|
Justo
González Beramendi dedicou máis de
25 anos en rematar esta monumental obra
Xerais
lanzará as librarías De provincia
a nación. Historia do galeguismo político.
Unha obra de máis de 1200 páxinas
onde se analiza a historia do galeguismo político
(30-Agosto-2007)
 Xerais
vai publicar na primeira semana de setembro a obra
de Justo González Beramendi De
Provincia a nación. Historia do galeguismo
político. Un
traballo de investigación ó que o
autor dedicou máis de 25 anos.
De
provincia a nación é unha investigación sistemática da natureza e evolución dos
movementos sociopolíticos de reivindicación de Galicia como suxeito político de
seu dende as súas primeiras manifestacións individuais no século XVIII até a
actualidade. Este libro é unha contribución decisiva para coñecer e entender, por que Galicia
ten hoxe unha personalidade política irreversiblemente
diferenciada.
Justo
González Beramendi (Madrid, 1941) é catedrático de Historia Contemporánea da USC. Foi
cofundador do Museo do Pobo Galego e actual presidente da súa Xunta
Reitora.
|
|
A
Concellería de Cultura de Carballo organiza
estes encontros entre público e autores en
diferentes pubs do concello
Séchu
Sende, Carlos G. Meixide e Manuel Rivas participarán
no vindeiro trimestre de Literactúa
(30-Agosto-2007)
 O
programa Literactúa, que organiza a Concellería
de Cultura, Ensino e Normalización Lingüística
de Carballo, e que propone un encontro entre lectores
e autores presentou a súa programación
para o terceiro trimestre, que se desenvolverá
os días 26 de setembro, 31 de outubro e o
28 de novembro.
O
26 de setembro Séchu Sande falará
cos lectores da súa última obra, o
libro de relatos Made in Galiza (Galaxia).
Séchu Sende foi premio Blanco Amor no 2003.
Será na Taberna-Café O'Patacón.
O
31 de outubro será Carlos G. Meixide quen
converse sobre o seu libro O home inédito
(Edicións da Rotonda), disponible en principio
únicamente en internet, aínda que
xa se pode obter en papel tra-la edición
de Rinoceronte Editora. No café Colón.
Para
rematar o ano literario Manuel Rivas e o seu múltipremiado
Os libros arden mal (Xerais) estarán
na Cervexaría Dublín.
|
|
O
xoves comeza o XXI Festival da Poesía no
Condado
Numerosas
actividades arredor da poesía danse cita
en Salvaterra do Miño
(29-Agosto-2007)
 A Sociedade
Cultural e Desportiva do Condado presenta a XXI
edición do Festival da Poesía do Condado,
que este ano estará adicado á recuperación
da memoria histórica e coma homenaxe ós
loitadores e loitadoras contra o fascismo.
O
festival, que se desenvolverá desde o xoves
30 de agosto ata o 1 de setembro na localidade pontevedresa
de Salvaterra de Miño, acollerá poetas
de diferentes nacionalidades, ademais de numerosas
actividades paralelas como exposicións de
pintura, proxección de audiovisuais, concertos,
video-poemas...
Marica
Campo, Ana Romaní, Daniel Salgado ou Jon
Benito serán algúns dos poetas que
estarán presentes en Salvaterra.
A
organización habilitou zona de acampada e
transporte de balde para os asistentes.
[Máis
información]
|
|
Xosé
Ramón Barreiro e Ramón Villares coordinarán
o proxecto
O
diario La Voz de Galicia pon na rúa a versión
máis completa e actualizada da Historia de
Galicia
(27-Agosto-2007)
 O
diario La Voz de Galicia porá a disposición
dos lectores o vindeiro 9 de setembro un coleccionable,
formado por 32 volumes, da historia de Galicia.
O planteamento da obra abrangue desde os primeiros
poboadores ata os nosos días, prestando unha
especial atención a relación entre
Galicia e América e á diáspora
galega.
A
obra estará coordinada polo presidente da
Real Academia Galega, Xosé Ramón Barreiro
Fernández e o presidente do Consello da Cultura
Galega, Ramón Villares, que ademais firman
diferentes volumes.
O
9 de setembro entregarase de forma gratuíta
o tomo XI, Historia política da Galicia Contemporánea.
De Isabel II á Restauración (1933-1874)
de Xosé Ramón Barreiro.
[Máis
información]
|
|
Canle
segredo e a narrativa completa de Xosé
María Álvarez Blázquez estarán
nos andeis os vindeiros meses
A
editorial Galaxia adiántase e prepara libros
sobre o homenaxeado das Letras Galegas 2008
(23-Agosto-2007)
 A figura de Xosé María Álvarez
Blázquez ofrece unha chea de posibilidades: poeta, narrador (os seus relatos
breves son tan pouco coñecidos como excelentes), mestre da lingua, investigador
do pasado literario, arqueólogo, etnógrafo, ensaísta, publicista, editor...
A
editorial Galaxia ven de anunciar unha de serie
de novidades arredor do homenaxeado nas Letras Galegas
2008. Así, Galaxia publicará nos próximos meses unha biografía e unha
antoloxía poética de Xosé María Álvarez Blázquez,
así como a súa obra máis significativa, Canle segredo, e varios
inéditos do autor, entre eles a súa narrativa galega completa.
 Xosé María Álvarez Cáccamo,
poeta tamén, fillo de Xosé María Álvarez Blázquez, está a preparar unha
Memoria do pai, e anotará a edición de Canle segredo, libro publicado en 1976 e
escrito vinte anos antes (recibira o Premio do Centro Galego de Buenos Aires en
1954). Fixará definitivamente o texto o tamén poeta Rodríguez
Baixeras.
Entre os inéditos ou textos pouco coñecidos, recuperarase os seus relatos breves, A pega rabilonga e outras
historias de tesouros, e unha colección curiosa de aforismos e xogos de
lingua que o poeta gardaba entre os seus papeis persoais: A significación dos
soños.
[Máis
información]
|
|
O
obxectivo é a declaración como Patrimonio
Cultural Europeo desde a desembocadura do Eume e
do Xuvia ata a do Eo
O
colectivo Ao carón da lareira recolle firmas
para a conservación do legado material e
inmaterial da Galicia do Norte
(23-Agosto-2007)
 A
nova iniciativa do colectivo Ao carón da
lareira, xunto a escritores e artistas que se sumaron
á iniciativa, é conseguir recolectar firmas suficientes para que a parte do norte de galicia
(a diócese de Mondoñedo e outros concellos colindantes) sexa declarada
Patrimonio Cultural Europeo.
Iso significaría que toda a cultura (tanto a material como a intanxible)
sería declarada patrimonio polo que gozaría de protección e axudas para o seu
desenvolvemento.
Desde o Colectivo declaran:
" Cremos que a zona do norte de Galicia é suficientemente rica en historia e en
cultura como para ser patrimonio.". "Temos todas as construccións relixiosas, as
contruccións celtas e as máis contemporaneas. Tamén temos un mundo rural moi
rico pero en decadencia, un conxunto de artistas moi diversos e comprometidos
coa cultura. E tantas outras cousas que poderíamos enumerar."
O
obxectivo é acadar máis de 3000 firmas
para conseguir que desde as Administracións
se dean os pasos necesarios para que o Patrimonio
Material e Inmateria da Galicia Norte, da que se
extende desde a desembocadura do Eume e do Xuvia
ata a do Eo (a súa literatura, a súa
paisaxe, as súas tradicións e os seus
monumentos se declaren Patrimonio Cultural Europeo.
[Blog
de Ao Carón da Lareira]
|
|
A
Feira Literaria estará amenizada con múltiples
actividades paralelas como concertos ou títeres
O
23 de agosto comezará unha nova edición
da Praza dos Libros en Carballo
(20-Agosto-2007)
 O Xardín Municipal encherase durante catro días, do 23 ao 26 de agosto, de
libros, de actividades lúdicas, participativas, divertidas e formativas para
nenas e nenos e para persoas adultas, de autoras e autores da comarca e do país,
de presentacións e sinaturas de libros, de recitais, de actuacións, de
representacións, etc. Unha nova edición da Praza dos Libros, a
feira literaria de Bergantiños. E todo isto convivirá o xoves 23 e o domingo 26
coa feira tradicional.
O
alcalde de Carballo, Evencio Ferrero; a concelleira de Cultura e Normalización
Lingüística, Belén Lendoiro; e o representante dos libreiros, Ramón Tasende,
presentaron en conferencia de prensa a semana pasada a Praza dos Libros 2007.
Na feira participarán diversas librarías (Brañas e Trasgo, de
Carballo; Couceiro e Orizales, da Coruña; e Roget, de Vimianzo), mais tamén
outras entidades e asociacións con diversos produtos culturais (A Xente das
Cores e Manis, con orixinais camisetas; Solidariedade Galega co Pobo Saharauí,
Concello de Carballo, etc.).
O programa inclúe múltiples presentacións de
libros, como Lingua, nación e identidade, de Xosé Ramón Freixeiro Mato;
As horas de María, de Paco Souto; Arte e parte, de Xurxo Borrazás;
Crónicas de Carballo, de Xan Fraga; Historia dunha lata e
Lume!, de Alberto Varela Ferreiro; Seavia é nome de parroquia, de
Xosé Antonio Andrade; e O bosque da Nadgor, de Farruco Graña. Tamén
haberá sinatura de libros por parte de Santiago Jaureguizar. A encargada do
pregón será Mercedes Queixas Zas, secretaria xeral da Asociación de
Escritores/as en Lingua Galega (AELG) e coordinadora dos equipos de
normalización lingüística (ENL) dos centros de ensino da provincia da Coruña.
Será o xoves 23 ás 13.00 h.
As casetas estarán abertas en horario de 11.00 h a 14.00 h e
de 17.30 h a 21.30 h.
[Máis
información]
|
|
A
AGAI reclama a devolución da Biblia Kennicott
A
biblia Kennicott foi publicada no século
XV na Coruña e é un dos máis
bellos manuscritos existentes
(09-Agosto-2007)
 A
AGAI (Asociación Galega de Amizade con Israel)
ven de lle solicitar ó goberno galego que
dea todos os pasos necesarios para a devolución
ó pobo galego da Biblia Kennicott, posiblemente
a máis exquisita biblia xudea, escrita e
ilustrada na cidade da Coruña no ano 1476,
só 16 anos antes da súa expulsión
da península.
A
biblia foi encargada por Salomón de Braga,
un xudeo coruñés ó calígrafo
Moises Ibn Zabarah. A biblia foi mercada en Inglaterra
por Benjamin Kennicott, hebreísta, bibliotecario
e párroco da Universidade de Oxford, e alí
é onde permanece,a día de hoxe, a
biblia xudea galega.
O
presidente da asociación, Pedro Gómez
Valadés, ven de reclamarlle á Xunta
que solicite á Universidade de Oxford á
devolución da Biblia: " O seu lugar
non é Oxford, o seu lugar é o Museo
do Pobo Galego"
[Blog
da A.G.A.I.]
|
|
Onte
presentouse a X Edición do Salón Internacional
do Cómic
A
edición deste ano prestará especial
atención á banda deseñada galega
e valenciana
(07-Agosto-2007)
 Miguelanxo
Prado, director de Viñetas desde o Atlántico
e Carlos González Garcés, concelleiro
de festas, deron a coñecer onte o programa
do X Salón Internacional de Cómic
de A Coruña, que se celebrará este
ano entre os días 13 e 19 de agosto.
Este
ano o Salón contará con invitados
de auténtico luxo, como o xaponés
Yoshihiro Tatsumi (Xapón, 1935), un dos maiores
exponentes do manga nipón; o americano Jeff
Smith, pai artísitico de Bone ou o francés
Étienne Davodeau, que presentou recentemente
'Ha muerto un hombre'.
O
cartel deste ano completarase con exposicións,
habilitadas en varias salas da cidade herculina,
e que prestarán unha especial atención
a estes dez últimos anos de banda deseñada
galega e valenciana, xunto á novela gráfica.
O
Salón terá unha especial incidencia
e presencia na cidade, onde haberá multitude
viñetas espalladas ó longo da Coruña.
[Visitar
blog Viñetas desde o Atlántico]
|
|
O
vigués Jacobo Fernández Serrano verá
a súa obra publicada pola Deputación
da Coruña
Fallouse
a III Edición do Premio Castelao de Banda
Deseñada
(03-Agosto-2007)
 O autor de cómic, ilustrador e pintor Jacobo Fernández
Serrano (Vigo, 1971), coa súa obra Aventuras de Cacauequi (edición anotada), é o gañador da
terceira edición do premio Banda Deseñada Castelao, que convoca a Deputación da
Coruña. O premio Banda Deseñada Castelao foi dado a coñecer onte
á mañá polo
presidente da Deputación da Coruña, Salvador Fernández Moreda, tras a reunión do
xurado que seleccionou por unanimidade, do conxunto das oito creacións
presentadas, o traballo artístico de Jacobo Fernández Serrano. Ademais de
Salvador Fernández Moreda, do xurado formaron parte o comisario do premio, o
creador coruñés Miguelanxo Prado, así como a deputada responsable da área de
Cultura, Caridad González Cerviño; ademais de Antonio Seijas Cruz, gañador da
anterior edición; Ángel de la Calle, Carlos Portela Orjales e Agustín Fernández
Paz.
O xurado estima que a obra galardoada, segundo o manifestado por
Miguelanxo Prado, "a partir da premisa toda historia do pensamento pode estar
mal, Aventuras de Cacauequi (edición anotada), ofrécenos unha historia na que o
autor crea un mundo propio e orixinal, tanto no plano artístico como no
narrativo".
Considera tamén o xurado que "A
historia, narrada cunha estrutura nova, crea un mundo fantástico que reflicte
unha ollada inxenua e madura a un tempo, non exenta de amargura, sobre as
relacións humanas. A proposta tamén é orixinal no plano plástico, cun enfoque
que bebe da fontes clásicas da ilustración, sabiamente
asimiladas".
A maiores, o presidente da
Deputación da Coruña manifestou que as creacións de Jacobo Fernández
Serrano formarán parte dunha exposición que se exhibirá no Quiosco Alfonso da
Coruña con motivo da celebración nos próximos días dunha nova edición de
Viñetas desde O Atlántico.
Neste contexto presentarase tamén a
obra gañadora da segunda edición do premio Castelao, neste caso a do tamén
membro do xurado Antonio Seijas Cruz, que leva por nome Un home feliz. Esta
foi realizada por Edicións Lea por encarga da Deputación da
Coruña.
Pola súa banda, Miguelanxo Prado sinalou que o xurado
apreciou na obra gañadora unha "importante calidade gráfica", inspirada na
tradición da ilustración clásica. Respecto ao conxunto da obra presentada a esta
nova edición do premio Banda Deseñada Castelao dixo que o xurado observou unha
falta de equilibrio entre a achega gráfica, e o traballo de
guión. [Ver
programa completo]
|
|