índice

novas

axenda

andel

conversas

lectores

rapaces

reseñas

firmas

ligazóns

Antón Zapata García. Biografía dun poeta emigrado ao servizo da II República

Miro Villar

Laiovento

Xénero: Investigación

309 p. ; 19 €

A vida de Zapata entre a colonia galega non debeu ser fácil. Nacionalista Galego e independentista, antifranquista e aliadófilo, a sua rexa personalidade tivo de aturar moitos sensabores e inxurias. "Poeta das sans rebeldías", chamoulle o estudoso Alberto Vilanova na biografía que lle dedicou na sua voluminosa obra Los gallegos en la Argentina. E de corazón e espírito rebelde foi Zapata, loitador desde ben mozo da causa da liberdade. Liberdade da súa patria asoballada para a que arelou días máis ventureiros traballando a prol da sua cultura, como socio protector do Seminário de Estudos Galegos, e da sua conciencia nacional na Agrupazón Nazonalista Pondal, formada nos anos vinte polos mozos emigrantes galegos que albiscaban unha Galiza independente e dona de si. E liberdade da humanidade aferrollada pola ameaza do nazismo e do fascismo, que o levou a cantar un Hino a Stalingrado e dedicar un poema á destrución de Gernika.

[Xesús Torres Regueiro]

Escapado. Do Monte do Pindo ao exilio pasando pola Illa de San Simón

Luís Lamela García

Xerais

Xénero: Narrativa

264 p. ; 17 €

Escapado. Do Monte Pindo ao exilio pasando pola illa de San Simón de Luís Lamela García quere lanzar a mensaxe de que é moito máis importante recordar que comprender, por que a memoria sempre pode ser verdadeira, aínda que ás veces sexa falsa. Unha novela que quere ser unha crónica na que se mestura a vida e a morte, o pasado e o presente, a realidade e a ficción. Unha obra de lectura engaiolante que enlaza a historia e a memoria, e nas que as relacións temporais están, tamén, unidas por espazos reais: o monte do Pindo, Fisterra e a ría de Corcubión, a illa de San Simón, as frontes da guerra civil española, o exilio francés e americano, o desexado retorno ás raíces do Pindo... Un percorrido pola esperanza perdida e a traxedia dos vencidos dunha guerra civil, a de 1936, que cambiou drasticamente a vida de toda unha xeración ilusionada e apaixonada. Unha traxedia que, polo que a Teófilo Caamaño se refire, o protagonista principal da narración, aínda non terminou.

Skugga-Baldur

Sjón [Trad. de Elías Portela Fernández]

Rinoceronte

Xénero: Narrativa

116 p. ; 14 €

Un sinistro naufraxio trae a ledicia a unha vila do suroeste de Islandia, ó tempo que cambia a vida do xoven Fridrik B. Fridjónsson, un universitario bohemio residente en Copenhague, introducindo no seu destino o personaxe de Abba, a misteriosa rapaza con síndrome de Down e acusada de infanticidio que quedará baixo a súa tutela. Fridrik decide entón ficar no país natal e mudarse ó humilde eirado que lle deixaron seus pais na parroquia de Dalur. Alí chegará tamén pouco despois un novo párroco, o reverendo Baldur Skuggason, e aínda que as súas vidas non se han de cruzar demasiado, a figura do sacerdote será esencial para desvela-los misterios do seu fado.

Paralelamente a estes eventos, o desenvolvemento dunha cacería levará a trama a un nivel alegórico, abrindo un diálogo entre o cazador e o raposo, ou simplemente, entre home e natureza, cuxo desenlace restituirá a orde das cousas neste pequeno universo mítico “nas lindes do mundo habitable”.

Memorias dun ninguén

Carlos Mella

Galaxia

Xénero: Narrativa

172 p. ; 14 €

Unha biografía novelada que tamén é un conto longo escrito con esa fina ironía que todo o relativiza á vez que o fai esencial.

Contar o pasado para traelo ao presente é o obxectivo de Carlos Mella en Memorias dun ninguén. Desde a senectude o protagonista percorre o fío do tempo vivido: a Guerra Civil vista a través dos ollos dun neno, a mocidade durante o franquismo, a fartura da ilusión e as ambicións logradas... a inanidade final.

O autor de Non somos inocentes volve contemplar os tempos idos porque, fóra dese escenario dá brincos a vida, os actores non somos ninguén.

Lóstregos

Xosé Neira Vilas

Xerais

Xénero: Ensaio

224 p. ; 17 €

Aparecen neste libro de Xosé Neira Vilas cen textos, outros tantos lostregueos escintilando no espazo e no tempo. Cen variados temas que informan, analizan ou denuncian cuestións que atinxen ao mundo que nos arrodea ou acontecementos pretéritos que dalgún xeito inciden nas nosas vidas. Así, a Amazonia en perigo, a fuxida de cerebros, os dereitos indíxenas, o fogar cubano de Hemingway, o cambio climático, os galegos no canal de Panamá, o centenario de Laxeiro, a defensa da lingua galega, a prensa dos emigrantes, o problema da auga, os biocombustibles, os noventa anos de Mandela… Todo tratado con rigor documental e cunha prosa ben traballada, áxil, precisa, modelo de xornalismo, no que alternan a crónica, a memoria e o afán de expresar en poucas palabras todo o que o autor nos vai contando.

Santiago, 1909

Henrique Alvarellos Casas

Alvarellos

Xénero: Investigación

142 p. ; 28,50 €

No verán de 1909, Santiago viviu un acontecemento sen precedentes na historia da cidade e de Galicia: a montaxe da Exposición Rexional Galega.

Un certame –hoxe esquecido– que acolleu a preto de 600 instalacións en ubicadas en once grandes e singulares pavillóns, e onde foron expostas máis de 10.000 pezas de arqueoloxía, obras de arte e historia. A Expo de 1909 marcou época. Era tamén o primeiro Ano Santo do século e polo recinto (instalado ao suroeste da Alameda e no colexio San Clemente) pasaron en cinco meses máis de 53.000 persoas, o dobre da poboación de Santiago naquel intre.

Cen anos despois, aquela peculiar simbiose de arte e industria ben merece un rescate. O autor –o editor e xornalista Henrique Alvarellos Casas– viaxa á Galicia daqueles días para reconstruír a crónica da Exposición Rexional e recuperar do esquecemento preto de setenta fotografías e ilustracións únicas.

Camiñantes. Un itinerario filosófico

Marcelino Agís Villaverde

Galaxia

Xénero: Ensaio

250 p. ; 20 €

Escrito coa clara conciencia do xardineiro que aspira a obter pequenos froitos, co mesmo valor do artesanal, este libro camiña cara ao que dende as orixes da filosofía foi o fin máis elevado para o home: a felicidade. Unha felicidade sostíbel, construída cos retallos fuxidíos dos momentos de dita.

Velaquí un libro que fala do home actual e do seu mundo. Da vida como camiño con encrucilladas. Encrucilladas que levan a filosofía actual a buscar na linguaxe unha nova forma de supervivencia. Unha modalidade de encontro no inestable conflito de interpretacións dos múltiples discursos sobre a realidade.

Camiñantes aborda os problemas derivados da globalización, a violencia e a soidade do home contemporáneo.

Rosalía de Castro. A luz da ousadía

Diego Pardo Amado

Laiovento

Xénero: Ensaio

264 p. ; 16,50 €

Rosalía de Castro. A luz da ousadía abre as portas ao coñecemento dun debate sobre a identidade, condición e capacidades das mulleres, central no século XIX, e que demostra até que ponto era importante, para o sistema e a súa estabilidade, truncar calquer arela de mudanza psicosocial e moral e reforzar, en troca, todos os mecanismos de suxeición da muller ao home, aos fillos, á casa e á moral conservadora reinante. É, o presente libro, fillo dunha leitura cordial, desprexuiciada e moi atenta da obra íntegra da nosa autora, tanto en verso como en prosa, acto necesario para unha comprensión cabal da súa cosmovisión, da súa ideoloxía, da aspiración á instauración dunha nova moral social e da consecución dun novo locus para as mulleres. Fica ela, Rosalía, liberada do esperpento (dos espellos cóncavos ou convexos que tantas veces a aqueloutraron), retratada conforme autoriza a súa elocuencia, a forza directa dos seus textos, moi ricos en significados explícitos, mais tamén en significados implícitos ou encubertos.

[María Pilar García Negro].

Nas ondas de Galicia. Noticias, opinións, estampas e personaxes

Modesto Hermida

Ir Indo

Xénero: Crónica

268 p. ; 18 €

Hai mensaxes do medio radiofónico que ben pagaría a pena conservar e divulgar por escrito. Entre outras, podemos considerar as correspondentes ós textos, en boa medida literarios, que Modesto Hermida compendia no volume Nas ondas de Galicia, unha iniciativa sen precedentes en lingua Galega.

Mercurio

Emilio Alonso

Xerais

Xénero: Narrativa

104 p. ; 15,80 €

Mercurio é un thriller ambientado en Lugo e protagonizado por un ex-policía que exerce como criminólogo, mediático e famoso grazas á televisión. Por esta novela de Emilio Alonso, desfilan tamén un morto, policías, forenses, historias de amor e, sobre todo, moitas anécdotas que o protagonista vai contando ao longo da narración. O Lugo onde que a historia se desenvolve é unha cidade actual, con importantes referentes do pasado, pero no que pervive un miserable ambiente moral, social e cultural, o que se respiraba na cidade na década dos sesenta e primeiros setenta, prevalecendo vellos hábitos e rutinas que converten a Mercurio nunha hábil mestura entre novela policíaca e costumista. O humor e a retranca do protagonista, posuidor dunha dobre moral, e a homenaxe sentimental que o autor fai á súa cidade, converten esta novela, pola que pasean todo tipo de personaxes, nunha lectura agradable, amena e divertida.