EN PRIMEIRO PLANO 

O neno que aprendeu a voar, ilustrado por José Miguel Ribeiro sobre textos de Alexandre Honrado, obtivo unha mención especial na 12ª edición do Premio Nacional de Ilustración en Portugal. A obra, publicada en galego e castelán por Kalandraka a partir da versión orixinal editada en portugués por Dom Quixote, destaca por "un desafiante xogo de perspectivas e unha secuenciación narrativa ben lograda", segundo o xurado, que tamén valorou desta obra "a suxestión dunha multiplicidade de sentidos, algúns deles nacidos dunha especial volumetría". Así, o ilustrador "recorre, con eficacia, a unha técnica menos habitual no panorama editorial portugués, potenciando as lecturas plurais". 

AXENDA 

O Salón de Actos da Escola Superior de Enxenería Informática no Campus de Ourense (As Lagoas s/n) acolle o debate Escritores na blogosfera. Participarán Rubén Ruibal, Xerardo Menéndez e Manuel Bragado. Modera o acto Domingo Docampo. O mércores 14 de maio, de 18.00 h. a 19.15 h.

ANDEL | Para dicir abril

Cunha estrutura encabezada por poemas de Safo de Lesbos, a protagonista vai esmiuzando, nun xogo de intertextualidades, o que é a súa vida, marcada por un pasado de relacións imposibles de esquecer, dende a primeira infancia ata o momento presente. Vázquez Pintor, cunha linguaxe luminosa e unha poeticidade de imaxes que esixen do lector unha participación activa, explora algunha das vetas máis escuras do ser humano, a soidade, os grandes traumas, a dor en estado lacerante, para deixar constancia da catástrofe emocional que supón enfrontarse a vivencias límite. 

CONVERSAS | Xosé Ballesteros

Aínda que naceu co obxectivo de achegar aos máis pequenos os grandes clásicos da literatura infantil, dez anos despois Kalandraka publica en varios idiomas e os seus libros son lidos desde Latinoamérica até Xapón ou China. Xose Ballesteros é escritor, tradutor e director de Kalandraka Editora. Repasamos con el como foron os comezos e a traxectoria desta editorial pontevedresa que cambiou a forma de ver e de traballar a literatura infantil e xuvenil de noso país.

PREMIOS

Edicións Espiral Maior convoca en Galicia e Portugal o XVI Premio de Poesía Espiral Maior, un dos certames poéticos máis importantes dos que na actualidade teñen lugar no ámbito peninsular ibérico. Na actual convocatoria, o premio, patrocinado por Ámbito Cultural El Corte Inglés, pasa de estar dotado con 12.000 € a 15.000 €, converténdose así no premio mellor dotado economicamente de Galicia e nun dos mellores dotados, no que atinxe á poesía, do panorama ibérico e europeo. Poderán presentarse ao Premio libros escritos en galego e en portugués, inéditos e cun mínimo de 600 versos e o prazo de admisión dos mesmos rematará o 20 de xuño de 2008.

FIRMAS| Nacho Alonso

Segundo o último padrón municipal do Instituto Nacional de Estatística a poboación de Galicia diminuirá, na vindeira década, en máis de trinta mil habitantes. Outro dato significativo é que case o dez por cento dos habitantes serán maiores de 75 anos. Galicia, senón varían estas expectativas, será un país envellecido e, como advirte Xosé Manuel Sarille* en El Correo Gallego, está abocada a se “empequenecer”. Unha perda de habitantes, co conseguinte detrimento do número de falantes, implicaría que a lingua, a cultura, o país, esvaecerían e minguarían.

En curto

DAVID PINTOR EN MÉXICO

O ilustrador David Pintor foi seleccionado para a mostra internacional de ilustradores Sueños en papel. As ilustracions seleccionadas éstaran expostas no museo Zapopan de Mexico a partires do 29 de abril de 2008.

DICIONARIO DE FRASEOLOXÍA GALEGA

Xerais de Galicia saca do prelo, despois de tres anos de traballo, o Dicionario de fraseoloxía galega, preparado polas profesoras Carme López e Mª Rosario Soto, onde se recolle case dez mil frases feitas

LUGARES CON LENDA

A web máxica Galicia Encantada propón aos seus lectores o concurso Lugares con lenda, onde os participantes, co mapa de Google Maps, coa foto e con outros datos deben responder a diferentes preguntas

MADRID HOMENAXEA A WENCESLAO FERNÁNDEZ FLÓREZ

O Concello de Madrid dedica unha placa na casa onde viviu e morreu o xornalista e escritor coruñás Wenceslao Fernández Flórez. Ao acto asistiron o Ministro de Cultura e o Presidente da Deputación da Coruña entre outros persoeiros

UN ENSAIO SOBRE A CÁTIRA DE CELA GAÑADORA DO PREMIO ANAGRAMA

Gustavo Guerrero gañou por unanimidade o premio Anagrama de Ensaio cun traballo sobre A cátira de C.J. Cela. O traballo, titulado Historia de un encargo: “La catira” de Camilo José Cela. Literatura, ideología y diplomacía en tiempos de la Hispanidad será publicado pola editorial de Jorge Herralde

TEO E CARRAL REEDITAN UN LIBRO DE X.M. ÁLVAREZ BLÁZQUEZ

Os concellos de Teo e de Carral reeditaron o libro Berro en lembranza dos Herois de Carral, publicado no ano 1934 pola Federación de Mocedades Galeguistas de Pontevedra e de autoría de Xosé María Álvarez Blázquez

I PREMIO IRREVERENTES DE NOVELA

Luna de Papel, del escritor coruñés José Enrique Canabal, obtivo o primeiro Premio Irreverentes de Novela, dotado con 3.000 euros e a publicación da obra na colección de Narrativa de Ediciones Irreverentes

PALABRAS NA SOLAINA

As persoas que se hospeden nas casas rurais e hoteis do Baixo Miño terán acceso a unha escolma de libros de Xosé María Álvarez Blázquez. "Palabra na solaina", organizado pola Consellería de Cultura e Deporte, distribuirá libros deste autor nos establecementos turísticos

MARUJA PINO, PREGOEIRA DO CORPUS CHRISTI

A escritora Maruja Pino será a pregoeira das festas do Corpus Christi 2008 de Ponteareas, festas de interese turístico nacional que se celebrará os días 24 e 25 de maio

XORNADAS VIRTUAIS SOBRE CURROS ENRÍQUEZ

A AELG e as AS-PG convocan unhas Xornadas Virtuais sobre Manuel Curros Enríquez. Un curso de Formación a Distancia en liña para os docentes de Educación Primaria, Secundaria e Bacharelato. Poderán participar así mesmo as persoas que, sen ser docentes, teñan interese na figura deste escritor