índice

novas

axenda

andel

conversas

lectores

rapaces

reseñas

firmas

ligazóns

Arredor do mundo

Xosé Neira Vilas

Xerais de Galicia

Xénero: Artigos

240 p. ; 16,50 €

O mundo en que vivimos é “ancho e alleo”, como alguén dixo, mais tamén é estreito e noso, segundo o ollemos. Cada vez máis abarcable e globalizado e ao mesmo tempo máis complexo e dividido. Este planeta que nos leva e nos trae na súa andaina de rotación e translación está poboado de enigmas e sucesos, maiores ou menores, que chaman a nosa atención. Xosé Neira Vilas detense neste cento de artigos noutros tantos temas e acontecementos que ocorren no mundo que tripamos, neste chisco do mundo que se chama Galicia, conseguindo engaiolar ao lector cunha prosa purísima e ben traballada, tan característica dun clásico vivo da nosa literatura.

Os dominios de Gólgur

John Alonso

Edicións Morgante

Xénero: Narrativa

197 p. ; 17,10 €

Novela inserida no formato da ucronía do xénero fantástico. Está ambientada nunha Galicia medieval na que non existe o cristianismo e inclúe numerosos xiros humorísticos.

Na Idade Media, Galicia chámase Miranda, e é un ducado independiente do reino de Asturias; aquí nunca se chegou a implantar o cristianimo. Os seus habitantes cren non demo chamado Gólgur pero pouco máis. Neste escenario, Dinís, o duque de Miranda decide encargar unha misión a tres aventureiros de fortuna. A cuadrilla aventureira percorre, con identidades falsas, os condados de Muros e o marquesado de Ribeira.

John Alonso Oreiro (A Coruña, 1967) intérnase no seu primeiro título nos camiños da narrativa fantástica botando mán dos recursos que lle son especialmente caros: o humor e a sátira social.

Made in Galiza

Séchu Sende

Editorial Galaxia

Xénero: Narrativa

156 p. ; 12 €

Un libro que procura a fórmula da liberdade na punta da lingua. Un libro de historias orixinais como cada unha das persoas e dos pobos que coñecemos ou soñamos: únicos. Un libro que conta contigo para ler o mundo con palabras que tamén son túas. Un libro difícil de soñar, como a vida mesma. Contraditorio, inocente, emocionante, creativo, rebelde: un libro Made in Galiza.

A vinganza da mantis

Paloma Calvo Varela

Espiral Maior

Xénero: Narrativa

116 p. ; 12 €

Primeiro libro da autora, composto por once relatos que reflicten a vida da mocidade actual. Un abano de temas que van desde a droga ao paro, desde a familia ao mundo negro, desde o desexo aos abismo existenciais.

A xeografía física de Galicia

Ángel Miramontes Carballada

Lóstrego

Xénero: Divulgación

94 p. ; 5,95 €

Nesta obra preséntase unha aproximación ao medio físico galego.
A través dos factores ambientais máis relevantes faise un percorrido desde a orixe de Galicia ata o estado de conservación actual, para poder valorar a extraordinaria biodiversidade do país.

O muiñeiro ouveador

Arto Paasilinna

Rinoceronte

Xénero: Narrativa

270 p. ; 18 €

Cando Gunnar Huttunen aparece nunha vila perdida de Laponia e decide mercar e por en funcionamiento o vello muíño á beira do río Kemi, os labregos da veciñanza rinse del, aínda que axiña se rendirán á evidencia do éxito da empresa.

"Unha novela de aventuras cun ritmo incesante... A aparición deslumbrante dun novo tipo de heroe: o rebelde ecoloxista-maníaco-depresivo e o seu curioso ouveo no fondo do bosque."  (Dominique Guión - Le Figaro)

De provincia a nación. Historia do galeguismo político

Justo Beramendi

Xerais de Galicia

Xénero: Historia

1248 p. ; 50 €

De Provincia a nación. Historia do galeguismo político é unha investigación sistemática da natureza e evolución dos movementos sociopolíticos de reivindicación de Galicia como suxeito político de seu dende as súas primeiras manifestacións individuais no século XVIII até a actualidade. O tratamento do provincialismo, do rexurdimento e do rexionalismo do século XIX, e máis aínda do nacionalismo galego do século XX, faise cunha profundidade sen precedentes. Para a análise acaída das diferentes dimensións –a ideolóxica, a social, a organizativa, a electoral– e das súas interrelacións, o autor incorpora conceptos e modelos analíticos propios que implican unha notable innovación metodolóxica no eido do estudo do nacionalismo. As maiores novidades neste sentido son a reconstrución das estruturas das ideoloxías, a caracterización das bases sociais e a técnica aplicada para desvelar e cuantificar a fraude electoral na Segunda República. Ademais, en paralelo coa historia central, vai trazando a da cuestión nacional en España, o que permite ter en conta a incidencia de factores extragalegos e comparar o galeguismo político cos seus análogos doutros territorios do Estado español. Isto unido á consideración da natureza e dos problemas maiores da sociedade galega de cada época, dá as claves para unha explicación convincente das causas do nacemento, persistencia, posibilidades e limitacións do nacionalismo galego. Xa que logo, este libro é unha contribución decisiva para coñecer e entender, por que Galicia ten hoxe unha personalidade política irreversiblemente diferenciada. 

A odisea

Homero

Toxosoutos

Xénero: Literatura clásica

353 p. ; 10 €

Este clásico e claro referente da literatura universal que se orixina moitos séculos antes da nosa era, é unha epopea que, ao igual que todas, ten a finalidade de ser declamada ante un público. A súa autoría é atribuída ao poeta e rapsoda grego Homero. O texto que o lector ten entre as mans, conservado e estandarizado dende tempo inmemorial para o noso goce, relata as innumerables peripecias, desventuras e andanzas que sofre o protagonista deste poema épico, Ulises, para regresar á súa patria, Ítaca, despois de combater na guerra de Troia.

Conversas con Darío Xohan Cabana

José Luis Calvo Vidal e Yago Rodríguez Yáñez

Xerais de Galicia

Xénero: Conversas

296 p. ; 17 €

Pertence Darío Xohán Cabana á “Grande Xeración” de Manuel María e Méndez Ferrín, mais tamén a aquela estirpe clásica de escritores como Dante, Petrarca ou Boccaccio que reviviron os ideais grecolatinos. Neste libro, J.Luis Calvo e Yago Rodríguez Yáñez recollen longas horas de conversas que mantiveron en Romeán cunha das figuras da literatura galega contemporánea que posuíndo múltiples vertentes acrisola cunha solidez e experiencia dificilmente igualables os achados clásicos coas novas tendencias. “Vida e Literatura”, “Poesía”, “Narrativa” e “Traducion” son algúns dos temas centrais abordados nunha obra que ofrece un acaído retrato humano, literario e político deste escritor de elegante apostura e de compromiso a ultranza coa lingua e cultura galegas e coa loita contra as desigualdes sociais. Unha “Cronoloxía” e “Bibliografía”, ademais dun apartado “Fotobiográfico” completan un volume que constitúe unha formidable achega para un mellor coñecemento dun dos máis recentes membros da Academia Galega.

Pintor por Italia

Xavier Correa Corredoira

Baía Edicións

Xénero: Viaxes

144 p. ; 21 €

Pintor por Italia é un diario resultado de dúas viaxes realizadas por Correa Corredoira e que nos transmite visións distintas para achegarnos a mesma identidade, Italia, desde dous estados de ánimo que marcan perfectamente o percorrido realizado dunha forma libre e aberta para deixarse atrapar pola súa arte, polas súas xentes, pola súa gastronomía, en definitiva, por unha cultura mediterránea que non nos é allea nin sequera tan diferente vista a través dos ollos dun singular representante deste finis terrae que nos caracteriza e define como pobo atlántico.
Correa Corredoira achéganos Italia desde dúas perspectivas: a escrita, máis inesperada nun artista plástico, a través duns textos ben traballados e que, en ocasións, se transforman en auténticas visións e presentacións poéticas, e a plástica, na que se recoñece máis o singular viaxeiro, e a través da cal nos dá a coñecer e propón un (re)coñecemento da arte que mana por todas as rúas e cidades desa Italia, que no seu lapis e pincel, se nos transforma nunha máxica visión de cores.
Con todo, Pintor por Italia é máis que un diario de viaxes e un catálogo de imaxes, é a simple –coa súa dificultade– mostra da personalidade dun dos máximos representantes da expresión plástica galega actual, e que agora se nos descobre tamén como un magnífico escritor.