar activamente no encontro tomarán a iniciativa con comunicacións e mesas redondas, apoiados por estudosos expertos que abrirán ou pecharán as xornadas.

O obxectivo último do Congreso é fomentar o intercambio de experiencias entre especialistas de diversos ámbitos e fomentar, así mesmo, a convivencia entre investigadores expertos nos campos da historia, da arte, da lingua, da literatura e da cultura na súa relación co Camiño de Santiago e novos investigadores que inician a súa actividade nestes campos de estudo.

 [Máis información]

Dentro de pouco aparecerá unha segunda fase dirixida ao pública máis novo

A Consellería de Cultura e Deporte presenta Praza das Letras, un portal para a promoción do libro galego e a lectura

(14-Marzo-2008)

A Consellería de Cultura e Deporte presentou hoxe o portal en Internet ‘PrazaDasLetras.org’, un proxecto creado para ser o referente do libro galego en Internet. Este portal web integra toda a información relacionada co sector do libro e nace para converterse na ferramenta de referencia para coñecer e complementar as campañas e as políticas de fomento da lectura e promoción do libro que desenvolve a Consellería.

Este portal dá continuación á revista en soporte papel, da que xa se editaron catro títulos. Funcionará como aglutinador na Rede das diferentes accións que a Consellaría leve adiante para desenvolver o Plan de Fomento do Libro e a Lectura, que Cultura presentou en outubro de 2007 e para o que hai previsto un investimento de 50 millóns de euros ata o 2011.

‘PrazaDasLetras.org’ conta coa participación e o apoio de todos os colectivos implicados no sector do libro. Busca dinamizar a actividade social, creativa e económica do sector do libro e da lectura, e quere ser a parte visible dunha estratexia que a Consellaría desenvolve no mundo real para potenciar a industria editorial galega e os hábitos lectores na sociedade. Na web destaca a amplitude dos contidos, con información e recursos de utilidade para os lectores e as lectoras, os propios axentes do sector e as administracións e entidades que participan no fomento da lectura.

O portal conta cun extenso catálogo de autores en lingua galega, no que aparecen máis de 850 escritores, ilustradores e tradutores, dos que nuns casos se achegan datos básicos e noutros se inclúen reseñas biográficas máis completas. Outro catálogo reúne arredor de 350 referencias editoriais en galego, coas últimas novidades e títulos clásicos en narrativa, teatro, poesía e ensaio. Estes dous catálogos serán ampliados progresivamente. Complétanse coa relación das editoriais galegas e das asociacións que agrupan aos principais actores do sector.

A sección de actualidade da web inclúe noticias relacionadas co libro galego, áreas específicas dedicadas aos premios literarios e ás feiras do sector, e unha completa axenda con todos os eventos arredor do libro que se celebran en Galiza: presentacións, obradoiros, tertulias, feiras, salóns, certames e outras actividades.

O portal conta cunha sección titulada ‘Coa lectura’, na que se engloban contidos máis en profundidade, como entrevistas cos autores e outros protagonistas do mundo editorial, reportaxes e dosieres sobre temas específicos. Tamén hai espazo para as recomendacións literarias. En ‘Le comigo’, personaxes de diferentes ámbitos da vida social galega responden preguntas sobre as súas lecturas pasadas, presentes e futuras. E en ‘Lecturas temáticas’, escritores e expertos recomendan seleccións de libros galegos para achegarse a diferentes temas. Por último, hai nesta sección un lugar para os ‘Clubs de lectura’, no que aparecen aqueles que en Galiza ou noutros lugares do mundo se realizan arredor do libro galego.

A última sección da web leva por nome ‘En acción’ e permite coñecer a industria editorial e as campañas e políticas de fomento do libro e a lectura. Nesta sección relaciónase a lexislación que concerne ao sector, as diferentes campañas desenvolvidas pola Consellaría de Cultura para fomentar a lectura e datos e análises sobre a situación do sector. O espazo ‘Vendendo fóra’ dá conta das iniciativas para a internacionalización do libro galego, con información sobre as diferentes propostas e axudas. E en ‘Recursos na rede’ engádese unha ampla relación de sitios web vinculados ao libro.

Está prevista unha segunda fase de desenvolvemento da web encamiñada a incentivar a participación, cunha sección pensada para público infantil e xuvenil, con novidades editoriais e ferramentas para achegar o ámbito da lectura e da creación aos máis novos. O bloque máis interactivo da web completarase cunha editora virtual, pensada para incentivar a creación.

 [Máis información]

 [Praza das Letras]

Os galardóns entregaranse na Cea das Letras, á que asistirá Nancy Morejón "Escritora Galega Universal"

A AELG da a coñecer os finalistas dos premios que outorga a asociación neste 2008

(12-Marzo-2008)

A Asociación de Escritores en Lingua Galega deu a coñecer hoxe os finalistas dos premios AELG 2008 que se celebrará na tradicional Cea das Letras o 26 de abril. A AELG recoñecese así a mellor obra publicada no 2007 en cadanseu xénero: Literatura Infantil e Xuvenil (en colaboración con Gálix, cuxos socios/as tamén votarán nesta categoría), Literatura Xornalística (que premiará o/a autor/a coa mellor traxectoria xornalística no 2007, e para cuxa elección tamén se contará cos votos dos/as membros do Colexio de Xornalistas), Tradución, Teatro, Narrativa, Ensaio e Poesía.

Esta é a listaxe de finalistas dos Premios AELG 2008 correspondentes a cada xénero:

Literatura Infantil e Xuvenil

 - Illa soidade (Xerais) de An Alfaya.

 - Rinocerontes e quimeras (Tambre) de Marcos S. Calveiro.

 - Boas noites (Xerais) de Paula Carballeira.

 - A lagoa das nenas mudas (Xerais) de Finda Casalderrey.

 - Libro das alquimias (Galaxia) de Xesús Constela.

 - Minimaladas (Xerais) de Carlos López.

 - O único que queda é o amor (Xerais) de Agustín Fernández Paz.

 - Saladina (Galaxia) de Xavier Queipo.

Poesía

 - Ortigas (Espiral Maior) de Xiana Arias.

 - Sextinario: trinta e seis + tres (Sotelo Blanco) de Marica Campo.

 - Hai cu (Xerais) de O Leo

 - Diccionario do estremecemento (Espiral maior) de Migual A. Fernán-Vello.

 - Miño (Espiral Maior) de Francisco X. Fernández Naval.

 - Morte do mar (Baía Edicións) de Paulino Pereiro.

 - Cólera (Xerais) de María Xosé Queizán.

Teatro

 - Crío-Xénese (Laiovento) de Afonso Becerra.

 - Comedia bífida (Galaxia) de Manuel Núñez Singala.

 - Ciclo de Marte (Linteo) de Millán Picouto.

Ensaio

 - De provincia a nación (Xerais) de Justo G. Beramendi.

 - Arte e parte. Dos patriarcas á arte suicida (Galaxia) de Xurxo Borrazás.

 - Querer, crer, entrever (Laiovento) de Carlos P. Martínez Pereiro.

Tradución

 - Fuxir (Galaxia) de Jean-Philippe Toussaint e traducido por Carmen e Mª Dolores Torres París.

 - O castelo branco (Galaxia) de Orhan Pamuk e traducido por Eva Almazán.

 - Poemas canónicos (Rinoceronte) de Konstantinos Kavafis e traducido por Yolanda Vilarchao.

 - O muiñeiro ouveador (Rinoceronte) de Arto Paasilinna e traducido por Tomás González Ahola.

Narrativa

 - As palabras da néboa (Galaxia) de Francisco Castro.

 - Trinta e dous dentes (Galaxia) de Xavier López López.

 - O soño da febre (Galaxia) de Miguel Anxo Murado.

 - O señor Lugrís e a negra sombra (Xerais) de Luís Rei Núñez.

 - Os ollos de K (Galaxia) de Antón Riveiro Coello.

 - Made in Galiza (Galaxia) de Séchu Sende.

 - Así nacen as baleas (Galaxia) de Anxos Sumai.

Literatura xornalística

Rosa Aneiros, Xosé Carlos Caneiro, Alfredo Conde, Bieito Iglesias, Gustavo Luca de Tena, Manuel X. Neira, Xosé Luís Méndez Ferrín, Xosé Manuel Pereiro e Manuel Rivas

O Premio AELG Internacional 2008, “Escritora Galega Universal”, recaeu por decisión da Asemblea Anual de Socios/as na figura da escritora cubana Nancy Morejón, que estará entre nós no mes de abril, asistindo o sábado día 26 de dito mes á Cea das Letras, durante a que se entregarán os galardóns. Así mesmo, a Asemblea aprobou conceder o Premio AELG para Institucións 2008 á Mostra de Teatro de Ribadavia.

 [Ver os gañadores do ano pasado]

Na nosa lyngoage galega recolle as actas do simposio organizado en 2005 polo ILGA en colaboración co Consello da Cultura galega

A USC e o Consello da Cultura Galega presentan un libro sobre a emerxencia do galego como lingua escrita no medievo

(12-Marzo-2008)

Onte presentouse no Consello da Cultura Galega o libro Na nosa lyngoage galega. A emerxencia do galego como lingua escrita na Idade Media, que recolle as actas do simposio organizado en novembro de 2005 polo Instituto da Lingua Galega en colaboración co Consello da Cultura. A obra, que segundo Rosario Álvarez, directora do ILG, “supón un fito nos estudos sobre o galego histórico” é tamén unha homenaxe ao profesor e investigador Ramón Lorenzo por parte dos seus compañeiros do ILG.

O volume, de case setecentas páxinas e editado por Ana Boullón, reúne estudos que abordan o contexto histórico e cultural, a relación entre o latín e o romance, a escrita do romance no ámbito peninsular e diferentes aspectos da emerxencia do romance escrito en Galicia na época baixomedieval. Son traballos feitos por especialistas da Universidade de Santiago e doutras universidades españolas e europeas que analizan desde dinstintas perspectivas (histórica, paleográfica e lingüística) as circunstancias que fixeron posible o inicio da escrita en galego na Idade Media. Os traballos consideran asemade as situacións do noso contorno xeográfico e lingüístico (Portugal, Castela e Cataluña) e o encadramento no ámbito europeo.

O presidente do Consello da Cultura Galega, Ramón Villares, que presidiu o acto, gabouse do traballo feito polo ILG e da colaboración prestada polo Consello. Felicitou tamén a Ramón Lorenzo a quen se referiu como “un rei no estudo da lingua galega”.

 [Máis información]