Tras unha longa estancia en Catalunya, dende onde agasallou os lectores galegos coa novela Os paxaros tamén migran ao sur (Xerais) -galardoada co Premio Terra de Melide 2006- e con A historia de Bavar e do Kiwi -publicada en catalán, aranés, español, éuscaro, aragonés e galego por Trinca de Lleida-, Silverio Cerradelo aséntase agora nunha nova etapa vital e literaria en Santiago de Compostela.

Licenciado en Veterinaria e en Filoloxía Galega, Cerradelo publica e colabora en multitude de actividades e publicacións medioambientais, culminado no proxecto educativo desenvolto en Vallcalent -do que foi coordinador do proxecto- e que deu lugar ao libro de Bavar e do Kiwi.

No novo vieiro que vén de comezar, Silverio Cerradelo ultima a escrita dunha nova novela: un libro que segundo nos conta o autor convida, a través da vida do seu protagonista, a facermos unha reflexión en torno aos condicionantes e a opresión tan grandes que houbo -e aínda hai- en Galicia, sobre a vida das persoas homosexuais. Ambientada na década dos anos 90, ten como protagonista un home galego procedente do rural, con pouca formación intelectual e que ten daquela 60 anos...

Un petisco cativo e saboroso este avance... Todos os que gozamos coa primeira novela curta do escritor ourensán agardamos por vela o máis axiña posible nos andeis das librarías.

A catedrática e investigadora Aurora Marco é unha loitadora incansable en prol do recoñecemento e do activismo cultural do país, feito contrastado ao ver o seu extenso e importante labor que vén desenvolvendo a través das súas publicacións ensaísticas, estudos de xénero, material didáctico e artigos en multitude de publicacións.

Dentro da extensa bibliografía que Aurora Marco nos legou nos últimos trinta anos destacan os seus traballos sobre as obras de Antonio López Ferreiro, Ramón Otero Pedrayo, Xesús Rodríguez López, Carvalho Calero, Avilés de Taramancos ou de Ramiro Paz Carvajal, cobrando igual importancia o centrado sobre as mulleres e o traballo que estas desenvolveron, como As precursoras. Achegas para o estudo da escrita feminina (Galiza, 1800-1936) (La Voz de Galicia), Mulleres e educación en Galiza. Vida de mestras (Ediciós do Castro), a edición do poemario de Áurea Lorenzo Abeijón Queixas (Toxosoutos) ou o monumental Dicionario de mulleres galegas. Das orixes a 1975 (A Nosa Terra).

Tras a publicación dese esencial Dicionario de mulleres galegas, Aurora Marco repetirá editora o vindeiro ano para a publicación dun ensaio no cal recupera biografías e historias de vida das guerrilleiras galegas –as que estiveron na clandestinidade, as do “monte”, e máis as da chaira, enlaces...– que son aínda as grandes silenciadas, co obxectivo de deitar luz sobre a participación das mulleres no movemento de resistencia antifranquista. De indubidable interese, abofé, como toda a obra de Aurora Marco.