índice

novas

axenda

andel

conversas

lectores

rapaces

reseñas

firmas

ligazóns

O frío azul

Ramón Caride Ogando

Sotelo Blanco Edicións

Xénero: Narrativa

128 p. ; 10,5 €

Ano 1517. Nunha escura invernía, desafiando unha mesta nevarada, un viaxeiro chega ao mosteiro de Oseira. Acarrexa unha misteriosa bagaxe, a fonda tristeza do seu corazón mancado e, sobre todo, a ansia por saber a calquera prezo a razón da súa insólita desventura. Pouco a pouco, paseniño, a monotonía tépeda da pedra e a rutina dos ritmos monacais van minando a súa afouteza, ata que, finalmente, a impensada confesión do amo do mosteiro o leve sen remisión polos camiños máis abraiantes. Sen acougo, do val estremeiro do Xálima a Portugal, de Toledo ao Courel, o autor tece un sorprendente relato que se vai apoderando do lector.

Un relato de guerras e de nigromancia, de panteísmo e de represión, de poder asoballante e de resistencia secular. Un relato sorprendente que oscila, a cada paso, entre a quentura do amor e a friaxe da morte, entre as historias reais que sobrecollen e as lendas que perviven, agochadas, nos curutos das serras máis afastadas.

Ramón Caride debuxa con mestría paisaxes, feitos e soños en O frío azul (Premio Manuel Lueiro Rey de novela Curta 2007), para facernos vivir, na compaña dos seus protagonistas, unha viaxe inesquencíbel polo tempo e polo espazo que nos permite albiscar os abismos máis fondos, os que cada un de nós levamos dentro.

Acendede as almenaras

Bernardino Graña

Xerais de Galicia

Xénero: Poesía

72 p. ; 12,5 €

Acendede as almenaras é un poemario co que Bernardino Graña grava un testemuño de emoción e vibración ante a vida e as persoas, un testemuño a través do que lanza ao aire unha onda a favor das ataduras do amor e da amizade. Libro recompilatorio pero inédito, que reúne composicións escritas desde os anos 80 até hoxe, Acendede as almenaras organiza os textos en poemas amor, amigo e escarnio, seguindo a nosa tradición literaria medieval, para dar conta da importancia das relacións vitais e persoais, da forza do cariño, da tenrura e do apego que son, en definitiva, os fíos invisibles que nos propulsan ao longo da vida.

Quero ser presidente

Xosé Rúas Araujo

Alvarellos Editora

Xénero: Ensaio

198 p. ; 18,9 €

Todo sobre as campañas electorais, os candidatos e as súas estratexias.

Xosé Rúas utiliza neste libro a súa dilatada traxectoria como xornalista, columnista, profesor, investigador universitario e asesor de comunicación política, para achegarnos, nun ton didáctico e ameno, enriquecido por constantes anécdotas e notas de humor, as claves teóricas e técnicas da propaganda e do marketing electoral. Escrito por un experto teórico e profesional galego de referencia, Quero ser presidente. Claves da comunicación electoral ha marcar un antes e un despois nas estratexias electorais empregadas no noso país.

Resultará imprescindible e mesmo revelador para calquera especialista ou curioso por coñecer un pouco máis o apaixonante mundo que se agocha detrás de cada campaña electoral.

Xosé María Álvarez Blázquez na súa canle secreta

Henrique Rabuñal

Laiovento

Xénero: Ensaio

87 p. ; 11 €

Henrique Rabuñal ofrécenos unha viaxe intensa pola biografía intelectual do polígrafo tudense Xosé María Álvarez Blázquez (1915-1985), un amante da liberdade e da dignidade que fixo da palabra oral e escrita a súa fermosa arma de intervención. Xosé María foi mestre da República, libreiro, editor, escritor, profesor, articulista, arqueólogo, bibliófilo, conversador, conferencista, académico, galeguista, cronista de Vigo, ávido coleccionista, pai, voz da radio e erudito en moitos saberes.

A presente obra retrata a súa etapa de formación en Tui e Pontevedra, os crueis desterro e exilio interior, os seus proxectos Monterrey e Castrelos asentado en Vigo, a súa obra de creación literaria e en definitiva a súa grandiosa presenza no século XX galego. Nesa medida trátase dunha homenaxe a quen ten un lugar entre as grandes personalidades das nosas letras e da nosa patria.

O xiro postal

Oumane Sembène [Trad. Isabel García Fernández]

Rinoceronte

Xénero: Narrativa

92 p. ; 14 €

A chegada dun xiro postal altera a rutina dun barrio pobre do Dakar dos anos 60. Toda a veciñanza espera atopar neses cartos a saída a unha vida miserenta, chea de débedas e privacións.

A través das peripecias polas que pasa o protagonista para cobrar o xiro, Ousmane Sembène ofrécenos un retrato cruel pero lúcido do Senegal inmediatamente posterior á Independencia, no que se manteñen as estruturas sociais e económicas da época colonial.

Levado ao cine polo propio autor (Mandabi, 1968), O xiro postal denuncia a hipocrisía, a corrupción e o parasitismo dunha sociedade que, porén, ten nas súas mans a posibilidade de tentar cambiar.

Valle-Inclán inédito

Ramón del Valle-Inclán

Espasa-Calpe

Xénero: Epistolario

348 p. ; 24,9 €

Este libro reúne 4 manuscritos y 144 cartas inéditas de Ramón del Valle-Inclán, que forman parte del ArchivoValle-Inclán Alsina. La edición corre a cargo de su nieto Joaquín del Valle-Inclán, autor también de uno de los prólogos. Las cartas abarcan desde 1895 hasta los años cuarenta del siglo XX. Cartas a y de miembros de su familia, políticos, amigos, escritores comentando los más diversos asuntos. 

Saudade. Verba Galega nas Américas

V.V.A.A.

Centro Ramón Piñeiro

Xénero: Recuperación da memória histórica

p. ; 12 €

A primeira empresa sociocultural creada polos galeguistas de México foi Saudade. Verba galega das Américas, que sae á rúa en 1942 coincidindo co "Día de Galiza". Tivo como editor responsible nos dous primeiros números o arquitecto Xosé Caridad Mateo, responsabilidade que traspasa a Ramiro Illa Couto no terceiro número, e correrá a cargo de Ramón Cabanillas Álvarez a edición dos números catro e cinco (...). A redacción integrábana Florencio Delgado Gurriarán, Carlos Velo, Ramiro Illa Couto e Ramón Cabanillas Álvarez, colaborando estreitamente con eles Marcial Fernández, Manuel Porteiro Viñas e Bieito Búa Rivas (...)

Un dos propósitos que perseguía a publicación era a incorporación da colonia galega, a dos vellos residentes, á loita pola defensa da `personalidade cultural e política de Galicia. Coincidindo co último número de Saudade publícase, tamén con motivo do "Día de Galiza", o Cancioneiro da Loita Galega. Edición da que se sabe foi Saudade o poeta Valdeorrés Florencio Delgado Gurriarán.

Saudade non volve aparecer ata 1952, manténdose na nova xeira ata agosto de 1953. Nesta súa segunda etapa incorpora colaboracións de galeguistas do interior, e na dirección está agora o socialista Marcial Fernández, incorporándose Luis Soto á redacción. Segundo R. Gurriarán "esta empresa unitaria foi o xermolo de imporrtantes accións culturais que logo virían, como o Padroado de Vieiros. Unha vez máis, o último número de Saudade coincide con outra sonada actividade galeguista. Nesta volta, coa constitución do Padroado da Cultura Galega en México, que se leva a cabo no hotel Majestic de México D.F., o 29 de xuño de 1953. A primeira direciva estivo presidida polo violinista Xesús Dopico Barreiro, con Roxelio Rodríguez de Bretaña como secretario xeral. (María Xosé Rodríguez Galdo)

A pega rabilonga. Os ruíns

Xosé María Álvarez Blázquez

Galaxia

Xénero: Narrativa

168 p. ; 12 €

Publícase neste volume toda a narrativa breve escrita en galego por Xosé María Álvarez Blázquez.

Dous libros de contos: Os ruíns, narracións que datan do ano 1935, case no punto do estoupido da Guerra Civil, e A pega rabilonga e outras historias de tesouros, que viu a luz en 1971 en Edicións Castrelos. Estas narracións comparten, malia os anos que as separan, riqueza descritiva, viveza nos diálogos, humor sutil e unha querenza do autor polos personaxes humildes e perdedores fronte á crítica aberta aos insensibles e aos poderosos.

Matádeo mañá

Elixio Rodríguez

Xerais de Galicia

Xénero: Ensaio

368 p. ; 19,1 €

Matádeo mañá é un testemuño autobiográfico excepcional; a reconstrución do emocionante periplo vital deste aviador galeguista durante a Guerra Civil: un tempo ralentizado polo cárcere, o terror dos paseos, a súa fuxida cara ao bando republicano, os xuízos sumarísimos que sufriu e o seu traballo como secretario da Solidaridade Antifeixista Galega xunto con Castelao. Tamén é unha memoria lúcida do exilio galego en México, onde Elixio Rodríguez foi un dos promotores da emisión radiofónica A hora de Galicia e do Padroado da Cultura Galega e colaborador teimudo da revista Vieiros que dirixían Luís Soto e Carlos Velo, «xérmolo e vangarda política dun anovado nacionalismo galego», en palabras do historiador Elixio Villaverde, autor do limiar destas memorias apaixonantes. Este é un relato trepidante de feitos históricos, políticos, diplomáticos e bélicos, que constitúe unha grande achega á nosa memoria colectiva. Esta segunda edición destas memorias, consideradas como un dos cumes do xénero autobiográfico en lingua galega, foi revisada e corrixida polo autor antes do seu pasamento, á que se lle engadiu un índice onomástico e un adral de Aser Álvarez.

O de Millarengo

Beatriz Martínez de Millarengo

Ediciós do Castro

Xénero: Narrativa

506 p. ; 18 €

No mes de xaneiro de 1809, un artilleiro de Napoleón queda ferido nunha emboscada tendida ao exército francés por un grupo de guerrilleiros galegos preto de Pontedeume. Os seus compañeiros, créndoo morto, van deixalo abandonado na súa fuga, logo de sacarlle o capote, as botas e as armas...
Unha muller atópao inconsciente, sente pena por el e levao á súa casa, onde o agocha para non dar lugar a que crean que é unha traidora afrancesada. O seu home é guerrilleiro e o seu fillo soldado do exército galego, o que vai permitir á autora relatar o acontecido en Galiza na Guerra da Independencia, hai dous séculos.