Volta e revolta

A Nosa Terra publica a novela inédita de Xoán Manuel Casado

(30-Xullo-2010)

Edicións A Nosa Terra ven de publicar Volta e revolta, a novela inédita que nos deixou Xoán Manuel Casado antes de morrer.

Xoán Manuel Casado naceu no ano 1949 en Barcelona, aínda que as súas raíces podemos atopalas en Castro Caldelas. Fillo do tamén escritor Manuel Casado Nieto, exerceu a avogacía en Barcelona. Publicou o seu primeiro libro en 1973, o poemario Rexistro de menores espantos (Gráficas Saturno), ao que seguiron varias obras en poesía e narrativa. En 1989 publicou, xunto a Xosé Manuel Salgado, un libro de conversas con Xosé Luís Méndez Ferrín, publicado en Sotelo Blanco. Finou na súa localidade natal en 2002.

Volta e revolta nace grazas ao interese posto por Xesús González Gómez -amigo persoal do propio Casado- na súa publicación. A novela ten como protagonista a un guinista de cine que retorna dende Francia para coñecer o lugar onde fora "paseado" o seu pai tras o alzamento franquista de 1936.

O 8 de agosto na Ferrería de Seoane en Folgoso do Courel

A XII edición do Filandón de músicas do Courel estará dedicado a Uxío Novoneyra

(30-Xullo-2010)

A XIII edición do Filandón de músicas do Courel estará dedicado este ano ao poeta e homenaxeado no Día das Letras Galegas Uxío Novoneyra. O evento terá lugar o vindeiro 8 de agosto na Ferrería de Seoane no concello de Folgoso do Courel.

O encargado de presentar a programación do festival foi Xosé Luís Foxo, director da Escola Provincial de Gaitas e da Real Banda da Deputación de Ourense e, ademais, un dos principais promotores do Filandón. Foxo destacou a proxección internacional do evento e asegurou que cada ano son máis os visitantes estranxeiros que se achegan ao Courel atraídos polo folclore e a música da zona.

A Escola de gaitas do Courel, a cantante viguesa Pilocha, Alfredo González ou Sons da Eira serán os protagonistas musicais dun festival que ten como principal obxectivo conservar e dar a coñecer a tradición musical das terras do Courel. Nesta liña, esta XIII edición do Filandón complétase coa saída ao mercado dun CD/DVD sobre o evento do ano pasado e coa publicación de tres volumes sobre a música do Courel nos que se recollen máis de 3.000 cantigas e melodías tradicionais da montaña lucense.

Ademais, o vindeiro 6 de agosto inaugúrase en Santa Eufemia un grupo escultórico de Francisco Escudero en homenaxe a Elvira Touzón Quiroga, coñecida como a avoa do Filandón polo seu labor fundamental na transmisión oral da memoria musical do Courel.

O traballo Estudo das migracións estacionais dos telleiros do Baixo Miño. 1750-1900) foi a gañadora na modalidade de investigación

Os XV premios de investigación Ferro Couselo xa teñen gañadores

(30-Xullo-2010)

O tribunal do xurado do XV Premio Ferro Couselo, presidido por José María Bello maneiro, Alcalde–Presidente do concello de Valga; e formado por Fernando Acuña Castroviejo, Catedrático de Arqueoloxía da Universidade de Santiago de Compostela; Marcial Gondar Portasany, Catedrático de Antropoloxía da Facultade de Filosofía e Ciencias da Educación da Universidade de Santiago de Compostela; Xulio Rodríguez González, Facultativo do Corpo Superior de Museos; Pegerto Saavedra Fernández, Catedrático de Historia Moderna da Universidade de Santiago de Compostela; Pablo Sánchez Ferro, membro do Corpo facultativo de Arquivos e neto de Xesús Ferro Couselo; e José Ramón Rial Becerra, como secretario, vén de facer público os gañadores da edición deste ano.

Na primeira modalidade, para traballos de investigación de ámbito galego, recaeu na obra presentada baixo o lema O penedo Amarelo, e que corresponde á coruñesa María de los Ángeles Verea Castelo e o título do traballo Estudo das migracións estacionais dos telleiros do Baixo Miño. 1750-1900). Na segunda modalidade, consistente nunha bolsa para proxectos centrados en estudos históricos sobre Valga, foi para o proxecto presentado baixo o lema Os cabaqueiros e que corresponde ao vigués Alejandro Fernández Palicio e o título do proxecto O Patrimonio Industrial de Valga. As telleiras e as fábricas de Cerámica.

O xurado, asímesmo, outorgou unha mención especial as obras presentadas á primeira modalidade baixo o título Isidro Parga Pondal: as redes de coñecemento científico e Emigrados galegos a Portugal durante a querra civil e a posguerra, pola enorme calidade de ámbolos dous traballos.

Ana Pontón, deputada do BNG, denuncia a presenxa invisíbel de Rosalía de Castro no Ano do Libro e da Lectura

A Consellería de Cultura presenta o Mapa de bibliotecas de Galicia

(30-Xullo-2010)

O director xeral de Promoción e Difusión da Cultura, Francisco López, presidiu onte a reunión do Consello de Bibliotecas de Galicia, onde se presentou o censo de bibliotecas como punto de partida do Mapa de bibliotecas de Galicia e o texto definitivo da nova Lei, que será aprobada no Consello da Xunta proximamente. Ademais do director xeral, na reunión estiveron presentes os demais membros do organismo: o subdirector xeral de Bibliotecas, Daniel Buján Núñez; a xefa do Servizo do Sistema de Bibliotecas, Consuelo Meiriño Sánchez; os representantes da Comisión de Educación e Cultura do Parlamento, Gerardo Marraus, Eduardo Pardo, Carmen Varela e María Antonia Pérez; e a representante do Consello da Cultura Galega, Helena Villar.

Francisco López presentou aos asistentes o censo de bibliotecas que, xunto coa creación duns estándares de biblioteca propios, son o punto de partida para a elaboración do que será o Mapa de bibliotecas de Galicia. O Mapa é o marco de referencia básico das actuacións das administracións públicas responsables da prestación do servizo bibliotecario e representa para Galicia unha ferramenta de planificación territorial importante. A recompilación e procesamento dos datos que se recollen no censo son polo tanto a primeira acción do proceso de creación do futuro mapa. Do mesmo xeito, o director xeral presentou ante o Consello o texto definitivo da Lei de Bibliotecas, unha vez rematado o período de consultas. Tras pasar polo Consello de Bibliotecas, o Consello do Libro e ser presentado ante as Asociacións Profesionais, atópase na última etapa para a súa aprobación no Consello da Xunta.

Outro dos puntos de interese abordados na sesión desta mañá referiuse as actuacións levadas a cabo ao longo de 2010. Entre estas actuacións destaca a formación inicial e permanente do persoal bibliotecario da Rede de Bibliotecas de Galicia, a potencialización da Biblioteca como centro cultural e de promoción da lectura a través de actividades de animación na Rede de Bibliotecas de Galicia, o programa de mellora das coleccións bibliográficas das bibliotecas públicas municipais, a adecuación de infraestruturas e equipamentos dirixidos a mellora dos servizos mediante a adquisición de equipamento informático e os aspectos relativos á Biblioteca de Galicia.

Críticas desde a oposición.

A deputada nacionalista Ana Pontón reclamou que a Consellería de Cultura rectifique a súa política de fomento do libro e da lectura por ir en detrimento, a través dos recortes nas modificacións presupuestarias, das bibliotecas e da promoción do libro en galego, “unha política que non encaixa precisamente co que deberan ser os obxectivos do Ano do Libro e a Lectura”. Pontón presentou en rolda de prensa unha serie de iniciativas parlamentares para denunciar que  tras esta efémeride non hai máis que unha “declaracíón virtual” e “gasto superfluo” pero non unha celebración real que apoie e dimensione o sector do libro en galego e fomente o coñecemento dos seus autores e autoras máis relevantes.

Neste sentido, lamentou que mediado xa o ano a figura máis representativa das letras galegas, da que se cumpren 125 anos do seu pasamento, teña unha presenza xa non só residual senón invisíbel nos actos organizados pola Xunta.

Publicarase a nova novela de Manuel Rivas e de Cornelia Funke

Xerais prepara as súas novidades para despois do verán

(30-Xullo-2010)

Nunha época de descanso e relax vacacional, as editoriais non adoitan presentar aos seus lectores moitas novidades no campo editorial. Sen embargo, si que traballan cara futuras incorporacións nos seus catálogos para despois do verán.

Este é o caso da viguesa Xerais de Galicia, que promete non defraudar aos letores galegos con dúas novidades que sen dúbida algunha acadarán excelentes resultados, trátase da nova novela de Manuel Rivas e do lanzamento mundial de Reckless, Carne de pedra, de Cornelia Funke.

Todo é silencio, a nova novela de Manuel Rivas tras o exitoso Os libros arden mal (Xerais) narra o irresistíbel ascenso social de Mariscal, un capo contrabandista, e das almas que habitan Brétema, o universo que domina ao seu antollo. En Brétema, na costa atlántica, houbo un tempo en que as redes do contrabando, reconvertidas ao narcotráfico, acadaron tanto poder que estiveron moi preto de controlar o poder social e as institucións. Todo é silencio narra tamén a vida dun grupo de amigos, aos que une dende a infancia o andar á crebas, á procura de restos de naufraxios, no escenario sempre sorprendente do mar de Galicia. Ese mar que fala cos signos que deita na beira. Dende moi pronto, o destino da xente nova estará determinado pola sombra odiosa e engaiolante a un tempo do omnipresente Mariscal. Unha novela, Todo é silencio, que relata como os círculos do crime rodean e corrompen, non sempre con éxito, o extraño feitizo da condición humana.

Moi diferente é Reckless. Carne de pedra, que sairá publicada o 14 de setembro de vez en galego, inglés, alemán, francés, castelán e catalán. Cornelia Funke é unha das autoras máis lidas do mundo e foi elixida pola revista Times como unha das cen persoas máis influentes do planeta. Nesta novela, Jacob Reckless cometeu un erro: despois de moitos anos de precaución, seu irmán Will cruzou o espello e foi tras el… a un mundo no que os contos máis tenebrosos se volven realidade e no que a maldición dunha fada sementa carne de pedra. Ese mundo foi fuxida e fogar para Jacob durante moitos anos e nel andou por fragas e outeiros na busca de obxectos máxicos para reis e emperadores. Pero cando a pel de Will se transforma en xade, Jacob marcha na procura dunha única cousa: a menciña que salve a seu irmán. Esta será a primeira novela da autora en galego.

A inauguración terá lugar o mércores 28 de xullo ás 20.30 h.

Feito en Culleredo II, a poesía dáse a mán con diferentes artes

(27-Xullo-2010)

A Concellería de Cultura do Concello de Culleredo inaugura mañá mércores, ás 20.30 h., na Sala de Exposicións "Xosé Rey Lago" dos Muíños de Acea de Ama (O Burgo-Culleredo), o acto de inauguración da exposición colectiva Feito en Culleredo II, coa que se pretende simbolizabar o que representa o concello de Culleredo no mundo da arte.

Diferentes artístas, co vencello común de ter algún tipo de relación con Culleredo, e procedentes de diferentes polas da arte, participan nesta exposición colectiva no que terá lugar a poesía, a banda deseñada, a pintura, a escultura, a fotografía e a cerámica. En total, participan vinte e nove artistas, entre os que destacan, no eido poético, Miguel Anxo Fernán Vello, Pablo Bouza e Luz Campello; en banda deseñada, Xurxo García Penalta; e en fotografía, Xurxo Lobato, Luís M. Iglesias, Román Montesinos ou Pedro Pastor.

O acto de inauguración contará coa participación de Celestino Poza Domínguez, concelleiro de Cultura, e do historiador Carlos Pereira Martínez. A exposición permanecerá aberta ao público do 28 de xullo ao 3 de setembro de 2010.

Trátase de "Unha historia tráxica de lectura amable", en palabras do xurado

Elena Veiga Rinlo gaña o VI premio Biblos-Pazos de Galicia

(27-Xullo-2010)

O VI premio Biblos xa ten gañadora. Elena Veiga Rinlo, de Guísamo, gañou o premio que Biblos Clube de Lectores organiza con Pazos de Galicia para escritores menores de 25 anos nun acto celebrado o pasado venres na Casa Grande de Bachao en Santiago de Compostela.

Elena Veiga presentou o traballo Morto en fucsia: "Unha historia tráxica de lectura amable, capaz de conmover nalgunha páxina ata encollerche o peito, e de arrincarche de súpeto unha gargallada en momentos de esperpento e hipérbole”, segundo ditaminou o xurado, formado por Fina Casalderrey, Pablo García Martínez (gañador da edición anterior) e Tucho Calvo, en representación de Biblos. Conclúe o xurado “auténtica expoñente da que podería ser a nova Xeración Facebook, en Elena Veiga cómpre destacar o ben que xoga durante a construción da trama coa virtualidade e como se aproveita dela para agachar unha proposta de final que abate o lector”.

Elena Veiga terá a posibilidade de rematar a novela gañadora no mes de outubro baixo a tutela da escritora Fina Casalderrey. Amais de ver publicada a novela, o premio achégalle á gañadora unha escultura de Luís Loureira titulada A peneira dos soños. O xurado igualmente subliñou, na entrega do premio, a novela finalista de Andrea Maceiras Lafuente, titulada A caixa da memoria.

Unha plataforma para a industria cultural galega

Constitúese a Asociación Culturgal

(25-Xullo-2010)

A Asociación Galega de Editores (AGE), a Asociación Galega de Produtores Fonográficos (AGAPHONO), Asociación Galega de Empresas Musicais (AGEM) e ESCENA GALEGA, asinaron os estatutos e acta de constitución da Asociación Culturgal, que contará máis adiante coas incorporacións da AGAPI e EGANET.

A directiva de Culturgal ten a Xulio Amigo como presidente representando á AGE; na vicepresidencia está Ernesto Chao por ESCENA GALEGA; como secretario e representando a AGAPHONO figura Cándido Meixide e na tesourería Beatriz Sieira en representación de AGEM.

A asociación terá como misión a posta en marcha da edición do 2010 do Culturgal, que contou cun gran éxito na edición do 2008 e que non foi convocado no 2009. A asociación Culturgal nace coa intención de se converter nun proxecto que actúe como unha plataforma na que se integren, dinamicen e interrelacionen a pluralidade dos sectores que actúan ao redor da industria cultural galega, co ánimo de que se converta en referencia imprescindible e obrigada, a xeito de cita anual, para todos os que queiran coñecer a oferta cultural galega.

Entre os actos está a mostra Na fronte unha estrela sobre os momentos históricos do poeta de Celanova

A Fundación Curros Enríquez asina un convenio con Cultura para desenvolver conxuntamente un programa de actividades

(25-Xullo-2010)

O presidente da Fundación Curros Enríquez, Antonio Mouriño, e o conselleiro de Cultura e Turismo, Roberto Varela, asinaron un convenio de colaboración para a realización de actividades culturais arredor da obra de Manuel Curros Enríquez. En virtude deste acordo, a Consellería de Cultura e Turismo destinará 17.500 euros para o desenvolvemento dun total de cinco programas culturais.

Trátase dun programa conxunto de actividades, unha exposición, cursos, edicións e publicacións de libros e unha xornada de convivencia, todas elas en torno á figura do poeta de Celanova. As actividades que Fundación e Consellería desenvolverán conxuntamente son:

- Exposición Na fronte unha estrela: Unha mostra composta pola produción de fondos da Real Academia Galega e fondos da propia Fundación Curros Enríquez, que está dividida en seis bloques, e que se centra nos principais momentos históricos da recta final da vida do escritor e nos posteriores da súa figura literaria.

- Curso Gravados para Curros Enríquez: Organizarase un taller orientado ao público en xeral onde se traballará en torno á obra literaria do poeta de Celanova.

- Edición de Os Bolechas sobre os autores de Celanova: esta edición ten como máxima finalidade dar a coñecer entre os máis pequenos aos escritores da vila de Celanova e principalmente a Curros Enríquez.

- Publicación dun libro de poemas de Myriam Gilbertson: a continuidade do interese literario dos descendentes de Curros Enríquez, reflíctese coa publicación do traballo poético da tataraneta do poeta.

- Xornada de convivencia cos centros Currros Enríquez de Galicia e Ruta Currosiana animada: Trátase de promover a celebración dunha xornada cos centros de toda Galicia que leven o nome do poeta, onde haberá un conta contos, un pequeno obradoiro de música e un espectáculo de animación no que se representará unha obra do poeta.

Unha plataforma para a industria cultural galega

Constitúese a Asociación Culturgal

(25-Xullo-2010)

A Asociación Galega de Editores (AGE), a Asociación Galega de Produtores Fonográficos (AGAPHONO), Asociación Galega de Empresas Musicais (AGEM) e ESCENA GALEGA, asinaron os estatutos e acta de constitución da Asociación Culturgal, que contará máis adiante coas incorporacións da AGAPI e EGANET.

A directiva de Culturgal ten a Xulio Amigo como presidente representando á AGE; na vicepresidencia está Ernesto Chao por ESCENA GALEGA; como secretario e representando a AGAPHONO figura Cándido Meixide e na tesourería Beatriz Sieira en representación de AGEM.

A asociación terá como misión a posta en marcha da edición do 2010 do Culturgal, que contou cun gran éxito na edición do 2008 e que non foi convocado no 2009. A asociación Culturgal nace coa intención de se converter nun proxecto que actúe como unha plataforma na que se integren, dinamicen e interrelacionen a pluralidade dos sectores que actúan ao redor da industria cultural galega, co ánimo de que se converta en referencia imprescindible e obrigada, a xeito de cita anual, para todos os que queiran coñecer a oferta cultural galega.

O galardón fíxose público no marco da Mostra Internacional de Teatro de Ribadavia

Manuel Lourenzo faise co V premio Abrente de Textos Teatrais

(24-Xullo-2010)

O dramaturgo Manuel Lourenzo foi galardoado con Aquelas cousas do verán co premio da V edición do Premio Abrente de Textos Teatrais, que convoca o Concello de Ribadavia xunto con Política Lingüística, coincidindo coa celebración da Mostra Internacional de Teatro de Ribadavia.

O valadourés Manuel Lourenzo é unha das pezas claves do teatro galego. Impulsor da escola de teatro Casahamlet, ten no seu haber os máis importantes galardóns no eido dramático, como o Premio Nacional de Literatura Dramática, Premio Nacional de Artes escénicas, o Premio Álvaro Cunqueiro ou o Premio de Teatro Rafael Dieste.

Tras 15 anos de andaina, pecha unha referencia na web

Pecha o xornal dixital Vieiros

(24-Xullo-2010)

Logo de 15 anos, o xornal dixital Vieiros, referencia do xornalismo en Galicia e en galego, pecha a súa andaina. Reproducimos de seguido a carta do seu editor, Lois Rodríguez:

Nacemos cando a rede galega estaba aínda en cueiros e ningún medio do país estaba na web. Tivemos a mesma forma de entender Galiza que aquela revista homónima do exilio liderada por Luís Soto: un país moderno e aberto ao mundo, sen complexos e con todo o futuro por diante.

Vieiros foi desde o comezo unha iniciativa aberta e independente, que pretendeu abeirar a toda a comunidade de galegos alí onde estiveren, na crenza de que Galiza non é só un territorio, senón tamén un espazo de comunicación. E nese espazo, Vieiros converteuse no cerne de múltiples proxectos, tanto propios como alleos. Do seu impulso xurdiu o primeiro especial electoral on-line (Eleccións Galegas de 1997), a primeira ciber-charla cun persoeiro (Isaac Díaz Pardo), o primeiro vocabulario sexual realizado coa colaboración dos lectores, a primeira experiencia de creación literaria en rede (Por conto alleo, de Camilo Franco), ou a creación de ‘A Polo Ghit’, o primeiro concurso da canción galega do verán.

Como punto de referencia dos internautas galegos no mundo, Vieiros chegou a ter até máis de trinta correspondentes-colaboradores en diferentes lugares do mundo: desde Gotemburgo a Nova York pasando por Bos Aires e O Bierzo . Asemade, deulle abeiro a colectivos e outras publicacións, como o IGADI, Tempos Novos, Canal Ciencia, Federación Ecoloxista Galega ou Irimia.

Mais foi o labor informativo diario o que consolidou Vieiros como medio de referencia da Internet galega, sobre todo a partir do Prestige, cando -cun esforzo informativo sen precedentes- acompañamos a resposta social diante da catástrofe mentres a meirande parte dos medios maioritarios miraban cara a outro lado.

Sen embargo, e a pesar dos seus máis de 20.000 lectores diarios, Vieiros nunca foi un medio rendible e necesitaba absorber parte dos recursos necesarios para sobrevivir dunha empresa do mesmo accionariado.

En xuño de 2009, nunha situación de aparente bonanza económica no seo das dúas empresas, unha auditoría externa desvelou irregularidades económicas e administrativas de extrema gravidade, cuxa responsabilidade foi asumida por escrito polo daquela xerente e apoderado das empresas, Óscar Martínez, quen terá que responder diante da xustiza.

Este proceso levou ao peche da outra empresa e de forma inmediata deseñouse xunto cos traballadores un plan de viabilidade para salvar Vieiros, cousa que non foi posible dada a gravidade da situación, á que houbo que sumarlle o duro golpe da crise económica.

Foi pois un ano moi difícil no que empresa e traballadores intentamos de todos os xeitos manter acesa a estrela de Vieiros, pero chegou a hora de renderse.

Neste momento, só resta darlles as grazas a todos os lectores, aos que creron neste proxecto, colaboraron nel e puxeron o seu grao de area para que outro xornalismo galego fose posible. E moi especialmente aos traballadores e aos opinadores, pola súa entrega e compromiso inesgotable.

Foi un pracer. Até sempre.

Lois Rodríguez, editor de Vieiros

[Web de Vieiros] 

Diferentes propostas artísticas os días 24 e 25 de xullo

Mañá comeza unha nova edición do Festigal

(23-Xullo-2010)

Mañá arranca unha nova edición do Festigal, que este ano 2010 chega á súa novena edición. Concibido como unha alternativa aberta a todos públicos, o Festigal pretende ser un escaparate para a proxección e intercambio cultural a través de diferentes propostas artísticas. Deste xeito, o Festigal acollerá dende presentacións de libros ou actuacións musicais ata proxección de filmes e conferencias.

Un ano máis, o lugar escollido é o Campus Universitario Sur de Santiago de Compostela e esténdese ao longo de corenta e oito horas entre os días 24 e 25 de xullo.

No apartado púramente literario presentaranse algunhas das últimas novidades no mundo editorial, como os primeiros libros de ATRAVÉS | EDITORA de Ugia Pedreira e Sechu Sende, Un home impuntual (Galaxia) de Xosé María Álvarez Cáccamo, Tres cores: Azul (Estaleiro) de Moncho Iglesias, A intervención (Xerais) de Teresa Moure ou O segredo de Marco Polo (Galaxia) de Francisco Castro.

[Web do Festigal]

[Programación na Galería das Letras do Festigal]

Pola´súa obra Vidas cruzadas

An Alfaya gaña o Premio de Novelas por Entregas de La Voz

(23-Xullo-2010)

A obra Vidas cruzadas, de An Alfaya, foi designada por unanimidade polo xurado como obra gañadora do Premio de Novela por Entregas que organiza anualmente o xornal La Voz de Galicia. Estructurado en 31 capítulos, a obra gañadora publicarase no diario coruñés ao longo do mes de agosto a razón dun capítulo por día.

Segundo lemos en La Voz de Galicia, Vidas cruzadas é "Unha historia que se alimenta de varias tramas persoais, un matrimonio en crise, un accidente de tráfico que marca un punto de inflexión a varias vidas e, de fondo, un relato sobre a soidade e a incomunicación nos nosos días".

O xurado, composto por Luís Ventoso, Xosé Carlos Caneiro, Ramón Loureiro, Luís Pousa e Ramón Nicolás, gabou tamén o vibrante estilo da novela finalista presentada a concurso baixo o lema Arume e co título Xogo de nenos.

[Ver a nova en La Voz de Galicia]

Ata o 3 de outubro na Casa da Parra de Compostela

Inaugúrase a exposición Ao pé do prelo, unha mostra da relación do artista Luís Seoane coa edición

(23-Xullo-2010)

A compostelá Casa da Parra acolleu a inauguración da exposición Ao pé do prelo. Luís Seoane. Libros: editor e artista gráfico. A mostra, propulsada pola Consellería de Cultura e Turismo, coincide co centenario do nacemento do artista Luís Seoane (Bos Aires, 1910; A Coruña, 1979) e pretende homenaxear a Seoane pola súa condición de editor. Todos os visitantes que se acheguen á Casa da Parra (Santiago), ata o vindeiro 3 de outubro, poderán contemplar unha das exposicións mais exhaustivas e documentadas da produción bibliográfica e gráfica de Luis Seoane.

A mostra reúne case 300 pezas deseñadas por Luis Seoane, libros, catálogos de exposicións, carpetas de gravados e colaboracións con outros artistas. Entre as obras expostas exhíbese o libro de debuxos Homenaxe a la Torre de Hércules, 49 dibujos (Bos Aires: Editorial Nova, 1944), que levou o premio Pierpont Morgan Library como un dos mellores libros deseñados no mundo entre 1944 e 1946.

A faceta de editor de Seoane foi expresada tanto polo inxente labor de ilustrador e diagramador de centenares de libros das distintas empresas editoriais coas que colaborou ou que el mesmo impulsou e dirixiu, coma nos seus propios albumes de gravados ou debuxos e nas ilustracións dos libros de poesía, prosa ou teatro dos que é autor. Luís Seoane consideraba que ilustrar ou compaxinar un libro era unha oportunidade de atopar unha nova expresión porque coma pintor sentía a necesidade de idear fermosos libros.

A mostra recolle igualmente as colaboracións de Luis Seoane con Emecé Editores, Editorial Nova, Editorial Botella de Mar, Editorial Citania, Edicións Galicia do Centro Galego de Bos Aires, Edicións do Castro, Editorial Cuco Rei, entre outras. Asemade, tamén se expoñen cinco pezas orixinais, catro óleos e unha pintura sobre papel, da produción de Luis Seoane dende os anos corenta aos setenta pertencentes aos fondos da Xunta de Galicia.

Os libros mostrados na exposición proceden maioritariamente dos fondos da Biblioteca de Galicia da Cidade da Cultura, pero tamén da Biblioteca da Universidade de Santiago, Museo de Arte Galega Contemporánea Carlos Maside, Museo de Pontevedra, Instituto de Estudos Galegos Padre Sarmiento e Museo do Pobo Galego.

Do 21 ao 25 de xullo na Alameda de Soage

Principia a IX edición da Feira do Libro de Cangas

(20-Xullo-2010)

A Alameda de Soage de Cangas recibe un ano máis a Feira do Libro, que este ano chega a súa novena edición.

A Feira do Libro, que se desenvolverá do 21 ao 25 de xullo, contará con pregoeiro de luxo, o escritor compostelán Suso de Toro, quen ven de publicar recentemente Sete palabras (Xerais) e quen anunciou publicamente a súa retirada do mundo das letras. Presentacións de libros, asistencia de autores, actividades para os máis pequenos, recitais poéticos e actuacións musicais serán algunhas das actividades que encherán ao longo desta semana a península do Morrazo.

[Ver o programa da XI Feira do Libro de Cangas]

Releva no cargo a Alfonso García Sanmartín, tras rematar o seu mandato

Manuel Bragado elixido novo presidente da Asociación Galega de Editores

(18-Xullo-2010)

O pasado venres tivo lugar a asemblea da Asociación Galega de Editores, onde se elixiu unha nova directiva que estará baixo a presidencia do editor de Xerais de Galicia Manuel Bragado, acompañará a Bragado Belén López, de Baía, que actuará como vicepresidenta. A elección do novo presidente e do resto dos integrantes da súa directiva contou co apoio dos editores, obtendo o voto unánime dos reunidos en asemblea. Alfonso García Sanmartín, Fran Alonso, Ana Guerra e Pilar Sampil conformaron o núcleo duro de traballo da directiva da AGE desde o ano 2006. Rematado o mandato e sen opción a reelección por imposición estatutaria, os editores cesantes ovacionaron aos novos directivos desexándolles moita sorte no seu cometido.

Manuel Bragado presentou a súa candidatura como froito do esforzo por aglutinar diversas sensibilidades dentro da entidade gremial, felicitando a García Sanmartín e ao seu equipo polo intenso e importante traballo realizado ao longo de catro anos. O director de Xerais espuxo os tres eixos fundamentais da súa proposta de traballo: a continuidade nos proxectos e tarefas, a firmeza na defensa dos intereses gremiais,  e o consenso e a cooperación corporativa e gremial. Tendo en conta os tres piares, a directiva traballará co compromiso de acadar o recoñecemento definitivo da edición galega en todos os ámbitos, reivindicando a débeda histórica co libro e o seu papel de sector estratéxico no eido cultural e tamén no da innovación e transformación produtiva. Bragado compremeteuse a manter unha relación fluída e constante cos asociados, co fin de darlle resposta ás inquietudes e aos retos que se lle plantexan ás empresas editorias.

O novo equipo está formado por Manuel Bragado, de Edicións Xerais, presidente; Belén López, de Baía, vicepresidenta; Laura Rodríguez, de Hércules de Ediciones, secretaria; Xelasio Suárez, de Ir Indo, tesoureiro; Paco Villegas, de Cumio, vogal; Xosé Aldea, de Ouvirmos, vogal; Xulio Amigo, de Galaxia, vogal; e Consuelo Carreira, de Sotelo Blanco, vogal.

A trama, de carácter futurista, está ambientada na Galicia do século XXII

Antón Lopo gaña a XXII edición do premio de novela Manuel García Barros

(15-Xullo-2010)

O escritor e xornalista monfortino Antón Lopo ven de gañar a XXII edición do premio de novela Manuel García Barros pola obra Obediencia.

O xurado, formado por Inmaculada Otero Varela, Manuel Santiago Fernández Álvarez, Xosé Manuel Eyré Val, Carlos  Lema e Valentín García Gómez en representación do Concello da Estrada acordou, por maioría, conceder o premio a obra de Antón Lopo, presentada baixo o lema Gödel, de entre as 31 propostas presentadas ao certame.

En opinión do xurado, a novela gañadora destaca pola súa capacidade para trasladar aos lectores a unha Galicia do futuro que se torna completamente verosímil. A imaxinación creadora e a habilidade para construír unha historia nese futuro hipotético, usando a linguaxe das matemáticas, as imaxes visuais do cinema de ciencia ficción, e a intriga dunha trama que se desenvolve freneticamente cuns personaxes ben trazados e protagonizada por unha muller. Este fío argumental recolle debates políticos e loitas de poder nun futuro no que parte de Galicia está desertizada, outra parte baixo unha eterna néboa tóxica e na que se vai construíndo unha urdime con referencia xeográfica á Compostela cidade-estado independente e republicana do século XXII.

Este premio de novela, organizado polo concello da Estrada dende 1989, instituíuse co obxectivo de homenaxear a memoria e espallar a obra de Manuel García Barros (Ken Keirades). Entre os seus gañadores aparecen nomes importantes das nosas letras como Manuel Forcadela, Xosé Miranda, Francisco castro, Xosé Carlos Caneiro, Antón Riveiro Coello, Santiago Jaureguízar ou Bieito Iglesias, entre outros. A novela gañadora será publicada pola editorial Galaxia.

72 primeiros títulos co obxectivo final da totalidade do catálogo

Xa están dispoñibles os primeiros títulos para e-readers da editorial Galaxia

(15-Xullo-2010)

A Esmorga, A praia dos afogados, Xente no rodicio, O libro da egoista, O triángulo inscrito na circunferencia, Arredor de si ou Herba aquí ou acolá son algúns dos 72 títulos recuperados do fondo editorial de Galaxia que dende hoxe están dispoñibles en formato ebook a través da propia web da editorial. 72 títulos da literatura galega de todos os tempos póñense ao alcance dun simple clic, incluíndo a revista Grial.

Dende a portada web da editorial elaborouse un espazo que leva directamente ao portal de distribución de contidos dixitais onde se ofrecen todos os títulos ordeados alfabeticamente. Galaxia pretende ir incomporando progresivamente máis títulos ata poñer en formato dixital descargable para os lectores electrónicos a totalidade do catálogo.

Un tren denominado Follas Novas fará o percorrido Padrón-Compostela

A AELG convoca para mañá unha homenaxe a Rosalía de Castro no Panteón de Galegos Ilustres

(14-Xullo-2010)

A Asociación de Escritores en Lingua Galega (AELG) vai celebrar mañá xoves 15 de xullo un acto cívico e reivindicativo en lembranza do traslado dos restos mortais de Rosalía de Castro -que tivo lugar o 25 de maio de 1891-, e para que se garanta o acceso público ao Panteón dos Galegos Ilustres.

Un tren, identificado como Follas Novas, partirá da estación da Matanza, ao carón da casa de Rosalía, ás 17.45 h., para facer o traxecto Padrón-Compostela. Unha hora antes, ás 16.45 h., haberá unha concentración na colexiata de Santa María de Iria, no cemiterio de Adina, onde o presidente da AELG, Cesáreo Sánchez, informará do sentido dos actos, á vez que se lerá un poema de Rosalía de Castro.

Na estación de Compostela agardará a comitiva restante, actuando a banda municipal. Xa en Santiago, o cortexo sairá pola rúa do Hórreo cara a Praza do Toural, primeira parada da comitiva, onde haberá unha lectura de tres poemas de Cantares Gallegos, para continuar pola Praza da Universidade e pola Praza de Cervantes, onde se lerán outros poemas de Rosalía.

Finalmente, en San Domingos de Bonaval celebrarase unha audición do Ángelus, de Massenet, e unha lectura de poemas de Follas Novas, intercalando actuacións de diversos grupos musicais e artistas, para rematar o acto coa lectura dun comunicado reivindicativo da figura de Rosalía de Castro, cando se cumpren 125 anos da súa morte, e para que se garanta o acceso público ao Panteón dos Galegos Ilustres.

[Programa de actos]

Tras asinar un convenio de colaboración

FEGAMP e Fundación Manuel María traballarán para a adquisición da casa natal do poeta lugués

(14-Xullo-2010)

A sede de Federación Galega de Municipios e Provincias (FEGAMP) acolleu onte a sinatura do convenio entre a  Federación e a Fundación Manuel  María de Estudios Galegos que ten  por obxecto a creación dun marco de  acordos de mutua colaboración entre  as Entidades Locais e a Fundación que  permita, por unha banda, a realización  de actividades nos concellos relacionadas coa promoción e desenvolvemento da cultura e a lingua galega e, contribuír á adquisición por parte da Fundación, da casa natal de Manuel María para convertela en Casa Museo do Escritor.

Na actualidade a casa natal de Manuel María está habitada polo irmán deste e a súa familia con quen a Fundación xa chegou a un principio de acordo para a construción dunha nova vivenda para os actuais inquilinos e acondicionar como museo a coñecida como Casa de Hortas, en Outeiro de Rei.

Entidades locais de forte vencello co escritor como as deputacións de Lugo e A Coruña e o concello de Monforte xa amosaron o seu apoio á dedicación da casa natal de Manuel María a museo e sede do seu legado cultural. O convenio marco asinado hoxe polo presidente da FEGAMP, Carlos A. Fernández, e a presidenta da Fundación e viúva do poeta, Saleta Goy, permite estender o proxecto ao conxunto do país, na medida en que a Federación se compromete a difundir e promover a adhesión a este convenio entre as Entidades Locais.

[Convenio asinado entre a FEGAMP e a Fundación Manuel María]

Na Coruña do 9 ao 15 de agosto

A XIII edición de Viñetas desde o Atlántico homenaxeará ao debuxante Will Eisner

(14-Xullo-2010)

O debuxante americano, Will Eisner, falecido no ano 2005, será un dos protagonistas da XIII edición do Salón Internacional do Cómic da Coruña Viñetas desde o Atlántico, que se desenvolverá entre os días 9 e 15 de agosto. O festival renderá homenaxe a este mestre da banda deseñada, pai da novela gráfica, cunha exposición retrospectiva. Grazas ao labor do comisario da mostra, Denis Kitchen, os afeccionados que visiten o Salón poderán contemplar, por primeira vez en España, páxinas orixinais de "The Spirit", "Contrato con Dios" ou "El corazón de la tormenta".

A décimo terceira cita co Cómic na cidade da Coruña tamén dedicará unha exposición a un xénero específico: as tiras de prensa e a un elemento iconográfico singular: o esqueleto, que revisa o tratamento que a historieta fai desta parte da anatomía. A primeira das mostras resume, a través de cen ferros orixinais, a historia das tiras de prensa. Series como Príncipe Valiente, Little Nemo, Bringing up father, Dick Tracy, Phantom, Mandrake, Popeye, Krazy Kat, Flash Gordon, Tarzan, Peanuts, Pogo e moitas máis, poderán contemplarse na exposición, unha das máis completas do mundo sobre este xénero. A oferta do festival inclúe tamén unha exposición sobre cidades mergulladas, que reúne historietas europeas e norteamericanas que se desenvolven ou inclúen mundos nas profundidades mariñas.

Esta edición de Viñetas desde o Atlántico exporá obras orixinais de case unha decena de debuxantes de Europa e América, que tamén viaxarán á cidade para estar cos afeccionados. Este é o selo de identidade do festival coruñés: debuxos orixinais e os seus autores, cos que poder charlar relaxadamente e coñecer o seu proceso creativo. A lista de debuxantes convidados inclúe, entre outros, ao galego Víctor Rivas, creador do personaxe para os máis pequenos, Harry Pórrez. O autor vigués traballa na actualidade en ilustración infantil e xuvenil para o mercado americano. Tamén viaxarán ata A Coruña a nova debuxante, Camille Jourdy, gañadora do premio "Autor revelación" do festival de Angoulême, pola súa triloxía "Rosalie Blum" e o artista británico Dave McKean, autor de "Arkham Asylum" e "Cages", obras de referencia dentro do mundo do cómic. Volve de novo a Viñetas cunha mostra de orixinais dos seus últimos traballos Carlos Pacheco, un dos debuxantes españois máis internacionais. Traballa fundamentalmente para o mercado estadounidense, dando forma a personaxes clásicos da viñeta como Superman, Batman e X-Men. Viñetas desde o Atlántico contará tamén coa presenza de Émile Bravo, quen compartirá protagonismo co seu personaxe, o "botóns" Spirou e o seu fiel Fantasio. A oferta de Viñetas 2010 inclúe ademais a mostra "Raule e Roger", na que o guionista catalán Raule, un dos máis prolíficos de España, e o debuxante tamén catalán Roger Ibáñez, ensinan o resultado da súa colaboración, sobre todo para a serie Jazz Maynard. Tamén expoñerá no Salón Daniel Montero, Premio Castelo BD de 2009, promovido pola Deputación coruñesa.

Unha das novidades desta edición é o estreo da páxina web do Salón do Cómic. No sitio www.vinetasdesdeoatlantico.com o público interesado poderá consultar toda a información sobre o festival: contidos das exposicións, autores invitados, horarios de apertura das salas, contidos e horarios de conferencias, de presentacións ou das sinaturas de autores. A pantalla principal da páxina adórnaa o cartel anunciador das Viñetas deste ano e que leva a firma inconfundible do debuxante André Juillard. A páxina contén información das trece edicións.

O 10 de xullo na Galería Jazz a partires das 21.30 h.

Poesía Alimentaria en Vigo

(09-Xullo-2010)

Quén dixo que a poesía non alimenta? O clube de poetas gourmets desmenten tal afirmación cunha velada de poesía, arte e, como non, tapas.

A xornada Poesía Alimentaria terá lugar este sábado 10 de xullo ás 21.30 h. na Galería Jazz (Ronda de Don Bosco 21) de Vigo.

[Descargar o cartel de Poesía Alimentaria]

No marco da II Festa da palabra

A Ínsua dos Poetas homenaxeará mañá ao escultor Arturo Baltar

(09-Xullo-2010)

A Ínsua dos Poetas, situada en A Esgueva, entre os concellos do Carballiño e O Irixo, acollerá mañá sábado a II Festa da palabra.

Esta paraxe, de algo máis de cen ferrados e ideada para a convivencia entre literatura e natureza a través de citas culturais, será o escenario da homenaxe que recibirá o escultor Arturo Baltar, acto principal desta Festa da Palabra, que contará coa participación, entre outros escritores e artistas, de Manuel Rivas, Luis González Tosar, Víctor Campio, Antón Lamazares e Acisclo Manzano. Ao remate do acto compartirase un xantar de irmandade.

A Ínsua dos poetas naceu no 2009 tras un acordo entre a familia do porta e presidente do PEN Galicia Luís González Tosar e a Deputación de Ourense, coa fin de establecer unha paisaxe de palabras, de arte, de vangarda e de paixón, en palabras do seu impulsor, González Tosar.

[Descargar programa da II Festa da Palabra]

Domingo Villar e o seu detective Leo Caldas seguen coa súa exitosa traxectoria

A praia dos afogados, mellor libro de literatura negra para a Asociación Brigada 21

(09-Xullo-2010)

Domingo Villar, ven de recibir un novo premio para a súa segunda e exitosa novela A praia dos afogados, publicada orixinariamente pola editorial Galaxia en galego. A Asociación Brigada 21, formada por lectores e seareiros ao xénero negro e criminal, ven de outorgar á novela protagonizada polo detective Leo Caldas o premio á mellor novela.

Estes galardóns, elixidos polos lectores, non teñen remuneración económica. Os lectores fan as súas propostas sobre os mellores libros lidos ao longo do ano e os máis votados aínda teñen que pasar pola peneira dun xurado especializado.

[Asociación Brigada 21] 

Fermín Penzol: Unha obra para un país

O convenio entre a Fundación Penzol con Cultura e Deputación permitirá poñer en valor o patrimonio bibliográfico e documental da Fundación

(08-Xullo-2010)

A Fundación Penzol, a Deputación de Pontevedra e a Consellería de Cultura e Turismo asinaron un conveniopara desenvolver o programa conxunto Fermín Penzol: unha obra para un país. O importe total do convenio ascende a 45.000 euros e permitirá desenvolver un programa conxunto para a realización de exposicións, mesas redondas ou publicacións.

O obxectivo fundamental do convenio establécese na realización da exposición Fermín Penzol: unha obra para un país, que é o núcleo principal da actividade a través da cal se configurará un percorrido pola historia da Fundación, expoñendo fotos da institución, gravados, debuxos, libros ou documentos de distintas épocas. Dita exposición estará aberta ao público nos meses de outubro e novembro de 2010 e complementarase cun ciclo de mesas redondas, onde se deliberará sobre o papel e significado deste tipo de iniciativas civís a prol da cultura galega, e unha publicación en formato de libro-catálogo sobre o significado e a importancia de Fermín Penzol e máis da Fundación na historia da cultura galega.

Na voz poética da escritora pontevedresa resoa a poesía de Rosalía de Castro

Follas Novas recupera dous traballos de Aurora Vidal Martínez no seu centenario

(05-Xullo-2010)

Neste 2010, onde se están rememorando os centenarios dos nacementos de ilustres persoeiros das nosas letras e da nosa cultura, como Ricardo Carvalho Calero, Luís Seoane ou Gonzalo Torrente Ballester, é tamén o centenario do nacemento da poeta pontevedresa Aurora Vidal Martínez (1910-2005).

Narradora, poeta e dramaturga, Aurora Vidal exerceu como maestra en escolas galegas, canarias e valencianas. A súa condición de escritora maniféstase a unha idade moi temperá, e colabora en revistas literarias da época, como Vida Gallega, Cristal e Sonata Gallega. Na capital do Lérez trabou amizade con escritores da época, como Álvaro Cunqueiro, Rey Romero, Herminia Fariña, Figueira Valverde ou Sabino Torres.

Aurora Vidal Martínez escribiu tanto en galego como en castelán, e nos seus versos flúe un ar que lembra dende García Lorca ata Luís Amado Carballo, facendo unha especial referencia a Rosalía de Castro, como nestes versos do seu libro Poemas de nenos e paxariños:

Cantaban melancolías

polo cómaro deserto,

pola campía frolida,

coma se fora un labrego.

A súa andania literaria principia en 1945 cando publica Vivencias de infancia en Pontevedra, despois seguirían os contos, obras teatrais ou poemarios, como o anteriormente citado Poemas de nenos e paxariños, O Espantallo Namorado ou Contros de rapaces.

Neste centenario de Vidal Martínez, é de agradecer o labor da editorial Follas Novas quen ven de tirar do prelo dous libros da lerezana: Poemas, en castelán, unha escolma que recolle a delicada e intimista voz de Aurora Vidal; e Poemas de nenos e paxariños, reedición daquela primeira impresa no ano 1958 en Pontedeume, da man de Miguel López Torre.

Foi un incansable traballador en prol da lingua galega

Coruña homenaxea ao escritor e político Lois Peña Novo

(05-Xullo-2010)

A concelleira de Mocidade, Solidariedade e Normalización Lingüística do Concello da Coruña realiza, coa Asocación Cultural Alexandre Bóveda da Coruña, unha homenaxe ao político e escritor chairego Lois Peña Novo.

A Concellaría de Normalización Lingüística editou un folleto no que se recolle a historia de Lois Peña Novo e reprodúcense documentos inéditos, como unha fotografía durante unha homenaxe a Castelao organizada polas Irmandades da Fala o 19 de xuño de 1932 en Lugo ou as papeletas electorais das eleccións municipais na Coruña de 1920. Ademais, ao longo desta semana realizaranse dous actos de homenaxe. O primeiro será o mércores día 7 de xullo ás 18.00 h. na rúa Lois Peña Novo (Martinete) coa colocación dunha placa conmemorativa, e o xoves, no local da Agrupación Cultural Bóveda (rúa Olmos, 16-18, 1º) ás 20.00 h. terá lugar unha conferencia sobre Lois Peña a cargo do profesor e escritor Manuel Roca Cendán.

Ermitas Valencia, concelleira de Mocidade, Solidariedade e Normalización Lingüística, destacou o papel de Peña Novo na defensa da lingua galega, xa que foi un dos integrantes das Irmandades da Fala que máis defendeu a necesidade de participación dos nacionalistas nas institucións políticas e o primeiro membro do nacionalismo galego que ocupou un cargo público no ano 1920, cando foi elixido concelleiro do Concello da Coruña.

Galería de Mulleres

A biblioteca da Muller de Muxía dedica o mes de xullo á artista Maruja Mallo

(05-Xullo-2010)

A Galería Mulleres da Biblioteca da Muller de Muxía dedica este mes de xullo á artista Maruja Mallo. Esta iniciativa, coa que cada mes se achega o labor dunha muller no mundo das artes, as letras, a ciencia, etc… nace co obxectivo de visibilizar a aportación da muller á historia da humanidade, ao mundo das ideas, das artes , das ciencias … ámbitos nos que tradicionalmente apareceu infrarrepresentada.

Cada mes estará dedicado a unha muller e repartiranse carteis nos que apareza esa muller e indicacións para informarse sobre ela ou para acceder á súa obra. Con cada muller destacada indicarase que libro ou libros están á disposición do usuario/a na Biblioteca da Muller do Concello de Muxía, escritos por esta muller ou que fagan referencia á mesma.