Os nomes dos gañadores o vindeiro 7 de xuño na Illa de San Simón

Finalistas dos Premios Xerais 2008

(31-Maio-2008)

Tras a súa primeira sesión de deliberación, celebrada na tarde de hoxe, os xurados dos Premios Xerais 2008 declararon as obras finalistas nas tres modalidades.

O xurado da 25ª edición do Premio Xerais de Novela, formado polos escritores Xabier Puente Docampo, Xosé Miranda, Santiago Jaureguizar, Uxía Casal, Estíbaliz Espinosa e Francisco Alonso Villaverde (editor), en representación de Xerais, con voz e sen voto, entre as cincuenta e catro obras participantes, declarou finalistas as presentadas baixo os seguintes lemas: As sereas de Tubinga, Flora da xunqueira e Memoria de sal.

O xurado da 3ª edición do Premio Fundación Caixa Galicia de Literatura Xuvenil, formado por Isabel Bilbao Freire (responsable de acción externa da Fundación Caixagalicia), Xabier Senín Fernández (profesor e tradutor), Andrea Maceiras Lafuente (estudante de Filoloxía), Antonio Piñeiro Rodríguez (estudante de 3º da ESO, CEIP Alfonso VII de Caldas de Reis), Einés Monteagudo Vilavedra (estudante de 3º da ESO do IES de Ames) e Xosé Manuel Moó Pedrosa (editor), en representación de Xerais, con voz e sen voto, entre as vinte e oito obras participantes, declarou finalistas as presentadas baixo os lemas: Eu son ti, O derradeiro inverno e Tusitala.

O xurado da 23ª edición do Premio Merlín de literatura infantil, formado por Manuel Figueiras Fernández (profesor e responsable da BLIX, Biblioteca de Literatura Infantil e Xuvenil), Adolfo Gálvez Pazos (profesor e responsable de Biblioxest), Beatriz Pereiro Pérez (profesora), Óscar Villán (ilustrador), Laura Sáez Fernández (tradutora e intérprete) e Helena Pérez Fernández (editora), en representación de Xerais, con voz e sen voto, entre as trinta e dúas obras participantes, declarou finalistas as presentadas baixo os lemas: Cómpre botar unhas palabriñas máxicas, Indanonseiben, Paspallasazul e XX27/ni-0.

Os tres xurados determinarán as obras gañadoras, nunha vindeira reunión, a celebrar o sábado 7 de xuño. A festa de fallo dos premios terá lugar no serán dese mesmo día e, como en edicións anteriores, na illa de San Simón.

Os dez galardoados dos Premios Nacionais recibirán os premios nunha gala que se celebrará en Santiago de Compostela o 14 de xuño

Manuel Lourenzo, Premio Nacional da Cultura Galega en Artes Escénicas

(31-Maio-2008)

O xurado dos Premios Nacionais da Cultura Galega outorgou onte tres novos galardóns, os únicos que faltaban por coñecer. Os premiados son Mercedes Peón (Música), Manuel Lourenzo (Artes Escénicas) e o Laboratorio de Formas (Iniciativa Cultural). Os dez galardonados recibirán os premios nunha gala que terá lugar en Santiago o sábado 14 de xuño.

O teatro de Manuel Lourenzo volve aos temas da traxedia grega para denunciar situacións da historia recente. Lourenzo é autor de máis de cincuenta obras dramáticas, entre as que se atopan Traxicomedia do vento de Tebas namorado dunha forca (Ediciós do Castro), As criadas, Defensa de Helena (Sotelo Blanco), Electra (Cadernos da Escola Dramática Galega), Últimas faíscas de setembro (Deputación da Coruña), Veladas indecentes (Laiovento) e Insomnes (Biblioteca-Arquivo Teatral "Francisco Pillado Mayor"). Verqueu ao galego pezas dos clásicos gregos e de autores como Goethe, Büchener, Fassbinder e Heiner Müller e levou a escena a dramaturgos como Sófocles, Eurípides, Puschkin, Chekov, Strindberg, Brecht e Genet, e a autores galegos como Castelao, Cunqueiro, Otero Pedrayo, Euloxio R. Ruibal, Xesús Pisón, etc. O seu labor como escritor e director teatral foi recoñecido con máis dunha vintena de premios, entre os que se atopan o Premio Abrente, o Facho de poesía, o Celso Emilio Ferreiro de Poesía, o premio do Festival Internacional de Teatro de Ribadavia ao mellor director, o Rafael Dieste en dúas ocasións, o Premio Nacional de Literatura Dramática e o Pedrón de Ouro.

Con estes novos tres recoñecementos, xa está completa a listaxe de galardóns dos Premios Nacionais da Cultura, que queda como segue:

Arquitectura e espazos públicos: Manuel Gallego Jorreto

Artes escénicas: Manuel Lourenzo

Artes visuais: Francisco Leiro

Cine e audiovisual: Margarita Ledo

Cultura tradicional e de base: Museo do Pobo Galego

Iniciativa cultural: Laboratorio de Formas

Literatura: Xosé Luís Méndez Ferrín

Música: Mercedes Peón

Patrimonio cultural: Remodelación urbana de Pontevedra

Pensamento e cultura: Francisco Díaz-Fierros.

A Consellería de Cultura convoca estes Premios coa finalidade de facer unha mención pública a aquelas persoas ou colectivos que se teñan destacado no enriquecemento da cultura galega, tanto coas súas obras como coa súa participación en distintas iniciativas no eido da creación ou do fortalecemento do noso patrimonio cultural. Os seleccionados foron escollidos entre as máis de 200 candidaturas presentadas, ademais das propostas polos propios membros do xurado. Os galardóns, de carácter anual, teñen unha dotación de 15.000 euros.

Ao longo de catro días o pazo de Mariñán convertirase nun foro para o diálogo e o intercambio de opiniónse experiencias

V Diálogos Literarios de Mariñán

(29-Maio-2008)

O Pazo de Mariñán, na localidade coruñesa de Bergondo acollerá, do 4 ao 7 de xuño os xa tradicionais Diálogos Literarios, onde se abordará a diversidade das literaturas ibéricas e que nesta edición alcanza a súa quinta edición. Ademáis serven, en palabras de Kristina Berg, para facer "xustiza á memoria de Carlos Casares". De feito, é a Fundación Carlos Casares, co patrocinio da Deputación da Coruña, titular do Pazo quen, dentro das actividades que desenvolven, organiza este foro para o diálogo e o intercambio de opinións e experiencias entre escritores, críticos, tradutores, editores, profesores e políticos procedentes de Galicia, España, Portugal e Iberoamérica, nun ambiente no que se prioricen valores como a pluralidade, a tolerancia e a convivencia.

O programa dos V Diálogos de Mariñán, coordinados nesta ocasión polo escritor e crítico Román Raña, é o seguinte:

4 xuño, mércores

20.00 h. Conferencia de apertura: Título por concretar

Acto público no Centro Sociocultural Caixa Galicia, A Coruña (r/ Médico Rodríguez, 2 - 4): Lasse Söderberg

5 xuño, xoves:

10.00 h. – 11.15 h. Ollos novos. Con Inma López Silva e Rexina Vega. Moderador, Carlos L. Bernárdez

11.15 h. – 11.30 h. Café

11.30 h. – 13.00 h. Faladoiro

13.30 h. Acto de inauguración: coa presenza de representantes das institucións organizadoras e patrocinadoras

14.15 h. Xantar inaugural

17.00 h. – 18.15 h. Outras palabra. Con Joan Margarit e Fernando Pinto do Amaral. Moderadora, Dolores Vilavedra

18.15 h. – 18.30 h. Café

18.30 h.– 20.30 h. Faladoiro

21.00 h. Cea

6 xuño, venres:

10.00 h. – 11.15 h. Letras da vida. Con Gustavo Martín Garzo e Xosé Miranda. Moderador, Manuel Bragado

11.15 h. – 11.30 h. Café

11.30 h. – 13.30 h. Faladoiro

14.15 h. Xantar

17.00 h. A arquitectura e os xardíns pacegos de Mariñán. Visita ao Pazo de Mariñán guiada por Álvaro Trillo, enxeñeiro de montes e investigador

20.00 h. A vida como festín. Acto público. Auditorio da sede da Fundación Caixa Galicia, A Coruña (Cantón Grande, 21-24). Con Juan Cruz e Bieito Iglesias. Moderador, Ramón Nicolás

21.30 h. Cea n’A Coruña

7 xuño, sábado:

10.00 h. – 11.15 h. Mirada norte. Con Iban Zaldua e Darío Xohán Cabana. Moderador, Gonzalo Navaza

11.15 h. – 11.30 h. Café

11.30 h. – 13.30 h. Faladoiro

14.15 h. Xantar

17.00 h. – 18.15 h. Lembranzas de poesía. Con María do Carmo Kruckenberg e Manuel Álvarez Torneiro. Moderador, Luís González Tosar

18.15 h. – 18.30 h. Café

18.30 – 20.30: Faladoiro

21.00: Cea

O escritor ourensán é unha das figuras fundamentais na segunda metade do século XX

Méndez Ferrín, primeiro Premio Nacional da Cultura Galega en Literatura

(28-Maio-2008)

O xurado dos Premios Nacionais da Cultura Galega outorgou o galardón Premio Nacional da Cultura Galega na categoría de Literatura a Xosé Luís Méndez Ferrín.

O xurado dos Premios Nacionais destacou do escritor ourensán a calidade da súa obra, mantida ao longo de varias décadas, que o fai un escritor recoñecido a nivel internacional. Méndez Ferrín é a figura fundamental da literatura galega na segunda metade do século XX. Protagonizou o cambio de rumbo das nosas letras nas décadas dos sesenta e os setenta, con obras como o poemario Con pólvora e magnolias (Xerais) e o libro de relatos O crepúsculo e as formigas (Xerais). Foi quen de construír unha voz propia e inconfundible, na que conviven realismo, fantasía e simbolismo. O seu forte compromiso político e coa lingua plásmanse nas súas creacións, tanto narrativas como poéticas.

Hoxe tamén falláronse o Premios Nacionais da Cultura Galega en Pensamento e Cultura Científica, que foi concedido ao edafólogo Francisco Díaz-Fierros e o premio no apartado de Patrimonio Cultural, que recaeu na remodelación urbana de Pontevedra. ANteriormente xa foron premiados Manuel Gallego Jorreto (Arquitectura e Espazos Públicos), o escultor Francisco Leiro (Artes Visuais), a profesora Margarita Ledo (Cinema e Audiovisual) e no Museo do Pobo Galego (Cultura Tradicional e de Base). Nos próximos días daranse a coñecer os tres premios restantes: Artes Escénicas, Música e Iniciativa Cultural.

Os actos de homenaxe serán o sábado 31 de maio ás 12.00 h. coa presenza de Manuel Taboada, Xosé Neira Vilas e Víctor F. Freixanes

O Concello de O Pino nomea a Luís Seoane como Fillo Predilecto a título póstumo

(28-Maio-2008)

O Auditorio da Casa da Cultura de O Pino acollerá, o sábado 31, o acto de nomeamento de Luis Seoane como Fillo Predilecto de O Pino, entregado a título póstumo. A iniciativa foi aprobada nun pleno celebrado o pasado 26 de marzo, a proposta da Concellería de Educación e Cultura, e cos votos a favor dos tres grupos municipais, que coincidiron en resaltar a importante relación que Seoane tivo con O Pino, en concreto con Arca, plasmada en debuxos e textos. A pesar de non ter nacido no concello, súa nai sí era de Arca, e el pasou nesta parroquia boa parte da súa infancia e xuventude. Cando volveron de Bos Aires-tiña Seoane 6 anos-seus pais herdaron unha leira en Arca e construíron a casa familiar-que aínda hoxe está en pé- xusto diante de onde se ubica o Albergue de Peregrinos do Pedrouzo. Un inmoble que lles foi arrebatado na Guerra Civil, por pertenceren ó bando republicano.

Os actos de homenaxe terán lugar o sábado, 31 de maio, ás 12.00 h. na Casa da Cultura. Intervirán, ademais do Alcalde, Manuel Taboada, un home que é toda unha referencia na cultura galega e ademais foi amigo de Seoane, Xosé Neira Vilas, que suple a ausencia doutro dos grandes amigos do galeguista, Isaac Díaz Pardo, a quen as súas obrigas no Padroado do Museo do Pobo Galego impiden a asistencia a esta cita. Tamén intervirá o profesor e director de Galaxia, Víctor Freixanes. Ás súas intervencións hai que sumar o descubrimento do nome que, a partires desa data, terá a Casa da Cultura, que oficialmente pasará a denominarse como Centro Sociocultural Luis Seoane.

Queda así testemuña da importante e constante relación que Seoane tivo unha importante e constante relación con Arca xa que, ademais da etapa vivida aquí, constantes visitas unha vez rematado o seu exilio e o manuscrito Cierro los ojos y veo, que escribiu no ano 1978, apenas un antes de morrer, e onde pón de manifesto as súas orixes. Un texto que tamén contén algúns debuxos do autor, relacionados con Arca e co seu entorno.

O xurado valorou a contemporaneidade e a súa aposta pola renovación da escrita

Construcións, de Eduardo Estévez, XIV premio de poesía "Miguel González Garcés" da Deputación da Coruña

(27-Maio-2008)

A obra titulada Construcións, do poeta Eduardo Estévez, resultou gañadora do XIV premio de poesía "Miguel González Garcés", instituído pola Deputación da Coruña. O presidente da institución provincial, Salvador Fernández Moreda, foi o encargado de dar a coñecer a decisión do xurado, que seleccionou entre as 55 obras presentadas o poemario Construcións, presentado baixo o lema "Ramón Caaveiro".

Eduardo Estévez, nado en Bos Aires e residente na actualidade na cidade da Coruña, xa obtivo un accésit na VII edición deste premio de poesía, correspondente ao ano 1997, pola súa obra Só paxaros sairon desta boca.

O premio "Miguel González Garcés" está considerando como un dos máis importantes galardón poéticos de cantos se convocan en Galicia. Ademais da dotación económica, a Deputación da Coruña edita a obra gañadora na súa colección de poesía, que xa ten 25 títulos, aos que se suman os dous que se incorporarán nos vindeiros meses como resultado desta nova edición do certame. Trátase, segundo Fernández Moreda, dunha das mellores coleccións de poesía galega contemporánea.

Pola súa banda, o voceiro do xurado, Manuel Forcadela, afirmou que a selección do gañador tivo lugar tras un intenso debate por parte do xurado, "que valorou a contemporaneidade da súa escrita e a aposta do autor pola renovación da nosa tradición estética", así como "a liña de construción expresiva" da obra "na que se pode advertir unha proximidade do cotián". O comisario do premio, Xavier Seoane, destacou a elevada participación coa que contou esta edición do certame e destacou o prestixio dos integrantes do xurado. Seaone subliñou tamén a variada estética das obras presentadas, "o que demostra a boa saúde da poesía galega, tanto nos aspectos técnicos e formais como de contido".

A Deputación editará 1.500 exemplares das obras gañadora e finalista do certame, que se presentarán no derradeiro trimestre do presente ano.

O premio, creado no ano 1991, está dotado con 6.500 euros, ademais da publicación da obra gañadora. Entre os gañadores e finalistas do galardón en anteriores edicións atópanse recoñecidos nomes da lírica e da literatura galega como Miguel Anxo Fernán Vello, Manuel Álvarez Torneiro, Estevo Creus, Román Raña, Xulio L. Valcárcel ou Xosé María Álvarez Cáccamo.

O escritor melidense recibirá a Letra E da Asociación de Escritores en Lingua Galega o próximo sábado 7 de xuño

Xosé Vázquez Pintor será homenaxeado na súa terra

(27-Maio-2008)

A homenaxe O Escritor na súa Terra, impulsada pola Asociación de Escritores en Lingua Galega, chega este ano a súa XIV edición recaendo, por decisión unánime da súa asemblea de socios e socias, na figura de Xosé Vázquez Pintor, que será homenaxeado na terra onde naceu, Melide.

Esta iniciativa anual conforma xa unha tradición na traxectoria da asociación, e tense constituído ao longo dunha década como unha celebración na que a terra de orixe do homenaxeado/a cobra un protagonismo fundamental nesta cita cultural. Tratase dunha celebración múltiple e popular na que se vén recoñecendo a entidade literaria de insignes figuras das nosas letras, a través dunha serie de eventos como a entrega do galardón Letra E de escritor/a (unha peza escultórica asinada por un/ha recoñecido/a artista galego/a), a plantación dunha árbore simbólica (elixida polo propio autor, e que neste caso é un buxo), a colocación dun monolito conmemorativo ou a inauguración dun espazo público co nome do/a homenaxeado/a ou cun nome elixido polo/a homenaxeado/a.

Programa de actos. Sábado, 7 de xuño de 2008

11.30 h. Xardíns da Capela de San Roque

Plantación dun buxo (árbore simbólica do escritor) e descubrimento da Pedra Escultórica dedicada ao homenaxeado.

Interveñen: Cesáreo Sánchez Iglesias, presidente da AELG, e o escritor Xosé Vázquez Pintor.

12.30 h. Biblioteca Pública Municipal

A Biblioteca Pública Municipal recibirá o nome de Xosé Vázquez Pintor.

Intervirán: Mercedes Queixas, secretaria xeral da AELG, Socorro Cea, alcaldesa de Melide, e o homenaxeado, Xosé Vázquez Pintor

13.30 h. Salón de plenos do concello de Melide

Acto de entrega da Letra E

Intervirán: Mercedes Queixas, secretaria xeral da AELG, e Cesáreo Sánchez Iglesias, presidente da AELG

Lectura da laudatio, pronunciada polo escritor Ramón Caride Ogando.

Entrega dunha peza escultórica do artista Silverio Rivas a Xosé Vázquez Pintor.

Intervención do homenaxeado

14.30 horas Xantar de confraternidade

Aberto aos/ás socios/as da AELG, vecindade de Melide e demais persoas interesadas, no Restaurante Sony (Estrada de Santiago, s/n)

Xosé Vázquez Pintor recibirá este galardón que xa foi entregado con anterioridade a Antón Avilés de Taramancos (1995, Taramancos), Bernardino Graña (1996, Cangas do Morrazo), Manuel María (1997, Outeiro de Rei), María Xosé Queizán (1998, Vigo), Xosé Neira Vilas (1999, Gres-Vila de Cruces), Uxío Novoneyra (2000, Parada do Courel, póstumo), Luz Pozo Garza (2001, Ribadeo), Xosé Chao Rego (2002, Vilalba), Xosé Fernández Ferreiro (2003, Nogueira de Ramuín), Salvador García Bodaño (2004, Teis-Vigo), Pura e Dora Vázquez (2005, Ourense), María do Carme Kruckenberg (2006, Vigo) e Manuel Lourenzo (2007, O Valadouro).

Ata o 31 de maio na Casa da Cultura Pintor Lloréns de Sada

Mostra sobre os irmáns Xohán Antón e Ramón Suárez Picallo en Sada

(27-Maio-2008)

O sábado 31 de maio remata a Mostra dedicada aos irmáns Xohán Antón e Ramón Suárez Picallo que principou o pasado 15 de maio e que se pode visitar na Casa da Cultura Pintor Llorens do concello de Sada.

Esta mostra está enmarcada nos actos que ao longo deste ano homenaxearán a Xohán Antón e Ramón Suárez Picallo e onde se pretende amosar ao público a vida e obra destes dous destacados sadenses que foron represaliados polo franquismo por defenderen o seu ideal galeguista. Ademais dos dez paneis informativos que constitúen o corpo base da exposición, débense subliñar as aportacións desinteresadas de artistas locais coma o escultor Valdi ou o pintor Suárez de Concha. Tamén se amosan obxectos persoais de Ramón Suárez Picallo, cedidos para esta mostra pola familia.

A mostra recolle datos biográficos dos irmáns Suárez Picallo, da súa vinculación con Sada, do seu pobo ; do Ateneo Político e Social, da represión do 36, da II República, do trauma da Guerra Civil... Tamén se poden contemplar exemplares orixinais como o albúm da Cortes Republicanas de 1931, un orixinal da Constitución da II República -obsequio aos Deputados electos-, así coma fotografías familiares e unha adicatoria de Castelao.

 [Paneis exposición irmáns Suárez Picallo]

O xurado das diferentes categorías dará a coñecer aos finalistas o vindeiro sábado 31 de maio

Comeza a conta atrás dos Premios Xerais 2008

(26-Maio-2008)

O sábado 31, tras a reunión que manterán o día anterior os xurados das diferentes categorías, anunciaranse as obras finalistas dos Premios Xerais 2008.

Para a 25ª edición do Premio Xerais de Novela, dotado con 25.000 euros, presentáronse cincuenta e catro obras. O xurado está formado por: Xabier Puente Docampo (escritor), Xosé Miranda (escritor), Santiago Jaureguizar (escritor e xornalista), Uxía Casal (escritora), Estíbaliz Espinosa (escritora) e Francisco Alonso Villaverde (editor), en representación de Xerais, con voz e sen voto.

Na 3ª edición do Premio Fundación Caixa Galicia de literatura xuvenil compiten vinte e oito obras e está dotado con 10.000 euros. O xurado está formado por: Isabel Bilbao Freire (responsable de acción externa da Fundación Caixagalicia), Xabier Senín Fernández (profesor e tradutor), Andrea Maceiras Lafuente (estudante de filoloxía), Antonio Piñeiro Rodríguez (estudante de 3º da ESO, CEIP Alfonso VII de Caldas de Reis), Einés Monteagudo Vilavedra (estudante de 3º da ESO do IES de Ames) e Xosé Manuel Moó Pedrosa (editor), en representación de Xerais, con voz e sen voto.

O xurado da 23ª edición do Premio Merlín de literatura infantil e no que concorren trinta e dúas obras, está formado por: Manuel Figueiras Fernández (profesor e responsable da BLIX, Biblioteca de Literatura Infantil e Xuvenil), Adolfo Gálvez Pazos (profesor e responsable de Biblioxest), Beatriz Pereiro Pérez (profesora), Óscar Villán (ilustrador), Laura Sáez Fernández (tradutora e intérprete) e Helena Pérez Fernández (editora), en representación de Xerais, con voz e sen voto. Este premio está dotado con 10.000 euros.

As obras gañadoras coñeceranse o sábado 7 de xuño na tradicional festa que terá lugar ese mesmo día na illa de San Simón.

Entre os días 5 e 7 de xuño

Lleida acolle o XXV encontro Galeusca

(26-Maio-2008)

Co obxectivo de establecer políticas de actuación comúns e reflexionar sobre a situación da industria editorial nas culturas con lingua propia do territorio español, celébrase a quinta edición do Galeusca de Editores. A cidade de Lleida acollerá dende o xoves 5 ata o sábado 7 de xuño unha serie de mesas redondas que versarán sobre as axudas á edición, a gratuidade do libro de texto, os dereitos de autor e a proxección no exterior, e nas que está previsto que participen representantes da Asociación Galega de Editores (AGE) desprazados ao encontro neses días.

Os actos programados arrincarán o xoves 5 de xuño cunha cea de benvida a todos os asistentes, para dar paso ao día seguinte a unha intensa xornada. A mesa redonda As axudas á edición. Actualización da información das axudas nos diferentes territorios Galeusca. Pinceladas sobre axudas en Europa. As axudas do Ministerio de Cultura, na que está previsto que participe por parte da AGE o xerente de Ir Indo Edicións, Xelasio Suárez, dará paso a outra mesa matutina baixo o título Repercusión sobre a edición en linguas minorizadas da gratuidade no libro de texto, coa intervención, entre outros, do presidente da AGE e director de Rodeira, Alfonso García Sanmartín. A mañá rematará coa participación da xerente de Editorial Galaxia, Pilar Sampil, na mesa A colaboración entre editores no intercambio de dereitos de autor.

Xa na tarde do venres 6 de xuño desenvolverase a mesa redonda A proxección exterior das culturas. Experiencias das distintas asociacións. Posibilidade de accións conxuntas: vantaxes e inconvenientes, na que está previsto que, ademais dos membros dos outros gremios asistentes a Galeusca, participe a directora de Baía Edicións, Belén López. A xornada rematará coa presentación da campaña de fomento da lectura promovida polo Departamento de Cultura da Generalitat de Catalunya. Entre as actuacións principais da campaña destacan subscricións gratuítas a mozos de 18 anos a un medio de prensa escrita ou a distribución nos transportes públicos de primeiros capítulos de novidades editoriais Tamén se lanzará unha campaña de difusión nos medios de comunicación, co lema Leer nos hace + grandes.

 [Ver reportaxe completa na web da AGE]

Estas xornadas están enmarcadas na campaña para o recoñecemento do escritor ferrolán para o Día das Letras Galegas 2009

A Fundaçom Artabria organiza as xornadas 'Ricardo Carvalho Calero no século XX galego'

(26-Maio-2008)

Nos dias 27, 28 e 29 de Maio, a sala de actos da Vice-Reitoria do Campus de Esteiro, en Ferrol, acolle unhas xornadas de formación e divulgación da obra de Carvalho Calero, ‘Fillo Predilecto de Ferrol’ e ‘Fillo Ilustre da Galicia’, organizadas pola Fundaçom Artábria dentro da campaña polo recoñecemento da súa figura con o Dia das Letras de 2009.

Nas Xornadas van intervir algunhas e algúns dos maiores especialistas nos mais diversos aspectos da producción científica e literaria do autor ferrolán, alén do doutor en História Bernardo Máiz Vázquez, que fará unha contextualización histórica de Carvalho no século XX galego o martes ás 12.00 h.; pola tarde, o profesor da Universidade de Vigo José-Martinho Montero Santalha falará sobre a obra filolóxica de Carvalho Calero. De seguido, ás 18.15 h., o profesor de Portugués na Escola Oficial de Idiomas de Ferrol, Maurício Castro, presentará unha comunicación dedicada a sintetizar as contribucións de Carvalho para a sociolingüística galega.

O mércores, a partires das 16.30 h., o profesor de Literatura Galega na Universidade da Coruña Xosé María do Barro presentará unha comunicación intitulada Carvalho Calero: toda umha vida de investigador da Literatura Galega. A seguir, polas 18.15 h., o escritor e docente ferrolán Henrique da Costa falará sobre Os signos identitários da prosa de ficción de Ricardo Carvalho Calero.

As Xornadas concluirán o xoves 29, coas comunicacións sobre poesía e o teatro, a cargo de duas profesoras de literatura, especialistas ambas na obra de Carvalho. A docente da Universidade de Santiago Carmen Blanco tratará a poesía, coa ponencia É poeta…; a profesora da USC en Lugo Araceli Herrero Figueroa pechará as Xornadas coa conferencia Carvalho: Dramaturg e Dramatiker, onde se ocupará da obra dramática do protagonista das Xornadas.

Estas Xornadas están organizadas pola Fundaçom Artabria coa colaboración do Concello de Ferrol. A inscrición é de balde e pode ser feita o primeiro día das xornadas chamando ao teléfono 696 55 00 56.

Difusora de Artes e Ideas publicará 3.000 exemplares deste primeiro volume

Historias de Galiza recolle os relatos escritos en banda deseñada por xóvenes creadores galegos

(21-Maio-2008)

O director xeral de Xuventude, Rubén Cela, presentou onte á mañá no Centro Galego de Arte Contemporánea, o libro Historias de Galiza, un volume que recolle os relatos de 5 xóvenes creadores galegos en banda deseñada. Son historias de ficción que aluden ao período comprendido entre o mesolítico e a conquista romana.

Con esta actuación preténdese por unha banda, potenciar, facilitar e promover o importante nivel creativo que se está a dar en Galicia entre os xóvenes autores de banda deseñada, e por outra, situar a historia do noso país coma un contexto válido para a creación de ficción.

Historias de Galiza é o primeiro dos cinco volumes sobre a historia de Galicia que vai editar Difusora de Artes e Ideas co patrocinio da dirección xeral de Xuventude. Neste primeiro volume, que ten unha tirada de 3.000 exemplares, participan cinco xóvenes autores de banda deseñada: Idoia de Luxán Vázquez, Jerónimo Piñeiro de Castro, Juan Luís Pérez, Carlos Alfonso Fernández, Jaime Eizaguirre. Nos seus relatos dan vida a cinco historias de temáticas e estilos diferentes, escritas en base ao guión de Carlos Rafael de Ramos.

O libro recolle, na súa parte final, unha pequena reseña histórica sobre as diferentes épocas nas que se desenvolven as historias, ademais de darlle a esta obra de banda deseñada un aspecto engadido no formativo. Neste senso, Cela resaltou que Historias de Galiza é unha obra que combina o disfrute do cómic coa aprendizaxe da historia do noso país, desde o mesolítico ata a actualidade.

 [Máis información]

Espiral Maior publicará, como en anos anteriores a obra gañadora, que este ano foi para Gramática da afirmación de Paulino Peña Álvarez

O venres celebrarase o acto de entrega do XI Certame de Poesía Concello de Carral

(21-Maio-2008)

O venres 23 de maio terá lugar na Biblioteca Municipal de Carral a cerimonia de entrega do XI Certame de Poesía Concello de Carral, que este ano recaeu no poeta ourensán Paulino Peña Álvarez pola súa obra Gramática da afirmación. O xurado do XI Certame de Poesía “Concello de Carral”, formado por Luciano Rodríguez, Ánxeles Penas García e Xosé Luís Mosquera Camba, baixo a presidencia da Concelleira de Cultura María José García Fariña destacou desta obra “a súa madurez lírica, o excelente manexo da lingua, o contrapunto que establece entre lingua e terra, a súa gran musicalidade, o sorprendente das súas imaxes, e que é un libro constructivo”.

No mesmo acto presentarase a obra gañadora do pasado ano Nadja c’est moi de Xosé Luís Mosquera Camba, publicada pola editorial Espiral Maior; Valentina Carro Padía presentará a súa performance poética A perfomance da vulvareta; presentarase o poemario Poemas II do Club de Poesía de Carral; e, por último, o espectáculo Palabras contadas, unha narrativa musical de Camilo Franco con música en directo de Magín Blanco.

O acto, que dará comezo ás 20.30 h., contará coa participación de José Luis Fernández Mouriño (Alcalde de Carral), Xosé Luis Mosquera Camba, Ánxeles Penas, Luciano Rodríguez e de Miguel Anxo Fernán Vello.

Deste xeito, consolídase unha das referencias literarias do país, en edicións anteriores fíxeronse co certame Fernando Díaz-Castroverde, Rafael Lema, Rafa Villar, Lucía Novás, Baldo Ramos, Eduardo Estévez, Xurxo Alonso, Marcos S. Calveiro e Isidro Novo.

Ferrol e o que queda por chover está dispoñible en formato pdf ou en tapa blanda

Alberte Momán súmase ás novas tecnoloxías para a publicación do seu novo poemario

(20-Maio-2008)

O escritor e poeta Alberte Momán súmase as novas tecnoloxías para a publicación do seu novo poemario. Ferrol e o que queda por chover é a nova achega do autor ferrolán á venda exclusivamente pola internet, unha nova experiencia coa que se pretende integrar as novas ferramentas de edición e distribución masivas no sistema literario galego.

Ferrol e o que qeuda por chover está dispoñible na web www.lulu.com en dúas modalidades: a descarga do poemario en formato pdf ou en soporte físico en tapa blanda.

Momán define o seu novo traballo como "unha restrospectiva histórica moi persoal sobre o Ferrol que me tocou vivir. Tamén dese outro Ferrol que viviron por min, das súas experiencias plasmadas na miña imaxe".

 [Ferrol e o que queda por chover en Lulu.com]

A Consellería de Cultura e Deporte achega máis de 158.000 euros para o desenvolvemento de actividades

Convocadas axudas para a promoción da lectura en asociacións culturais

(19-Maio-2008)

A Consellería de Cultura e Deporte fomenta a realización de actividades de animación á lectura e a posta en marcha de clubs de lectura por todo o país. Para iso vén de convocar unha liña de subvencións que achega 158.560 euros para que asociacións e institucións culturais poidan desenvolver os seus propios programas de fomento da lectura. A convocatoria de axudas publicouse o pasado venres no DOG. Están dirixidas a asociacións e institucións culturais sen ánimo de lucro, que contan cun prazo de un mes desde hoxe para solicitalas. Cada beneficiario pode recibir un máximo de 10.000 euros.

O obxectivo destas subvencións é que as asociacións creen e manteñan obradoiros de animación lectora, concurso de lectores, clubs do libro e outras actividades similares de fomento da lectura.

 [Ver convocatoria no DOGA]

Gómez Alfaro deixounos unha extensa obra poética merecedora de multitude de premios literarios

Faleceu repentinamente o poeta Xosé Carlos Gómez Alfaro

(18-Maio-2008)

O pasado mércores faleceu de forma repentina e inesperada o escritor, poeta e mestre Xosé Carlos Gómez Alfaro cando participaba como xurado nun concurso literario no colexio Manuel Rodríguez Sinde de A Guarda.

Natural de As Chabolas (Ribadavia), impartía desde 1978 aulas no Colexio PP. Somascos de A Guarda.

Gómez Alfaro deixounos unha ampla obra poética e literaria, amais das súas colaboración en diferentes medios de comunicación como La Región, La Voz de Galicia ou El Faro de Vigo entre outros. Autor en lingua galega desde 1970, destacar da súa obra As labaradas da lembranza (autoeditado), Matria de néboa (Ed. do castro), Alba plena do Alén (Espiral Maior), Os ciclóns do sino (Deputación de Ourense), Ofertorio de solpores (Espiral Maior), Pasos cara á alba (Follas Novas), Alén do lume (Espiral Maior), O clamor da eclipse (Espiral Maior) e Confíteor (Litoral das Rías) entre outros moitos que lle definiron como un mestre do soneto e que o levaron a gañar diversos certames e premios literarios como Meigas e Trasgos, o Rosalía de Castro, Concello de Marín, Felicianio Rolán e Antón Tovar e o Premio de Poesía Cidade de Ourense nos anos 2004 e 2006.

Considerao vexatorio para os galegos e galegas

A Asociación de Escritores en Lingua Galega rexeita a reedición do libro Superchistes gallegos

(18-Maio-2008)

A Asociación de Escritores en Lingua Galega rexeita a reedición do libro Superchistes gallegos mediante o seguinte cominicado:

"En relación coa reedición do libro Superchistes Gallegos do autor arxentino Ricardo Parrotta, baixo o seudónimo Pepe Muleiro, publicada pola Editorial Sudamericana, a Asociación de Escritores en Lingua Galega fai as seguintes consideracións:

AELG lamenta profundamente a publicación do libro por parte dunha editora de prestixio contrastado como é a Editorial Sudamericana, por permitir acoller no seu catálogo, xunto a obras dun enorme prestixio intelectual, unha publicación vexatoria para os galegos e galegas.

AELG denuncia que, dunha forma supostamente irónica, se atenta discriminatoria e gratuitamente contra a identidade moral e cultural dun dos países máis vellos de Europa.

AELG demanda, no marco das estreitas e fraternais relacións culturais e sociais entre Galiza e Arxentina, froito de vínculos inesquecibeis de fonda raíz, a intervención dos organismos competentes na procura dunha rectificación pública por parte da editora responsable.

AELG amosa a súa solidariedade a toda a colectividade galega da Arxentina, colectividade que foi quen de contribuir ao longo dos tempos ao engrandecemento do país argentino, á vez que esixe o respeito e dignidade dun pobo, o galego, cunha cultura altamente recoñecida, diversa e rica."

A Fundación Amigos de Galicia editará 1600 exemplares da obra gañadora

Antítese Nativa, do noiés Manuel Lôpez Rodrígues, gañador da edición 2008 do Premio de Poesía Suso Vaamonde

(15-Maio-2008)

Antítese Nativa é o título do poemario firmado por Manuel Lôpez Rodrígues e que vén de ser galardoado co Premio de Poesía Suso Vaamonde 2008 convocado pola Fundación Amigos de Galicia en colaboración co Concello de Vilagarcía e co patrocinio da Secretaría Xeral de Política Lingüística da Xunta de Galicia.

O fallo do xurado deuse a coñecer hoxe na rolda de prensa que tivo lugar no Concello vilagarciá e na que participaron o presidente e o membro da Fundación Amigos de Galicia, Jesús Busto e Luis Rial, respectivamente, así como o concelleiro de Cultura de Vilagarcía, Xosé Castro Ratón. Do poemario gañador da XIV edición do Premio de Poesía Suso Vaamonde o xurado salientou a variedade léxica e o importante traballo lingüístico que ten este compendio de poemas de amor á terra e á muller escrito por Manuel Lôpez Rodrígues usando como medio o verso libre.

O xurado estivo formado por Luís G. Tosar, Xosé Alonso e Antón Grande.

O autor, natural do municipio coruñés de Noia (membro do recoñecido Colectivo Literario Sacou), recollerá o premio, dotado con 1.000 euros, no acto público que terá lugar o sábado 17 de maio en Vilagarcía, no transcurso da Festa das Letras Galegas. Ademais, a Fundación Amigos de Galicia publicará Antítese Nativa cunha tirada de 1.600 exemplares.

Este premio está adicado á memoria de Suso Vaamonde (1950-2000). Compositor dende os dezaseis anos, comeza a darse a coñecer na antiga Asociación Cultural de Vigo. Seguindo por este camiño, entra dende mozo en contacto coa movida roqueira en Vigo, que o leva a formar parte dos grupos musicais Os Copens e Marco Balorento , este último polo 1966, e co que gaña o seu primeiro premio nun festival organizado por unha emisora de radio da cidade. De aí pasa ó movemento Voces Ceibes a principios dos anos 70, deixando un pouco de lado o seu labor de letrista para, acompañado da súa inseparable guitarra, poñer voz e música ós poemas galegos. En palabras de Manuel María, foi a "Persoa máis representativa na historia da música do noso país".

Diferentes actos lembrarán a figura do bardo de Logrosa

O concello de Negreira homenaxea a Xosé Manuel López Ardeiro

(14-Maio-2008)

O Concello de Negreira pon a punto os últimos preparativos para a homenaxe ao poeta Ardeiro, o día 15 de maio en Negreira, e ao cal non faltarán persoeiros da cultura galega da talla dos poetas Salvador García Bodaño, Helena Villar Janeiro, Xesús Rábade Paredes ou Xulio López Valcárcel. Por motivos dunha viaxe ó estranxeiro caeuse a última hora, Miguel Anxo Fernán Vello, aínda que si estará o presidente do Consello da Cultura Galega, Ramón Villares, entre outros destacados persoeiros.

Os actos abriranse ás sete e media da tarde na zona das Brañas coa descuberta da placa co nome de Xosé M. López Ardeiro que levará dende agora unha nova rúa da vila. Media hora despois, na capela do pazo do Cotón comezará o concerto que ofrecerá o orfeón Terra A Nosa, da Fundación Caixa Galicia, cos seus arredor de cincuenta membros. A partir das nove nunha segunda parte da homenaxe, no auditorio da Casa da Cultura proxectarase o vídeo "Ardeiro na lembranza", no que durante uns corenta minutos ofrécense testemuñas de amigos, veciños ou familiares do poeta, ao que seguirá a lectura de poemas, para remata-los actos coa actuación musical do guitarrista negreirés, Xosé Guzmán.

Xosé Manuel López Ardeiro faleceu o pasado 23 de decembro á idade de 63 anos. Natural de Logrosa, na vila de Negreira, foi autor dunha extensa obra poética e literaria, ademáis de colaborar en numerosas publicacións e libros colectivos. Entre as súas obras destacan Un xardín no tempo (tresCtres Editores) e Versos de ausencia e desagravio (Espiral Maior).

O autor analiza neste escrito o importante que é para a normalización lingüística a fornada de grupos musicais actuais que cantan en galego

O escritor e xornalista Xesús Fraga obtén o 'IV Premio a artigos xornalísticos normalizadores Concello de Carballo'

(14-Maio-2008)

O xurado do 'IV Premio a artigos xornalísticos normalizadores Concello de Carballo', despois de examinar detidamente os 40 traballos que se presentaron ao certame, fallou os dous premios que establecía o concurso.

O primeiro premio recaeu no artigo titulado A bendita intranscendencia do pop, de Xesús Fraga Sánchez. O autor analiza neste escrito o importante que é para a normalización lingüística a fornada de grupos musicais actuais que cantan en galego con total normalidade, sen ter que cargar coa responsabilidade de facer país ou salvar o idioma, igual que antes fixera o movemento bravú, 'Os Resentidos' ou Andrés do Barro.

Xesús Fraga é redactor e locutor de 'La Voz de Galicia' e 'Radio Voz' e tamén colaborador do programa da TVG 'Libro Aberto'. Como escritor ten publicados os libros: Tute para catro (Xerais), A-Z (Xerais) e Solimán (Xerais). Tamén publicou a tradución ao galego de Arthur e George (Rinoceronte), de Julian Barnes.

O segundo premio foi para o artigo Carta dun trífido esquizoide, do tamén xornalista Kiko Neves. No texto, saliéntase a modernidade, necesidade e practicidade do galego, e faise cunha comparativa co sueco e cunha destacada calidade literaria con tintes rupturistas e con destacados valores estilísticos.

Os dous artigos serán publicados nas nove publicacións que colaboran no certame: A Nosa Terra, A Peneira, Diario de Bergantiños, Galicia Hoxe, La Opinión da A Coruña, La Voz de Galicia, O Acontecer, Tempos Novos e Vieiros.

Os obxectivos deste premio son promover a reflexión sobre a situación social da lingua galega, crear espazos nos xornais para analizar e promocionar o uso do idioma galego e promover o emprego da nosa lingua na prensa escrita.

A entrega dos premios terá lugar o vindeiro sábado, día 17 de maio, a partir das 19.00 h. no Xardín Municipal para poñer o peche ao maratón de lectura 'Oito horas lendo'.

Ramón Villares salientou a oportunidade de unir nesta publicación a Nicomedes Pastor Díaz e a Xosé María Álvarez Blázquez

O Consello da Cultura Galega edita unha publicación que homenaxea a Xosé María Álvarez Blázquez como bibliófilo, editor e erudito

(14-Maio-2008)

O Consello da Cultura Galega presentouu onte unha publicación conmemorativa do “Día das Letras Galegas”. Trátase da edición facsímile do manuscrito autógrafo Égloga de Belmiro e Benigno, de Nicomedes Pastor Díaz; do facsímile dese texto impreso e editado en 1951 pola editorial Monterrey, dirixida por Xosé María Álvarez Blázquez (1915-1985), autor das Notas para unha edición crítica, publicadas nos Cuadernos de Estudios Gallegos e tamén incluídas na publicación que homenaxea, como editor, bibliófilo e erudito, á figura a quen este ano a Real Academia Galega dedica a efeméride das Letras Galegas.

Ramón Villares, Presidente do CCG, salientou a oportunidade dunha iniciativa que permite unir os nomes de Nicomedes Pastor Díaz, “poeta auroral do Pre-Rexurdimento” e de Xosé María Álvarez Blázquez, “na súa dimensión de bibliófilo, erudito, editor e recuperador de tesouros literarios como foi o caso desta Égloga”. O Presidente do CCG agradeceu as axudas de Xosé María Álvarez Cáccamo, fillo do homenaxeado; de Eduardo Pardo de Guevara, director do Instituto “Padre Sarmiento” e da revista “Cuadernos de Estudios Gallegos; de Francisco Fernández del Riego, director da Fundación Penzol, onde se conserva o manuscrito, e de Ramón Mariño Paz, que achegou a versión do manuscrito “no marco do proxecto que se está a desenvolver neste Consello sobre os textos literarios anteriores ao Rexurdimento, que logo serán publicados baixo o rubro de “Papés de imprenta condenada”.

[Máis información]

A Consellería de Cultura anuncia que antes de que remate o presente ano xa estará en marcha

A nova Axencia Galega de Industrias Culturais substituirá ao actual IGAEM e ampliará as súas funcións

(13-Maio-2008)

O Parlamento aprobou hoxe o ditame elaborado pola Comisión IV de Educación e Cultura do Proxecto de Lei de Creación da Axencia Galega de Industrias Culturais. A conselleira de Cultura e Deporte, Ánxela Bugallo, interviu no peche do debate no Parlamento, onde dixo que coa aprobación desta lei "o cambio que precisaba a cultura galega está en marcha".

A conselleira cualificou a creación de AGADIC como "un acto de responsabilidade institucional, unha decisión estratéxica coa que Galiza se adianta a unha tendencia que será xeral no futuro máis próximo no eido das políticas públicas". A Lei de Creación desta axencia entrará en vigor logo da súa publicación no DOG. A continuación aprobarase vía decreto o seu Estatuto de Funcionamento.

AGADIC substituirá ao IGAEM e estenderá o seu radio de acción para funcionar como verdadeiro organismo de apoio á produción e distribución do conxunto das industrias culturais. O obxectivo de AGADIC é consolidar o tecido industrial no sector cultural galego para ter empresas con ingresos suficientes e estables, fomentando a creación e comercialización de bens e servizos culturais de calidade e favorecendo a difusión da lingua e da cultura galegas como elementos singularizadores. A Axencia tamén pretende fomentar a demanda de produtos culturais na sociedade galega e, á vez, aumentar a exportación.

Os destinatarios da Axencia serán as empresas culturais privadas dedicadas principalmente á produción, distribución ou comercialización de produtos culturais incorporados en calquera clase de soporte, así como de espectáculos en vivo. Coa creación de AGADIC impulsaranse en paralelo as dimensións social, artística e patrimonial da cultura mediante unha especialización da Dirección Xeral de Creación e Difusión Cultural nos ámbitos do apoio á creación artística e á dinamización da base sociocultural da cultura galega. Desde a Consellería de Cultura anuncian que antes de que remate o 2008 AGADIC iniciará a súa andaina.

Para garantir o coñecemento da realidade das industrias culturais e as súas necesidades, crearase un Consello asesor no que estarán as asociacións e agrupacións máis representativas dos sectores culturais."

[Máis información]

Obradoiros, contacontos, presentacións... encherán de literatura e libros a céntrica praza compostelana

A Praza de Cervantes celebra durante toda a semana o Día das Letras Galegas

(12-Maio-2008)

Dende o lúns 12 de maio ata o sábado 17, a céntrica Praza de Cervantes na capital galega acollerá unha serie de actividades para conmemorar o Día das Letras Galegas.

O lúns 12 de maio haberá obradoiros de manualidades onde os rapaces de 6 e 7 anos e de 8 a 9 anos traballarán sobre a obra publicada por OQO O que ben che quer. A partires das 18.00 h. Sesión de contacontos a cargo de Kalandraka Editora.

Ao día seguinte, o ilustrador e creador da popular serie dos Bolechas, Pepe Carreiro, pronunciará sendas charlas ás 12.00 h. pola mañá e ás 18.00 h.

O mércores 14 ás 12.00 h., a editorial Sotelo Blanco organizará un encontro con nenos traballando sobre o libro A rebelión das rúas; unha fala das rúas máis emblemáticas de Santiago e o significado de moitos dos seus nomes. Ás 18.00 h. Covadonga Blanco e Teresa Otero impartirán un obradoiro de papiroflexia.

Ás 12.00 h. do xoves Manuel Núñez Singala falará sobre o seu libro Comedia Bífida (Galaxia), onde o autor trata sobre o galego e a súa situación actual na sociedade. Ás 16.00 h., Carlos Blanco, profesor de ensino medio e autor de varias obras de poesía realizará un obradoiro onde os rapaces aprenderán a traballar e divertirse con poemas de varios autores. Covadonga Blanco e Teresa Otero repetirán, como o día anterior, un obradoiro de papiroflexia. Ás 20.00 h. presentarase o libro Fundación Bautista Álvarez.

Para o día 16, desde as 10.00 h. aexposición e venda durante todo o día na rúa de libros galegos. Nieves Costas animará aos máis pequenos con dúas sesións de contacontos. A primeira, ás 10.30 h. estará dirixida a nenos de 6-7 anos e ás 12.00 h. para nenos de 8-9 anos. Ás 16.00 h. Obradoiro de poesía a cargo de Carlos Negro e ás 19.00 h. a revista humorística Retranca celebrará o seu especial Letras Galegas coa presenza do seu director, Kiko da Silva e os colaboradores da revista.

Para rematar a semana, e coincidindo co Día das Letras Galegas, haberá unha exposición e venda de libros na rúa durante todo o día. 

Pola súa parte, a libraría Couceiro, sita no número 6 da Cervantes, celebrará o Día das Letras Galegas facendo un 10 % de desconto en todo o libro galego o venres 16 e sábado 17 de maio.

'O modelo de préstamo demostrou durante anos as súas profundas carencias pedagóxicas e o descontento que xera entre o sector docente, así como a negativa incidencia na industria cultural galega e as súas repercusións no proceso de normalización lingüística'

Pais, profesores e docentes rexeitan o sistema de préstamo do libro de texto e avogan por axudas directas: Informa da AGE

(12-Maio-2008)

Reproducimos aquí o informe da Asociación Galega de Editores sobre o sistema actual de préstamo do libro galego:

Todos os grupos enquisados –docentes, equipos directivos e pais-, en caso de poder elixir, decántanse por un modelo alternativo de axudas directas tanto para eles como para os seus fillos, ao que ven maiores vantaxes pedagóxicas. Este sistema tamén é apoiado pola industria do libro –editores, libreiros e distribuidores- de Galicia, que avogan por unha gratuidade real baseada nun modelo, moderno e eficaz pedagoxicamente, viable economicamente e socialmente xusto de axudas directas canxeables mediante bono-libro ou tarxeta electrónica.

Estas e outras conclusións fixéronse públicas o pasado 7 de maio en Santiago durante a presentación do informe "Como se percibe o Sistema de Préstamo de Libros de Texto no Contexto Escolar Galego", realizado pola Unidade de Psicoloxía do Consumidor e Usuario da Universidade de Santiago de Compostela (USC PSICOM), no que por primeira vez se analiza e valora a percepción que teñen algúns dos principais axentes afectados pola medida, como pais, profesores e equipos directivos.

Momento óptimo

Este traballo de investigación realizouse nunha excelente conxuntura, tendo en conta que o sistema de préstamo en Galicia se instaurou progresivamente en toda a Ensinanza obrigatoria dende 2003 e está establecido completamente no actual curso 2007-2008.

A gran maioría dos proxenitores declara non estar moi satisfeito co modelo mentres que só o 18% dos mesmos di estar contento e a principal vantaxe que ven ao modelo galego, en especial os pais, é o aforro económico que supón. Ao comparar o modelo vixente co modelo alternativo de axuda directa, a maioría de docentes e pais galegos consideran que o segundo é mellor para fomentar a motivación e o interese dos alumnos (51,6%), é mellor para apoiar o rendemento académico dos alumnos (68,8%) e é mellor para aumentar a calidade da ensinanza (72,2%).

Dende o punto de vista social, o sector docente opina maioritariamente que o sistema de axudas directas atende máis axeitadamente aos principios de xustiza e equidade social, opinión que é apoiada polo 50% dos pais. Tanto os equipos directivos como o resto do profesorado galego afirman que o modelo máis fácil de xestionar para os centros educativos é o de axudas directas, mentres que a xestión do modelo de préstamo é un dos seus puntos débiles. O 98% dos equipos directivos enquisados prefire xestionar o sistema de axudas directas debido fundamentalmente á enorme carga de traballo que supón o préstamo.

Libros en mal estado

O mantemento dos libros supón un grave problema para os pais. Entre o 16% e 18% considera que os seus fillos recibiron os libros en mal estado e/ou sucios, e é outro dos aspectos que lles motiva a rexeitar o sistema. Para os profesores supón un grave inconveniente o non poder traballar directamente nos libros de texto, polo que se ven obrigados a recorrer con máis frecuencia ás fotocopias como recurso didáctico. Un 24,5% dos profesores afirma haber incrementado o uso de fotocopias para desenvolver a docencia.

En conclusión, o informe pon de manifesto as principais deficiencias e virtudes do modelo de gratuidade de libros de texto en Galicia e establece unhas pautas de acción e recomendacións para mellorar o modelo. A gratuidade universal para os libros de texto e materiais didácticos complementarios é unha aspiración lexítima, pero esta non se debe facer a calquera prezo.

O modelo de préstamo demostrou durante anos as súas profundas carencias pedagóxicas e o descontento que xera entre o sector docente, así como a negativa incidencia na industria cultural galega e as súas repercusións no proceso de normalización lingüística. O informe revela que segue existindo moito descoñecemento e desinformación sobre as consecuencias reais da implantación do préstamo. O aforro económico para as Administracións dun sistema de gratuidade mediante préstamo é menor do que a primeira vista puidera pensarse, segundo o documento que pecha as súas conclusións cunha serie de recomendacións e pautas de acción."

[Ver informe na web da AGE]

Os premios fallaronse onte no Balneario de Mondariz

O soño da febre, De provincia a nación e Arte e parte, novamente premiados na XXXI edición dos Premios da Crítica de Galicia

(11-Maio-2008)

Miguel Anxo Murado por O soño da febre (Galaxia), Justo Beramendi por De Provincia a Nación. Historia do galeguismo político (Xerais), Arte e parte. Dos patriarcas á arte suicida (Galaxia), Xaime Quessada, a Editorial Ouvirmos pola colección A Tiracolo e o Arquivo do Reino de Galicia foron os gañadores da XXXI edición dos Premios da Crítica de Galicia que se fallaron onte no Balneario de Mondariz.

O soño da febre, que xa foi merecedor recentemente dos premios concedidos pola Asociación de Escritores en Lingua Galega e do Antón Losada Diéguez no pasado mes de abril foi premiado no apartado Creación Literaria.

Outro multipremiado é a colosal obra de Justo Beramendi, que acadou o premio no apartado de Investigación. De provincia a nación foi premiado pola AELG, no Antón Losada Diéguez e nos Irmandade do Libro dos libreiros galegos. Amais, Justo Beramendi foi Pedrón de Ouro 2008 e a súa obra foi considerada polos lectores de Fervenzas Literarias como segunda mellor obra de ensaio do 2007.

Tras ser considerada polos lectores de Fervenzas Literarias como o mellor libro de ensaio do 2007, Arte e Parte. Dos patriarcas á arte suicida de Xurxo Borrazás foi premiado onte como mellor obra de Ensaio e Pensamento. Arte e parte ofrécese ao público como escenario de conflito, como problematización duns conceptos culturais tan asumidos que se converteron en paisaxe e deixaron de ser útiles.

O tristemente finado Xaime Quessada foi premiado no apartado Ciencias e Artes da Representación. A colección A tiracolo da discográfica Ouvirmos en Música e o Arquivo do Reino de Galicia en Iniciativa Cultural foron o resto duns premios que se entregarán o vindeiro 31 de maio.

A AELG e o Concello de Santiago asinan un convenio de colaboración co obxectivo de asentar en Compostela un foro literario multicultural

Escritores en Compostela achegará catro escritores de sona internacional á capital de Galicia cada ano

(08-Maio-2008)

O concelleiro de Cultura do Concello de Santiago, Néstor Rego, e o presidente da Asociación de Escritores en Lingua Galega, Cesáreo Sánchez, asinaron hoxe un convenio cuxa finalidade é asentar en Santiago de Compostela o foro literario multicultural denominado Escritores en Compostela, que fará da cidade espazo nuclear ao redor do que converxeren sucesivos encontros entre os escritores e escritoras galegos con outros de ámbito internacional.

Tanto a Concellería de Cultura do Concello de Santiago como a Asociación de Escritores en Lingua Galega coincidiron no acto de presentación do convenio na conveniencia e necesidade de xuntar esforzos e impulsar iniciativas, programas, accións e proxectos conxuntos dirixidos á promoción e difusión da literatura galega, achegándoa a toda a cidadanía galega.

Como resultado do convenio asinado por ambas as dúas partes, ao longo deste ano 2008 organizarase un máximo de catro visitas de escritores ou escritoras pertencentes a diferentes sistemas literarios de ámbito internacional, co gallo de partillaren a súa experiencia creadora e creativa cos escritores e escritoras galegos.

Dúas visitas xa se levaron a cabo: a do escritor belga recentemente traducido ao idioma galego, Jean-Philippe Tousaint, e a escritora cubana Nancy Morejón. A outra ou outras visitas, até un máximo de catro en total,  está pendente de confirmar en función da súa axenda, mais os encontros programaríanse para o 3º e 4º trimestre do presente ano.

Serán protagonistas nesta edición Talía Teatro e o escritor Xelucho Abella

A A.C. Monte Branco do Couto organiza a XXVI edición de Festiletras

(08-Maio-2008)

A Asociación Cultural Monte Branco do Couto, coa colaboración do concello de Ponteceso, presentou o programa para a XXVI edición da festa das letras.

Como todos os anos, o Couto convértese na referencia cultural, non só comarcal, se non tamén galega polo esforzo e traballo das xentes que forman parte desta entidade cultural. Desde o sábado 10 ata o domingo 18 de maio libros, obradoiros, teatro, exposicións, contacontos... encherán de cultura Ponteceso.

Nesta edición homenaxearase a Talía Teatro e ao escritor Xelucho Abella. Talía Teatro cumpre neste 2008 o seu XX aniversario; o domingo 11 representaranse as obras Menos lobos, O merlo branco e Quero ser grande. Ao longo do día haberá obradoiros teatrais impartidos por Arthur Trillo e Toño Casais.

O día 17 de maio, coincidindo co día das Letras Galegas, homenaxearase ao escritor Xelucho Abella, teólogo e concelleiro do PSG-EG nos concellos de Malpica e Ponteceso. Xelucho é autor dos libros A cidade maldita (Xerais), Gundar e o cabalo de oito patas (Casals), As aventuras de pelusa (Casals) ou A ermida do diaño (Galaxia).

[Web de Festiletras]

[Programación]

A versión Beta da web permite descargar Protexta, o suplemento cultural

Nace Tempos Dixital: Información, opinión e debate na rede

(08-Maio-2008)

En abril de 1997 aparecía nos quioscos e librarías o número 0 da revista Tempos Novos. A súa tarefa durante máis de dez anos sería interrogar libremente o curso do país, á marxe dos poderes, e informar para o debate e o coñecemento. Agora nace na internet Tempos Dixital, que cabo da súa irmá maior en papel, tentará crear opinión rigorosa do que vai acontecendo cada sete días e mobilizar unha hemeroteca de máis de 130 números, que segue a medrar. Amais, esta proposta cadra coa dunha web 2.0. Quérese dicir que o protagonismo lle acae a unha rede social que se organiza para valorar, reflexionar e mesmo producir os contidos da publicación electrónica...

O soportal Tempos Dixital, na súa busca de información, opinión e debate na rede, como reza o seu subtítulo, está dividido nas seccións Política, Economía, Entreculturas, Ciencia e Tecnoloxía, Sociedade, Encontros e Comunicación. Amais, está dispoñible a versión en pdf do seu suplemento cultural Protexta e unha hemeroteca cos artigos antigos.

Tempos Dixital está coordinado polo xornalista Aurelio Castro.

[Tempos Dixital]

Tardes de lecer na Fundación Wenceslao Fernández Flórez

A Fundación Wenceslao Fernández Flórez recibe unha subvención da Deputación da Coruña para dar a coñecer o legado literario e humano do escritor coruñés

(07-Maio-2008)

A Deputación da Coruña e Fundación Wenceslao Fernández Flórez asinaron no día de onte un convenio co cal a Deputación achega este ano un total de 18.000 € para financiar o ciclo de actividades culturais ‘Tardes de lecer na FWFF’ co obxectivo de promover o coñecemento da obra literaria e da figura do autor coruñés.

Nesta iniciativa inclúense actividades como concertos de música clásica e tradicional, recitais de poesía e representacións teatrais, conferencias e presentacións de libros, proxeccións de películas e celebración de datas sinaladas como o Día das Letras Galegas, ou o Día da Poesía.

A Deputación da Coruña, membro do Padroado da Fundación Fernández Flórez é propietaria da casa do autor coruñés en Cecebre "Villa Florentina" , cedida como sede á Fundación, pretende así, colaborar naqueles proxectos, actividades e accións culturais que incidan na difusión da obra dos autores galegos, no marco do compromiso que mantén coa promoción da cultura galega.

O presidente da institución provincial, Salvador Fernández Moreda, valorou moi positivamente o acordo asinado xa que permitirá afondar no coñecemento da figura do ilustre escritor coruñés e da súa obra.

Pola súa banda, o director da Fundación Wenceslao Fernández Flórez, Antonio Montero, agradeceu a colaboración prestada pola Deputación e resaltou a importante acción cultural que a fundación desenvolve ao longo do ano, e o importante número de persoas que participan nelas. 

[Máis información]

Era director do Instituto Galego de Estudos Comunitarios da Fundación Isla Couto e membro do consello de redacción de GRIAL, amais de autor dunha vintena de libros

Deixounos Xan Bouzada

(06-Maio-2008)

Xan Bouzada Fernández, membro do consello de Redacción de GRIAL e director do Instituto Galego de Estudos Comunitarios da Fundación Isla Couto faleceu onte, 5 de maio, como consecuencia dunha longa enfermidade.

Bouzada, nado en Lugo o 1 de decembro de 1951, era doutor en Socioloxía e profesor titular do Departamento de Socioloxía, Ciencia Política e Filosofía da Facultade de Ciencias Sociais e da Comunicación da Universidade de Vigo.

Incorporouse á redacción de GRIAL en 1989, na etapa que dirixiu Carlos Casares, e á que pertenceu ata hoxe. Ao longo destes case vinte anos, participou activamente nos labores da revista con numerosas colaboracións, encargándose, ademais, da coordinación dos monográficos "Os dilemas da acción cultural" (número 130, 1996), "Sobre a sociedade da cultura" (149, 2001), "Demografía galega, un devalo imparable?" (162, 2004), "Espazos da cultura" (168, 2005). Nestes días distribuíuse o último número (177, 2008), onde coordinou a sección "Desafíos da educación".

Autor e editor de máis dunha vintena de libros sobre socioloxía da cultura, políticas culturais, sociolingüística e desenvolvemento local e comunitario, entre os que se atopan: Mapa cultural de Galicia: a situación socio-cultural dos concellos galegos (Xunta de Galicia, 1991), Políticas culturales y sociedad democrática (Asociación Española de Sociología de la Cultura y de las Artes, 1999), Cultura e concellos. As estratexias de promoción cultural no ámbito local (Consello da Cultura Galega, 2000), O proceso de normalización do idioma galego (3 vol., 2002-2003), Cultura e participación (Consello da Cultura Galega, 2003) e Cultura e novas tecnoloxías (Consello da Cultura Galega, 2006).

En Galaxia publicou Redes sociais e conxuntos de acción (1996), O desenvolvemento comunitario local (1999) e Familia e comunidade: a familia como actor nos procesos de desenvolvemento local (2001).

Ademais de membro da International Sociological Asociation e da Asociación Galega de Socioloxía, entre 1994 e 1998 foi presidente da Asociación Española de Sociología de las Artes y la Cultura (AESCA).

Déixanos Xan Bouzada en plena madureza intelectual e profesional, con varios proxectos inacabados e unha fonda pegada en cantos o coñecemos polo seu intenso e infatigable compromiso coa lingua e a cultura de Galicia, á que dedicou o mellor das súas angueiras.

Toda a información sobre os lugares de solta nos vindeiros días

Espazo Lectura ceibará 120 libros en galego en celebración do Día das Letras Galegas

(06-Maio-2008)

Espazo Lectura prepara unha gran solta de libro galego para o próximo sábado 10 de maio. Constituirá a acción central deste colectivo para as Letras Galegas e será a primeira vez que se produza unha liberación masiva e conxunta de libros no Val Miñor. A partir do sábado, o Bookcrossing buscará lectores e lectoras entre nós. Ceibaranse arredor de 120 libros en galego en distintos puntos dos tres concellos (Baiona, Gondomar e Nigrán). Eses puntos serán debidamente anunciados na web de Espazo Lectura e todos os libros estarán rexistrados na páxina oficial de bookcrossing por Espazo Lectura. A solta complementarase coa edición dun folleto explicativo impreso coa colaboración dos tres gobernos municipais, e cunhas chamativas pegatinas (ademais das etiquetas bookcrossing de Espazo Lectura) que serán adheridas ás capas dos libros liberados.

[Espazo Lectura]

[Bookcrossing España]

Poetas Galegos da Posguerra

O Liceo de Ourense analiza as figuras de Xosé Mª Álvarez Blázquez, Uxío Novoneyra, Manuel María, Celso Emilio Ferreiro e Antón Tovar nun ciclo de conferencias

(04-Maio-2008)

O ano 1936 significou en Galicia a traxedia para milleiros de familias e tamén un drama inmenso para o futuro da cultura galega, esplendoroso nese momento. A expresión en galego quedou reducida durante os primeiros anos a poetas falanxistas e panexiristas do novo réxime. Outras grandes voces galegas estaban xa no exilio naquel momento. Hai que agardar a 1947, coa aparición de Cómaros verdes, de Aquilino Iglesia Alvariño, para albiscar un certo rexurdir da lírica galega. Neses anos nace a Editorial Galaxia (1950), as primeiras revistas poéticas bilingües («Posío», «Alba», «Gelmírez», etc.) e as primeiras coleccións poéticas como Benito Soto, coordinada por Celso Emilio, ou Xistral en Monforte, que se relacionaron con moitas outras de toda España.

Prepárase así o terreo para a fecundación dos grandes poetas da posguerra. Entre eles, a maioría nacidos entre 1920 e 1940, que hoxe a crítica clasifica como Promoción de Enlace e Xeración das Festas Minervais. Moitos deles renovarán o cultivo da poesía en galego ó abeiro das tendencias poéticas que brillaran especialmente na época das vangardas, antes da guerra: o neotrobadorismo, o imaxinismo, o popularismo ou o paisaxismo. Outros ensaiarán novas vías como o berro existencial da Escola da Tebra ou a nova poesía social. Moitos, polas circunstancias históricas vividas, nin sequera coñecían ben a tradición dos poetas galegos e sentiron ademais a pegada doutros poetas en castelán, sobre todo da Xeración do 27. Case todos empezaron facendo poesía nos dous idiomas: moitos deles apostarían logo pola expresión monolingüe en galego. Contaban co apoio dalgúns medios como o xornal compostelán «La Noche» e o seu suplemento cultural ou, máis logo, a admiración dos novos escritores do grupo Brais Pinto.

A sección de literatura do Liceo de Ourense nos achega, nesta sexta edición do ciclo Visións de Galicia, a algunhas desas grandes voces ben representativas do seu momento e do seu país: Manuel María, Xosé María Álvarez Blázquez, Uxío Novoneyra, Celso Emilio Ferreiro e Antón Tovar. Diferentes especialistas farán un achegamento rigoroso á súa obra e personalidade: son cinco nomes que marcan algúns dos grandes camiños da nosa lírica contemporánea e que ademais permanecen no tempo, auténticos clásicos da mellor poesía escrita en galego. Ó carón deles figuraron nomes tan relevantes como Luís Pimentel, Xosé María Díaz Castro, Pura Vázquez, Xoana Torres, Manuel Cuña Novás, María Mariño, Luz Pozo Garza, Eduardo Blanco Amor, Antón Avilés de Taramancos ou Álvaro Cunqueiro, entre outros.

Programa (todas a partires das 20.15 h.):

Día 5 de maio: Conferencia de Xohán Xesús Cabana Xosé María Álvarez Blázquez.

Día 9 de maio: Conferencia de Luis González Tosar Uxío Novoneyra.

Día 12 de maio: Conferencia de Miguel Anxo Fernán-Vello Manuel María.

Día 15 de maio: Conferencia de Ramón Nicolás Celso Emilio Ferreiro.

Día 19 de maio: Conferencia de Marcos Valcárcel Antón Tovar.

[Máis información]

Interveñen Manuel Lourenzo, Santiago Fernández e Anahí Varela

Un espectáculo poético-musical a cargo de Casa Hamlet percorrerá Galicia

(04-Maio-2008)

Baixo o título Quen poidera convosco voar a compañía de teatro Casa Hamlet percorrerá vilas e cidades de Galicia e Madrid nun recital-concerto poético sobre a obra de Manuel Curros Enríquez no centenario do seu pasamento. Neste espectáculo poético-musical recitarán os poemas de Curros Manuel Lourenzo, Santiago Fernández e Anahí Varela.

Polo de agora están confirmadas as seguintes datas e lugares: 4 de maio no Teatro Colón da Coruña (ás 20.00 h.), 13 de maio na Casa de Galicia de Madrid (ás 20.00 h.), 20 de maio na Casa da Cultura de Betanzos (ás 12.00 h.) e o 23 de maio no local social de Berdillo (ás 20.30 h.)

Un Maratón de Lectura en galego abrirá os actos

O Centro Cívico Os Mallos prepara as súas actividades para conmemorar o Día das Letras galegas

(04-Maio-2008)

O Centro Cívico Municipal Os Mallos da Coruña prepara as súas actividades para conmemorar o 17 de maio o Día das Letras Galegas adicado a Xosé María Álvarez Blázquez.

O 13 de maio organizan un Maratón de Lectura en galego onde convidan a participar a todos aqueles que se queran achegar un texto en galego de algún autor ou mesmo propio. Os interesados han de se achegar ao Centro para solicitar quenda de lectura. Abrirá o acto o ilustre Isaac Díaz Pardo a partires das 17.00 h.

A continuación, A caricia da serpe, un grupo de poesía musicada, formado entre outros por Lino Braxe e Miguel Ladrón de Guevara ofrecerá unha actuación musical.

O día anterior á celebración das Letras Galegas haberá unha representación teatral da obra de Manuel Núñez Singala O achado do Castro, interpretada polo Grupo de Teatro Ateaco. Acceso de balde recollendo a invitación a partires do 9 de maio no Departamento de Conserxería.

A obra será publicada pola editorial Espiral Maior

Paulino Peña Álvarez gaña o XI Certame de Poesía 'Concello de Carral' co poemario Gramática da afirmación

(04-Maio-2008)

O xurado do XI Certame de Poesía 'Concello de Carral', acordou elixir o poemario titulado Gramática da afirmación, do ourensano Paulino Peña Álvarez, como gañador desta edición do concurso literario.

O xurado, formado por formado por Luciano Rodríguez, Ánxeles Penas García e Xosé Luís Mosquera Camba, baixo a presidencia da Concelleira de Cultura María José García Fariña, e con Carlos Lorenzo Pérez como secretario, destaca da obra “a súa madurez lírica, o excelente manexo da lingua, o contrapunto que establece entre lingua e terra, a súa gran musicalidade, o sorprendente das súas imaxes, e que é un libro constructivo”.

A esta edición do premio de Carral presentáronse 38 poemarios, e está previsto o acto de entrega do premio para o día 23 de maio na Biblioteca Municipal de Carral. Paulino Peña recibirá como premio 2.000 euros, ademais de ver publicado o seu libro na colección de Poesía da Editorial Espiral Maior.

Paulino Peña, licenciado en Filosofía e Ciencias da Educación, é mestre de ensino primario e coordinador provincial dos equipos de normalización e dinamización lingüística de Ourense.  Este é o primeiro premio importante que acada este poeta ourensán, despois de que gañara en Bilbao, en dúas ocasións, o 'Anduriña voandeira', e noutra ocasión o convocado polo Concello de Serra de Outes. Paulino Peña ten traballado durante varios anos na promoción das letras galegas, encargándose da coordinación e edición dos vídeos sobre os autores homenaxeados cada 17 de maio. Ademais é autor de múltiples unidades didácticas sobre as Letras Galegas. Todos estes traballos están dirixidos ao sector do ensino e promovidos pola Xunta de Galicia.

[Máis información]

"Revivir o latexo daquel momento fundacional" declarou o reitor da Universidade da Coruña na presentación

As universidades galegas presentan unha reprodución facsímile do manuscrito do himno galego

(04-Maio-2008)

As tres universidades galegas presentaron na rúa Tabernas, sede da Real Academia Galega, unha reprodución facsímile do manuscrito do himno de Eduardo Pondal, a partitura da música composta por Pascual Veiga e varias cartas da correspondencia mantida entre ambos autores que conforman parte do contido de O Himno galego. Documentos históricos 1890-1907, un libro co que as tres universidades galegas conmemoran o centenario da primeira interpretación do himno galego.

Ao acto, que estivo presidido por Xosé María Barja, reitor da Universidade da Coruña, asistiron o vicerreitor de Relacións Institucionais da Universidade de Vigo, Iván Area; o vicerreitor de Relacións Institucionais da Universidade de Santiago, Lourenzo Fernández; o arquiveiro-bibliotecario da Real Academia Galega, Xosé Luis Axeitos e o catedrático de Lingua Galega e Portuguesa da UDC, Manuel Ferreiro. Todos destacaron a importancia da colaboración das institucións que deu como froito a publicación desta reprodución facsimilar. O reitor da Universidade da Coruña destacou que o volume é “unha achega necesaria ao centenario do himno que nos permite coñecer e mesmo revivir o latexo daquel momento fundacional”.

Lareira Literaria

Paula San Vicente, Xoán Babarro, Ramón Loureiro e Edicións Xerais de Galicia na Lareira Literaria de Maio

(04-Maio-2008)

Paula San Vicente, Xoán Babarro, Ramón Loureiro e Edicións Xerais de Galicia cóntanos ás súas novidades e proxectos sobre vindeiros libros e traballos.

Paula San Vicente, tras gañar o Certame Carvalho Calero de Narración curta con Fíos-de-contas (Laiovento) prepara un novo libro de relatos co tema principal da vellez.

Pola súa banda, o ourensán Xoán Babarro, tras un intenso 2007 con tres libros dirixidos ao público máis novo, ofreceranos neste ano a poesía completa do asturiano Antolín Santos Mediante, poeta nado en Taramundi e cunha importante publicación en galego. Para o público infantil, publicará Cormarín, a historia dun corvo mariño que veremos como medra e, para finais de ano, un libro de poemas onde parte de tópicos da poesía pondaliana.

Mentres agardamos pola vindeira novela de Ramón Loureiro, onde vai estar moi presente a imaxinación ao servizo da creación da terra, sairá en breve Príncipes de Bretaña en Compostela, ilustrado por Gonzalo Pernas, unha particular homenaxe á Cidade de Compostela e ao Camiño de Santiago que publicará Biblos.

Xerais prepara un maio cheo de novidades, desde as achegas ao público infantil cos novos libros de Ramón Caride e Iván Sende ata as novelas de Marcos S. Calveiro, Begoña Paz ou Carmen Blanco; sen esquecer os premios Game Over e Historia da chuvia que cae todos os días, premios Manuel María de Literatura Dramática Infantil e o Premio Álvaro Cunqueiro. Outras interesantes novidades pódense ver na Lareira Literaria deste mes.

[Lareira Literaria]