A obra será publicada na colección de poesía "Arte de Trobar", editada polo P.E.N. Clube de Galicia

O poeta lucense Luís Valle Regueiro resulta gañador do Premio de Poesía Caixanova

(26-Decembro-2008)

O poeta lucense Luís Valle Regueiro foi o gañador do VII Premio de Poesía Caixanova co traballo A caída, que foi presentada baixo o lema “Caliban”.

Nesta sétima edición do certame, organizado polo P.E.N. Clube de Galicia e Caixanova, concorreron 67 poemarios inéditos. O xurado, composto por Luís González Tosar, escritor e presidente do Centro P.E.N. de Galicia; Anxo Angueira, poeta e profesor da Universidade de Vigo; Elvira Riveiro, profesora da Universidade de Vigo; Arximiro Villar, poeta, investigador e crítico literario; e Ramón Nicolás, crítico literario, decidiu outorgarlle o galardón á obra do lucense Luís Valle Regueiro pola súa “coherencia estética e un equilibrio estrutural próximo ao minimalismo expresivo”. Así mesmo, tamén quixeron destacar que “resulta significativo o tratamento que fai o autor da poética do íntimo cun suxestivo repertorio simbólico e un rexistro lingüístico contido pero escolleito”. Amais da dotación económica do premio, A caída será publicada na colección de poesía “Arte de Trobar”, editada polo P.E.N. Clube de Galicia.

Luís Valle Regueiro é o sétimo gañador deste certame, un dos máis prestixiosos do país en poesía, tras Carlos Penela por Sombras, rosas, sombras (2007), Marilar Aleixandre por Mudanzas (2006), Arcadio López-Casanova con Herdo do canto (2005), Román Raña por As metamorfoses do túnel (2004), María do Cebreiro con Non deixes que o poema te coñeza (2003) e Xavier Seoane, por Dársenas do ocaso (2002).

Un longo e tortuoso camiño: Adaptación, crise e cambio no Bloque Nacionalista Galego (1982-2008) é de autoría de Xosé Ramón Quintana Garrido

Un estudo sobre a evolución do BNG desde 1982 ata os nosos días é premiado co Ramón Piñeiro de Ensaio

(22-Decembro-2008)

A obra Un longo e tortuoso camiño: Adaptación, crise e cambio no Bloque Nacionalista Galego (1982-2008), da que é autor o profesor Xosé Ramón Quintana Garrido, resultou gañadora do Premio Ramón Piñeiro de Ensaio 2008, que organizan conxuntamente a Secretaría Xeral de Política Lingüística da Xunta de Galicia, a través do Centro Ramón Piñeiro para a investigación en humanidades, e Editorial Galaxia coa colaboración de Unión Fenosa. A xuntanza do xurado realizouse hoxe, día 22 de decembro, ás 11.00 h., no Centro Ramón Piñeiro, en Santiago de Compostela.

O ensaio premiado nesta oitava edición do Premio Ramón Piñeiro, que será publicado por Galaxia o próximo ano, aborda o tema de da evolución, entre o radicalismo e a adaptación, do BNG, desde 1982 á actualidade. O xurado recoñece así os méritos dunha obra na que destaca a capacidade do autor para interpretar e reconstruír, con rigor intelectual e eficacia expositiva, o proceso recente do BNG. Análise feita á luz da ciencia política e dos abondosos fondos documentais empregados polo autor.

O xurado, que concedeu o premio por maioría, estivo formado por Luís Alonso Girgado, María López Sández, Rosa Marta Gómez Pato, Ramón Villares e Carlos Lema, salientou a calidade dos nove orixinais presentados, así como a variedade de temas abordados neles.

O profesor ourensán Xosé Ramón Quintana Garrido é especialista en historia política e historia social. Publicou con Marcos Valcárcel o libro Ramón Otero Pedrayo. Vida obra e pensamento (Ir Indo), ademais de diversos artigos en revistas especializadas e publicacións colectivas.

O prazo de entrega de orixinais remata o 13 de abril do 2009

Comeza a conta atrás para os Premios Xerais 2009

(22-Decembro-2008)

Edicións Xerais de Galicia ven de convocar as bases para a 26ª edición do Premio Xerais de Novela, a 4ª edición do Premio Fundación Caixa Galicia de Literatura Xuvenil e a 24ª edición do Premio Merlín de Literatura Infantil.

O prazo de entrega de orixinais para cada un dos diferentes premios remata o 13 de abril do 2009. O xurado, formado por cinco membros escolleitos entre lectores, recoñecidos profesionais da cultura e un secretario con voz e sen voto en representación de Edicións Xerais emitirá o seu fallo no curso da Cea “Xerais” que se celebrará o día 6 de xuño.

[Bases da 26ª edición do Premio Xerais de Novela]

[Bases da 4ª edición do Premio Fundación Caixa Galicia de Literatura Xuvenil]

[Bases da 24ª edición do Premio Merlín de Literatura Infantil] 

A entrega dos premios celebrarase o 27 de decembro na Casa da Concello de Padrón

Iván García Campos, novo gañador dos Premios Pedrón de Ouro de narración breve

(22-Decembro-2008)

O xurado da XXXIV edición do Premio Nacional de Narracións Curtas "Modesto Rodríguez Figueiredo", que convoca a Fundación do Pedrón de Ouro en colaboración do Concello de Padrón, outorgou o primeiro premio ao escritor Iván García Campos polo relato Unha casa chea de xanelas. O xurado, que estivo composto por Avelino Abuín de Tembra (Presidente da Fundación do Pedrón de Ouro), María Xesús Senín Fernández (en representación do Concello de Padrón), Carlos Negro Romero (en representación da AELG), Román Raña (en representación do PEN CLUBE DE GALICIA), Xesús Manuel Valcárcel (designado pola Fundación do Pedrón de Ouro), Xesús Santos Suárez (moderador e membro da Fundación do Pedrón de Ouro) e David Otero (secretario e membro secretario da Fundación do Pedrón de Ouro) destacaron do relato de García Campos a capacidade narrativa, o detallismo na construción psicolóxica dos personaxes, o multiperspectivismo para crear a historia mestura de realidade e imaxinación. Tamén se destaca a gradación de accións, o detallismo e obsérvase cualitativamente a pluralidade de emisores nos contextos sociais así como as referencias temáticas do momento e asemade a elementos narrativos de definición cinematográfica.

Iván García Campos, habitual nos premios de narracións curtas, xa fora premiado na 34ª edición destes mesmos premios, así como no Certame literario de relatos curtos “Os Viadutos”, no Certame de Narración Curta Ánxel Fole ou no Concurso de Contos para a Mocidade de Ourense.

Tras as conclusións do xurado, outorgáronse dous accésit ás obras Colleita de sombras de Chelo Suárez e a Un pintor malogrado de Alberto Gómez Aneiros. Asemade, o xurado propuxo pola súa calidade literaria a publicación das obras Ai padriño!, A corrente salvaxe e Happy sunday.

Os premios entregaranse o vindeiro 27 de decembro na Casa do Concello de Padrón. Tanto os traballos premiados como os propostos para publicación, se así o permiten os seus autores, serán publicados nun tomo da Colección “ Premios Modesto R. Figueiredo" pola Editorial O Castro.

Os fundadores da Asociación Galega de Editores foron homenaxeados no apartado de Edición Histórica

O libro das viaxes imaxinarias, PAlAbrAs brAncAs, Fin de século en Palestina, Lolita, Agustín Fernández Paz e Gadisa, premiados na IV Noite da Edición

(21-Decembro-2008)

A Asociación de Escritores en Lingua Galega celebrou o pasado venres 19 de decembro a IV Noite da Edición, unha gala coa que o gremio editorial pretende reunir anualmente a todos aqueles que traballan o día a día da realidade material do libro, a súa produción e a súa edición e na que se entregaron os Premios da Edición 2008, concedidos polos propios editores. O evento, patrocinado polo Centro Español de Derechos Reprográficos (CEDRO), tivo lugar no Verbum-Casa das Palabras de Vigo e acudiron a el os profesionais do sector e destacadas autoridades do mundo do libro, a cultura e a política en Galicia.

Nesta IV Noite da Edición foron homenaxeados no apartado da Edición Histórica os fundadores da Asociación Galega de Editores, que celebra no 2008 o seu vinte e cinco aniversario. Recolleron o premio Bieito Ledo, da editorial Ir Indo, e Olegario Sotelo Blanco, de Sotelo Blanco Edicións. Ámbolos dous editores quixeron rendirlle homenaxe, na recollida do premio, a aqueles compañeiros fundadores que xa non están entre nós e que iniciaron o camiño da Asociación Galega de Editores. Asemade, Bieito Ledo incidiu na creación da AGE, no ano 1983, como o terceiro fito do libro galego xunto a Xeración Nós con Ánxel Casal e o posterior período de resistencia cultural desde Bos Aires; e tras a fundación de Galaxia. Rematou engadino que a identidade de Galicia como pobo non existiría sen o libro galego.

Posteriormente foron entregados os premios creados pola AGE para recoñecer a excelencia do traballo dos compañeiros editores e dos integrantes doutros colectivos que se distinguiron ó longo do ano 2008 polo seu labor a favor do libro ou a lectura. Estas distincións, sen dotación económica, son outorgadas polas corenta e catro editoras que forman parte da Asociación, previa presentación das candidaturas que cada unha considera oportunas, tras dúas votacións para cada unha das seis categorías.

Premio Isaac Díaz Pardo ao libro ilustrado do 2008: O libro das viaxes imaxinarias (Xerais), ilustrado por Xosé Cobas.

Finalistas: A fabulosa lenda do Rei Artur (Rodeira-Edebé), ilustrado por Francesc Rovira; Celso Emilio Ferreiro. Selección poética (Faktoría K de Libros), ilustrado por Baldo Ramos; Rosalía de Castro. Selección poética (Faktoría K de Libros), ilustrado por Belén Padrón; e Terra Libre (Edicións Xerais de Galicia), ilustrado por Fran Jaraba.

Premio Xosé Neira Vilas ao libro Infantil e Xuvenil: PAlAbrAs brAncAs (Xerais) de Elvira Riveiro Tobío.

Finalistas: A pastelaría de Dona Remedios (Rodeira-Edebé), de Agustín Fernández Paz; Caracois (OQO Editora), de Armando Quintero; Imaxina animais (Kalandraka Editora), de Xosé Ballesteros; e O ladrón de palabras (Edicións A Nosa Terra), de Anxo Fariña.

Premio Ánxel Casal ao libro do ano: Fin de século en Palestina (Galaxia) de Miguel Anxo Murado.

Finalistas: A arquitectura en Galiza: Aproximación á realidade arquitectónica xeral de Galiza dende a Prehistoria ata os nosos días (Edicións Nigra Trea), de Manuel Torres Búa; A conta atrás (Faktoría K de Libros), de Carlos Portela; A vida nova de Madame Bovary (Editorial Galaxia), de Xosé Carlos Caneiro; Caderno de animalista (OQO Editora), de Antom Fortes; O libro das viaxes imaxinarias (Edicións Xerais de Galicia), de Xabier P. Docampo; e Os animais domésticos na Historia de Galicia (3C3 Editores), de Diego Conde e José M. Vázquez Varela.

Premio Lois Tobío ao libro traducido: Lolita (Faktoría K de Libros), traducido por Xesús Fraga.

Finalistas: A fabulosa lenda do Rei Artur (Rodeira-Edebé), traducido por Isabel Soto e Xabier Senín; As flores do mal (Editorial Galaxia), traducido por Gonzalo Navaza; Cantos e fragmentos (Edicións Positivas), traducido por Raúl Gómez Pato; Deshonra (Rinoceronte Editora), traducido por Moisés Barcía; Eu servín ao Rei de Inglaterra (Rinoceronte Editora), traducido por Fernando de Castro; e Mal de escola (Edicións Xerais de Galicia), traducido por Xabier Senín e Isabel Soto.

Premio Xosé María Álvarez Blázquez ao autor ou autora do ano: Agustín Fernández Paz. Finalistas:Justo Beramendi e Miguel Anxo Murado.

Premio Francisco Fernández del Riego á colaboración no labor editorial do ano: GADISA, pola súa campaña publicitaria “VIVAMOS COMO GALEGOS”.

Entre todos os participantes sortearase un lote de libros cortesía da Federación de Libreiros de Galicia

Abertas as votacións para elixir o mellor do 2008

(18-Decembro-2008)

Os editores, os escritores, os críticos, os libreiros... Todos escollen as súas preferencias literarias do ano. Desde Fervenzas Literarias propoñémosvos a todos os lectores e lectoras que deades a vosa opinión e sexades vos quen votedes polos mellores libros, autores, ilustradores,... do 2008.

Respecto ao pasado ano, queremos destacar a creación literaria do país limitando as categorías de Narrativa, Poesía, Ensaio, Literatura Xuvenil e Infantil exclusivamente ao libro galego, engadindo como novos os apartados de traducións cara a nosa lingua. Outras categorías que incluímos por vez primeira nesta edición son: Mellor crítico/a literario, Mellor Libraría e Mellor Blog cuxos contidos se centren principalmente en temas literarios e/ou de creación. Cremos que deste xeito contemplamos practicamente na súa totalidade os diferentes aspectos literarios da literatura galega.

Para agradecer as vosas achegas, sortearemos entre todos e todas as participantes un lote de libros cedido por xentileza da FEDERACIÓN DE LIBREIROS DE GALICIA.

Agardamos polos vosos votos!!!

[Vota polos teus mellores libros do 2008]

[Ver os resultados de Os mellores libros do 2007]

A entrega realizarase no transcurso da Cea das Letras en maio do 2009

A AELG ven de nomear á escritora mexicana Elena Poniatowska Escritora Galega Universal

(18-Decembro-2008)

A Asociación de Escritores en Lingua Galega decidiu outorgar o galardón “Escritora Galega Universal” á escritora mexicana Elena Poniatowska.

O galardón ofreceullo o presidente da asociación, o poeta Cesáreo Sánchez Iglesias, no transcurso da súa recente estadía na Feira do Libro de Guadalajara (México).

A distinción entregáraselle no transcurso da Cea das Letras, un dos actos máis importantes na vida da Asociación de Escritores en Lingua Galega, xunto cos Premios AELG, uns galardóns que, concedidos por escritores/as para escritores/as, levan camiño de se afianzar como uns dos de máis prestixio no noso panorama literario. A Cea das Letras celebrarase no mes de maio de 2009.

Xornalista e narradora, nacida en París o 19 de maio de 1933, filla dunha mexicana, Paula Amor, e un nobre polaco, Jean Poniatowska. Radica en México desde 1942. Foi bolseira do Centro Mexicano de Escritores, de 1957 a 1958; ingresou no Sistema Nacional de Creadores Artísticos, como creadora emérita, en 1994.

A súa carreira principiou no exercicio do xornalismo, e ten publicada unha obra moi ampla, que inclúe varios xéneros.

Entre os seus textos destacan as novelas Hasta no verte Jesús mío (1969), Querido Diego, te abraza Quiela, (1978), La flor de Lis (1988), Tinísima (1992) e La piel del cielo (2001); os ensaios: Todo empezó el domingo (1963), La noche de Tlaltelolco (1971), Gaby Brimmer (1979), Fuerte es el silencio (1980), El último guajolote (1982), ¡Ay vida, no me mereces!, (1985), Nada, nadie. Las voces del temblor (1988), e Juchitán de las mujeres (1989); as coleccións de contos: Lilus Kikus (1954), De noche vienes (1979), Métase mi prieta entre el durmiente y el silbatazo (1982) e os libros de entrevistas: Palabras cruzadas, Era, (1961), Domingo 7 (1982), Todo México (1990) e Todo México, vol. II (1994).

Acadou múltiples premios entre os que cómpre salientar: Premio Mazatlán 1970, por Hasta no verte Jesús mío; Premio Xavier Villaurrutia 1970 (rexeitado), por La noche de Tlatelolco; Premio Nacional de Periodismo 1978 (foi a primeira muller que recibiu esta distinción) polas súas entrevistas; Premio Manuel Buendía 1987 (outorgado por varias universidades de México), por méritos relevantes como escritora e xornalista; Premio Mazatlán de Literatura 1992, por Finísima; Premio Alfaguara de Novela 2001, por La piel del cielo, e Premio Rómulo Gallegos 2007, pola súa novela El tren pasa primero.

O soportal permite a libre descarga de textos teatrais

O Centro Dramático Galego presenta a plataforma Dramaturxias de actualidade

(18-Decembro-2008)

O Centro Dramático Galego presentou hoxe Dramaturxias de actualidade, un soportal web específico para acadar a máxima difusión dos textos escritos polos autores de teatro galego actuais.

Neste espazo virtual convivirán un número ilimitado de textos escritos polos participantes no laboratorio de escrita permanente Pistas para unha dramaturxia da actualidade -que dirixe dentro do CDC o autor e director teatral Cándido Pazó- con outras obras de autores emblemáticos da dramaturxia galega que queiran utilizar este medio para dar a coñecer os seus textos e propostas. Tamén hai un espazo para títulos actuais escritos en calquera lingua, así como para obras en reposición e textos de espectáculos producidos nos últimos anos polas compañías galegas e que estas queiran trasladar a estudosos, teatro amador e escolar, ou a futuras reposicións e novas montaxes.

Para facer máis doada a localización dos fondos, incorporouse un motor de busca por distintas categorías, como son o autor/a, título, ano, público, número de personaxes e texto libre. Tamén hai un foro de intercambio de opinións e xeración de debates sobre obras, temáticas e tendencias que conforman a escrita dramática de hoxe en día en Galicia.

A directora do CDG, Cristina Domínguez Dapena, xa adiantara no pasado mes de novembro en Alacante no marco da Muestra de Teatro Español de Autores Contemporáneos a posta en marcha desta web que suscitou grande interese entre os dramaturgos congregados neste encontro, con escasos precedentes no Estado Español.

[Dramaturxias de actualidade]

O segundo premio foi para o traballo A cidade medieval de Tui, de Jesús Vila Pérez

Un estudo sobre os Andrade, Premio de Historia Medieval de Galiza e Portugal 2008

(17-Decembro-2008)

A casa dos Andrade 1160-1540. Nobreza, mentalidade e ideoloxía na Galiza baixo medieval de Francisco Correa Arias foi a obra gañadora do Premio de Historia Medieval de Galiza e Portugal 2008, convocado conxuntamente pola Editorial Toxosoutos, a Fundación Comarcal Noia e a Fundación Comarcal Muros.

O xurado, presidido polo profesor de historia medieval da Universidade de Santiago de Compostela, Carlos Barros Guimeráns, tomou por unanimidade esta decisión destacando a importancia do tema para a historia de Galiza Medieval e a orixinalidade e novidade do enfoque metodolóxico global, que inclúe mentalidades, historia social, xenealoxía, acontecementos..., baseado nunha recolleita extensiva de fontes orixinais.

O resto do tribunal estivo formado polo profesor de historia da Universidade de Porto, Luis Miguel Duarte, polo profesor de filoloxía galega da Universidade de Santiago de Compostela, Henrique Monteagudo Romero, e polos profesores, Xerardo Agrafoxo Pérez e Pedro García Vidal.

O segundo premio, coa consideración de finalista, foi outorgado ao traballo que leva por título A cidade medieval de Tui de Jesús Vila Pérez. O tribunal subliñou deste traballo  polo interese descritivo dos acontecementos políticos e sociais, economía e grupos sociais, monumentos e territorio da cidade de Tui, dende o século XIII ao século XV, baseándose en fontes da catedral de Tui. As obras, gañador e finalista, foron seleccionadas entre os oito orixinais recibidos na Editorial Toxosoutos ata o trinta de setembro de 2008, data límite de recepción de traballos.

O veredicto desta oitava edición do Premio de Historia Medieval de Galiza e Portugal 2008 fíxose público esta mañá, cabodano da morte do Mariscal Pardo de Cela, no mosterio de San Xusto en Lousame.

O autor gañador, Francisco Correa Arias, xa obtivo en 2003 este mesmo Premio de Historia Medieval coa obra, Fernán Pérez de Andrade, o Bóo. Mentalidade e realidade social, que estudaba tamén cuestións relacionadas coa caste dos Andrade; nese estudo o xurado destacou o uso de fontes e o tratamento renovador do enfoque historiográfico. A obra gañadora e finalista serán publicadas pola editorial Toxosoutos no vindeiro mes de marzo dentro da súa colección Trivium, adicada á investigación e estudos de historia medieval sobre Galiza e Portugal, que vai polo número trinta e un, e no que xa foron editados os traballados gañador e finalista de edicións anteriores.

[Edicións anteriores do Premio Historia Medieval de Galicia]

Na xuntanza mantida hoxe en Compostela, confirmouse a Coruña como sede permanente do Cultur.gal

Unha nova campaña da Consellería de Cultura e Deporte promove o consumo de cultura galega

(17-Decembro-2008)

A conselleira de Cultura e Deporte, Ánxela Bugallo, e o director xeral de Creación e Difusión Cultural, Luís Bará, presentaron hoxe a campaña "A cultura que facemos escóllea no Nadal". Ten por obxectivo principal contribuír a dar visibilidade aos produtos culturais galegos, e lograr que libros, discos e filmes galegos estean entre os elixidos á hora de adquirir os regalos de Nadal.

A campaña desenvolverase nas librarías, quioscos e tendas de discos de todo o país, onde se colocarán elementos que identifiquen os espazos nos que se sitúan os libros, CDs e DVDs galegos. Distribuiranse ademais materiais de regalo para as persoas que adquiran produtos culturais galegos: cadernos de notas e discos compactos cunha recompilación de temas de grupos actuais de xéneros como o folk, o rock e o pop. A campaña reforzarase con publicidade nos medios de comunicación.

O punto de partida propicio para esta campaña de Nadal deuno o éxito que acadou a segunda edición de Cultur.gal, que se celebrou do 4 ao 7 de decembro no Palexco da Coruña. O Consello Asesor da feira, formado por representantes dos distintos sectores das industrias culturais de Galicia, reuniuse hoxe en Santiago e decidiu manter a cidade da Coruña como sede permanente da feira, que se celebrará sempre nas datas previas ao Nadal.

A decisión de que A Coruña sexa a sede de Cultur.gal tomouse logo de avaliar como moi positiva a presenza de público na feira. Ao longo dos catro días de celebración pasaron polo recinto arredor de 37.000 persoas, o que significa case cuadriplicar a asistencia á primeira edición. Esa presenza de público correspondeuse cunha boa participación nas actividades programadas. O Consello Asesor valorou Cultur.gal como un proxecto fundamental para contribuír a darlle visibilidade á oferta cultural do país nas súas diferentes versións, soportes e sectores.

O mércores 17 de decembro a partires das 22.00 h.

Primeira edición do fESTALEIRO, festa por unha cultura libre

(16-Decembro-2008)

A editorial independente Estaleiro Editora celebrará o mércores 17 de decembro a primeira edición de fESTALEIRO, festa por unha cultura libre. A festa celebrarase no pub Tarasca de Santiago de Compostela (R/ Entremuros, 13) dende as 22.00 h.

A entrada á festa é gratuíta e haberá sorteos de libros de Estaleiro Editora e de outras editoras independentes, discos editados sob licencias libres e outro material. A festa contará coas actuacións dos grupos The Name e Ataque Escampe. A banda de rock de serie B celebra tamén, con este concerto, a despedida da súa exitosa xira “A invención da pólvora”.

Estaleiro Editora pretende, con este acto, divulgar diferentes manifestacións artísticas do ámbito da cultura libre e a creación de espazos en que difundir o seus materiais, alternativos ao circuíto oficial da literatura e do pensamento subsidiados.

Estaleiro Editora é un proxecto de difusión cultural alternativa que pretende ofrecer unha edición de calidade a prezos reducidos e autofinanciada, co obxectivo de crear un espazo de liberdade para a dinamización cultural, a innovación literaria e o pensamento crítico. Desde o seu nacemento, levan publicados os libros: Plan de fuga, de Alberto Lema; Fume / Insomnio de Rubén Ruibal e Carlos Losada; e A Revoluçao Pendente, de Carlos Diegues. Todos eles están dispoñibles mediante descarga libre dende a web de Estaleiro Editora.

Entre o 13 e o 20 de decembro a Fundación acollerá unha serie de actividades culturais e literarias

O sábado 13 de decembre inaugúrase a Fundación Eduardo Pondal no concello de Ponteceso

(11-Decembro-2008)

Tras un longo período de rehabilitación da antiga casa reitoral de O Couto, na parroquia de Cospindo (Ponteceso), o sábado 13 de decembro terá lugar, ás cinco do serán, a inauguración da Fundación Eduardo Pondal.

Os actos de celebración darán comezo ás 11.00 h. da mañá cun roteiro pondaliano desde Ponteceso ata o Monte Branco guiado polo guía turístico Javier Couto Castro. Á hora oficial da inauguración, despois dunha sesión pirotécnica, descubrirase a placa da Fundación Eduardo Pondal obra do artesán Anxo Cousillas. As actuacións musicais a cargo da Asociación Cultural Monte Branco onde interpretarán, entre outras pezas, o Himno Galego, darán paso a entrega en agasallo ás familias da parroquia o libro 25 anos Monte Branco.

Para celebrar a posta en marcha da Fundación levarase a cabo unha serie de actividades culturais e literarias que se desenvolverán ata o 20 de decembro que incluirá roteiros, conferencias, presentacións, obradoiros, recitais,...

[Semana Cultural na Fundación Eduardo Pondal]

Mondo e outras historias publicouse por vez primeira en 1989

Xerais reedita a única obra do Premio Nobel Le Clézio en galego

(11-Decembro-2008)

Coincidindo coa entrega do Premio Nobel 2008 de Literatura ao escritor francés Jean-Marie Gustave Le Clézio, Xerais reedita a súa obra Mondo e outras historias, publicada por vez primeira na Colección Xabarín en 1987, o que supuxo a primeira achega ao galego do premiado autor. Dita obra, traducida por Valentín Arias e Raquel Villanueva, acadou o Premio á Tradución do Ministerio de Cultura, e o Premio Ramón Cabanillas, ámbolos dous en 1989.

Os fundadores da Asociación Galega de Editores, que este ano celebra o seu vinte e cinco aniversario, recibirán un homenaxe no apartado de Edición Histórica

Os editores galegos entregarán os seus premios na IV Noite da Edición o 19 de decembro no Verbum vigués

(10-Decembro-2008)

O Verbum de Vigo foi o espazo escollido para a celebración da IV Noite da Edición, unha gala que se celebrará o vindeiro venres 19 de decembro, onde a organizadora Asociación Galega de Editores pretende reunir a todos aqueles que traballan o día a día da realidade material do libro, a súa produción e a súa edición. Ao longo da mesma, entregaranse os Premios da Edición 2008, que conceden os propios editores. Entre os asistentes, está previsto que acodan profesionais do sector e destacadas autoridades do mundo do libro, a cultura e a política en Galicia.

Nesta IV Noite da Edición serán homenaxeados no apartado da Edición Histórica os fundadores da Asociación Galega de Editores, que celebra no 2008 o seu vinte e cinco aniversario. Asemade entregaranse previamente á cea os premios creados pola AGE para recoñecer a excelencia do traballo dos compañeiros editores e dos integrantes doutros colectivos que se distinguiron ó longo do ano 2008 polo seu labor a favor do libro ou a lectura. O Premio Francisco Fernández del Riego, co que se pretende recoñecer o traballo realizado por unha persoa ou colectivo de persoas, entidade ou institución das que colaboran co sector editorial ou que participan na promoción do libro editado en lingua galega e da propia lingua, recaeu nesta edición na empresa GADISA pola tarefa desenvolvida a prol do recoñecemento da cultura galega.

Na actualidade os membros da Asociación Galega de Editores están a efectuar as súas votacións para cada elexir entre os finalistas a cada un dos gañadores das cinco categorías restantes contempladas nos Premios da Edición 2008, dos que non se saberá a identidade ata o propio día da gala. Os finalistas para cada unha das categorías son:

Premio Ánxel Casal ao Libro do ano, co que se pretende recoñecer un libro editado polos membros da AGE e publicado orixinalmente en lingua galega entre o 1 de decembro de 2007 e o 30 de novembro de 2008. Os finalistas son A arquitectura en Galiza: Aproximación á realidade arquitectónica xeral de Galiza dende a Prehistoria ata os nosos días (Nigra Trea) de Manuel Torres Búa, A conta atrás (Faktoría K de Libros) de Carlos Portela, A vida nova de Madame Bovary (Galaxia) de Xosé Carlos Caneiro, Caderno de animalista (OQO) de Antom Fortes, Fin de século en Palestina (Galaxia) de Miguel Anxo Murado, O libro das viaxes imaxinarias (Xerais) de Xabier P. Docampo e Os animais domésticos na Historia de Galicia (3C3 Editores) de Diego Conde e José M. Vázquez Varela.

Premio Xosé Neira Vilas ao Libro infantil e xuvenil do ano, co que se pretende recoñecer un libro infantil ou xuvenil editado polos membros da AGE e publicado orixinalmente en lingua galega entre o 1 de decembro de 2007 e o 30 de novembro de 2008. Os finalistas son A pastelaría de Dona Remedios (Rodeira) de Agustín Fernández Paz, Caracois (OQO) de Armando Quintero, Imaxina animais (Kalandraka) de Xosé Ballesteros, O ladrón de palabras (A Nosa Terra) de Anxo Fariña e PAlAbrAs brAncAs (Xerais) de Elvira Riveiro Tobío.

Premio Lois Tobío ao Libro traducido do 2008, co que se pretende recoñecer un libro traducido para o galego e publicado polos membros da AGE entre o 1 de decembro de 2007 e o 30 de novembro de 2008. Os finalistas son A fabulosa lenda do Rei Artur (Rodeira) traducido por Isabel Soto e Xabier Senín, As flores do mal (Galaxia) traducido por Gonzalo Navaza, Cantos e fragmentos (Positivas) traducido por Raúl Gómez Pato, Deshonra (Rinoceronte) traducido por Moisés Barcía, Eu servín ao Rei de Inglaterra (Rinoceronte) traducido por Fernando de Castro, Lolita (Faktoría K de Libros) traducido por Xesús Fraga, e Mal de escola (Xerais) traducido por Xabier Senín e Isabel Soto.

Premio Isaac Díaz Pardo ao Libro ilustrado do 2008, co que se pretende recoñecer un libro ilustrado editado polos membros da AGE e publicado orixinalmente en lingua galega entre o 1 de decembro de 2007 e o 30 de novembro de 2008. Os finalistas son A fabulosa lenda do Rei Artur (Rodeira) ilustrado por Francesc Rovira, Celso Emilio Ferreiro. Selección poética (Faktoría K de Libros) ilustrado por Baldo Ramos, O libro das viaxes imaxinarias (Xerais) ilustrado por Xosé Cobas, Rosalía de Castro. Selección poética (Faktoría K de Libros) ilustrado por Belén Padrón e Terra Libre (Xerais) ilustrado por Fran Jaraba:

Premio Xosé María Álvarez Blázquez ao autor ou autora do ano, co que se pretende recoñecer o traballo realizado por un autor ou unha autora, ou colectivo de autores/as, en lingua galega durante 2008. Os finalistas son Agustín Fernández Paz, Justo Beramendi e Miguel Anxo Murado.

Aínda que os premios non teñen dotación económica, farase entrega no acto dunha peza escultórica numerada a cada un dos galardoados.

[Ver os gañadores da III Noite da Edición]

O acto de presentación do terceiro volume da triloxía Educación e Paz servirá para renderlle homenaxe a Xesús R. Jarés, fundador de Educadores pola Paz

EDUCACIÓN e PAZ

(09-Decembro-2008)

Durante o ano 2008 celébrase o 25 aniversario de Educadores pola Paz, grupo que forma parte do movemento de renovación pedagóxica Nova Escola Galega. Para conmemorar esta efeméride, Xesús R. Jares, desaparecido o pasado mes de setembro, impulsou a publicación dunha triloxía, Educación e Paz, coa intención de que recollese as achegas dos homes e mulleres que, ao longo destes anos, veñen traballando arredor dos obxectivos que promove Educadores pola Paz. Con esta intención naceron os tres libros que constitúen o proxecto, deseñado en colaboración con Edicións Xerais de Galicia: o primeiro deles recolle as actuacións levadas a cabo nestes últimos vinte e cinco anos de Educadores pola Paz; o segundo recolle as colaboracións que fixeron uns 40 ensaistas de distintas disciplinas e países agrupadas en tres campos: o mundo no que vivimos, os escenarios e propostas de paz e o papel da educación para a paz a prol da paz, a cidadanía democrática e os dereitos humanos. E o terceiro volume que, baixo o epígrafe de 'Literatura e Paz', recolle textos narrativos e poéticos de autores e autoras galegos inspirados na cultura da paz.

Co gallo do sesenta aniversario da Declaración Universal dos Dereitos Humanos, que se celebra mañá, celebrarase no Auditorio do Centro Cultural Caixanova un acto cívico no que se presentará ese terceiro volume: Educación e Paz III. Literatura Galega pola Paz. O acto, que será conducido por Manuel Romón, contará coa participación da Conselleira de Cultura e Deporte, Ánxela Bugallo; do Alcalde de Vigo, Abel Caballero; do director de Xerais, Manuel Bragado; e unha representación dos trinta narradores e poetas galegos que participan no volume de Literatura Galega pola Paz. Durante o acto dez alumnos e alumnas dos IES do Castro e de Teis de Vigo lerán o texto da Declaración e os profesores da Escola de Música Tradicional de Vigo, compoñentes da agrupación Son de seu, interpretarán diversas pezas.

Este acto, ademais, constituirá a merecida e emotiva lembranza do fundador de Educadores pola Paz Xesús R. Jares.

Desde as institucións estidian manter Coruña como sede das vindeiras edicións

Pecha a segunda edición do Cultur.gal con preto de corenta mil visitantes

(09-Decembro-2008)

A edición 2008 do Cultur.gal pechou o domingo as súas portas cunha estimación de 37.000 visitantes ao longo dos catro días, un gran salto con respecto á primeira edición, que aglutinou unhas 10.000 persoas. O director xeral de Creación e Difusión Cultural, Luís Bará, fai un balance "positivo" da feira, que "superou mesmo as mellores expectativas no que respecta á presenza de profesionais e empresas, pero sobre todo de público".

O día de maior afluencia da Feira foi o domingo, cuns 13.000 visitantes. Na primeira xornada, pasaron polo Palexco unhas 4.000 persoas, unha cifra que se duplicou no seguinte día. Na xornada do sábado achegáronse unhas 12.000 persoas.

[Autores que pasaron polo Cultur.gal 08 na canle da AELG]

Unha familia galega e un océano de por medio. Vínculos e experiencias a través da memoria fotográfica e epistolar (c.1894-1972)

Un estudo sobre a emigración galega resulta gañadora do VII Premio Manuel Murguía de ensaio

(03-Decembro-2008)

O traballo Unha familia galega e un océano de por medio. Vínculos e experiencias a través da memoria fotográfica e epistolar (c.1894-1972), do que é autora Maria Liliana da Orden, resultou gañador da VII edición do premio de ensaio Manuel Murguía, convocado pola Deputación da Coruña. O premio de ensaio foi dado a coñecer polo presidente da corporación Salvador Fernández Moreda, que salientou a calidade do traballo galardoado, que foi seleccionado entre os oito presentádos ao certame.

O xurado, composto por Carmen Fernández Casanova, Luis Alonso Álvarez, María Xosé Rodríguez Galdo, e Carmen Margariña Valderrama Currás, declarou gañador do premio, por unanimidade de todos os seus membros, ao estudo sobre a emigración galega, presentado baixo o lema de Emilia Eiré Besteiro, e realizado por María Liliana Da Orden, que reside na cidade arxentina de Mar de Prata. O xurado considera que a obra premiada constitúe un traballo innovador, académico, co rigor metodolóxico propia deste tipo de ensaios, e que estuda unha realidade transnacional. Trátase, pois, dun tema esclarecedor dunha realidade galega: a emigración; co estudo dunha familia dende o punto de orixe ata a incorporación ao destino: a Arxentina.

Pola súa banda, o voceiro do xurado, Luis Alonso Álvarez, catedrático da Universidade da Coruña, salientou que "a obra constitúe un ensaio de microhistoria, de pequena historia, pero ao tempo de grande. Podería ser unha fermosa novela que principia co achado dun feixe de cartas esquecidas nun vello baúl do faiado da casa familiar, pero é sobre todo unha fermosa historia en absoluto novelada. Nela, a autora estuda a evolución dunha familia de Salvaterra do Miño que emigra a América. E faino a través da memoria de máis de 80 cartas e innumerábeis fotografías, recordos e entrevistas". Para Luis Alonso trátase dun estudo "que reflicte a emigración na década dos 50 dunha familia que escapaba da miseria materia e moral que trouxeron para o noso país a posguerra e o franquismo, esa longa noite de pedra, ao dicir do poeta". O voceiro do xurado salientou tamén que é a primeira vez na historia do premio de ensaio Manuel Murguía que non se lle concede o galardón a un galego de aquí, se non a un galego de alén do mar.

O premio de ensaio, ademais da dotación económica, supón a publicación da obra por parte da Deputación a través dunha editorial de prestixio.

O volume está publicado pola Asociación da Prensa da Coruña

A cidade dos xornalistas réndelle tributo aos profesionais da información que figuran no rueiro coruñés

(04-Decembro-2008)

"Desde Salvador de Madariaga a Manuel Rivas, desde Wenceslao Fernández Flórez a César Antonio Molina, esta cidade deu ao xornalismo español algunha das súas sinaturas máis ilustres”, referiu Fernández Moreda, presidente da Deputación da Coruña, durante o transcurso da presentación de A cidade dos xornalistas: A Coruña, 53 rúas e prazas con historia, un libro que compendia as biografías dos xornalistas que están presentes no rueiro coruñés, e doutros tres autores que figurarán nun futuro inmediato tras a súa aprobación no Pleno do concello o pasado luns. A publicación foi editada pola Asociación da Prensa da Coruña, co patrocinio da Deputación, e supón unha homenaxe ao conxunto dos autores que figuran nela.

O libro, editado en galego e castelán, contará cunha tirada de catro mil exemplares e porase á venda nas librerías da cidade. Editado en formato A4, ten un total de 226 páxinas, na que se inclúen, ademais das biografías, os mapas de localización das rúas ou prazas dos autores homenaxeados.

Do 4 ao 7 de decembro

A segunda edición do Cultur.gal abre mañá as súas portas no Palexco da Coruña

(03-Decembro-2008)

O Cultur.gal, a Feira Galega das Industrias Culturais, abrirá mañá as súas portas no Pazo de Exposicións da Coruña (PALEXCO) ata o domingo 7 de decembro. Está Feira está organizada pola Consellería de Cultura e Deporte coa colaboración de diversas entidades dos diferentes sectores.

O Cultur.gal deste ano ven cargado de actividades para os seus catro días de duración: exposicións de produtos e servizos, presentacións, concertos, obradoiros infantís, encontros profesionais, proxeccións audiovisuais,... Na súa organización participan máis de 100 entidades, o que fai de Cultur.gal o evento con maior participación do tecido empresarial da cultura galega.

Literariamente falando, no Cultur.gal estarán presentes unha trintena de empresas do sector literario entre as que figuran editoriais, librarías e asociacións que realizaran preto dunha trintena de presentacións de novidades literarias e de sinaturas de libros por parte dos seus autores e autoras. Medio cento deses escritores e escritoras intervirán no programa Falemos de libros de gravación de entrevistas, que posteriormente se emitirán pola rede e que están abertas a todo o público. Nesta cita, organizada en colaboración coa Asociación de Escritores en Lingua Galega (AELG) figuran os nomes de Antón Reixa, Camilo Franco, Chelo Suárez, Rosa Aneiros, Emma Couceiro, Lino Braxe, Yolanda Castaño, Manuel Lourenzo e María Reimóndez, entre outros.

Para o sábado 6 está prevista a realización dunha xornada profesional sobre o libro e a edición onde, baixo o título de “Presente e futuro do libro galego” e na que intervirán Alfonso García Sanmartín, presidente da AGE; Xurxo Patiño, presidente da Federación de Libreiros; e Xoán Manuel Pazos do Consorcio Editorial en representación dos distribuidores, debaterán sobre o estado actual da industria do libro e sobre o camiño que debera seguir.

O Cultur.gal é, polo tanto, o escaparate ideal para as empresas culturais que queiran achegarlles os seus produtos e servizos a todos os profesionais e á cidadanía en xeral, unha oportunidade para todas aquelas persoas que queiran coñecer a oferta cultural do país en todos os ámbitos e o mellor espazo de encontro e interrelación para todos/as os/as profesionais relacionados coa cultura en Galicia. Despois dunha primeira edición que tivo lugar en Pontevedra en maio de 2007, promovida pola AGE, esta segunda edición pretende consolidar a feira, aumentar a participación de todos os ámbitos culturais do país, incrementar a presenza de público profesional e xeral e, polo tanto, darlles unha maior proxección, visibilidade e difusión ás industrias culturais galegas.

[Cultur.gal 08]

[Descargar dossier do Cultur.gal 08]

[Ver programa de actos na Axenda]

Componse, ademais dos fondos galegos e casteláns, da maior biblioteca particular galega de literatura, poesía, ensaio e teatro portugués e brasileño

A familia de Jenaro Marinhas del Valle doa a súa biblioteca privada á Biblioteca Nacional de Galicia

(02-Decembro-2008)

Nun acto público celebrado onte, a familia González Marinhas fixo entrega en doazón á Biblioteca Nacional de Galicia, da colección bibliográfica privada de Jenaro Marinhas del Valle. Esta doazón celébrase coincidindo coa conmemoración do centenario do nacemento do escritor coruñés.

Esta colección ocupará un lugar destacado na Galería de Bibliotecas de Especial Interese que a Biblioteca Nacional de Galicia ten reservado para os fondos de creadores e de persoas que, coma Jenaro Marinhas del Valle, dedicaron a súa vida a unha labor de creación intensa, de dignificación e de compromiso profundo co seu país e coa súa cultura. Como parte do labor da Biblioteca Nacional de preservación e conservación do patrimonio bibliográfico relacionado con Galicia, a Consellería de Cultura e Deportes está a impulsar acordos con bibliotecas de especial relevancia, tanto de particulares como de institucións, para o depósito, cesión e doazón de obras de grande valor.

Os fondos da biblioteca persoal de Jenaro Marinhas del Valle componse de máis de 2.000 obras impresas, especializada en literatura, poesía, filosofía, filoloxía, historia, ensaio e teatro, a parte de coleccións de revistas e xornais galegos, moitos deles de grande antigüidade. Os títulos en galego e español son uns 1.200. O avó e tataravó de Jenaro Marinhas del Valle inician a colección con obras editadas nos séculos XVII e XVIII, ou comezos do XIX (como, por exemplo, Os sepulcros de Harvey, de 1830).

En español, sobresaen edicións moi antigas de Valle Inclán, Azorín, Unamuno pero tamén de Kant, Leibnitz (en edición de 1877), Freud ou Oscar Wilde. Destacan ademais obras teatrais de autores europeos -Ionesco, Pirandello ou Artaud, por exemplo-, e pezas do existencialismo como as edición antigas de obras de Camus ou Sartre. Os títulos en galego son moitos, de todos os autores e épocas, e algúns dedicados a el ou ao seu pai. Inclúe tamén edicións moi valiosas, como, por exemplo, a edición facsímil das Cantigas de Santa María (códice de San Lourenzo do Escorial), así como dicionarios e coleccións de arte e historia.

Tamén é de subliñar unha interesantísima sección dedicada a Portugal e Brasil con perto de 1.000 obras, que lle confire un valor especial. Seguramente esta sexa a máis completa das bibliotecas particulares galegas sobre literatura, ensaio, poesía e teatro portugués e brasiliano. Abrangue dende os clásicos -como Gil Vicente, por exemplo- até fins do século XX: Eça de Queiroz, Antero de Quental, Camôes, Pessoa, Brandâo, Almeida Garret, Castelo Branco, ou Lobo Antunes, entre outros.

Esta colección, depositada na Biblioteca Nacional de Galicia, será unha homenaxe permanente á súa figura, e á súa persoa, que asegurará a salvagarda do seu legado bibliográfico e cultural, e permitirá a lectores, a estudosos e a investigadores, ademais de consultar obras difíciles de atopar fora desta colección, estudar e coñecer mellor a súa vida e obra.

Unha ducia de escritores miran cara o Atlántico como inspiración

Vieiros publica na súa web No lombo do Atlántico, un conxunto de relatos onde auga e sal mudan en palabra

(02-Decembro-2008)

Ao longo do pasado verán, o xornal dixital Vieiros foi publicando na súa web, da man de escritores e escritoras de recoñecido prestixio, unha serie de relatos tendo ao Atlántico, nas súas máis diversas localizacións, o seu punto de partida e de inspiración.

Polas súas páxinas pasaron, entre marea e marea: Suso de Toro, Alexandre Nerium, Luisa Castro, Marta Dacosta, Xosé Neira Vilas, Xurxo Souto, Pilar Beiro, Rexina Vega, Xabier Paz, Francisco Fernández Naval, Xosé Vázquez Pintor e Agustín Fernández Paz, que reflectiron nos seus escritos a pegada do azul e o salitre do océano.

Agora, coa colaboración da Consellería de Pesca e Asuntos Marítimos da Xunta de Galicia, todos eses relatos quedan recompilados no libro No lombo do Atlántico: Relatos de auga e sal, dispoñible para os lectores desde a páxina web de Vieiros e descargable en formato pdf.

[Descargar No lombo do Atlántico: Realtos de auga e sal]

Lareira Literaria

Xavier Manteiga, Marina Mayoral, Emilio Xosé Ínsua e Alberte Pagán na Lareira Literaria de decembro

(02-Decembro-2008)

Na Lareira Literaria deste mes contamos coa presenza de Xavier Manteiga, Marina Mayoral, Emilio Xosé Ínsua e Alberte Pagán.

O guionista e escritor Xavier Manteiga, tras quedar finalista do Manuel García Barros de Novela con O soño de Caín, está á espera da publicación desa novela. Mentres, prepara un libro de aforismos, un cardume de breves reflexións vitais para sobrevivir en tempos ruidosos.

Pola súa banda, a monfortina Marina Mayoral xa ten rematada unha novela que verá á luz esta primavera. En Quen matou a Inmaculada de Silva Marina Mayoral retoma un episodio que xa aparecera anteriormente: a morte do fuxido Antón do Cañote e da "señorita " Inmaculada de Silva no patio da casa patrucial dos Silva, en Brétema. Ao mesmo tempo cóntase nela como Etelvina de Silva descubre na súa adolescencia a súa vocación de novelista e vive o primeiro amor. Tamén está traballando nun novo libro, pero para ese teremos que agardar un pouquiño máis...

Emilio Xose Ínsua posiblemente é o máis profundo coñecedor e investigador da obra de Antón Villar Ponte, tal e como queda reflectido na súa obra ensaística. Sen esquecer a súa obra poética, para o vindeiro ano o Seminario de Estudos Terra de Viveiro publicará o que será o seu terceiro traballo poético. En Cancións no cuadraxésimo latexo Ínsua reúne poemas elexíacos, sociais, existenciais e intimistas. Antes veremos publicado Antón Villar Ponte e a Galiza de alén mar, onde Emilio Xosé Ínsua profundiza na relación do fundador das Irmandades da Fala co mundo da emigración galega.

Tras publicar o pasado ano A mirada impasible. As películas de Andy Warhol en Positivas. Alberte Pagán prepara unha segunda parte onde o cineasta carballiñés analiza a segunda tendencia no cine de Warhol, onde a cámara perde a inmobilidade e se converte en protagonista dos filmes.

[Lareira Literaria]