Biblos publicará Santa Matriusca coincidindo coas Letras Galegas

Aberto o espazo web da segunda novela de Iria López Teijeiro, Santa Matriusca.

(26-Decembro-2007)

Despois de gañar o I Premio Biblos-Pazos de Galicia con Meniña de cristal, e as súas traduccións ao castelán e portugués, Iria López Teijeiro prepara a publicación da que será a súa segunda novela Santa Matriusca, que Biblos lanzará coincidiendo coas Letras Galegas 2008.

Como adianto á publicación de Santa Matriusca está disponíbel o espazo web da novela. Un completo blog con información do libro, da autora, un adianto do primeiro capítulo e o trailer da novela.

 [Máis información] 

A campaña iniciarase antes da conmemoración do 23 de abril de 2008, Día Internacional do Libro

Cultura lanzará unha nova campaña de promoción do libro e da lectura cun investimento de 1.300.000 euros

(21-Decembro-2007)

A Consellería de Cultura e Deporte lanzará nos próximos meses unha nova campaña de promoción do libro e a lectura. Esta proposta ten por obxectivo integrar a lectura entre os hábitos da poboación galega, favorecer o mercado do libro e promover a utilización das bibliotecas públicas e contará cun investimento de 1.300.000 euros.

Trátase dunha campaña dinámica baseada en accións participativas, que buscará a máxima efectividade e desenvolverase tendo en conta os cambios de hábitos nos lectores que se producen ao longo do ano. Estas medidas irán encamiñadas a promover os hábitos lectores, a consolidar o libro galego e potenciar o acceso ás bibliotecas.

Esta iniciativa da Dirección Xeral de Creación e Difusión Cultural encádrase dentro do Plan da Lectura, que presentou Ánxela Bugallo no Parlamento en outubro. O plan ordena por primeira vez de forma integral todos os esforzos que se realizan para incrementar o hábito da lectura e fortalecer todos os actores do sector, desde libreiros a bibliotecas ou editores, para o que se prevé un investimento total de 50 millóns de euros até o ano 2011.

O Plan da Lectura é unha obriga que se deriva da Lei do Libro e da Lectura, que entrou en vigor a finais de xaneiro, para ordenar este sector de grande importancia cultural e económica. Para elaborar o Plan, a Consellaría de Cultura mantivo un diálogo continuo con todas as partes implicadas. Un dos aspectos máis importantes que engloba o Plan é mellorar a imaxe social do libro e da lectura, liña na que se enmarca a nova campaña de comunicación.

 [Máis información] 

O ensaio aborda o tema da paisaxe e a súa estreita relación coa cuestión identitaria

María López Sánchez gaña o Premio de ensaio Ramón Piñeiro coa obra Paisaxe e Nación: A creación discursiva do territorio

(20-Decembro-2007)

A obra Paisaxe e Nación: A creación discursiva do territorio, da que é autora María López Sández, resultou gañadora do Premio Ramón Piñeiro de Ensaio 2007, que organizan conxuntamente a Secretaría Xeral de Política Lingüística da Xunta de Galicia e Editorial Galaxia coa colaboración de Unión Fenosa. A xuntanza do xurado realizouse hoxe, día 20 de decembro, ás 11 horas no Centro Ramón Piñeiro, en Santiago de Compostela.

María López Sánchez, doutora en Teoría da Literatura e Literatura Comparada pola Universidade de Santiago de Compostela, fai unha proposta de análise que parte do imaxinario social do nacionalismo para se achegar á paisaxe como espazo, como ideoloxía e como fundamento da identidade nacional. A paisaxe na pintura, a dimensión espacial e xeográfica dos fenómenos literarios e a xerarquización do territorio analizada a través dos mapas leva á autora a realizar un exhaustivo balance das diferentes concepcións da idea de paisaxe para concluír na noción do espazo como creación.

O xurado, que concedeu o premio por maioría, estivo formado por Luís Alonso Girgado, Alexandre García-Caballero, Manuel González González, Dolores Vilavedra Fernández e Carlos Lema, e salientou a calidade dos oito orixinais presentados, así como a variedade de temas abordados neles. A obra gañadora será publicada pola Editorial Galaxia o vindeiro ano.

Moncho Iglesias escribe desde Belén un poemario onde poemas e fotografías se explican mútuamente

Daniel Salgado traduce por vez primeira ó galego a Allen Ginsberg, bardo da xeración Beat

(19-Decembro-2007)

A editorial compostelá Edicións Positivas anuncia as súas novidades editoriais para esta parte final do ano.

Ouveo e outros poemas é a primeira obra de Allen Ginsberg traducida (por Daniel Salgado) ó galego, ademáis de ser a obra máis importante do poeta da xeración Beat. Compañeiro de Kerouac, de Burroughs e Gregory Corso, Ouveo foi considerada peligrosa polo FBI por se considerar unha grande ameaza para a seguridade nacional.

Oda ás nais perennes con fillos caducos entre os brazos é o primeiro libro de poemas en galego de Moncho Iglesias. Escrito en Belén, cidade onde reside, é quen de escribir con humor no medio de tanta violencia, con alegría entre a morte constante, con optimismo alá onde non se ve o futuro, con amor á xente no medio de tanto desprezo.

No último número da revista ANIMAL a Plataforma SOS COUREL elabora un programa para sobrevivir, con imaxes de Xan G. Muras, unha por cada mes, a modo de calendario.

Estarán presentes os poemas de Miguel González Garcés, Manuel María ou Luísa Villalta entre outros

Espectáculo poético-musical do grupo Ouriol na Biblioteca "Miguel González Garcés" da Coruña

(17-Decembro-2007)

O grupo Ouriol levará á Biblioteca Pública da Coruña “O Sexto Sentido”,un espectáculo que conxuga poesía e música nun diálogo suxestivo que procura a comunicación de sensacións, emocións e sentimentos. O recital, que ten como fío conductor a propia experiencia poética, traslada ao noso idioma versos de autores estranxeiros, tales como Blake, Michaux, Kavafis, Wallace Stevens, Sylvia Plath, Pizarnik, Cirlot, Gamoneda ou Celan; asemade, estará presente a poesía de poetas galegos como Miguel González Garcés, Manuel María ou Luísa Villalta.

O grupo Ouriol está formado polos músicos Fito Ares -instrumentos de vento- e Bernardo Martínez –percusión e clarinete-; a voz recitadora é a da poeta Eva Veiga.

O espectáculo , que se inclúe no programa de actividades de animación á lectura que vén desenvolvendo a Biblioteca “Miguel González Garcés”, terá lugar o mércores 19 de decembro ás 20.30 h. no salón de actos e a entrada é libre e totalmente de balde.

O Salón de Plenos do Pazo de San Marcos acollerá a entrega do premio ante máis de 100 persoas

O académico da Lingua Galega Francisco Javier Río Barja premiado co Otero Pedrayo 2007

(16-Decembro-2007)

O humanista e xeógrafo lugués Francisco Javier Río Barja recibirá o premio literario "Otero Pedrayo" 2007 que este ano convoca a Deputación de Lugo. Con este premio preténdese resaltar a figura e obra deste literato contribuíndo ó mesmo tempo á exaltación da cultura galega promocionando os seus valores e ós escritores que traballan pola defensa da nosa cultura.

O xurado destacou o traballo deste académico da Lingua Galega e da Academia das Ciencias como continuador do gran Otero Pedrayo. A entrega do premio realizarase o día 20 de decembro ás 20:00 horas no Salón de Plenos do Pazo de San Marcos. Ó acto están conviados máis de 100 persoas entre as que se atopan o Presidente da Xunta de Galicia, Emilio Pérez Touriño, a Presidenta do Parlamento de Galicia, María Dolores Villariño, a Conselleira de Cultura, Ánxela Bugallo, o Conselleiro de Traballo, Ricardo Varela, membros da Corporación Provincial, o Alcalde de Lugo, José López Orozco, ademais doutras personalidades políticas, das artes, das letras e das ciencias de Galicia.

Discípulo e compañeiro de Otero Pedrayo, Francisco Javier Río Barja é continuador da teoría xeográfica humanista do escritor ourensán. Naceu en Lugo en 1919 e vive en Santiago de Compostela. É catedrático de Xeografía pola Universidade de Compostela. Ten estudos de Dereito, Filosofía e Letras e Xeografía e Historia. Membro da Real Academia Galega, do Consello da Cultura Galega, da Academia de Ciencias de Galicia e do Instituto Galaico-Miñoto, foi director do Instituto de Estudos Galegos “Padre Sarmiento” durante os anos 1978 e 1994.

Entre os numerosos premios e distincións que ostenta destacan os Premios Galicia de Investigación, das Artes e das Letras e Castelao da Xunta de Galicia; Trasalba da Fundación Otero Pedrayo; Ramón Mourente de Periodismo, Premio do Ministerio de Información e Turismo; Premio Valle Inclán e Alfredo Brañas do Centro Galego de Bos Aires. Francisco Javier Río Barja tamén foi galardoado con un estudo sobre a Terra Chá pola Deputación de Lugo.

Da súa extensa bibliografía destacan tamén documentais sobre rexións naturais galegas realizados en colaboración con Consello da Cultura Galega e emitidos pola Televisión de Galicia. Coordinador de 5 tomos sobre “Geografía de Galicia” (Proxecto de Galicia) é tamén autor doutras publicacións como: “Bibliografía económica de Galicia” (1960); “Didáctica da xeografía” (1981); “Cartografía xurisdicional de Galicia no século XVIII” (1989); “Os ríos galegos. Estudio de morfología e réxime” (1992); “Galicia, esa descoñecida” (2001).

 [Máis información] 

Made in Galiza, O único que queda é o amor, Xavier Senín, Guía dos mamíferos de Galicia, o Salón do Libro de Pontevedra e Anxos Sumai inscriben os seus nomes na literatura galega

Os Editores Galegos elixen ós mellores do 2007

(16-Decembro-2007)

Os Editores Galegos elixieron o venres pola noite no Aquarium Finisterrae da Coruña ós mellores libros editados entre o 1 de decembro do 2006 e o 30 de novembro do 2007 nunha velada na que estiveron presentas as conselleiras de Educación, Laura Sánchez Piñón, e a conselleira de Cultura, Ánxela Bugallo, ademáis do presidente da Deputación de Pontevedra, Salvador Fernández.

Premiados:

- Premio Ánxel Casal ao libro do ano: Made in Galiza (Galaxia) de Sechu Sende.

- Premio Xosé Neira Vilas ao Libro infantil e xuvenil do ano: O único que queda é o amor (Xerais) de Agustín Fernández Paz.

- Premio Lois Tobío ao Libro traducido do 2007. A odisea (Rodeira) de Homero. Traducida por Xavier Senín.

- Premio Isaac Díaz Pardo ao Libro ilustrado do 2007. Guía dos mamíferos de Galicia (Baía) ilustrado por Calros Silvar.

- Premio Francisco Fernández del Riego á colaboración no labor editorial do ano. Salón do Libro Infantil e Xuvenil de Pontevedra.

- Premio Xosé María Álvarez Blázquez ao autor ou autora do ano. Anxos Sumai.

Ademáis homenaxeouse no apartado da Edición Histórica os editores de A Nosa Terra, La Voz de Galicia e Alvarellos Editora.

Confirmouse que a celebración da IV Noite da Edición 2008 celebrarase en Vigo.

III Implícate! Noite de Música e palabra solidaria

A cultura e a solidaridade daranse a mán este domingo no Teatro Principal de Santiago de Compostela

(13-Decembro-2007)

A ONG Implicadas no Desenvolvemento organizan para o vindeiro domingo 16 de decembro o III IMPLÍCATE! NOITE DE MÚSICA E PALABRA SOLIDARIA cuxo obxectivo é facer un chamamento á solidariedade das galegas e galegos, unindo nesa noite a cultura galega e a solidariedade galega. O propósito principal deste evento é dar a coñecer o traballo desta organización de cooperación ao desenvolvemento galega, invitar ao público a ver o mundo con outros ollos, a reflexionar, e a cambiar o mundo, dende Galicia, dende a conciencia crítica e a acción clara. Igualmente, os cartos recadados con esta iniciativa destinaranse integramente a financiar proxectos de cooperación para o desenvolvemento de Implicadas.

Nesta noite daranse cita un cartel de artistas galegas/os que, de xeito altruísta, colaboran no evento a prol da sensibilización cidadá e da cooperación, figuran Nova Galega de Danza ou María Reimóndez no apartado de danza; Iria Piñeiro e Paula Carballeira en teatro; os grupos Loretta Martin ou Espido en música; poetas como María Lado, Antón Lopo, Estíbaliz Espinosa e Miguel Anxo Fernán Vello; e as comunicadoras Isabel Blanco e Yolanda Castaño que presentarán e conducirán o evento.

A cita é este domingo 16, a partir das 20.30 h., no Teatro Principal de Santiago de Compostela. O prezo é de 10 € entrada xeral e 6 € para estudantado. Dadas as características do local no que se celebrará o evento, o Implícate terá un aforo máis limitado que en anos anteriores, polo que desde a organización recomendan mercar as entradas con suficiente antelación, ditas entradas pódense mercar a través do servizo de vendas de Caixa Galicia (a través da web e do teléfono 902 434443), no propio Teatro Principal, ou no local de Implicadas en Vigo (Camelias, 49 - escaleira).

Na cinza sempre hai esperanza doutro lume

Carlos Penela Martín gaña o VI Premio de Poesía Caixanova coa obra Sombras, Rosas, Sombras

(12-Decembro-2007)

O xurado do VI Premio de Poesía Caixanova decidiu onte outorgarlle o galardón a Carlos Penela Martín pola obra Sombras, rosas, sombras. O certame, dotado con 12.000 euros, é un dos de maior dotación do panorama literario galego e un dos mellores que se realizan nas diferentes linguas do Estado. Na edición deste ano presentáronse un total de 78 traballos.

O xurado, que estivo composto por Luís González Tosar, escritor e presidente do PEN Clube de Galicia; Marilar Aleixandre, gañadora do V Premio de Poesía Caixanova con Mudanzas; Dolores Sánchez Palomino, profesora da Universidade da Coruña; Bieito Arias Freixedo, profesor da Universidade de Vigo, e Xosé Manuel Salgado Rodríguez, profesor na Universidade de Santiago, decidiu por unanimidade entregarlle o galardón ao texto presentado por Carlos Penela, de 32 anos e residente en Viena, pola súa "solidez poética" tanto no aspecto formal coma no desenvolvemento dunha linguaxe innovadora e o mantemento dunha permanente tensión estética. Luís González Tosar, como portavoz do xurado, explicou que a obra resulta sorprendente xa que nos atopamos ante un autor novo que presenta un "libro de madurez, de remate dun ciclo, e non de comezar unha andadura".

Sombras, rosas, sombras é un volume estruturado en varias partes moi ben enlazadas, que fala da procura da identidade colectiva e individual, situando ao ser humano diante do espello para cuestionar esa identidade. Bieito Arias Freixedo, membro do xurado, salientou a tensión permanente entre o lume e a sombra. Ademais, indicou que a filosofía do libro pode resumirse na frase: "na cinza sempre hai a esperanza doutro lume".

A obra gañadora será publicada na colección de poesía que edita Caixanova en colaboración co PEN Clube de Galicia, baixo o título xenérico de Arte de Trobar. Desta mesma colección presentouse tamén onte o último volume, Astro interior, unha antoloxía poética de Miguel Anxo Fernán Vello, que inclúe unha escolma de poemas escritos polo autor entre 1984 e 2007.

 [Máis información] 

Manuel Ferreiro impartirá unha charla sobre o Himno Galego no día central dos actos

100 anos do himno galego en Ponteceso

(12-Decembro-2007)

Ponteceso, local natal do bardo Eduardo Pondal, autor da letra do himno galego, acollerá do 18 ao 20 de decembro a celebración dos 100 anos do Himno Galego, que terán lugar na Casa dos Veciños de O Couto.

Abriránse as xornadas o martes 18 de decembro coa charla Nós temos letra. Proposta didáctica para o profesorado ó redor do himno de 18 h. a 19.30 h. Haberá un recital poético pondaliano de 19.45 h. a 21.00 h. a cargo de Miro Villar, Alexandre Nerium e, aínda por confirmar, Manuel Rivas.

O mércores 19, de 18 h. a 19.30 h. Xosé Neira Vilas disertará sobre A estrea do Himnno galego en América no ano 1907. De 19.45 h. a 21.00 h. a Coral Polifónica da Estrada interpretará o Concerto coral do Himno galego. Letra de Xosé María Lema Suárez e música do seu director Javier Comesaña.

Por último, o xoves 20, día do centenario, de 18.00 h. a 19.30 h. será a charla Unha visión do Himno galego desde o 2007 a cargo de Manuel Ferreiro Fernández, autor de De Breogán aos Pinos. O texto do himno galego (Laiovento), o maior estudoso da obra de Pondal, para proceder logo co Concerto do Himno galego a cargo da Banda de Música Eduardo Pondal de Ponteceso.

A exposición “Nazón de Breogán” da Consellería de Vicepresidencia e Benestar estará aberta durante os tres días.

As xornadas están especialmente dirixidas para profesores o público xeral pode tomar parte, sempre tendo en conta os límites do aforo.

Para o vindeiro ano o canon será aboado polas tres administracións

O Ministerio de Cultura asumirá o canon bibliotecario correspondente a 2007

(11-Decembro-2007)

O ministro de Cultura, o coruñés César Antonio Molina anunciou onte, en rolda de prensa en Santiago de Compostela, que o seu ministerio asumirá por completo o pago do canon bibliotecario correspondente ó ano 2007, para deste xeito cumprir a normativa europea, xa que o Tribunal de Xustiza da Unión Europea condenou ó estado español a obrigar que se abone este canon.

Para o vindeiro ano, o ministro informou que o Estado asumirá un tercio dos custos, mentres que a administración autonómica e a local pagarán unha pequena parte cada unha delas.

Para rematar engadiu que no caso de non pagar, a multa procedente da Unión Europea ascendería a 10 millóns de euros, unha cantidade superior ó pago do canon.

Ámbolos dous libros competirán cos mellores do mundo en maio do 2008

Dous libros galegos premiados nos Premios Gourmand 2007

(10-Decembro-2007)

Os libros Vacas, a súa dignificación sexual e gastronómica (Everest Galicia), de Flavio Morganti, chef do restaurante Galileo en Pereiro de Aguiar (Ourense) e O viño, a viña e a bodega na sabedoría popular (Ir Indo Edicións), de Edelmiro L. Mateo García, membro dunha coñecidísima familia bodegueira de Verín, resultaron gañadores dos Premios Gourmand 2007, que recoñecen ós mellores libros de viño e cociña do mundo.

A obra Vacas, a súa dignificación sexual e gastronómica resultou gañadora nas categorías "Mellor libro de Cociña en España", "Mellor monográfico culinario en galego", "Mellor cuberta dun libro de cociña en galego" e "Mellor fotografía dun libro de cociña en galego". Pola súa banda, o libro O viño, a viña e a bodega na sabedoría popular foi recoñecido na categoría "Mellor libro de Historia do viño en galego".

O ano pasado, o libro 45 recetas con ortigas (Alvarellos) de Martín Álvarez foi premiado co Premio Gourmand Medalla de Honra ao mellor monográfico do mundo 2006.

 [Máis información] 

A Nosa Terra, La Voz de Galicia e Alvarellos Editora serán homenaxeados no apartado da Edición Histórica

Xa se coñecen os nomes dos finalistas dos III Premios da Edición de Galicia

(09-Decembro-2007)

Onte déronse a coñecer os finalistas da III Noite da Edición que se celebrará o 14 de decembro no Aquarium Finisterrae da Coruña. Os premios, organizados pola Asociación Galega de Editores pretende recoñecer aos autores e entidades que traballan a prol do libro en Galicia.

- Premio Ánxel Casal ao libro do ano: De provincia a nación. Historia do galeguismo político (Xerais) de Xusto Beramendi; Made in Galiza (Galaxia) de Sechu Sende; Para que serve a Historia de Galicia (Lóstrego) de José Carlos Bermejo.

- Premio Xosé Neira Vilas ao Libro infantil e xuvenil do ano: Minimaladas (Xerais) de Carlos López; O único que queda é o amor (Xerais) de Agustín Fernández Paz; Xela volveuse vampira (Baía) de Fina Casalderrey.

- Premio Lois Tobío ao Libro traducido do 2007. A odisea (Rodeira) de Homero; Cuspirei sobre as vosas tumbas (Faktoria K) de Boris Vian; O señor Ibrahim e as flores do Corán (Faktoría K) de Éric-Emmanuel Schmitt ; Só silencio me responde (Rinoceronte) de Anna Akhmátova.

- Premio Isaac Díaz Pardo ao Libro ilustrado do 2007. Guía dos mamíferos de Galicia (Baía) ilustrado por Calros Silvar; Minimaladas (Xerais) ilustrado por David Pintor; Titiritesa (OQO Editora), ilustrado por Mauricio A. C. Quarello.

- Premio Francisco Fernández del Riego á colaboración no labor editorial do ano. As quimbambas da Radio Galega, Protexta de Tempos Novos, Salón do Libro Infantil e Xuvenil de Pontevedra e Sección de Cultura do xornal Galicia Hoxe.

- Premio Xosé María Álvarez Blanco ao autor ou autora do ano. Agustín Fernández Paz, Anxos Sumai, Pepe Carreiro e Suso de Toro.

Tamén honrarase ao autor/a do ano e á colaboración no labor editorial do ano. Ademáis, nesta III Noite da Edición serán homenaxeados no apartado da Edición Histórica os editores de A Nosa Terra, La Voz de Galicia e Alvarellos Editora. Asemade entregaranse no transcurso da cea os premios creados pola AGE para recoñecer a excelencia do traballo dos compañeiros editores e dos integrantes doutros colectivos que se distinguiron ó longo do ano 2007 polo seu labor a favor do libro ou a lectura.

Paralelamente está previsto que a Cea da Edición de Galicia sexa precedida dunha semana adicada á edición e ós libros seleccionados polos editores como os mellores do ano 2007. Con tal fin as librarías Sisargas, Cruceiro, Novo Colón, Xiada, Nós, Lume, Didacta e Cidade Escolar adicarán nos seus escaparates e instalacións da Coruña unha especial atención ós libros finalistas dos premios a través de carteis anunciadores e expositores preparados con esta finalidade.

 [Máis información]

O neno do pixama de raias leva varios meses nas listas de libros máis vendidos de todo o mundo

Faktoría K presenta dous supervendas

(07-Decembro-2007)

Coincidindo co estreo cinematográfico d'A brúxula dourada, Faktoria K vén de publicar a versión galega da novela na que está baseada, A aurora boreal, do escritor británico Philip Pullman, traducida por Fernando Moreiras. Ademais, a editorial viguesa segue contribuindo á normalización da lingua coa tradución d'O neno do pixama a raias, o gran éxito literario do irlandés John Boyne, con Daniel Saavedra como tradutor.

A aurora boreal, galardoada en 1995 coa Medalla Carnegie á mellor obra xuvenil, é a primeira parte da triloxía titulada ‘A materia escura’. Esta novela fantástica ambientada na época victoriana contén todos os ingredientes para atraer o interese de rapaces e adultos: estranas desaparicións, segredos, misións arriscadas, mundos paralelos e obxectos máxicos. Aborda temas como a rebeldía fronte ás convencións morais da época, a loita do ben contra o mal e o afán por adquirir coñecemento.

O neno do pixama de raias, traducida a máis de dous decenas de linguas, contará en breve coa adaptación cinematográfica. O neno do pixama de raias trata un tema tan trascendente e doroso na nosa historia recente como o holocausto a través da perspectiva de Bruno, un rapaz de nove anos.

Urco Editora estréase con O corvo, de Edgar Allan Poe

Fantasía, ciencia ficción e terror en galego

(06-Decembro-2007)

O 20 de decembro presentarase en sociedade Urco Editora, unha nova editorial radicada en Santiago de Compostela que acepta o compromiso de acercar a literatura de fantasía, ciencia ficción e terror ao galego.

O primeiro título que porán á venda será un clásico, O corvo de Edgar Allan Poe, nunha edición bilingüe e ilustrada. Próximamente, Lovecraft, Washington Irving, H.G. Wells ou Robert E. Howard entre outros irán enchendo as tres coleccións que conformarán o catálogo de Urco: Urco Gótica, dedicada aos grandes mestres da literatura de terror-gótico dos séculos XIX e XX; Urco Ciencia-Ficción e Urco Fantasía.

Urco propón unha interesante iniciativa as persoas interesadas en subscribirse nesta nova iniciativa, un 10% de desconto en todos os libros que publiquen (anuncian un título ao mes) sen custos de envío a casa.

Os asistentes á presentación do día 20 (na Fundación Caixa Galicia de Santiago de Compostela, ás 20.00 h.) que desexen subscribirse recibirán como agasallo de benvida o primiero título da editorial, O corvo.

 [www.urcoeditora.com]

O escritor Jaureguizar propuso a candidatura para Manuel Rivas

Méndez Ferrín, único candidato ao Nóbel

(05-Decembro-2007)

Luis González Tosar, presidente do PEN Clube de Galicia anunciou onte, durante a homenaxe en Ourense a Eduardo Blanco-Amor, que o PEN Clube propondrá á Academia Sueca a selección de Xosé Luís Méndez Ferrín como candidato ao Nóbel das letras. Luis González Tosar indicou que é o PEN Clube de Galicia, ao igual que os outros 138 centros do PEN Clube internacional, o único que elixe ó representante das letras galegas na candidatura aos Nóbel. O escritor e xornalista Santiago Jaureguizar propuso desde o seu blog Cabaret Voltaire a oportunidade para Manuel Rivas.

O autor de Crónica de Nós leva optando ó galardón desde o ano 1998. No caso de conseguilo, sería o primeiro escritor en lingua minoritaria desde que en 1904 (na carta edición dos Nóbel de Literatura), o escritor occitano Frederic Mistral acadou o galardón exaequo con José de Echegaray.

Doce meses despois, que sabemos?

Ano María Mariño: Un balance

(04-Decembro-2007)

Para que serviu o ano de María Mariño? Remocicaron as Letras nas sombras do Courel e da autoría? Que fica tras os pasos á procura do mundo dos furados? É Noia distinta? Crebar a lingua, tensar o idioma, abríronse os portóns? Que vento escoitamos agora na fosa de altura? Cóase Palabra no tempo e Verba que comenza polas fendas do canon? Independizouse María Mariño dos adxectivos? Lémola? Lerémola outra? Doce meses despois, que sabemos?, que queremos saber?.

O Consello da Cultura Galega, a través da Comisión de Igualdade organiza un encontro de debate o día 12 de decembro sobre a autora homenaxeada este ano polas Letras Galegas. A xornada comezará cunha mesa redonda moderada por Rosario Álvarez onde intervirán Helena González, Esperanza Mariño, Carmen Blanco e Pilar García Negro. A continuación, Yolanda Castaño, Lupe Gómez, María Lado e María do Cebreiro participan nun recital titulado María Mariño na voz das poetas dos noventa.

Estas actividades desenvolveranse no Consello da Cultura Galega ás 16.30 h.

 [Máis información]

Galaxia presentará dous novos libros co seu traballo xornalístico

Un Simposio analizará a figura de Carlos Casares

(03-Decembro-2007)

A Fundación Carlos Casares, a Cátedra Carlos Casares da Universidade de Vigo e o Liceo de Ourense, organizan para os días 13, 14 e 15 de decembro o Simposio Internacional Carlos Casares.

No Simposio trataranse as diversas facetas do escritor ourensán. Así, os seus libros serán analizados por especialistas, afondarase na súa relación coa literatura infantil e xuvenil e coa xeración Nós.

Estas conferencias se desenvolverán no Liceo de Ourense e nas dependencias da Universidade de Vigo en Ourense. Está confirmada a participación de Xosé A. Neira Cruz, Víctor F. Freixanes, Dolores Vilavedra ou Luis González Tosar, entre outros especialistas na vida e na obra de Casares. Ase mesmo, Marcos Valcárcel guiará aos asistentes nun roteiro literario polo Ourense de Casares.

O xoves 13, Galaxia presentará dous novos libros coa obra xornalística de quen foi director da mítica editoria. 

Durante o Simposio estará instaladas nas dependencias do Liceo de Ourense unha exposición sobre a vida e a obra de Carlos Casares.

 [Descargar programa]

 [Máis información]

O escritor e crítico cinematográfico Miguel Anxo Fernández é o coordinador deste volume

Presentado Rodado en Galicia, un libro que recolle 174 películas rodadas en Galicia

(03-Decembro-2007)

Hoxe presentouse en Galicia 'Rodado en Galicia', un libro histórico coordinado por Miguel Anxo Fernández que recolle un total de 174 rodaxes de ficción, en formato longametraxe filmadas na xeografía galega, integra ou parcialmente, entre o ano 1916, con Miss Ledya de José Gil, ata a actualidade, con Los Girasoles Ciegos, filme que José Luis Cuerda vén de rodar en Galicia.O secretario xeral de Comunicación, Fernando Salgado asegurou hoxe que este proxecto “único no Estado”, contribuirá a afianzar a nosa comunidade como plató de cine ao tempo que consegue a proxección internacional do sector cinematográfico galego.

'Rodado en Galicia' é unha iniciativa da Secretaría Xeral de Comunicación a través do Consorcio Audiovisual de Galicia dentro das actividades relacionadas coa Galicia Film Comission e do Foro Audiovisual Galego. É un volume gran formato de 625 páxinas sen precedentes no contexto cinematográfico español. Fernando Salgado destacou na súa intervención o feito de que este libro se atopa en permanente reciclaxe. Así, referiuse ás novidades e ampliación no contido, con respecto á edición anterior. Trátase, incidiu, “dunha obra nova, con continuidade, que medra por diante e por detrás”.

Pola súa banda, o coordinador do volume, Miguel Anxo Fernández, sinalou que se trata dunha iniciativa pioneira no Estado e que vén demostrar que “hai sensibilidade e posibilidade reais de entender o país como plató cinematográfico”. O investigador sinalou que foi a colaboración institucional a que fixo posible sacar adiante este traballo, no que participan, ademais da Secretaría Xeral de Comunicación da Xunta, o Consorcio Audiovisual de Galicia, o Foro Audiovisual de Galicia, a Fundación Caixa Galicia e a Filmoteca Nacional.

'Rodado en Galicia' inclúe de cada un dos filmes, e en función da información dispoñible, unha sinópse, unha ficha artística, unha ficha técnica e os lugares de rodaxe. Nas películas anteriores aos anos 40, das que non existen copias, o libro incorpora referencias de prensa, declaracións dos directores, reseñas bibliográficas, etc. O libro se acompaña dun dvd no que se inclúe a listaxe das películas coa ficha ténica, artística, a sinópse e os lugares de rodaxe das películas.

Marina Mayoral dirixirá o espazo web adicado á matriarca da literatura galega

Rosalía de Castro dispón dun espazo web na Biblioteca Virtual Cervantes

(01-Decembro-2007)

A Biblioteca Virtual Miguel de Cervantes adica unha nova sección á poeta galega Rosalía de Castro. Dirixirá o proxecto a escritora de Mondoñeda aínda que asentada en Madrid Marina Mayoral.

Na presentación da nova páxina, Mayoral define a incorporación de Rosalía de Castro ao fondo da Cervantes coma "un paso máis e moi importante para reparar a incomprensión sufrida pola escritora". A crítica de su tiempo condenou a Rosalía a unha inxusta indiferencia por non cumplir os canons establecidos en relación coa literatura femenina. De feito, o seu nome non apareceu nas antoloxías de escritoras editadas no XIX nin en Las cien mejores poesías de la lengua castellana seleccionadas por Menéndez y Pelayo.

Mayoral indica que, cos seus libros Cantares Gallegos e Follas novas, Rosalía de Castro "devolveu ao galego a categoría de lingua literaria que había perdido en séculos de silencio" e "converteuse na voz dun pobo que había perdido a súa voz". Mayoral tamén afirma que o libro de Rosalía En las orillas del Sar, é, xunto coas Rimas de Bécquer, a mejor obra do Romanticismo español.

A sección que inaugura a Cervantes contén, entre outros materiais, as obras completas da escritora, unha fonoteca na que se poden escoitar algúns dos seus versos máis destacados e unha amplia selección de estudos sobre a autora galega e o Romanticismo.

A Biblioteca Virtual Cervantes tamén ten unha web adicada á escritora galega Emilia Pardo Bazán.

 [Ver espazo web sobre Rosalía de Castro]

Os actos contarán cun reciatl poéticos e diversas actuacións musicais

Homenaxe a don Germán López Quiroga en Monforte de Lemos

(01-Decembro-2007)

A comarca da Ribeira Sacra homenaxeará o vindeiro 8 de decembro a don Germán López Quiroga, escritor, poeta e ferroviario de Escarión (O Saviñao). Membro da Asociación de poetas "Poetas del Sur de Lugo" cultiva as letras tanto en galego como en castelán e os seus artigos veron a luz nos xornais La Voz de Galicia, El Progreso e El Faro de Vigo.

Os actos de homenaxe que lle ten preparado comezarán ás 12.00 h. no Salón de Actos do Concello de Monforte de Lemos (Pza. de España) co recital de poesía "Poetas da Ribeira Sacra", a continuación actuará a Coral Polifónica do Concello de Monforte de Lemos. Ás 14.00 h. o grupo de gaitas do concello monfortino amenizará o xantar no restaurante Don Manuel, onde se fará unha entrega de agasallos coa música do grupo de folk "O Trícole".

Nestes actos intervirán Pepe Pol, Margarita Otero, Ana Arias Saavedra, Ana Mª Gamallo, Isabel Santiorxo (Sober),  Francisco J.R. Aldeguería, Pilar Cambón, Mar Sabater, Rosa García Machado (A Rúa), Alfonso Campos, Marcedes Moreno, Cristina Mejías, Alba Lara Mª Jesús, Enma Fernández (A Rúa) e Ramón Porto.

Os interesados en participar neste acto de homenaxe ten ata o día 5 de decembro para retiras as súas invitacións en Caixa Galicia (Cardenal), La Fraternal, Centro Recreativo do Saviñao e Restaurante Don Manuel.